ग्रामीण पाणी पुरवठा पाणीटंचाईचा आढावा 

टंचाईची कामे वेळेत पूर्ण करा

                       --- पालकमंत्री अशोक चव्हाण

नांदेड, दि. 24:- जिल्ह्यातील टंचाईची कामे वेळेत पूर्ण करावीत. तसेचे जिल्हा परिषद, पंचायत समिती स्तरावर नियंत्रण कक्ष स्थापन करून पाणीटंचाईबाबत नागरिकांच्या तक्रारीची नोंद घेण्यात यावी असे, निर्देश राज्याचे सार्वजनिक बांधकाम मंत्री तथा नांदेड जिल्हा पालकमंत्री अशोक चव्हाण यांच्या अध्यक्षतेखाली आज जिल्हाधिकारी कार्यालयाच्या निजी कक्षात आयोजित पाणी टंचाई आढावा बैठकीत त्यांनी दिले.  

या बैठकीस जिल्हा परिषदेचे अध्यक्ष मंगाराणी अंबुलगेकर, माजी राज्यमंत्री डी पी सावंत, जिल्हा परिषदेचे प्रभारी मुख्य कार्यकारी अधिकारी शरद कुलकर्णी, समाज कल्याण सभापती रामराव नाईक, कृषी सभापती बाळासाहेब रावणगावकर, महावितरणचे अधीक्षक अभियंता संतोष वाहने, शिक्षण व बांधकाम सभापती संजय बेळगे, महिला व बालकल्याण सभापती श्रीमती सुशिलाताई बेटमोगरेकर यांच्यासह विभाग प्रमुखांची यावेळी उपस्थित होते.

पालकमंत्री अशोक चव्हाण म्हणाले, पाणीपुरवठा योजनांचे कामे कंत्राटदारांनी अर्धवट सोडलेले कामे पूर्ण करुन घेण्यात यावीत. जिल्हाधिकाऱ्यांच्या स्तरावर जिल्हा परिषदेचे मुख्य कार्यकारी अधिकारी आणि जिल्हाधिकारी यांनी सदरचा प्रश्न मार्गी लावावा. भुजल सर्वेक्षणाचे काम बारा दिवसात भुजल सर्वेक्षण व विकास यंत्रणेने तात्काळ करावे. देगलूर, मुखेड येथे पाणीटंचाई गावामध्ये पाण्याचा प्रश्न निर्माण होत असेल, तर त्यावर उपाययोजना तात्काळ करण्यात यावीत.

पाणी टंचाई 2019-2020 निवारण कार्यक्रमांतर्गत घेतलेल्या उपाययोजनांचा व खर्चाचा आढावा घेतला. तसेच नांदेड जिल्हा ग्रामीण पाणी टंचाई कार्यक्रम 2019, विहीर अधिग्रहण टँकरद्वारे पाणीपुरवठा करणे,नळ योजना विशेष दुरुस्ती, तात्पुरती पूरक नळ योजना, सार्वजनिक विहीर खोल करणे, गाळ काढणे उन्हाळ्यात नागरिकांना पाणी उपलब्ध करून देण्याबाबत मौलिक सूचना पालकमंत्री अशोक चव्हाण यांनी दिल्या.

पाणी, कर्जाबाबतचे ग्रामपंचायतींचे जलसंधारणाचा प्रस्ताव शासनाकडे तात्काळ पाठविण्यात यावा. ग्रामपंचायतीमध्ये व्हिडीओ कॉन्फरन्स रूम तयार करण्यात यावीत. जिल्ह्यातील नगरपालिकेला आवश्यक आसलेल्या निधी माहिती घेवून मागणी करण्याबाबतही सुचना पालकमंत्री अशोक चव्हाण यांनी यावेळी दिल्या.

मनरेगाची कामे सोशल डिस्टन्स ठेवून करण्यात यावी. तसेच मनरेगाची कामे अधिकाधिक वाढवण्याबाबतही सूचना पालकमंत्री अशोक चव्हाण यावेळी देण्यात आली. जिल्ह्यातील सर्व उपविभागीय अधिकारी, तहसीलदार, गटविकास अधिकारी यांच्याशी व्हिडीओ कॉन्फरसिंगद्वारे पाणी टंचाईबाबतचा आढावा घेतला.

