विश्वशांतीचे केंद्र म्हणून नांदेडला विकसित करण्यावर देऊ भर - पर्यटन मंत्री मंगलप्रभात लोढा

जिल्ह्यातील 15 क दर्जाच्या पर्यटन क्षेत्रावर प्राथमिक सुविधा

होट्टल महोत्सवासाठी भरीव तरतूद

लोकाभिमुखतेसाठी जिल्ह्यात पर्यटन समिती

वीर बाल दिवस व नांदेड महोत्सवाचे उद्घाटन संपन्न

नांदेड (जिमाका) दि. 25 :- अध्यात्म, तीर्थक्षेत्र आणि पर्यटन याचा सुरेख संगम नांदेड जिल्ह्यात आहे. संपूर्ण विश्वाला आवश्यक असलेल्या शांतीचे प्रतिक म्हणून नांदेडच्या पवित्र भूमीकडे पाहिले जाते. तख्त सचखंड श्री हुजूर साहिब गुरुद्वाराच्या माध्यमातून जो शांती व एकात्मतेचा संदेश दिला जातो तो अत्यंत मोलाचा आहे. येथील हे शक्तीस्थळ भक्तीसह विश्वशांतीचे केंद्र म्हणून विकसीत करण्यावर आपण सर्व मिळून भर देऊ, असे प्रतिपादन राज्याचे पर्यटन, कौशल्य विकास व उद्योजकता, महिला व बालविकास मंत्री मंगलप्रभात लोढा यांनी केले.

महाराष्ट्र शासन, पर्यटन विभाग, तख्त सचखंड श्री हुजूर साहिब गुरूद्वारा यांच्या संयुक्त विद्यमाने वीर बाल दिवस व नांदेड महोत्सवाचे उद्घाटन आज गुरुग्रंथ साहिब भवन, यात्री निवास परिसर नांदेड येथे त्यांच्या हस्ते संपन्न झाले. त्यावेळी ते बोलत होते. या समारंभास पंजाबचे विधानसभेचे सभापती स. कुलतार सिंघ संधवान, खासदार प्रतापराव पाटील चिखलीकर, आमदार राजेश पवार, आमदार मोहनराव हंबर्डे, खासदार स. विक्रमजित सिंघ साहनी, उपसभापती जयकिसन सिंघ, आमदार कुलवंत सिंघ, जिल्हाधिकारी अभिजीत राऊत, माजी पोलीस महासंचालक डॉ. परविंदरसिंघ पसरीचा, पोलीस अधीक्षक श्रीकृष्ण कोकाटे, मनपा आयुक्त डॉ. सुनिल लहाने, जिल्हा परिषदेचे प्रभारी मुख्य कार्यकारी अधिकारी एस. जी. माळवदे, दै. तरुण भारत वृत्तपत्राचे संपादक किरण शेलार, प्रविण साले, लड्डू सिंग महाजन आदींची उपस्थिती होती.

अखंड हिंदुस्थान हीच आपली ओळख आहे. आपल्या इतिहासात जर डोकावून पाहिले तर आपल्या अखंडत्वाला वेळोवेळी तोडण्याचा इतिहास आपल्या लक्षात येईल. इथे राहणाऱ्या सर्व धर्मांनी एकात्मता ठेऊन राष्ट्रहिताला प्राधान्य दिले. आपली एकात्मता यातूनच देशाची अखंडता टिकून राहिली आहे. ही अखंडता टिकवून ठेवण्यासाठी शीख धर्माने याचबरोबर साहिबजादा बाबा जोरावर सिंघजी व साहिबजादा फतेहसिंघजी यांचे बलिदान देश कधी विसरणार नाही, असे पर्यटन मंत्री मंगलप्रभात लोढा यांनी सांगितले. देशाच्या अखंडतेसाठी ज्यांनी बलिदान दिले आहे तो इतिहास नव्या पिढी पर्यंत पोहचावा या उद्देश ठेवून प्रधानमंत्री नरेंद्र मोदी यांनी वीरबाल दिवस साजरा करण्याचा निर्णय घेतला. त्याप्रमाणे महाराष्ट्रातील एक बुलंद संदेश नांदेड येथून देण्यास प्रारंभ करतांना आम्हाला आनंद असल्याचे त्यांनी सांगितले.

