वृत्त क्रमांक 1308

वाहनांद्वारे अवैध गौण खनिज वाहतुक करू नये - उपप्रादेशिक परिवहन अधिकारी प्रशांत कंकरेज 

नांदेड दि. 17 डिसेंबर :- वाळू व इतर गौण खनिजांचे अनधिकृत उत्खनन, वापर व अवैध वाहतूक करणाऱ्या वाहनावर पहिल्या गुन्ह्यासाठी 30 दिवस परवाना निलंबन व वाहन अटकावून ठेवणे, दुसऱ्या गुन्ह्यासाठी 60 दिवस परवाना निलंबन व वाहन अटकावून ठेवणे, तिसऱ्या गुन्ह्यासाठी परवाना रद्द करण्याची कार्यवाही करण्यात येणार आहे. वाहनांद्वारे अवैध गौण खनिज वाहतुक करण्यात येऊ नये, असे आवाहन उप प्रादेशिक परिवहन अधिकारी प्रशांत कंकरेज यांनी केले आहे. 

 

राज्यात वाळू व इतर गौण खनिजांचे अनधिकृत उत्खनन, वापर व अवैध वाहतूक होत असल्याने अशा वाहनांवर आळा घालण्यासाठी व अशी अवैध वाहतूक होऊ नये यासाठी कठारे कारवाई करण्याबाबत शासन स्तरावर निर्णय घेण्यात आला आहे. त्यानुसार दोषी वाहनांवर मोटार वाहन अधिनियम, 1988 च्या कलम 86 मधील तरतुदीनुसार विभागीय कारवाई करण्यासाठी राज्य परिवहन प्राधिकरण महाराष्ट्र राज्य मुंबई यांची 18 ऑगस्ट 2025 रोजी बैठक पार पडली आहे.

 

त्यात दोषी वाहनावर पहिल्या गुन्ह्यासाठी 30 दिवस परवाना निलंबन व वाहन अटकावून ठेवणे, दुसऱ्या गुन्ह्यासाठी 60 दिवस परवाना निलंबन व वाहन अटकावून ठेवणे, तिसऱ्या गुन्ह्यासाठी परवाना रद्द करण्याची कार्यवाही करण्याबाबत ठराव मंजूर करण्यात आलेला आहे.

 

त्यानुसार प्रादेशिक परिवहन प्राधिकरण नांदेड यांच्या 16 डिसेंबर 2025 रोजीच्या बैठकीतील ठरावानुसार 26 डिसेंबर 2025 पासून राज्य परिवहन प्राधिकरण यांनी पारित केलेल्या ठरावाप्रमाणेच ठराव पारित करण्यात आला. सदर ठरावानुसार वरीलप्रमाणे कार्यवाही करण्यात येणार आहे, असेही आवाहन उप प्रादेशिक परिवहन अधिकारी प्रशांत कंकरेज यांनी केले आहे. 

00000

 वृत्त क्रमांक 1307

जलताराला तंत्रज्ञानाची जोड ; जिओ-फेन्सिंगद्वारे पारदर्शक अंमलबजावणीसाठी एकदिवसीय कार्यशाळा संपन्न

जिल्हाधिकाऱ्यांच्या हस्ते जलतारा ॲपचे उद्धघाटन

लोकसहभाग व तंत्रज्ञानाच्या सहाय्याने जलतारा चळवळ अधिक प्रभावीपणे राबविणार

नांदेड, दि. 17 डिसेंबर :  उपक्रम अधिक परिणामकारक, पारदर्शक व गतिमान करण्यासाठी जलतारा उपक्रमाला तंत्रज्ञानाची जोड देण्यात आली आहे. प्रत्येक कामाची जिओ-फेन्सिंगद्वारे नोंद, छायाचित्रण तसेच प्रत्यक्ष प्रगतीचे निरीक्षण करण्यासाठी स्वतंत्र मोबाईल अॅप विकसित करण्यात आले आहे. या जलतारा अॅपचे उद्घाटन आज जिल्हाधिकारी राहुल कर्डिले यांच्या हस्ते करण्यात आले. या प्रणालीमुळे कामांमध्ये पारदर्शकता वाढून वेळेत व दर्जेदार अंमलबजावणी सुनिश्चित होणार असल्याचेही त्यांनी यावेळी सांगितले.

