वृत्त क्र. 1047

निवडणूक निरीक्षक ए. गोविंदराज यांनी घेतला 

मुखेड येथील निवडणूक विषयक कामाचा आढावा

नांदेड, दि. 8 नोव्हेंबर:- मुख्य खर्च निरीक्षक ए. गोविंदराज यांनी आज 91-मुखेड विधानसभा मतदार संघातील निवडणूक निर्णय अधिकारी यांचे कार्यालयास भेट देवून निवडणूक विषयक कामकाजाचा आढावा घेतला. यावेळी निवडणूक निर्णय अधिकारी अनुप पाटील व सहाय्यक निवडणूक अधिकारी राजेश जाधव यांनी त्यांचे स्वागत केले.

खर्च निरीक्षक ए. गोविंदराज यांनी खर्च कक्षातील कामाची पाहणी करुन, मिडीया कक्षामार्फत होत असलेल्या कामाची पाहणी केली. खर्च कक्षातील उमेदवारांच्या खर्चाचे रजिस्टरची तपासणी केली. यावेळी निवडणूक निर्णय अधिकारी अनुप पाटील, निवडणूक विभागाचे नायब तहसिलदार जोहरे, एस.बी.नरमीटवार, प्रशांत लिंबेकर, महाडीवाले, तलाठी देशमुख, मिडीया कक्ष प्रमुख उत्तम नारलावार, शिवशंकर कुच्चेवाड, संजय येनुरवार, रफिक बागवान इत्यादी उपस्थित होते.

00000

वृत्त क्र. 1046

संकटग्रस्त बालकांच्या मदतीसाठी हेल्पलाईन नंबर 1098 ची मदत घ्या 

नांदेड दि. 8 नोव्हेंबर :- आपल्या आजूबाजूला जर बालकामगार, बाल भिक्षेकरी, लैंगिक अत्याचारग्रस्त बालके, हरवलेली बालके, सापडलेली बालके, सोडून दिलेली बालके, बालविवाह, संकटग्रस्त बालके आढळल्यास अशा बालकांना त्वरीत आवश्यक मदत कुठून कशी मिळवून देता येईल, याकरीता कुठे संपर्क करावा याबाबत सामान्य नागरिकांमध्ये संभ्रम असतो. यासाठी आता चाईल्ड हेल्पलाईन नंबर 1098 कार्यान्वित करण्यात आली आहे. 

संकटग्रस्त बालकांना त्वरित मदतीसाठी भारत सरकारच्या महिला व बाल विकास विभागामार्फत 0 ते 18 वयोगटातील कोणत्याही प्रकारच्या अडचणी व संकटात सापडलेल्या तसेच काळजी व संरक्षणाची गरज असलेल्या सर्व बालकांसाठी चाईल्ड हेल्पलाईन सेवा 1098 संपूर्ण महाराष्ट्रात कार्यान्वित आहे. या सेवेअंतर्गत संकटग्रस्त बालकांना 24 तास हेल्पलाइन सेवा उपलब्ध आहे. या सेवेचा लाभ बालक स्वतः घेऊ शकतो किंवा इतर कोणीही सदर सेवेद्वारे बालकांना मदत मिळवून देऊ शकतात. या संबधी माहिती देणाऱ्या व्यक्तीचे नाव गोपनीय ठेवले जाते. याद्वारे संकटग्रस्त बालकांना मदत करण्यासाठी संबंधीतांनी 1098 या टोल फ्री क्रमांकावर संपर्क साधावा, असे आवाहन महिला व बालविकास विभागाचे आयुक्त डॉ. प्रशांत नारनवरे, जिल्हाधिकारी अभिजीत राऊत, महिला व बालविकास अधिकारी श्रीमती आर. पी. रंगारी यांनी केले आहे.

