महत्वाचे वृत्त क्र.  674

 

मतदारांनो ! विधानसभा मतदार यादीतील नावांची खातरजमा करा

 

प्रारूप मतदार यादी प्रसिद्ध ;10 व 11 तसेच 17 व 18 ऑगस्टला नोंदणीची अखेरची संधी

 

३० ऑगस्टला विधानसभेच्या मतदारांची अंतिम यादी जाहीर होणार

 

नांदेड, दि. 6 ऑगस्ट : नांदेड जिल्ह्यातील किनवट, हदगाव, भोकर, नांदेड उत्तर, नांदेड दक्षिण, लोहा, नायगाव, देगलूर व मुखेड विधानसभा मतदारसंघाच्या प्रारूप मतदार यादी तयार झाली आहे. राजकीय पक्षापासून सामान्य नागरिकांपर्यंत प्रारूप यादी सर्वांसाठी खुल्या असून नागरिकांनी आपआपल्या नावाची तपासणी करून घ्यावी, असे आवाहन जिल्हाधिकारी अभिजीत राऊत यांनी केले आहे.

 

मतदानाच्या दिवशी आपले नाव मतदान यादीमध्ये नाही, मयत, मृतकांची नावे आहेत, अशा तक्रारी वारंवार करण्यात येतात.मात्र मतदानाच्या पूर्वी निवडणूक विभागामार्फत ज्या मतदान याद्या तयार होतात, त्याबाबत सामान्य नागरिकांनी राजकीय पक्षांनी जागरूकपणे लक्ष वेधणे आवश्यक आहे,अशी सूचना प्रशासनाने केली आहे. याबाबत दावे व हरकती स्वीकारण्याचा कालावधी 6 ऑगस्ट 2024 मंगळवार ते 20 ऑगस्ट 2024 मंगळवारच्या दरम्यान असणार आहे, याचा सर्वांनी लाभ घ्यावा असेही स्पष्ट करण्यात आले आहे.

 

मतदार नोंदणी संदर्भातील प्रारूप याद्यांची माहिती आज प्रकाशित आली आहे. राजकीय पक्षाच्याही बैठकही वेळोवेळी घेण्यात आल्या आहेत. त्यामुळे प्रारूप तपासून यामधील नावे वगळणे , नव्याने समाविष्ट करणे, मतदान केंद्र व त्याची माहिती करून घेणे सर्व शक्य आहे. यासाठी मतदार व राजकीय पक्षांनी लक्ष वेधणे आवश्यक आहे.

 

 या ठिकाणी बघा प्रारूप याद्या 

 नांदेड जिल्ह्यातील 83 -किनवट, 84- हदगाव, ८५ -भोकर, ८६ -नांदेड उत्तर ,87- नांदेड दक्षिण, 88-लोहा, 89 -नायगाव, 90- देगलूर व 91-मुखेड या मतदारसंघातील प्रारूप मतदार यादी मतदान नोंदणी अधिकारी तथा उपविभागीय अधिकारी यांचे कार्यालय, तसेच सहाय्यक नोंदणी अधिकारी तहसीलदार यांचे कार्यालय व सर्व पदनिर्देशित ठिकाणी तसेच जिल्हाधिकारी कार्यालय नांदेड येथे सहा ऑगस्ट रोजी प्रसिद्ध भारत निवडणूक आयोगाच्या निर्धारित कार्यक्रमानुसार प्रसिद्ध करण्यात आली आहे.

 

२० ऑगस्टपूर्वी आक्षेप नोंदवा

निवडणूक आयोगाच्या निर्देशानुसार एक जुलै 2024 या अहर्ता दिनांकावर आधारित मतदार याद्यांचा दुसरा विशेष संक्षिप्त पुनरिक्षण कार्यक्रम आगामी विधानसभा निवडणूक डोळ्यापुढे ठेवून सुरू झाला असून त्या अंतर्गत ही दुसरी प्रारूप मतदार यादी प्रसिद्ध झाली आहे. यासंदर्भात कोणाला आक्षेप असल्यास 20 ऑगस्ट पूर्वी राजकीय पक्ष किंवा सामान्य नागरिक आपला अर्ज दाखल करू शकतात.

