श्री गुरूग्रंथसाहिब भवन येथे

भव्य प्रमाणात आंतरराष्ट्रीय योगा दिवस साजरा  

 

नांदेड (जिमाका) दि. 21 :- निरोगी आयुष्यासाठी योगाची साधना आवश्यक असून हा संदेश सर्व सामान्यापर्यत पोहचावा व नागरिकांनी अधिकाधिक आपल्या निरोगी आरोग्यासाठी योगाकडे वळावे या उद्देशाने आज श्री गुरूग्रंथसाहिब भवन नांदेड येथे आठवा आंतराष्ट्रीय योग दिवस साजरा करण्यात आला. नांदेड जिल्हा प्रशासन, पतंजली योग समिती, विविध संस्था यांच्या सहभागातून भव्य प्रमाणात साजरा झालेल्या या आंतरराष्ट्रीय योग दिनाच्या कार्यक्रमास प्रमुख अतिथी म्हणून खासदार प्रताप पाटील चिखलीकर, जिल्हाधिकारी डॉ. विपीन इटनकर, जिल्हा परिषदेचे मुख्य कार्यकारी अधिकारी वर्षा ठाकुर-घुगे, शिक्षणाधिकारी प्रशांत दिग्रसकर, सौ. सविता बिरगे, गुरुद्वाराचे सहाय्यक अधिक्षक हरजितसिंग कडेवाले, डॉ. हंसराज वैद्य, जिल्हा क्रीडा अधिकारी आर. एस. मारावार, पंतजली योग समितीचे योग प्रसारक अनिल अमृतवार, आदी मान्यवर उपस्थित होते.

 

भारतीय स्वातंत्र्याच्या अमृत महोत्सवी वर्षाचे औचित्य साधून हा योगदिन अधिकाधिक व्यापक करण्यात आला. जिल्हाभर योगाभ्यासाच्या माध्यमातून सुदृढ आरोग्याचा संदेश पोहचावा व सहज करता येण्या योग्य अशा या महत्वपूर्ण आरोग्य साधनेशी लोक जुळावेत या उद्देशाने जिल्हा प्रशासनाच्यावतीने या योग दिवसासाठी भव्य तयारी करण्यात आली होती. पंतजली योग समिती यांनी पुढाकार घेतलेल्या या समारंभास गुरुद्वारा बोर्डने सहकार्य केले. योगअभ्यासक अनिल अमृतवार यांनी उपस्थितांकडून योगाप्रात्याक्षिकाचे धडे दिले. आयुष मंत्रालयाने दिलेल्या शिष्टाचारानुसार योगक्रियेचा समावेश करण्यात आला होता. या समारंभात गुजराथी हायस्कुल, राष्ट्रीय गांधी हिंदी विद्या मंदिर, जिल्हा परिषद मुलींचे हायस्कूल, मनपा प्राथमिक शाळा, खालसा हायस्कूल, सचखंड पब्लिक स्कूल, आंध्रा समिती हायस्कूल या शाळेचे विद्यार्थी, एनसीसी स्काउट गाईडचे विद्यार्थी, विविध क्रीडा संघटनेचे प्रतिनिधी व राज्य आपत्ती प्रतिसाद दलाचे जवान यांनी सहभाग घेतला. कार्यक्रमाचे सूत्रसंचालन महारुद्र माळगे यांनी केले.

0000 

 23 जून रोजी आंतरराष्ट्रीय ऑलिंपिक 

दिनानिमित्त विविध कार्यक्रमाचे आयोजन

 

नांदेड (जिमाका) दि. 21 :-  आंतरराष्ट्रीय ऑलिंपिक समितीची 23 जून 1894 रोजी स्थापना झाली. या दिवसाच्या स्मरणात आंतरराष्ट्रीय ऑलिंपिक दिवस व सप्ताह साजरा केला जातो. खेळाडूंना सर्वोकृष्ट बनविण्यासाठी ऑलिंपिक दिवस साजरा करण्यात येतो. चालू वर्षे हे भारताचे अमृत महोत्सवी वर्षे म्हणुन साजरा करण्यात येत आहे. जिल्हा क्रीडा अधिकारी कार्यालय व नांदेड-वाघाळा शहर महानगरपालिका व ऑलिंपिक असोसिएशन नांदेड यांच्या संयुक्त विद्यमाने जिल्ह्यात आंतरराष्ट्रीय ऑलिंपिक दिन व सप्ताह कार्यक्रम साजरा करण्यात येणार आहे.

