हवामान खात्याच्या अंदाजानुसार

शेतकऱ्यांच्या खरीपाच्या आशा पल्लवीत

नांदेड, (जिमाका) दि. 16 :- यावर्षी हवामान विभागाच्या अंदाजानुसार पावसाला वेळेवर सुरूवात होणार असून सरासरी इतका पाऊस पडेल असा अंदाज हवामान खात्याने व्यक्त केला आहे. त्यामुळे  शेतकऱ्यांसाठी व कृषी विभागासाठी हे वर्षा समाधानाचे जाईल अशी आशा वाटते. कोविड-19 विषाणूच्या लॉकडाऊनच्या काळात शेती व्यवसायाला काही अंशी सूट मिळाली आहे. बळीराजा आता शेतीच्या पूर्वमशागतीसह इतर कामे पूर्ण करून पेरणीसाठी सज्ज होतो आहे.

कंधार तालुक्यात खरीप पेरणी क्षेत्र 68 हजार हेक्टर असून मुख्य पीक कापूस साधारणतः 28 हजार हेक्टरवर तर सोयाबीन साधारणत: 22 हजार हेक्टरवर पेरले जाते. त्यानंतर ज्वारी तुर मुग उडीद ही खरीप पिके प्रामुख्याने घेतली जातात. तालुक्यात यावर्षी खरीपासह रब्बी व उन्हाळी हंगामात पेरणी मोठ्या प्रमाणावर झाली असून पीक घनता जवळपास 134 टक्के झाली आहे. रब्बी हंगामात हरभरा, गहू ,रब्बी ज्वारी तर उन्हाळी हंगामात भुईमूग, ज्वारी या पिकांची लागवड मोठ्या प्रमाणात तर तिळासह  भाजीपाला चारा पिकांची लागवड  करण्यात आली.

कृषी विभागाच्या विविध योजनांचा शुभारंभ

खरीप हंगाम 2020 मध्ये कृषी विभागामार्फत काही उपक्रम हाती घेतले असून यामध्ये सोयाबीन पेरणीसाठी घरचे बियाणे वापरणे, या सोयाबीनची उगवण क्षमता तपासणी करणे व त्यानंतर बीजप्रक्रिया करून रुंद सरी वरंबा पद्धतीने पेरणी करण्यावर  विभागाने मार्गदर्शन करून भर दिला आहे. सोयाबीन बियाणे उगवण क्षमता प्रात्यक्षिके क्षेत्रीय कर्मचाऱ्यांना मार्फत तालुक्‍यात गावोगावी मोठ्या प्रमाणावर घेतले जात असून नुकतीच उगवण क्षमता चाचणीचे प्रात्यक्षिक आमदार शामसुंदर शिंदे यांच्या हस्ते हाळदा येथे शेतकऱ्यांच्या उपस्थितीत घेण्यात आले.

कृषी निविष्ठाची खरेदी गटामार्फत

एकत्रितरित्या थेट बांधावर उपक्रमाचा शुभारंभ

कृषी निविष्ठांच्या खरेदीसाठी कृषी निविष्ठा विक्री केंद्रावर शेतकऱ्यांची गर्दी होऊ नये व कोरोना विषाणूंचा प्रादुर्भाव पासून सुरक्षित राहण्यासाठी बाजारातील गर्दी टाळण्यासाठी कंधार तालुक्यातील आत्मा अंतर्गत नोंदणी झालेले गट व गावातील शेतकऱ्यांना अशा निविष्ठांची खरेदी एकत्रितरीत्या करण्याबाबत कृषी विभागाकडून मोठ्या प्रमाणावर जनजागृती करून थेट बांधावर कृषी निविष्ठा पुरवण्यासाठी मोठ्या प्रमाणावर प्रयत्न करण्यात येत आहेत. याचाच एक भाग म्हणून आज मौ. बिजेवाडी तालुका कंधार येथील वसंतराव नाईक शेतकरी गट यांना कृषी निविष्ठांचा थेट बांधावर पुरवठा या उपक्रमाअंतर्गत आमदार श्यामसुंदर शिंदे यांच्या हस्ते आज कंधार येथे करण्यात आला. यावेळी या 4 गटातील एकूण 70 शेतकऱ्यांना 20 टन रासायनिक खते व बियाणे  21  क्वि. थेट बांधावर विक्री करण्यात आले.

याप्रसंगी उपविभागीय कृषी अधिकारी आर. टी. सुखदेव, तालुका कृषी अधिकारी रमेश देशमुख, मंडळ कृषी अधिकारी नागोराव आंबुलगेकर, विकास नरनाळीकर, पवनसिंह बैनाडे , कृषी पर्यवेक्षक, कृषी सहाय्यक यांची उपस्थिती होती. या निविष्ठांचा थेट बांधावर पुरवठा विषाणूच्या पार्श्वभूमीवर योग्य खबरदारी घेऊन मास्क बांधून व सुरक्षित अंतर ठेवून करण्यात आला.