‘जलतारा ॲप’ अंमलबजावणी विषयावर आज जिल्हाधिकारी कार्यालयाच्या नियोजन भवन येथे एकदिवसीय कार्यशाळेचे आयोजन करण्यात आले होते. यावेळी जिल्हा परिषदेच्या मुख्य कार्यकारी अधिकारी मेघना कावली, उपजिल्हाधिकारी संजीव मोरे, जिल्हा अधीक्षक कृषी अधिकारी दत्तकुमार कळसाईत, उपमुख्य कार्यकारी अधिकारी अमित राठोड, नायब तहसीलदार जयशंकर इटकापल्ले, सर्व तालुका कृषी अधिकारी, सर्व बीडीओ, नोडल अधिकारी चेतन जाधव, एमआयएस समन्वयक रूपेश झंवर, राज्य उपजीविका तज्ज्ञ श्रीमती चेतना लाटकर, प्रादेशिक समन्वयक दिनेश खडसे, सर्व एपीओ, पीटीओ, सीडीईओ तसेच एचआयएमडब्ल्यूपी सीएसओ टीमचे प्रतिनिधी व संपूर्ण जिल्हा नरेगा टीम मोठ्या संख्येने उपस्थित होती.

सर्व अधिकाऱ्यांना ‘जलतारा ॲप’ आपल्या मोबाईलमध्ये डाउनलोड करून त्याचा सक्रिय वापर करण्याचे तसेच इतरांना या उपक्रमासाठी प्रेरित करण्याचे आवाहन जिल्हाधिकारी राहुल कर्डिले यांनी केले. केवळ प्रशासकीय अंमलबजावणीपुरते मर्यादित न राहता, प्रत्येक अधिकाऱ्यांनी स्वतःच्या घरात जलतारा उभारून समाजास आदर्श घालून द्यावा, असे स्पष्ट निर्देश त्यांनी दिले.

नांदेड जिल्ह्यात पावसाच्या पाण्याचे प्रभावी व्यवस्थापन करून भूजल पातळी वाढविण्याच्या उद्देशाने जिल्हाधिकारी राहूल कर्डिले यांच्या संकल्पनेतून सुमारे एक लाख जलतारे निर्माण करण्याचे महत्त्वाकांक्षी उद्दिष्ट निश्चित करण्यात आले आहे. या अभिनव उपक्रमाचा औपचारिक प्रारंभ जिल्ह्यातील विविध गावांमध्ये करण्यात आला असून, केंद्र शासनाच्या “Catch the Rain – Where it Falls, When it Falls” या जलसंधारण संकल्पनेला अधिक बळकटी देण्यासाठी जिल्हा प्रशासनामार्फत हा उपक्रम प्रभावीपणे राबविण्यात येत आहे.

या पार्श्वभूमीवर जलतारा उपक्रमाचा आढावा घेण्यात येऊन जलताऱ्यांचे जिओ-फेन्सिंग करण्यासाठी विकसित करण्यात आलेल्या मोबाईल अॅाप्लिकेशनचे उद्घाटन करण्यात आले. जलतारा निर्मिती ही केवळ संरचना उभारणी नसून, भविष्यातील पाण्याच्या सुरक्षिततेसाठीची दूरदृष्टी असल्याचे मत यावेळी व्यक्त करण्यात आले.

पावसाचे अतिरिक्त पाणी शेतजमिनीत मुरवून भूजल पातळी वाढवणे, जमिनीची धूप रोखणे, मातीची पोत सुधारणे, उत्पादनक्षमता वाढवणे तसेच नैसर्गिक संसाधनांचे संवर्धन करणे हा या अभियानाचा मुख्य उद्देश आहे. 

कार्यशाळेदरम्यान जलतारा उपक्रमासह अति प्रभावित मेगा पाणलोट प्रकल्पाचा सविस्तर आढावा घेण्यात आला. या प्रकल्पांतर्गत प्राप्त प्रस्तावांवर तातडीने प्रक्रिया करून गांभीर्याने दखल घेण्याच्या स्पष्ट सूचना पंचायत समिती व कृषी विभागास देण्यात आल्या. विविध विभागांतील समन्वयातूनच हा उपक्रम यशस्वी होऊ शकतो असेही यावेळी अधोरेखित करण्यात आले.

