वृत्त क्रमांक 407

जिल्हास्तरीय महिला लोकशाही दिनाचे सोमवारी आयोजन 

नांदेड, दि. 19 एप्रिल :- जिल्हास्तरीय महिला लोकशाही दिन सोमवार 21 एप्रिल 2025 रोजी सकाळी 11 वा. जिल्हाधिकारी नांदेड यांच्या अध्यक्षतेखाली महसुल प्रबोधनी (प्रशिक्षण केंद्र) एसबीआय एटीएमच्या मागे जिल्हाधिकारी कार्यालय परिसर नांदेड येथे आयोजित केला आहे.

 

शासन निर्णय 4 मार्च 2013 नुसार राज्यात सर्व जिल्हयात दर महिन्याच्या तिसऱ्या सोमवारी महिला लोकशाही दिन जिल्हाधिकारी यांच्या अध्यक्षतेखाली साजरा करण्यात येतो. जर या दिवशी सार्वजनिक शासकीय सुट्टी असल्यास त्यानंतर येणारा कामकाजाचा दिवस, महिला लोकशाही दिन म्हणून पाळण्यात येईल असे आदेशित केले आहे.

 

संबंधित समितीचे सदस्य व शासन निर्णयात नमुद संबंधित विभागाचे अधिकारी यांनी उपस्थीत रहावे. तसेच समस्याग्रस्त व पिडीत महिलांनी महिला लोकशाही दिनी आपले अर्ज विहीत नमुन्यात सादर करावेत. असे आवाहन महिला लोकशाही दिन समितीचे अध्यक्ष तथा जिल्हाधिकारी नांदेड यांनी व सदस्य सचिव तथा जिल्हा महिला व बालविकास अधिकारी नांदेड यांनी केले आहे.

00000

अण्णासाहेब पाटील आर्थिक मागास विकास महामंडळ #योजना

#नांदेड

18.4.2025

 महत्वाचे वृत्त क्रमांक 406

जागतिक वारसा दिनाच्या पर्वावर चालुक्यकालीन येरगी व होट्टल येथे कार्यक्रम 

 हेरिटेज वॉक आणि भारत नाट्यमचे सादरीकरण 

नांदेड दि.१८ एप्रिल : मागे दगडात कोरलेल्या चालुक्य शिल्पशैलीच्या विविधांगी रेखीव कलाकृती आणि त्यापुढे भरतनाट्यमशैलीत हेरिटेज वॉक, अशा आयोजनात आज जागतिक वारसा दिनानिमित्त जिल्ह्यातील सर्वोत्तम प्राचीन कलाकृती असणाऱ्या येरगी येथे विशेष हेरिटेज वॉकचे आयोजन करण्यात आले होते.आपल्या वारसाबद्दलच्या या जनजागृती कार्यक्रमाला गावकऱ्यांनी उत्स्फूर्त प्रतिसाद दिला.

पूरातत्व व वस्तुसंग्रहालय संचालनालय नांदेड विभाग, ग्रामपंचायत कार्यालय येरगी, तालुका देगलूर तसेच जिल्हा प्रशासन नांदेड यांच्या संयुक्त विद्यमाने जागतिक वारसा दिनाला या कार्यक्रमाचे आयोजन करण्यात आले होते.

आज सकाळी सहा वाजता या कार्यक्रमाला सुरुवात झाली. स्वामी रामानंद तीर्थ मराठवाडा विद्यापीठात कार्यरत असणाऱ्या दीप्ती शंकरराव उबाळे यांच्या मार्गदर्शनातील भरतनाट्यम चमूने प्रथम येरगी ग्राम व नंतर होट्टल येथील या जगप्रसिद्ध वारशापुढे आपले अप्रतिम सादरीकरण केले.

या ठिकाणच्या सर्व मंदिराच्या परिसरात पुरातत्व विभागाच्या अधिकाऱ्यांसोबत या क्षेत्रांमध्ये आवड असणाऱ्या मान्यवरांच्या उपस्थितीत हेरिटेज वॉक घेण्यात आला.येरगी गावामध्ये प्रभात फेरीसारखे या हेरिटेज वॉकचे स्वागत झाले. अनेक क्षेत्रातील मान्यवर यावेळी सहभागी झाले होते. यावेळी महिलांचा सहभाग उल्लेखनीय होता.पुरातत्त्व विभागाचे समन्वयक कामाजी डक, पुरातत्त्व विषय तज्ञ सुरेश जोंधळे,वास्तुविशारद कासार पाटील,नायब तहसीलदार मकरंद दिवाकर,कलाशिक्षक गजानन सुरकुटवार व नंदगिरीचे किल्लेदार यांच्यासह अनेक मान्यवर सहभागी झाले होते.

