जिल्ह्यात गत 24 तासात सरासरी 18.18 मि.मी. पाऊस

नांदेड, दि. 20 :- जिल्ह्यात शनिवार 20 जुलै 2019 रोजी सकाळी 8 वा. संपलेल्या गत 24 तासात सरासरी 18.18 मिलीमीटर पावसाची नोंद झाली असून दिवसभरात एकूण 290.95 मिलीमीटर पाऊस झाला आहे. तर जिल्ह्यात आतापर्यंत सरासरी 158.48 मि.मी. पावसाची नोंद झाली आहे. जिल्ह्यात आतापर्यंत 16.76 टक्के एवढा पाऊस झाला आहे.

जिल्ह्यात 20 जुलै 2019 रोजी सकाळी 8 वा. संपलेल्या 24 तासात झालेला पाऊस मिलीमीटरमध्ये तालुकानिहाय पुढील प्रमाणे कंसात एकूण पाऊस : नांदेड- 18.75 (148.39), मुदखेड- 10.00 (213.00), अर्धापूर- 2.33 (141.32), भोकर- 29.00 (150.45), उमरी- 37.33 (175.78), कंधार- 30.17 (157.16), लोहा- 19.83 (124.71), किनवट- निरंक (155.67), माहूर- 0.50 (201.34), हदगाव- 0.29 (123.70), हिमायतनगर- निरंक (93.35), देगलूर- 25.17 (132.32), बिलोली- 49.60 (223.20), धर्माबाद- 19.67 (134.65), नायगाव- 33.60 (184.40), मुखेड- 14.71 (176.27). आज अखेर पावसाची सरासरी 158.48 (चालू वर्षाचा एकूण पाऊस 2535.71) मिलीमीटर आहे.

00000

  

अर्धापूर येथील दिवाणी व फौजदारी न्यायालयाच्या नूतन इमारतीचे रविवारी उद्घाटन

            नांदेड, दि. 18 :- अर्धापूर येथील दिवाणी व फौजदारी न्यायालयाच्या नूतन इमारतीचे उद्घाटन मुंबई उच्च न्यायालय औरंगाबाद खंडपीठाचे न्यायमूर्ती प्रसन्न वराळे यांचे हस्ते रविवार 21 जुलै 2019 रोजी सकाळी 10.30 वा. संपन्न होणार आहे.

            मुंबई उच्च न्यायालय औरंगाबाद खंडपीठाचे न्यायमूर्ती तथा नांदेड जिल्ह्याचे पालक न्यायमूर्ती किशोर सोनावणे यांच्या प्रमुख उपस्थिती राहणार असून या कार्यक्रमाच्या अध्यक्षस्थानी प्रमुख जिल्हा न्यायाधीश दिपक धोळकिया राहणार आहे. अर्धापूर अभिवक्ता संघाचे किशोर देशमुख, अर्धापूर येथील दिवाणी न्यायाधीश क स्तर मयूरा यादव यांची उपस्थिती राहील, अशी माहिती प्रबंधक जिल्हा न्यायालय नांदेड यांनी दिली आहे.

000000

महसूल राज्यमंत्री संजय राठोड यांचा दौरा

            नांदेड, दि. 18 :- राज्याचे महसूल राज्यमंत्री संजय राठोड हे नांदेड दौऱ्यावर येत असून त्यांचा दौरा कार्यक्रम पुढील प्रमाणे राहील.

            शुक्रवार 19 जुलै 2019 रोजी सकाळी 10 वा. माहूर तालुक्यातील रामनगर तांडा येथील डॉ. गणेश उकंडराव जाधव यांचे आईचे निधनामुळे त्यांचे कुटूंबियांची सांत्वनपर भेट. दुपारी 12 वा. शासकीय वाहनाने दारव्हा जि. यवतमाळकडे प्रयाण करतील.

00000

प्रज्ज्वला योजनेतून महिलांचे सक्षमीकरण 

- प्रज्वला समितीच्या अध्यक्षा दिपाली मोकाशे

            

नांदेड, दि. 18:- प्रज्ज्वला योजनेतून महिलांचे शैक्षणिक,आर्थिक,सामाजिक,राजकीय सक्षमीकरण होण्यास मदत होणार आहे, असे प्रतिपादन प्रज्ज्वला समितीच्या अध्यक्षा श्रीमती दिपाली मोकाशे यांनी केले.  

