शेतकऱ्यांनी शेतीपूरक व्यवसायातून

उत्पन्न वाढविले पाहिजे - जिल्हाधिकारी डोंगरे

नांदेड दि. 30 :- शेतकऱ्यांनी रेशीम, मत्स्यपालन, दुग्धव्यवसाय, शेळीपालन यासारख्या शेतीपूरक व्यवसायातून उत्पन्न वाढविले पाहिजे, असे प्रतिपादन जिल्हाधिकारी अरुण डोंगरे यांनी केले.  

जागतिक बँक अर्थसहाय्यीत महाराष्ट्र स्पर्धाक्षम कृषि विकास प्रकल्पांतर्गत जिल्हास्तरीय खरेदीदार विक्रेता संमेलनाचे आयोजन नांदेड येथील हॉटेल ताज पाटील प्लाझा येथे करण्यात आले होते. या संमेलनाचे उद्घाटन जिल्हाधिकारी श्री. डोंगरे यांचे हस्ते करण्यात आले, त्यावेळी ते बोलत होते.

यावेळी जिल्हा अधिक्षक कृषि अधिकारी तथा प्रकल्प संचालक (आत्मा) आर. बी. चलवदे, आत्माचे प्रकल्प उपसंचालक तथा कृषि उपसंचालक सौ. एम. आर. सोनवणे, नांदेड उपविभागीय कृषि अधिकारी आर. टी. सुगदेव, मार्गदर्शक एनसीडीइएक्सचे अमोल मेश्राम, वामभोरी गर्भगिरी फार्मर्स प्रोड्युसर कंपनीचे श्री. चिंधे, पुणे महा. एफपीसीचे प्रशांत पवार, रुप्रोनॉमी कंपनीचे संग्राम नायका, नाशिक देवी नदी ॲग्रो प्रोड्युसर कंपनीचे अनिल शिंदे, विदर्भ को. ऑपरेटीव्ह कंपनीचे वैभव ठाकरे, वैद्यनाथ कृषि विकास मंडळाचे वैजनाथ कराड, पैनगंगा ॲग्रो फुड प्रोसोसिंग इंडस्ट्री व कृषि समर्थ ट्रेनींग कंपनीचे पवनकुमार मोरे, संग्राम देशमुख यांची प्रमुख उपस्थिती होती.           

जिल्हाधिकारी श्री. डोंगरे म्हणाले, शेतमालाला चांगला दर मिळवा यासाठी शेतकऱ्यांनी शेतमाल स्वच्छ, वाळवून, चाळणी करुन प्रतवारी केल्यानंतर बाजारात आणावा. महाराष्ट्र स्पर्धाक्षम कृषि विकास प्रकल्पांतर्गत जिल्ह्यात 14 शेतकरी उत्पादक कंपन्या स्थापन केल्या असून या कंपन्यांकडे शेतमालावर प्रक्रिया करण्यासाठी यंत्रसामुग्री उभी केली आहे. जिल्ह्यात शेतकऱ्यांनी मोठ्या प्रमाणात गट स्थापन करुन कंपन्या स्थापन कराव्यात व आपल्या शेतमालाची थेट विक्री गटामार्फत किंवा कंपनीमार्फत करावी, असे आवाहन जिल्हाधिकारी श्री. डोंगरे यांनी केले.  

प्रास्ताविकात जिल्हा अधिक्षक कृषि अधिकारी श्री. चलवदे यांनी शेतकरी उत्पादक कंपन्यांनी जिल्ह्यातील हळद पिकावर प्रक्रिया करुन दर्जेदार हळद पावडर ब्रँडींग व पॅकींग करुन विक्री करावी. जिल्ह्यात मिरचीचे उत्पादन मोठ्या प्रमाणावर होत असून मिरचीचे दर्जेदार पावडर करुन विक्री करता येईल. तसेच निर्यातक्षम दर्जेदार केळीचे उत्पादन घेऊन केळी निर्यात तसेच प्रक्रिया करता येईल, असे सांगितले.