0000

वृत्त क्र. 1045

राज्यस्तरीय शालेय बेसबॉल क्रीडा स्पर्धा संपन्न 

पुणे,मुंबई,कोल्हापूर, अमरावती संघास अजिंक्यपद

नांदेड, दिनांक,८ नोव्हेंबर:- क्रीडा व युवक सेवा संचालनालय महाराष्ट्र राज्य पुणे अंतर्गत जिल्हा क्रीडा अधिकारी कार्यालयं नांदेड,जिल्हा क्रीडा परीषद नांदेड यांच्या संयुक्तं विद्यमाने  आयोजीत राज्यस्तरीय शालेय 14 वर्षांतील मुले- मुली बेसबॉल क्रीडा स्पर्धा पीपल्स महाविद्यालय मैदान येथे संपन्न झाली. या स्पर्धेत मुलींच्या गटात प्रथम पुणे,द्वितीय मुंबई तर अमरावती तृतीय स्थानावर राहिले तर मुलाच्या गटात प्रथम पुणे, द्वितीय कोल्हापूर,तृतीय अमरावती संघाने स्थान संपादन केले. 

 स्पर्धेचा बक्षीस समारंभ जिल्हा क्रीडा अधिकारी जयकुमार टेंभरे यांच्या हस्ते पार पडला .यावेळी उपस्थित क्रीडा मार्गदर्शक प्रकाश होनवडजकर,क्रीडा अधिकारी संजय बेतीवार, शिवकाता देशमुख,अकोला जिल्हा सचिव नारायण बत्तुले, अमरावतीचे इंद्रजित नितनवार,ज्ञानेश काळे, चाळीसगाव चे देशमुख सर,राजेंद्र बनसोडे,संदीप लंबे,विपुल दापके, हौशी बेसबॉल जिल्हा संघटना नांदेड चे सचिव आनंदा कांबळे,सोमनाथ नरवडे निवड समिती सदस्य प्रदीप पाटील, वैष्णवी कासार,आदी मान्यवर उपस्थीत होते.

कार्यक्रमाचे सूत्रसंचालन क्रीडा अधिकारी राहुल श्रीरामवर यांनी केले व आभार प्रदर्शन बालाजी शिरसिकर यांनी केले.

अंतिम सामन्यामध्ये शिवराज शेरकर,ओम आडसुळे, आस्मी राऊत,शर्वरी देवकर (पुणे),केदार गायकवाड,समर्थ जाधव (कोल्हापूर),रियोना मेहता,काव्या कोठारी(मुंबई)या खेळाडूंनी उत्कृष्ट खेळी करत आपल्या संघाना विजय प्राप्त करून देण्यात महत्त्वाचे योगदान दिले. विजय संघाना क्रीडा कार्यालयामार्फत चषक , प्रमाणपत्र व पदक देण्यात आले.

अंतिम सामन्यात पंच प्रमुख गणेश बेटूदे,सोमनाथ सपकाळ,संतोष आवचार, मुकेश बिराजदार,बालाजी गाडेकर, आकाश साबणे,विशाल कदम,राहुल खुडे,सायमा बागवान,यांनी पंच म्हणून तर गुणलेखक म्हणून गौस शेख, सोपान केदार,अर्चना कोल्होड,अमृता शेळके, इत्यादींनी म्हणून भूमिका निभावली.

 स्पर्धा पार पाडण्यासाठी संतोष कणकावार वरिष्ठ लिपिक, संजय चव्हाण,आनंद जोंधळे, दत्तकुमार दुथडे ,मोहन पवार, विजयानंद भालेराव,यश कांबळे,सुभाष धोंगडे, आकाश भोरे ,शेख अक्रम, चंदू गव्हाणे जिल्हा क्रीडा अधिकारी कार्यालयातील कर्मचारी,जिल्हा बेसबॉल संघटना आदींनी परिश्रम घेतले.

