आणिबाणीच्या कालावधीत तुरुंगवास भोगाव्या

लागलेल्या व्यक्तींनी माहिती सादर करण्याचे आवाहन

        नांदेड, दि. 10 :-  सन 1975 मे 1977 मधील आणिबाणीच्या कालावधीत ज्या व्यक्तींना बंदीवास / तुरुंगवास सोसावा लागला त्यांनी यापुर्वी अर्ज सादर केलेल्या सर्व संबंधितांनी अर्जाचा नमुना परिशिष्ट अ व शपथपत्राचा मसुदा परिशिष्ट ब मध्ये माहिती आवश्यक पुरावा कागदपत्रांच्या प्रमाणित प्रतीसह 20 ऑक्टोंबर 2018 पर्यंत कार्यालयीन वेळेत जिल्हाधिकारी कार्यालय नांदेड येथे सादर करावीत, असे आवाहन जिल्हाधिकारी नांदेड यांनी केले आहे.  

            सन 1975 व 1977 मधील आणिबाणीच्या कालावधीत लोकशाहीसाठी लढा देणाऱ्या ज्या व्यक्तींना बंदीवास / तुरुंगवास सोसावा लागला अशा व्यक्तींचा सन्मान / यथोचित गौरव करण्यासंबंधी धोरण निश्चित करण्यात आले आहे. त्याअनुषंगाने अर्जदारांकडून प्राप्त करुन घ्यावयाच्या अर्जाचा नमुना परिशिष्ट अ मध्ये असून शपथपत्राच्या मसुद्यामध्ये सुधारणा करण्यात आली आहे. सुधारित शपथपत्राचा मसुदा परिशिष्ट ब मध्ये सादर करण्याबाबत शासनाने सुचना दिल्या आहेत, असेही प्रसिद्धी पत्रकात नमूद केले आहे.

00000

नांदेड शिख गुरुद्वारा सचखंड

श्री हजूर अपचलनगर साहिब मंडळ निवडणूक 2018

प्रारुप मतदार यादीवर आक्षेप असल्यास

लेखी स्वरुपात दाखल करण्याचे आवाहन   

  नांदेड, दि. 10 :- येथील नांदेड शिख गुरुव्‍दारा सचखंड श्री हजूर अपचलनगर साहिब मंडळाच्‍या निवडणूक प्रारुप मतदार यादीबाबत हरकती, दावे व आक्षेप यासंदर्भात 4 ऑक्टोंबर रोजी जिल्‍हाधिकारी नांदेड यांनी पारीत केलेले आदेशान्वये आक्षेप असल्यास संबंधित मतदारांनी मुदतीत विभागीय आयुक्‍त कार्यालयात लेखी स्‍वरुपात अपिल दाखल करावेत, असे आवाहन जिल्‍हाधिकारी नांदेड यांच्‍यावतीने करण्‍यात आले आहे.              

जिल्‍हाधिकारी नांदेड यांनी दिलेल्‍या निकालाविरुध्‍द अपिल करण्‍यासाठी सक्षम अधिकारी, विभागीय आयुक्‍त औरंगाबाद विभाग औरंगाबाद यांचेकडे 5 ते 19 ऑक्‍टोबर 2018 या कालावधीत अपीलार्थींना व्दितीय अपील दाखल करता येईल. विभागीय आयुक्‍त औरंगाबाद यांचेकडे 20 ते 26 ऑक्‍टोबर 2018 या कालावधीत प्राप्‍त अपील निकाली काढण्‍यात येतील. त्यानंतर 3 नोव्‍हेंबर 2018 रोजी अंतिम मतदार यादी प्रसिध्‍द होईल.