होट्ट्लचे वैशीष्टय 

चालुक्य शिल्पशैलीचा अप्रतिम अविष्कार म्हणजे होट्टल. चालुक्य शिल्पशैलीचा वारसा देगलूर तालुक्यातील होट्टल या चालुक्य नगरीने जोपासलेला आढळतो. इसवीसणाच्या अकराव्या शतकात कल्याणीच्या चालुक्यांचा प्रभाव नांदेड परिसरावर होता. तेव्हाची पोट्टलनगरी म्हणजे आजचे होट्टल हे गाव.त्यांच्या राज्यातले महत्त्वाचे ठाणे.

या ठिकाणी अकराव्या, बाराव्या व तेराव्या शतकातले चार शिलालेख सापडले आहेत. त्या काळातला अप्रतिम कलाविष्कार पाहायचा तो इथल्या सिद्धेश्वर मंदिराच्या बाह्य भिंतीवरील कलादालनातून. सिद्धेश्वर मंदिर गावच्या पश्चिमेला असून मंदिराची रचना ताराकृती आहे. समोर मुख्य मंडप आणि दोन्ही बाजूस अर्ध मंडप आहे. मधोमध कलात्मक सभा मंडप आहे. येथील नदी मंडपात असलेल्या शिलालेखावरून या मंदिराची प्राचीन रचना लक्षात येते. हा शिलालेख सहाव्या विक्रमादित्याच्या काळातील आहे. शिलालेखाच्या माध्यमातून त्या काळातील ऐतिहासिक संदर्भ कळतात.

दगडात कोरलेल्या शिल्पातून ज्यांना कविता सुचवू शकतात. अशा अभ्यासू पर्यटकांना, लिपीच्या अभ्यासकांना हजार आठशे वर्षांपूर्वीचे संस्कृत भाषेतले कन्नड व मराठी लिपीत कोरले गेलेले अनेक शिलालेख या परिसरात आपल्याकडे खेचून नेतात. चालुक्य काळातील सर्वात मोठे हिस्टॉरिकल डॉक्युमेंटेशन, नांदेड मध्ये झाले आहे. येरगी ग्रामपंचायतीने पुढाकार घेत ,येरगी चालुक्यकालीन सांस्कृतिक झरा, या कॉफीटेबल बुकची निर्मिती केली. अशा प्रकारे वारसा जपणारी येरगी ही भारतातील पहल करणारी पहिली ग्रामपंचायत आहे.नांदेड जिल्ह्यात चालुक्यकालीन 40 शिलालेख आहेत. एकूण शिलालेखन पैकी चार शिलालेख येरगी येथे पाहायला मिळतात.

0000

18.4.2025

 वृत्त क्रमांक 405

गावागावांमध्ये पाणी वाटपसंस्थांशी जलसंपदा विभागाचा गावभेटीतून संवाद 

नांदेड दि. १८ एप्रिल : जलसंपदा विभागामार्फत जल व्यवस्थापन पंधरवाडा अंतर्गत 18 एप्रिल ला गावागावांमध्ये ज्या ठिकाणी पाणी वाटप संस्था आहे त्या ठिकाणी अंतर्गत सभा घेऊन सदस्यांना पाणी वाटप संस्थेचे आणि पाण्याचे महत्व व त्या संदर्भातील नव्या धोरणांची माहिती देण्याचा उपक्रम आज संपूर्ण जिल्ह्यामध्ये राबविण्यात आला.

महाराष्ट्र शासन जलसंपदा विभाग नांदेड पाटबंधारे मंडळ, नांदेड जलव्यवस्थापन कृती पंधरवडा - २०२५ निमित्त अधीक्षक अभियंता अ.आ. दाभाडे पालक अभियंता तथा पालक अभियंता नांदेड जिल्हा यांच्या मार्गदर्शनाखाली सुरू झालेल्या विविध कार्यक्रमाच्या आयोजनाच्या पंधरवड्या अंतर्गत दि. १८ एप्रिल शुक्रवार रोजी "शेतकरी व पाणी वापर संस्था संवाद" या विषयी नांदेड पाटबंधारे मंडळ नांदेड अंतर्गत सर्व कार्यालयामध्ये कार्यक्रम संपन्न झाले. 

पाटबंधारे विभाग नांदेड अंतर्गत असलेल्या नायगाव, भोकर व किनवट येथे  कार्यालय व इतर ठिकाणी शेतकरी संवाद बैठक पार पडली.या निमित्ताने पाणी वापर संस्था व शेतकरी यांच्या विविध तक्रारीचें निराकरण करण्यात आले. तसेच आवर्तन काळातील अडचणींवर चर्चा करताना  अधिकारी कर्मचारी उपस्थित होते.

पाणी वाटप संस्थेची सक्रियता शेतकरी आणि प्रशासन या दोन्ही संस्थांना बळकटी देणारी आहे त्यामुळे या संस्थेच्या गुणात्मक विकासाकडे आणि उद्दिष्ट पूर्ण कार्याकडे लक्ष वेधण्याचे आवाहन यावेळी सहभागी अधिकाऱ्यांनी केले.

