वृत्त क्र. 559   

कोरोनातून 23 व्यक्ती बरे झाल्याने रुग्णालयातून सुट्टी

नवीन चार व्यक्तींचा अहवाल पॉझिटिव्ह  

नांदेड (जिमाका) दि. 20 :- डॉ. पंजाब भवन कोविड केअर सेंटर नांदेड येथील 15 तर मुखेड कोविड केअर सेंटर येथील 8 बाधित व्यक्ती बरे झाल्याने जिल्ह्यातील एकुण 23 बाधितांना आज रुग्णालयातून सुट्टी देण्यात आली आहे. आतापर्यंत एकूण 209  व्यक्तींना कोरोनातून बरे झाल्याने सुट्टी देण्यात आली आहे. आज सायं 5 वाजेपर्यंत नांदेड शहरातील राजनगर येथील 38 वर्षाचा एक पुरुष, रहेमतनगर येथील 48 वर्षाचा एक पुरुष आणि भगतसिंग रोड नांदेड येथील 55 वर्षाची एक महिला आहे. याचबरोबर 62 वर्षाचा पिरबुऱ्हानगर येथील एका पुरुष रुग्णाचा 19 जून रोजी मृत्यू झाला आहे. मृत्यूपश्चात सदर रुग्णाचा अहवाल प्राप्त झाला आहे.

जिल्ह्यात आज प्राप्त झालेल्या 77 अहवालापैकी 62 अहवाल निगेटिव्ह प्राप्त झाले.आजच्या 4 बाधित व्यक्तींमुळे जिल्ह्यातील एकुण बाधितांची संख्या 301 एवढी झाली आहे. पुणे येथून 2 कोरोना बाधित रुग्ण वय 12 व 16 वर्षे तसेच मंडई नांदेड येथील रहिवासी असलेली 45 वर्षाची माहिला हैद्राबाद येथून संदर्भीत करण्यात आली आहे. यामुळे नांदेड जिल्ह्याची एकुण कोरोना बाधित रुग्णांची संख्या 304 एवढी झाली आहे. आतापर्यंत 304 बाधितांपैकी 209 रुग्णांना रुग्णालयातून सुट्टी देण्यात आलेली आहे. उर्वरीत 81 रुग्णांवर औषधोपचार चालू आहेत. यातील चार बाधितांची प्रकृती गंभीर स्वरुपाची आहे. 50 व 52 वर्षाच्या दोन स्त्री रुग्ण व 52 व 54 वर्षाचे दोन पुरुष यांचा यात समावेश आहे.

 नांदेड जिल्ह्यात 81 बाधित व्यक्तींमध्ये डॉ. शंकरराव चव्हाण शासकीय वैद्यकीय महाविद्यालय विष्णुपुरी नांदेड येथे 18, पंजाब भवन कोविड केअर सेंटर येथे 52, मुखेड उपजिल्हा रुग्णालय येथे 5 बाधित व्यक्ती उपचारासाठी दाखल असून 6 बाधित व्यक्ती औरंगाबाद येथे संदर्भित झाले आहेत. शनिवार 20 जून रोजी 45 व्यक्तींचे स्वॅब तपासणीसाठी पाठविण्यात आले असून त्यांचा अहवाल उद्या सायंकाळी पर्यंत प्राप्त होईल.

जिल्ह्याची कोरोना विषयी संक्षीप्त माहिती पुढील प्रमाणे आहे.

सर्वेक्षण- 1 लाख 45 हजार 825,

घेतलेले स्वॅब- 5 हजार 639,

निगेटिव्ह स्वॅब- 4 हजार 950,

आज पॉझिटिव्ह स्वॅब संख्या- 04,

एकुण पॉझिटिव्ह बाधित व्यक्ती- 304,

स्वॅब तपासणी अनिर्णीत संख्या- 11,

स्वॅब नाकारण्यात आलेली संख्या- निरंक,

मृत्यू संख्या- 14,

रुग्णालयातून सुट्टी दिलेली संख्या- 209,

रुग्णालयात उपचार घेत असलेले बाधित व्यक्ती- 81,

स्वॅब तपासणी चालू व्यक्तींची 45 एवढी संख्या आहे.

