ध्वजदिन निधी संकलनाचा शुभारंभ 1 कोटीपर्यत निधी संकलन करण्याचा निर्धार क्युआर कोडचा वापर करुन ध्वजदिन निधीत रक्कम करता येणार जमा

  वृत्त क्र. 1173

ध्वजदिन निधी संकलनाचा शुभारंभ

1 कोटीपर्यत निधी संकलन करण्याचा निर्धार

  क्युआर कोडचा वापर करुन ध्वजदिन निधीत रक्कम करता येणार जमा

                                                                                                                                                         

नांदेड, दि. 9 डिसेंबर :-  ध्वजदिन निधीच्या माध्यमातून सैनिकांच्या प्रति कृतज्ञता व्यक्त करण्यासाठी व त्यांच्या कुटूंबाच्या कल्याणासाठी हा निधी संकलित करण्यात येतो.  मागील वर्षाच्या तुलनेत यावर्षी सशस्त्र सेना ध्वजदिन निधी 2024-25 संकलन उद्दिष्ट 1 कोटीपर्यत करण्याचा निर्धार जिल्हाधिकारी अभिजीत राऊत यांनी व्यक्त केला.

आज जिल्हाधिकारी कार्यालयाच्या नियोजन भवनात सशस्त्र ध्वजदिन निधी संकलन शुभारंभ कार्यक्रमाचे आयोजन करण्यात आले होते. यावेळी ते बोलत होते. यावेळी अपर जिल्हाधिकारी पांडुरंग बोरगावकर, निवासी उपजिल्हाधिकारी महेश वडदकर, जिल्हा परिषदेचे अतिरिक्त मुख्य कार्यकारी अधिकारी संजय तुबाकले, राज्य उत्पादन शुल्क विभागाचे अधीक्षक गणेश पाटील, मनपाचे अतिरिक्त आयुक्त गिरीश कदम, वीरपिता, वीरपत्नी, वीरमाता, माजी सैनिक यांच्या उपस्थितीत ध्वजनिधी संकलनाचा शुभारंभ करण्यात आला.

ध्वजदिन निधी संकलनासाठी यावेळी क्युआर कोडचा वापर करुन निधी संकलन करता येणार आहे. क्युआर कोडच्या माध्यमातून सामान्य नागरिकांपर्यत पोहचून जास्तीत जास्त निधी संकलित करण्याबाबत जिल्हाधिकारी अभिजीत राऊत यांनी शासकीय अधिकारी, कर्मचारी व नागरिकांना योगदान देण्याबाबत आवाहन केले. तसेच माजी सैनिकांच्या इतर मागण्याबाबतही दर तीन महिन्याला बैठक आयोजित करण्यात येईल असेही त्यांनी यावेळी सांगितले. तसेच जिल्ह्यातील युवकांना सैन्यात भरती होण्यासाठी शासकीय यंत्रणाच्या माध्यमातून मार्गदर्शन व सहकार्य करण्यात येईल असेही त्यांनी यावेळी सांगितले. यावेळी मागील वर्षात ज्या विभाग प्रमुखांनी ध्वजनिधी संकलनात विशेष योगदान दिले त्यांचे अभिनंदन करुन त्यांचा जिल्हाधिकाऱ्यांच्या हस्ते सन्मान करण्यात आला.

                                                                                                                                                         

यावेळी वीरपीता धोंडीबा शेटोबा जोधळे, वीरपत्नी अरुणाताई टर्के,वीर पीता व वीरमाता आशाबाई व गणपतराव गोंविदे, वीरपत्नी शितल संभाजी कदम, वीरपिता श्रीराम डूबुकवाड यांचा सन्मान जिल्हाधिकारी अभिजीत राऊत यांच्या हस्ते करण्यात आला. तसेच विशेष गौरव पुरस्कार कुमार अविष्कार मोरे, कुमारी नंदिनी कांगणे या सैनिकांच्या पाल्याचा विशेष गौरव करुन प्रत्येकी 20 हजार रुपयांचा धनादेश त्यांच्या हस्ते दिला.  

