राष्ट्रीय लोकन्यायालयाचे आयोजन

10 सप्टेंबर ऐवजी 8 ऑक्टोंबर रोजी

नांदेड, दि. 7 :- नांदेड जिल्हा न्यायालयात व सर्व तालुका न्यायालयात 10 सप्टेंबर रोजी राष्ट्रीय लोकन्यायालयाचे आयोजन करण्यात आले होते. राज्यात शनिवार 10 सप्टेंबर रोजी महालक्ष्मी सण येत असल्यामुळे  राष्ट्रीय लोकन्यायालय पुढे ढकलण्यात आले असून शनिवार 8 ऑक्टोंबर 2016 रोजी होणाऱ्या राष्ट्रीय लोकन्यायालयामध्ये समाविष्ट करण्यात आले आहे. विधीज्ञ, पक्षकारांनी याची नोंद घ्यावी, असे अवाहन जिल्हा विधी सेवा प्राधिकरणाच्या अध्यक्षा तथा प्रमुख जिल्हा न्यायाधीश सविता बारणे यांनी केले आहे.    

राष्ट्रीय लोकन्यायालयात पक्षकार, वकिलांनी आपली जास्तीतजास्त फौजदारी अदखलपात्र गुन्हयातील तडजोडयोग्य प्रकरणे तसेच वाहतुक, पेट्टी मॅटर व नगरपालीका, महानगरपालिका यांची प्रकरणे सांमजस्याने मिटविण्यासाठी ठेवून आपसात निकाली काढावीत. शनिवार  10 सप्टेंबर ऐवजी 8 ऑक्टोबर रोजी पक्षकारांनी आपली प्रकरणे निकाली काढण्यासाठी संबंधित न्यायालयास, जवळच्या विधी सेवा समिती  किंवा जिल्हा विधी सेवा प्राधिकरण नांदेड यांच्याशी संपर्क साधावा, असेही आवाहन जिल्हा विधी सेवा प्राधिकरणाचे सचिव न्या. ए. आर. कुरेशी यांनी केले आहे.

000000

सार्वजनिक उत्सव मंडळांनी

प्रसाद वाटपात आवश्यक खबरदारी घ्यावी 

अन्न व औषध प्रशासन विभागाचे आवाहन 

नांदेड, दि. 7- सार्वजनिक धार्मिक उत्सव मंडळे, त्यांचे पदाधिकारी आणि प्रसाद उत्पादन वितरण करणारे सर्व अन्न व्यवसायिकांनी प्रसाद वाटपात आवश्यक खबरदारी घ्यावी.  अन्न, प्रसाद याबाबत काही संशय असल्यास आपले क्षेत्राच्या अन्न सुरक्षा अधिकारी अथवा सहायक आयुक्त (अन्न) तथा पदनिर्देशित अधिकारी यांचेशी प्रत्यक्ष संपर्क साधावा. नागरिकांनी यासंदर्भात माहिती, तक्रार, सूचना असल्यास एफडीए हेल्पलाईन क्र. 1800222365 वर कळवावे, असे आवाहन अन्न व औषध प्रशासनाचे सहायक आयुक्त पी. डी. गळाकाटू यांनी केले आहे.

