नियोजन समितीच्या बैठकीत आढावा

जिल्हा वार्षिक योजनेतून विकासकामांवर

54 टक्के खर्च ; उर्वरित निधी खर्च करा

- पालकमंत्री रामदास कदम

नांदेड दि. 29 :- नांदेड जिल्ह्यातील विविध विकास कामांवर चालु वर्षीच्या जिल्हा वार्षिक योजनेतील सर्वसाधारण, अनुसूचित जाती उपयोजना व आदिवासी उपयोजना (ओटीएसपीसह) मिळून वितरीत केलेल्या तरतुदीच्या 54 टक्के खर्च झाला असून उर्वरित निधीतून तातडीने विकास कामे हाती घेऊन शंभर टक्के खर्च होईल यादृष्टिने सर्व विभागांनी नियोजन करावे, असे निर्देश जिल्ह्याचे पालकमंत्री तथा राज्याचे पर्यावरण मंत्री रामदास कदम यांनी दिले.

नांदेड जिल्हा नियोजन समितीची बैठक पालकमंत्री कदम यांच्या अध्यक्षतेखाली नियोजन भवनाच्या मुख्य सभागृहात झाली. यावेळी ते बोलत होते. बैठकीस जिल्हा परिषद अध्यक्षा शांताबाई पवार, महापौर शिलाताई भवरे, आमदार डी. पी. सावंत, आमदार हेमंत पाटील, आमदार सुभाष साबणे, आमदार नागेश पाटील आष्टीकर, आमदार वसंत चव्हाण, आमदार अमर राजूरकर, आमदार डॉ. तुषार राठोड, आमदार विक्रम काळे, आमदार प्रदिप नाईक, जिल्हाधिकारी अरुण डोंगरे, जिल्हा परिषदेचे मुख्य कार्यकारी अधिकारी अशोक काकडे, महानगरपालिका आयुक्त लहुराज माळी आदि मान्यवर उपस्थित होते.

प्रारंभी जिल्हा नियोजन समितीच्या मागील बैठकीच्या इतिवृत्तावरील अनुपालनास मान्यता देण्यात आली. जिल्हा वार्षिक योजनेच्या चालु वर्षीच्या खर्चाचा आढावा घेण्यात आला. सप्टेंबर अखेर झालेल्या खर्चानुसार सर्वसाधारण योनजेच्या 74 कोटी 79 लाख रुपयांच्या वितरीत तरतूदी पैकी 84 टक्के खर्च झाला आहे. अनुसूचित जाती उपयोजनेच्या 62 कोटी 78 लाख 27 हजार रुपये वितरीत तरतूदीपैकी 32 टक्के खर्च झालेला आहे. याशिवाय आदिवासी उपयोजनेच्या 23 कोटी 69 लाख रुपयांच्या वितरीत तरतूदीपैकी 16 टक्के खर्च संबंधित यंत्रणांकडून झाला असल्याची माहिती देण्यात आली.

सन 2018-19 च्या जिल्हा वार्षिक योजनेच्या सर्वसाधारण योजनेतील बांधकाम स्वरुपाच्या कामांच्या यादीस या बैठकीत मान्यता देण्यात आली. यामध्ये प्रामुख्याने ग्रामीण भागाच्या विकासाची कामे समाविष्ट आहेत. विजेच्या वाढत्या भारनियमनाचा प्रश्न या बैठकीत चर्चिला गेला. महावितरणने 299 रोहित्र खरेदी करण्यासाठी 4 कोटी 16 लाख 84 हजार रुपयांच्या अतिरिक्त निधीचा प्रस्ताव सादर केलेला आहे. या बैठकीत प्रस्तावाला मान्यता देण्यात आली.