                                                                                                                                                      

कार्यक्रमाची सुरूवात शहिदांना श्रद्वांजली वाहून करण्यात आली. निवासी उपजिल्हाधिकारी तथा जिल्हा सैनिक कल्याण अधिकारी महेश वडदकर यांनी प्रास्ताविकात ध्वजदिन निधीचे महत्व सांगून संकलित झालेल्या निधीचा विनियोग व माजी सैनिकांच्याच्या पुनर्वसनासाठी विविध कल्याणकारी योजना कशा राबविण्यात येतात यांची माहिती दिली. तसेच माजी सैनिकांसाठी सीएसडी कॅण्टीन, सैनिक संकुलन व भरती पूर्व प्रशिक्षण केंद्र नांदेड येथे सुरु करण्याबाबत विनंती जिल्हाधिकाऱ्यांकडे केली.

                                                                                                                                                        

कार्यक्रमाचे सुत्रसंचालन अन्वर शेख यांनी केले तर कल्याण संघटक कॅप्टन विठ्ठल कदम यांनी आभार मानले. कार्यक्रमास जिल्हयातील माजी सैनिक, विधवा, अवलंबित उपस्थित होते. माजी सैनिक संघटनांचे अध्यक्ष रामराव थडके, पठाण हयुन, एल.देवदे, विकास बल्फेवाड, ज्ञानेश्वर पाटील डुमने, कमलाकर शेटे इत्यादी उपस्थित होते.  हा कार्यक्रम यशस्वी करण्यासाठी कार्यालयाचे कल्याण संघटक, विठ्ठल कदम, होस्टेल अधीक्षक अर्जून जाधव, लिहिक अनिल देवज्ञे, सुर्यकांत कदम यांनी प्रयत्न केले.

 00000

                                                                                                                                                        

9.12.2024

वृत्त क्र. 1170

माहूरगड येथे श्री दत्तजयंती उत्सवानिमित्त

पोलीस अंमलदारांना अधिकार प्रदान

नांदेड, दि. 9 डिसेंबर :- माहूरगड येथे श्री दत्तजयंती उत्सव 12 ते 15 डिसेंबर 2024 या कालावधीमध्ये साजरा होत आहे. या उत्सवासाठी महाराष्ट्र, तेलंगणा, आंध्रप्रदेश, कर्नाटक व इतर राज्यातून भाविक मोठ्या प्रमाणावर येतात. त्यामुळे या कालावधीत मिरवणुका व इतर कार्यक्रम शांततेत पार पडावे, त्यामध्ये कोणतीही बाधा येऊ नये व शांतता रहावी यासाठी पोलीस अधीक्षक अबिनाश कुमार यांनी महाराष्ट्र पोलीस अधिनियम 1951 चे कलम 36 अन्वये प्राप्त झालेल्या अधिकारान्वये 12 ते 15 डिसेंबर 2024 च्या मध्यरात्रीपर्यंत किनवट उपविभागीय पोलीस अधिकारी रामकृष्ण मळघणे व माहूर पोलीस स्टेशनचे प्रभारी अधिकारी सहाय्यक पोलीस निरीक्षक शिवप्रकाश मुळे यांना महाराष्ट्र पोलीस अधिनियम 1951 कलम 36 मधील पोट कलमे अ ते फ प्रमाणे पुढील अधिकार केले आहेत.

प्रदान करण्यात आलेले अधिकार पुढीलप्रमाणे  आहेत. रस्त्यावरील व रस्त्याने जाणाऱ्या मिरवणुकीतील किंवा जमावातील लोकांनी कशा रितीने चालावे व कोणत्या रितीने वागावे ते फर्मविण्यासाठी. अशा कोणत्याही मिरवणुका या कोणत्या मार्गाने, कोणत्या वेळात काढाव्यात किंवा काढू नयेत असे मार्ग व अशा वेळा विहित करण्याबद्दल. सर्व मिरवणुकीच्या व जमावाच्या प्रसंगी व पुजा-अर्चेच्या प्रार्थना स्थळाच्या सर्व जागेच्या आसपास पुजा-अर्चेच्या वेळी कोणताही रस्ता किंवा सार्वजनिक जागा येथे गर्दी होणार असेल किंवा अडथळा होण्याचा संभव असेल अशा सर्व प्रसंगी अडथळा न होऊ देणेबाबत. सर्व रस्त्यावर किंवा रस्त्यामध्ये घाटात किंवा घाटावर, सर्व धक्क्यांवर किंवा धक्क्यामध्ये आणि सार्वजनिक स्नानांच्या, कपडे धुण्याच्या व उतरण्याच्या जागांच्या ठिकाणी व जागामध्ये, जत्रा, देवालय आणि सार्वजनिक स्थळी, लोकांच्या जाण्या-येण्याच्या जागेमध्ये सुव्यवस्था राखणेबद्दल. तसेच सार्वजनिक ठिकाणी अथवा सार्वजनिक करमणुकीच्या ठिकाणी ध्वनिक्षेपकांच्या आवाजावर नियंत्रण ठेवण्यासाठी व सूचना देण्यासंबंधी. महाराष्ट्र पोलीस अधिनियम 1951 चे कलम 33, 35 ते 40, 42, 43, 45 या अन्वये दिलेल्या कोणत्याही आदेशास अधिन असलेल्या त्यास पुष्टी देणारे सुव्यवस्था राहणेकामी योग्य आदेश देण्याबाबत.

