जिल्ह्यात दिवसभरात सरासरी 26.80 मि.मी. पाऊस   

लोहा तालुक्यात हंगामातील सरासरी पूर्ण

  

           नांदेड, दि. 15 :- जिल्ह्यात  गुरुवार 15 सप्टेंबर 2016 रोजी  सकाळी 8 वा. संपलेल्या गत 24 तासात एकूण 428.77 मिलीमीटर  पाऊस झाला असून  जिल्‍ह्यात  दिवसभरात सरासरी 26.80 मिलीमीटर पावसाची  नोंद  झाली  आहे. जिल्ह्यात या हंगामात आतापर्यंत सरासरी 751.52 मि.मी. पावसाची नोंद झाली आहे.

जिल्ह्यात या हंगामात आतापर्यंत झालेल्या पावसाची तालुकानिहाय टक्केवारी पुढील प्रमाणे. (सर्वाधिक ते उतरत्या क्रमाने) लोहा- 100.78, भोकर- 91.65,  अर्धापुर- 91.27, नांदेड- 90.79, हदगाव- 90.49, माहूर- 83.59, बिलोली- 80.86, कंधार- 79.36, हिमायतनगर- 77.59,  मुखेड- 77.40, नायगाव- 73.68, धर्माबाद- 70.92, मुदखेड- 67.52, किनवट- 66.95, देगलूर- 61.87, उमरी- 57.57. जिल्ह्याची यंदाच्या हंगामातील आतापर्यंत पावसाची  टक्केवारी  78.65 इतकी झाली आहे.   

जिल्ह्यात गुरुवार 15 सप्टेंबर रोजी सकाळी 8 वा. संपलेल्या गत 24 तासात  झालेला  पाऊस मिलीमीटरमध्ये  तालुकानिहाय  पुढील  प्रमाणे  कंसात  एकूण  पाऊस  : नांदेड- 45.13 (827.87), मुदखेड- 17.00 (576.35), अर्धापूर- 49.33 (793.66) , भोकर- 21.75 (913.25), उमरी- 45.00 (573.60), कंधार- 24.33 (640.14), लोहा- 32.00 (839.84), किनवट- 10.14 (830.17), माहूर- 31.75 (1036.50), हदगाव- 29.14 (884.40), हिमायतनगर- निरंक (758.32), देगलूर- 17.83 (557.01), बिलोली- 21.80 (782.80), धर्माबाद- 14.00 (649.37), नायगाव- 26.00 (674.60), मुखेड- 43.57 (686.41) आज  अखेर  पावसाची सरासरी 751.52  (चालू वर्षाचा एकूण पाऊस 12024.29) मिलीमीटर आहे. 

00000

तृतीयपंथीसाठी कायदेविषयक शिबीर संपन्न

           नांदेड, दि. 14 :- जिल्हा विधी सेवा प्राधिकरण नांदेड कार्यालयामार्फत नुकताच रेल्वे स्टेशन नांदेड येथील आरपीएफच्या कार्यालयात तृतियपंथी यांच्या कायदेविषयक समस्या व त्यावरील उपाय या विषयावरील कायदे विषयक शिबीराचे आयोजन करण्यात आले होते.  

अध्यक्षस्थानी  न्या. ए. आर. कुरेशी होते. न्या. कुरेशी यांनी समाजातील घटक असलेल्या या व्यक्तींना समाजात सन्मानाने जगण्याचा अधिकार आपल्या राज्यघटनेत असून समाजाने त्यांना सन्मानाची वागणुक दिली पाहिजे. आजच्या तृतियपंथी यांची संख्या अल्प असल्यामुळे त्यांच्या विविध अडचणी दूर करण्यासाठी संघटीत होणे गरजेचे आहे. इतरांना त्रास होईल अशी कृत्ये न करता  त्यांनी गावोगावी फिरत न रहाता शिकले पाहिजे, काम केले पाहिजे व सन्मानाने जगले पाहिजे. सामान्यांनी त्यांना चांगली वागणूक देवून त्यांना आपल्या प्रवाहात सामावून घेतले पाहिजे, असे सांगीतले. तसेच यावेळी राष्ट्रीय विधी सेवा प्राधिकरणाच्या विविध योजनाची माहिती दिली. 

