वृत्त क्रमांक 821

प्रलंबित प्रतिवेदन, ई-चालन संदर्भात 13 सप्टेंबर रोजी लोकअदालत  

नांदेड दि. 6 ऑगस्ट :- नांदेड प्रादेशिक परिवहन कार्यालयात प्रलंबित प्रतिवेदन, ई-चालन यासंदर्भात जिल्हा विधी सेवा प्राधिकरणाच्यावतीने शनिवार 13 सप्टेंबर 2025 रोजी लोकअदालत आयोजित केली आहे. 

प्रलंबीत प्रकरणांचा निपटारा करण्यासाठी जिल्हा विधी सेवा प्राधिकरणाद्वारे आयोजित केलेल्या या लोकअदालतमध्ये वाहनचालक, मालकांनी उपस्थित रहावे व तडजोड पद्धतीने आपल्या वाहनासंबंधी प्रकरणाचा निपटारा करावा. या उपलब्ध सुविधेचा संबंधितांनी लाभ घ्यावा, असे आवाहन उपप्रादेशिक परिवहन अधिकारी नांदेड यांनी केले आहे. 

00000

 वृत्त क्रमांक 820

बिगर व्यावसायिक प्रथम वर्षातील 

विद्यार्थ्यांसाठी शासकीय वसतिगृह योजना  

नांदेड दि. 6 ऑगस्ट :- जिल्ह्यात उच्च शिक्षण घेणाऱ्या बी.ए., बी.कॉम, बी.एस.सी.,एम.ए.,एम.एस.सी. अशा बिगर व्यावसायिक प्रथम वर्षातील अभ्यासक्रमाच्या प्रवेशित विद्यार्थ्यांनी सन 2025-26 या वर्षांसाठी शासकीय वसतिगृह योजनेचे ऑनलाईन अर्ज https://hmas.mahait.org या संकेतस्थळावर 17 ऑगस्ट 2025 पर्यंत भरावेत, असे आवाहन इतर मागास बहुजन कल्याणचे सहाय्यक संचालक शिवानंद मिनगिरे यांनी केले आहे.

इतर मागास बहुजन कल्याण विभागांतर्गत राबविण्यात येत असलेल्या विमुक्त जाती व भटक्या जमाती आणि विशेष मागास प्रवर्गातील उच्च शिक्षण घेणाऱ्या विद्यार्थ्यांसाठी शासकीय वसतिगृह योजना सुरू आहे. वसतिगृहात प्रवेशित विद्यार्थ्यांना उच्च शिक्षणाकरिता भोजन निवास व शैक्षणिक साहित्यासाठी त्यांच्या आधारसंलग्न बँक खात्यामध्ये थेट रक्कम वितरीत करण्यात येते.

00000

 वृत्त क्रमांक 819   

वादळी वाऱ्यासह मुसळधार पावसाची शक्यता

 

हवामानशास्त्र केंद्राने दिल्या सूचना

 

प्रादेशिक हवामानशास्त्र केंद्र मुंबई यांनी दि. 06 ऑगस्ट 2025 रोजी दुपारी 13:11 वाजता दिलेल्या सूचनेनुसार नांदेड जिल्ह्यासाठी दि. 06 ते 09 ऑगस्ट 2025 या चार दिवसांसाठी यलो (Yellow) अलर्ट जारी केलेला आहे. दि. 06 व 07ऑगस्ट 2025 हे दोन दिवस जिल्ह्यात तुरळक ठिकाणी ताशी 30 ते 40 किमी वेगाने वादळी वारे वाहण्याची, विजेच्या कडकडाटासह व ढगांच्या गडगडाटासह मुसळधार स्वरूपाचा व दि. 08 व 09 ऑगस्ट 2025 हे दोन दिवस जिल्ह्यात तुरळक ठिकाणी ताशी 30 ते 40 किमी वेगाने वादळी वारे वाहण्याची, विजेच्या कडकडाटासह व ढगांच्या गडगडाटासह हलका ते मध्यम स्वरूपाचा पाऊस पडण्याची अधिक शक्यता वर्तविली आहे. या नैसर्गिक आपत्ती संदर्भात सर्व संबंधित यंत्रणा आणि जनतेने खबरदारी घ्यावी. नागरिकांनी खबरदारीची उपाययोजना म्हणून पुढील प्रमाणे काळजी घ्यावी. असे आवाहन जिल्हा प्रशासनाकडून करण्यात आले आहे.