जिल्ह्यात झालेल्या कमी पर्जन्यमानामुळे दुष्काळ सदृष्य परिस्थितीचा नजिकच्या काळात सामना करावा लागणार असल्याने त्यासंबंधीची दुष्काळ निवारणाची स्वतंत्र बैठक घेण्यात येईल, असे सांगून पालकमंत्री कदम यांनी यावेळी सदस्यांनी मांडलेल्या प्रश्नाविषयी सविस्तर विवेचन केले. यावेळी बावरीनगर दाभड येथील बौद्धविहार या स्थळास "क" वर्ग तिर्थक्षेत्र पर्यटनस्थळामध्ये समावेश करण्याचा निर्णय घेण्यात आला. लवंडेश्वर मंदिर व भवानी मंदिर तळणी ता. हदगाव आणि महादेव मंदिर शिऊर ता. हदगाव, शेंबोली ता. मुदखेड येथील खंडोबा मंदिर, भिमटेकडी व इदगा मैदानाला "क" दर्जाचे तिर्थक्षेत्र व पर्यटनस्थळ म्हणून घोषित करण्यात आले. याशिवाय तिर्थक्षेत्राच्या प्रस्तावांनाही यावेळी मान्यता देण्यात आली. धर्माबाद परिसरातील विकासाच्या 12 कोटी रुपयांच्या कामांसंदर्भात यावेळी चर्चा करण्यात आली. या बैठकीस समितीचे सदस्य असलेले लोकप्रतिनिधी तसेच विभाग प्रमुख अधिकारी उपस्थित होते.

00000

नांदेड जिल्ह्याच्या टंचाई निवारणास प्राधान्य

पाटबंधारे प्रकल्पातील पाणीसाठा

प्राधान्याने पिण्यासाठी आरक्षित

- पालकमंत्री रामदास कदम

नांदेड दि. 29 :- उन्हाळ्यातील पाणीटंचाईचा कालावधी लक्षात घेऊन नांदेड जिल्ह्याचे पालकमंत्री तथा राज्याचे पर्यावरण मंत्री रामदास कदम यांच्या अध्यक्षतेखाली जिल्ह्यातील विविध पाटबंधारे प्रकल्पातील उपलब्ध पाणीसाठ्यापैकी शहरी व ग्रामीण भागातील पिण्यासाठी 15 ऑगस्ट पर्यंत पुरेल एवढे पाणी आरक्षित करण्यात आले.

पालकमंत्री कदम यांच्या अध्यक्षतेखाली जिल्हा नियोजन समितीच्या सभागृहात पाणी आरक्षणाबाबत बैठक घेण्यात आली. या बैठकीस आमदार डी. पी. सावंत, आमदार हेमंत पाटील, आमदार सुभाष साबणे, आमदार नागेश पाटील आष्टीकर, आमदार वसंत चव्हाण, आमदार अमर राजूरकर, आमदार डॉ. तुषार राठोड, आमदार विक्रम काळे, आमदार प्रदिप नाईक, जिल्हाधिकारी अरुण डोंगरे, जिल्हा परिषदेचे मुख्य कार्यकारी अधिकारी अशोक काकडे, महानगरपालिका आयुक्त लहुराज माळी, पाटबंधारे विभागाचे अधिक्षक अभियंता एस. के. सब्बीनवार आदि मान्यवर तसेच विभागाचे अधिकारी उपस्थित होते.