कृषी यांत्रिकीकरण अंतर्गत ट्रॅक्टरचलीत औजारांची पाहणी कंधार तालुक्यातील मौ. बहाद्दरपुरा येथे केली यावेळी शिवाजी गणपती पेठकर यांनी खरेदी केलेल्या रोटाव्हेटरची पाहणी केली. तालुक्यात यावर्षी ट्रॅक्टर व ट्रॅक्टरचलीत औजारे साठी 52 लाख रुपये अनुदान शेतकऱ्यांच्या खात्यावर डीबीटीद्वारे जमा केले.

मनरेगा अंतर्गत फळबाग लागवडीचा शुभारंभ

महात्मा गांधी राष्ट्रीय  ग्रामीण रोजगार हमी योजनेअंतर्गत मौ. बिजेवाडी तालुका कंधार येथे कल्पवृक्ष फळबाग लागवड अंतर्गत आंबा फळपीक लागवडीचा शुभारंभ आमदार श्यामसुंदर शिंदे यांच्या हस्ते करण्यात आला. चालू वर्षी या योजनेतून इच्छुक पात्र लाभार्थ्यांना फळबाग लागवड करण्यासाठी कृषी विभागाकडून विशेष प्रयत्न करण्यात येत आहेत व मोठ्या प्रमाणावर फळ पिकाची लागवड करण्यासाठी प्रयत्न करण्यात येत आहेत. मौ. बिजेवाडी येथे गजानन संभाजी डांगे यांच्या आंबा फळ लागवडीचा खड्डे खोदण्याचा शुभारंभ आमदार श्यामसुंदर शिंदे यांच्या हस्ते  करण्यात आला. तसेच सन 2018 19 मध्ये या योजनेअंतर्गत  लागवड केलेल्या संभाजी माणिकराव लुंगारे यांच्या आंबा लागवड केलेल्या फळपिकांच्या बागेला भेट देऊन पाहणी करण्यात आली.

निंबोळी अर्क घरी तयार करून  फवारणीसाठी  वापर करा

मागील काही वर्षापासून कापूस पिकावर शेंदरी बोंडअळीचा प्रादुर्भाव मोठ्या प्रमाणावर वाढलेला होता या अळीमुळे दोन वर्षापूर्वी कापूस पिकाचे नुकसानही मोठ्या प्रमाणावर झालेले होते. शेंदरी अथवा गुलाबी बोंड आळीचे व्यवस्थापन करण्यासाठी कृषी विभागाकडून मागील काही वर्षापासून विशेष मोहीम हाती घेण्यात आली असून विविध उपाययोजनाद्वारे सेंदरी बोंडअळीचे व्यवस्थापन करण्यात येत आहे. त्याअंतर्गत कापूस फरदड मुक्ती अभियान राबविणे, पूर्वहंगामी कापूस पिकाची लागवड टाळणे, शेतातील पराठी काडी-कचरा जाळून नष्ट करणे, क्रॉप सॅपच्या माध्यमातून गावोगावी निवडलेल्या कापूस प्लॉटची दर आठवड्याला निरीक्षणे नोंदवणे, किडीची आर्थिक नुकसानीची पातळी पाहून त्वरित उपाय योजना सुचविणे, रासायनिक-जैविक कीटकनाशके, कामगंध सापळे यासह प्रत्येक फवारणी सोबत निंबोळी अर्काचा वापर या बाबी प्रभावीपणे वापरल्याने या अळीचे चांगल्या प्रकारे व्यवस्थापन होऊन किडीचा प्रादुर्भाव नियंत्रणात ठेवण्यात यश आले आहे.

रासायनिक कीटकनाशकावरचा खर्च कमी करून लिंबोळी अर्काचा वापर केल्याने किडीचे नियंत्रण प्रभावीपणे होत असल्याचे दिसून आले पाच टक्के निंबोळी अर्काची फवारणी ही फायदेशीर दिसून आली. निंबोळी अर्काची खरेदी बाजारातून न करता शेतातील व परिसरातील लिंबोणीच्या झाडाखाली निंबोळ्या जमा करून उन्हात वाळवून सुकवून त्या लिंबोळीचा भरडा तयार करून असा पाच किलो भरडा दहा लिटर पाण्यात रात्रभर भिजवून दुसऱ्या दिवशी वस्त्रगाळ करून 100 लिटर पाण्यात मिसळून वापरला तर घरच्या घरी कमी खर्चामध्ये लिंबोळी अर्क तयार होत असल्याने अशा पद्धतीने निंबोळ्या गोळा करून घरच्याघरी निंबोळी अर्क तयार करण्यासाठी शेतकऱ्यांना मार्गदर्शन करून प्रवृत्त करण्यात येत आहे. 

फुळवळ येथील एमआयडीसी स्थित निमार्क निर्मिती केंद्रास भेट

कंधार तालुक्यात फुळवळ येथील एमआयडीसी येथे निंबोळी पासून निंबोळी भरडा व नीम तेल तसेच निमार्क तयार करण्यात येते व माफक दरात विक्री केली जाते. त्याचाही फायदा तालुक्यातील शेतकऱ्यांना मोठ्या प्रमाणावर होत आहे. या प्रकल्पाला आमदार शामसुंदर शिंदे यांनी भेट दिली व हा उपक्रम शेतकऱ्यांसाठी निश्चितच फायदेशीर ठरेल. तालुक्यातील व तालुक्याच्या आजूबाजूला असलेल्या तालुक्यातील शेतकऱ्यांना याचा निश्‍चितपणे फायदा होईल असे मनोगत व्यक्त केले.