 

नांदेड जिल्हयात आंतरराष्ट्रीय ऑलिंपिक दिन व सप्ताह 23 जून ते 28 जून या कालावधीत साजरा करण्यात येणार आहे. या सप्ताहानिमित्त 23 जून रोजी सदृढ भारत ऑलिंपिक दौड, 24 जून रोजी सायकल रॅली, 25 जून  रोजी निबंध स्पर्धा- भारत ऑलिंपिकमध्ये काल, आज आणि उद्या, 26 जून रोजी चित्रकला स्पर्धा- भारतीय पुरातन खेळ व ऑलिंपिक, 27 जून,2022 रोजी विविध खेळांच्या जिल्हास्तर स्पर्धाचे आयोजन, 28 जून 2022 वक्तृत्व स्पर्धा- भारतीय ऑलिम्पीयन भूतकाळ, वर्तमानकाळ व भविष्यकाळ, 29 जून रोजी ऑलिंपिक मशाल रॅली व या उपक्रमात सहभागी झालेल्या खेळाडूंना बक्षिस वितरण, प्रमाणपत्र वितरण, पदक विजेत्या खेळाडूंचा सत्कार व समारोप कार्यक्रमाचे आयोजन करण्यात आले आहे.

 

नांदेड शहरातील शाळा / महाविद्यालयातील प्रत्येकी 50 खेळाडू मुले / मुली, विद्यार्थी शारीरिक शिक्षकासह या कार्यक्रमास उपस्थित राहावे. अधिक माहितीसाठी बालाजी जोगदंड पाटील 9420673394, 7020815826 व श्रीमती शिवकांता देशमुख (राज्य क्रीडा मार्गदर्शक) 9657092794 यांचेशी संपर्क साधावा, असे आवाहन जिल्हा क्रीडा अधिकारी राजेश्वर मारावार यांनी केले आहे.

 00000

 हमखास नोकरीची संधी देणाऱ्या तंत्रनिकेतनची प्रवेश प्रक्रिया सुरु 

नांदेड (जिमाका) दि. 21 :- दहावी उत्तीर्ण झालेल्या विद्यार्थ्यांसाठी तंत्रनिकेतन प्रथम वर्ष व बारावी, आयटीआय उत्तीर्ण विद्यार्थ्यांसाठी थेट व्दितीय वर्ष तंत्रनिकेतन प्रवेश प्रक्रिया सुरु झाली असुन ही प्रक्रिया तंत्रशिक्षण संचालनालय महाराष्ट्र राज्य यांच्यामार्फत राबविण्यात येत आहे.  दहावी उत्तीर्ण झाल्यानंतर हमखास यशाचा मार्ग म्हणजे तंत्रनिकेतन होय त्यातुन उत्तीर्ण होणा-या विद्यार्थ्यांना रोजगाराच्या व उद्योगाच्या असंख्य संधी उपलब्ध आहेत, म्हणुन विद्यार्थ्यांनी तंत्रनिकेतनमध्ये प्रवेश घ्यावा, असे प्रतिपादन तंत्रशिक्षण संचालनालयाचे संचालक डॉ. अभय वाघ यांनी केले आहे. 