कोरोना संदर्भात जनतेने अफवांवर विश्वास ठेवू नये तसेच मनात कुठल्याही प्रकारची भिती न बाळगता अत्यावश्यक कामाशिवाय घराबाहेर पडू नये असे आवाहन नांदेडचे जिल्हा शल्य चिकित्सक डॉ. निळकंठ भोसीकर यांनी केले आहे. तसेच सर्व जनतेने आपल्या मोबाईलवर “आरोग्य सेतू ॲप” डाऊनलोड करुन घ्यावे जेणे करुन आपल्या सभोवती कोरोना बाधित रुग्ण असल्यास आपणास हे ॲप सतर्क करेल असे डॉ. निळकंठ भोसीकर यांनी स्पष्ट करुन प्रशासनास जनतेने सहकार्य करण्याचे आवाहन केले आहे.

00000

वृत्त क्र. 558   

नांदेड जिल्हा प्रशासनाचा

अखिल भारतीय पातळीवरील पुरस्काराने गौरव

कर्करोग नियंत्रण जनजागृतीसाठी राबविली होती अभिनव मोहिम

नांदेड (जिमाका) दि. 20 :- नांदेड जिल्हा प्रशासनाच्यावतीने जिल्ह्यातील ग्रामीण भागात कर्करोगासंदर्भात जनजागृती निर्माण व्हावी यासंदर्भात राबविलेल्या मोहिमेला अखिल भारतीय पातळीवरील डिस्ट्रीक्ट गव्हर्नन्सचा स्कोच अर्वाड देवून गौरव केला आहे. या यशाबद्दल पालकमंत्री अशोक चव्हाण यांनी ही मोहिम यशस्वी करणाऱ्या जिल्हा प्रशासनातील अधिकारी व कर्मचाऱ्यांचे अभिनंदन केले आहे.

कर्करोग आजारासंदर्भात लोकांनी निसंकोचपणे आजाराची लक्षणे दिसताच तात्काळ तपासणी करुन घ्यावी यासाठी तत्कालीन जिल्हाधिकारी अरुण डोंगरे यांच्या मार्गदर्शनाखाली एक विशेष मोहिम हाती घेतली होती. या मोहिमेंतर्गत जिल्ह्यातील बाराशे खेड्यांमध्ये 1 हजार 500 आशा कार्यकर्ती यांना विशेष प्रशिक्षण दिले गेले. याचबरोबर रॅली व इतर उपक्रमांच्या माध्यमातून व्यापक प्रमाणात आरोग्य तपासणी शिबिरांचेही आयोजन करण्यात आले होते. यात जवळपास 25 लाख लोकांना स्क्रीनिंगच्या कार्यकक्षेत घेता आले. यात सुमारे 12 हजार लोकांमध्ये प्राथमिक लक्षणे दिसून आल्याने त्यांना वेळेवरच योग्य उपचारासाठी पाठविण्यात आले. वेळीच त्यांना उपचार मिळाल्याने पुढील संभाव्य आजाराच्या संकटापासून त्यांना वाचविता आले. संपूर्ण नांदेड जिल्ह्यात नांदेड जिल्हा नियोजन समितीच्या नाविन्यपूर्ण योजनेंतर्गत ही मोहिम राबविली गेली.

अत्यंत शिस्तबद्ध पद्धतीने संपूर्ण जिल्हाभर राबविल्या गेलेल्या या उपक्रमाला राष्ट्रीय पातळीवर गुड गव्हर्नन्ससाठी मान्यता प्राप्त असलेल्या स्कोच अर्वाडसाठी नामांकन दाखल केले होते. यानंतर सदर संस्थेने अखिल भारतीय पातळीवरील नवीन दिल्ली येथे या वर्षाच्या जानेवारी महिन्यात एक मोठी परिषद घेऊन प्रत्येक नामांकन सादर करणाऱ्या जिल्हा प्रमुखांना सादरीकरण करण्यास सांगितले होते.  यात नांदेड जिल्ह्याचे सादरीकरण निवासी उपजिल्हाधिकारी डॉ. सचिन खल्लाळ यांनी करुन संपूर्ण जिल्ह्याचा सप्रमाण आराखडा ठेवला होता. नांदेड जिल्ह्यात राबविण्यात आलेल्या या मोहिमेच्या माहितीने सारे सभागृह भारावून गेले होते. निवड समितीनेही याची चांगली दखल घेत नांदेड जिल्ह्याला अखिल भारतीय पातळीवरील हा डिस्ट्रीक्ट गव्हर्नन्सचा स्कोच अर्वाड देवून गौरव केला. जिल्हाधिकारी डॉ. विपीन इटनकर यांनी सर्वांचे अभिनंदन केले.