 

या गोष्टी करा

विजेच्या गडगडाटासह पावसाची पूर्वकल्पना असल्यास बाहेर जाणे टाळा. जर मोकळ्या जागेत असाल आणि जवळपास कुठल्याही सुरक्षित इमारतीचा आसरा नसेल तर सखल जागेत जाऊन गुडघ्यात डोके घालून बसा. आकाशात विजा चमकत असल्यास घरात किंवा सुरक्षित इमारतीत आश्रय घ्या. घराच्या बाल्कनी, छत अथवा घराबाहेरील ओट्यावर थांबू नका. आपण घरात असाल आणि घरातील विद्युत उपकरणे चालू असतील तर त्या वस्तू त्वरित बंद करा. तारांचे कुंपण, विजेचे खांब व इतर लोखंडी वस्तूंपासून दूर रहा. पाण्यात उभे असाल तर तात्काळ पाण्यातून बाहेर पडा. तुमच्या स्मार्ट मोबाईल फोन मध्ये 'दामिनी', 'सचेत' हे दोन ॲप डाउनलोड करा 'दामिनी' ॲप तुमच्या आजूबाजूला वीज विषयक संभाव्य धोके दर्शविते तर 'सचेत' ॲप मुळे तुम्हाला तुमच्या आजूबाजूच्या हवामानाविषयी अचूक इशारे व माहिती मिळते.

 

या गोष्टी करु नका

आकाशात विजा चमकत असल्यास घरातील लँडलाईन फोनचा वापर करू नका. शॉवरखाली अंघोळ करू नका. घरातील बेसिनचे नळ, पाण्याची पाईपलाइन यांना स्पर्श करू नका तसेच कुठल्याही विद्युत उपकरणांचा वापर करू नका. विजेच्या गडगडाटासह वादळी वारे चालू असताना लोखंडी धातूच्या सहाय्याने उभारलेल्या तंबूमध्ये किंवा शेडमध्ये आसरा घेऊ नका. उंच झाडाच्या खाली आसरा घेऊ नका. धातूंच्या उंच मनोऱ्याजवळ उभे टाकू नका. जर आपण घरात असाल तर उघड्या दारातून अथवा खिडकीतून वीज पडताना पाहू नका. हे बाहेर थांबण्याइतकेच धोकादायक आहे. असे आवाहन जिल्हा प्रशासनाकडून करण्यात आले आहे.

0000

 वृत्त क्रमांक 818 

उपमुख्यमंत्री अजित पवार यांची

खतगावकर यांच्या निवासस्थानी सांत्वनपर भेट

 

नांदेड दि. 6 ऑगस्ट :- राज्याचे उपमुख्यमंत्री अजित पवार यांनी आज माजी खासदार भास्करराव पाटील खतगावकर यांच्या नांदेड शहरातील साई निवास बाबानगर नांदेड येथील निवासस्थानी भेट देवून त्यांचे सांत्वन केले. त्यांच्या पत्नी कै. सौ. स्नेहलता भास्करराव पाटील खतगावकर यांचे अलिकडेच निधन झाले आहे. माजी मुख्यमंत्री तथा खासदार अशोकराव चव्हाण यांच्या त्या भगीनी होत्या.

 

यावेळी आमदार विक्रम काळे, आमदार सतिश चव्हाण, आमदार प्रतापराव पाटील चिखलीकर हे उपस्थित होते. 

00000

 वृत्त क्रमांक 817 

उपमुख्यमंत्री अजित पवार यांचे आगमन

नांदेड दि. 6 ऑगस्ट :- राज्याचे उपमुख्यमंत्री अजित पवार यांचे आज दुपारी श्री गुरू गोविंद सिंघजी विमानतळ नांदेड येथे आगमन झाले. यावेळी आमदार विक्रम काळे, आमदार सतीश चव्हाण,आमदार प्रताप पाटील चिखलीकर हे उपस्थित होते.

 

यावेळी जिल्हाधिकारी राहुल कर्डिले, नांदेड परिक्षेत्राचे विशेष पोलीस उपमहानिरीक्षक शहाजी उमाप, कुलगुरू डॉ. मनोहर चासकर, जिल्हा परिषदेच्या मुख्य कार्यकारी अधिकारी मेघना कावली, जिल्हा पोलीस अधीक्षक अबिनाश कुमार, मनपा आयुक्त महेशकुमार डोईफोडे आदींनी त्यांचे स्वागत केले.