या संमेलनात धान्य खरेदी / विक्री व्यवस्थापन, धान्य, भाजीपाला खरेदीदार इतर खरेदीदार ओळख व संवाद, शेतकरी कंपनी व मार्केटिंग या विषयांवर सादरीकरणाद्वारे मार्गदर्शन करण्यात आले. यावेळी जिल्ह्यातील शेतकरी उत्पादक कंपन्यांचे संचालक, सभासद, शेतकरी आदी उपस्थित होते.    

जिल्ह्यात शेतकरी उत्पादक कंपन्या 14 स्थापन करण्यात आल्या असून त्यांची नावे पुढील प्रमाणे आहेत. (कंसात व्यावसायिक प्रस्तावाचा प्रकार) लहानकर फार्मर्स प्रोड्युसर कंपनी लि. आंबेगाव / लहान ता. अर्धापूर (प्राथमिक प्रक्रिया - हळद पावडर). पुर्वारेश्वर ॲग्रो प्रोड्युसर कंपनी करडखेड ता. देगलूर, बरबडा परीसर ॲग्रो प्रोड्युसर कं. बरबडा ता. नायगाव, धर्माबाद ॲग्रो प्रोड्युसर कंपनी जारीकोट ता. धर्माबाद, श्री गुरु समर्थ रामबापु प्रोड्युसर कंपनी लि. वाळकेवाडी ता. हिमायतनगर, सगरोळी परीसर ॲग्रो प्रोड्युसर कंपनी लि. सगरोळी ता. बिलोली, विठ्ठलेश्वर शेतकरी उत्पादक कंपनी लि. शहापूर ता. देगलूर, राजे मल्हारराव होळकर ॲग्रो प्रोड्युसर कं. लि. नारनाळी ता. कंधार (धान्य स्वच्छता व प्रतवारी, पॅकींग युनिट). राष्ट्रमाता जिजाऊ ॲग्रो प्रोड्युसर कंपनी रोहिपिंपळगाव ता. मुदखेड, बेंबर ॲग्रो प्रोड्युसर कंपनी बेंबर ता. भोकर, योगीराज निवृत्ती महाराज ॲग्रो प्रोड्युसर कंपनी चिंचोली ता. कंधार (भाजीपाला प्राथमिक प्रक्रिया स्वच्छता व प्रतवारी पॅकिंग). भाग्यविधाता शेतकरी प्रोड्युसर कंपनी लि. बारड ता. मुदखेड, तामसा परीसर फार्मर्स प्रोड्युसर कंपनी लि. तामसा ता. हदगाव, गुरु गोविंद सिंघजी मनार ॲग्रो प्रोड्युसर कंपनी लि. कौठा ता. कंधार (दालमिल) अशी माहिती यावेळी देण्यात आली आहे. एमएसीपी प्रकल्पांतर्गत शेतकरी समुदायाची उत्पादकता त्यांचा नफा आणि बाजार संपर्क वाढविणे, शेतकरी व बाजार व्यवस्था स्पर्धाक्षम करणे, शेतकऱ्यांसाठी कृषि विस्तार सेवांमध्ये सुधारणा आणि बाजार व्यवस्थेत सुधारणा करण्याचे उद्दीष्ट निश्चित करण्यात आले आहे.

000000

धर्माबाद कृषी उत्पन्न बाजार समिती निवडणूक

मतदान-मतमोजणी केंद्र परिसरात 144 कलम

नांदेड दि. 29 :- धर्माबाद कृषि उत्पन्न बाजार समिती निवडणूकीची संपूर्ण प्रक्रिया शांततेत, निर्भय व न्याय वातावरणात पार पाडण्याच्या दृष्टीकोणातून तसेच निवडणूक कालावधीत कायदा व सुव्यवस्था अबाधीत रहावी यादृष्टीने 3 नोव्हेंबर 2018 रोजी संबंधीत मतदान केंद्र परिसरात व 4 नोव्हेंबर रोजी मतमोजणी केंद्र परिसरात फौजदारी प्रक्रिया संहिता 1973 चे कलम 144 अन्वये जिल्हादंडाधिकारी अरुण डोंगरे यांनी आदेश लागू केला आहे.