            तत्पुर्वी जिल्हा न्यायालय नांदेड येथील न्या. जे. आर. पठाण यांनी पर्यायी वाद निवारण पध्दती आणि त्यांचे फायदे याबाबत मार्गदर्शन केले. अॅड. प्रविण अयाचित यांनी तृतियपंथी यांच्या विधी समस्या व त्यावरील उपाय याबाबत मार्गदर्शन केले. अॅड. वाकोडकर यांनी नागरीकांचे मुलभुत कर्तव्य याबाबत मार्गदर्शन केले. रेल्वे पोलीस (जीआरपी) चे वरिष्ठ पोलीस निरीक्षक  श्री. अत्तार व अॅड. श्रीमती झगडे यांनी कायदेविषयक मार्गदर्शन केले. यावेळी रेल्वे सुरक्षाबलचे पोलीस निरिक्षक श्री. यादव, अॅड. श्रीमती घोरपडे यांची उपस्थिती होती.

            गौरी शानूर बल्कस यांनीही मनोगत व्यक्त केले. सुत्रसंचालन अॅड. श्री वाकोडकर यांनी केले तर आभार अॅड. प्रविण अयाचित यांनी मानले.  विधी सेवाचे संगमेश्वर मंडगे,  रेल्वे पोलीस कर्मचारी यांनी कार्यक्रम संयोजन केले.

00000

औरंगाबाद खंडपीठाचे न्यायाधीश

न्या. ए. व्ही. निरगुडे यांचा दौरा

           नांदेड, दि. 14 :-  उच्च न्यायालय मुंबई, खंडपीठ औरंगाबादचे न्यायाधीश न्या. ए. व्ही. निरगुडे हे शनिवार व रविवार दोन दिवसांसाठी नांदेड दौऱ्यावर येत असून त्यांचा दौरा कार्यक्रम पुढील प्रमाणे राहील.

            शनिवार 17 सप्टेंबर 2016 रोजी औरंगाबाद येथून नंदिग्राम एक्सप्रेसने सकाळी 5.10 वा. नांदेड येथे आगमन व शासकीय विश्रामगृह नांदेड येथे राखीव व मुक्काम.

            रविवार 18 सप्टेंबर 2016 रोजी रात्री 11.40 वा. नांदेड येथून अजिंठा एक्सप्रेसने औरंगाबादकडे प्रयाण करतील.

000000

जादुटोणा विरोधी कायदा जनजागृती

समितीची बैठक संपन्न

            नांदेड, दि. 14 :- जादुटोणा विरोधी कायदा, जनजागृती प्रचार आणि प्रसार यासाठी नांदेड जिल्ह्यात तालुकास्तरीय, तसेच ग्रामस्तरीय कार्यक्रमांचे सुक्ष्म नियोजन करण्यात यावे, तसेच जिल्हास्तरीय कार्यशाळेद्वारे अनेक संदेशदूत तयार करावेत, असे निर्देश अप्पर जिल्हाधिकारी संतोष पाटील यांनी आज येथे दिले. जादूटोणा विरोधी कायदा जनजागृती प्रचार आणि प्रसार कार्यक्रम अंमलबजावणी समितीची बैठक श्री. पाटील यांच्या अध्यक्षतेखाली संपन्न झाली. त्यावेळी ते बोलत होते. बैठकीस जनजागृती जिल्हास्तरीय समितीचे सचिव तथा सहायक समाज कल्याण आयुक्त भगवान वीर, जिल्हा समन्वयक मच्छिंद्र गवाले, सहायक आयुक्त एल. के. चौरे आदींची उपस्थिती होती.