0000 

रास्तभाव दुकानदारांविरुद्ध

प्राप्त तक्रारी निकाली काढण्यासाठी

तालुकानिहाय नोडल अधिकाऱ्यांची नियुक्ती

नांदेड, दि. 24 (जिमाका) :- जिल्‍हयात सर्वत्र अन्‍न धान्‍य वितरण करण्‍यात येत असून विविध योजनांचे निकष, अन्‍नधान्‍य परिमाण, दर यामध्‍ये शिधापत्रिकाधारक यांचा संभ्रम झाल्‍याने रास्‍त भाव दुकानदारांविरूध्‍द मोठ्या प्रमाणात तक्रारी व्‍हॉटसअप, ई-मेल, दुरध्‍वनी व लेखी स्‍वरूपात जिल्‍हा प्रशासनाकडे प्राप्‍त होत आहेत. या तक्रारी निकाली काढण्‍याच्‍यादृष्‍टीने तालुकानिहाय नोडल अधिकारी व सहायक नोडल अधिकारी यांची नियुक्‍ती जिल्हाधिकारी डॉ. विपीन इटनकर यांनी केली आहे.  

राज्‍य शासनाने कोरोना विषाणूचा (कोव्हिड 19) प्रादुर्भाव रोखण्‍यासाठी राज्‍यात साथरोग प्रतिबंधात्‍मक कायदा 1897 दि. 13 मार्च 2020 पासून लागू करुन खंड 2, 3 व 4 मधील तरतुदीनुसार दिनांक 14 मार्च 2020 अधिसुचना निर्गमित झाल्यानंतर राज्‍यात लॉकडाऊन जाहीर केले आहे.

सार्वजनिक वितरण व्‍यवस्‍थेंतर्गत पात्र लाभार्थ्‍यांना विविध योजनेमार्फत अन्‍नधान्‍य पुरविण्‍याचे जाहीर केले आहे. त्‍यामध्ये एप्रिल ते जून 2020 यामध्‍ये अंत्‍योदय, प्राधान्य कुटुंब योजनेंतर्गत पात्र लाभार्थ्‍यांना त्‍यांचे नियमीतचे धान्‍य वाटप झाल्‍यानंतर प्रधानमंत्री गरीब कल्‍याण अन्‍न योजनेंतर्गत याच लाभार्थ्‍यांना प्रति व्‍यक्‍ती 5 किलो तांदुळ मोफत देण्‍यात येत आहे. तसेच नियमीत एपीएल शेतकरी योजनेंतर्गत पात्र लाभार्थी यांना प्रती व्‍यक्‍ती 2 किलो तांदुळ दर 3 रुपये प्रति किलो व 3 किलो गहू दर 2 रुपये प्रति किलो प्रमाणे वितरीत करण्‍यात येत आहे.  तसेच ज्‍या शिधापत्रिकाधारक राष्‍ट्रीय अन्‍न सुरक्षा योजनेंतर्गत समाविष्ट होऊ न शकलेल्‍या, शेतकरी योजनेंतर्गत सवलतीच्‍या दराने लाभ मिळत नसलेल्‍या तसेच ज्‍यांचे वार्षिक कौटुंबीक उत्पन्‍न 1 लाखाच्‍या आत आहे, ज्‍यांची संगणकीय प्रणालीमध्‍ये नोंद झाली नाही अशा पात्र लाभार्थ्‍यांना मे व जुन 2020 या कालावधीत गहू 8 रुपये प्रति किलो व तांदुळे 12 रुपये प्रति किलो प्रतिमहा प्रति व्‍यक्‍ती 3 किलो गहू व 2 किलो तांदूळ या प्रमाणे वितरीत करण्‍यात येणार आहे.