सर्व मान्यवरांनी जलतारा उपक्रमाबाबत समाधान व्यक्त करत लोकसहभाग व तंत्रज्ञानाच्या सहाय्याने जलतारा चळवळ अधिक प्रभावीपणे राबविण्याचा निर्धार व्यक्त केला. नांदेड जिल्हा जलसंधारण क्षेत्रात राज्यासाठी आदर्श ठरेल, असा विश्वास यावेळी व्यक्त करण्यात आला. ‘जल आहे तर उद्या आहे’ आणि जलतारा हीच नांदेडच्या जलसुरक्षेची शाश्वत वाटचाल आहे, असा संदेश यानिमित्ताने देण्यात आला.

00000

 वृत्त क्रमांक 1306

नशेच्या औषध विक्री विरोधात अन्न व औषध प्रशासनाची कठोर कारवाई

नांदेड, दि. 17 डिसेंबर :- अन्न व औषध प्रशासन, नांदेड कार्यालयाच्यावतीने नशेच्या औषधांची बेकायदेशीर विक्री करणाऱ्या मेडिकल स्टोअर्सविरोधात कठोर कारवाई करण्यात आली आहे. काही वृत्तपत्रे व इलेक्ट्रॉनिक माध्यमांत नशेच्या औषध विक्रीबाबत अपूर्ण व मोघम स्वरूपाच्या बातम्या प्रसिद्ध होत असल्याचे निदर्शनास आले आहे. 

या पार्श्वभूमीवर नागरिकांना नशेच्या गोळ्यांची बेकायदेशीर विक्री करणारी किंवा नियमबाह्य औषध विक्री करणारी कोणतीही औषधी पेढी आढळून आल्यास त्यांनी सहायक आयुक्त (औषधे), अन्न व औषध प्रशासन, महाराष्ट्र राज्य, नांदेड यांच्याशी संपर्क साधून कार्यालयाकडे लेखी तक्रार सादर करावी. यामुळे कायद्याचे उल्लंघन करणाऱ्या औषधी दुकानांविरोधात प्रभावी कारवाई करणे प्रशासनास शक्य होईल.

कोटा (राजस्थान)च्या धर्तीवर नांदेड शहर हे शैक्षणिक हब म्हणून विकसित होत आहे. राज्यासह परराज्यातून मोठ्या संख्येने विद्यार्थी शिक्षणासाठी नांदेड येथे वास्तव्यास आहेत. काही मेडिकल स्टोअर्समार्फत नशेच्या औषधांची व गोळ्यांची सहज उपलब्धता होत असल्याबाबत निदर्शनास आले होते.  त्या अनुषंगाने नांदेड शहरासह जिल्ह्यातील विविध भागांतील औषधी दुकानांची विशेष तपासणी मोहीम राबविण्यात आली. नांदेड कार्यालयासाठी सहायक आयुक्त (औषधे) यांचे एक पद व औषध निरीक्षकांची एकूण चार पदे मंजूर असून, मार्च 2025 पासून औषध निरीक्षकांची सर्व पदे रिक्त आहेत. सद्यस्थितीत या पदांचा अतिरिक्त कार्यभार सहायक आयुक्त (औषधे), नांदेड यांच्याकडे आहे. 

तथापि, विभागातील औषध निरीक्षकांच्या सहकार्याने विशेष तपासणी मोहीम प्रभावीपणे राबविण्यात आली आहे.

या मोहिमेत नोव्हेंबर 2025 अखेर डॉक्टरांच्या प्रिस्क्रिप्शनशिवाय नशेच्या गोळ्यांची विक्री तसेच औषध कायद्याच्या इतर तरतुदींचे उल्लंघन केल्याप्रकरणी एकूण 48 औषधी पेढ्यांना कारणे दाखवा नोटिसा बजावून लेखी स्पष्टीकरण मागविण्यात आले होते. प्राप्त स्पष्टीकरण समाधानकारक न आढळल्याने 32 औषधी पेढ्यांचे परवाने निलंबित करण्यात आले असून 13 औषधी पेढ्यांचे परवाने कायमस्वरूपी रद्द करण्यात आले आहेत. उर्वरित 3 औषधी पेढ्यांविरोधात कारवाई प्रस्तावित आहे. कारवाई करण्यात आलेल्या काही औषधी पेढ्यांनी शासनस्तरावरून स्थगिती आदेश प्राप्त केल्यामुळे त्यांच्याविरोधातील प्रकरणे शासनस्तरावर प्रलंबित आहेत अशी माहिती अन्न व औषध प्रशासनाचे सहायक आयुक्त औषधे अ.तु.राठोड यांनी प्रसिध्दीपत्रकाद्वारे दिली आहे. 