पिण्याच्या पाण्याला संपूर्ण जिल्ह्यातील प्रकल्पातील जलाशयामध्ये सर्वोच्च प्राधान्य राहिल असे सांगून पालकमंत्री कदम यांनी जिल्ह्यातील विविध जलाशयातील उपलब्ध पाणीसाठा आणि शहरी व नागरी भागासाठीची संबंधित यंत्रणांची मागणी लक्षात घेऊन पाणी आरक्षणाचा निर्णय घेतला. यावेळी लोकप्रतिनिधींनी मांडलेल्या सुचना लक्षात घेण्यात आले. महानगरपालिका नांदेडसाठी विष्णूपूरी प्रकल्पात 30 दलघमी आणि उर्ध्व पैनगंगा प्रकल्पात 15 दलघमी पाणी आरक्षित करण्यात आले. याशिवाय जिल्हा परिषद नांदेडसाठी विष्णुपुरी प्रकल्पात 2 दलघमी आणि उर्ध्व पैनगंगा प्रकल्पात 35 दलघमी पाणी आरक्षीत करण्यात आला. याशिवाय विष्णुपुरी प्रकल्पात 1.50 दलघमी पाणी एमआयडीसी नांदेडसाठी ठेवण्यात आले आहे. तसेच जिल्ह्यातील विविध नगरपालिका व ग्रामीण भागासाठी जिल्हा परिषदेच्या मागणीप्रमाणे जिल्ह्यातील विविध प्रकल्पातील पाणी आरक्षीत करण्यात आले. उर्ध्व पैनगंगा, निम्म मानार बारुळ, विष्णुपूरी, पूर्णा, देवापूर या मोठ्या प्रकल्पात एकुण 93.10 दलघमी आणि उर्ध्व मानार लिंबोटी निम्म मानार बारुळ, कुंद्राळा, करडखेड, नागरझरी, कुदळा, उर्ध्व पैनगंगा प्रकल्प क्र. 4, बाभळी बंधारा या मध्यम प्रकल्पातील 18.80 दलघमी पाणीसाठा आरक्षित करण्यात आला तसेच पलाईगुडा, शेख फरिदवदरा, रेणापूर सुधा, सुनेगाव व उर्ध्व मानार लिंबोटी या लघु प्रकल्पात 4.80 दलघमी पाणी पिण्यासाठी आरक्षित करण्यात आले असल्याचे पालकमंत्री कदम यांनी जाहिर केले.

प्रारंभी जिल्हाधिकारी अरुण डोंगरे यांनी जिल्ह्यातील मोठ्या, मध्यम आणि लघु प्रकल्पातील पाणीसाठ्याची व जिल्ह्यातील पर्जन्यमानाची माहिती देऊन शहरी व ग्रामीण भागासाठी पाण्याची यंत्रणांनी केलेली मागणी आदिची माहिती दिली. अवैध पाणी उपशावर नियंत्रणासाठी समित्या गठित केल्या असून कार्यवाही सुरु असल्याचे सांगून जिल्हाधिकारी डोंगरे यांनी पाटबंधारे विभागाकडे थकीत पाणीपट्टी भरण्याबाबत जिल्हा परिषदेला सुचना केली. या बैठकीस संबंधित विभागाचे अधिकारी उपस्थित होते. बैठकीपूर्वी प्रधानमंत्री आवास योजनेच्या शहरी लाभार्थ्यांना कार्यारंभ आदेश देवून अंमलबजावणी प्रक्रियेचा शुभारंभ करण्यात आला.

000000

विधानसभा विरोधी पक्षनेता

राधाकृष्ण विखे पाटील यांचा सुधारीत दौरा

नांदेड दि. 26 :- महाराष्ट्र विधानसभा विरोधी पक्षनेता राधाकृष्ण विखे पाटील यांचा शनिवार 27 ऑक्टोंबर 2018 रोजीचा सुधारीत दौरा कार्यक्रम पुढील प्रमाणे राहील.   