श्री गुरूगोविंदसिंघजी यांची ही पावन भूमी आहे. श्री गुरूगोविंदसिंघजी यांनी सदैव एकात्मतेवर भर दिला. त्यांनी संहिष्णुतेवर भर दिला. त्यांनी दिलेल्या या गुरूसंदेशाला विचारात घेऊन नांदेड हे विश्वशांतीचे केंद्र म्हणून विकसीत करण्यामध्ये पर्यटन विभागाने अधिक द्यावा, अशी मागणी खासदार प्रतापराव पाटील चिखलीकर यांनी आपल्या मनोगतात व्यक्त केली.

यावेळी सेवानिवृत्त व्हाइस चान्सलर पंजाबी युनिर्व्हसिटी पटीयालाचे डॉ. स. जसपाल सिंघजी, पंजाब कला परिषदेचे अध्यक्ष स. सुरजीत सिंघजी पातर, पंजाबी साहित्य अकॅडमीचे सेवानिवृत्त अध्यक्ष राजन खन्ना यांनी साहिबजादा बाबा जोरावर सिंघजी व साहिबजादा फतेसिंघजी यांच्या साहसाबद्दल माहिती दिली. श्री गुरूगोविंदसिंघजी यांनी धर्माचा अर्थ सत्य असल्याचे सांगितले आहे. सत्याचे पालन यातच संपूर्ण जगाच्या कल्याणाचा मार्ग असून भारताचा राष्ट्रवाद हा संताचा असल्याचे प्रतिपादन राजन खन्ना यांनी केले.

ज्या इतिहासावर आपण उभे आहोत तो इतिहास नव्या पिढी पर्यंत पोहचवणे आपल्या सर्वांचे कर्तव्य आहे. श्री गुरूगोविंदसिंघजी धर्मानुसार चालले म्हणून आपली अखंडता टिकून राहिल्याचे प्रतिपादन पंजाब विधानसभेचे सभापती कुलतारसिंघ संधवान यांनी केले. साहिबजादा बाबा जोरावर सिंघजी व साहिबजादा फतेसिंघजी हे येणाऱ्या पिढीचे आयकॉन असल्याचे तरुण भारत वृत्तपत्राचे संपादक किरण शेलार यांनी सांगितले.

जिल्हाधिकारी अभिजीत राऊत यांनी सर्व मान्यवरांचे स्वागत करून जिल्हा प्रशासनाच्यावतीने आभार व्यक्त केले. कार्यक्रमाचे बाल वीर दिवसानिमित्त दोन दिवस संपन्न होणाऱ्या कार्यक्रमाची रुपरेषा सांगुन प्रास्ताविक माजी पोलीस महासंचालक डॉ. परविंदरसिंघ पसरीचा यांनी केले.

*जिल्ह्यातील पर्यटनस्थळ व कौशल्य विकास विभागाबाबत पर्यटनमंत्री लोढा यांनी घेतली आढावा बैठक*

नांदेड जिल्ह्यातील पर्यटनस्थळे व तीर्थक्षेत्र यांचे महत्व लक्षात घेता यावर येत्या काळात अधिक भर दिला जाईल. रोजगार व स्वयंरोजागाराच्या संधी त्या-त्या पर्यटन तीर्थक्षेत्राच्या भागात मोठ्या प्रमाणात उपलब्ध होऊ शकतात यादृष्टिने आमचे नियोजन सुरू आहे. पर्यटनक्षेत्राच्या विकास कामात लोकसहभागही तेवढाच महत्वाचा असतो. पर्यटनक्षेत्राच्या संदर्भात असणाऱ्या ज्या सेवासुविधा लागतात त्यात कार्य करणारे हॉटेल, गाईडस्, पर्यटनाशी काम करणाऱ्या सेवाभावी संस्था यांचा सहभाग तेवढाच आवश्यक असतो. हे लक्षात घेता जिल्हा पातळीवर पर्यटनाच्या विकासासंदर्भात अशासकीय सदस्यांची एक समिती नियुक्त करण्याचे निर्देश पर्यटन मंत्री मंगलप्रभात लोढा यांनी दिले.