उपांत्य सामन्यांचे निकाल

मुले विभाग

1) कोल्हापूर वि. वी लातूर (15-0) होमरन

2) पुणे वि. वी  अमरावती (8-0) होमरन

मुली विभाग

1) मुंबई वि.वी (7-5) होमरन

2) अमरावती वि. वी नागपूर (06-4) होमरन

अंतिम सामन्याचे निकाल

मुली विभाग

पुणे वि.वी मुंबई (11-1) होमरन 

मुले विभाग

पुणे वि.वी कोल्हापूर (10-0) होमरन

००००००

वृत्त क्र. 1044

पूर्ण दिवस सुटी अथवा किमान 2 तास मतदानाला वेळ द्या !

कामगार, मजूर, वेटरपासून ते मेकॅनिकपर्यंत सर्वांना 20 नोव्हेंबरला सवलतीचे आदेश

20 नोव्हेंबर मतदानाचा दिवस

नांदेड, दि. 8 नोव्हेंबर- नांदेड जिल्ह्यातील लोकसभा पोटनिवडणूक व विधानसभा सार्वत्रिक निवडणुकीसाठी बुधवार 20 नोव्हेंबर 2024 रोजी मतदान होणार आहे. त्यामुळे या दिवशी अत्यावश्यक सेवेपासून तर कर्मचाऱ्यांपर्यंत आणि कामगारांपासून शेतमजूर, मेकॅनिक, वेटर या सर्वांना एक तर पूर्ण दिवसाची सुट्टी अथवा मतदान करण्यासाठी दोन तासाची सवलत द्या, असे स्पष्ट निर्देश प्रशासनाने सर्व कामगार आस्थापनांना दिले आहे.

नांदेड लोकसभा पोटनिवडणूक व विधानसभा सार्वत्रिक निवडणुकीसाठी 20 नोव्हेंबर 2024 रोजी मतदान होत आहे. नांदेड विधानसभा मतदान क्षेत्रात असलेले कामगार, अधिकारी, कर्मचारी यांना मग ते कामानिमित्त निवडणूक होणाऱ्या क्षेत्राबाहेर कार्यरत असले तरीही त्‍यांना निवडणुकीच्‍या दिवशी बुधवार 20 नोव्हेंबर 2024 रोजी मतदानाचा हक्‍क बजावण्‍यासाठी भरपगारी सुट्टी देण्‍याबाबत शासन परिपत्रक निर्गमित झाले आहे.

ही सुट्टी सर्व आस्‍थापना, कारखाने, दुकाने, इत्‍यादीना लागू राहील. उदा. राज्‍य शासन, केंद्र शासन व खाजगी कंपन्‍या या मधील आस्‍थापना, सर्व दुकाने व इतर आस्‍थापना, निवासी हॉटेल, खाद्यगृहे, अन्यगृहे, नाट्यगृहे, व्‍यापार, औद्योगिक उपक्रम किंवा इतर आस्‍थापना तसेच माहिती व तंत्रज्ञान कंपन्‍या, शॉपिग सेंटर, मॉल्‍स,रिटेलर इ. अपवादात्‍मक परिस्‍थीतीत कामगार, अधिकारी, कर्मचारी इत्‍यादीना पूर्ण दिवस सुट्टी देणे शक्‍य नसेल तर, मतदान क्षेत्रातील कामगारांना मतदानाचा हक्‍क बजावण्‍यासाठी सुट्टी ऐवजी केवळ दोन ते तीन तासांची सवलत देता येईल.

मात्र त्‍याबाबत त्‍यांनी संबंधित जिल्हा निवडणूक अधिकारी यांची पूर्व परवानगी घेणे आवश्यक राहील. कोणत्‍याही परिस्थितीत मतदारांना मतदानासाठी किमान दोन ते तीन तासांची भरपगारी सवलत मिळेल याची दक्षता संबंधित आस्‍थापना मालकांनी घेणे आवश्‍यक राहील.