 

 शनिवार, रविवारी मतदान केंद्रावर अर्ज करा

ज्यांची नावे मतदान यादीमध्ये नाही त्यांनी दिनांक 10 व 11 ऑगस्ट तसेच 17 व 18 ऑगस्ट या शनिवार रविवारी येणाऱ्या दिवसाला आपले अर्ज भरून द्यावेत. प्रत्येक विधानसभा मतदार संघात नियमित जे मतदान केंद्र आहेत त्या ठिकाणी मतदान केंद्रस्तरीय अधिकारी उपस्थित राहणार असून नागरिक या ठिकाणी यादीमध्ये आपली नावे समाविष्ट करू शकतात. जिल्ह्यातील नऊ विधानसभा क्षेत्रामध्ये या ठिकाणी मतदार अर्ज स्वीकारले जाणार आहे.

 

फॉर्म ६, ७, ८ भरण्याची सुविधा

फॉर्म ६ भरून नव्याने मतदार यादी मध्ये नाव समाविष्ट करता येते. फॉर्म ७ भरून यादीतून नाव वगळता येते. फॉर्म क्रमांक८ भरून मतदार यादीतील नावाची दुरुस्ती व अन्य बाबी करता येतात. २० ऑगस्ट रोजी अर्ज स्वीकारण्याची मुदत संपणार आहे. त्यानंतर सर्व अर्जाची तपासणी होऊन पुन्हा ३० ऑगस्ट रोजी अंतिम मतदार यादी प्रकाशित केली जाणार आहे. या मतदार यादीच्या आधारेच आगामी विधानसभा निवडणुकीचे मतदान घेण्यात येणार आहे.

 

केंद्रस्तरीय अधिकाऱ्याला सहकार्य करा 

मृत (मयत ) मतदारांची नावे वगळण्यासाठी मयताच्या कुटुंबातील सदस्यांनी फॉर्म नंबर सात भरून देणे आवश्यक आहे. त्याचप्रमाणे गावातील ग्रामसेवक यांनी जन्म मृत्यू नोंदवही प्रमाणे मयत मतदारांची नावे वगळण्यासाठी मतदान केंद्रस्तरीय अधिकारी यांना जन्म मृत्यू नोंदवहीची प्रमाणित प्रत उपलब्ध करून दयावी.जन्म मृत्यू नोंदवहीमध्ये एखाद्या मयत मतदाराची नोंद नसल्यास मतदान केंद्रस्तरीय अधिकारी यांनी स्थानिक चौकशी व पंचनामा करून मयत मतदारांची नावे वगळण्याची कार्यवाही या विशेष मोहिमे दरम्यान करावयाची आहे. त्यासाठी संबंधित गावातील सर्व नागरिक, राजकीय पक्षांचे प्रतिनिधी, राजकीय पक्षांनी नियुक्त केलेले मतदान केंद्रस्तरीय प्रतिनिधी यांनी मतदान केंद्रस्तरीय अधिकारी यांना आवश्यक ते सहकार्य करावयाचे आहे. या संदर्भात कोणीही हयगय करू नये, केंद्रस्तरीय अधिकारी, ग्रामसेवक यांनी यातील आपली जबाबदारी ओळखावी असेही जिल्हाधिकाऱ्यांनी स्पष्ट केले आहे.

00000

 वृत्त क्र  673

राष्ट्रीय बाल स्वास्थ कार्यक्रमांतर्गत 

जन्मजात बहिरेपणा असलेल्या 70 बालकांना श्रवणयंत्र वाटप 

नांदेड दि. 6 ऑगस्ट :  जन्मजात बहिरेपणाचा आजार असलेल्या व श्रवण शक्ती कमी असलेल्या 116 बालकांची तपासणी जिल्हा रुग्णालय नांदेड येथे यशश्री कान नाक घसा हॉस्पिटल मिरज सांगली येथील डॉ. गीता कदम व  त्यांचे सहकारी  यांच्यामार्फत सोमवार 5 ऑगस्ट रोजी करण्यात आले. यापैकी 6 बालकांना  कॉक्लियर इम्प्लांट शस्त्रक्रिया आवश्यक असल्याचे निष्पन्न झाले असून त्याची  शस्त्रक्रिया करण्यात येणार आहे. उर्वरित कमी प्रमाणात ऐकू येणाऱ्या  70 बालकांना जिल्हा शल्यचिकित्सक डॉ. निळकंठ भोसीकर यांच्या हस्ते श्रवणयंत्र वाटप करण्यात आले आहे.