या केंद्रातून शेतकऱ्यांना माफक दरात तसेच दर्जेदार लिंबोळी पावडर निंबोळी अर्क मिळावा अशी अपेक्षा व्यक्त केली. गरजू शेतकऱ्यांना जमा केलेल्या लिंबोळीचा भरडा योग्य दर लावून करून देण्याबाबत सूचना केली. केंद्रचालकांनी सुद्धा यास संमती दर्शविलीव शेतकऱ्यांनी स्वत: जमा केलेल्या लिंबोळीचा भरडा शेतकऱ्यांना त्यांच्या समक्ष योग्य दरात करून देऊ असे आश्वासन दिले.

खरीप हंगामाच्या सर्व शेतकरी बंधूंना व कृषी विभागाला  आमदार श्यामसुंदर शिंदे यांनी शुभेच्छा दिल्या. यावेळी पंचायत समितीचे कृषी अधिकारी एस. एम. मुंढे, सहाय्यक तंत्रज्ञान व्यवस्थापक विनोद पुलकुंडवार, कृषी सहायक भुषण पेटकर, बंटी गादेकर, ज्ञानेश्वर चोंढे, उमराव आदमपुरे, प्रल्हाद डांगे, बालाजी डांगे, माधव लुंगारे सुरेश राठोड यांची उपस्थिती होती.

000000

नोंदणीची 27 मे अंतिम मुदत ;

खरीप हंगामासाठी पीक कर्ज

मागणीसाठी ऑनलाईन नोंदणी सुरु

नांदेड, (जिमाका) दि. 16 :- खरीप हंगाम सन 2020-21 साठी पीक कर्ज घेण्यास इच्छुक असलेल्या शेतकऱ्यांनी पुढील नमूद संकेतस्थळावर पीक कर्जाची मागणी नोंदणी ही 17 ते 27 मे 2020 या कालावधीत ऑनलाईन नोंदणीद्वारे करावी. शेतकऱ्यांनी जिल्हा प्रशासनास सहकार्य करावे, असे आवाहन जिल्हाधिकारी डॉ. विपीन इटनकर यांनी केले आहे.

जागतिक महामारी कोवीड-19 विषाणू संसर्गाच्या पार्श्वभूमीवर शासनाकडून देशपातळीवर संचारबंदी घोषीत करण्यात आली आहे. बँकेतील गर्दीमुळे होणारा विषाणू संसर्ग टाळण्यासाठी सन 2020-21 या खरीप हंगामात नांदेड जिल्ह्यातील पीक कर्ज घेण्यास इच्छुक शेतकऱ्यांनी या संकेतस्थळावर https://docs.google.com/forms/d/e/1FAIpQLSehk6tQ6VGKaSH_LSQ6o4u2S7dNATKcjwOK2mKLfD8qD7He0g/viewform?usp=sf_link   ऑनलाईन पीक कर्ज मागणी नोंदणी 17 ते 27 मे 2020 या दरम्यान करावी.

ही नोंदणी केलेल्या शेतकऱ्यांची यादी जिल्हा अग्रणी बँक नांदेड मार्फत संबंधीत बँकेकडे पाठविण्यात येणार आहे. ही यादी प्राप्त झाल्यानंतर संबंधित बँक शाखेकडून पीक कर्ज घेण्यास पात्र असणाऱ्या शेतकऱ्यांना लघुसंदेश पाठविण्यात येणार आहे. बँकेमार्फत लघुसंदेश प्राप्त झालेल्या शेतकऱ्यांनी बँकेने दिलेल्या तारखेस त्यांचे आधारकार्ड, सात/बारा, आठ-अ, फेरफार नक्कल, पॅनकार्ड, टोचनकाशा, पासपोर्ट साईज 2 फोटो, पासबुक या कागदपत्रांसह बँकेत उपस्थित रहावे. अंतिम पीक कर्ज मंजुरी किंवा नामंजुरी बँकेच्या नियमाप्रमाणे करण्यात येईल याची संबंधीत शेतकऱ्यांनी नोंद घ्यावी, असे आवाहन नांदेड सहकारी संस्थेचे जिल्हा उपनिबंधक प्रवीण फडणीस यांनी केले आहे.  

00000

शनिवारी नवीन 18 रुग्ण पॉझिटिव्ह  

पंधरा पुरुष तर तीन महिलांचा यात समावेश

नांदेड, (जिमाका) दि. 16 :- कोरोना विषाणु संदर्भात शनिवार 16 मे 2020 रोजी सायं. 5 वा. नांदेड जिल्हा शल्यचिकित्सक डॉ. निळकंठ भोसीकर यांनी दिलेल्या प्रसिद्धी पत्रकातील माहितीनुसार 14 व 15 मे रोजी पाठविण्यात आलेल्या स्वॅब पैकी 41 रुग्णांचा अहवाल रात्री उशिरा प्राप्त झाला आहे. त्यामध्ये नवीन 18 रुग्ण हे पॉझिटिव्ह आढळून आले असून यापैकी 15 पुरुष तर 3 महिला  रुग्णांचा यात समावेश आहे. त्यामुळे नांदेड जिल्ह्यातील पॉझिटिव्ह रुग्णांची संख्या 84 वर पोहचली आहे.