            येथील स्टेडियम परिसरातील डॉ. शंकरराव चव्हाण प्रेक्षागृहात आज आयोजित महाराष्ट्र राज्य महिला आयोगाच्यावतीने प्रज्ज्वला योजनेतंर्गत बचतगटांचे प्रशिक्षण आयोजन करण्यात आले होते. यावेळी  महापौर श्रीमती दिक्षाताई धबाले, उपमहापौर सतीश देशमुख तरोडेकर, बालकल्याण समितीच्या उपसभापती डॉ. अरशया कोशर, विशेष पोलीस महानिरीक्षक प्रकाश मुत्याल, मनपा आयुक्त लहुराज माळी, जिल्हा विधी सेवा प्राधिकरणाचे सचिव राजेंद्र रोटे, गुरुप्रितकौर सोडी, दिलीप कंदकुर्ते अदिंची यावेळी उपस्थिती होती.   

            

श्रीमती मोकाशे म्हणाल्या की, बचत गटातील महिलांमध्ये आर्थिक सामाजिक आणि कायदेविषयक जनजागृती करण्यासाठी प्रज्ज्वला योजनेतंर्गत प्रशिक्षण उपयुक्त ठरणार आहे. या योजनेतून “एक जिल्हा, एक वस्तू” असे क्लस्टर्स तयार करण्यात येणार आहे. यातून प्रत्येक जिल्ह्याला एक ओळख आणि महिलांना मोठ्या प्रमाणात रोजगार उपलब्ध होणार आहे. तसेच तिसऱ्या टप्प्यात बचतगटांच्या उत्पादनांना शाश्वत बचतगट बाजार जिल्ह्याच्या ठिकाणी उभारण्याचे नियोजन असल्याचेही श्रीमती मोकाशे यांनी सांगितले.

            महिलांसाठी विविध कायदे आहेत, त्या कायद्याची माहिती व्हावी, त्याचबरोबर महिलांसाठी विविध शासकीय योजना राबविण्यात येतात. या योजनांचा त्यांना लाभ घेता यावा, यासाठी या प्रज्ज्वला योजनेच्या माध्यमातून प्रशिक्षण कार्यक्रम बचतगटांसाठी आयोजित केलेले आहे. तसेच बचत गटांच्या महिलांनी उत्पादित केलेल्या वस्तूंचे मार्केटींग, विक्री करण्यासाठी शहरात जागा, अशा पध्दतीने काम केले जात आहे.

            जिल्हा विधी सेवा प्राधिकरणाचे सदस्य सचिव राजेंद्र रोटे म्हणाले की, कायदेविषयक माहिती महिलांनी घेणे आवश्यक आहे. महिलांनी कायद्याची माहिती करुन घेणं आणि महिलांच्या कायद्याची जनजागृती होणे आवश्यक आहे, असे ही श्री. रोटे यांनी सांगितले.

            

मनपा आयुक्त लहूराज माळी म्हणाले की, शासकीय योजनांची माहिती महिलांपर्यंत पोहचविण्यासाठी प्रशिक्षण आयोजित करण्यात आलेले आहे. तसेच महानगरपालिकेमार्फत राबविण्यात येत असलेल्या योजनांची माहिती देवून या प्रशिक्षणाचा बचत गटांच्या महिलांनी घ्यावा, असेही मनपा आयुक्त श्री. माळी यांनी सांगितले.

नांदेड विशेष पोलीस महानिरीक्षक प्रकाश मुत्याल म्हणाले की, महिलांना त्यांच्या अधिकाराची जाणीव व्हायला हवी. महिलांनी सदैव सक्षम व्हावं, अशीही श्री. मुत्याल यांनी अपेक्षा व्यक्त केली.

            बचत गटाच्या माध्यमातून उत्पादित वस्तूंची बाजारपेठ, त्यासाठी विक्री व्यवस्था, विविध योजनांचा  त्याचा लाभ घेण्यासाठी करावयाची कार्यवाही आदिंची तपशीलवार माहिती दिली. राज्य महिला आयोगाने प्रकाशित केलेल्या सखी संवाद, कायदे तुमच्यासाठी, प्रज्ज्वला या पुस्तिकांचे वाटप बचत गटाच्या महिलांना करण्यात आले.

            या प्रशिक्षण कार्यक्रमाचे सुत्रसंचालन जिल्हा समन्वयक माधव डोम्पले, आभार महाराष्ट्र महिला आयोगाच्या जनसंपर्क अधिकारी कपालिनी सिनकर प्रास्ताविक केले तर जिल्हा संरक्षण अधिकारी गणेश जोंधळे यांनी आभार मानले. 