जिल्हाधिकारी कार्यालयात झालेल्या आढावा बैठकीस जिल्हाधिकारी अभिजीत राऊत, मनपा आयुक्त डॉ. सुनिल लहाने, उपजिल्हाधिकारी अनुराधा ढालकरी, संतोषी देवकुळे, उपविभागीय अधिकारी विकास माने, जिल्हा परिषदेच्या उपमुख्य कार्यकारी अधिकारी (महिला व बालकल्याण) रेखा काळम, कौशल्य विकास विभागाच्या सहाय्यक आयुक्त रेणुका तम्मलवार उपस्थित होते.

जिल्ह्यातील एकुण पर्यटनक्षेत्रापैकी प्राथमिक स्तरावर क दर्जाच्या 15 पर्यटनक्षेत्रावर प्राथमिक पायाभूत सुविधा विकसीत केल्या जातील, असे पर्यटन मंत्री लोढा यांनी जाहीर केले. होट्टल महोत्सवासाठी भरीव तरतूद करून या ठिकाणी जनसुविधेच्या हिताला प्राधान्य दिले जाईल, असे त्यांनी स्पष्ट केले. हा महोत्सव एप्रिल ऐवजी फेब्रुवारी महिन्यात घ्यावा या सूचनेचा त्यांनी स्विकार करून पर्यटन विभागाला निर्देश दिले. याचबरोबर जिल्ह्यातील विविध तीर्थक्षेत्र व पर्यटन क्षेत्र यांना जोडणारे एक सर्किट निर्माण करून विकासावर भर देऊ असेही त्यांनी सांगितले. शंभर किमी परिसरातील जेवढी पर्यटनस्थळे येतील, तीर्थक्षेत्र येतील त्याचा यात समावेश असेल, असेही त्यांनी स्पष्ट केले.

*राज्यात पाच लाख बेरोजगारांना देऊ रोजगार*

ग्रामीण भागातील युवकांना रोजगाराच्या व स्वयंरोजगाराच्या संधी ग्रामीण पातळीवरच उपलब्ध व्हाव्यात यादृष्टिने आम्ही भर देत आहोत. खेड्यापाड्यातील विद्यार्थ्यांना आयटीआय केंद्राच्या मार्फत वेगळे कोर्सेस तयार करीत आहोत. यात प्रामुख्याने सौरऊर्जा, कृषिक्षेत्र याबाबींचा विचार आम्ही केला आहे. राज्यात सुमारे पाच लाख युवकांना रोजगार व स्वयंरोजगार उपलब्ध करून दिला जाईल, असे कौशल्य विकास व उद्योजकता मंत्री मंगलप्रभात लोढा यांनी सांगितले.

*वीर बालकांच्या शहिदांची आठवण करतांना पर्यटन मंत्री मंगलप्रभात लोढा यांनी गाऊन व्यक्त केल्या भावना*

साहिबजादा बाबा जोरावर सिंघजी व साहिबजादा बाबा फतेह सिंघजी यांच्या वीर बलिदानाचे स्मरण करतांना पर्यटन मंत्री मंगलप्रभात लोढा यांना आपल्या भावना व्यक्त करतांना “कही पर्वत झुके भी है” हे गीत गाऊन दाखविले. त्या गिताचे बोल पुढील प्रमाणे आहेत.

कही पर्वत झुके भी है,

कही दरिया रूके भी है,

नहीं रूकती रवानी है,

नहीं झुकती जवानी है।।

गुरू गोबिंद के बच्चे,

उमर मे थे अगर कच्चे,

मगर थे सिंह के बच्चे,

धर्म ईमान के सच्चे,

गरज कर बोल उठे थे यूँ,

सिंह मुख खोल उठे थे यूँ,

नही हम रूके नही सकते,

नही हम झूके नही सकते,

कही पर्वत झुकें भी है,

कही दरिया रूके भी है,

नहीं रूकती रवानी है,

नहीं झुकती जवानी है।।

हमे निज देश प्यारा है,

हमे निज धर्म प्यारा है,

पिता दशमेश प्यारा है,

श्री गुरू ग्रंथ प्यारा है,

जोरावर जोर से बोला,

फतेहसिंह शोर से बोला,

रखो ईटें भरो गारा,

चुनो दिवार हत्यारों,

कही पर्वत झुकें भी है,

कही दरिया रूके भी है,

नहीं रूकती रवानी है,

नहीं झुकती जवानी है।।

निकलती स्वास बोलेगी,

हमारी लाश बोलेगी,

यही दिवार बोलेगी,

हजारों बार बोलेगी,

हमारे देश की जय हो,

पिता दशमेश की जय हो,

हमारे धर्म की जय हो,

श्री गुरू ग्रंथ की जय हो,

कही पर्वत झुकें भी है,

कही दरिया रूके भी है,

नहीं रूकती रवानी है,

नहीं झुकती जवानी है।।

कही पर्वत झुके भी है,

कही दरिया रूके भी है,

नहीं रूकती रवानी है,

नहीं झुकती जवानी है।।

00000

 