शनिवारी नवीन 18 पॉझिटिव्ह रुग्णांपैकी 13 रुग्ण प्रवासी असून 4 रुग्ण करबला भागातील तर एक रुग्ण कुंभारगल्ली सराफा भागातील आहे. या रुग्णांपैकी 15 पुरुष असून त्यांचे अनुक्रमे वय 15, 16, 17, 18, 18, 19, 19, 20, 20, 21, 22, 23, 23, 26, 27 आहे. तसेच तीन स्त्री त्यांचे अनुक्रमे वय 50, 51, 52 आहे.  या रुग्णांवर यात्री निवास एनआरआय भवन व शासकीय आयुर्वेद महाविद्यालय नांदेड येथे औषधोपचार सुरु आहेत. सध्या त्यांची प्रकृती स्थिर असून त्यांच्या संपर्कातील व्यक्तींचा शोध घेणे चालू आहे.

नांदेड जिल्ह्यात 84 पॉझिटिव्ह रुग्णांपैकी 26 रुग्ण हे बरे झाल्यामुळे त्यांना रुग्णालयातून सुट्टी देण्यात आली आहे. उपचार सुरु असलेल्या 51 रुग्णांपैकी- 8 रुग्ण हे डॉ. शंकरराव चव्हाण वैद्यकीय महाविद्यालय नांदेड, तसेच पंजाब भवन कोवीड केअर सेंटर व यात्री निवास कोवीड केअर सेंटर येथे- 42 रुग्ण व बारड ग्रामीण रुग्णालय येथील धर्मशाळेत कोवीड केअर सेंटरमध्ये- एका रुग्णावर औषधापचार सुरु आहेत. औषधोपचारास प्रतिसाद न दिल्यामुळे एकुण पॉझिटिव्ह 5 रुग्णांचा मृत्यू झाला असून या रुग्णांना रक्तदाब, मधुमेह या आजाराने बाधित होते. या आजाराने बाधित रुग्णांनी विशेष काळजी घ्यावी.

जनतेनी अफवांवर विश्वास न ठेवता मनात कुठल्याही प्रकारची भिती बाळगू नये व अत्यावश्यक कामाशिवाय घराबाहेर पडू नये आणि नांदेड जिल्हा प्रशासनाला सहकार्य करावे. तसेच आपल्या मोबाईलमध्ये “आरोग्य सेतू ॲप” डाऊनलोड करुन घ्यावा, जेणेकरुन आपल्या सभोवती कोरोना बाधित रुग्ण असल्यास आपणास या ॲपद्वारे सतर्क राहण्यास मदत मिळेल, असे आवाहन जिल्हा शल्यचिकित्सक डॉ. निळकंठ भोसीकर यांनी केले आहे.

00000

शनिवारी नवीन 18 रुग्ण पॉझिटिव्ह ;

नांदेड जिल्ह्यात 84 पॉझिटिव्ह रुग्णांपैकी

26 रुग्ण बरे तर 51 रुग्णांवर उपचार सुरु  

नांदेड, (जिमाका) दि. 16 :- कोरोना विषाणु संदर्भात शनिवार 16 मे 2020 रोजी सकाळी 11 वा. जिल्हा शल्यचिकित्सक नांदेड यांनी दिलेल्या प्रसिद्धी पत्रकातील माहितीनुसार 14 व 15 मे रोजी पाठविण्यात आलेल्या स्वॅब पैकी 41 रुग्णांचा अहवाल रात्री उशिरा प्राप्त झाला आहे. त्यामध्ये नवीन 18 रुग्ण हे पॉझिटिव्ह आढळून आले आहेत. त्यामुळे नांदेड जिल्ह्यातील पॉझिटिव्ह रुग्णांची संख्या 84 वर पोहचली आहे.

शनिवारी नवीन 18 पॉझिटिव्ह रुग्णांपैकी 13 रुग्ण प्रवासी असून 4 रुग्ण करबला भागातील तर एक रुग्ण कुंभारगल्ली सराफा भागातील आहे. या रुग्णांवर यात्री निवास एनआरआय भवन व शासकीय आयुर्वेद महाविद्यालय नांदेड येथे औषधोपचार सुरु आहेत. सध्या त्यांची प्रकृती स्थिर असून त्यांच्या संपर्कातील व्यक्तींचा शोध घेणे चालू आहे.