000000

लेख

लेख 

माळेगाव यात्रा : ग्रामीण संस्कृतीची प्रयोगशाळा !

मराठवाडा संतांची, वीरांची भूमी आहे. याच भूमीतील नांदेड जिल्ह्यात माळेगाव आहे. लोहा तालुक्यातील या गावात मोठी यात्रा भरते. ही यात्रा मार्गशीर्ष अमावास्येला सुरू होते. दक्षिण भारतात ही यात्रा अत्यंत प्रसिद्ध आहे. माळेगाव केवळ धार्मिक स्थळ नाही. ते ग्रामीण अर्थव्यवस्थेला गती देणारे मोठे व्यापारी केंद्र आहे. या यात्रेला आजपासून (ता. 18 ते 25 डिसेंबर) सुरुवात होत आहे. त्यानिमित्ताने या यात्रेवर प्रकाश टाकणारा हा लेख.

माळेगाव यात्रेला जवळपास चार शतकांची परंपरा आहे. मोगल, निजाम काळापासून या यात्रेला अनन्य साधारण महत्त्व होते. ऐतिहासिक काळापासून माळेगाव घोड्यांच्या व्यापारासाठी प्रसिद्ध आहे. आजही तेलंगणा, कर्नाटक आणि महाराष्ट्रातील व्यापारी येथे येतात. या ठिकाणी महाराष्ट्राचे कुलदैवत असलेल्या खंडोबाचे देखणे, सुंदर असे मंदिर आहे.

माळेगाव यात्रा म्हणजे लोककलांचे माहेरघरच. येथे कलगी-तुरा, वाघ्या-मुरळी, गोंधळ आणि भारूड सादर होतात. तमाशा, लावणी येथील मुख्य आकर्षण असते. नामांकित तमाशा फडांची जुगलबंदी येथे रंगते. तमाशासोबतच 'मौत का कुआँ' सारखे प्रकारही येथे दिसतात.

इतर यात्रांमध्ये प्रामुख्याने फक्त देवदर्शन असते. पण माळेगाव यात्रा वेगळी आहे. येथे कृषी प्रदर्शन आणि कुस्त्यांची दंगल पाहायला मिळते. पशु प्रदर्शन या यात्रेचे हृदय आहे. येथे हजारो जनावरांची खरेदी-विक्री होते. राजस्थानच्या पुष्कर मेळ्यानंतर घोड्यांच्या व्यापारासाठी ही दुसरी मोठी बाजारपेठ आहे. यात्रेत सर्वधर्मीय लोक आनंदाने सहभागी होतात. ही यात्रा म्हणजे उत्तम, असे सामाजिक सलोख्याचे प्रतीकच आहे.

माळेगाव यात्रा ग्रामीण अर्थव्यवस्थेचा कणा आहे. पाच ते सात दिवसांतच येथे कोट्यवधींची उलाढाल होते. चेतक, मारवाडी, पंजाबी अशा उच्च जातीचे घोडे विक्रीला येतात. या घोड्यांची खरेदी-विक्री किंमत चकित करणारी असते. यासह येथे गाढवांचीही मोठी बाजारपेठ भरते. वीटभट्टी व्यावसायिक आणि परराज्यातील व्यापारी येथे गाढवे खरेदी करतात. याशिवाय उंट, बैल, गायी आणि शेळ्या-मेंढ्यांचीही विक्री होते. कृषी अवजारे आणि खाद्यपदार्थांचीही मोठी उलाढाल होते.

अडचणीच्या काळात ही यात्रा शेतकऱ्याला आधार देते. पशुधन विकून आलेला पैसा शेतीसाठी वापरला जातो. यात्रेत शेतकऱ्यांना नवीन बियाणे आणि तंत्रज्ञानाची माहिती मिळते. तसेच यात्रेतून स्थानिक मजुरांना रोजगार मिळतो. पूर्वी यात्रेत कृषी विषयक वस्तूंची देवाण-घेवाण (Barter System) होत असे. आता रोखीने आणि 'युपीआय'द्वारे (Online) व्यवहार होतात. पूर्वी बैलगाडीतून येणारे भाविक चारचाकी गाड्यांमधून येतात.