            महाराष्ट्र सरकारने नरबळी आणि इतर अमानुष, अनिष्ट, अघोरी प्रथा व जादुटोणा यांना प्रतिबंध घालण्यासाठी त्यांचे समूळ उच्चाटन करण्यासाठी अधिनियम लागू केला आहे. या जादुटोणा विरोधी कायद्याच्या प्रचार आणि प्रसारासाठी जिल्हास्तरीय समित्यांचे गठन करण्यात आले असून अप्पर जिल्हाधिकारी या समितीचे अध्यक्ष आहेत. जिल्ह्यात या कायद्याच्या प्रचार व प्रसारासाठी विशेष प्रयत्न केले जाणार आहेत. त्यामध्ये सुरवातीला तीन तालुकास्तरीय कार्यक्रमांचे नियोजन करण्याचे, तसेच त्यानंतर ग्रामस्तरापर्यंत पोहचून विषयनिहाय जनजागृतीसाठी प्रयत्न करण्याचे निर्देश अप्पर जिल्हाधिकारी श्री. पाटील यांनी दिले. सर्पदंश उपचारातील अंधश्रद्धा, कुपोषण दूर करण्यासाठीचे अघोरी उपाय तसेच अन्य विघातक प्रथांबाबत ग्रामस्तरांपर्यंत पोहचून जाणीव-जागृतीचे विशेषतः स्थानिक प्रबोधनकारांचे सहाय्य घेण्यात यावे, असेही सुचविण्यात आले. जनजागृतीसाठी महाविद्यालय ते विद्यापीठीयस्तरावर वक्तृत्त्व स्पर्धा घेण्यात याव्यात, स्वंयप्रेरीत आणि लोकांच्या भाषेत जनजागृती करणाऱ्यांची मदत घेण्यात यावेत, असेही सांगण्यात आले.

00000000

जिल्ह्यात हंगामात 75.84 टक्के पाऊस   

लोहा तालुक्यात हंगामात 96.94 टक्के, गत 24 तासात 90.50 मि.मी. पाऊस

           नांदेड, दि. 14 :- जिल्ह्यात  बुधवार 14 सप्टेंबर 2016 रोजी  सकाळी 8 वा. संपलेल्या गत 24 तासात एकूण 507.40 मिलीमीटर  पाऊस झाला असून  जिल्‍ह्यात  दिवसभरात सरासरी 31.71 मिलीमीटर पावसाची  नोंद  झाली  आहे. जिल्ह्यात या हंगामात आतापर्यंत सरासरी 724.72 मि.मी. पावसाची नोंद झाली आहे.

जिल्ह्यात या हंगामात आतापर्यंत झालेल्या पावसाची तालुकानिहाय टक्केवारी पुढील प्रमाणे. (सर्वाधिक ते उतरत्याक्रमाने) लोहा- 96.94, भोकर- 89.47,  हदगाव- 87.51, नांदेड- 85.84, अर्धापुर- 85.59, माहूर- 81.03, बिलोली- 78.61, हिमायतनगर- 77.59, कंधार- 76.35, मुखेड- 72.49, नायगाव- 70.84, धर्माबाद- 69.39, किनवट- 66.13, मुदखेड- 65.53, देगलूर- 59.89, उमरी- 53.05. जिल्ह्याची यंदाच्या हंगामातील आतापर्यंत पावसाची  टक्केवारी  75.84 इतकी झाली आहे.   

जिल्ह्यात बुधवार 14 सप्टेंबर रोजी सकाळी 8 वा. संपलेल्या गत 24 तासात  झालेला  पाऊस मिलीमीटरमध्ये  तालुकानिहाय  पुढील  प्रमाणे  कंसात  एकूण  पाऊस  : नांदेड- 53.75 (782.74), मुदखेड- 8.67 (559.35), अर्धापूर- 56.67 (744.33) , भोकर- 8.50 (891.50), उमरी- 12.67 (528.60), कंधार- 52.67 (615.81), लोहा- 90.50 (807.84), किनवट- 14.43 (820.03), माहूर- 25.00 (1004.75), हदगाव- 26.57 (855.26), हिमायतनगर- 2.00 (758.32), देगलूर- 29.00 (539.18), बिलोली- 27.20 (761.00), धर्माबाद- 21.00 (635.37), नायगाव- 26.20 (648.60), मुखेड- 52.57 (642.84) आज  अखेर  पावसाची सरासरी 724.72  (चालू वर्षाचा एकूण पाऊस 11595.52) मिलीमीटर आहे. 