जिल्‍हयात रास्‍तभाव दुकानदारांविरूध्‍द प्राप्त होणाऱ्या तक्रारी निकाली काढण्‍यासाठी पुढीलप्रमाणे तालुकानिहाय नोडल अधिकारी व सहायक नोडल अधिकारी यांची नियुक्‍ती करण्‍यात आली आहे. यामध्ये तालुका नोडल अधिकारी, सहा.नोडल अधिकारी यांचे नाव व मोबाईल क्रमांक कार्यालयाचा दुरध्वनी क्रमांक पुढीलप्रमाणे आहे.

नांदेड तालुका- तहसिलदार अरून जऱ्हाड 9511774349, सारंग चव्हाण ना.त.पुरवठा 9822232545, 02462-236769. अर्धापूर-तहसिलदार सुजीत नरहरे 8275273829, जाधव ना.त. पुरवठा 9823271459 02462-272167. कंधार-तहसिलदार सखाराम मांडवगडे 9011925584, ताडेवार ना. त. पुरवठा 9822638671, 02466-223424. लोहा- तहसिलदार व्ही. एम. परळीकर 9049286856, राम बोरगावकर ना.त.पुरवठा 9404465313, 02466-242460. भोकर- तहसिलदार भरत सुर्यवंशी 9623398559, के. व्हि. मस्के ना.त.पुरवठा 8390247049, 02467-222622. मुदखेड-तहसिलदार दिनेश झांपले 9422965456, एस. जी. जोगदंड ना.त.पुरवठा 8669064978, 02462-275551. धर्माबाद-तहसिलदार शिंदे डी. एन. 9422611487, एस. एन. हांदेश्वादर ना. त. पुरवठा 9423439557, 02465-245200. उमरी- तहसिलदार एम. एन. बोथीकर 9921844511, राजेश लांडगे ना.तह. 9049945378, 02467-244202. देगलूर- तहसिलदार अरविंद बोळंगे 7776889999, वसंत नरवाडे ना.त.पुरवठा 9421913691, 02463-255033. मुखेड- तहसिलदार काशिनाथ पाटील 9422911933, आर. आर. पदमवार नरवाडे ना.त.पुरवठा 8805889485, 02461-222522. बिलोली- तहसिलदार राजपुत विक्रम महाजन 9922317071, उत्तम निलावार ना.त.पुरवठा 8208290063, 02465-223322. नायगाव- तहसिलदार श्रीमती सुरेखा नांदे 7775034666, एन. एस. भोसीकर ना.त.पुरवठा 9545929394, 02465-203592. किनवट- तहसिलदार नरेंद्र तबाजी देशमुख 7588560342, श्री. लोखंडे ना.त.पुरवठा 9421759608, 02469-222008. माहूर- तहसिलदार सिध्देश्वर वरणगावकर 9421490400, 8668676787, गोविंदवार ना.त.पुरवठा 9423352436 02460-268521, हदगाव- तहसिलदार जीवराज डापकर 7350531111, विजय येरावाड ना.त.पुरवठा 9545009009, 02468-222328. हिमायतनगर- तहसिलदार जाधव एन. बी. 9552972949, अनिल तामसकर ना.त.पुरवठा 9403460422, 02468-244428 याप्रमाणे आहेत. 

नोडल अधिकाऱ्यांनी कार्यालयाकडून ई-मेल, दुरध्‍वनी, व्‍हॉटसअप व पत्राद्वारे तसेच नागरिकांकडून प्राप्‍त झालेल्‍या तक्रारीबाबत स्‍वत: किंवा आपले यंत्रेणेमार्फत 24 तासाच्या आत वस्‍तुस्थितीदर्शक चौकशी करावी. त्यानंतर केलेल्‍या कार्यवाहीचा अहवाल जिल्हाधिकारी कार्यालयाकडे सादर करावा. ज्‍या तक्रारीमध्‍ये तथ्‍य दिसुन येत नाही, त्‍या तक्रारी त्‍वरीत निकाली काढून जिल्हाधिकारी कार्यालयास तसे अवगत करावे. तक्रारदारांने चुकीची तक्रार केल्‍याचे चौकशीअंती निदर्शनास आल्‍यास तक्रारदाराविरूध्‍द नियमानुसार फौजदारी स्‍वरुपाची व योग्‍य ती कार्यवाही करावी. या परिपत्रकात दिलेल्‍या सुचनांचे काटेकोरपणे पालन करण्‍यात यावे. यात हलगर्जीपणा, टाळाटाळ केल्‍याचे निर्दशनास आल्‍यास संबंधितांविरुध्‍द नियमानुसार कार्यवाही करण्‍यात येईल, असे परित्रकात जिल्हाधिकारी डॉ. विपीन इटनकर यांनी नमूद केले आहे.  