 माळेगाव यात्रेत सुशासन आणि गरीब कल्याण विषयावर प्रदर्शन

 

नांदेड (जिमाका) दि. 24 :- भारतीय स्वातंत्र्याच्या अमृत महोत्सवानिमित्त (आझादी का अमृत महोत्सव) तसेच केंद्र सरकारच्या ‘8 वर्षे सेवा, सुशासन आणि गरीब कल्याणाची’ या विषयावर आधारित भव्य बहु-माध्यम प्रदर्शानास आज पासून शानदार सुरुवात झाली. या प्रदर्शनाचे उद्घाटन जिल्हा परिषदचे प्रभारी मुख्य कार्यकारी अधिकारी संदीप माळोदे यांच्या हस्ते झाले.

 

यावेळी गटविकास अधिकारी शैलेश वावळे, सामाजिक कार्यकर्ते प्रविण पाटील चिखलीकर, माळेगावचे सरपंच हनुमंत धुळगुंडे, स्वच्छ भारत अभियानाचे मिलींद व्यवहारे, केंद्रीय संचार ब्यूरोचे क्षेत्रीय प्रचार अधिकारी माधव जायभाये, इंद्रवदनसिंह झाला, सुमित दोडल आदी मान्यवर उपस्थित होते.

 

आझादी का अमृत महोत्सव व केंद्र सरकारचे ‘आठ वर्षे सेवा, सुशासन आणि गरीब कल्याणाची’ या बहुमाध्यम प्रदर्शनातून आपल्याला स्वातंत्र्य लढ्याची सर्व माहिती तसेच केंद्र सरकारच्या 8 वर्षे कामगिरीची माहिती अत्यंत कमी वेळात आत्मसात होते, असे सांगून या अभियास संदीप माळोदे यांनी शुभेच्छा दिल्या.

भारत सरकारच्या माहिती आणि प्रसारण मंत्रालयाअंतर्गत नांदेड येथील केंद्रीय संचार ब्यूरोद्वारे या प्रदर्शनाचे आयोजन करण्यात आले आहे. या प्रदर्शनात भारतीय स्वातंत्र्य लढ्याच्या इतिहासातील विविध महत्वाच्या घटना-घडामोडी सोबतच 1857 ते 1947 भारतीय स्वातंत्र्य लढ्यातील महान स्वातंत्र्य सेनानी यांची जीवनगाथा व केंद्र सरकारच्या 8 वर्ष सेवाची माहिती बहूमाध्यम स्वरुपात माडण्यात आली आहे.

 

2 हजार 500 चौरस फुटावर आयोजित या आकर्षक सजावट बहूमाध्यम प्रदर्शात आझादी क्वेश्ट (भारत के हिरो) आनलाईन खेळ, डिजिटल स्क्रीन, एलईडी वाल्स, विविध स्वातंत्र्य लढ्यातील महान स्वातंत्र्य सेनानीचे कटाउट्स, सेल्फी बुथ आणि स्वाक्षरी वालच्या माध्यमातून अंत्यत सोप्या भाषेत माहिती देण्यात आली आहे. या पाच दिवशीय प्रदर्शनात सांस्कृतिक कार्यक्रमाचेही आयोजन करण्यात आले आहे. शाहीर रमेश गिरी यांच्या कलापथकाद्वारे देशभक्तीपर गितांतून मनोरंजन करण्यात येत आहे. हे प्रदर्शन सकाळी 9 ते रात्री 8 वाजेपर्यंत सर्वांसाठी मोफत खुले आहे. माळेगाव यात्रेस भेट देणाऱ्या नागरिकांनी प्रदर्शनाचा लाभ घ्यावा, असे आवाहन केंद्र सरकारद्वारे करण्यात आले आहे.