नांदेड जिल्ह्यात 84 पॉझिटिव्ह रुग्णांपैकी 26 रुग्ण हे बरे झाल्यामुळे त्यांना रुग्णालयातून सुट्टी देण्यात आली आहे. उपचार सुरु असलेल्या 51 रुग्णांपैकी- 8 रुग्ण हे डॉ. शंकरराव चव्हाण वैद्यकीय महाविद्यालय नांदेड, तसेच पंजाब भवन कोवीड केअर सेंटर व यात्री निवास कोवीड केअर सेंटर येथे- 41 रुग्ण व बारड ग्रामीण रुग्णालय येथील धर्मशाळेत कोवीड केअर सेंटरमध्ये- एक रुग्ण तसेच शासकीय आयुर्वेद महाविद्यालय नांदेड येथे- एका रुग्णावर औषधापचार सुरु आहेत. औषधोपचारास प्रतिसाद न दिल्यामुळे एकुण पॉझिटिव्ह 5 रुग्णांचा मृत्यू झाला असून या रुग्णांना रक्तदाब, मधुमेह या आजाराने बाधित होते. या आजाराने बाधित रुग्णांनी विशेष काळजी घ्यावी.

जनतेनी अफवांवर विश्वास न ठेवता मनात कुठल्याही प्रकारची भिती बाळगू नये व अत्यावश्यक कामाशिवाय घराबाहेर पडू नये आणि नांदेड जिल्हा प्रशासनाला सहकार्य करावे. तसेच आपल्या मोबाईलमध्ये “आरोग्य सेतू ॲप” डाऊनलोड करुन घ्यावा, जेणेकरुन आपल्या सभोवती कोरोना बाधित रुग्ण असल्यास आपणास या ॲपद्वारे सतर्क राहण्यास मदत मिळेल, असे आवाहन जिल्हा शल्यचिकित्सक डॉ. निळकंठ भोसीकर यांनी केले आहे.

00000

आदेशातील अटींच्या अधीन राहून

कंटनमेंट झोन वगळून इतर क्षेत्रात मद्य विक्री सुरु

नांदेड, (जिमाका) दि. 15 :- शासनाने लॉकडाऊन कालावधीमध्ये अनुज्ञप्त्या शनिवार 16 मे 2020 पासून सकाळी 10 ते सायं 6 वाजेपर्यंत आणि घाऊक / ठोक मद्यविक्री अनुज्ञप्त्या (नमुना एफएल-1 व सीएल-2) सायं. 5 वाजेपर्यंत सुरु करुन देण्यास नमुद पुढील अटींच्या अधीन राहून परवानगी दिली आहे. याबाबत किरकोळ मद्यविक्री अनुज्ञप्तीधारक (नमूना एफएल-2 / एफएलबिआर-2) यांनी नोंद घ्यावी, असे आवाहन करण्यात आले आहे.

घाऊक / ठोक मद्य विक्री अनुज्ञप्त्यांबाबत : ग्रामीण भागातील सर्व घाऊक विक्रेते यांचे व्यवहार  चालू करण्यात येतील. शहरी भागातील कंटेनमेंट झोन वगळून इतर क्षेत्रातील घाऊक मद्य विक्रेत्यांचे व्यवहार चालू करण्यात येतील. परंतू सायं. 5 वाजल्यानंतर सुरु ठेवता येणार नाहीत. नमूद आदेशानुसार कामाच्या ठिकाणी पाळावयाची मार्गदर्शक तत्वे घाऊक विक्रेत्यांवर बंधनकारक राहतील. संबंधीत अनुज्ञप्तीमधील सर्व नोकरांची / कामगारांची थर्मल  स्कॅनिंग करावी व ज्या नोकरास किंवा कामगारास सर्दी, खोकला व ताप यासारखी लक्षणे आहेत, त्यास अनुज्ञप्तीमध्ये प्रवेश देऊ नये. घाऊक विक्रेत्यांनी 50 टक्के मनुष्यबळावर काम करावे व सोशल डिस्टन्सिगचे पालन करावे.

किरकोळ मद्य विक्री अनुज्ञप्त्यांबाबत : राज्य उत्पादन शुल्क आयुक्त यांचे निर्देश व शासनाने पारित केलेले आदेशानुसार राज्यातील नमूना एलएल-2 अनुज्ञप्ती प्रकारात स्पिरीट, सौम्य मद्य, बिअर व वाईन तर नमुना एफएल / बिआर-2 अनुज्ञप्ती प्रकारात बिअर व वाईन व नमुना एफएल / डब्लू-2 अनुज्ञप्ती प्रकारात वाईन सीलबंद घरपोच परवानाधारकास विक्री करण्यास परवानगी दिली आहे. ही कार्यवाही शासनाने आपत्ती व्यवस्थापन कायदा 2005 किंवा राज्यात लागू असलेल्या इतर कायद्यान्वये जारी केलेले लॉकडाऊनचे आदेश अस्तित्वात असेपर्यंत लागू राहिल. याबाबत करावयाच्या कार्यवाहीसाठी मार्गदर्शक तत्वे पुढीलप्रमाणे राहतील.