जिल्ह्यातील धर्माबाद कृषि उत्पन्न बाजार समितीसाठी मतदानाच्या दिवशी मतदान केंद्राच्या तसेच मतमोजणीच्या दिवशी संबंधितांनी निश्चित केलेल्या मतमोजणी केंद्राच्या हद्दीपासून 200 मीटर परिसरातील मंडपे, सर्व दुकाने, मोबाईल, कॉडलेस फोन, पेजर, वायरलेस सेट, ध्वनीक्षेपके, सर्व प्रकारचे फेरीवाले व इतर इलेक्ट्रॉनिक्स उपकरणे, निवडणुकीच्या कामाव्यतीरिक्त खाजगी वाहन, मतमोजणीच्या कामाव्यतीरिक्त व्यक्तीस प्रवेश करण्यासाठी प्रतिबंधीत करण्यात आले आहे.

हा आदेश मतदान केंद्राच्या हद्दीपर्यंत 3 नोव्हेंबर 2018 रोजी मतदान सुरु झाल्यापासून मतदान संपेपर्यंत तर मतमोजणी केंद्राच्या हद्दीपर्यंत 4 नोव्हेंबर 2018 रोजी सकाळी 6 वाजेपासून ते मतमोजणी प्रक्रिया संपेपर्यंत अंमलात राहील, असेही आदेशात म्हटले आहे.  

00000

उपेक्षित व मुलांकडून देखभाल न होणाऱ्या

ज्येष्ठ नागरिकांना पिठासीन अधिकाऱ्यांकडे दाद मागता येईल

नांदेड दि. 29 :- उपेक्षित व मुलांकडून देखभाल न होणाऱ्या जिल्ह्यातील ज्येष्ठ नागरिकांना अधिनियमाद्वारे त्यांचे कार्यक्षेत्रातील पिठासीन अधिकारी यांच्याकडे दाद मागता येईल, असे जिल्हाधिकारी नांदेड यांनी प्रसिद्धी पत्रकाद्वारे कळविले आहे.  

भारत सरकारने वृद्धांची उपेक्षा टाळण्यासाठी, त्यांची काळजी व देखभाल घेण्यास मुलांवर कायदेशीर दायित्व व जबाबदारी टाकण्यासाठी आई-वडील व ज्येष्ठ नागरिक यांच्या चारितार्थ व कल्याणासाठी अधिनियम 2007 व 2010 अधिनियमीत केला आहे. त्याअनुषंगाने राज्य शासनाने जिल्ह्यातील सर्व उपविभागीय अधिकारी यांना त्यांचे कार्यक्षेत्रातील पिठासीन अधिकारी म्हणून अधिसूचित केले आहे.

पिठासीन अधिकारी यांच्या कार्यक्षेत्राचा तपशिल पुढील प्रमाणे आहे. नांदेड उपविभागीय अधिकारी - नांदेड व अर्धापूर तालुका (संपर्क क्र. 02462-230966). कंधार उपविभागीय अधिकारी- कंधार व लोहा तालुका (संपर्क क्र. 02466-223051). देगलूर उपविभागीय अधिकारी - देगलूर व मुखेड तालुका (02463-255034). बिलोली उपविभागीय अधिकारी- बिलोली व नायगाव तालुका (02465-223123). धर्माबाद उपविभागीय अधिकारी- धर्माबाद  व उमरी तालुका (02465-244279). भोकर उपविभागीय अधिकारी - भोकर व मुदखेड तालुका (02467-223884). हदगाव उपविभागीय अधिकारी - हदगाव व हिमायतनगर तालुका (02468-222099). किनवट उपविभागीय अधिकारी- किनवट व माहूर तालुका (02469-222228). या अधिनियमांतर्गत संपूर्ण जिल्हा कार्यक्षेत्रासाठी जिल्हाधिकारी हे अपिलीय प्राधिकारी आहेत, असेही प्रसिद्धी पत्रकात नमूद केले आहे.