सर्व आस्‍थापना,कारखाने, दुकाने इत्‍यादींच्‍या मालकांनी , व्‍यवस्‍थापनाने या आदेशाचे अनुपालन होईल याची खबरदारी घ्‍यावी. मतदारांकडून मतदानासाठी योग्‍य ती सुट्टी अथवा सवलत प्राप्‍त न झाल्‍याने मतदान करणे शक्‍य न झाल्‍याबाबची तक्रार आल्‍यास , त्‍यांच्‍या विरुध्‍द योग्‍य ती कारवाई करण्‍यात येईल . 

00000

  वृत्त क्र. 1043

राज्यस्तरीय शालेय बेसबॉल क्रीडा स्पर्धेचे शानदार उदघाटन

नांदेड, दि. 7 नोव्हेंबर : जिल्हा क्रीडा अधिकारी कार्यालय, जिल्हा क्रीडा परीषद, नांदेड यांच्या संयुक्त विद्यमाने आयोजीत राज्यस्तरीय शालेय 14 वर्षांतील मुले- मुली बेसबॉल क्रीडा स्पर्धा पीपल्स महाविद्यालय मैदान, नांदेड येथे 6 जानेवारी ते 8 नोव्हेंबर, 2024 दरम्यान पार पडणार आहेत. या स्पर्धेचे उद्घाटन सचिव नांदेड एज्युकेशन सोसायटीचे श्रीमती शामल पत्की, जिल्हा क्रीडा अधिकारी जयकुमार टेंभरे यांच्या हस्ते आज झाले.

कार्यक्रमाचे अध्यक्ष नांदेड एज्युकेशन सोसायटीचे उपाअध्यक्ष सी.ए.डॉ प्रवीण पाटील यांनी भूषविले. यावेळी प्रमुख उपस्थिती पीपल्स कॉलेजचे प्राचार्य डॉ. आर.एम.जाधव, प्रमुख पाहुणे एस एम पटेल, शिवछत्रपती क्रीडा पुरस्कार प्राप्त जे.ई.गुपिले,  सुरज सोनकांबळे, नृसिंह आठवले, महाराष्ट्र राज्य बेसबॉल संघटनेचे तांत्रिक समितीचे गोकुळ तांदळे, कोल्हापूरचे सचिव राजेंद्र बनसोडे, ज्ञानेश काळे, क्रीडाअधिकारी संजय बेतीवार, क्रीडा मार्गदर्शक प्रकाश होनवडजकर, बालाजी शिरसीकर, क्रीडा अधिकारी राहुल श्रीरामवार, विपुल दापके, हौशी बेसबॉल जिल्हा संघटना नांदेडचे सचिव आनंदा कांबळे, निवड समिती सदस्य प्रदीप पाटील, वैष्णवी कासार, छ.संभाजीनगरचे सचिव तथा पंच प्रमुख गणेश बेटूदे, पीपल्स महाविद्यालयाचे प्राध्यापक विलास वडजे हे उपस्थीत होते.

कार्यक्रमाचे सूत्रसंचलन मुकेश बिराजदार यांनी तर आभार प्रदर्शन क्रीडा मार्गदर्शक बालाजी शिरसीकर यांनी केले. आज झालेल्या सामन्यासाठी संतोष आवचार, आकाश साबणे, सोमनाथ सपकाळ, विशाल कदम, बालाजी गाडेकर, राहुल खुडे, गौस शेख यांनी पंच म्हणून तर गुणलेखक म्हणून सायमा बागवान, अमृता शेळके इत्यादींनी भूमिका निभावली.

स्पर्धा पार पाडण्यासाठी क्रीडा कार्यालयातील संतोष कणकावार वरिष्ठ लिपिक, दत्तकुमार धुतडे, संजय चव्हाण, आनंद जोंधळे, मोहन पवार, सुभाष धोंगडे, विद्यानंद भालेराव, सोनबा ओव्हाळे, यश कांबळे, शेखअक्रम,चंदू गव्हाणे जिल्हा क्रीडा अधिकारी कार्यालयातील कर्मचारी, जिल्हा संघटना आदी परिश्रम घेत आहेत.

