जीवनात यशस्वी होण्यासाठी वाचन आवश्यक

-         धर्मदाय उपआयुक्त किशोर मसने

        

नांदेड दि. 16 :- जीवनात यशस्वी होण्यासाठी वाचन आवश्यक असून जो व्यक्ती ग्रंथालाच आपला गुरु मानतो तो जीवनात यशस्वी होतो. ग्रंथच जीवनात येणाऱ्या अडचणीवर मात करण्याची प्रेरणा देतात, असे प्रतिपादन धर्मदाय उप आयुक्त किशोर मसने यांनी केले.

        भारताचे माजी राष्ट्रपती दिवंगत डॉ.ए.पी.जे.अब्दूल कलाम यांचा जन्मदिन 15 ऑक्टोंबर हा दिवस वाचन प्रेरणा दिन म्हणून साजरा केला जातो. यानिमीत्त नांदेड जिल्हा ग्रंथालय अधिकारी कार्यालय यांच्यावतीने आयोजित ग्रंथप्रदर्शन व व्याख्यान कार्यक्रमाच्या उद्घाटन प्रसंगी श्री मसने बोलत होते. प्रभाकर कानडखेडकर यांच्या अध्यक्षतेखाली पार पाडलेल्या या कार्यक्रमास रणजीत धर्मापुरकीर, राजेंद्र हंबीरे व जिल्हा ग्रंथालय अधिकारी आशिष ढोक हे उपस्थित होते.

     कार्यक्रमाची सुरवात डॉ. ए.पी.जे.अब्दूल कलाम व एस.आर.रंगनाथन यांच्या प्रतीमा पुजनाने झाली. कार्यक्रमाचे प्रास्ताविकात जिल्हा ग्रंथालय अधिकारी आशिष ढोक यांनी वाचन प्ररेणा दिनानिमीत्त कार्यक्रमाचा हेतू विषद केला. याप्रसंगी स्वामी रामानंद तीर्थ मराठवाडा विद्यापीठातील माहितीशास्त्रज्ञ प्रा. रणजीत धर्मापुरीकर यांनी आधुनिक युगातील वाचनांच्या संधी या विषयावर उपस्थित विद्यार्थी, वाचक यांना मार्गदर्शन करताना ग्रंथालयाचे डिजीटायजेशन महत्व, विविध ठिकाणच्या वेबसाईडवर उपलब्ध असलेली माहिती व माहितीचे स्वरुप, वाड:मयचौर्य इत्यादी विषयी माहिती दिली.

      अध्यक्षीय समारोपात मराठवाडा साहित्य परिषद शाखा नांदेडचे अध्यक्ष प्रभाकर कानडखेडकर यांनी मला वाचनाची प्रेरणा देणारे अनेक साहित्यीक आहेत. त्यांचा सहवास मला लाभला म्हणूनच वाचनाची आवड निर्माण झाली. येणा-या पिढीने सुध्दा भरपूर वाचन करावे व जीवनात यशस्वी, व्हावे असे प्रतिपादन याप्रसंगी केले.

         कार्यक्रमास रामचंद्र देठे, निर्मलकुमार सुर्यवंशी, बालाजी पाटील, कोनापूरे, नरसिंग पाटील, व्यकंट रेनगुटवार, पांडुरंग रेनगुटवार, शिवाजी सुर्यवंशी, कुबेर राठोड, विलास पाटील, गजानन कळके, राजेगोरे इत्यादी उपस्थित होते.

       कार्यक्रमाचे सुत्रसंचालन प्रताप सुर्यवंशी यांनी केले तर आभार शिवाजी पवार यांनी मानले. कार्यक्रम यशस्वी करण्यासाठी बाळू पावडे, को.मा.गाडेवाड, संजय पाटील, रघुवीर अदीने प्रयत्न केले. याप्रसंगी विद्यार्थी,वाचक मोठया संख्यने उपस्थित होते.

0000

पदवीधर व शिक्षकसंघाच्या मतदार याद्या

नव्‍याने तयार करण्याचा कार्यक्रम जाहीर

दावे हरकती स्विकारण्याची 6 नोव्हेंबर अंतिम मुदत

नांदेड दि. 16 :- पदवीधर व शिक्षकसंघाच्‍या मतदार याद्या नव्‍याने दिनांक 1 नोव्हेंबर 2019 या अर्हता दिनांकावर (Qualifying Date) आधारीत तयार करण्याचा कार्यक्रम जाहीर केला आहे. नांदेड तालुक्यातील 86 नांदेड उत्तर व 87 नांदेड दक्षिण मतदारसंघात पदवीधर व शिक्षक मतदारसंघाच्‍या मतदार यादीत नव्‍याने तयार करण्यासाठी भारत निवडणूक आयोगाने पुढीलप्रमाणे कार्यक्रम जाहीर केला आहे.  

पुनरिक्षणाचे टप्पे व कालावधी पुढील प्रमाणे राहील. नमूना 18 किंवा 19 व्‍दारे दावे व हरकती स्‍वीकारण्‍यांचा अंतिम दिनांक बुधवार 6 नोव्‍हेबर 2019 आहे. हस्‍तलिखीते तयार करणे व प्रारुप मतदार याद्यांची छपाई मंगळवार 19 नोव्‍हेंबर 2019. प्रारुप मतदार यादयांची प्रसिध्‍दी शनिवार 23 नोव्‍हेंबर 2019 ते सोमवार 9 डिसेंबर 2019 आहे. दावे व हरकती निकाली काढण्‍याचा दिनांक व पुरवणी गुरुवार 26 डिसेंबर 2019 असून मतदार यादीची अंतिम प्रसिध्‍दी सोमवार दिनांक 30 डिसेंबर 2019 होणार आहे.

 भारत निवडणूक आयोगाने दिलेल्या सुचनेनुसार नांदेड तालुक्‍यातील पदवीधर व शिक्षक  मतदारांना मतदार नोंदणी अधिनियम 1960 चे कलम 31 (3) अन्‍वये पदवीधर व शिक्षक संघाच्‍या मतदार यादया नव्‍याने तयार करण्यासाठी जाहीर सूचना प्रसिध्‍द करण्‍यांत येत आहे. या प्रसिध्‍दी पत्रकात नमूद दिनांकापर्यंत सर्व पदवीधर व शिक्षक मतदारांनी आपले फॉर्म तहसिल कार्यालय नांदेड येथे जमा करावेत, असे आवाहन मतदार नोंदणी अधिकारी तथा उपविभागीय अधिकारी लतीफ पठाण यांनी केले आहे.

00000