त्यामुळे बालकांची श्रवण शक्ती वृद्धिंगत होण्यास मदत होणार असल्याने पालकांमधून समाधान व्यक्त केल्या जात आहे.    

या शिबिरासाठी जिल्हाधिकारी अभिजित राऊत आणि जि.प.मुख्य कार्यकारी अधिकारी मिनल करनवाल यांच्या मार्गदर्शनाखाली आणि जिल्हा शल्यचिकित्सक डॉ. निळकंठ भोसीकर, जिल्हा आरोग्य अधिकारी डॉ. संगीता देशमुख, अतिरिक्त जिल्हा शल्य चिकित्सक डॉ. संजय पेरके, निवासी वैद्यकीय अधिकारी डॉ. राजाभाऊ बुट्टे, डॉ. विद्या झिने, डॉ.हनुमंत जाधव, डॉ.विजय पवार यांच्या नेतृत्त्वाखाली RBSK जिल्हा समन्वयक अनिल कांबळे, DEIC व्यवस्थापक विठ्ठल तावडे, ऑडिओलॉजिस्ट श्रीमती श्वेता शिंदे तसेच राष्ट्रीय बाल स्वास्थ कार्यक्रमांतर्गत असलेले वैद्यकीय अधिकारी आणि कर्मचारी परिश्रम घेतले. 

राज्यात शालेय आरोग्य तपासणी हा कार्यक्रम यशस्वी ठरल्यामुळे व कुपोषणाचा प्रश्न गंभीर असल्यामुळे बाल मृत्यूचे प्रमाण कमी करण्यासाठी राष्ट्रीय बाल स्वास्थ कार्यक्रम राबविण्यात येत आहे. नांदेड जिल्ह्यातील 45 आरोग्य पथकांद्वारे वर्षातून 2 वेळा अंगणवाडीतील व 1 वेळा शाळेतील बालकांची नियमित आरोग्य तपासणी करण्यात येत आहे. शुन्य ते 18 या वयोगटातील बालाकंची 4D म्हणजे जन्मतः व्यंग, पोषणमुल्यांची कमतरता, शाररीक व मानसिक विकासात्मक विलंब, आजाराचे निदान व उपचार करण्यात येतात. जन्मजात बहिरेपण तपासणी, हृदयरोग तपासणी (2D ECHO), नेत्ररोग, आकडी/फेफरे यांची मोठ्या प्रमाणावर शिबिर आयोजीत करून निदान  आवश्यकतेनुसार शस्त्रक्रिया व औषधोपचार करण्यात येते.  

जिल्ह्यातील अनेक मुला-मुलींना या कार्यक्रमाचा मोफत लाभ झालेला असून त्यात अनेक जणांवर  कानाच्या शस्त्रक्रिया व इतर शस्त्रक्रिया करण्यात आलेल्या आहेत. जिल्ह्यातील अंगणवाडी तपासणी दरम्यान कुपोषित बालकांना निदान व औषधोपचार करून श्रेणीवर्धन करण्यासाठी पोषण पुनर्वसन केंद्र स्त्री रुग्णालय श्यामनगर नांदेड संदर्भित करण्यात येऊन त्यांच्या पालकास बुडीत मजुरीचा लाभ देण्यात येतो.  तसेच जिल्हा शीघ्र हस्तक्षेप केंद्र अंतर्गत शुन्य ते 6 वर्ष वयोगटातील ज्या बालकांना जन्म जात आजार, अवयवांच्या उणीवा आणि विकास/वाढीचा अभाव आढळलयास त्यांच्यावर वेळीच शस्त्रक्रिया/औषधोपचार करून भविष्यात त्यांना शरीराच्या गुंतागुंतीच्या आजार किंवा उणीवापासून दूर ठेवणे शक्य होत आहे.

0000

 वृत्त क्र  672 

महसूल पंधरवाडा अंतर्गत दहा ऑगस्टला 'सैनिक हो तुमच्यासाठी' विशेष उपक्रम

 

नांदेड दि. 6 ऑगस्ट : 10 ऑगस्टला जिल्ह्यात महसूल विभाग सैनिकोहो तुमच्यासाठी विशेष उपक्रम राबविणार आहे. राज्य शासनाने एक ते 15 ऑगस्ट हा महसूल पंधरवाडा महसूल व सामान्य जनता यांच्या मधला संपर्क वाढविण्यासाठी जनसंपर्क अभियानाचा ठरवला असून विविध उपक्रम राबविण्यात येत आहे.