आज झालेल्या सामन्यांचा निकाल पुढीलप्रमाणे आहे

मुले विभाग - 1) कोल्हापूर वि. वी छ. संभाजीनगर (15-0) होम रन, 2) लातूर वि. वीनागपूर (7-1) होम रन, 3) पुणे वि. वी मुंबई (10-4) होमरन4) अमरावती वि. वीनाशिक (17-1) होमरन तर मुली विभाग - 1) मुंबई वि. वी नाशिक (7-5) होमरन, 2) अमरावती वि. वी लातूर (16-3) होमरन, 3) नागपूर वि. वी छ. संभाजीनगर (13-5) होमरन, 4) पुणे वि. वी कोल्हापूर (15-0) होमरनया स्पर्धा पिपल्स कॉलेज, नांदेड येथे आयोजीत करण्यात आले असून, यास्पर्धेचा जास्तीत जास्त खेळाडू, क्रीडा प्रेमी, रसीकांनी आनंद घ्यावा, असे आवाहन जिल्हा क्रीडा अधिकारी  जयकुमार टेंभरे यांनी केले आहे.

00000

 वृत्त क्र. 1042

राज्य उत्पादन शुल्क विभागाकडून 3 लाख 38 रुपयांचा मुद्देमाल जप्त 

नांदेड जिल्हयाच्या दलाकडून 16 धडक कारवाई

नांदेड, दि. 7 नोव्हेंबर : भारत निवडणूक आयोगाने विधानसभा सार्वत्रिक निवडणुकीचा कार्यक्रम जाहीर केल्यानंतर आचारसंहितेमध्ये अवैध मद्य जप्त करण्याची धडक कारवाई नांदेड जिल्हा राज्य उत्पादन शुल्क विभागाकडून सुरू आहे. 6 नोव्हेंबर रोजी विभागाने 16 ठिकाणी धाडी टाकून एकूण 3 लाख 38 हजार 980 रुपयांच्या मुद्देमालाची दारू जप्त केल्याची माहिती नांदेडचे राज्य उत्पादन शुल्क अधिक्षक गणेश पाटील यांनी दिली आहे.

6 नोव्हेंबर रोजी झालेल्या कारवाईमध्ये विविध ठिकाणी एकुण 16 गुन्हे दाखल करण्यात आले आहेत. यामध्ये 16 आरोपींना अटक करण्यात आली आहे. हस्तगत करण्यात आलेल्या जानमालामध्ये एकूण 16 गुन्हे, वारस 16, अटक आरोपी 16, रसायन 450 लि. देशी मद्य 94.20 लि., जप्तवाहन संख्या 03  जप्त असे एकूण सर्व मुद्येमाल 3 लाख 38 हजार 980 रुपयांचा मुद्देमाल जप्त केला आहे.

जिल्ह्यातील 9 विधानसभा मतदारसंघातील मतदान प्रक्रिया मुक्त व निर्भयपणे पार पाडावी यासाठी राज्य उत्पादन शुल्क विभागास दक्ष राहण्याचे व आवश्यक त्या उपाययोजना करण्याबाबत जिल्हाधिकारी तथा मुख्य निवडणूक निर्णय अधिकारी अभिजीत राऊत यांनी आदेश दिले आहेत. त्यानंतर जिल्ह्यामध्ये विभागामार्फत धाडी टाकण्याचे सत्र सुरू आहे. निवडणूक काळामध्ये यामध्ये अधिक वाढ करण्यात आली असून अवैध दारू विक्रीवर विभागाची काटेकोर नजर आहे.  

