जागतिक कर्णबधिरता दिन साजरा

नांदेड दि. 4 :- तीन मार्च हा जागतिक कर्णबाधीरता दिन म्हणून संपूर्ण राज्यात साजरा केला जातो. त्याअनुषंगाने 3 ते 11 मार्च या कालावधी जागतिक कर्णबाधीरता साप्ताह म्हणून साजरा केला जातो.

त्याअनुषंगाने नांदेड जिल्हा रुग्णालय येथे जागतिक कर्णबाधीरता दिन आज साजरा करण्यात आला आहे. याप्रसंगी अतिरिक्त जिल्हा शल्य चिकित्सक डॉ. संतोष शिरसिरकर यांनी उपस्थित रुग्ण व त्यांची नातेवाईक यांना कर्णबाधीरता म्हणजे काय त्याची विविध कारणे कोणती याबद्दल माहिती दिली. एखाद्या व्यक्तीस संबंधित आजाराची लक्षणे दिसून आल्यास ग्रामीण रुग्णालय उपजिल्हा रुग्णालय तसेच जिल्हा रुग्णालय नांदेड येथे उपलब्ध असलेल्या तपासणी, उपचार सुविधांचा लाभ घ्यावा, असे आवाहन केले.

यावेळी निवासी वैद्यकीय अधिकारी डॉ. एच. के. साखरे, डॉ. प्रमोद चिखलीकर डॉ. सभा खान डॉ. हनुमंत पाटील तसेच सर्व वैद्यकीय अधिकारी, कार्यालयीन अधिकारी व कर्मचारी उपस्थित होते. या कार्यक्रमासाठी समुपदेशक सुवर्णकार सदाशिव व सामाजिक कार्यकर्ता बालाजी गायकवाड आदींनी परिश्रम घेतले.

00000

     जिल्ह्यात जमावबंदी, शस्त्रबंदी आदेश लागू 

नांदेड, दि. 4:- जिल्ह्यात शनिवार 14 मार्च 2020 रोजी मध्यरात्रीपर्यंत शस्त्रबंदी व जमावबंदी आदेश लागू राहणार आहे, अशी माहिती अपर जिल्हादंडाधिकारी कार्यालयाकडून देण्यात आली आहे.

जिल्ह्यातील कायदा व सुव्यवस्था अबाधित रहावी म्हणून अपर जिल्हादंडाधिकारी यांनी मुंबई पोलीस अधिनियम 1951 चे कलम 37 (1) व (3) अन्वये जिल्ह्यात शनिवार 29 फेब्रुवारी 2020 रोजी सकाळी 6 वाजेपासून ते शनिवार 14 मार्च 2020 रोजी मध्यरात्रीपर्यंत शस्त्रबंदी व जमावबंदी आदेश लागू राहिल. त्यानुसार पाच किंवा पाचपेक्षा अधिक व्यक्तींनी या आदेशात नमुद असलेली कृत्ये सार्वजनिक परिसर किंवा त्याच्या जवळपास करण्यास बंदी घालण्यात आली आहे. हा आदेश कामावरील पोलीस अधिकारी, शासकीय कर्मचारी, विवाह, अंत्ययात्रा, धार्मिक कार्यक्रम, यात्रा व इतर सक्षम अधिकारी यांनी विशेषरित्या परवानगी दिलेल्या मिरवणुकांना लागू होणार नाही.  

अशा मिरवणुकांना परवानगी देण्याचे अधिकार तसेच पाच व पाचपेक्षा जास्त इसम जमण्यासाठी, सभा, मिरवणुका, मोर्चा काढणे, ध्वनीक्षेपक वाजविण्यास परवानगी देण्याचे अधिकार जिल्ह्यातील पोलीस ठाणे प्रभारी अधिकारी यांना तसेच पोलीस अधीक्षक नांदेड यांनी प्राधिकृत केलेल्या इतर पोलीस अधिकारी यांना राहतील.

00000

जनगणना प्रशिक्षणाची सुरवात  

नांदेड दि. 4 :- भारताची जनगणना 2021 साठी जिल्हा, शहर, सर्व चार्ज अधिकारी आणि रेग्युलर असिस्टंट (संबंधीत जनगणना कर्मचारी) यांच्या प्रशिक्षणाचे आयोजन 4 व 5 मार्च 2020 रोजी नियोजन भवन जिल्हाधिकारी कार्यालय परिसरत नांदेड येथे सकाळी 9.30 वा. करण्यात आले आहे. निवासी उपजिल्हाधिकारी डॉ. सचिन खल्लाळ यांच्या अध्यक्षतेखाली भारताची जनगणना-2021 चे अनुषंगाने प्रशिक्षणास आज सुरवात करण्यात आली.  