 

सैनिक व तुमच्यासाठी हा उपक्रम 10 ऑगस्ट रोजी राबविण्यात येणार आहे. जिल्हाधिकारी कार्यालयातील सर्व कार्यासन अधिकारी उपविभागीय अधिकारी तहसीलदार यांनी नांदेड जिल्ह्यातील राष्ट्रीय सुरक्षिततेच्या कामी सीमावर्ती भागामध्ये व सुरक्षिततेच्या दृष्टीने अन्य संवेदनशील भागांमध्ये तैनात असणारे सैनिक यांना व त्यांच्या कुटुंबियांना आवश्यक असणारे महसूल कार्यालयाकडून निर्गमित होणारे विविध दाखले प्रमाणपत्रे मिळण्याबाबतच्या अर्जावर तत्काळ कारवाई करून निकाली काढावे असे आवाहन जिल्ह्याचे निवासी उपजिल्हाधिकारी तथा जिल्हा सैनिक कल्याण अधिकारी महेश वडतकर यांनी केलेले आहे.

 

याशिवाय संरक्षण दलात कार्यरत असताना शहीद झालेल्या कर्मचाऱ्यांना जमीन वाटप करण्याबाबत प्रलंबित असलेल्या अर्जावर कार्यवाही करण्यात यावी, तसेच संरक्षण दलातून सेवानिवृत्त झालेल्या अधिकारी कर्मचारी यांना घरासाठी, शेतीसाठी जमीन वाटवाबाबत प्रलंबित असलेली प्रकरणे तात्काळ निकाली काढण्यात यावी, असे निर्देश दिले आहेत. यासंदर्भात कुठलीही अडचण असल्यास जिल्हा सैनिक कल्याण अधिकारी कार्यालयाशी समन्वय साधावा असे आवाहनही महेश वडदकर यांनी केले आहे.

0000

वृत्त क्र. 671

मुख्यमंत्री माझी लाडकी बहीण योजना ; पोर्टलवर 4.73 लक्ष नोंदी

नांदेड जिल्ह्यात 56% अर्जांची छाननी पूर्ण

नांदेड दि. ५ ऑगस्ट : मुख्यमंत्री माझी लाडकी बहीण योजनेला जिल्ह्याच्या ग्रामीण भागामध्ये उदंड प्रतिसाद मिळत आहे. संपूर्ण यंत्रणा सध्या अर्ज ऑनलाईन करणे व मंजुरी देणे या कामात व्यस्त असून जिल्ह्यातील आत्तापर्यंत दाखल 4 लाख 73 हजार 123 अर्जापैकी दोन लक्ष 68 हजार 955 अर्ज तालुका समितीने मंजूर करून जिल्हास्तरीय समितीकडे पाठविले आहे. थोडक्यात 56 टक्क्यांपर्यंत अर्जाना प्राथमिक मंजुरी मिळाली आहे.

   

 दरमहा, दीड हजार रुपये म्हणजेच वर्षाला 18 हजार रुपये महिला भगिनींना थेट बँक खात्यात देणाऱ्या मुख्यमंत्री माझी लाडकी बहीण योजनेसाठी एकीकडे अर्जदारांची लगबग सुरू असतानाच प्रशासन हे सर्व अर्ज नारी शक्ती दूत पोर्टलवर अपलोड करण्यामध्ये व परिपूर्ण प्रस्तावाना मंजुरी देण्यात व्यस्त झाले आहे.अर्ज अचूक अपलोड करण्यात यावे. याकडे लक्ष वेधण्याचे आवाहन जिल्हाधिकारी अभिजीत राऊत यांनी केले आहे.

नांदेड जिल्हयाची पुढे आलेली आकडेवारी बघता आतापर्यंत 56% अर्जांची पडताळणी करण्यात आली आहे. दाखल केलेल्या अर्जांपैकी 2 लक्ष 68 हजार 955 अर्जाना तालुकास्तरावरून मंजुरी देण्यात आली आहे. पोर्टलवर अपलोड करताना त्रुटी आल्यामुळे नामंजूर झालेल्या अर्जाची संख्या फक्त 371 आहे. आता या अर्जाना जिल्हास्तरीय समिती तपासणी नंतर मान्यता देणार आहे.