हा आदेश लागू असेपर्यंत नांदेड जिल्ह्यातील माहूर येथील उपविभागीय पोलीस अधिकारी रामकृष्ण मळघणे  व सहाय्यक पोलीस निरीक्षक शिवप्रकाश मुळे यांच्याकडून रहदारीचे नियम व मार्गाबाबत सूचना कार्यक्रमाची तारीख, वेळ, जाहीरसभा, मोर्चे, मिरवणूक, निदर्शने, पदयात्रा इत्यादी कार्यक्रम संबंधितांनी दिलेल्या आदेशाचे पालन करावे. परवानगी दिलेल्या जाहीरसभा, मिरवणुका, पदयात्रा यात समायोजित घोषणा सोडून ज्या घोषणांमुळे शांतता व सुव्यवस्थेला बाधा होऊ शकते अशा घोषणा देऊ नये. हा आदेश लग्नाच्या ठिकाणी, प्रेत यात्रेस लागू नाही. या आदेशाचे उल्लंघन केल्यास मुंबई कायदा कलम 134 प्रमाणे अपराधास पात्र ठरेल, असेही आदेश पोलीस अधीक्षक अबिनाश कुमार यांनी जारी केले आहेत.

000000

भोकर मतदारसंघातील उमेदवारांच्या खर्चाचा हिशेब व लेखा पुनर्मेळ तपासणी 20 डिसेंबरला

  वृत्त क्र. 1172

भोकर मतदारसंघातील उमेदवारांच्या

खर्चाचा हिशेब व लेखा पुनर्मेळ तपासणी 20 डिसेंबरला

नांदेड, दि. 9 डिसेंबर :-  भारत निवडणूक आयोगाकडून वेळोवेळी निर्गमित केलेल्या परिपत्रकानुसार विधानसभा सार्वत्रिक निवडणुकीच्या अनुषंगाने 85-भोकर मतदारसंघातील उमेदवारांच्या निवडणूक खर्चाचा हिशोब ठेवणे व त्यांच्या लेखा पुनर्मेळ बैठक शुक्रवार 20 डिसेंबर 2024 रोजी सकाळी 11 वाजता निवडणूक निर्णय अधिकारी यांचे कार्यालय उपविभागीय अधिकारी कार्यालय भोकर येथे आयोजित केली आहे. या तपासणीसाठी उमेदवारांनी किंवा त्यांच्या प्रतिनिधींनी निवडणुकीच्या अनुषंगाने केलेल्या खर्चाचा हिशोब खर्च निरीक्षक यांच्यासमोर सादर करणे आवश्यक आहे.

अनुपस्थित राहणारे उमेदवार भारत निवडणूक आयोगाकडून वेळोवेळी निर्गमित केलेल्या परिपत्रकांनुसार कार्यवाहीस पात्र असतील. तसेच निवडणूक लढविणाऱ्या उमेदवाराने निवडणूक खर्चाचा हिशेब ठेवणे व दाखल करण्याच्या कायद्याच्या आवश्यकतांचे अनुपालन करण्यात निवडणूक लढविणाऱ्या उमेदवाराने कसूर केल्यास लोकप्रतिनिधीत्व अधिनियम 1951 च्या कलम 10 क अन्वये तो निवडणूक आयोगाकडून तीन वर्षाच्या कालावधीसाठी निरर्ह ठरविण्यास पात्र असेल याची नोंद घ्यावी.