00000

नांदेड गुरुद्वारा मंडळाची निवडणूक

मतदार यादी 22 नोव्हेंबरला प्रसिद्ध होणार

नांदेड दि. 29 :- नांदेड शिख गुरुद्वारा सचखंड श्री हजूर अपचलनगर साहिब मंडळाच्‍या तीन सदस्‍यांना निवडून देण्‍यासाठीची अंतिम मतदार यादी 3 नोव्हेंबर ऐवजी 22 नोव्हेंबर 2018 रोजी प्रसिध्‍द करण्‍यात येणार आहे. याची संबंधितांनी नोंद घ्‍यावी, असे आवाहन जिल्‍हाधिकारी नांदेड  यांनी केले आहे.  

महसूल व वन विभागाची अधिसूचना 27 जून 2018 नुसार नांदेड शिख गुरुव्‍दारा सचखंड श्री हजूर अपचलनगर साहिब मंडळाच्‍या तीन सदस्‍यांना निवडुन देण्‍यासाठी मतदार क्षेत्र औरंगाबाद, जालना, परभणी, हिंगोली, उस्‍मानाबाद, नांदेड, बीड, लातूर हे संपुर्ण जिल्‍हे व चंद्रपुर जिल्‍ह्यातील राजूरा, कोरपना व जीवती हे तालुके (तत्‍कालीन हैद्राबाद निजाम संस्‍थानाचा महाराष्‍ट्रातील भाग) येथील महाराष्‍ट्र विधानसभेसाठी दि. 1 जुलै 2018 या अर्हता दिनांकास अस्तित्‍वात असलेली विधानसभा मतदार यादीतील समाविष्‍ट शिखधर्मीय मतदारांची यादी तयार करुन निवडणूक घेण्‍यासाठी  निर्देश देण्‍यात आले आहेत.

त्‍यानुसार अंतिम मतदार यादी 3 नोव्‍हेंबर 2018 रोजी प्रसिध्‍द करण्‍यात येणार होती. परंतू 6 ते 13 नोव्हेंबर 2018 या कालावधीतील शिख धर्मीयांचा 310 वा गुरु-ता-गद्दी समारोह 2018 हा कार्यक्रम संभाव्‍य निवडणूक कार्यक्रमाच्‍या कालावधीत येणार आहे. गुरु-ता-गद्दीच्‍या धार्मिक समारोहाच्‍या व्‍यस्‍त कार्यक्रमामुळे शिख बांधवांना निवडणूक कार्यक्रमामध्‍ये सहभागी होण्‍यास अडचणी निर्माण होऊ शकतात. तसेच या कालावधीत निवडणूक कार्यक्रमाची पुरेशी प्रसिध्‍दी होणार नाही.

याबाबत शुध्‍दीपत्रक औरंगाबाद, जालना, परभणी, हिंगोली, उस्‍मानाबाद, नांदेड, बीड, लातूर व चंद्रपुर जिल्‍ह्यातील दैनिक वर्तमानपत्रात प्रसिध्‍द होणार आहे. हे शुध्‍दीपत्रक मतदार क्षेत्रातील सर्व जिल्‍हाधिकारी कार्यालये व गुरुव्‍दारा तख्‍त सचखंड श्री हजूर अपचलनगर साहिब बोर्ड नांदेडच्‍या सुचना फलकावर प्रसिध्‍द करण्‍यात आले आहे. तसेच नांदेड जिल्‍ह्याचे संकेतस्‍थळ (वेबसाईट)  www.nanded.gov.in वर देखील पाहण्‍यासाठी उपलब्‍ध आहे. असेही प्रसिद्धी पत्रकात नमूद केले आहे.