00000

 आदिवासींच्या अनुदानावरील विविध योजनांसाठी

30 जानेवारी पर्यंत अर्ज करण्याची मुदत

 

नांदेड (जिमाका) दि. 24 :- केंद्रवर्ती अर्थसंकल्प योजना सन 2022-23 अंतर्गत मंजूर योजनाचा लाभ घेण्यासाठी अनुसूचित जमातीच्या लाभार्थ्यांकडून पुढील तपशिलातील नमूद योजनाचे अर्ज नि:शुल्क मागविण्यात येत आहेत. या योजनांचे अर्ज किनवट प्रकल्पातील लाभार्थ्यांसाठी प्रकल्प अधिकारी एकात्मिक आदिवासी विकास प्रकल्प किनवट या ठिकाणी उपलब्ध आहेत. अधिक माहितीसाठी या कार्यालयातील सेवायोजन कक्ष येथे दूरध्वनी क्रमांक 02469-222015 वर संपर्क साधावा. योजनेचे परिपुर्ण अर्ज दिनांक 30 जानेवारी 2023 पर्यंत कार्यालयीन वेळेत सादर करावीत, असे आवाहन प्रकल्प अधिकारी तथा सहायक जिल्हाधिकारी नेहा भोसले यांनी केले आहे.

 

गट- अ मध्ये आदिवासी शेतकऱ्यांना 85 टक्के अनुदानावर तुषार / ठिबक संच खरेदी करण्यासाठी अर्थसहाय्य करणे. आदिवासी लाभार्थ्यांना 85 टक्के अनुदानावर टिनपत्रे खरेदी करण्यासाठी, आदिम जमातीच्या कोलाम लार्थ्यांना शंभर टक्के अनुदानावर टिनपत्रे खरेदी करण्यासाठी, आदिवासी शेतकरी लाभार्थ्यांना 85 टक्के अनुदानावर तारकुंपन खरेदी करण्यासाठी, आदिवासी युवक-युवतींना वैयक्तिक रोजगार संधी उपलब्ध होण्यासाठी 85 टक्के अनुदानावर संगणक व प्रिंटर संच खरेदी करण्याकरीता अर्थसहाय्य करणे.

 

गट- ब मध्ये आदिवासी युवक-युवतींना गट क पदे स्पर्धात्मक पूर्वतयारी निवासी प्रशिक्षण देणे. आदिवासी युवक-युवतींना डीएड / बीएड टीईटी परिक्षेचे निवासी प्रशिक्षण देणे. आदिवासी युवक-युवतींना रुग्णसहायक-सहायीका अभ्यासक्रम निवासी प्रशिक्षण देणे. गट-क मध्ये शासकिय आश्रमशाळेतील विद्यार्थ्यांसाठी प्रशिक्षण देण्याकरीता एकुण 6 योजनेस मंजुरात आहेत. याकरीता या प्रकल्पाअंतर्गत शासकीय आदिवासी आश्रमशाळा मुख्याध्यापकांनी अर्ज सादर करावेत.

 

या योजनेकरीता शासन निर्णयानुसार प्राप्त झालेल्या अर्जाच्या संगणीकृत यादी तयार करण्यात येईल. त्यानंतर कागदपत्रे तपासणी करून पात्र / अपात्र अर्जदाराच्या स्वतंत्र याद्या तयार करण्यात येईल. लाभार्थी निवड करतांना प्रथम अपंग, विधवा, परितक्त्या, निराधार महिला यांना प्राधान्याने योजनेचा लाभ देण्यात येईल. तसेच प्रशिक्षण योजनेकरीता स्वयंसेवी / सेवाभावी संस्थानी गट-ब व गट-क चे प्रशिक्षणाचे योजनेकरीता या कार्यालय स्तरावर विहित नमुन्यात प्रस्ताव / अर्ज सादर करावेत. याकरीता या कार्यालयाचे सेवायोजन शाखेशी संपर्क साधावा, असेही आवाहन प्रकल्प अधिकारी तथा सहायक जिल्हाधिकारी नेहा भोसले यांनी केले आहे.