यावेळी मुंबई जनगणना कार्यालयाचे संचालक यांच्याकडून उपसंचालक रघु अनुमोल, वरिष्ठ निरीक्षक प्रविण भगत, वरिष्ठ  पर्यवेक्षक आर. एस. पाथवे, विलास होनराव (पाटील) जिल्हा समन्वयक अधिकारी यांनी राष्ट्रीय लोकसंख्या रजिस्टर संकल्पना, कार्यपद्धती, मोबाईल ॲपचा वापर याबाबत सविस्तर माहिती दिली.

हे प्रशिक्षण जिल्हा, शहर, नगरपालिका, नगरपंचायत सर्व चार्ज अधिकारी तसेच सर्व संबंधीत जनगणना लिपीक उपस्थित होते, अशी माहिती जिल्हा जनगणना अधिकारी तथा निवासी उपजिल्हाधिकारी नांदेड यांनी दिली आहे.

000000

राज्य माहिती आयोग खंडपीठ औरंगाबादकडून 

द्वितीय अपिलांवर नांदेडला सुनावणी कार्यक्रम

संकेतस्थळावर सुनावणी बोर्डाची माहिती प्रसिद्ध   

नांदेड दि. 4 :- राज्य माहिती आयोग खंडपीठ औरंगाबाद यांच्यावतीने येत्या 17, 18 व 19 मार्च 2020 रोजी द्वितीय अपिलांची साहशे विशेष सुनावणीचा कार्यक्रम नांदेड जिल्हाधिकारी कार्यालय परिसरातील नियोजन भवन येथे आयोजित करण्यात आला आहे.

राज्य माहिती आयुक्त, राज्य माहिती आयोग खंडपीठ औरंगाबाद यांना प्राप्त होणाऱ्या द्वितीय अपिलांची लक्षणीय संख्या लक्षात घेता राज्य माहिती आयुक्तांनी नांदेड जिल्हयातील अपिलार्थीकडून प्राप्त होणाऱ्या द्वितीय अपिलांची सुनावणी नांदेड येथे घेण्यासाठी विशेष मोहिम प्रस्तावित केली आहे.

सुनावणी कार्यक्रम नियोजन भवन जिल्हाधिकारी कार्यालय नांदेड येथे दिनांक 17, 18 व 19 मार्च 2020 या कालावधीत घेण्यात येणार आहे. द्वितीय अपिलांची संख्या सुमारे 600 सुनावण्या घेण्याबाबत सुचित केले आहे.

राज्य माहिती आयुक्त खंडपीठ औरंगाबाद यांनी द्वितीय अपिल प्रकरणाची माहिती https://sic.maharashtra.gov.in या संकेतस्थाळावर सुनावणी बोर्ड तारखेनिहाय प्रसिद्ध केली आहे. जिल्हाधिकारी कार्यालय सामान्य शाखा (माहिती अधिकारी) यांनी 3 मार्च 2020 ते 20 मार्च 2020 पर्यंत nanded.gov.in या संकेतस्थवळावर जिल्हा सुचना व विज्ञान अधिकारी नांदेड जिल्हाधिकारी कार्यालय नांदेड यांना प्रसिद्धी देण्याबाबत सुचना दिली आहे. नांदेड जिल्हयातील विविध कार्यालयांना सुनावणी बोर्ड उपलब्ध होण्यासाठी 3 मार्च 2020 पासून nanded.gov.in या जिल्हा संकेतस्थळावर उपलब्ध झाले आहे, अशी माहिती उपजिल्हाधिकारी (सामान्य) जिल्हाधिकारी कार्यालय नांदेड यांनी दिली आहे.