00000

पालकमंत्री रामदास कदम यांनी

केली शेतातील पिकाची पाहणी

 

          नांदेड,दि. 29 :- जिल्ह्याचे पालकमंत्री तथा राज्याचे पर्यावरण मंत्री रामदास कदम यांनी आज जिल्हा नियोजन समितीच्या बैठकीनंतर बिलोली तालुक्यातील केरुर येथील शेतीला भेट देवून दुष्काळसदृष्य परिस्थितीमुळे नुकसान झालेल्या पिकाची पाहणी केली.

यावेळी त्यांच्या समवेत आमदार हेमंत पाटील, आमदार डॉ. तुषार राठोड, आमदार सुभाष साबणे, जिल्हाधिकारी अरुण डोंगरे, जिल्हा परिषदेचे मुख्य कार्यकारी अधिकारी अशोक काकडे आदि अधिकारी उपस्थित होते. यावेळी त्यांनी नुकसानग्रस्त शेतकऱ्यांशी संवाद साधला यावेळी कृषी विभागाच्या अधिकाऱ्यांनीही माहिती दिली.  

****

नियोजन समितीच्या बैठकीत आढावा

जिल्हा वार्षिक योजनेतून विकासकामांवर

54 टक्के खर्च ; उर्वरित निधी खर्च करा

- पालकमंत्री रामदास कदम

नांदेड दि. 29 :- नांदेड जिल्ह्यातील विविध विकास कामांवर चालु वर्षीच्या जिल्हा वार्षिक योजनेतील सर्वसाधारण, अनुसूचित जाती उपयोजना व आदिवासी उपयोजना (ओटीएसपीसह) मिळून वितरीत केलेल्या तरतुदीच्या 54 टक्के खर्च झाला असून उर्वरित निधीतून तातडीने विकास कामे हाती घेऊन शंभर टक्के खर्च होईल यादृष्टिने सर्व विभागांनी नियोजन करावे, असे निर्देश जिल्ह्याचे पालकमंत्री तथा राज्याचे पर्यावरण मंत्री रामदास कदम यांनी दिले.

नांदेड जिल्हा नियोजन समितीची बैठक पालकमंत्री कदम यांच्या अध्यक्षतेखाली नियोजन भवनाच्या मुख्य सभागृहात झाली. यावेळी ते बोलत होते. बैठकीस जिल्हा परिषद अध्यक्षा शांताबाई पवार, महापौर शिलाताई भवरे, आमदार डी. पी. सावंत, आमदार हेमंत पाटील, आमदार सुभाष साबणे, आमदार नागेश पाटील आष्टीकर, आमदार वसंत चव्हाण, आमदार अमर राजूरकर, आमदार डॉ. तुषार राठोड, आमदार विक्रम काळे, आमदार प्रदिप नाईक, जिल्हाधिकारी अरुण डोंगरे, जिल्हा परिषदेचे मुख्य कार्यकारी अधिकारी अशोक काकडे, महानगरपालिका आयुक्त लहुराज माळी आदि मान्यवर उपस्थित होते.

प्रारंभी जिल्हा नियोजन समितीच्या मागील बैठकीच्या इतिवृत्तावरील अनुपालनास मान्यता देण्यात आली. जिल्हा वार्षिक योजनेच्या चालु वर्षीच्या खर्चाचा आढावा घेण्यात आला. सप्टेंबर अखेर झालेल्या खर्चानुसार सर्वसाधारण योनजेच्या 74 कोटी 79 लाख रुपयांच्या वितरीत तरतूदी पैकी 84 टक्के खर्च झाला आहे. अनुसूचित जाती उपयोजनेच्या 62 कोटी 78 लाख 27 हजार रुपये वितरीत तरतूदीपैकी 32 टक्के खर्च झालेला आहे. याशिवाय आदिवासी उपयोजनेच्या 23 कोटी 69 लाख रुपयांच्या वितरीत तरतूदीपैकी 16 टक्के खर्च संबंधित यंत्रणांकडून झाला असल्याची माहिती देण्यात आली.