शनिवार 27 ऑक्टोंबर 2018 रोजी सकाळी 9 वा. नांदेड विमानतळ येथून खाजगी हेलिकॉप्टरने माहूरकडे प्रयाण. सकाळी 9.30 वा. माहूर हेलिपॅड येथे आगमन व मोटारीने रेणुका देवी मंदिराकडे प्रयाण. सकाळी 10 वा. रेणुकादेवी मंदिर येथे आगमन व राखीव. सकाळी 10.30 वा. रेणुका देवी मंदिर येथून मोटारीने माहूर हेलिपॅडकडे प्रयाण. सकाळी 11 वा. माहूर हेलिपॅड येथे आगमन व खाजगी हेलिकॉप्टरने हदगावकडे प्रयाण. सकाळी 11.30 वा. हदगाव हेलिपॅड हदगाव येथे आगमन व मोटारीने भाऊराव सहकारी साखर कारखाना युनिट क्र. 4 हदगावकडे प्रयाण. सकाळी 11.45 वा. भाऊराव सहकारी साखर कारखाना युनिट क्र. 4 हदगाव येथे आगमन व राखीव. दुपारी 12.30 वा. भाऊराव सहकारी साखर कारखाना युनिट क्र. 4 हदगाव येथून मोटारीने जिल्हा परिषद हायस्कूल मैदान हदगावकडे प्रयाण. दुपारी 12.45 वा. जिल्हा परिषद हायस्कूल मैदान हदगाव येथे आगमन व जनसंघर्ष यात्रेच्या जाहिर सभेस उपस्थिती. स्थळ जिल्हा परिषद हायस्कूल मैदान हदगाव. दुपारी 1.15 वा जिल्हा परिषद हायस्कूल मैदान हदगाव येथून मोटारीने हदगाव हेलिपॅडकडे प्रयाण. दुपारी 1.30 वा. हदगाव हेलिपॅड येथून खासगी हेलिकॉप्टरने लोणी ता. राहाता अहमदनगरकडे प्रयाण करतील.

00000

ज्येष्ठ नागरीकांना विधी सेवा सहाय्य योजनेची

जिल्हा विधी सेवा प्राधिकरणात बैठक संपन्न

नांदेड दि. 26 :- ज्येष्ठ नागरीकांना विधी सेवा सहाय्य पुरविण्यासाठी योजना राबविण्याच्या अनुषंगाने समितीची बैठक जिल्हा न्यायालयातील जिल्हा विधी सेवा प्राधिकरण येथे जिल्हा विधी सेवा प्राधिकरणाचे सचिव न्यायाधीश  डी. टी. वसावे यांच्या अध्यक्षतेखाली आज घेण्यात आली.

यावेळी समिती सदस्य डॉ. हंसराज वैद्य, अॅड.  व्ही. डी. पाटनुरकर उपस्थितीत होते. बैठकीत जेष्ठ नागरीकांच्या समस्या जाणुन दाखल पूर्व प्रकरणांचा विचार करून आवश्यक विधी सेवा उपलब्ध करून देण्याबाबत सांगितले. जेष्ठ नागरीकांचे न्यायालयीन प्रकरणे लवकर निकाली काढण्याबाबत संबंधित न्यायालयात सुचना देण्यात आल्या. यावेळी जेष्ठ नागरीक लक्ष्मीबाई गणपत मेलपेदेवार यांना मोफत वकिल देण्यात आला.

            न्यायाधीश डी. टी. वसावे यांनी जेष्ठ नागरिकांनी सन्मानाने, आनंदाने जीवन जगावे. तक्रार किंवा समस्या असेल तर जिल्हा विधी सेवा प्राधिकरणामार्फत मार्गदर्शन केले जाईल. मुलगा किंवा मुलगी कमवत असेल तर त्याच्या कमाई मधील काही रक्कम त्यांच्या आई-वडीलास खावटीपोटी देता येते असे ते म्हणाले. तसेच जेष्ठ नागरीकांचे हक्क, अधिकार कोणीही हिरावुन घेऊ शकत नाहीत. आई-वडीलांकडे दुर्लक्ष करु नये. आई-वडील जीवंत असतांना त्यांच्या मुलभूत गरजा पुर्ण कराव्यात.    आपल्या मुलांकडुन छळ होत असल्यास मुलगा किंवा मुलीकडुन पोटगी मिळवण्याचा हक्क त्यांच्या आई-वडीलांना आहे. जेष्ठ नागरीकांनी स्वाभीमान जागृत करावा. आई-वडीलांची काळजी घ्यावी. तसेच समता, स्वातंत्र व बंधुताची भावना आपल्या घरापासुन सुरू केली पाहिजे, असेही त्यांनी सांगितले. तसेच जेष्ठ नागरीकांसाठी असलेल्या केंद्र व राज्य शासनाच्या विविध योजनांची सविस्तर माहिती यावेळी न्या. वसावे यांनी दिली.