0000

 पर्यटन मंत्री मंगलप्रभात लोढा यांच्या हस्ते वीर बालदिवस व नांदेड महोत्सवाचे रविवारी उद्घाटन

 नांदेड (जिमाका) दि. 23 :- राज्याचे पर्यटन, कौशल्य विकास व  उद्योजकता, महिला व बालविकास मंत्री मंगलप्रभात लोढा यांच्या हस्ते वीर बाल दिवस व नांदेड महोत्सवाचे उद्घाटन रविवार 25 डिसेंबर 2022 रोजी गुरुग्रंथ साहिब भवन, यात्री निवास परिसर नांदेड येथे सकाळी 10 वा. होणार आहे. ग्राम विकास आणि पंचायती राज, वैद्यकीय शिक्षण, क्रीडा व युवक कल्याण मंत्री तथा नांदेड जिल्ह्याचे पालकमंत्री गिरीष महाजन यांच्या अध्यक्षतेखाली होणाऱ्या समारंभास माजी मुख्यमंत्री अशोक चव्हाण, खासदार प्रतापराव पाटील चिखलीकर, खासदार हेमंत पाटील, खासदार सुधाकर श्रृंगारे, आमदार सतीश चव्हाण, आमदार विक्रम काळे, आमदार राम पाटील रातोळीकर, आमदार मोहनराव हंबर्डे, आमदार भिमराव केराम, आमदार माधवराव पाटील जवळगावकर, आमदार डॉ. तुषार राठोड, आमदार श्यामसुंदर शिंदे, आमदार बालाजी कल्याणकर, आमदार राजेश पवार, आमदार जितेश अंतापुरकर यांची प्रमुख उपस्थिती राहणार आहे.

 

याचबरोबर माजी पोलीस महासंचालक डॉ. परविंदरसिंघ पसरीचा, पर्यटन व सांस्कृतिक विभागाचे सचिव सौरभ विजय, विभागीय आयुक्त सुनिल केंद्रेकर, पर्यटन संचलनालयाचे संचालक डॉ. बी. एन. पाटील, जिल्हाधिकारी अभिजीत राऊत, पोलीस अधीक्षक श्रीकृष्ण कोकाटे, मनपा आयुक्त डॉ. सुनिल लहाने, जिल्हा परिषदेचे प्रभारी मुख्य कार्यकारी अधिकारी एस. जी. माळवदे यांची उपस्थिती राहणार आहे.   

 

वीर बाल दिवस व नांदेड महोत्सवात रविवार 25 डिसेंबर 2022 रोजी सकाळी 11 ते दुपारी 1 वा. या कालावधीत गुरुग्रंथ साहिब भवन, यात्री निवास परिसर, नांदेड येथे चर्चासत्र. सायं. 5.30 ते 6.30 वाजेपर्यंत मार्शल आर्टस्, रात्री 8.30 वा. गुरुग्रंथ साहिब भवन, यात्री निवास परिसर नांदेड येथे शबद किर्तनाचे आयोजन केले आहे.

 

सोमवार 26 डिसेंबर 2022 रोजी सकाळी 8 ते 11 वा. महात्मा फुले पुतळ्यापासून ते गुरुग्रंथ साहिब भवन यात्री निवास परिसर नांदेड या मार्गावर शालेय विद्यार्थ्यांची प्रभात फेरी. दुपारी 12.15 ते 2.30 या कालावधीत गुरुग्रंथ साहिब भवन यात्री निवास परिसर नांदेड येथे निबंध, वक्तृत्व स्पर्धा व कविता वाचन. सायं. 5.30 ते 6.30 पर्यंत गोदावरी नदीकाठी (नगीनाघाट) येथे मार्शल आर्टस तर रात्री 8.30 वा. गुरूग्रंथ साहिब भवन यात्री निवास परिसरात शबद किर्तनाचे आयोजन केले आहे.

0000

 लोकाभिमूख उपक्रम हीच सुशासनाची ओळख

-   जिल्हाधिकारी अभिजीत राऊत

 

नांदेड (जिमाका) दि. 23 :- ग्रामीण व दुर्गम भागासह सर्व लोकांची शासनाशी संबंधित असलेली सर्व कामे पारदर्शक पद्धतीने व निर्देशीत केलेल्या कालावधीत निकाली निघाली पाहिजेत. यासाठी लोकाभिमूख प्रशासन महत्वाचे असते. प्रशासकीय पातळीवर याला अधिक गती मिळावी व कर्तव्य तत्परता वाढावी यादृष्टिने 25 डिसेंबर हा सुशासन दिन म्हणून साजरा केला जातो. लोकाभिमूख उपक्रम हीच सुशासनाची ओळख असते. याला चालना मिळावी व जिल्ह्यात ज्या-ज्या विभागामार्फत अधिक पारदर्शक व लोकाभिमूख कामे पार पडली आहेत अशा कामांना प्रोत्साहन देणे आवश्यक असते. चांगले उपक्रम हे सदैव राबविण्यावर भर देण्याचे निर्देश जिल्हाधिकारी अभिजीत राऊत यांनी दिले.

