बालकामगार विरोधी दिनानिमित्त

कायेदविषयक शिबीर संपन्न

नांदेड, दि. 15  :-  हजरत फातेमा मुलींची माध्यमिक शाळा देगलूरनाका नांदेड येथे जागतिक बालकामगार विरोधी दिनानिमित्त कायदेविषयक शिबीराचे आज आयोजन करण्यात आले होते. जिल्हा विधी सेवा प्राधिकरणाचे सचिव न्या. डी. टी. वसावे हे अध्यक्षस्थानी होते. अॅड. प्रविण अयाचित, शाळेचे सचिव, अॅड. शेहजान सिद्दीकी, शाळेच्या मुख्याध्यापीका श्रीमती सय्यदा अंजुमआरा, अॅड. नयुम खान पठाण, अॅड. एम.एल.गायकवाड, अॅड. आर.जी.कानोटे, अॅड. तब्बसुम, अॅड. श्रीमती टी.एम.शेख, अॅड. गंगासागरे राणी यांची उपस्थिती होती.

            बालमजुरी कायदाची माहिती देताना न्या. वसावे म्हणाले की, बालमजुरी करणाऱ्या मुलांचा मानसिक व शारीरिक विकास होत नाही. मुलांनी काम करत असलेले काम कशा पध्दतीचे आहे हे कळण्यासाठी त्यांना शिक्षण महत्त्वाचे आहे. बालमजुरांना धोक्याच्या ठिकाणी काम करताना धोका होऊ शकतो याची जाणीव नसते, म्हणून त्यांनी शिक्षण शिकले पाहिजे त्यातून त्यांचा मानसिक व शारिरीक विकास होतो,  असे सांगीतले. असंघटित क्षेत्रात काम करणाऱ्या कामगारांसाठी कायदा तसेच गरिबी निर्मुलनासाठी प्रभावी अंमलबजावणी याबाबतही मार्गदर्शन केले.

प्रास्ताविकात अॅड. अयाचित यांनी शिक्षणाचा अधिकार याबाबत माहिती दिली. अॅड. शेहजान सिद्दीकी यांनी बालमजुरीचे दुष्परीनाम याबाबत माहिती दिली. शाळेच्या मुख्याध्यापिका श्रीमती सय्यदा अंजुमआरा यांनी बालमुजरी रोखण्यासाठी मार्गदर्शन केले. अॅड.  गायकवाड यांनी वयाच्या 14 वर्षापर्यंत बालमजुरी करणे हा कायदाने गुन्हा असल्याचे सांगून याबाबत शासनाने बालमजुरी प्रतिबंधात्मक कायदा तयार केला असल्याचे सांगीतले. अॅड. आर. जी. कानोटे यांनी बालमजुरीबाबत विद्यार्थ्यांना माहिती देताना शिक्षणास प्राधान्य देण्याचे सांगितले. अॅड. तब्बसुम, अॅड. श्रीमती टी.एम.शेख यांनी मार्गदर्शन केले.

तत्पुर्वी शिबीरास आलेल्या मान्यवरांचे व न्यायाधीशांचे स्वागत शाळेतील कर्मचारी, विद्यार्थीनी व शाळेचे सचिव अॅड. शेहजान सिद्दीकी यांनी केले. सुत्रसंचालन अॅड. नयुम खान पठाण यांनी केले तर कार्यक्रम यशस्वी झाल्याबद्दल सर्वांचे आभार शळेच्या उपमुख्याध्यापिका तसलीम फातेमा यांनी केले. या कार्यक्रमास हजरत फातेमा माध्यमिक शाळेतील तीनशे विद्यार्थीनी, आदी उपस्थित होते.

00000000

जप्त केलेल्या रेतीसाठ्याचा 

तहसिल कार्यालयात शनिवारी लिलाव

 नांदेड दि. 15 -  नांदेड तालुक्यात जप्त केलेल्या रेतीसाठ्याचा लिलाव उपविभागीय अधिकारी नांदेड यांच्या अधिपत्याखाली शनिवार 17 जून 2017 रोजी दुपारी 12 वा. तहसिल कार्यालय नांदेड येथे घेण्यात येणार आहे, असे  तहसिलदार नांदेड यांनी प्रसिद्धी पत्रकाद्वारे कळविले आहे.