 

दहावीच्या गुणांवर तंत्रनिकेतनमध्ये प्रथम वर्षास व बारावी, आयटीआय उत्तीर्ण विद्यार्थ्यांना थेट व्दितीय वर्षास प्रवेश दिला जातो. त्यामुळे कमी कालावधीमध्ये एक उत्तम करिअर निर्माण करण्याची संधी विद्यार्थ्यांना मिळते. तंत्रनिकेतन मधील व्यावसायिक अभ्यासक्रम उत्तीर्ण झाल्यानंतर नोकरी किंवा व्यवसाय सुरु करता येतो. रेल्वे, संरक्षण दले, आरटीओ, भेल, महावितरण, दुरसंचार विभाग, पाटबंधारे विभाग, तंत्र शिक्षण विभाग इ. सरकारी, निमसरकारी क्षेत्राबरोबरच वाढत्या औद्योगिकीकरणाच्या आधुनिक काळात तंत्रनिकेतनमधुन उत्तीर्ण होणा-या विद्यार्थ्यांना खाजगी उद्योगक्षेत्रामध्ये रोजगाराच्या अनेक संधी उपलब्ध आहेत. तसेच बी.टेक, बी.ई., बी.आर्किटेक्चर, बी.एस्सी व्होकेशनल, बीबीए अशा  व इतर पदवी अभ्यासक्रमास प्रवेश घेण्यासही विद्यार्थी पात्र ठरतो. अंतिम वर्षात शिकणा-या विद्यार्थ्यांना परिसर मुलाखती मधुन विविध नामांकित कंपन्यातर्फे नोकरीची संधी दिली जाते. मागील वर्षी मराठवाडयातील ग्रामीण व शहरी भागातील जवळपास 1130 विद्यार्थ्यांची निवड परिसर मुलाखती मार्फत झालेली आहे, अशी माहिती सहसंचालक श्री.उमेश नागदेवे, तंत्रशिक्षण विभाग, औरंगाबाद यांनी दिली आहे. 

          

औरंगाबाद विभागात शासकीय व अशासकीय असे एकुण 57 तंत्रनिकेतने असुन त्यांची 15,040 विद्यार्थी प्रवेश क्षमता आहे. तंत्रनिकेतन मध्ये  प्रवेश घेणारा विद्यार्थी हा प्रामुख्याने ग्रामीण भागातील तसेच मराठी माध्यमातील असल्यामुळे विद्यार्थ्यांना परिक्षा व अध्ययन अध्यापनासाठी मराठी माध्यमाचाही पर्याय उपलब्ध करुन देण्यात आला आहे. महाराष्ट्र शासनाने यावर्षीपासुन नियमात केलेल्या बदलानुसार कोणत्याही शाखेतुन आयटीआय उत्तीर्ण झालेला विद्यार्थी हा तंत्रनिकेतनमधील थेट द्वितिय वर्षाच्या सर्व शाखांसाठी पात्र राहील. विद्यार्थ्यांच्या सोईसाठी तिस-या अतिरिक्त प्रवेश फेरीचा अंतर्भाव या वर्षी पासून प्रवेश प्रक्रिेयेत करण्यात आला आहे. कोव्हिडमुळे ज्या विद्यार्थ्यांनी आपले आई व वडील गमावले आहेत व ज्यांच्याकडे " पीएम केअर्स  प्रमाणपत्र " आहे अशा विद्यार्थ्यांसाठी दोन अतिरिक्त जागा अभ्यासक्रमनिहाय राखीव ठेवण्यात आलेल्या आहेत. 

 

तंत्रनिकेतनमध्ये केंद्रीभुत प्रवेश प्रक्रियेतुन प्रवेश मिळणा-या विद्यार्थ्यांना शासनाच्या विविध शिष्यवृत्ती योजनांचा लाभ घेता येईल. प्रवेशासाठी लागणा-या विविध कागदपत्रांची पूर्तता होण्याच्या दृष्टीने डॉ.अभय वाघ संचालक तंत्रशिक्षण यांनी प्रत्येक जिल्हातील जिल्हाधिकारी यांना पत्राव्दारे प्रवेशासाठी आवश्यक ती कागदपत्रे तात्काळ उपलब्ध करुन देण्यासाठी विनंती केली आहे. 