00000

बांधकाम कामगारांना 

नोंदणी करण्याचे आवाहन  

नांदेड दि. 17 :- राज्य शासनाने इमारत व इतर बांधकाम कामगारांच्या रोजगार व सेवाशर्तीचे नियमन करणे व त्यांना सुरक्षा, आरोग्य व कल्याणकारी योजनांचा लाभ देण्यासाठी इमारत व इतर बांधकाम कामगार कल्याणकारी मंडळाची स्थापना केली आहे. या मंडळाच्या विविध कल्याणकारी योजनेसाठी जिल्ह्यातील सर्व बांधकाम कामगारांनी नोंदणी करावी असे, आवाहन सहाय्यक कामगार आयुक्त मोहसीन सय्यद यांनी केले आहे.

मंडळाने नोंदणीसाठी निश्चित केलेले शुल्क 37 रुपये व त्यापुढील वर्षाच्या नुतनीकरणासाठी वार्षिक 12 रुपये इतके शुल्क भरणा करावे. याव्यतिरिक्त कोणतेही शुल्क कामगारास लागत नाही. याबरोबर महाराष्ट्र इमारत व इतर बांधकाम कामगार मंडळामार्फत सेफ्टी / इसेशियल कीट सुद्धा नि:शुल्क देण्यात येत आहे.

सद्यस्थितीत या मंडळाचे कामकाज सहाय्यक कामगार आयुक्त नांदेड कार्यालयामार्फत चालविण्यात येत आहे. शासन अधिसूचनेद्वारे बांधकामाच्या व्याखेत समावेश करण्यात आलेल्या 21 बांधकाम व्यवसायाशी निगडीत व्यवसायात काम करणाऱ्या कामगाराचे वय 18 वर्षापासून ते 60 वर्षाच्या आतील कामगारांची नोंदणी करण्यात येते. नोंदणी व नुतनीकरण करण्यासाठी दरवर्षाला माघील 12 महिन्यात 90 दिवस काम केल्याचे प्रमाणपत्र शासनाने वेळोवेळी प्राधिकृत केलेल्या यंत्रणेकडून प्रमाणपत्र सादर करणे आवश्यक आहे.

नोंदणी झालेल्या बांधकाम कामगारांना मंडळाच्या विविध कल्याणकारी योजनांचे लाभ वाटप केले जाते. या योजनांमध्ये बांधकाम कामगारासह त्याची पत्नी व अपत्यांचा देखील समावेश असून त्यांना प्रसुतीसाठी अर्थसहाय्य, गंभीर आजाराच्या उपचारासाठी अर्थसहाय्य, कामावर असताना अपघातामुळे अपंगत्व आल्यास किंवा मृत्यू झाल्यास अर्थसहाय्य, कामगारांचे स्वत:चे विवाहासाठी अर्थसहाय्य, कामगारांच्या अपत्यांना पहिली पासून ते पदवी पर्यंतच्या शिक्षणासाठी अर्थसहाय्य आदी विविध योजनाद्वारे अर्थसहाय्य वाटप केले जाते. कामगारांनी खाजगी एजंटापासून सावधान रहावे, असेही आवाहन कामगार कार्यालयाच्यावतीने करण्यात आले आहे.   

00000     

शंकरनगर जवाहर नवोदय विद्यालयातील सहावीच्या प्रवेश परिक्षेचे ऑनलाईन अर्ज सुरु

नांदेड दि. 17 :- बिलोली तालुक्यातील शंकरनगर येथील जवाहर नवोदय विद्यालयातील इयत्ता 6  वी प्रवेशासाठी प्रवेश परिक्षा 11 जानेवारी 2020 रोजी घेण्यात येणार आहे. यासाठी ऑनलाईन अर्ज करण्याची प्रक्रिया सुरु असून संबंधितांनी www.navodaya.gov.in व www.nvsadmissionclasssix.in या वेबसाईटवर वर विनामूल्य ऑनलाईन अर्ज करता येतील. अर्ज करण्याची मुदत 15 सप्टेंबर 2019 पर्यंत देण्यात आली आहे.