लोकप्रतिनिधीत्व अधिनियम , 1951 च्या कलम 77 नुसार निवडणुकीच्या वेळेस प्रत्येक उमेदवार एकतर तो स्वत: ,ती स्वत: किंवा त्याच्या, तिच्या निवडणूक प्रतिनिधीद्वारे त्याला, तीला नामनिर्देशित करण्यात आले आहे. त्या दिनांकापासून निवडणुकीच्या निकाल लागण्याच्या दिनांकापर्यत दोन्ही दिनांक धरुन, त्याने किंवा त्याच्या निवडणूक प्रतिनिधीने केलेला किंवा प्राधिकृत केलेल्या सर्व खर्चाचा स्वतंत्र व अचूक हिशेब ठेवणे आवश्यक आहे, असे निवडणूक निर्णय अधिकारी 85-भोकर विधानसभा मतदार संघाचे निवडणूक निर्णय अधिकारी तथा उपविभागीय अधिकारी प्रविण मेगशेट्टी यांनी प्रसिद्धीपत्रकाद्वारे कळविले आहे.

000000

8.12.2024

   वृत्त क्र. 1169

नांदेड जिल्हा निर्यातक्षम केळी उत्पादक शेतकऱ्यांचा हब बनविणार- अभिजीत राऊत

 मॅग्नेट प्रकल्प अंतर्गत केळी उत्तम कृषी पद्धती या विषयावर प्रशिक्षण संपन्न

नांदेड दि. 8 डिसेंबर : अलिकडच्या काळात शेतकऱ्यांनी पारंपारिक पीक पद्धती सोडून निर्यातक्षम केळी उत्पादकतेवर भर द्यावा. तसेच शेतीसह शेतमाल प्रक्रिया उद्योगाकडे वळावे. उत्पादित केलेला पक्का शेतमाल निर्यात करण्याकडे भर द्यावा, असे प्रतिपादन जिल्हाधिकारी अभिजीत राऊत यांनी केले.

जिल्हा नियोजन भवन जिल्हाधिकारी कार्यालयात नुकतेच सहकार व पणन विभाग अंतर्गत आशियाई विकास बँक अर्थसहाय्यीत महाराष्ट्र ऍग्री बिझनेस नेटवर्क (मॅग्नेट) प्रकल्प अंतर्गत महाराष्ट्र सहकार विकास महामंडळ पुणे, कृषी व आत्मा विभाग नांदेड यांच्या संयुक्त विद्यमाने केळी उत्तम कृषी पद्धती या विषयावर प्रशिक्षणाचे आयोजन नुकतेच करण्यात आले होते. यावेळी ते बोलत होते. कार्यक्रमास मॅग्नेट प्रकल्प पुण्याचे अतिरिक्त प्रकल्प संचालक डॉ. अमोल यादव, जिल्हा अधीक्षक कृषी अधिकारी दत्तकुमार कळसाईत, प्रकल्प संचालक आत्मा  शिरफुले,  महाराष्ट्र सहकार विकास महामंडळ पुणेचे मनुष्यबळ विकास तथा वरिष्ठ प्रशिक्षण अधिकारी हेमंत जगताप, प्रकल्प उपसंचालक मॅग्नेट लातूर महादेव बरडे, विभागीय प्रकल्प अधिकारी मॅग्नेट, केळी संशोधनाचे प्रभारी अधिकारी डॉक्टर शिवाजी शिंदे, पोखर्णी कृषी विज्ञान केंद्राचे प्रमुख शास्त्रज्ञ डॉ. देविकांत देशमुख,  संचालक के डी एक्सपोर्ट सोलापूर किरण डोके, उपसरव्यवस्थापक महाकृषी शेतकरी उत्पादक कंपनी सोलापूर नरहरी कुलकर्णी, बारड शितलादेवी शेतकरी उत्पादक कंपनीचे अध्यक्ष निलेश देशमुख, बारडकर, हिरकणी बायोटेकचे रत्नाकर देशमुख, विभागीय अधिकारी सोमनाथ जाधव, गजेंद्र नवघरे, अक्षय हातागळे आदी उपस्थित होते.