   

ऑनलाइन ऑफलाइन अर्ज गोळा करण्यामध्ये व पोर्टलवर भरण्यामध्ये सर्वात प्रभावीपणे मुखेड तालुक्याने काम केले आहे. या तालुक्यात ऑफलाइन व ऑनलाईन एकूण 34 हजार 544 अर्ज दाखल झाले. यापैकी 34 हजार 202 अर्ज अपलोड करून तालुका समितीने मान्य केले आहे. ही टक्केवारी 99% आहे. जिल्ह्याची सरासरी टक्केवारी 56 असताना मुखेड तालुक्याने अतिशय उत्कृष्टपणे काम केले असल्याने प्रशासनाने टिम मुखेडचे कौतुक केले आहे.

 सर्वाधिक अर्ज नांदेड तालुक्यामध्ये दाखल झाले आहेत. ही संख्या 77 हजारावर आहे. तर सर्वात कमी अर्ज धर्माबाद तालुक्यामध्ये आहे ही संख्या केवळ 12 हजार आहे.

 दरम्यान, पात्र ठरलेले 56% अर्ज प्राथमिक तपासणीनंतर तालुका स्तरीय समितीला योग्य वाटत असले तरी या संदर्भातील अंतीम  निर्णय जिल्हास्तरीय समिती घेणार आहे.

 जिल्ह्यातील ज्या पात्र महिला या योजनेसाठी लाभार्थी ठरू शकतात त्या सर्व महिलांनी अर्ज दाखल करावे. 31 ऑगस्ट पर्यंत अर्ज दाखल करण्याची अंतिम तारीख असली तरी ही प्रक्रिया निरंतर सुरू असेल. तथापि, 31 ऑगस्ट पर्यंत अर्ज दाखल करणाऱ्यांना जुलै व ऑगस्ट महिन्यांचे पैसे रक्षाबंधनला मिळणार आहेत. त्यामुळे प्रशासनाने अतिशय गतीने ऑनलाइन पद्धतीने अर्ज अपलोड करणे सुरू केले आहे.

00000

 

वृत्त क्र. 670

सार्वजनिक गणेशोत्सव मंडळांकरिता राज्य शासनातर्फे

राज्यस्तरीय स्पर्धेचे आयोजन ; 5 लाख रुपयांचे प्रथम पारितोषिक 

 

·   अर्ज सादर करण्याची अंतिम मुदत 31 ऑगस्ट 

 

नांदेड, दि. 5 ऑगस्ट : महाराष्ट्र शासनाच्या पु.ल. देशपांडे महाराष्ट्र कला अकादमी, सांस्कृतिक कार्य विभाग यांच्या वतीने 'महाराष्ट्र राज्य उत्कृष्ट सार्वजनिक गणेशोत्सव मंडळ स्पर्धा 2024' चे आयोजन करण्यात आले आहे. सदर स्पर्धेत नोंदणीकृत संस्था किंवा परवानाधारक सार्वजनिक गणेशोत्सव मंडळे सहभागी होऊ शकतात. सदर स्पर्धेचा अर्ज पु. ल. देशपांडे महाराष्ट्र कला अकादमी, मुंबईच्या संकेतस्थळावर उपलब्ध असून अर्ज सादर करण्याची अंतिम तारीख 31 ऑगस्ट 2024आहे. संपूर्ण भरलेला अर्ज mahotsav.plda@gmail.com या ई-मेल आय.डी.वर पाठवणे आवश्यक आहे. अपूर्ण अर्ज रद्द ठरविण्यात येईल. 

 

सदर स्पर्धा निःशुल्क असून सांस्कृतिक कार्यक्रम, सांस्कृतिक स्पर्धांचे आयोजन, संस्कृतीचे जतन व संवर्धन याकरिता राबविण्यात आलेले उपक्रम, गडकिल्ले यांचे जतन व संवर्धन, राष्ट्रीय व राज्य स्मारके, धार्मिक स्थळे याविषयी जनजागृकता तसेच जतन व संवर्धन, विविध सामाजिक उपक्रम व कार्ये, पर्यावरणपूरक मूर्ती, पर्यावरणपूरक सजावट, ध्वनिप्रदूषण रहित वातावरण, गणेशभक्तासाठी केलेल्या सोयी सुविधा यांच्या आधारे केलेल्या कार्याचा गौरव व्हावा आणि असेच समाजाभिमुख उपक्रम अधिकाधिक घडावेत म्हणून प्रोत्साहनपर पुरस्कार देण्याचे शासनाचे उद्दिष्ट आहे. याच निकषांच्या आधारे स्पर्धेचे परीक्षण केले जाईल. 