तत्कालीन जिल्हा परिषदेचे मुख्य कार्यकारी अधिकारी अशोक शिनगारे, अशोक काकडे, तत्कालीन जिल्हा शल्यचिकित्सक डॉ. बी. पी. कदम, तत्कालीन जिल्हा आरोग्य अधिकारी डॉ. व्ही. आर. मेकाने, जिल्हा शल्यचिकित्सक डॉ. निळकंठ भोसीकर, जिल्हा आरोग्य अधिकारी डॉ. बालाजी शिंदे, बार्षी येथील कर्करोग तज्ज्ञ डॉ. नंदकुमार पानसे, आशा सेविका, आरोग्य कर्मचारी व जिल्हा परिषदेतील संबंधीत यंत्रणेने यासाठी पुढाकार घेतला.

0000

वृत्त क्र. 557

21 जून आंतरराष्ट्रीय योगा दिवसानिमित्त

प्रत्येक घरात योगाचे महत्व रुजण्यासाठी विशेष कार्यक्रम   

नांदेड (जिमाका) दि. 20 :- कोविड 19 या संसर्गजन्य आजाराने घातलेले थैमान रोखण्यासाठी प्रत्येकाने व्यक्तीगत पातळीवरील अंतराचे भान ठेवत मास्कच्या वापरासह अधिकाधिक निरोगी शरीर ठेवण्याशिवाय पर्याय नाही. निरोगी आयुष्याचा मंत्र योगविद्याच्या माध्यमातून आपल्या संस्कृतीने अवघ्या जगाला दिला आहे. कोरोनासारख्या आजारावर मात करण्यासाठी कोणताही खर्च न लागणारा योगाचा हा उपाय प्रत्येक नागरिकात रुजावा यासाठी आयुष संचालनालयाने आवाहन केले आहे. योगाभ्यासाचे महत्व लक्षात घेता त्याच्या प्रसारासाठी 21 जून रोजी आंतरराष्ट्रीय योग दिन म्हणून पाळला जातो. जिल्ह्यात हा संदेश अधिक प्रभावीपणे घराघरात पोहोचावा यासाठी जिल्हा प्रशासनानेही पुढाकार घेतला असून उद्या रविवार 21 जून रोजी सकाळी 7 वा. जिल्हा माहिती कार्यालय नांदेडच्या https://www.facebook.com/dionanded/  या वेबपेजवरुन जिल्हाधिकारी डॉ. विपीन इटनकर, जिल्हा शल्यचिकित्सक डॉ. निळकंठ भोसीकर, शासकीय आयुर्वेदिक महाविद्यालयाचे अधिष्ठाता डॉ. यशवंत पाटील हे सुसंवाद साधतील.

00000

फेसबुक लाईव्ह
उद्या रविवार 21 जून सकाळी 7 वा.

विषय :-  

कोविड 19 च्या आव्हानात्मक काळात योगाभ्यासाचे महत्व.

प्रमुख उपस्थिती :-

जिल्हाधिकारी डॉ. विपीन इटनकर, जिल्हा शल्यचिकित्सक डॉ. निळकंठ भोसीकर, शासकीय आयुर्वेदिक महाविद्यालयाचे अधिष्ठाता डॉ. यशवंत पाटील.

फेसबुक लाईव्हवर सकाळी 7 वाजता क्लिक करा
https://www.facebook.com/dionanded/ या लिंकवर.

सहभागी व्हा कोरोना पासून सुरक्षिततेच्या या चळवळीत,

योगाभ्यासाचा मंत्र जपत.