000000

सुधारीत वृत्त

स्पर्धा परीक्षा मार्गदर्शन शिबिराचे गुरुवारी आयोजन

जिल्हाधिकारी डॉ. विपीन इटनकर यांचे मार्गदर्शन

नांदेड दि. 3 :- उज्ज्वल नांदेड या मोहिमेअतंर्गत जिल्हाधिकारी कार्यालय, सेतू समिती, नांदेड वाघाळा शहर महानगरपालिका व जिल्हा ग्रंथालय अधिकारी कार्यालयाच्यावतीने गुरुवार 5 मार्च 2020 रोजी डॉ. शंकरराव चव्हाण प्रेक्षागृह, स्टेडियम परिसर नांदेड येथे एक दिवसीय स्पर्धा परिक्षा मार्गदर्शन ‍शिबिराचे आयोजन करण्यात आले आहे.

हे शिबीर गुरुवार 5 मार्च 2020 रोजी सकाळी 10.30 ते सायं 5 या वेळेत नांदेड नुतन जिल्हाधिकारी डॉ. विपीन इटनकर हे विद्यार्थ्यांना मार्गदशन करणार आहेत. चालू घडामोडी या विषयावर पुणे येथील प्रा. स्वप्नील सानप मार्गदर्शन करणार आहेत.

या मार्गदर्शन ‍शिबिरास स्पर्धा परिक्षेची तयारी करणाऱ्या विद्यार्थ्यांनी उपस्थित रहावे, असे आवाहन नांदेड जिल्हा प्रशासनाच्यावतीने जिल्हा ग्रंथालय अधिकारी आशिष ढोक यांनी केले आहे.

00000

प्रादेशिक परिवहन कार्यालयाच्या

कंधार, हिमायतनगर येथील शिबिरात बदल

नांदेड, दि. 3 :-  प्रादेशिक परिवहन कार्यालय नांदेडच्यावतीने मार्च 2020 मध्ये कंधार व हिमायतनगर येथील शिबीराच्या दिनांकामध्ये पुढीलप्रमाणे अंशत: बदल करण्यात आला आहे. 

कंधार येथे शनिवार 7 मार्च 2020 रोजीचे शिबीर शनिवार शासकीय सुट्टी असल्याने शुक्रवार 6 मार्च 2020 रोजी घेण्यात येणार आहे. हिमायतनगर येथील गुरुवार 12 मार्च 2020 रोजीचे शिबीर कंधार उरुस स्थनिक सुट्टी असल्याने शुक्रवार 13 मार्च 2020 रोजी घेण्यात येणार आहे.  

ज्या अनुज्ञप्ती धारकांनी शिबीर कार्यालयात अनुज्ञप्ती मिळण्यासाठी अर्ज सादर केला आहे त्यांनी याची नोंद घ्यावी, असे आवाहन प्रादेशिक परिवहन अधिकारी नांदेड यांनी केले आहे.   

00000

जागतिक महिला दिन   

साजरा करण्याबाबत सुचना

नांदेड, दि. 3 :-  महिला व बालविकास विभागाने रविवार 8 मार्च हा दिवस जागतिक महिला दिन साजरा करण्याबाबत शासन परित्रकाद्वारे सुचना निर्गमीत केल्या आहेत.    

त्याअनुषंगाने जिल्ह्यातील सर्व उपविभागीय अधिकारी, तहलिसदार, जिल्हा व सत्र न्यायालय प्रबंधक, स्वामी रामानंदतीर्थ मराठवाडा विद्यापिठाचे कुलसचिव, नांदेड वाघाळा शहर महानगरपालिका आयुक्त, जिल्हा परिषद मुख्य कार्यकारी अधिकारी, पोलीस अधीक्षक, डॉ. शंकरराव चव्हाण वैद्यकीय महाविद्यालयाचे अधिष्ठाता, जिल्हा शल्यचिकित्सक, जिल्हा आरोग्य अधिकारी, उपमुख्य कार्यकारी अधिकारी (पंचायत) जि. प., बालविकास प्रकल्प अधिकारी नागरी प्रकल्प, शिक्षणाधिकारी प्राथमिक, माध्यमिक जि. प., उपजिल्हाधिकारी (सामान्य) नांदेड यांनी पत्राद्वारे जिल्हाधिकारी नांदेड यांनी सुचना निर्गमीत केली आहे.   

शासन परिपत्रकातील दिलेल्या सुचनेप्रमाणे रविवार 8 मार्च 2020 रोजी जागतीक महिला दिनानिमित्त विविध प्रकारचे कार्यक्रम आयोजन करुन केलेल्या कार्यवाहीचा अनुपालन अहवाल शासन व जिल्हाधिकारी कार्यालयास सादर करावा, असेही पत्रात नमूद केले आहे.

0000