000000

नारी शक्ती पुरस्कारासाठी

नामांकने सादर करण्याचे आवाहन

नांदेड, दि. 26 :-  भारत सरकारच्या महिला व बाल विकास मंत्रालयामार्फत नारी शक्ती पुरस्कार देण्यात येणार आहे. या पुरस्काराचे वितरण दि. 8 मार्च, 2019  या जागतिक महिला दिनाच्या दिवशी करण्यात येणार आहेत. या पुरस्कारासाठी औरंगाबाद महसुली विभागातील आठ जिल्ह्यातून नामांकने मागविण्यात येत आहेत. यामध्ये वैयक्तीक पुरस्कार व स्वयंसेवी संस्था स्तरावरील पुरस्काराचा समावेश आहे. नामांकने सादर करण्यासाठी आवश्यक पात्रता, निकष व नमुना अर्ज इत्यादीची माहिती केंद्र शासनाच्या http//www.wcd.nic.in या संकेतस्थळावर उपलब्ध आहे.

तेंव्हा यासाठी औरंगाबाद विभागातील संबंधित जिल्ह्याच्या जिल्हा महिला व बाल विकास अधिकारी यांच्या कार्यालयात दि.  29 ऑक्टोबर, 2018 पर्यंत संबंधितांनी नामांकने सादर करावीत. त्यानंतर प्राप्त झालेली नामांकने, अर्ज स्वीकारली जाणार नाहीत, असे विभागीय उपआयुक्त, महिला व  बालविकास, औरंगाबाद विभाग, औरंगाबाद यांनी प्रसिध्दी पत्रकाद्वारे कळविले आहे.

0000

लोहा तालुक्‍यात 'एक दिवस नवमतदारासोबत' उपक्रम 27 रोजी

      नांदेड दि. 26 :- मतदारांना विशेष गृहभेटीव्‍दारे मतदार जनजागृती आणि मतदार नोंदणी मोहीम राबविण्‍यासाठी 'एक दिवस  नवमतदारासोबत' हा उपक्रम 27 आक्‍टोंबर 2018 रोजी लोहा तालुक्‍यात घेण्‍यात येत आहे. यासाठी विविध विभागाचे अधिकारी, कर्मचारी यांचेसह जवळपास अडीचशे कर्मचा-यांचा ताफा नियुक्‍त करण्‍यात आला असून ते गावोगावी जावून मतदारांना भेटी देणार आहेत तसेच नवमतदारांची मतदार म्‍हणून नोंदणी फॉर्म भरुन घेणार आहेत, अशी माहिती  लोहयाचे तहसिलदार विठ्ठल परळीकर यांनी दिली.

       जिल्‍हाधिकारी अरुण डोंगरे, उपजिल्‍हाधिकारी निवडणूक दिपाली मोतीयाळे यांच्‍या मार्गदर्शनाखाली व कंधारचे उपविभागीय अधिकारी पी.एस बोरगावकर यांच्‍या नियोजनात भारत निवडणूक आयोगाने दिलेल्‍या निर्देशानुसार 1 सप्‍टेंबर ते 31 आक्‍टोंबर 2018 या कालावधीत मतदार जनजागृती आणि मतदार नोंदणी मोहीम राबविण्‍यात येत आहे. याचाच एक भाग म्‍हणून 27 आक्‍टोंबर रोजी एक दिवस नवमतदारासोबत हा विशेष उपक्रम घेण्‍यात येत आहे. यासाठी विविध विभागाचे तपासणी अधिकारी, बिएलओ, पर्यवेक्षक, विविध विभागाचे सोबती कर्मचारी असे नियुक्‍ती आदेश जारी करण्‍यात आले आहेत. सदरील कामाची तपासणी करण्‍यासाठी कंधारचे उपविभागीय अधिकारी पी.एस. बोरगावकर, तहसिलदार व्‍ही.एम. परळीकर हे व्‍यक्‍तीशः भेटी देणार आहेत.