वृत्त क्र. 556

21 जून आंतरराष्ट्रीय योग दिवस

साजरा करण्यासाठी सर्वांनी घ्यावा पुढाकार 

नांदेड (जिमाका) दि. 19 :- संयुक्त राष्ट्रसंघाने 21 जून हा दिवस आंतरराष्ट्रीय योग दिन म्हणून घोषित केला आहे. पाच हजार वर्षाहून अधिक परंपरा असणाऱ्या योग विद्येची भारताने संपूर्ण जगाला दिलेली अनमोल देणगी आहे. सदृढ आरोग्यासाठी सहज साधा व कोणताही खर्च न लागणारा योगा सारखा उपाय नाही. मानवाच्या शाररिक व आत्मिक विकासासाठी योग विद्या अत्यंत सहाय्यभूत असून याच्या प्रचार व प्रसारासाठी सर्व संस्थांनी पुढाकार घेऊन रविवार 21 जून रोजी सकाळी 7 ते 7.45 या कालावधीत योग दिवस साजरा करावा, असे आवाहन आयुष संचालनालय महाराष्ट्र शासनाच्यावतीने करण्यात आले आहे.   

योग दिवसानिमित्त कार्यक्रमाचे नियोजन करतांना कोरोना विषाणु संदर्भात शासनाने दिलेल्या सूचना व निर्देशाचे तंतोतंत पालन करावे, असेही स्पष्ट करण्यात आले आहे. यात खालील कार्यक्रमाचे नियोजन करता येईल.

योगा तज्ज्ञ / एनजीओ यांचे मार्गदर्शनाखाली ऑनलाईन योगा व्याख्यान कार्यशाळेचे आयोजन करावे. महाविद्यालयातील स्वस्थवृत्त विभागामार्फत, महाविद्यालय व रुग्णालयातील विद्यार्थी, अधिकारी, कर्मचाऱ्यांचे 15 दिवसांचे प्रति दिवशी 1 तास प्रशिक्षण कार्यक्रम आयोजित करण्यात यावा. योगा या विषयावर महाविद्यालय व रुग्णालयातील विद्यार्थी, अधिकारी, कर्मचाऱ्यांचा सहभाग नोंदवून प्रश्न मंजुषा, रांगोळी, चित्रकला, भित्तीपत्रके आदी स्पर्धेचे आयोजन करावे. आंतरराष्ट्रीय योग दिनाचे बॅनर महाविद्यालयाचे दर्शनी स्थळावर लावण्यात यावे.  

कोरोना विषाणुचा प्रादुर्भाव असल्याने शासनाने सामाजिक अंतर तसेच मास्क लावण्याच्या व आवश्यक काळजी घेण्याच्या सुचना दिल्या आहेत. याबाबत शासनाने दिलेले निर्देश, सुचनांचे पालन करुन आंतरराष्ट्रीय योग दिन साजरा करावयाचा आहे. यासाठी संस्था / सुचनांचे पालन करुन आंतराष्ट्रीय योग दिन साजरा करावयाचा आहे. याकरीता आपले संस्था, महाविद्यालयातील विद्यार्थी, कर्मचारी तसेच संस्थेचे आजूबाजूचे परिसरातील जनतेला व्हिडिओ कॉल, कॉन्फरन्स कॉल सारख्या मोबाईल, संगणकीय ॲप या सारख्या अन्य ऑनलाईन पद्धतीद्वारे संपर्क साधून 21 जून 2020 रोजी सकाळी 7 वा. कॉमन योगा प्रोटोकॉलचे मार्गदर्शक तत्वानुसार योगाचे ऑनलाईन प्रात्यक्षिक कार्यक्रमाचे आयोजन करण्यात यावे. जेणेकरुन सदर घरातून सुद्धा सहभागी होतील.

त्याचप्रमाणे केंद्र शासनाने आयुष मंत्रालयाने आंतरराष्ट्रीय योग दिनाचे निमित्ताने माय लाईफ, माय योगा या व्हिडिओ ब्लॉगिंग काँन्टॅस्टचे आयोजन केले आहे. त्यानुसार सदर ऑनलाईन स्पर्धेमध्ये सहभागी होण्याकरीता ऑनलाईन पद्धतीने संकेतस्थळावर नोंदणी करणे आवश्यक आहे. संस्था, महाविद्यालयातील विद्यार्थी, कर्मचारी तसेच संस्थेच्या आजूबाजूच्या परिसरातील जनतेला या ऑनलाईन स्पर्धेमध्ये सहभागी होण्याकरीता प्रोत्साहन देण्यात यावे. https://yoga.ayush.gov.in/yoga/idy-2020 व https://www.mylifemyyoga2020/home या संकेतस्थळावर नोंदणी व अधिक माहितीसाठी संपर्क साधावा. जेणेकरुन सर्व सहभागी घरुनच या कार्यक्रमामध्ये सहभागी होती. तसेच सदरहून कार्यक्रमाचे आयोजन करताना कोरोना या विषाणुचे प्रतिबंधानाकरिता शासनाने दिलेल्या सुचना / निर्देशांचे पालन करावे व त्याचे उल्लंघन होणार नाही याची दक्षता घ्यावी, असे मुंबई आयुष संचालनालयाचे संचालक वैद्य कुलदीप राज कोहली यांनी कळविले आहे.  