 

या वर्षीची तंत्रनिकेतन प्रवेश प्रक्रिया सुरु झाली असुन विद्यार्थ्यांना ई-स्क्रुटीनी आणि प्रत्यक्ष स्क्रुटीनी पैंकी एका सुविधेचा पर्याय निवडून अर्ज भरता येईल. औरंगाबाद विभागात शहरी व ग्रामीण भागात 50 प्रवेश सुविधा केंद्र सुरु करण्यात आले असुन त्याठिकाणी विद्यार्थ्याला प्रवेश प्रक्रियेचे सविस्तर मार्गदर्शन तसेच नोंदणी अर्ज भरण्याची मोफत सुविधा करण्यात आली आहे. या सुविधांचा पालक व विद्यार्थ्यांनी लाभ घ्यावा, असे आवाहन सहसंचालक श्री.उमेश नागदेवे, तंत्रशिक्षण विभाग, औरंगाबाद यांनी केले आहे. प्रवेश प्रक्रियेच्या सविस्तर माहिती व प्रवेश नोंदणी अर्जासाठी https://poly22.dte.maharashtra.gov.in/diploma22/ या संकेतस्थळावर भेट द्यावी. तसेच अधिक माहितीसाठी दुरध्वनी क्रमांक 0240-2334216, 2334769 या क्रमांकावर संपर्क साधावा., असे आवाहन करण्यात आले आहे.

00000                                            

 जिल्हा विधी सेवा प्राधिकरण कार्यालयात

आंतरराष्ट्रीय योग दिन साजरा   

 

नांदेड (जिमाका) दि. 21 :- जिल्हा विधी सेवा प्राधिकरण कार्यालय नांदेड येथे आंतरराष्ट्रीय योग दिनानिमित्त  उत्साहात योगाभ्यास करण्यात आला. महाराष्ट्र राज्य विधी सेवा प्राधिकरण, मुंबई  यांच्या आदेशान्वये प्रमुख जिल्हा न्यायाधीश श्रीकांत ल. आणेकर यांच्या मार्गदर्शनाखाली आज सकाळी 7 वा. हा योगाभ्यास वर्ग घेण्यात आला. या कार्याक्रमासाठी योग शिक्षीका श्रीमती नंदीनी व प्रा. सुरेखा  घोगरे यांनी योगाभ्यास घेतला.

 

जिल्हा न्यायाधीश-1 एस. ई. बांगर, अति. जिल्हा न्यायाधीश ए.आर.धामेचा साहेब, मुख्य न्यायदंडाधिकारी श्रीमती के. पी. जैन, जिल्हा विधी सेवा प्राधिकरणाच्या सचिव तथा न्यायाधीश श्रीमती डी. एम. जज, 4 थे दिवाणी न्यायाधीश क.स्तर श्रीमती बी.एम.एन.देशमुख मॅडम, यांनी यात सहभाग घेऊन योगाभ्यास केला. योगसाधक श्रीमती नंदीनी व घोगरे यांनी योग दिनाच्या निर्देशानुसार योगाभ्यास घेतला. या कार्यक्रमाचे सूत्रसंचालन बी. एम. गायकवाड यांनी केले तर आभार मुख्य न्यायदंडाधिकारी श्रीमती के. पी. जैन यांनी मानले. कार्यक्रमाच्या यशस्वितेसाठी योग शिक्षक विधीज्ञ एच.आर.जाधव, विधीज्ञ कानोटे, नयुमखान पठाण, एस. ए. सौंदनकर, डी. जी. राठोड व न्यायालयाचे कर्मचारी उपस्थित होते.

0000

 नांदेड जिल्ह्यात पाच व्यक्ती कोरोना बाधित   

नांदेड (जिमाका) दि. 21 :- जिल्ह्यात आज प्राप्त झालेल्या  168 अहवालापैकी आरटीपीसीआर तपासणीद्वारे 5 अहवाल कोरोना बाधित आले आहेत. जिल्ह्यात आजवर एकुण बाधितांची संख्या 1 लाख 2 हजार 828 एवढी झाली असून यातील 1 लाख 127 रुग्णांना उपचारा नंतर बरे झाल्याने रुग्णालयातून सुट्टी देण्यात आली आहे. आजच्या घडीला 9 रुग्ण उपचार घेत आहेत.