 माळेगावची ही यात्रा केवळ उत्सव नाही. ती ग्रामीण संस्कृतीची एक प्रयोगशाळा आहे. आधुनिकीकरणाच्या काळातही यात्रेने आपली ओळख जपली आहे. हजारो हातांना काम देणारी ही यात्रा खऱ्या अर्थाने 'वैभवशाली' अशीच आहे.

- डॉ. श्याम टरके,

सहायक संचालक (माहिती), विभागीय माहिती कार्यालय, लातूर

 वृत्त क्रमांक 1305

१८ डिसेंबरपासून माळेगाव यात्रेला सुरुवात

भव्य कार्यक्रमांचे आयोजन; भाविकांसाठी सर्वांगीण सुविधा

मुख्य कार्यकारी अधिकारी मेघना कावली यांची माहिती

नांदेड, दि. १६ डिसेंबर:- दक्षिण भारतात प्रसिद्ध असलेल्या श्री क्षेत्र माळेगाव (ता. लोहा) येथे श्री खंडोबाची भव्य यात्रा येत्या १८ डिसेंबरपासून सुरू होत असून १८ ते २५ डिसेंबर २०२५ या कालावधीत नांदेड जिल्हा परिषदेमार्फत भव्‍य कृषी प्रदर्शन, विविध सांस्कृतिक, कृषी व पशुसंवर्धन विषयक स्‍पर्धेचे आयोजन करण्यात आले आहे, अशी माहिती जिल्हा परिषदेच्‍या मुख्य कार्यकारी अधिकारी तथा प्रशासक मेघना कावली यांनी आज पत्रकार परिषदेत दिली.

नांदेड जिल्हा परिषदेच्या यशवंतराव चव्हाण सभागृहात आयोजित पत्रकार परिषदेत त्या बोलत होत्या. यावेळी अतिरिक्त मुख्य कार्यकारी अधिकारी संदीप माळोदे, पंचायत विभागाचे उपमुख्य कार्यकारी अधिकारी डी.बी. गिरी, जिल्हा आरोग्य अधिकारी डॉ. संगीता देशमुख, पशुसंवर्धन उपायुक्त डॉ. राजकुमार पडिले, सहआयुक्‍त डॉ. प्रवीणकुमार घुले, कृषी विकास अधिकारी डॉ. नीलकुमार ऐतवडे, ग्रामीण पाणी पुरवठा विभागाचे कार्यकारी अभियंता राहुल रावसाहेब, उपमुख्य कार्यकारी अधिकारी मयूर अंदेलवाड, नरेगा उपमुख्य कार्यकारी अधिकारी अमित राठोड, महिला व बालकल्याण विभागाचे उपमुख्य कार्यकारी अधिकारी प्रशांत थोरात, मुख्य लेखा व वित्त अधिकारी शिवप्रसाद चेन्‍ना, समाज कल्याण अधिकारी सत्येंद्र आऊलवार, माध्यमिक शिक्षणाधिकारी माधव सलगर, नियोजन विभागाचे शिक्षणाधिकारी दिलीप बनसोडे आदींची उपस्थिती होती.

चौकट

माळेगाव यात्रेतील विविध कार्यक्रम याप्रमाणे- १८ डिसेंबर रोजी श्री खंडोबाची पालखी पूजन व कृषी प्रदर्शनाचे उद्घाटन, १९ डिसेंबर रोजी पशु, अश्व, श्वान, कुक्कुट प्रदर्शन व दुग्ध स्पर्धांचे उद्घाटन तसेच महिला व बालकांसाठी विविध स्पर्धा आयोजित करण्यात आल्या आहेत. २० डिसेंबर रोजी कृषीनिष्ठ शेतकऱ्यांचा सत्कार करण्यात येणार आहे. २२ डिसेंबर रोजी महिला आरोग्य शिबिर तसेच लावणी महोत्सव, २३ डिसेंबर रोजी पशुप्रदर्शन व दुग्ध स्पर्धांचे बक्षीस वितरण तसेच कुस्त्यांची प्रचंड दंगल, २४ डिसेंबर रोजी पारंपरिक लोककला महोत्सव, तर २५ डिसेंबर रोजी शंकरपटाचे (बैलजोडी-बैलगाडा शर्यत) आयोजन करण्यात आल्‍याची माहिती मुख्‍य कार्यकारी अधिकारी मेघना कावली यांनी दिली. 