सार्वजनिक उत्सव मंडळे, पदाधिकारी आणि प्रसाद उत्पादन वितरण करणारे अन्न व्यवसायिक यांनी अन्न सुरक्षा व मानके अधिनियम 2006 व त्या अंतर्गत नियम व नियमन 2011 मधील तरतूदीचे पालन करणे बंधनकारक आहे. प्रसाद करताना (उत्पादनाची) जागा स्वच्छ व आरोग्यदायी असावी. प्रसादासाठी लागणारा कच्चा माल हा अन्न पदार्थ परवानाधारक अथवा नोंदणीकृत अन्न व्यवसायिकांकडूनच खरेदी करावा. तसेच प्रसाद बनविण्याऱ्या केटरर्सची माहिती अद्यावत करुन ठेवावी. प्रसादासाठी लागणारी भांडी स्वच्छ, आरोग्यदायी व झाकण असलेली असावी. फळांचा प्रसाद म्हणून वापर करताना फळांची खरेदी क्षेत्रातील ओळखीच्या, परवाना/नोंदणी धारकाकडूनच करावी. कच्चे / सडलेले किंवा खराब फळांचा वापर करु नये. प्रसादाचे उत्पादन करताना मानवी सेवनास सुरक्षित राहील याची खात्री करावी. आवश्यक तेवढयाच प्रसादाची निर्मिती करावी. प्रसाद बनविण्यासाठी लागणारे पाणी पिण्यास योग्य असावे. प्रसाद उत्पादन करणाऱ्या स्वयंसेवकास ग्लोव्हज, टोपी (हेड गिअर) इत्यादी देण्यात यावे व प्रत्येकवेळी स्वयंसेवकाने हात स्वच्छ ठेवावेत. प्रसाद उत्पादन व वितरण करणारा स्वयंसेवक हा कुठल्याही संसर्गजन्य रोगापासून मुक्त असल्याची खात्री करुन घ्यावी. दुध अथवा दुग्धजन्य पदार्थ थंड राहतील असे कमी तापमानावरच साठवणुकीस ठेवावेत. खवा / माव्याची वाहतूक व साठवणूक थंड / रेफ्रीजरेटेड वाहनातूनच करावी व प्रसादामध्ये याचा वापर होत असल्यास दक्षता घेण्यात यावी. जुना, शिळा अनेक दिवस कोल्ड स्टोरेजमध्ये साठविलेला खवा / मावा प्रसादासाठी वापरु नये. अन्न सुरक्षा अधिकारी आल्यास एक जबाबदार व्यक्ती नेमून त्यास संपूर्ण सहकार्य करावे व त्याने दिलेल्या सूचनांचे पालन करणे अनिवार्य राहिल. नागरिकांच्या आरोग्याच्या दृष्टीने वरील मार्गदर्शक सुचनांचे पालन करुन सहकार्य करावे, असेही आवाहन सहायक आयुक्त (अन्न)  श्री. गळाकाटू यांनी केले आहे.

000000

जिल्हा परिषदेची शुक्रवारी सर्वसाधारण सभा

नांदेड दि. 7 :- जिल्हा परिषदेची सर्वसाधारण सभा शुक्रवार 9 सप्टेंबर 2016 रोजी सकाळी 11 वा. कै. यशवंतराव चव्हाण सभागृह जिल्हा परिषद नांदेड येथे आयोजित केली आहे, असे जिल्हा परिषदेचे उपमुख्य कार्यकारी अधिकारी (सा. प्र.) यांनी कळविले आहे.

0000000

चर्मकार विकास महामंडळ प्रशिक्षण कार्यक्रमासाठी

प्रशिक्षण संस्थांना अर्ज करण्याचे आवाहन 

नांदेड दि. 7 :- संत रोहिदास चर्मोद्योग व चर्मकार विकास महामंडळाकडून चर्मकार समाजातील कुटुंबामधील पात्र मुला-मुलींसाठी प्रशिक्षण योजना ही त्यांचे व्यवसायिक कौशल्य वाढविण्याच्या उद्देशाने राबविण्यात येत आहे. पात्र प्रशिक्षण संस्थांनी प्रस्ताव मंगळवार 13 सप्टेंबर 2016 पर्यंत महामंडळाच्या जिल्हा कार्यालयात सादर करावे, असे आवाहन जिल्‍हा व्‍यवस्‍थापक संत रोहिदास चर्मकार विकास महामंडळ मर्या. नांदेड यांनी केले आहे.  

प्रशिक्षण योजनेसाठी पुढील अटी पूर्ण करीत असलेल्या संस्थांकडून प्रस्ताव मागविण्यात येत आहेत. संस्था ही व्यवसाय शिक्षण व प्रशिक्षण संचालनालय तंत्र शिक्षण मंडळ, व्यवसाय शिक्षण प्रमाणपत्र परीक्षा मंडळ यांची मान्यता अथवा इतर तत्सम संस्थांशी संलग्नता असावी. संस्था सलग 5 वर्षापासून कार्यरत असावी. संस्थेचे मागील तीन वर्षाचे ऑडिट पूर्ण झालेले असावे. संस्थेकडे ट्रेडनिहाय प्रशिक्षणासाठी प्रशस्त जागा, यंत्रसामुगी व प्रशिक्षित कर्मचारी वर्ग असावा. मागील तीन वर्षात ट्रेडनिहाय किती प्रशिक्षणार्थींना वर्षनिहाय प्रशिक्षण दिले आहे याचा तपशील देण्यात यावा. संस्थेमार्फत तीन वर्षात प्रशिक्षण पूर्ण केल्यानंतर प्रशिक्षणार्थींनी स्वत:चा व्यवसाय सुरु केला आहे किंवा नोकरी मिळाली आहे त्याचा तपशील दयावा. तीस टक्के महिला प्रशिक्षणार्थी असणे आवश्यक आहे. शासनमान्यतेप्रमाणे एका वर्षात ट्रेडनिहाय किती विद्यार्थ्यांची प्रशिक्षणासाठी मान्यता आहे, याबाबत तपशील देण्यात यावा. प्रशिक्षण पूर्ण केल्यानंतर ट्रेडची परीक्षा कोणामार्फत घेतली जाईल याचा तपशील देण्यात यावा. प्रशिक्षण पूर्ण केल्यानंतर जॉब प्लेसमेंटकरीता काय कार्यवाही करण्यात येते व स्वयंरोजगार थाटण्यासाठी कोणती मदत प्रशिक्षणार्थीस करण्यात येते. याकरीता आपणाकडे कोणती यंत्रणा कार्यरत आहे याचा तपशील देण्यात यावा. बाहेरगावच्या प्रक्षिणार्थीसाठी राहण्याची व भोजनाची व्यवस्था होऊ शकेल काय याबाबत तपशील दयावा.  प्राप्त संस्थेच्या प्रस्तावाची स्थळ पाहणी ही गुरुवार 15 सप्टेंबर 2016 पर्यंत जिल्हा व्यवस्थापक करतील व त्याचा अहवाल प्रधान कार्यालय मुंबई येथे सादर करतील असेही प्रसिद्धीपत्रकात म्हणटले आहे.