 

जिल्ह्यातील कोरोनाचा प्रादुर्भाव कमी करण्यासाठी सेवाभावी संस्था, प्रतिनिधी आणि जागरुक नागरिकांनी आरोग्य जागराच्या चळवळीत सहभाग घ्यावा. याचबरोबर मास्क, सॅनिटायझर, सुरक्षित अंतर आणि लसीकरण याबाबत व्यापक जनजागृती करुन अनावश्यक घराबाहेर पडणे टाळावे, असे आवाहन जिल्हाधिकारी डॉ. विपीन इटनकर यांनी केले आहे.

 

जिल्ह्यात आतापर्यंत बाधित मृत रुग्णांची संख्या 2 हजार 692 एवढी आहे. नांदेड मनपा अंतर्गत गृहविलगीकरणातील तीन रुग्णाला उपचारानंतर बरे झाल्याने सुट्टी देण्यात आली. आजच्या बाधितांमध्ये आरटीपीसीआर तपासणीद्वारे नांदेड मनपा 4, हदगाव 1 असे एकुण 5 कोरोना बाधित आढळले आहेत. नांदेड जिल्ह्यातील तालुक्याअंतर्गत गृह विलगीकरण 4, नांदेड मनपा अंतर्गत गृहविलगीकरणात 5 असे एकुण 9 व्यक्ती उपचार घेत आहेत.

 

जिल्ह्याची कोरोना संशयित व कोविड बाधितांची संक्षिप्त माहिती.

 

एकुण घेतलेले स्वॅब- 9 लाख 6 हजार 340

एकुण निगेटिव्ह स्वॅब- 7 लाख 86 हजार 207

एकुण पॉझिटिव्ह बाधित व्यक्ती- 1 लाख 2 हजार 828

एकूण रुग्णालयातून सुट्टी दिलेली संख्या- 1 लाख 127

एकुण मृत्यू संख्या-2 हजार 692

उपचारानंतर बाधित रुग्ण बरे होण्याचे प्रमाण 97.37 टक्के

आज स्वॅब तपासणी अनिर्णीत संख्या-निरंक

आज स्वॅब नाकारण्यात आलेली संख्या-निरंक

आज प्रलंबित स्वॅब तपासणी संख्या-निरंक

रुग्णालयात उपचार घेत असलेले बाधित व्यक्ती-9

आज रोजी अतिगंभीर प्रकृती असलेले-निरंक.

 

 कोविड विषाणू विरुद्धची लस सुरक्षित असून कोरोनाची लाट पुनः येण्यापासून प्रतिबंध करण्यासाठी कोविड-19 लसीकरण दिर्घकाळ आणि प्रभावी उपाय आहे. “मिशन कवच कुंडल” अंतर्गत 18 वर्षावरील सर्व व्यक्तींनी कोविड लसीकरण करून घ्यावे आणि इतरांनाही लस घेण्यासाठी प्रोत्साहित करावे. ज्या नागरिकांनी कोविडच्या पहिल्या लसीचा डोस घेतला आहे त्यांनी ठराविक कालावधी नंतर दुसऱ्या लसीचा डोस आवश्य घ्यावा, असेही आवाहन करण्यात आले आहे.

0000

 जागतिक पर्यावरण दिन आणि बालकांना मोफत,

सक्तीचे शिक्षण कायद्याविषयक शिबीर संपन्न

नांदेड (जिमाका) दि. 21:-  सामान्य किमान कार्यक्रमातंर्गत वृक्षारोपण करुन त्यांचे संगोपन व संवर्धन व्हावे. तसेच या बाबीची समाजामध्ये जनजागृती होण्यासाठी प्रमुख जिल्हा न्यायाधीश श्रीकांत ल.आणेकर यांच्या मार्गदर्शनाखाली जिल्हा विधी सेवा प्राधिकरण नांदेड व प्रादेशिक वनीकरण विभाग यांच्यावतीने जिल्हा परिषद मुलींची शाळा नांदेड येथे जागतिक पर्यावरण दिन व बालकांना मोफत व सक्तीचे शिक्षण कायदा-2009 याविषयाचे कायदेविषयक शिबीर संपन्न झाले.  