00000

योग दिनानिमित्त विविध

कार्यक्रमाचे आयोजन करावे

 नांदेड दि. 15 - योगाचा प्रसार व प्रचार करण्यासाठी आंतराष्ट्रीय योगदिन दिनाचे औचित्य साधून बुधवार 21 जून 2017 रोजी विविध कार्यक्रमाचे आयोजन करण्यात यावे, असे जिल्हाधिकारी नांदेड यांनी कळविले आहे.

संयुक्त राष्ट्रसंघाने 21 जून हा आंतरराष्ट्रीय योग दिन म्हणून घोषीत केला असून या दिनाचे औचित्य साधून योगा उत्सव, चर्चासत्र, कार्यशाळा, सांस्कृतीक कार्यक्रम आदीचे आयोजन शाळा, महाविद्यालय, विद्यापीठ यामधील विद्यार्थ्यांकडून तसेच एन.एस.एस., नेहरु युवा केंद्र इत्यादी युवा संघटनांमार्फत योगासंबंधी कार्यक्रमांचे आयोजन करण्यात यावे. आंतराष्ट्रीय योग दिनाच्या आयोजनासंबंधी अन्य माहिती www.ayush.gov.in या संकेतस्थळावर उपलब्ध करण्यात आली आहे. तसेच कार्यक्रमाचे आयोजन करण्यासंदर्भात राज्य शासनाच्या शालेय शिक्षण व क्रीडा विभागाचा शासन निर्णय दि. 8 जून 2016 हा महाराष्ट्र शासनाच्या www.maharashtra.gov.in या संकेतस्थळावर उपलब्ध करण्यात आला आहे.

00000

सार्वजनिक न्यास नोंदणी कार्यालयाची

कामे ऑनलाईन पद्धतीने सुरु

नांदेड, दि. 15  :- सार्वजनिक न्यास नोंदणी कार्यालयाची कामे ऑनलाईन पद्धतीने सुरु झाली आहेत. न्यासाच्या विश्वस्तांना त्यांचे न्यासाचे परिशिष्ट- एकची माहिती www.charity.maharashtra.gov.in या संकेतस्थळावर भरावयाची आहे. अर्जदारांनी त्यांच्या संस्था नोंदणी, न्यास नोंदणी, बदल अर्ज, कलम 41 क अंतर्गत परवाना अर्ज व लेखा परीक्षण अहवाल ऑनलाईन भरावेत, असे आवाहन नांदेड विभागाचे धर्मादाय उपआयुक्त प्रणिता श्रीनीवार यांनी केले आहे.

सार्वजनिक न्यास नोंदणी कार्यालयाच्यावतीने ऑनलाईन पद्धतीने संस्था नोंदणी अर्ज उपाआयुक्त प्रणिता श्रीनीवार व सहायक धर्मादाय आयुक्त मंजुषा अलोने यांच्या हस्ते पहिले नोंदणी प्रमाणपत्र ऑनलाईन पद्धतीने नुकतेच देण्यात आले. अर्ज ऑनलाईन पद्धतीने सादर करण्यासाठी अर्जदारास ईमेल आयडी, मोबाईल नंबर, आधार कार्ड व पॅनकार्ड आवश्यक आहे. तसेच इतर विश्वस्ताची सुद्धा ही माहिती असणे आवश्यक आहे.

000000

जिल्ह्यात जमावबंदी, शस्त्रबंदी आदेश लागू

नांदेड, दि. 14  :- जिल्ह्यात सोमवार 26 जुन 2017  रोजी मध्यरात्रीपर्यत शस्त्रबंदी व जमावबंदी आदेश लागू केला आहे, अशी माहिती अपर जिल्हादंडाधिकारी कार्यालयाकडून देण्यात आली आहे.