 

7 सप्टेंबरपासून सुरू होणाऱ्या गणेशोत्सवात सर्व जिल्ह्यांच्या जिल्हाधिकारी कार्यालयांनी गठीत केलेली जिल्हास्तरीय समिती या स्पर्धेत सहभागी मंडळे किंवा संस्थांच्या उत्सवस्थळाला भेट देतील आणि जिल्हास्तरीय परीक्षण पूर्ण करतील. मुंबई, मुंबई उपनगर, ठाणे आणि पुणे हे 4 जिल्हे प्रत्येकी 3 आणि हे 4 जिल्हे वगळता अन्य 32 अशा प्रत्येक जिल्ह्यातून एक यानुसार एकूण 44 शिफारसी राज्यस्तरीय परीक्षणासाठी स्वीकारल्या जातील. 

 

राज्यस्तरीय परीक्षणात प्रथम तीन विजेत्यांना अनुक्रमे 5 लाख, 2.5 लाख आणि 1 लाख रुपयांचे पारितोषिक व प्रमाणपत्र देऊन गौरवण्यात येणार आहे. तसेच अन्य जिल्हास्तरीय प्रथम विजेत्यांना 25 हजार रुपयांचे पारितोषिक व प्रमाणपत्र देऊन गौरवण्यात येणार आहे. या स्पर्धेत अधिकाधिक संख्येने सहभाग नोंदवण्याचे आवाहन शासनातर्फे करण्यात आले आहे. स्पर्धेच्या अधिक माहितीसाठी सर्वांनी आपापल्या जिल्ह्याच्या जिल्हाधिकारी कार्यालयाशी संपर्क साधावा, असे आवाहन पु. ल. देशपांडे महाराष्ट्र कला अकादमी मुंबईचे संचालक मीनल जोगळेकर यांनी केले आहे.

00000

वृत्त क्र. 669 

महिला व बालविकास मंत्री आदिती तटकरे यांचा दौरा

नांदेड दि. 5 :- राज्याच्या महिला व बालविकास मंत्री आदिती वरदा सुनिल तटकरे या नांदेड जिल्हा दौऱ्यावर येत असून त्यांचा दौरा कार्यक्रम पुढील प्रमाणे राहिल.

मंगळवार 6 ऑगस्ट 2024 रोजी रात्री 2 वाजता हैद्राबाद येथून वाहनाने शासकीय विश्रामगृह, नांदेड येथे आगमन व राखीव. बुधवार 7 ऑगस्ट 2024 रोजी सकाळी 9.30 वा. शासकीय विश्रामगृह, नांदेड येथून  शासकीय वाहनाने हदगावकडे प्रयाण. सकाळी 10.30 वाजता हदगाव तालुक्यातील ग्रामपंचायत रुई येथे अंगणवाडी इमारतीचे उद्घाटन. सकाळी 11 ते 11.30 वाजेपर्यत हदगाव येथे महिला मेळावा कार्यक्रमास उपस्थिती. सकाळी 11.30 वाजता हदगाव येथून वाहनाने भोकर कडे प्रयाण. दुपारी 12 ते 12.30 वाजेपर्यत भोकर येथे युवक-युवती व महिला मेळावा कार्यक्रमास उपस्थिती. दुपारी 12.30 वाजता भोकर येथून वाहनाने नांदेड शहराकडे प्रयाण. दुपारी 1.30 ते 2 वाजेपर्यत नांदेड येथे शुक्ला कॉम्प्लेक्स, नवीन मोंढा नांदेड येथे आगमन व जनसंपर्क विभागीय कार्यालयाचे उद्घाटन समारंभास उपस्थिती. दुपारी 2 ते 2.30 पर्यत नांदेड शहरात राष्ट्रवादी काँग्रेस पक्ष युवक मेळाव्यास उपस्थिती. दुपारी 2.30 ते 3 वाजेपर्यत कार्यकर्त्यांच्या भेटीगाठीसाठी राखीव. स्थळ- शासकीय विश्रामगृह नांदेड . दुपारी 3 वाजता नांदेड येथून वाहनाने हैदराबाद कडे प्रयाण.

00000