000000

अन्न-आस्थापना दुकानांच्या केल्या 298 तपासण्या

सुचनांचे पालन करण्याचे अन्न औषध प्रशासनचे आवाहन   

नांदेड, दि. 24 (जिमाका) :- कोरोना विषाणुचा प्रादुर्भाव रोखण्यासाठी अन्न आस्थापना दुकानांच्या तपासण्या करण्यात येत असून अन्न व औषध प्रशासन नांदेड कार्यालयाच्या अखत्यारीतील नांदेड शहर, अर्धापुर व मुदखेड येथील किराणा, प्रोविजन स्टोअर्स, डिपार्टमेंटल स्टोअर्स, ऑईल शोरुम व जीवनावश्यक वस्तू उत्पादक, घाऊक व किरकोळ विक्री दुकाने यांच्या 298 तपासण्या करण्यात आल्या आहेत. यावेळी पेढीतील कामगारांना, पेढीमालकांना मास्क व सॅनिटायझर्सचा वापर करण्याबाबत सुचित करण्यात आले.

शासनस्तरावर विविध उपाय योजना राबविल्या जात आहेत. अन्न व औषध प्रशासन नांदेड या कार्यालयाच्यावतीने सुध्दा विविध उपाय योजना राबविल्या जात असून त्याचाच भाग म्हणुन

किराणा दुकानातून जीवनावश्यक वस्तुंचा मुबलक पुरवठा ग्राहकांना व्हावा याबाबत देखील प्रशासनाकडून सर्व पेढीधारकांना यथायोग्य सुचना देण्यात आल्या आहेत. विविध ठिकाणी अन्न आस्थापनाधारक यांच्या बैठका घेऊन जीवनावश्यक वस्तुंचा काळा बाजार, साठेबाजी, प्रतिबंधित अन्न पदार्थांची विक्री करू नये, सामाजीक अंतर राखणे आणि जमावबंदी कलम 144 चे काटेकोर पालन करावे अन्यथा कठोर कार्यवाहीस सामोर जावे लागेल याबाबत निदर्शीत करण्यात आले आहे. सर्व अन्न आस्थापनाधारकांना देण्यात आलेल्या सुचनांचे पालन काटेकोरपणे करावे, असे आवाहन अन्न व औषध प्रशासनचे सहायक आयुक्त तु. चं. बोराळकर यांनी केले आहे.

000000

मनपा क्षेत्रातील कन्टेनमेंट झोनमधील

13 हजार 309 व्यक्तींची थर्मल मशीनद्वारे तपासणी

नांदेड, दि. 23 (जिमाका) –  नांदेड वाघाळा शहर महानगरपालिका क्षेत्रातील पिरबुऱ्हाणनगर व लगतचा परिसर कन्टेनमेंट झोन मधील एकुण 3 हजार 79 घरांमधील 13 हजार 309 व्यक्तींची थर्मल मशीनद्वारे तपासणी करण्यात आली. नागरिकांनी सोशल डिस्टन्सिंगचे पालन करावे, वारंवार हात स्वच्छ धुवावे, अत्यावश्यक कामासाठी बाहेर पडतांना मास्क किंवा स्वच्छ धुतलेल्या रुमालाचा वापर करावा, असे आवाहन मनपाच्या आरोग्य विभागाकडून करण्यात आले आहे.

महानगरपालिका आयुक्त सुनिल लहाने यांच्या मार्गदर्शनाखाली मनपा उपआयुक्त (आरोग्य) अजिपाल सिंघ संधू, वैद्यकीय अधिकारी डॉ. सुरेश सिंह बिसेन, वैद्यकीय अधिकारी डॉ. मो. बदीयोद्दीन, डॉ. बळीराम भुरके, डॉ. बालाप्रसाद कुंटुरकर, डॉ. कल्याण पवार, आरोग्य पर्यवेक्षक, 40 आशा वर्कर आणि 40 परिचारिका यांनी कन्टेनमेंट झोनमध्ये नागरिकांची तपासणी केली.