0000

 

 

 वृत्त क्रमांक 404

दिव्यांग, पॅरा बॅडमिंटनपटू लताताई उमरेकर

यांना शिवछत्रपती राज्य क्रीडा पुरस्कार जाहीर

नांदेड दि. 17 एप्रिल :- दिव्यांग, पॅरा बॅडमिंटनपटू लताताई उमरेकर यांना शिवछत्रपती राज्य क्रीडा पुरस्कार जाहीर झाला आहे. शुक्रवार 18 एप्रिल रोजी सकाळी 11 वा. शिवछत्रपती क्रीडा संकुल बालेवाडी, पुणे येथे त्यांना हा सन्मान बहाल केला जाणार आहे. 

लताताई उमरेकर यांनी जापान, थायलंड, दुबई, युगांडा याठिकाणाच्या आंतरराष्ट्रीय स्पर्धेमध्ये भारताचे पॅरा जागतिक स्पर्धामध्ये प्रतिनिधीत्व केले आहे. तसेच भुवनेश्वर, दिल्ली, झारखंड या ठिकाणी राष्ट्रीय स्तरावरील स्पर्धामध्ये भाग घेतला आहे. त्यांना क्रीडा विभागात महाराष्ट्र शासनाने थेट नियुक्ती दिली आहे.  

नांदेड जिल्ह्यातील या क्रीडा पटूचे या पुरस्कारासाठी जिल्हाधिकारी राहुल कर्डिले, जिल्हा क्रीडा अधिकारी जयकुमार टेंमरे यांच्यासह सर्व मान्यवरांनी स्वागत केले आहे. त्यांचे प्रशिक्षक किरण माने व चेतन माने यांनी देखील या उपलब्धीसाठी त्यांचे कौतुक केले आहे. 

0000

 वृत्त क्रमांक 403

मुक्या जनावरांना उन्हाळयात वारंवार पाणी द्या

गाढवांना दुपारी 12 ते 3 वेळेत कामाला गुंतवू नका !

                                                                                                                                                                       नांदेड दि. 17 एप्रिल :-यावर्षी कडक उन्हाळा असून पाळीव प्राण्याबद्दल विशेष काळजी घेण्याचे आवाहन प्रशासनाने केले आहे. विशेषत: विटभट्यावर काम करणारे गाढव, घोडा व खच्चर यांना अधिक वजन व भर उन्हात काम न देण्याचे तसेच दर दोन तासांनी उन्हामध्ये पाणी देण्याबाबत पशुसंवर्धन विभागाने सर्व विटभट्या मालकांना तसेच मालवाहतूक करणाऱ्या वाहकांना आवाहन केले आहे. 

                                                                                                                                                                    मुक्या जनावरांना काय त्रास होतो हे त्यांना सांगता येत नाही. त्यामुळे त्यांच्या विरुध्द कोणतीही क्रुरता होवू नये यांची काळजी घेणे आवश्यक आहे. भारतीय जीवजंतु कल्याण बोर्ड या संस्थेने वीट भट्यावर काम करणाऱ्या गाढव, घोडा व खच्चर या प्राण्यासाठी मार्गदर्शीका निर्गमित केली आहे. तसेच प्राणी क्रुरता प्रतिबंधक कायदा सन 1960 यामध्ये देखील यासंदर्भात स्पष्ट सूचना दिल्या असून ज्या ठिकाणी तापमान 37 अंशापेक्षा अधिक आहे त्याठिकाणी 12 ते 3 या वेळेत गाढवांना व अन्य प्राण्यांना काम करण्यास प्रतिबंध करण्यात आला आहे. उष्ण हवामानात काम केल्याने मानवाप्रमाणे शरीरातील पाणी कमी होणे, उष्णतेचा ताण, पाठदुखी या समस्या गाढवांमध्ये अभ्यासाअंती दिसून आले आहे. 

71 टक्के प्राणी उन्हाळयामध्ये कमी पाणी पिल्यामुळे आजारी होत असल्याचे दिसून आले आहे. त्यामुळे गाढवांना वारंवार पाणी पाजणे आवश्यक आहे. तसेच काम करताना थोडया थोडया वेळाने त्यांना आराम देणे आवश्यक आहे. सतत 5 तास अधीक काम करुन घेणे निदर्यी वागणूक असून क्रुरतेचे लक्षण आहे. 

त्यामुळे प्रशासनाच्या या निर्णयाकडे पशुपालकांनी गाढवांच्या मालकांनी लक्ष वेधावे यासंदर्भात काम करणाऱ्या संघटना तसेच सुशिक्षित तरुणांनी मुक्या जनावरांच्या या समस्याकडे लक्ष वेधावे, असे आवाहन जिल्हाधिकारी तथा प्राणी क्लेश प्रतिबंधक सोसायटीचे अध्यक्ष राहुल कर्डिले यांनी केले आहे. 

00000