00000

“संवाद पर्व” अभियानांतर्गत

विज्ञान प्रदर्शनाचे उद्घाटन संपन्न

प्रदर्शनास नागरिकांचा उत्स्फुर्त प्रतिसाद  

नांदेड, दि. 13 :- शासनाच्या विविध योजना व उपक्रमांची जनजागृती व्हावी यासाठी माहिती व जनसंपर्क महासंचालनालयाच्या “संवाद पर्व” या अभियानांतर्गत  शासकीय आयुर्वेदीक महाविद्यालयात आयोजित  “मानवी अवयवदान नाव नोंदणी व विज्ञान प्रदर्शनाचे” उद्घाटन महाविद्यालयाचे निवासी वैद्यकीय अधिकारी डॉ. किशोर यादव यांच्या हस्ते करण्यात आले. यावेळी अवयवदान नाव नोंदणीस उत्स्फुर्त प्रतिसाद मिळाला असून महाविद्यालयाच्यावतीने आतापर्यंत सुमारे 1 हजार अवयवदान नाव नोंदणी करण्यात आली.

नांदेड  शासकीय आयुर्वेदीक महाविद्यालयात जिल्हा माहिती कार्यालय व श्री आयुर्वेदीक गणेश मंडळ नांदेड यांच्या संयुक्त विद्यमाने “संवाद पर्व”  उपक्रमांतर्गत “मानवी अवयवदान नाव नोंदणी व विज्ञान प्रदर्शनाचे” आयोजित करण्यात आले. यावेळी जेष्ठ पत्रकार  डॉ. रविंद्र रसाळ, जिल्हा माहिती अधिकारी दिलीप गवळी, गणेश मंडळाचे अध्यक्ष अनिकेत नादरे, उपाध्यक्ष विशाल वाघमारे, सचिव दिलीप वरडे, कोषाध्यक्ष किरण गव्हाणे आदी उपस्थित होते. हे  प्रदर्शन दोन दिवस सर्वांसाठी खुले आहे.

अवयवदानाने मृत्युच्या उंबरठ्यावर उभे असलेल्या रुग्णांना दुसरे जीवन जगण्याची संधी मिळू शकते. म्हणून राज्य शासनाने राज्यात महाअवयवदान अभियान राबविले आहे. त्याला सर्वस्तरावर चांगला प्रतिसादही मिळत आहे. या पार्श्वभुमीवर जनतेमध्ये अधिक जनजागृतीसाठी “संवाद पर्व” या अभियानातून प्रयत्न केला जात आहे. त्याअनुषंगाने आयुर्वेदीक महाविद्यालयात अवयवदान नाव नोंदणी व विज्ञान प्रदर्शन भरवण्यात आले.  डोळा, त्वचा, फुफ्फुसे, हृदय, प्लीहा, मुत्रपिंड, यकृत आदी मानवी अवयवांची प्रात्याक्षिकासह माहिती देवून नागरिकांना त्याचे महत्व पटवून देण्यात आले. 

यावेळी डॉ. यादव यांनी नागरिकांपर्यंत पोहचण्यासाठी “संवाद पर्व” हे अभियान निश्चित उपयुक्त आहे. अवयव ही निर्सगाने दिलेली अमुल्य भेट आहे. मृत्युनंतर इतर गरजू रुग्णांना आपण अवयवदान देवू शकता असे सांगून या प्रदर्शनाला नागरिकांनी भेट देवून अवयवदान करण्याचा संकल्प करावा, असे आवाहन केले.

प्रारंभी जिल्हा माहिती अधिकारी दिलीप गवळी यांनी “संवाद पर्व” या उपक्रमामागील भुमिका विशद केली. या उद्घाटन समारंभानंतर “बेटी बचाओ बेटी पढाओ” या विषयावर महाविद्यालयाच्या विद्यार्थ्यांनी पथनाट्य सादर केले. या पथनाट्यामध्ये स्त्रीभ्रुण हत्या, व्यसन मुक्ती, गर्भलिंग निदान, महिला अत्याचार, हुंडाबंदी आदी विषयी आकर्षक मांडणीतून संदेश दिला.  