यात्रेदरम्यान भाविकांच्या सोयीसाठी जिल्हा परिषदेमार्फत फिरती शौचालये, आरोग्य सेवा, मुबलक शुध्‍द पाणीपुरवठा, विजपुरवठा, सीसीटिव्‍ही कॅमेरे, पशुसंवर्धनासाठी दवाखाने, ॲम्बुलन्स आदी सर्व आवश्यक सुविधा उपलब्ध करून देण्यात आल्या असल्याचेही त्यांनी यावेळी सांगितले. प्रारंभी माळेगाव यात्रा नियोजन पोस्टरचे मुख्य कार्यकारी अधिकारी यांच्या हस्ते विमोचन करण्यात आले. त्यानंतर पशुसंवर्धन विभागाची चित्रफीत दाखविण्यात आली. यावर्षी कृषी व पशुसंवर्धन विभागाच्या विविध स्पर्धांमधील बक्षिसांच्या रकमेत लक्षणीय वाढ करण्यात आल्याची माहितीही यावेळी मुख्‍य कार्यकारी अधिकारी मेघना कावली यांनी दिली. 

चौकट

माळेगाव यात्रेत नागरिकांनी मोठ्या संख्येने सहभागी व्हावे, जिल्हा परिषदेमार्फत उभारण्यात आलेल्या कृषी व पशुसंवर्धन प्रदर्शनास भेट देऊन यात्रेचा आनंद घ्यावा, असे आवाहन मुख्य कार्यकारी अधिकारी मेघना कावली यांनी केले.

000000

  वृत्त क्रमांक 1304

जिल्हा रुग्णालयात हृदयरोग निदान व आरोग्य शिबीर संपन्न

शिबिरात 181 बालकांची तपासणी तर 75 पात्र बालकांवर किम्स हॉस्पिटल ठाणे येथे लवकरच मोफत हृदय शस्त्रक्रिया

नांदेड दि. 16 डिसेंबर :-  राष्ट्रीय बाल स्वास्थ कार्यक्रमांतर्गत 15 डिसेंबर रोजी 2 डी इको तपासणी शिबिरात हृदयाचे आजार असलेल्या बालकांची 2 डी इको तपासणी जिल्हाधिकारी राहुल कर्डिले, जिल्हा परिषदचे मुख्य कार्यकारी अधिकारी श्रीमती मेघना कावली यांच्या मार्गदर्शनाखाली श्री गुरु गोबिंद सिंघजी स्मारक, जिल्हा  रुग्णालय, नांदेड येथे आयोजीत करण्यात  करण्यात आली होती. या शिबिरात जिल्ह्यातील एकूण 181 बालकांची तपासणी करण्यात आली असून, किम्स हॉस्पिटल, ठाणे  येथे एकूण  75 पात्र बालकांची मोफत हृदय शस्त्रक्रिया डिसेंबर महिन्यात करण्यात येणार आहे. 

जिल्ह्यातील सर्व प्रसूती केंद्रामध्ये जन्माला येणाऱ्या बालकाची, प्रसूतीदरम्यान निर्माण झालेल्या गुतागुंतीमुळे ज्यांना एसएनसीयुमध्ये उपचार घेत असलेल्या नवजात बालकांची, आशांमार्फत गृहभेटी दरम्यान आढळून आलेल्या बालकांची व राष्ट्रीय बाल स्वास्थ कार्यक्रमांतर्गत बालकांची तपासणी दरम्यान त्याच्यातील जन्मजात व्यंग ओळखण्यासाठी तपासणी व आवश्यकतेनुसार उच्य उपचारासाठी डीईआईसी (District early intervention centre- जिल्हा शीघ्र हस्तक्षेप केंद्र) येथे संदर्भ सेवा देण्यात येतात. सदरील डीईआईसी अंतर्गत विविध स्तरावरून संदर्भित लाभार्थ्यांच्या 4 D's विशेषतः  नवजात बालकांमधील आढळून येणारे व्यंग (Birth Defects)  लहान मुलांमधील आजार, जीवनसत्वांच्या कमतरतेमुळे होणारे आजार (Deficiencies) व वाढीच्या समस्या (Developmental Delay) इत्यादी प्रकारच्या 4 D's चे वेळेवर निदान करून त्यांच्यावर योग्य औषधोपचार करण्यात येतात व गरजेनुसार संदर्भ सेवा उपलब्ध करून देण्यात येते.  