000000

माजी मुख्यमंत्री स्व. शंकरराव चव्हाण जलभूषण पुरस्काराचे 14 जुलै रोजी वितरण

 पुरस्कारार्थी निवडीसाठी राज्यस्तरीय समिती गठित

प्रथम विजेत्यास पाच लाख रूपये, प्रशस्तीपत्र व स्मृतीचिन्ह

मुंबई दि. 19-  भारताचे माजी गृहमंत्री तथा महाराष्ट्राचे माजी मुख्यमंत्री स्व. शंकरराव चव्हाण यांच्या स्मृतिप्रित्यर्थ येत्या 14 जुलै रोजी जलसंपदा, जलसंधारण व पाणी पुरवठा क्षेत्रात उत्कृष्ट काम करणाऱ्या व्यक्तींना जलभूषण पुरस्कार देण्यात येणार आहे. पुरस्कारार्थी निवडीसाठी राज्यस्तरीय समिती गठित करण्यात आली असून राज्यस्तरावर एकूण तीन पुरस्कार देण्यात येणार आहेत. प्रथम क्रमांकाच्या विजेत्यास पाच लाख रूपये, प्रशस्तीपत्र व स्मृतीचिन्ह दिले जाईल.

            'पाणी अडवा, पाणी जिरवा'ची संकल्पना अंमलात आणणारे तसेच जलसंस्कृतीचे जनक म्हणून गौरवपूर्ण उल्लेख करण्यात येणाऱ्या माजी मुख्यमंत्री स्व. शंकरराव चव्हाण यांचे यंदा जन्मशताब्दी वर्ष आहे. त्यानिमित्ताने जलसंधारण, जलसंपदा व पाणी पुरवठा क्षेत्रात उल्लेखनीय कार्य करणाऱ्या व्यक्तींना स्व. शंकरराव चव्हाण यांच्या नावाने जलभूषण पुरस्कार देण्याचा निर्णय राज्य शासनाने घेतला आहे. या पुरस्कारासाठी प्रथम क्रमांकाला 5 लाख रूपये व प्रशस्तीपत्र, स्मृतीचिन्ह, द्वितीय क्रमांकासाठी 3 लाख, प्रशस्तीपत्र व स्मृती चिन्ह तर तृतीय क्रमांकासाठी 2 लाख, प्रशस्तीपत्र, स्मृतीचिन्ह असे स्वरुप आहे.  या पुरस्काराचे वितरण माजी मुख्यमंत्री स्व. चव्हाण यांच्या जन्मदिनी येत्या 14 जुलै, 2020 रोजी करण्यात येणार आहे.

            या पुरस्काराच्या निवडीसाठी जलसंपदा विभागाच्या अपर मुख्य सचिव यांच्या अध्यक्षतेखाली राज्यस्तरीय समिती गठित करण्यात आली आहे. या समितीत मृद व जलसंधारण विभागाचे प्रधान सचिव, ग्रामविकास, पाणी पुरवठा व स्वच्छता विभागाचे प्रधान सचिव, कृषी विभागाचे प्रधान सचिव, लाभक्षेत्र विकासचे सचिव, यशदामधील जलसाक्षरता केंद्राचे संचालक, जलसंपदा विभागाचे मुख्य अभियंता (पा.), जलसाक्षरता केंद्राने निवडलेले दोन जलनायक यांचा समावेश असून जलसंपदा विभागाच्या लाभक्षेत्र विकासचे उपसचिव हे सदस्य सचिव म्हणून काम करणार आहेत.

            या पुरस्कार समारंभाचे आयोजन यशवंतराव चव्हाण विकास प्रशासन प्रबोधिनीतील जलसाक्षरता केंद्राच्या मार्फत होणार असून त्यांच्यामार्फत पुरस्काराची नामांकने मागविण्यात येणार आहेत. या संबंधीचा शासन निर्णय 12 जून रोजी काढण्यात आला आहे.