  या पथनाट्याचे लेखन किरण मुदखेडे यांनी केले तर दिगदर्शन डॉ. किशोर यादव यांनी केले.  बोईनवाड आकाश, प्रवीण चव्हाण, अक्षय पवार, हरिष बोडके, विशाल सांगळे, प्रविण बोडके, धनश्री गोरे, कल्याणी अग्रवाल, प्राजक्ता गोखने, जुई केंद्रे, येागेश झाडे यांनी या पथनाट्यात भाग घेतला. शासकीय आयुर्वेदीक महाविद्यालयाच्या परिसरात  “बेटी बचाओ बेटी पढोओ” , “स्त्री भ्रुण हत्या”, “व्सन मुक्ती”, “पाणी बचत” आदी विषयांवर काढलेल्या आकर्षक रांगोळ्या उपस्थितांचे लक्ष वेधत होत्या. यावेळी महाविद्यालयीन विद्यार्थी-विद्यार्थींनी, नागरिक  उपस्थित होते.     

00000

“संवाद पर्व” अभियानांतर्गत विविध योजनेची माहिती नांदेड आकाशवाणी केंद्रावरुन आज प्रसारण

           नांदेड, दि. 13 :- शासनाच्या विविध योजना जनतेपर्यंत पोहचविण्यासाठी हाती घेतलेल्या "संवाद पर्व"  अभियानांतर्गत नांदेड आकाशवाणी मालिकेतील चौथ्या भागात सौ. राजश्री हेमंत पाटील, सौ. अरुंधती पुरंदरे-साले, सौ. रेणुका तम्मलवाड व डॉ. मिरा कुलकर्णी यांनी सहभाग घेतला आहे. या कार्यक्रमाचे नांदेड आकाशवाणी केंद्रावरुन 13 व 14 सप्टेंबर 2016 रोजी प्रसारण होणार आहे.   

          

  माहिती व जनसंपर्क महासंचालनालयाच्या जिल्हा माहिती कार्यालय व आकाशवाणी केंद्र नांदेड यांच्या संयुक्त विद्यमाने "संवाद पर्व" अभियानांतर्गत विविध योजना विषयी माहिती देण्यासाठी मालिकेचे प्रसारण करण्यात येत आहे. या मालिकेतील चौथ्या भागात बेटी बचाव बेटी पढाओ, माझी कन्या भाग्यश्री योजना, पीसीपीएनडीटी कायदा व प्रमोद महाजन कौशल्य विकास कार्यक्रम आदी योजनांविषयी गोदावरी अर्बन मल्टिस्टेट क्रेडिट को-ऑप. सोसायटीच्या अध्यक्षा सौ. राजश्री हेमंत पाटील, माजी नगरसेविका सौ. अरुंधती पुरंदरे-साले, कौशल्य विकास, रोजगार व उद्योजकता जिल्हा कौशल्य विकास रोजगार व उद्योजकता मार्गर्शन केंद्राच्या सहायक संचालक सौ. रेणुका तम्मलवाड, रोटरी क्लबच्या अध्यक्षा डॉ. मिरा कुलकर्णी यांनी माहिती दिली. या कार्यक्रमाचे सुत्रसंचालन आकाशवाणीचे केंद्र संचालक भिमराव शेळके यांनी केले आहे.  

या कार्यक्रमाचे नांदेड आकाशवाणी केंद्रावरुन आज मंगळवार 13 सप्टेंबर 2016 रोजी रात्री 8.15 वाजता व त्याचे पूर्नप्रसारण बुधवार 14 सप्टेंबर रोजी रात्री 8.15 वा. होणार आहे. याचा सर्व नागरिकांनी लाभ घ्यावा, असे आवाहन जिल्हा माहिती अधिकारी दिलीप गवळी व नांदेड आकाशवाणीचे केंद्र संचालक भिमराव शेळके यांनी केले आहे.

000000