पिरबुऱ्हाणनगर येथील एका 64 वर्षीय नागरिकाला कोरोनाची बाधा झाल्यामुळे पिरबुऱ्हाणनगर व लगतचा परिसर सहयोगनगर, अशोकनगर, भाग्यनगर, वृंदावन कॉलनी, उदयनगर, शास्त्रीनगर, टिळकनगर, विद्युतनगर, अंबेकरनगर व इंदिरानगर इ. परिसर हा कन्टेनमेंट झोन म्हणून घोषित करण्यात आले आहे. कोरोना बाधीत व्यक्तीच्या परिवारातील 8 सदस्यांना आरएनआय निवास येथे आज दाखल करण्यात आले.

00000

                    शेतीविषयक आस्थापना चालू ठेवण्यास

सकाळी 7 ते सायं 5 वाजेपर्यंत वेळेची मुभा  

नांदेड, दि. 23 (जिमाका) – शेतकऱ्यांची खरीप पूर्व शेती विषयक कामाची निकड लक्षात घेता शुद्धीपत्रक 24 एप्रिल मध्ये अंशत: बदल करुन केवळ अशा शेतीविषयक आस्थापना, दुकाने, कृषि उत्पन्न बाजर समित्या व त्यांच्याशी निगडीत पुरवठा व वाहतूक ज्यांना यापुर्वीच्या आदेशान्वये चालू ठेवण्यास मुभा दिली आहे. त्यांना  आता सकाळी 7 ते सायं 5 वाजेपर्यंत चालू ठेवण्याची मुभा वेळोवेळी निर्गमीत आदेशात नमूद अटी व शर्तीच्या अधिन राहून जिल्हादंडाधिकारी डॉ. विपीन इटनकर यांनी दिली आहे.  

या आदेशाचे पालन न करणाऱ्या कोणतीही व्यक्ती, संस्था अथवा समूह यांना साथरोग प्रतिबंधक कायदा 1897 व आपत्ती व्यवस्थापन अधिनियम 2005 आणि भारतीय दंड संहिता 188 नुसार शिक्षेस पात्र असलेला अपराध केला असे मानण्यात येईल व कारवाई करण्यात येईल. तसेच यापूर्वी जिल्हादंडाधिकारी नांदेड कार्यालयाने निर्गमित केलेले दि. 13, 15, 19, 21 एप्रिल 2020 वर नमूद आदेश व दिनांक 20 एप्रिल 2020 वर नमूद शुद्धीपत्रकाद्वारे शेती विषयक आस्थापना, दुकाने वगळून इतरांसाठी दिलेले वेळेचे बंधन इत्यादी यापुर्वी प्रमाणेच अंमलात राहील, असे शुद्धीपत्रक जिल्हादंडाधिकारी डॉ. विपीन इटनकर यांनी 23 एप्रिल 2020 रोजी निर्गमित केले आहे.  

00000

मुस्लीम बांधवांनी पवित्र रमजान महिन्यात

कोरोना विषाणुचा प्रादुर्भाव रोखण्यासाठी शासनाच्या सूचनांचे पालन करावे

पोलीस अधीक्षक विजयकुमार मगर यांचे आवाहन

 नांदेड दि. 23 (जिमाका) :- महाराष्ट्र राज्यात मोठया प्रमाणात कोरोना विषाणूचा (कोविड-19) प्रसार होत आहे. त्यासाठी शासनामार्फत विविध प्रतिबंधात्मक उपाययोजना करण्यात येत आहेत. कोरोना विषाणूचा (कोविड-19) प्रादुर्भाव रोखण्यासाठी राज्यात 14 मार्च, 2020 पासून साथरोग प्रतिबंध अधिनियम 1897 लागू करण्यात आला आहे. 14 मार्चच्या अधिसूचनेन्वये यासंदर्भातील नियमावली प्रसिध्द करण्यात आली असून 17 एप्रिल 2020 च्या आदेशान्वये एकत्रित सुधारीत मार्गदर्शक सूचना निर्गमित करण्यात आलेल्या आहेत.