0000

वृत्त क्र. 555   

सहा महिन्यांच्या बालकासह 4 व्यक्ती 

कोरोनातून बरे झाल्याने त्यांना रुग्णालयातून सुट्टी

 नवीन एक पॉझिटिव्ह 

नांदेड (जिमाका) दि. 19 :- डॉ. शंकरराव चव्हाण शासकीय वैद्यकीय महाविद्यालय विष्णुपुरी येथील सहा महिन्याचा एक बालक बरा झाला असून डॉ. पंजाब भवन कोविड केअर सेंटर नांदेड येथील 4 बाधित रुग्ण बरे झाल्याने त्यांना रुग्णालयातून सुट्टी देण्यात आली आहे. आतापर्यंत एकूण 186  व्यक्तींना ते कोरोनातून बरे झाल्याने सुट्टी देण्यात आली आहे. नांदेड शहरातील सुंदरनगर येथील 23 वर्षाचा एक पुरुष पॉझिटिव्ह आढळल्याने जिल्ह्यातील एकुण बाधितांची संख्या 297 एवढी झाली आहे.  

जिल्ह्यात आज सायं. 5 वाजेपर्यंत प्राप्त झालेल्या 48 अहवालापैकी 47 अहवाल निगेटिव्ह प्राप्त झाले. जिल्ह्यात 98 बाधितांवर औषधोपचार चालू असून त्यातील त्यातील 3 बाधितांमध्ये 52 वर्षाची एक महिला आणि 52 व 54 वर्षांच्या दोन पुरुषांची प्रकृती गंभीर स्वरुपाची आहे. आतापर्यंत कोरोनामुळे मृत्यू पावलेल्या व्यक्तींची संख्या 13 झाली आहे.

नांदेड जिल्ह्यात 98 बाधित व्यक्तींमध्ये डॉ. शंकरराव चव्हाण शासकीय वैद्यकीय महाविद्यालय विष्णुपुरी नांदेड येथे 18, पंजाब भवन कोविड केअर सेंटर येथे 61, मुखेड उपजिल्हा रुग्णालय येथे 13 बाधित व्यक्ती उपचारासाठी दाखल असून 6 बाधित व्यक्ती औरंगाबाद येथे संदर्भित झाले आहेत. शुक्रवार 19 जून रोजी 87 व्यक्तींचे स्वॅब तपासणीसाठी पाठविण्यात आले असून त्यांचा अहवाल उद्या सायंकाळी पर्यंत प्राप्त होईल.

जिल्ह्याची कोरोना विषयी संक्षीप्त माहिती पुढील प्रमाणे आहे.

सर्वेक्षण- 1 लाख 45 हजार 751,

घेतलेले स्वॅब- 5 हजार 604,

निगेटिव्ह स्वॅब- 4 हजार 888,

आज पॉझिटिव्ह स्वॅब संख्या- 1,

एकुण पॉझिटिव्ह बाधित व्यक्ती- 297,

स्वॅब तपासणी अनिर्णीत संख्या- 232,

स्वॅब नाकारण्यात आलेली संख्या- 91,

मृत्यू संख्या- 13,

रुग्णालयातून सुट्टी दिलेली संख्या- 186,

रुग्णालयात उपचार घेत असलेले बाधित व्यक्ती- 98,

स्वॅब तपासणी चालू व्यक्तींची 87 एवढी संख्या आहे.

कोरोना संदर्भात जनतेने अफवांवर विश्वास ठेवू नये तसेच मनात कुठल्याही प्रकारची भिती न बाळगता अत्यावश्यक कामाशिवाय घराबाहेर पडू नये असे आवाहन नांदेडचे जिल्हा शल्य चिकित्सक डॉ. निळकंठ भोसीकर यांनी केले आहे. तसेच सर्व जनतेने आपल्या मोबाईलवर “आरोग्य सेतू ॲप” डाऊनलोड करुन घ्यावे जेणे करुन आपल्या सभोवती कोरोना बाधित रुग्ण असल्यास आपणास हे ॲप सतर्क करेल असे डॉ. निळकंठ भोसीकर यांनी स्पष्ट करुन प्रशासनास जनतेने सहकार्य करण्याचे आवाहन केले आहे.

00000