000000

सावित्रीबाई फुले शिष्यवृत्ती योजना  

जि. प. समाज कल्याण कार्यालयाकडे हस्तांतरीत   

नांदेड दि. 7 :-  सावित्रीबाई फुले शिष्यवृत्ती योजना सन 2016-17 पासून जिल्हा समाज कल्याण अधिकारी जिल्हा परिषद यांच्याकडे शासनाने हस्तांतरीत केली आहे. सावित्रीबाई फुले शिष्यवृत्ती योजनेचा लाभ घेण्यासाठी संबंधीत शाळेचे मुख्याध्यापक, विद्यार्थ्यांनी जिल्हा परिषदेच्या समाज कल्याण कार्यालयाशी  संपर्क साधावा  असे आवाहन सहाय्यक आयुक्त समाज कल्याण नांदेड यांनी केले आहे.

सावित्रीबाई फुले शिष्यवृत्ती योजनेअंतर्गत मुलींचे शिक्षणातील गळतीचे प्रमाण कमी होण्यासाठी विजाभज व विमाप्र प्रवर्गातील इयत्ता 8 वी ते 10 वी पर्यंतच्या विद्यार्थ्यांना सामाजिक न्याय व विशेष सहाय्य विभागाकडून लाभ देण्यात येतो.  

000000

लोकशाही दिनातील अर्ज त्वरेने निकाली काढावेत

-       जिल्हाधिकारी काकाणी यांचे निर्देश 

नांदेड, दि. 6 :- लोकशाही दिनात दाखल झालेल्या अर्जांवर संबंधित विभागाने कार्यवाही करुन त्वरेने अर्ज निकाली काढावेत, असे निर्देश जिल्हाधिकारी सुरेश काकाणी यांनी आज येथे दिले.  

नांदेड जिल्हाधिकारी कार्यालय येथे आयोजित जिल्हास्तरीय लोकशाही दिनामध्ये आज नव्याने 40 अर्ज दाखल झाले. जिल्हाधिकारी कार्यालय आवारातील बचत भवन येथे जिल्हाधिकारी सुरेश काकाणी यांच्या अध्यक्षतेखाली लोकशाही दिन संपन्न झाला.   

लोकशाही दिनास पोलीस अधीक्षक संजय ऐनपुरे, निवासी उपजिल्हाधिकारी जयराज कारभारी, जिल्हा परिषदेचे उपमुख्य कार्यकारी अधिकारी राहुल काळभोर, जिल्हा वनसंरक्षक सुजय डोडल, जिल्हा अधीक्षक कृषी अधिकारी डॅा. तुकाराम मोटे, पशूसंवर्धन उपायुक्त पी. पी. घुले, उपजिल्हाधिकारी (भूसंपादन) श्री. कोकणे , जिल्हा अग्रणी बँक व्यवस्थापक बी. यु. वाघमारे, कार्यकारी अभियंता व्ही. पी. शाहू आदी विविध विभागांचे अधिकारी उपस्थित होते.

लोकशाही दिनात आज दाखल झालेल्या अर्जाची संख्या विभागनिहाय पुढील प्रमाणे आहे. महसूल- 12, जिल्हा अग्रणी बँक-13, जिल्हा परिषद-10, पोलीस अधीक्षक, नांदेड महानगरपालिका, भुमिअभिलेख, सार्वजनिक बांधकाम,  महावितरण, नांदेड पाटबंधारे प्रत्येकी एक याप्रमाणे आहेत.