 

सुशासन सप्ताह व 25 डिसेंबर रोजी साजरा केल्या जाणाऱ्या सुशासन दिनाच्या आढावा बैठकीत ते बोलत होते. यावेळी अपर जिल्हाधिकारी पी. एस. बोरगावकर, मनपा आयुक्त डॉ. सुनिल लहाने, निवासी उपजिल्हाधिकारी अनुराधा ढालकरी, उपजिल्हाधिकारी संतोषी देवकुळे, जिल्हा पुरवठा अधिकारी लतीफ पठाण, उपविभागीय पोलीस अधिकारी अश्विनी जगताप, जिल्हा शल्य चिकित्सक डॉ. निळकंठ भोसीकर, जिल्हा आरोग्य अधिकारी डॉ. बालाजी शिंदे, शिक्षणाधिकारी (मा.) प्रशांत दिग्रसकर, जिल्हा अधीक्षक कृषि अधिकारी रविशंकर चलवदे, भोकर तहसिलदार राजेश लांडगे, जिल्हा परिषदेच्या उपमुख्य कार्यकारी अधिकारी (महिला व बालविकास) रेखा काळम यांनी त्यांच्या विभागामार्फत राबविल्या जाणाऱ्या उपक्रमाबाबत सचित्र सादरीकरण केले.

000000 

डॉ. शंकरराव चव्हाण भव्य कृषी प्रदर्शनाचे

आमदार श्यामसुंदर शिंदे यांच्या हस्ते माळेगाव येथे उद्घाटन संपन्न

डॉ. शंकरराव चव्हाण कृषिनिष्ठ शेतकरी पुरस्काराचे वितरण

नांदेड (जिमाका) दि. 23 :- श्रीक्षेत्र माळेगाव यात्रेत जिल्हा परिषदेच्या कृषि विभागामार्फत 22 ते 26 डिसेंबर कालावधीत कृषि प्रदर्शनाचे आयोजन करण्यात आले आहे. या कृषि प्रदर्शनाचे उद्घाटन 22 डिसेंबर 2022 रोजी आमदार श्यामसुंदर शिंदे यांच्या हस्ते करण्यात आले.

यावेळी जिल्हाधिकारी अभिजीत राऊत, जिल्हा परिषदेचे प्रभारी मुख्य कार्यकारी अधिकारी संदीप माळोदे, जिल्हा अधिक्षक कृषि अधिकारी रविशंकर चलवदे, प्रकल्प संचालक डॉ. संजय तुबाकले, कृषि विकास अधिकारी डॉ.टी.जी. चिमनशेट्टे, महाराष्ट्र शासनाचे कृषि भुषण प्राप्त शेतकरी डॉ.शिवाजी शिंदे, आत्मा प्रकल्प उपसंचालक श्रीमती सोनवणे, जिल्हा कृषि अधिकारी (विघयो) श्रीमती भाग्यश्री भोसले, मोहीम अधिकारी गजानन हुंडेकर, जिल्हा कृषि अधिकारी व्ही.एस. निरडे, माजी जिल्हा परिषद सदस्य चंद्रसेन पाटील यांची उपस्थिती होती.

डॉ. शंकरराव चव्हाण कृषिनिष्ठ शेतकरी पुरस्काराचे यावेळी वितरण करण्यात आले. यामध्ये शेती क्षेत्रात आधुनिक तंत्रज्ञानाचा वापर करुन उत्कृष्ट कार्य केल्याबद्दल प्रत्येक तालुक्यातून एक याप्रमाणे सन 2021-22 चे 16 व 2022-23 चे 16 असे एकूण 32 शेतकऱ्यांचा सन्मान चिन्ह, साडीचोळी, शाल, फेटा व प्रमाणपत्र देऊन सपत्नीक गौरव करण्यात आला. जिल्हयातील शेतकरी, कृषि निविष्ठा कंपनीचे प्रतिनिधी स्टॉलधारक उपस्थित होते. यावेळी मान्यवरांनी कृषि विभागामार्फत आयोजित फळे, भाजीपाला, मसाला पिके प्रदर्शन व स्पर्धामध्ये शेतकऱ्यांनी उत्पादीत केलेल्या गुणवत्ता पुर्ण पिकांच्या नमुन्याचे पाहणी करुन शेतकऱ्यांचे कौतुक केले.