आगामी काळातील रमजान ईद, उत्सव आणि इतर सार्वजनिक कार्यक्रम, विविध प्रकारची संभाव्य आंदोलनाची शक्यता यांच्‍या पार्श्वभुमीवर जिल्ह्यात शांतता व सुव्यवस्था कायम रहावी म्हणून अपर जिल्हादंडाधिकारी यांनी मुंबई पोलीस अधिनियम 1951 चे कलम 37 (1) व (3) अन्वये जिल्ह्यात सोमवार 12 जून  ते 26 जुन 2017 रोजीच्‍या मध्यरात्रीपर्यत शस्त्रबंदी व जमावबंदी आदेश लागू केला आहे. त्यानुसार पाच किंवा पाचपेक्षा अधिक व्यक्तींनी या आदेशात नमूद असलेली कृत्ये सार्वजनिक परिसर किंवा त्याच्या जवळपास करण्यास बंदी घालण्यात आली आहे. हा आदेश पोलीस अधिकारी, शासकीय कर्मचारी, विवाह, अंत्ययात्रा, धार्मिक कार्यक्रम, यात्रा व इतर सक्षम अधिकारी यांनी विशेषरित्या परवानगी दिलेल्या मिरवणुकांना लागू होणार नाही.

000000

जिल्ह्यात गत 24 तासात

 एकूण 104.92 मि.मी. पाऊस

          नांदेड, दि. 14 - जिल्ह्यात बुधवार 14 जून 2017 रोजी  सकाळी 8 वा. संपलेल्या गत 24 तासात एकुण 104.92 मिलीमीटर  पावसाची  नोंद  झाली  असून  जिल्‍ह्यात  दिवसभरात सरासरी 6.56  मिलीमीटर पाऊस झाला आहे.  तर जिल्ह्यात आतापर्यंत सरासरी 74.06 मि.मी. पावसाची  नोंद झाली आहे.

जिल्ह्यात 14 जून रोजी सकाळी 8 वा. संपलेल्या 24 तासात झालेला पाऊस मिलीमीटरमध्ये  तालुका निहाय पुढील  प्रमाणे  कंसात  एकूण  पाऊस : नांदेड- 7.25 (66.38), मुदखेड- 33.33 (91.33), अर्धापूर- 2.00 (73.33) , भोकर- 5.00  (104.50) , उमरी- 0.33 (31.33), कंधार-2.50 (82.00), लोहा-7.00 (85.33), किनवट- निरंक (90.43), माहूर- निरंक (79.00), हदगाव- 35.14 (141.18), हिमायतनगर- निरंक (57.82), देगलूर- 2.17  (29.67), बिलोली- निरंक (54.60), धर्माबाद- 4.00 (59.67), नायगाव- 6.20  (61.46), मुखेड- निरंक (77.00) आज  अखेर  पावसाची सरासरी 74.06 (चालू वर्षाचा एकूण पाऊस 1185.03) मिलीमीटर आहे.

00000000

नांदेडसह मराठवाड्यात आज

मध्यरात्रीपासून अतिवृष्टीचा इशारा

नांदेड दि. 13 :- मराठवाड्यात नांदेड जिल्ह्यासह आठही जिल्ह्यात बुधवार 14 जून रोजी मध्यरात्रीपासून पुढील 48 तासात अतिवृष्टी होण्याचा इशारा मुंबई कुलाबा येथील भारतीय हवामान खात्याने दिला आहे. त्या पार्श्वभुमीवर नागरिकांनी सतर्कता बाळगावी असे आवाहन जिल्हाधिकारी कार्यालयातील आपत्ती व्यवस्थाप कक्षाच्यावतीने करण्यात आले आहे.  

भारतीय हवामान खात्याच्या या इशाऱ्यात 15 जून पासून पुढे 48 तासात वादळी वाऱ्यासह जोरदार पावसाचा अंदाज वर्तविण्यात आला आहे. त्यानुसार मराठवाड्यातील जिल्ह्यात तुरळक ठिकाणी 70 ते 110 मिमीहून अधिक पाऊस होण्याची शक्यता आहे. त्या पार्श्वभुमीवर आपत्ती व्यवस्थापन कक्षाने विविध यंत्रणांना सतर्क राहण्याचे सूचना दिल्या आहेत. नागरिकांनी, विशेषत: शेतकऱ्यांनी अतिवृष्टीच्या काळात दक्षता घ्यावी. पशुधनासह विविध बाबींबाबत काळजी घ्यावी. जीवत व वित्तहानी होणार नाही यासाठी संबंधित यंत्रणांनाही सतर्क रहावे, असे आवाहनही जिल्हा प्रशासनाने केले आहे.  

00000