जिल्हयातील चालू शैक्षणिक वर्ष 2019-20 मध्ये इयत्ता 5 वी वर्गात शिक्षण घेत असलेल्या  सर्व शासकीय / निमशासकीय  मान्यताप्राप्त शाळेतील विद्यार्थी सलग्न तीन शैक्षणिक वर्ष 2017-18, 2018-19, 2019-2020 मध्ये अनुक्रमे वर्ग तीसरी, चौथी व पाचवी वर्ग खंड न पडता उत्तीर्ण असणे आवश्यक आहे. ऑनलाईन अर्ज करतांना विद्यार्थ्यांचा जन्म दिनांक 1 मे 2007 ते 30 एप्रिल 2011 दरम्यान असलेल्या सर्व वर्गवारीतील विद्यार्थ्यांचे प्रवेश परिक्षेचे ऑनलाईन अर्ज संकेतस्थळावर करता येईल. विद्यार्थ्यांचे अर्ज ऑनलाईन करताना  विद्यार्थ्याचे छायाचित्र 100 केबीमध्ये व स्वाक्षरी, पालकांची स्वाक्षरी व शाळा मुख्याध्यापकांचे सही व शिक्यासह प्रमाणपत्र स्कॅन कॉपी अपलोड करावे लागेल.  तसेच इयत्ता  5 वी शिक्षण घेत असलेल्या चालू  विद्यार्थ्यांची शाळा  ऑनलाईन अर्ज करतांना पालक शिक्षक व संबंधीत व्यक्तीने काळजीपुर्वक अचुक माहिती घेवून ऑनलाईन अर्ज करावेत. जसे जन्मतारीख, जातीची वर्गवारी व शहरी किंवा ग्रामीण आहे काय ते खात्री करुन अर्ज करावेत. अशाप्रकारे ऑनलाईन अर्ज करण्यासाठी शेवटची दिनांक 15 सप्टेंबर 2019  आहे.

ही प्रवेश परिक्षा शनिवार 11 जानेवारी 2020 रोजी सकाळी 11.30  वा. नांदेड जिल्हयातील संबंधित परिक्षा केंद्रावर घेण्यात येईल.  संबंधित शाळा मुख्याध्यापक, शिक्षक, पालक  व विद्यार्थ्यांनी याची नोंद घ्यावी, असे आवाहन शंकरनगर येथील जवाहर नवोदय विद्यालयाचे प्राचार्य हरिवरा प्रसाद यांनी केले आहे.

00000

दिनांक 1 जानेवारी 2019 या अर्हता दिनांकावर आधारीत मतदार याद्यांचा दुसरा विशेष संक्षिप्‍त पुनरिक्षण कार्यक्रम

नांदेड दि. 16 :- नांदेड तालुक्यातील 86 नांदेड उत्तर व 87 नांदेड दक्षिण मतदारसंघात मतदार यादीत मतदार यादी दुरुस्‍तीसाठी भारत निवडणूक आयोग यांनी खालील प्रमाणे कार्यक्रम जाहीर केला आहे. 

अ. क्र.	पुनरिक्षणाचे टप्‍पे	कालावधी
1	प्रारुप मतदारयादीची प्रसिध्‍दी करणे	15.07.2019 (सोमवार)
2	दावे व हरकती (अर्ज) सादर करणे	15.07.2019 ते 30.07.2019
3	विशेष मोहिमेचे दिनांक (Special compaign )	दिनांक 20.07.2019 (शनिवार) दिनांक 21/07/2019 (रविवार), दिनांक 27/07/2019 (शनिवार) व  दिनांक 28/07/2019 (रविवार)
4	पर्यवेक्षक/सहा. मतदार नोंदणी अधिकारी/मतदार नोंदणी अधिकारी व्‍दारा तपासणी	दिनांक 05 ऑगस्‍ट 2019 (सोमवार) पर्यंत
5	दावे व हरकती निकाली काढणे	13/08/2019 (मंगळवार) पर्यंत
6	उपजिल्‍हा निवडणूक अधिकारी/जिल्‍हा निवडणूक आधिाकरी /मतदार यादी निरिक्षक यांचेव्‍दारा मतदार यादीची विशेष तपासणी डाटाबेसचे अदयावतीकरण पुरवणी यादयाची छपाई इत्‍यादी	दिनांक 16/08/2019 (शु्क्रवार) पर्यंत
7	मतदार यादीची अंतिम प्रसिध्‍दी	दिनांक 19/08/2019 (सोमवार)

मतदारांना सूचना प्रसिद्धी पत्रकाद्वारे देण्यात येत असून महानगर पालिका क्षेत्रातील विविध प्रभागात याद्यांचे वाचन करून प्रसिद्धी देण्यात येणार आहे. उक्‍त कालावधीत मतदारांनी फॉर्म नं. 6, 7, 8, व 8अ तहसिल कार्यालय, मतदान केंद्रस्तरीय अधिकारी किंवा मनपा नोडल अधिकारी यांचेकडे जमा करावेत असे आवाहन मतदार नोंदणी अधिकारी तथा उपविभागीय अधिकारी लतीफ पठाण यांनी केले आहे. मतदारांनी यादीची पाहाणी करून विहीत मुदतीत मतदार यादीतील दुरुस्‍तीची कार्यवाही करुन राष्ट्रीय मतदार यादी शुद्धीकरण कार्यक्रमास सहकार्य करावे, असे आवाहन सहा. मतदार नोंदणी अधिकारी तथा तहसिलदार नांदेड यांनी केले आहे.

00000