नांदेड जिल्‍ह्यातील व नांदेड तालुक्‍यातील ज्‍या मतदारांनी दुबार मतदार नोंदणी केली आहे किंवा एकापेक्षा जास्‍त वेळा नोंदणी केली आहे अशा मतदारांची नावे अंतिम मतदार यादीतून वगळण्‍याबाबत 4 ऑक्टोंबर रोजी आदेश पारीत करण्‍यात आले आहेत. या आदेशाच्‍या प्रती संबंधित जिल्‍हाधिकारी कार्यालये, संबंधित तहसिल कार्यालये येथे पाहण्‍यास उपलब्‍ध आहेत.

प्राप्‍त हरकती व दावे, आक्षेप अर्जांच्‍या अनुषंगाने, संबंधित तहसिलदार यांचे अभिप्राय / अहवाल, आक्षेपकर्त्‍यांचे अर्ज, सुनावणी दरम्‍यान निदर्शनास आलेले अभिलेखे यावरुन माजलगाव जि. बीड, मंठा जि. जालना, मुदखेड जि. नांदेड, नांदेड जि. नांदेड  येथील अंतिम मतदार यादीतून काही नावे वगळणे, काही मतदारांची नावे अंतिम मतदार यादीत समाविष्‍ट करणे, काही मतदारांची नावामध्‍ये दुरुस्‍ती करणे, काही मतदाराच्‍या नावाशी संबंधीत विधानसभा मतदार संघ क्रमांक, यादी भाग क्रमांक, यादीतील अनुक्रमांक व नावातील दुरुस्‍ती करणे, नांदेड तालुक्‍याच्‍या प्रारुप मतदार यादीत मुदखेड तालुक्‍यातील विधानसभा मतदारसंघातील ज्‍या मतदारांच्‍या नावाचा समावेश झाला आहे अशा मतदारांची नावे मुदखेड तालुक्‍याच्‍या अंतिम मतदार यादीत समाविष्‍ट करणेबाबत 4 ऑक्टोंबर 2018 रोजी आदेश पारीत करण्‍यात आले आहेत.

नांदेड शिख गुरुव्‍दारा सचखंड श्री हजूर अपचलनगर साहिब बोर्ड अधिनियम 1956 च्‍या कलम 6 (1) (2) मधील तरतुदीप्रमाणे नांदेड शिख गुरुव्‍दारा सचखंड श्री हजूर अपचलनगर साहिब मंडळाच्‍या तीन सदस्‍यांना निवडून देण्‍यासाठी घ्‍यावयाच्‍या निवडणूकीसाठी तयार करण्‍यात आलेली प्रारुप मतदार यादी या कार्यालयाचे अधिसूचनेअन्‍वये 27 ऑगस्‍ट 2018 रोजी मतदार क्षेत्र औरंगाबाद, जालना, परभणी, हिंगोली, उस्‍मानाबाद, नांदेड, बीड लातूर हे संपुर्ण जिल्‍हे व चंद्रपुर जिल्‍ह्यातील राजूरा, कोरपना व जीवती हे तालुके (तत्‍कालीन हैद्राबाद निजाम संस्‍थानाचा महराष्‍ट्रातील भाग) येथे प्रसिध्‍द करुन 28 ऑगस्‍ट ते 26 सप्‍टेंबर 2018 या कालावधीत प्रारुप मतदार यादीवर हरकती व दावे स्विकारण्‍यात आले. सदरील दावे, व हरकती, आक्षेप अर्जांच्‍या अनुषंगाने 27 व 29 सप्टेंबर 2018 रोजी सुनावणी घेण्‍यात आली होती, असेही प्रसिद्धी पत्रकात नमूद केले आहे.

00000

महिला लोकशाही दिनी

अर्ज करण्याचे आवाहन 

  नांदेड, दि. 10 :- समस्याग्रस्त व पिडीत महिलांनी सोमवार 15 ऑक्टोंबर 2018 रोजी महिला लोकशाही दिनी आपले अर्ज विहित नमुन्यात सादर करावे, असे आवाहन जिल्हास्तरीय महिला लोकशाही दिन समितीचे अध्यक्ष तथा जिल्हाधिकारी नांदेड व सदस्य सचिव तथा जिल्हा महिला व बाल विकास अधिकारी नांदेड यांनी केले आहे. 