कोरोना विषाणूचा प्रादुर्भाव रोखण्यासाठी प्रतिबंधात्मक उपाययोजना म्हणून सामाजिक, सांस्कृतिक, राजकीय, धार्मिक, क्रीडाविषयक कार्यक्रम रद्द करण्याबाबत 14 मार्चच्या अधिसूचनेन्वये सूचना देण्यात आल्या आहेत.

शासनाने दिलेल्या सूचनांच्या अंमलबजावणीच्या अनुषंगाने मुस्लीम बांधवांचा पवित्र रमजान महिना शनिवार 25 एप्रिल 2020 रोजी पासून सुरु होत आहे. रमजान महिन्यामध्ये मुस्लीम समाजामध्ये मोठया संख्येने मस्जीदमध्ये जाऊन तसेच सार्वजनिकरीत्या नमाज पठण करण्याची प्रथा आहे. त्यामुळे मुस्लीम समाजातील नमाज, तरावीह व इफ्तार पार्टीसाठी एकत्र येतात. सद्य:स्थिती विचारात घेता, अधिक संख्येने लोक एकत्र आल्यास कोरोना विषाणूचा संसर्ग / संक्रमण मोठया प्रमाणावर होण्याची शक्यता असते व त्यामधून मोठया प्रमाणावर जिवित हानी होऊ शकते. त्यामुळे पवित्र रमजान महिन्यामध्ये मुस्लीम बांधवांनी पुढीलप्रमाणे सुचनांचे पालन करावे.

कोरोना विषाणूचा संसर्ग टाळण्यासाठी सद्या सुरु असलेल्या लॉकडाऊनच्या परिस्थितीत ज्याप्रमाणे सामाजिक विलगीकरणाचे पालन करण्याबाबत राज्य शासनाने दिलेल्या सूचनांप्रमाणे पवित्र रमजान महिन्यामध्ये काटेकोरपणे पालन करुन अंमलबजावणी करण्यात यावी. कोणत्याही परिस्थितीत मुस्लीम बांधव मस्जीदीमध्ये नियमित नमाज पठण, तरावीह तसेच इफ्तार पार्टीसाठी एकत्र येवू नये. घराच्या / इमारतीच्या छतावर एकत्र येवून नियमित नमाज पठण अथवा इफ्तार पार्टी करण्यात येवू नये. मोकळया मैदानावर एकत्र जमून नियमित नमाज पठण, इफ्तार पार्टी करण्यात येवू नये. लोकांकडून कोणताही सामाजिक, धार्मिक किंवा कौटूंबिक कार्यक्रम एकत्रित येवून साजरे होणार करु नयेत. सर्व मुस्लीम बांधवानी त्यांच्या घरातच नियमित नमाज पठण, तरावीह व इफ्तार पार्टी इत्यादी धार्मिक कार्य पार पाडावे. इतर कोणत्याही लोकांना धार्मिक कार्यक्रमात समाविष्ठ करु नये.

वरील दिलेल्या सुचनांचे जनतेने काटेकोरपणे पालन करुन आपले कर्तव्य पार पाडून समाजातील लोकांचे व आपल्या कुटूंबियांच्या आरोग्य व सुरक्षिततेला प्राधान्य देणे आपले कर्तव्य आहे. त्यामुळे समाजाच्या सुरक्षिततेसाठी नेमून दिलेली कर्तव्य पार पाडून समाजापुढे आदर्श घडवू या. शासनाच्या मार्गदर्शक सुचनांची सर्वांनी काटेकोरपणे अंमलबजावणी करुन कोरोना विषाणूविरुध्दचा आपला लढा जिंकण्याची मनीषा आपण सर्वजण मिळून बाळगू या...! असे आवाहन पोलीस अधीक्षक विजयकुमार मगर यांनी नांदेड जिल्हयातील जनतेला केले आहे.

0000000