या शिबिरासाठी जिल्हा शल्यचिकित्सक डॉ. संजय परके, निवासी वैद्यकीय अधिकारी, राजाभाऊ बुट्टे, अतिरिक्त जिल्हा शल्यचिकित्सक डॉ. पांडुरंग पावडे, एनसीडी नोडल अधिकारी हनुमंत पाटील, जिल्हा रुग्णालयाचे आरएमओ डॉ.साखरे, डॉ.पुष्पा गायकवाड, मेट्रन सुनीता राठोड यांच्या नेतृत्वात्वाखाली हृदयाचे आजार असलेल्या बालकांची २ डी इको तपासणी करण्यात आली. ही तपासणी किम्स हॉस्पिटल, ठाणे येथील लहान मुलांचे तज्ज्ञ डॉ. श्रीनिवासन एल. व डॉ.सोनिया कारापुरकर सुप्रसिद्ध बालहृदयरोग तज्ञ या विशेषतज्ज्ञांच्या मार्फत पार पडले. या शिबिराच्या यशस्वीतेसाठी अनिल कांबळे आरबीएसके जिल्हा समन्वयक, एफएलसी अश्फाक शेख, संपूर्ण आरबीएसके वैद्यकीय अधिकारी, कर्मचारी, डीईआयसी मधील अधिकारी कर्माचारी, जिल्हा रुग्णालयातील इंचार्ज सिस्टर सर्व कर्मचारी यांनी परिश्रम घेतले.

00000

 वृत्त क्रमांक 1303

18 डिसेंबर रोजी अल्पसंख्यांक हक्क दिवस  

नांदेड दि. 16 डिसेंबर :- महाराष्ट्र राज्य अल्पसंख्यांक आयोगाकडून 18 डिसेंबर  हा दिवस “अल्पसंख्यांक हक्क दिवस” म्हणून साजरा करण्यात येतो. राज्य अल्पसंख्याक आयोगामार्फत राबविण्यात येणाऱ्या केंद्र व राज्य शासनाची माहिती सर्व नागरिकांपर्यत पोहचावी या उद्देशाने 18 डिसेंबर 2025 रोजी अल्पसंख्याक दिवस विविध उपक्रम राबवून साजरा करण्याबाबत निर्देश जिल्हाधिकारी कार्यालयाकडून देण्यात आले आहेत.  

अल्पसंख्याक नागरिकांना त्यांच्या घटनात्मक व कायदेशीर हक्कांची जाणीव / माहिती होण्यासाठी विविध कार्यक्रम आयोजित करण्यात यावेत. जिल्ह्यातील शाळा व महाविद्यालयामध्ये अशासकीय समाजसेवी संस्थाच्या मदतीने सामाजिक कार्यकर्ते, स्वयंसेवी गट व विद्यार्थी यांच्यासाठी विविध कार्यक्रम आयोजित करण्यात यावेत. यात भित्तीपत्र स्पर्धा, वक्तृत्व स्पर्धा, निबंध स्पर्धा, कार्यक्रमातील विजेत्यांना पारितोषिके, व्याख्यानमाला, चर्चासत्र, परिसंवाद इत्यादीचा समावेश असावा. तसेच अल्पसंख्याक विकास विभागाचे 10 डिसेंबर 2025 रोजीची परिपत्रकातील सूचनानुसार कार्यक्रमांचे आयोजन करावे तसेच कार्यक्रमाचे आयोजन करताना आदर्श आचारसंहितेचा भंग होणार नाही याची दक्षता घ्यावी  व केलेल्या कार्यवाहीचा अहवाल शासनास सादर करावा. जिल्ह्यात सर्व विभाग प्रमुखांनी हा उपक्रम व्यापक प्रमाणात राबविण्यात यावा  असे, जिल्हाधिकारी कार्यालयाकडून निर्देशीत करण्यात आले आहे.

00000