00000

वृत्त क्रमांक 816

 

उत्तराखंड येथे गेलेले नांदेड जिल्ह्यातील सर्व यात्रेकरू सुखरुप

 

नांदेड दि. 5 ऑगस्ट :- उत्तराखंडमध्ये मुसळधार पावसामुळे आज 5 ऑगस्ट 2025 रोजी परिस्थिती गंभीर आहे. उत्तरकाशी जिल्ह्यातील धराली येथे ढगफुटी झाली असून ज्यामुळे खीरगंगा नदीला मोठा पूर आला आहे. अनेक घरांचे नुकसान झाले आहे आणि काही ठिकाणी भूस्खलन देखील झाले आहे.  उत्तराखंडमध्ये अतिवृष्टी झाली आहे. अनेक ठिकाणी ढगफुटीच्या घटना घडल्या आहेत. ज्यामुळे भूस्खलन आणि पूर आले आहेत. नांदेड जिल्ह्यातून बिलोली तालुक्यातील मौ. डोणगाव येथील 11 जण केदारनाथ बद्रीनाथ यात्रेसाठी 1 ऑगस्ट रोजी नांदेड येथून निघाले होते त्यांचा संपर्क झाला  आहे.  ते सर्व सद्यस्थितीत घटनास्थळापासून 150 किमी दूर असून सर्व 11 जण सुखरूप असल्याचे जिल्हा आपत्कालीन कार्य केंद्रास सचिन पत्तेवार यांनी कळविले आहे. 

 

त्या अकरा जणांची नावे पुढील प्रमाणे आहेत. सचिन पत्तेवार वय 25,शिवचंद्र सुकाळे वय 30,शिवा कुरे वय 32,स्वप्निल पत्तेवार वय 25,शिवा ढोबळे वय 28,धनंजय ढोबळे वय 26,नागनाथ मुंके वय 28,देवानंद गौण्डगे वय 24,अमोल कुरे वय 28,सोमनाथ चंदापुरे वय 29, देवानंद चंदापुरे वय 27.  

 

उत्तरकाशी येथे घडलेल्या परिस्थितीवर नांदेड जिल्ह्याचे  पालकमंत्री अतुल सावे हे लक्ष ठेवून असून आवश्यकते नुसार कार्यवाही करण्याच्या सूचना त्यांनी जिल्हाधिकारी यांना केल्या आहेत. नांदेड जिल्ह्यातील अजून कुणी उत्तराखंड येथे अडकून पडले असेल तर त्यांच्या नातेवाईकांनी संबंधित तालुक्यातील तहसीलदार यांच्याकडे किंवा जिल्हा आपत्कालीन कार्य केंद्र जिल्हाधिकारी कार्यालय नांदेड येथे (02462) 235077 या क्रमांकावर संपर्क करावा असे आवाहन जिल्हाधिकारी राहुल कर्डिले यांनी केले आहे.

0000

 वृत्त क्रमांक 815 

शिवाजी महाराज पुतळा ते महात्‍मा गांधी पुतळा रस्ता एकेरी मार्ग   

 

नांदेड दि. 5  ऑगस्ट :- नांदेड शहरातील महात्‍मा गांधी पुतळा ते शिवाजी महाराज पुतळा हा रस्‍ता दुहेरी मार्ग असून या रस्‍त्‍याचे काम होईपर्यंत हा मार्ग एकेरी वाहतुकीसाठी चालु राहणार आहे. महात्‍मा गांधी पुतळा ते शिवाजी महाराज पुतळा मार्ग वाहतुकीस प्रतिबंध करण्यात आला आहे. या मार्गावरील वाहतुकीस पर्यायी मार्ग म्हणून महात्‍मा गांधी पुतळा ते सोनु कार्नर, मुथा चौक ते शिवाजी महाराज पुतळा असा राहील.

 

मोटार वाहन कायदा 1999 चे कलम 115 मधील तरतुदीनुसार जिल्हादंडाधिकारी राहुल कर्डिले यांनी संबंधीत विभागांना उपाय योजना करुन 5 ते 30 ऑगस्ट 2025 या कालावधीत अधिसुचनेत नमुद केलेल्‍या पर्यायी मार्गाने सर्व प्रकारची वाहने वळविण्‍यास मान्‍यता दिली आहे.

 

पोलीस अधिक्षक नांदेड यांनी कायदा व सुव्‍यस्‍थेच्‍या अनुषंगाने आवश्‍यक त्या उपाय योजना करावी. कार्यकारी अभियंता सार्वजनिक बांधकाम विभाग नांदेड यांनी रस्‍ता वाहतुक प्रतिबंध व पर्यायी रस्‍त्‍यासाठी आवश्‍यक असलेले बोर्ड, चिन्‍ह लावणे इत्‍यादी बाबतची कार्यवाही करावी, असेही अधिसुचनेत स्पष्ट केले आहे.

0000