दर महिन्याच्या तिसऱ्या सोमवारी जिल्हास्तरीय महिला लोकशाही दिन घेण्यात येतो. सोमवार 15 ऑक्टोंबर रोजी सकाळी 11 वा. जिल्हाधिकारी नांदेड यांच्या अध्यक्षतेखाली बचत भवन जिल्हाधिकारी कार्यालय परिसर नांदेड येथे महिला लोकशाही दिन होणार आहे. संबंधीत समितीचे सदस्य व शासन निर्णयात नमुद संबंधीत विभागाचे अधिकारी यांनी उपस्थित रहावे, असेही आवाहन सदस्य सचिव तथा जिल्हा महिला व बालविकास अधिकारी नांदेड यांनी केले आहे.

00000

सातत्यपुर्ण सरावाने यश प्राप्त होते

- सोपान टोंपे

नांदेड दि. 9 :- परीक्षा मग ती कोणतीही असो सातत्याने सराव केल्यास यश नक्की मिळते. ते सी-सॅट या विषयावर मार्गदर्शन करीत होते. सी-सॅटमध्ये जास्तीत जास्त गुण घेण्यासाठी विदयार्थ्यांनी नियमीत सराव करावा. आयोगाच्या मागील प्रश्न पत्रिका वेळ लाऊन सोडवाव्यात, असे प्रतिपादन नुकतेच उपजिल्हाधिकारी पदावर निवड झालेले सोपान टोंपे  यांनी केले.

उज्ज्वल नांदेड मोहिमेंतर्गत जिल्हाधिकारी कार्यालय सेतू समिती, नांदेड वाघाळा शहर महानगरपालिका व जिल्हा ग्रंथालय अधिकारी कार्यालय नांदेड यांच्यावतीने आयोजित दरमहा 5 तारखेच्या स्पर्धा परीक्षा मार्गदर्शन शिबीरमध्ये बोलत होते. याप्रसंगी व्याख्याते कैलास तिडके, जिल्हा ग्रंथालय अधिकारी आशिष ढोक यांची प्रमुख उपस्थिती होती.

            जिल्हा ग्रंथालय अधिकारी आशिष ढोक यांनी प्रास्ताविकात स्पर्धा परीक्षेची तयारी करण्या-या विद्यार्थ्यांनी सर्व स्पर्धा परीक्षा देण्याची तयारी ठेवावी यासाठी जिल्हा प्रशासनाच्यावतीने नियमित मार्गदर्शन तथा सराव परीक्षेचे आयोजन करण्यात येत असल्याचे सांगितले.

            कैलास तिडके (Child Development Project Officer) यांनी दिवसभर चाललेल्या या शिबिरामध्ये विद्यार्थ्यांना डिसेंबरमध्ये होणा-या बाल विकास प्रकल्प अधिकारी या परीक्षेच्या अनुषंगाने मार्गदर्शन केले.

सूत्रसंचालन मुक्ती राम शेळके यांनी तर आभार  प्रताप सुर्यवंशी यांनी मानले. कार्यक्रमाच्या यशस्वीतेसाठी आरती कोकुलवार, बाळू पावडे, संजय कर्वे, कोंडिबा गाडेवाड, रघुवीर श्रीरामवार, सोपान यनगुलवाड आदीने सहकार्य केले.

000000

दिवाळीसाठी फटाका दुकानांच्या

परवान्यासाठी अर्ज करण्याचे आवाहन

नांदेड दि. 9 :- दिपावली उत्सव 2018 मध्ये तात्पुरती फटाका विक्रीची दुकाने सुरु करण्यासाठी परवाना घेणे आवश्यक आहे. तालुका भोकर व मुदखेड ग्रामीण हद्दीत तात्‍पुरते फटाका परवाना विस्फोटक अधिनियम 2008  नुसार अर्ज 4 ते 19 ऑक्टोंबर 2018 पर्यंत महा-ई-सेवा केंद्र सेतू भोकर व मुदखेड यांचे मार्फत विक्री व स्विकारले जातील, असे उपविभागीय दंडाधिकारी भोकर यांनी कळविले आहे.     