 मॅग्नेट प्रकल्पा अंतर्गत नांदेड, परभणी व हिंगोली या तीनही जिल्ह्यातील शेतकऱ्यांसाठी केळी निर्यातीसाठी मॅग्नेट प्रकल्पांतर्गत आवश्यक ती सर्व मदत केली जाईल असे मॅग्नेट प्रकल्पाचे अतिरिक्त प्रकल्प संचालक  डॉ. अमोल यादव यांनी आश्वासित केले. केळी निर्यातीसाठी आवश्यक ती सर्व मदत, त्यासाठी लागणारी ऑनलाइन नोंदणी याविषयी कृषी विभाग मार्गदर्शन व मदत करेल असे जिल्हा अधिक्षक कृषि अधिकारी दत्तकुमार कळसाईत यांनी सांगितले. एमसीडीसीला लातूर विभागामध्ये केळी पिक प्रशिक्षण घेण्यासाठी मॅग्नेट प्रकल्पाने संधी उपलब्ध करून दिल्याबद्दल प्रकल्पाचे हेमंत जगताप यांनी आभार मानले. किरण डोके यांनी निर्यातक्षम केळी पीक लागवड तंत्रज्ञानातील विविध बारकावे समजून सांगितले .  निलेश देशमुख यांनी निर्यातक्षम केळी पिकाची वाव व संधी याविषयी मार्गदर्शन केले. नरहरी कुलकर्णी यांनी केळी लागवडी मधील खत व पाणी व्यवस्थापन व निर्यातक्षम उत्पादन याविषयी मार्गदर्शन केले. गणेश पाटील यांनी ग्लोबल गॅप प्रमाणिकरण व फ्रुट केअर योजना याविषयी सविस्तर माहिती दिली. लिंग समानता व सामाजिक समावेशन याविषयी अक्षय हातागळे यांनी माहिती दिली. या कार्यक्रमासाठी नांदेड, परभणी व हिंगोली जिल्ह्यातील ३५० हून अधिक शेतकऱ्यांनी सहभाग नोंदवला.

00000

राज्यस्तरीय शालेय सेपकटाकरॉ स्पर्धा उत्साहात संपन्न

  वृत्त क्र. 1167

राज्यस्तरीय शालेय सेपकटाकरॉ स्पर्धा उत्साहात संपन्न

नांदेड दि. 6 डिसेंबर :- जिल्हा क्रीडा अधिकारी कार्यालय, जिल्हा क्रीडा परिषद, नांदेड यांच्या संयुक्त विद्यमाने व नांदेड जिल्हा सेपकटाकरॉ असोसिएशन यांचे सहकार्याने सुरु असलेल्या राज्यस्तरीय शालेय सेपकटाकरॉ (14 वर्षे मुले-मुली) क्रीडा स्पर्धा 3 ते 5 डिसेंबर, 2024 या कालावधीत जिल्हा क्रीडा संकुल, इनडोअर हॉल, नांदेड येथे संपन्न झाली.

या स्पर्धेचे बक्षीस वितरण कार्यक्रमाचे अध्यक्ष जिल्हा क्रीडा अधिकारी जयकुमार टेंभरे हे तर प्रमुख अतिथी म्हणुन तालुका क्रीडा संयोजक, नायगांव तथा सेवानिवृत्त मुख्याध्यापक जीवन पवार,  क्रीडा अधिकारी प्रवीण कोंडेकर, निवड समिती सदस्य गणेश माळवे, निवड समिती सदस्य दर्शन हस्ती,  निवड समिती सदस्य रवीकुमार बकवाड, क्रीडा शिक्षक विनोद जमदाडे आदी उपस्थित होते.

या स्पर्धेत पुणे व नाशिक विभागाचे  वर्चस्व राहीले असून स्पर्धेचा अंतिम निकाल पुढीलप्रमाणे आहे.  
14 वर्षे मुले-  प्रथम- पुणे विभाग,  द्वितीय- नाशिक विभाग व तृतिय- नागपूर विभाग
14 वर्षे मुली-  प्रथम- पुणे नाशिक,  द्वितीय- पुणे विभाग व तृतिय- मुंबई विभाग