लोकशाही दिनातील अर्जाच्या आढाव्यानंतर जिल्हाधिकारी श्री. काकाणी यांनी लोकशाही दिनात दाखल होणाऱ्या अर्जांबाबत वेळेत कार्यवाही झाली पाहिजे. दिर्घकाळ प्रलंबीत असणारे अर्जही संबंधित अधिकाऱ्यांनी त्वरेने निकाली काढली पाहिजेत, असेही निर्देश त्यांनी दिले.

0000000

मराठवाडा मुक्ती संग्राम दिन वर्धापन दिनाच्या

समारंभ पूर्वतयारीची आढावा बैठक संपन्न

नांदेड, दि. 6 :- मराठवाडा मुक्ती संग्राम दिनाचा 68 वा वर्धापन दिन समारंभ शनिवार 17 सप्टेंबर 2016 रोजी आयोजित करण्यात येणार आहे. हुतात्मा स्मृती स्तंभास मानवंदना व पुष्पचक्र अर्पण करण्याचा कार्यक्रम आणि मुख्य शासकीय ध्वजवंदन माता गुजरीजी विसावा उद्यानात होणार आहे. या समारंभासाठीची पूर्व तयारी आढावा बैठक जिल्हाधिकारी सुरेश काकाणी यांच्या अध्यक्षतेखाली आज संपन्न झाली.

जिल्हाधिकारी कार्यालय आवारातील बचत भवन येथे झालेल्या या बैठकीस पोलीस अधीक्षक संजय ऐनपुरे, अप्पर जिल्हाधिकारी  संतोष पाटील, निवासी उपजिल्हाधिकारी जयराज कारभारी, जिल्हा परिषदेचे उपमुख्य कार्यकारी अधिकारी राहुल काळभोर, जिल्हा वनसंरक्षक सुजय डोडल, जिल्हा अधीक्षक कृषी अधिकारी डॅा. तुकाराम मोटे, जिल्हा सहकार उपनिबंधक वसंत निकम, पशूसंवर्धन उपायुक्त पी. पी. घुले, उपजिल्हाधिकारी (भूसंपादन) श्री. कोकणे , जिल्हा अग्रणी बँक व्यवस्थापक बी. यु. वाघमारे, कार्यकारी अभियंता व्ही. पी. शाहू यांच्यासह विविध विभागांचे अधिकारी यांची उपस्थिती होती.

मुक्ती संग्राम दिनाचा हा वर्धापन दिन उत्साहात साजरा व्हावा यासाठी काटेकोर नियोजन करण्याचे निर्देश जिल्हाधिकारी श्री. काकाणी यांनी दिले. शनिवार 17 सप्टेंबर रोजी 8.30 वा. हुतात्मा स्मृती स्तंभास पुष्पचक्र अर्पण करुन मानवंदना देण्यात येईल. त्यानंतर  सकाळी 9 वा. ध्वजवंदन होणार आहे. या मुख्‍य शासकीय ध्वजवंदन कार्यक्रमास जास्तीतजास्त नागरिकांना उपस्थित राहता यावे यासाठी इतर सर्व कार्यालय आणि संस्था यांनी त्यांचे ध्वजवंदनाचे कार्यक्रम सकाळी 8.15 पूर्वी किंवा सकाळी 9.30 नंतर आयोजित करावेत. भारतीय राष्ट्रध्वज संहितेनुसार ध्वजवंदन करण्यात यावे. तसेच राष्ट्रध्वजाच्या उचीत सन्मानाबाबतचे गृह विभागाच्या परिपत्रकानुसार प्लॉस्टिकचे ध्वज वापरले जाऊ नयेत. यासाठी सर्वच यंत्रणांनी दक्ष रहावे, अशाही सूचना बैठकीत देण्यात आल्या. मुक्ती संग्राम दिनाच्या माता गुजरीजी विसावा उद्यानातील विविध व्यवस्थांबाबत संबंधीत यंत्रणांना वेळेत कार्यवाहीचे निर्देशही या बैठकीत देण्यात आले.

मुक्ती संग्राम दिन उत्साहात साजरा करण्यात यावा. या कार्यक्रमानंतर शासनाच्या चारा टंचाई, पाणी टंचाई, रोजगार हमी योजना, जलयुक्त शिवार सारख्या विविध योजनांची उत्कृष्टरित्या अंमलबजावणी  करणाऱ्या अधिकारी, कर्मचाऱ्यांचा गौरवही करण्याचा विचार असल्याचे सांगून जिल्हाधिकारी श्री. काकाणी यांनी  शासनाच्या विविध विभागाने उत्कृष्ट काम केलेल्या अधिकारी व कर्मचाऱ्यांची निवड करुन ठेवावी, असे सांगितले.

00000000