तात्‍पुरता फटाके विक्री परवानासाठी विहित नमुन्‍यात पुढील कागदपत्रांसह अर्ज कार्यालयात दाखल करावेत.   नमुना AE-5 मधील अर्ज, परवाना घेण्‍याच्‍या दुकानाचा नकाशा ज्‍यात साठा व विक्री करावयाचे ठिकाण, साठवणूक क्षमता, त्‍याचा मार्ग परिसरातील सुविधा इत्‍यादी तपशील दर्शविण्‍यात यावा. The Explosive Rules 2008 मधील नियम 86(3) अन्‍वये सदर व इतर दुकान यात किमान 15 मीटरचे अंतर असणे आवश्‍यक  आहे. नकाशात दुकान क्रमांक नमुद असावा. अर्जदाराचे दोन पासपोर्ट आकाराचे छायाचित्र. परवाना शुल्कासाठी 500 रुपये चलनाची प्रत जोडलेली असावी. एकाच परिसरात सामुहिकरित्‍या दुकाने टाकण्‍यात येत असल्‍यास संबंधीत अर्जदारास देण्‍यात आलेला दुकान क्रमांक नमुद असलेले प्रमाणपत्र (Allotment Letter). संबंधीत ग्रामपंचायत, नगरपालिका, नगरपरिषद यांचे  नाहरकत प्रमाणपत्र. संबंधीत पोलीस स्‍टेशनचे चारित्र्य व नाहरकत प्रमाणपत्र. जागेच्‍या मालकी हक्‍काचा पुरावा. दुकानाच्‍या ठिकाणी करण्‍यात आलेली व्‍यवस्‍था तपशील अग्निशमन दल, सुरक्षा रक्षक इ.. इतर अटी व शर्ती नियम 84 नुसार.

अर्जदाराने विहित नमुन्‍यातील अर्ज व सर्व कागदपत्राची पुर्तता केली असल्‍याची खात्री झाल्‍यानंतर नोंदवून देण्‍यात येईल. चलनाद्वारे शुल्क शासन जमा झाल्‍यानंतर चलनाची प्रत अर्जासोबत जोडून, अर्ज महाईसेवा केंद्र भोकर व मुदखेड यांचेकडे 4 ते 19 ऑक्टोंबर पर्यंत स्विकारण्यात येतील. त्यानंतर आलेल्या अर्जाचा विचार केला जाणार नाही. याच कालावधीत परवाने महाईसेवा केंद्रामार्फत वितरीत करण्यात येतील.

       सण उत्सव कालावधीत The Explosive Rules 2008 मधील नियम 84 (6) अन्‍वये एकाच ठिकाणी 50 पेक्षा जास्‍त दुकानास अनुज्ञाप्‍ती दिली जाणार नाही. विहित केलेल्‍या साठा व विक्री परिणामापर्यतचाच व्‍यवहार करता येईल. याबाबत The Explosive Rules 2008 मधील नियमानुसार व SET-X ते SET-Xv मधील निर्देशानुसार साठा नोंदवही तयार करुन ती तपासणीसाठी उपलब्‍ध ठेवावी लागेल. The Explosive Rules 2008 अन्‍वये अनाधिकृतपणे विस्‍फोटक साठा व विक्री करणे हा गंभीर स्‍वरुपाचा अपराध असून तो दंडनीय आहे, याची नोंद घ्यावी असेही उपविभागीय दंडाधिकारी भोकर यांनी कळविले आहे.