तसेच या स्पर्धेतून उत्कृष्ट कामगिरी केलेल्या खेळाडूंची राष्ट्रीय शालेय सेपकटाकरॉ क्रीडा स्पर्धेसाठी निवड करण्यात आली आहे.  या कार्यक्रमाचे अध्यक्ष जिल्हा क्रीडा अधिकारी जयकुमार टेंभरे हे तर प्रमुख अतिथी म्हणुन जिल्हा कोषागार अधिकारी श्रीमती बगाटे अलंकृता या उपस्थित होत्या. स्पर्धेमध्ये हार-जीत होत असते निवड न झालेल्या खेळाडूंनी खचून न जाता पुढील स्पर्धेत आपली कामगीरी उत्कृष्ट कशी करता येईल याकरिता चांगला सराव केला पाहीजे तसेच राष्ट्रीय स्पर्धेकरीता निवड झालेल्या खेळाडूंनी राष्ट्रीय स्पर्धेत उत्कृष्ट कामगीरी करुन राज्याचे नाव उज्वल करावे, असे श्रीमती बगाटे अलंकृता यांनी खेळाडूंना मार्गदर्शन करताना सांगितले.

राष्ट्रीय स्पर्धेसाठी निवड झालेल्या खेळाडूंची नावे पुढीलप्रमाणे आहेत.
14 वर्षे मुले संघ– समरजीत सुजीत कदम (पुणे विभाग), शिवराज संजय सोले (छ.संभाजीनगर विभाग), प्रणव डाडाहारी डातीर (नाशिक विभाग), अनमोल सुरेंद्र मुखर्जी (नागपूर विभाग), आदित्य विलास पांगरेकर (लातूर विभाग) राखीव खेळाडू- 1) अथर्व दिगंबर तोडकरी (पुणे), 2) विराज जयदिप तांबवेकर (कोल्हापूर),  3) गणेश सचिन शिंदे (छ.संभाजीनगर)

14 वर्षे मुली संघ–वेदिका नितील महाले (नाशिक विभाग), भक्ती प्रभाकर नागणे  (पुणे विभाग), समृदी धनाजी काळोखे (मुंबई विभाग), जेसिका प्रमोद काळे (अमरावती विभाग), मानसी विजय कुलकर्णी (संभाजीनगर विभाग) राखीव खेळाडू- 1) सृष्टी गणेश जागीरवाड (लातूर), 2) समृध्दी रोशन जाधव (नाशिक),  3) मैथली सुरेश धस  (छ.संभाजीनगर)

ही स्पर्धा यशस्वी करण्यासाठी जिल्हा क्रीडा अधिकारी जयकुमर टेंभरे यांचे मार्गदर्शनाखाली संजय बेतीवार, राज्य क्रीडा मार्गदर्शक बालाजी शिरसीकर, .चंद्रप्रकाश होनवडजकर, श्रीमती शिवकांता देशमुख, क्रीडा अधिकारी राहुल श्रीरामवार, क्रीडा अधिकारी विपुल दापके, वरिष्ठ लिपिक संतोष कनकावार, कनिष्ठ लिपिक दत्तकुमार धुतडे, व्यवस्थापक संजय चव्हाण, आनंद जोंधळे, हनमंत नरवाडे, आकाश भोरे, मोहन पवार, सुभाष धोंगडे, शेख इकरम, विद्यानंद भालेराव, चंद्रकांत गव्हाणे, यश कांबळे व सेपकटाकरॉ असोसिएशनचे पदाधिकारी व खेळाडू आदीनी सहकार्य केले .
00000

हदगाव शहरात 18 तंबाखू विक्रेत्यांवर दंडात्मक कार्यवाही तंबाखू विक्रेत्यांना 8 हजार 500 रुपयांचा दंड आकारला

  वृत्त क्र. 1166

हदगाव शहरात 18 तंबाखू विक्रेत्यांवर दंडात्मक कार्यवाही

तंबाखू विक्रेत्यांना 8 हजार 500 रुपयांचा दंड आकारला
                                                                                                                                                                                       नांदेड दि. 6 डिसेंबर :- हदगाव शहरात तंबाखू व तंबाखूजन्य पदार्थाची मोठ्या प्रमाणात विक्री तसेच कोटपा २००३ कायद्याचे उल्लंघन होत असल्याबाबत मिळालेल्या माहितीनुसार जिल्हास्तरीय तंबाखू नियंत्रण पथकाने 5 डिसेंबर 2024 रोजी हदगाव शहरात अचानक धाडी टाकून एकूण 18 तंबाखू विक्रेत्यांना  8 हजार 500  रुपये दंड आकारण्यात आला.