जिल्ह्यात आचारसंहिता लागू असून या काळामध्ये कोणीही अवैध मद्य खरेदी करू नये. तसेच स्वत:जवळ बाळगू नये, असे आवाहन विभागाने केले आहे. मद्याचा गैरवापर निवडणूक काळात होत असल्यास या संदर्भात विभागाला नागरिकांनी टोल फ्री क्रमांक 1800 233 9999 व व्हॉटसॲप क्र. 8422001133 यावर संपर्क साधण्याचे आवाहन केले आहे. या कारवाईमध्ये अधिक्षक गणेश पाटील यांच्या मार्गदर्शनाखाली रत्नमाला गायकवाड, जावेद कुरेशी, आशिष महिंद्रकर, सरकाळे यांच्यासह अनेक कर्मचाऱ्यांनी सहभाग घेतला होता.

0000

  वृत्त क्र. 1041

बल्क एसएमएस व्हाईस, एसएमएस विनापरवानगी जारी केल्यास कारवाई करणार : जिल्हाधिकारी

माध्यम  प्रमाणिकरण   व सनियंत्रण समितीची करडी नजर

आज बल्क एसएमएस संस्थाच्या प्रतिनिधी समवेत बैठक

नांदेड, दि. 7 नोव्हेंबर : नांदेड लोकसभा पोटनिवडणूक 2024 व विधानसभा सार्वत्रिक निवडणुकीची आचारसंहिता सुरु आहे. आचारसंहिता कालावधीत  उमेदवारांकडून मतदाराना मतदान करण्याबाबत विना परवानगी  बल्क एसएमएस देण्याची शक्यता नाकारता येत नाही. ज्या उमेदवारांना प्रचारासाठी बल्क एसएमएस पाठवायचे आहेत, त्यांनी माध्यम प्रमाणिकरण व संनियंत्रण समितीची परवानगी घेवूनच एसएमएस पाठविण्याची कार्यवाही करावी, असे आवाहन जिल्हाधिकारी तथा माध्यम  प्रमाणिकरण  व संनियंत्रण समितीचे अध्यक्ष अभिजीत राऊत यांनी केले आहे.

निवडणूक आयोगाने निर्देशित केल्याप्रमाणे बल्क एसएमएस, ई-पेपर, व्हीडीओ, ऑडीओ, रेडीओ चॅनेलवरील कोणत्याही जाहिरातीला परवानगी घेणे आवश्यक आहे. परवानगी शिवाय इलेक्ट्रॉनिक्स फॉरमॅटवरील कोणतीही जाहिरात दिल्यास कारवाई केली जाईल.

बल्क एसएमएस बाबत उमेदवारांच्या सर्व प्रतिनिधी समवेत उद्या दुपारी 1 वाजता माध्यम प्रमाणिकरण व संनियंत्रण समितीच्यावतीने बैठक आयोजित केली आहे.  तरी बल्क एसएमएस, व्हाईस सेवा पुरविणाऱ्या मेसेज एजन्सीने जिल्हाधिकारी कार्यालयाच्या परिसरातील नियोजन भवनातील माध्यम कक्षात बैठकीसाठी उपस्थित राहावे, असे आवाहन माध्यम प्रमाणीकरण व संनियंत्रण समितीचे सदस्य सचिव तथा जिल्हा माहिती अधिकारी प्रवीण टाके यांनी केले आहे.

रेडिओ संदेश बल्क एसएमएस बंदी

निवडणूक दिनांकाच्या 48 तासाच्या शांतता काळामध्ये आकाशवाणी व खाजगी चॅनलवरील निवडणूक विषयीच्या बाबीचे प्रसारण बंद करण्याचे निर्देशही जिल्हा प्रशासनाने दिले आहेत. तसेच मोबाईल वरील बल्क एसएमएस सेवाही या काळात बंद ठेवण्याचे निर्देशित करण्यात आले आहे. 48 तास आधी मोबाईलवर अशा प्रकारे आदेश आल्यास त्याची सर्वस्वी जबाबदारी एसएमएस सेवा देणाऱ्या एजन्सीची असेल, यांची सर्वानी नोंद घ्यावी असेही आवाहन करण्यात आले आहे.

00000