000000

जवरला येथे सर्व रोगनिदान महाआरोग्य शिबिराचे शनिवारी आयोजन

ग्रामस्थांनी शिबिराचा लाभ घ्यावा - जिल्हाधिकारी अरुण डोंगरे  

नांदेड, दि. 9 :- राज्यपाल सी. विद्यासागर राव यांनी दत्तक घेतले गाव किनवट तालुक्यातील जवरला येथे शनिवार 13 ऑक्टोंबर 2018 रोजी सर्व रोगनिदान महाआरोग्य शिबिराचे आयोजन जिल्हा परिषद शाळेच्या प्रांगणात सकाळी 9 ते दुपारी 4 वाजेपर्यंत करण्यात आले आहे. या शिबिराचा लाभ जवरला व लगतच्या गावातील ग्रामस्थांनी घ्यावा, असे आवाहन जिल्हाधिकारी अरुण डोंगरे यांनी केले आहे.    

जिल्हाधिकारी कार्यालय नांदेड, आरोग्य विभाग व मानव विकास कार्यक्रमांतर्गत या शिबिराचे आयोजन करण्यात आले आहे. शिबिरात ग्रामस्थांची आरोग्य तपासणी तज्ज्ञ डॉक्टरांमार्फत मोफत करण्यात येणार आहे. यात गरोदर व स्तनदा मातांची तपासणी, बालकांची तपासणी (मानव विकास कार्यक्रम). नेत्ररोग विषयक तपासण्या व सल्ला. सिकलसेल तपासणी. असांसर्गिक आजारांबाबत (रक्तदाब, मधूमेह, कर्करोग) (एन.सी.डी. कार्यक्रम). प्रयोगशाळा तपासणी. आयुष्यमान भारत- प्रधानमंत्री जनआरोग्य योजनेचे गोल्डन कार्ड वाटप. इतर आजार तपासणी (जनरल फिजीशियन). आरोग्य प्रदर्शनी व जनजागृती. याप्रमाणे सर्व विभागाचे सहकार्य व समन्वयाने हे शिबिर आयोजित करण्यात आले आहे. हे महाआरोग्य शिबीर जवरला येथील जिल्हा परिषद शाळेच्या प्रांगणात आयोजित करण्यात आले आहे. या शिबिरात तज्ज्ञ डॉक्टांराकडून संबंधीत रुग्णांची व ग्रामस्थांची आरोग्य तपासणी मोफत करण्यात येणार आहे. जवरला येथील ग्रामस्थ तसेच लगतच्या गावातील ग्रामस्थांनी मोठ्या प्रमाणात या सर्व रोगनिदान महाआरोग्य शिबिराचा लाभ घ्यावा, असेही आवाहन नांदेड जिल्हा प्रशासनाच्यावतीने करण्यात आले आहे.

000000

सहकार मंत्री सुभाष देशमुख यांचा दौरा

नांदेड, दि. 9 :- राज्याचे सहकार, पणन व वस्त्रोद्योग मंत्री सुभाष देशमुख हे नांदेड दौऱ्यावर येत असून त्यांचा दौरा कार्यक्रम पुढील प्रमाणे राहील.

गुरुवार 11 ऑक्टोंबर 2018 रोजी मुंबई येथून देवगिरी एक्सप्रेसने सकाळी 8.40 वा. नांदेड रेल्वे स्थानक येथे आगमन. सकाळी 8.50 वा. नांदेड रेल्वे स्थानक येथून शासकीय वाहनाने शासकीय विश्रामगृहाकडे प्रयाण. सकाळी 9.10 वा. शासकीय विश्रामगृह नांदेड येथे आगमन व राखीव. सकाळी 11 ते दुपारी 12.30 वाजेपर्यंत श्री गुरुजी सहकारी रुग्णालय उद्घाटन सोहळ्यास उपस्थिती. स्थळ - श्री गुरुजी रुग्णालय बजाज फंक्शन हॉल शेजारी डॉ. एम. जी. बजाज इस्टेट छत्रपती चौक पुर्णा रोड नांदेड. दुपारी 12.30 ते 1 वाजेपर्यंत राखीव. दुपारी 1.05 वा. नांदेड येथून शासकीय वाहनाने लातूरकडे प्रयाण करतील.

000000