ही कार्यवाही  जिल्हाधिकारी अभिजित राऊत,  जिल्हा शल्यचिकित्सक डॉ. निळकंठ भोसीकर, अतिरिक्त जिल्हा शल्यचिकित्सक डॉ. संजय पेरके व नोडल अधिकारी डॉ. हनमंत पाटील यांच्या मार्गदर्शनाखाली करण्यात आली. या पथकात जिल्हा सल्लागार डॉ. शितल चातुरे,  दंत शल्य चिकित्सक डॉ. रवींद्र तोष्णीवाल, मानसशास्त्रज्ञ प्रकाश आहेर, वैद्यकीय सामाजिक कार्यकर्ते बालाजी गायकवाड, समुपदेशक चक्रधर गुदप्पे तसेच हदगाव पोलीस ठाण्याचे पोलीस निरीक्षक राजेश पुरी  यांच्या मार्गदर्शनाखाली पोलीस कॉन्सटेबल सुरेश तुप्पेकर उपस्थित होते.

सार्वजनिक ठिकाणी तसेच शैक्षणिक अथवा शासकीय, निमशासकीय कार्यालयाच्या परिसरात तंबाखू व तंबाखूजन्य पदार्थाची विक्री अथवा सेवन किंवा साठवण होत असल्यास जिल्हा तंबाखू नियंत्रण कक्ष, जिल्हा रुग्णालय नांदेड येथे तक्रार नोंदवून नांदेड जिल्हा तंबाखू मुक्त करण्याच्या या अभियानास सहकार्य करावे असे, आवाहन जिल्हा शल्य चिकित्सक डॉ. निळकंठ भोसीकर यांनी केले आहे.
00000

 वृत्त क्र. 1165

जिल्ह्यात आजपासून

100 दिवसीय क्षयरोग मोहीमेस सुरुवात
                                                                                                                                                                                  नांदेड दि. 6 डिसेंबर :- राष्ट्रीय क्षयरोग दुरीकरण कार्यक्रमांतर्गत जिल्ह्यात उद्यापासून 100 दिवसीय क्षयरोग शोध मोहीम राबविण्यात येणार आहे. ही मोहीम दिनांक शनिवार 7 डिसेंबर 2024 रोजी सुरू होणार असून 24 मार्च जागतिक क्षयरोग दिन 2025 रोजी संपणार आहे. या मोहीमेच्या प्रभावी अंमलबजावणीसाठी या 100 दिवसीय क्षयरोग  मोहिमेमध्ये सर्वांनी सक्रीय सहभाग घ्यावा. तसेच  सन 2025 पर्यंत जिल्हा क्षयमुक्त होईल यासाठी प्रयत्न करावेत, असे आवाहन जिल्हाधिकारी अभिजीत राऊत व जिल्हा परिषदेच्या मुख्य कार्यकारी अधिकारी मीनल करणवाल यांनी केले आहे .

या मोहीमेचा उद्देश हा जास्तीत जास्त क्षयरुग्ण शोधून त्यांना उपचारावर आणणे, क्षय रुग्णांचा मृत्यूदर कमी करणे, नवीन क्षय रुग्णांचे प्रमाण कमी करणे, वंचित व अतिजोखमीच्या घटकापर्यंत पोहोचून आरोग्य सेवा पुरवणे, क्षयरोगाविषयी जनजागृती करणे, समाजामधील क्षयरोगाविषयी जनजागृती करणे व सामाजिक कलंक कमी करण्यासाठी उपक्रम राबविणे, जिल्हयातील संमती दिलेल्या क्षयरुग्णांची पंतप्रधान क्षय मुक्त भारत अभियानांतर्गत निक्षयमित्र यांचेकडुन पोषण आहार कीटचे वाटप करणे असा आहे.
 