या कृषि प्रदर्शनात एकूण 113 स्टॉल आहेत. ट्रॅक्टर, कृषि औजारे उत्पादक, बियाणे उत्पादक कंपनी, रासायनिक खते, किटकनाशक औषधी, सेंद्रीय शेती उत्पादन, खाद्यपदार्थ, शेतकऱ्यांची शेती उत्पादने, नर्सरी, कृषि विज्ञान केंद्र पोखर्णी, कृषि विज्ञान केंद्र सगरोळी, महाबीज, वसंतराव नाईक मराठवाडा कृषि विद्यापीठ परभणी, तालुका कृषि अधिकारी लोहा यांचे हे कृषि स्टॉल यात्रेच्या पाच दिवसांच्या कालावधीत सकाळी 9 ते रात्री 9 या वेळेत स्टॉल सुरु राहणार आहेत. जिल्हा परिषद कृषि विभागाच्या वतीने जिल्हास्तरीय फळे, भाजीपाला, मसाला पिकांचे प्रदर्शन व स्पर्धा आयोजित करण्यात आल्या आहेत. यामध्ये विविध पिकांच्या शेतकऱ्यांनी सहभाग नोंदविला आहे. या पिकांमध्ये स्पर्धा आयोजित केली आहे. उत्कृष्ट नमुन्याची निवड उपविभागीय कृषि अधिकारी नांदेड यांच्या अध्यक्षतेखाली गठीत समितीमार्फत करण्यात येणार आहे. प्रथम, द्वितीय, तृतीय क्रमांकाच्या उमेदवारांना अनुक्रमे 4 हजार रुपये, 3 हजार रुपये, 2 हजार रुपये बक्षीस व प्रशस्तीपत्र देण्यात येणार आहेत.

प्रास्ताविक कृषि विकास अधिकारी टी.जी. चिमनशेट्टे यांनी केले तर सुत्रसंचालन राम कवडे यांनी केले. आभार कृषि अधिकारी सिकंदर पठाण यांनी मानले. हे प्रदर्शन आयोजनासाठी जिल्हा कृषि अधिकारी व्ही.एस. निरडे, पुंडलिक माने, माजी जिल्हा कृषि विकास अधिकारी संभाजी कऱ्हाळे, मोहीम अधिकारी गजानन हुंडेकर यांनी सहाय्य केले.

00000

 आधारभूत किंमत खरेदी योजनेच्या

ऑनलाईन नोंदणीसाठी 31 डिसेंबर पर्यत मुदतवाढ 

नांदेड (जिमाका) दि. 23 :-आधारभूत किंमत खरेदी योजना खरीप हंगाम 2022-23 मध्ये धान/भरडधान्य खरेदी करण्यासाठी धान भरडधान्य उत्पादक शेतकऱ्यांची ऑनलाईन नोंदणी बिलोली  (कासराळी) येथील केंद्रावर सुरू आहे. ही ऑनलाईन नोंदणी करण्यासाठी शनिवार 31 डिसेंबर 2022 पर्यंत मुदतवाढ देण्यात आली आहे. 

नोंदणीसाठी चालु हंगामातील पीकपेरा, ऑनलाईन नोंद असलेला सातबारा, बँक खात्याची साक्षांकीत प्रत, आधार कार्ड प्रत तसेच शेतकऱ्यांचा मोबाईल नंबर इत्यादी कागदपत्रासह शेतकऱ्यांनी स्वत: उपस्थित राहून पोर्टलवर ऑनलाईन नोंदणी दरम्यान लाईव्ह फोटो अपलोड करायचा आहे. या योजनेचा शेतकरी बांधवांनी लाभ घेण्यासाठी मुदतीत नोंदणी करावी, असे आवाहन जिल्हा पणन अधिकारी नांदेड यांनी केले आहे. 

00000