राज्यात घरपोच मद्यसेवा ही ज्या जिल्ह्यात अनुज्ञप्त्या कार्यरत ठेवण्यास सक्षम प्राधिकाऱ्याने परवानगी दिली आहे, तेथे कंटेनमेंट झोन वगळून देता येईल. घरपोच मद्यसेवा ही किरकोळ मद्यविक्री अनुज्ञप्ती प्रकार म्हणजेच एफएल 2, एफएल / बिआर-2 व एफएल / डब्लू 2 मधून विक्रीसाठी असलेल्या नमूद मद्य प्रकारासाठी राहिल. तथापि देशी मद्याची घरपोच मद्य सेवा देता येणार नाही. केवळ घरपोच मद्यसेवा पुरविणे बंधनकारक असून गर्दी टाळण्यासाठी कुठल्याही परिस्थितीत अनुज्ञप्तीमधून थेट ग्राहकास मद्य विक्री करता येणार नाही. घरपोच मद्यविक्री सेवा ही केवळ अधिकृत वैध नमुना एफएलएक्ससी परवानाधारकास करण्यात येईल. ग्राहकाकडे परवाना नसल्यास त्यास नमूना एफएल-एफ परवाना अनुज्ञपतीधारक देतील. याशिवाय हा परवाना  https://exciseservices.mahaonline.gov.in / https://stateexcise.maharashtra.gov.in या संकेतस्थळावर तात्काळ उपलब्ध आहे.

मद्याची मागणी नोंदविण्यासाठी परवानाधारक-ग्राहक व्हॉट्सअप, लघुसंदेश, भ्रमणध्वनी, दूरध्वनीचा वापर करु शकेल. किरकोळ मद्य विक्री करणारा अनुज्ञप्तीधारक असा क्रमांक ठळकपणे दुकानाबाहेर प्रदर्शित करतील तसेच अनुज्ञप्तीधारक पर्याप्त उपलब्ध माध्यमांचा वापर करुन घरपोच सुविधा देण्याची कार्यवाही करतील.

मागणीप्रमाणे घरपोच सेवा देण्यासाठी अनुज्ञप्तीधारकास त्यांच्या स्वत:ची वितरण व्यवस्था करावी लागेल. शासन आदेशाप्रमाणे विहित कालावधीसाठी मर्यादीत सेवा असल्याने वितरण व्यवस्था करणाऱ्या इसमांसाठी मद्याची ने-आण करताना वाहतूक परवान्याऐवजी सामान्य निरीक्षक किंवा दुय्यम-निरीक्षक दर्जाच्या कमी नसलेल्या राज्य उत्पादन शुल्क अधिकाऱ्याने मंजूर केलेले ओळखपत्र देण्यात येतील.

अनुज्ञप्तीधारकाने वितरीत व्यवस्थेसाठी आवश्यकतेनुसार मुनष्यबळ ठेवावे. तथापि त्यांची संख्या 10 पेक्षा अधिक नसावी. ओळखपत्र असलेला व्यक्ती एकावेळी ग्राहक / ग्राहकाच्या मागणीपेक्षा अधिक मद्य वाहतूक करणार नाहीत. तथापि अशा व्यक्ती डिलीव्हरी बॉय कोणत्याही परिस्थितीत 24 युनिट पेक्षा जास्त मद्याची वाहतूक करणार नाहीत.

मद्य वितरीत करणारे डिलीव्हरी बॉय यांनी पिवळ्या रंगाचा “लिकर डिलीव्हरी बॉय” असा उल्लेख असलेला टी-शर्ट घालूनच मद्य वितरीत करणे बंधनकारक आहे. आपणास सकाळी 10 ते सायं. 6 यावेळेतच मद्याची घरपोच विक्री करता येईल.

अनुज्ञप्तीधारक घरपोच मद्यसेवा किंवा त्याचे वितरण व्यवस्था चोख करण्यास जबाबदार असेल. मद्य घरपोच पुरविल्यानंतर अनुज्ञप्तीधारक मद्य पोच झाल्याचा पुरावा प्राप्त करतील. परवानाधारकाकडून मद्याची किंमत ही रोख स्वरुपात अथवा क्रेडिट / डेबिट कार्ड स्वॅप मशिनच्या माध्यमातून डिलीव्हीर बॉयने स्वीकारावी. अनुज्ञप्तीधारकास मद्याची घरपोच सेवा देताना मद्य छापील किरकोळ विक्री किंमतीने (एमआरपी) विक्री करणे बंधनकारक आहे. घरपोच मद्यसेवेसाठी कोणतेही अतिरिक्त शुल्क, सेवा शुल्क आकारण्यात येऊ नये.

वितरण व्यवस्थेत वापरण्यात येणाऱ्या व्यक्ती, डिलीव्हरी बॉय यांच्या बाबतीत पुढील बाबती पाळणे बंधनकारक आहे.