सन 2018-19 च्या जिल्हा वार्षिक योजनेच्या सर्वसाधारण योजनेतील बांधकाम स्वरुपाच्या कामांच्या यादीस या बैठकीत मान्यता देण्यात आली. यामध्ये प्रामुख्याने ग्रामीण भागाच्या विकासाची कामे समाविष्ट आहेत. विजेच्या वाढत्या भारनियमनाचा प्रश्न या बैठकीत चर्चिला गेला. महावितरणने 299 रोहित्र खरेदी करण्यासाठी 4 कोटी 16 लाख 84 हजार रुपयांच्या अतिरिक्त निधीचा प्रस्ताव सादर केलेला आहे. या बैठकीत प्रस्तावाला मान्यता देण्यात आली.

जिल्ह्यात झालेल्या कमी पर्जन्यमानामुळे दुष्काळ सदृष्य परिस्थितीचा नजिकच्या काळात सामना करावा लागणार असल्याने त्यासंबंधीची दुष्काळ निवारणाची स्वतंत्र बैठक घेण्यात येईल, असे सांगून पालकमंत्री कदम यांनी यावेळी सदस्यांनी मांडलेल्या प्रश्नाविषयी सविस्तर विवेचन केले. यावेळी बावरीनगर दाभड येथील बौद्धविहार या स्थळास "क" वर्ग तिर्थक्षेत्र पर्यटनस्थळामध्ये समावेश करण्याचा निर्णय घेण्यात आला. लवंडेश्वर मंदिर व भवानी मंदिर तळणी ता. हदगाव आणि महादेव मंदिर शिऊर ता. हदगाव, शेंबोली ता. मुदखेड येथील खंडोबा मंदिर, भिमटेकडी व इदगा मैदानाला "क" दर्जाचे तिर्थक्षेत्र व पर्यटनस्थळ म्हणून घोषित करण्यात आले. याशिवाय तिर्थक्षेत्राच्या प्रस्तावांनाही यावेळी मान्यता देण्यात आली. धर्माबाद परिसरातील विकासाच्या 12 कोटी रुपयांच्या कामांसंदर्भात यावेळी चर्चा करण्यात आली. या बैठकीस समितीचे सदस्य असलेले लोकप्रतिनिधी तसेच विभाग प्रमुख अधिकारी उपस्थित होते.

00000

नांदेड जिल्ह्याच्या टंचाई निवारणास प्राधान्य

पाटबंधारे प्रकल्पातील पाणीसाठा

प्राधान्याने पिण्यासाठी आरक्षित

- पालकमंत्री रामदास कदम

नांदेड दि. 29 :- उन्हाळ्यातील पाणीटंचाईचा कालावधी लक्षात घेऊन नांदेड जिल्ह्याचे पालकमंत्री तथा राज्याचे पर्यावरण मंत्री रामदास कदम यांच्या अध्यक्षतेखाली जिल्ह्यातील विविध पाटबंधारे प्रकल्पातील उपलब्ध पाणीसाठ्यापैकी शहरी व ग्रामीण भागातील पिण्यासाठी 15 ऑगस्ट पर्यंत पुरेल एवढे पाणी आरक्षित करण्यात आले.

पालकमंत्री कदम यांच्या अध्यक्षतेखाली जिल्हा नियोजन समितीच्या सभागृहात पाणी आरक्षणाबाबत बैठक घेण्यात आली. या बैठकीस आमदार डी. पी. सावंत, आमदार हेमंत पाटील, आमदार सुभाष साबणे, आमदार नागेश पाटील आष्टीकर, आमदार वसंत चव्हाण, आमदार अमर राजूरकर, आमदार डॉ. तुषार राठोड, आमदार विक्रम काळे, आमदार प्रदिप नाईक, जिल्हाधिकारी अरुण डोंगरे, जिल्हा परिषदेचे मुख्य कार्यकारी अधिकारी अशोक काकडे, महानगरपालिका आयुक्त लहुराज माळी, पाटबंधारे विभागाचे अधिक्षक अभियंता एस. के. सब्बीनवार आदि मान्यवर तसेच विभागाचे अधिकारी उपस्थित होते.