       सदर रोजी बिएलओ आणि त्‍यांचे सोबती कर्मचारी त्‍यांना नेमूण दिलेल्‍या क्षेत्रातील सर्व कुंटूबाना भेटी देणार असून कुंटूबातील पात्र सदस्‍यांची नावे मतदार यादीत आहेत काय हे तपासून पाहणार आहेत. तसेच महिला मतदार, दिव्‍यांग व्‍यक्‍ती, नवमतदार यांची नोंदणी प्रमाण वाढविण्‍याकरीता विशेष प्रयत्‍न करणार आहेत.

       1 जानेवारी 2019 या अर्हता दिनांकावर 18 वर्ष पूर्ण होत असलेल्‍या पात्र मतदारांनी मतदार यादीत नाव नोंदणी करण्‍यासाठी नमुना नं (6), मतदार यादीतील नावे वगळण्‍यासाठी नमुना नं (7), दुरुस्‍तीसाठी नमुना नंबर (8) व विधानसभा मतदार संघाअंतर्गत स्‍थलांतरासाठी नमुना नंबर (8 अ) भरुन संबंधीत बिएलओ यांचेकडे दयावा. तसेच सर्व मतदारांनी त्‍यांची नावे मतदार यादीत असल्‍याबाबतची खात्री करावी.

       सर्व नियुक्‍त अधिकारी/कर्मचारी यांनी त्‍यांना नेमूण दिलेल्‍या क्षेत्रात जावून नवमतदारासाठी एक दिवस उपक्रम यशस्‍वी करावा तसेच मतदारांनी सदर उपक्रम यशस्‍वी करण्‍यासाठी योगदान दयावे, असे आवाहन तहसिलदार विठ्ठल परळीकर यांनी केले आहे.

00000

पालकमंत्री रामदास कदम यांचा दौरा

नांदेड दि. 26 :- राज्याचे पर्यावरण मंत्री तथा नांदेड जिल्ह्याचे पालकमंत्री रामदास कदम हे नांदेड दौऱ्यावर येत असून त्यांचा दौरा कार्यक्रम पुढील प्रमाणे राहील.

सोमवार 29 ऑक्टोंबर 2018 रोजी देवगिरी एक्सप्रेसने सकाळी 8.40 वा. नांदेड रेल्वे स्थानक येथे आगमन व शासकीय वाहनाने शासकीय विश्रामगृह नांदेडकडे प्रयाण करतील. सकाळी 9 वा. शासकीय विश्रामगृह नांदेड येथे आगमन व राखीव. दुपारी 12.15 वा. सन 2018-19 मध्ये पिण्याचे पाणी आरक्षण करण्यासंदर्भात बैठक स्थळ- नियोजन भवन मुख्य सभागृह जिल्हाधिकारी कार्यालय नांदेड. दुपारी 12.30 वा. नांदेड जिल्हा नियोजन समिती बैठकीस उपस्थिती. स्थळ- नियोजन भवन मुख्य सभागृह जिल्हाधिकारी कार्यालय नांदेड. दुपारी 3 ते 5 वाजेपर्यंत आमदार हेमंत पाटील यांचे मतदारसंघातील विविध आयोजित कार्यक्रमास उपस्थिती. सायं. 5.45 वा. नांदेड रेल्वे स्थानक येथे आगमन व राखीव. सायं 6 वा. नांदेड रेल्वे स्थानक येथून देवगिरी एक्सप्रेसने मुंबईकडे प्रयाण करतील.

000000