डिलीव्हीर बॉय याची नोंदणीकृत वैद्यकीय व्यवसायी (आरएमपी) यांच्याकडून वैद्यकीय तपासणी करावी व वैद्यकीय दृष्ट्या सक्षम असावा, तसे प्रमाणपत्र प्राप्त करुन त्यांनी सदर प्रमाणपत्र सोबत बाळगावे. अशा प्रमाणपत्राधारकास ओळखपत्र देण्यात येईल. या व्यक्तींना मास्क, हेडकॅप व हॅण्डग्लोज वापरणे बंधनकारक राहिले. सदर व्यक्तीने निर्जुतुकीकरणासाठी हॅण्ड सॅनिटयझरचा वापर वेळोवेळी करणे बंधनकारक राहिल. अनुज्ञप्तीधारकास या कामगारांचे वेळोवेळी थर्मल स्कॅनिंग करणे बंधनकारक राहिल. जर कामगाराचे शारिरीक तापमान विहित मर्यादेपेक्षा जास्त आढळून आले तर त्याचे ओळखपत्र तात्काळ काढून घ्यावे व त्याची वैद्यकीय तपासणी करुन आवश्यक वैद्यकीय सुविधा देण्यास मदत करावी. जे डिलीव्हरी बॉय नोकरी सोडून जातील अथवा त्यांना कामावरुन कोणत्याही कारणास्तव कमी करण्यात येईल. तेंव्हा त्याचे ओळखपत्र न चूकता संबंधीत कार्यक्षेत्राच्या राज्य उत्पादन शुल्क अधिकाऱ्याकडे जमा करण्याची जबाबदारी अनुज्ञप्तीधारकाची राहिले. केंद्र शासन व राज्य शासनाच्या लॉकडाऊन संदर्भाच्या मार्गदर्शक तत्वांनुसार घरपोच मद्य वितरण सेवेमध्ये कार्यरत व्यक्तींना आपत्ती निवारण, चोख स्वच्छता राखणे व कोव्हिड संदर्भात इतर बाबतीत जसे सेतू ॲपचा वापर याबाबत सखोल प्रशिक्षण देण्याची जबाबदारी अनुज्ञप्तीधारकांची राहिल.  

घरपोच मद्य सेवा देणे हा एक अलिखीत करार असून सदरचा करार अनुज्ञप्तीधारक, वाहतूक करणारा व परवानाधारक-ग्राहक यांच्यातील असून यातील कोणत्याही बाबींच्या वादासंबंधामध्ये शासन अथवा राज्य उत्पादन शुल्क विभाग जबाबदार राहणार नाही. संबंधीत अनुज्ञप्तीधारकांनी नमूना एफएलआर-3 व एफएलआर-3 ऐ नोंदवहीमध्ये घरपोच मद्यविक्री होत असलेल्या मद्याच्या विशेष नोंदी करावयाच्या आहेत. त्याशिवाय घरपोच मद्यविक्री केलेल्या परिमाणाची एक अतिरिक्त स्वतंत्र नोंदवही ठेवावी.

प्रचलीत नियमान्वये असलेल्या मद्य बाळगणे, वाहतूक करणे इत्यादी मद्य सेवन परवान्यातील तरतुदीचे कोणत्याही प्रकारे उल्लंघन होणार नाही याची दक्षता संबंधीत अनुज्ञप्तीधारकाने घ्यावयाची आहे. सदर शासन आदेश व कोव्हिड 19 मुळे घरपोच मद्य सेवेच्या अनुषंगाने देण्यात आलेल्या मार्गदर्शक तत्वांचा भंग झाल्यास संबंधीत अनुज्ञप्तीधारक व दोषींविरुद्ध आपत्ती व्यवस्थापन कायदा 2005 साथीचे रोग कायदा 1897 भारतीय दंड संहितेच्या कलम 188 तसेच महाराष्ट्र दारुबंदी कायदा 1949 अन्वये फौजदारी कारवाईस पात्र राहतील. याबाबत शासनाकडून वेळोवेळी निर्गमीत होणारे आदेश अनुज्ञप्तीधारकास बंधनकारक राहतील. राज्य उत्पादन शुल्क विभागाचे आयुक्त यांनी दिलेल्या निर्देशातील तरतुदींचा भंग होणार नाही याची दक्षता घेऊन ही कार्यवाही शनिवार 16 मे 2020 पासून लागु करण्यास मान्यता देण्यात आली आहे.

सर्व अनुज्ञप्तीधारकांना आवश्यकता भासल्यास जिल्हा प्रशासनास आवश्यक पोलीस बंदोबस्त उपलब्ध करुन देण्यासाठी विनंती करावी. तसेच मार्गदर्शक तत्वाचा भंग झाल्यास आपत्ती व्यवस्थापन कायदा 2005 च्या कलम 51 ते 60 तसेच भारतीय दंड संहितेच्या कलम 188 अन्वये साथरोग प्रतिबंधक कायदा 1897 व महाराष्ट्र दारुबंदी कायदा 1949 व त्याअंतर्गत नियमान्वये संबंधीत अनुज्ञप्तीधारकाविरुद्ध नियमानुसार कारवाई करण्यात येईल. सदरचे आदेश पुढील आदेश होईपर्यंत लागू राहतील याची सर्व अनुज्ञप्तीधारकांनी नोंद घ्यावी, असे आदेश जिल्हाधिकारी नांदेड यांनी 15 मे रोजी निर्गमीत केले आहेत.