पिण्याच्या पाण्याला संपूर्ण जिल्ह्यातील प्रकल्पातील जलाशयामध्ये सर्वोच्च प्राधान्य राहिल असे सांगून पालकमंत्री कदम यांनी जिल्ह्यातील विविध जलाशयातील उपलब्ध पाणीसाठा आणि शहरी व नागरी भागासाठीची संबंधित यंत्रणांची मागणी लक्षात घेऊन पाणी आरक्षणाचा निर्णय घेतला. यावेळी लोकप्रतिनिधींनी मांडलेल्या सुचना लक्षात घेण्यात आले. महानगरपालिका नांदेडसाठी विष्णूपूरी प्रकल्पात 30 दलघमी आणि उर्ध्व पैनगंगा प्रकल्पात 15 दलघमी पाणी आरक्षित करण्यात आले. याशिवाय जिल्हा परिषद नांदेडसाठी विष्णुपुरी प्रकल्पात 2 दलघमी आणि उर्ध्व पैनगंगा प्रकल्पात 35 दलघमी पाणी आरक्षीत करण्यात आला. याशिवाय विष्णुपुरी प्रकल्पात 1.50 दलघमी पाणी एमआयडीसी नांदेडसाठी ठेवण्यात आले आहे. तसेच जिल्ह्यातील विविध नगरपालिका व ग्रामीण भागासाठी जिल्हा परिषदेच्या मागणीप्रमाणे जिल्ह्यातील विविध प्रकल्पातील पाणी आरक्षीत करण्यात आले. उर्ध्व पैनगंगा, निम्म मानार बारुळ, विष्णुपूरी, पूर्णा, देवापूर या मोठ्या प्रकल्पात एकुण 93.10 दलघमी आणि उर्ध्व मानार लिंबोटी निम्म मानार बारुळ, कुंद्राळा, करडखेड, नागरझरी, कुदळा, उर्ध्व पैनगंगा प्रकल्प क्र. 4, बाभळी बंधारा या मध्यम प्रकल्पातील 18.80 दलघमी पाणीसाठा आरक्षित करण्यात आला तसेच पलाईगुडा, शेख फरिदवदरा, रेणापूर सुधा, सुनेगाव व उर्ध्व मानार लिंबोटी या लघु प्रकल्पात 4.80 दलघमी पाणी पिण्यासाठी आरक्षित करण्यात आले असल्याचे पालकमंत्री कदम यांनी जाहिर केले.

प्रारंभी जिल्हाधिकारी अरुण डोंगरे यांनी जिल्ह्यातील मोठ्या, मध्यम आणि लघु प्रकल्पातील पाणीसाठ्याची व जिल्ह्यातील पर्जन्यमानाची माहिती देऊन शहरी व ग्रामीण भागासाठी पाण्याची यंत्रणांनी केलेली मागणी आदिची माहिती दिली. अवैध पाणी उपशावर नियंत्रणासाठी समित्या गठित केल्या असून कार्यवाही सुरु असल्याचे सांगून जिल्हाधिकारी डोंगरे यांनी पाटबंधारे विभागाकडे थकीत पाणीपट्टी भरण्याबाबत जिल्हा परिषदेला सुचना केली. या बैठकीस संबंधित विभागाचे अधिकारी उपस्थित होते. बैठकीपूर्वी प्रधानमंत्री आवास योजनेच्या शहरी लाभार्थ्यांना कार्यारंभ आदेश देवून अंमलबजावणी प्रक्रियेचा शुभारंभ करण्यात आला.

000000