 

या कार्यक्रमाच्या अध्यक्षस्थानी जिल्हा विधी सेवा प्राधिकरणाच्या सचिव श्रीमती डी.एम.जज, प्रमुख पाहुणे प्रादेशीक वनीकरण विभागाचे वनपरिक्षेत्र अधिकारी पांडुरंग धोंडगे यांची उपस्थिती होती. या कार्यक्रमामध्ये जि.प्र. शाळेचे मुख्याध्यापक यांनी बालकांना मोफत व सक्तीचे शिक्षण कायदा-2009 या विषयावर मार्गदर्शन केले. श्री. धोंडगे यांनी वृक्ष लागवड व त्याचे संगोपन व संवर्धनाबाबत मार्गदर्शन केले. श्रीमती जज मॅडम यांनी नैसर्गीक साधन संपत्तीच्या व प्लॉस्टीकचा फार मोठया प्रमाणात होत असलेल्या वापरामुळे मानवी जीवनावर होणाऱ्या दुष्परिणामाबाबत विद्यार्थ्याशी प्रश्नोत्तर  व  व्हीडीओद्वारे मार्गदर्शन केले.  या कार्यक्रमास जिल्हा परिषद शाळेतील इयत्ता 5 वी ते 7 मधील विद्यार्थी, शाळेतील शिक्षकवृंद उपस्थित होते. या कार्यक्रमाचे सुत्रसंचालन नयुमखान पठाण यांनी केले. हा कार्यक्रम यशस्वी करण्यासाठी जि.प.मुलींची शाळा वजीराबाद नांदेड येथील मुख्याध्यापक व सर्व शिक्षक, प्रादेशिक वनीकरण विभागाचे कर्मचारी व जिल्हा विधी सेवा प्राधिकरणाचे कर्मचाऱ्यांनी सहकार्य केले.

0000

 जिल्हा रुग्णालयात आंतरराष्ट्रीय योग दिन संपन्न

नांदेड (जिमाका) दि. 21:-  आज आंतरराष्ट्रीय योग दिनानिमित्त जिल्हा रुग्णालयात जिल्हा शल्य चिकित्सक डॉ.एन.आय.भोसीकर यांच्या मार्गदर्शनाखाली शासकीय प्ररीचर्या प्रशिक्षण केंद्र व आयुष विभागाच्योवतीने आंतरराष्ट्रीय योग दिन साजरा करण्यात आला.

 

कार्यक्रमांचे उद्घाटन अतिरिक्त जिल्हा शल्य चिकित्सक डॉ. संतोष शिरसिकर यांचे हस्ते धन्वंतरी प्रतिमेचे पूजन व दिप प्रज्वलन करून करण्यात आले. यानंतर योगप्रशिक्षक श्रीमती राणी दळवी  यांनी  विविध योगासन व प्राणायाम यांची प्रात्यक्षिक दाखवून उपस्थितांना योगा दिनाचे धडे दिले. तसेच सर्वांनी नियमित योग साधनेवर भर द्यावा असेही त्या यावेळी म्हणाल्या.

 

या कार्यक्रमास  जिल्हा आयुष अधिकारी डॉ. संदेश जाधव, सहाय्यक जिल्हा आयुष अधिकारी डॉ.जव्वाद  खान, शासकीय प्ररीचर्या प्रशिक्षण केंद्राचे प्राचार्य रेणुकादास मैड, डॉ. कैलास चव्हाण, एल टी तुमोड, रानोळकर, छाया कदम, अपर्णा जाधव, अर्चना भोसले तसेच अधिकारी व कर्मचारी उपस्थित होते. या कार्यक्रमाचे प्रास्ताविक सुवर्णकार सदाशिव यांनी केले. आभार प्रदर्शन गायकवाड बालाजी यांनी मानले. या कार्यक्रमाच्या यशस्वीतेसाठी नर्सिंग कॉलेजच्या विद्यार्थिनी परिश्रम घेतले.

00000