00000

जिल्हा न्यायालयात

रोग प्रतिकारक होमीयोपॅथी औषधाचे वाटप

नांदेड, (जिमाका) दि. 15 :- सध्या कोरोनासारख्या संसर्गजन्य रोगाचा प्रसार वाढत असल्यामुळे या पासून बचाव व शरीराची रोगप्रतिकारक शक्ती वाढविण्यासाठी आयुष मंत्रालयाने स्वीकारलेल्या आर्सेनिक अल्बम 30 या होमिओपॅथिक गोळ्याच्या 400  किटचे वाटप प्रमुख जिल्हा न्यायाधीश  दिपक धोळकिया यांच्या मार्गदर्शनाखाली नांदेड जिल्हा न्यायालयात न्यायिक अधिकारी, न्यायालय कर्मचारी, विधिज्ञ सरकारी अधिकारी, पोलिस शिपाई यांना करण्यात आले.

प्रमुख जिल्हा न्यायाधीश दिपक धोळकिया यांच्या कन्या डॉक्टर उर्वी नागुरे लातूर व डॉक्टर सुषमा सराफ यांनी या कार्यास मोलाचे सहकार्य केले आहे. या सहकार्याबद्दल नांदेड जिल्हा विधी प्राधिकरणने  त्यांचे आभार व्यक्त केले आहे.

00000

दिलासा : 33 पॉझिटिव्ह रुग्णांवर उपचारामुळे प्रकृती स्थिर

एक लाख 73 हजार 392 नागरिकांकडून

“आरोग्यसेतू” ॲप डाऊनलोड ;

कोरोना विरुद्धच्या लढ्यात ॲपचा उपयोग

नांदेड, (जिमाका) दि. 15 :- कोरोना विषाणुचा प्रादुर्भाव वाढणार नाही यासाठी शासनाकडून विविध उपाययोजना राबविण्यात येत आहेत.  त्याअनुषंगाने शासनाने आवाहन केल्यानुसार नांदेड जिल्ह्यातील 1 लाख 73 हजार 392 नागरिकांनी “आरोग्य सेतू ॲप” डाऊनलोड करुन त्याचा वापर सुरु केला आहे. नागरिकांनी मोबाईलमध्ये ॲप डाऊनलोड करुन घ्यावा त्यामुळे सभोवती कोरोना बाधित रुग्ण असल्यास या ॲपद्वारे आपणास सतर्क राहण्यास मदत मिळेल, असे आवाहन जिल्हा शल्यचिकित्सक डॉ. निळकंठ भोसीकर यांनी केले आहे.

शुक्रवार 15 मे रोजी 304 प्रलंबित अहवालापैकी एकही अहवाल प्रयोगशाळेकडून प्राप्त झाला नाही.  सध्या 33 पॉझिटिव्ह रुग्णांवर वैद्यकीय पथकांकडून उपचार सुरु असून त्यांची प्रकृती स्थिर आहे. या उपचारामुळे कोरोनाबाधित रुग्ण बरे होण्याचे प्रमाण वाढत असल्याने नांदेड जिल्ह्याला कोरोना प्रादुर्भाव रोखण्यासाठी दिलासा मिळत आहे.

नांदेड जिल्ह्यात बाहेर जिल्ह्यातून आलेले एकुण प्रवासी, प्रत्यक्ष सर्वेक्षणाद्वारे 1 लाख 8 हजार 928 व्यक्तींची तपासणी करण्यात आली असून यातील 2 हजार 408 रुग्णांचे नमुने स्वॅब घेण्यात आले होते. त्यापैकी 2 हजार स्वॅब तपासणी अहवाल निगेटिव्ह आला असून 304 व्यक्तींचा अहवाल प्रलंबित आहेत.

आतापर्यंत घेतलेल्या स्वॅबपैकी एकुण 66 रुग्णांचा तपासणी अहवाल पॉझिटिव्ह आला आहे. पैकी आजपर्यंत 26 रुग्णांना कोरोना या आजारातून मुक्त झाल्यामुळे रुग्णालयातून सुट्टी देण्यात आलेली आहे.

सद्यस्थितीत 33 पॉझिटिव्ह रुग्णांपैकी- 8 रुग्णांवर डॉ. शंकरराव चव्हाण शासकीय वैद्यकीय महाविद्यालय व रुग्णालय विषणुपुरी नांदेड, तसेच ग्रामीण रुग्णालय बारड धर्मशाळा कोविड केअर सेंटर येथे एका रुग्णावर उपचार सुरु आहेत. तसेच पंजाब भवन कोविड केअर सेंटर आणि यात्रीनिवास कोविड केअर सेंटर येथे असलेल्या 24 रुग्णांवर उपाचार सुरु आहे. त्यांची प्रकृती स्थिर आहे. औषधोपचारास प्रतिसाद न दिल्यामुळे एकुण पॉझिटिव्ह 5 रुग्णांचा मृत्यू झाला असून या रुग्णांना रक्तदाब, मधुमेह या आजाराने बाधित होते. या आजाराने बाधित रुग्णांनी विशेष काळजी घ्यावी.

जनतेनी कोणत्याही अफवांवर विश्वास न ठेवता मनात कुठल्याही प्रकारची मनात भिती बाळगू नये व अत्यावश्यक कामाशिवाय घराबाहेर न पडता नांदेड जिल्हा प्रशासनाला सहकार्य करावे, असे आवाहन जिल्हा शल्यचिकित्सक डॉ. निळकंठ भोसीकर यांनी केले आहे.

00000