100 दिवसीय क्षयरोग मोहीम देशभरातील 347 निवडलेल्या जिल्ह्यांमध्ये राबविण्यात येत आहे.  यामध्ये नांदेड जिल्ह्याचा समावेश आहे. 100 दिवसीय क्षयरोग शोध मोहीमेमध्ये जोखीमग्रस्त भाग निवडून त्यांचे सर्वेक्षण करण्यात येणार आह. नि-क्षय शिबीर, अनाथाश्रम, वृद्धाश्रम, उद्योग संस्था, निवासी शाळा, कारागृह येथे क्षयरोग तपासणी शिबिर व स्थलांतरीत ऊस तोडणी कामगार, उच्च जोखीमग्रस्त भाग व वंचित घटकांचे सर्वेक्षण करण्यात येणार आहे. यासाठी जिल्हास्तर व तालुकास्तरावर नियोजन करण्यात आले आहे. ही मोहीम राबविण्यासाठी लोकप्रतिनिधी , सामाजीक संस्था, सामाजिक कार्यकर्ते व इतर विभागांचा सहभाग घेण्यात येणार आहे. मोठ्या प्रमाणात जनजागृती करण्यात येणार आहे. ही मोहीम Intensified case finding ( ICF) प्रकारची मोहीम असल्यामुळे केवळ अति जोखमेच्या व्यक्तीमध्येच राबविण्यात येणार आहे.

*मोहीमेचा उद्देश*

अति जोखमीच्या गटातील व्यक्तीमध्ये व्यापक प्रमाणात जनजागृती राबवून क्षयरोग रुग्ण शोधणे, क्षय रुग्णांमध्ये मृत्यूचे प्रमाण कमी करणे, टीपीटीचा प्रभावी वापर करून नवीन क्षय रुग्णाचे प्रमाण कमी करणे. जास्तीत जास्त क्षयरुग्ण शोधून त्यांना उपचारावर आणणे. नवीन क्षयरुग्णांचे प्रमाण कमी करणे.  वंचित व अति जोखमीच्या घटकापर्यंत पोहोचून आरोग्य सेवा पुरवणे. समाजामधील क्षयरोग विषयी जनजागृती करणे व सामाजिक कलंक कमी करण्यासाठी उपक्रम राबविणे. जिल्ह्यातील संमती दिलेल्या क्षयरुग्णांची पंतप्रधान क्षय मुक्त भारत अभियानांतर्गत निक्षयमित्र यांचेकडुन पोषण आहार कीटचे वाटप करणे अशा स्वरूपाचे आहे .

*अति जोखमीचे गट पुढीलप्रमाणे*

साठ वर्षावरील व्यक्ती, मधुमेह असणाऱ्या व्यक्ती,  धूम्रपान करणाऱ्या व्यक्ती, यापूर्वी क्षयरोगाचा उपचार घेतलेल्या व्यक्ती, क्षय रुग्णांच्या संपर्कातील घरातल्या व्यक्ती, एच.आय.व्ही. बाधित व्यक्ती, तुरुंगातील कैदी, निवासी शाळा, औद्योगिक वसाहती/ कारखाने, वृद्धाश्रम, बी एम आय 18 पेक्षा कमी असणाऱ्या व्यक्ती, झोपडपट्टी, अनाथ आश्रम, औद्यगिक वसाहत मधील कामगार इत्यादी.

ही मोहीम यशस्वी व्हावी म्हणून उपकेंद्र, प्रा.आ.केंद्र, तालुकास्तर व जिल्हास्तरीय आरोग्य विभाग सज्ज झाला असून शोधलेल्या प्रत्येक संशयित क्षय रुग्णाची स्पूटम तपासणी व एक्स-रे तपासणी करून घेण्यात येणार आहे . जिल्ह्यातील तालुका आरोग्य अधिकारी व वैद्यकीय अधिकारी या मोहिमेचे प्रभावी सनियंत्रण व पर्यवेक्षण करणार आहेत .

या मोहिमेमध्ये शोधलेल्या प्रत्येक क्षयरुग्णांना त्वरित उपचार चालू करावा व पल्मोनरी क्षय रुग्णांच्या संपर्कातील पात्र व्यक्तींची सी.वाय.टीबी (CY -TB) तपासणी करून त्यात पॉझिटिव्ह येणाऱ्या व्यक्तींना टीपीटी चालू करण्यात येईल .

जिल्हाभरात ही मोहीम यशस्वी करण्यासाठी जिल्हा आरोग्य अधिकारी डॉ. संगीता देशमुख, जिल्हा क्षयरोग अधिकारी डॉ. सतीश कोपुरवाड संपूर्ण आरोग्य विभाग कार्यान्वित असणार आहे . नागरिकांनी या मोहिमेस प्रतिसाद देऊन मोहीम यशस्वी करावी, असे आवाहन करण्यात आले आहे .
00000