वृ.वि.5560                                                                               28 वैशाख, 1939 (सायं.6.15 वा.)                                                                                             दि. 18 मे, 2017

एबीसीची मोहोर

लोकराज्य मराठीतील सर्वाधिक खपाचे मासिक

पुन्हा एकदा सिद्ध

मुंबई दि. 18 : माहिती व जनसंपर्क महासंचालनालयाच्या वतीने प्रकाशित 'लोकराज्य' हे पुन्हा एकदा महाराष्ट्रातील सर्वाधिक खपाचे मासिक ठरले आहे. ऑडिट ब्युरो ऑफ सर्क्युलेशन (एबीसी) ने नुकताच जुलै ते डिसेंबर 2016 चा देशातील सर्व वृत्तपत्रे / नियतकालिके यांच्या अधिकृत खपाचा अहवाल प्रकाशित केला असून यात ही बाब नमूद करण्यात आली आहे. एबीसीच्या यादीत देशातील एकमेव शासकीय नियतकालिक आणि एकमेव मराठी मासिक हा मानही लोकराज्यने पटकाविला आहे. जुलै ते डिसेंबर 2016 या कालावधीत लोकराज्यचा खप 4 लाख 3 हजार 164 प्रती असा आहे.

महाराष्ट्रात प्रथम क्रमांकाचे स्थान प्राप्त करतानाच 'लोकराज्य' ने देशातील सर्वाधिक खपाच्या मासिकांमध्ये दुसऱ्या क्रमांकाचे स्थान प्राप्त केले आहे. पहिल्या क्रमांकावर मल्याळम भाषेतील 'वनिथा' हे मासिक असून त्याचा खप 5 लाख 58 हजार 978 प्रती आहे. तिसऱ्या क्रमांकावर 'मल्याळम मनोरमा' हे मासिक असून त्याचा खप 3 लाख 44 हजार 573 प्रती आहेत.

'लोकराज्य' मासिकाने सातत्याने आपला पहिला क्रमांक कायम ठेवला असून महाराष्ट्राच्या कान्याकोपऱ्यात जाणारे हे एकमेव मासिक आहे. शासनाची अधिकृत आणि वस्तुनिष्ठ माहिती तसेच निर्णय, धोरणे, योजना,यशकथा, मुलाखती यांचा समावेश या मासिकात करण्यात येतो. तरुण वाचकांमध्ये या मासिकाची लोकप्रियता असून विविध स्पर्धा परीक्षा देणाऱ्या स्पर्धकांना हे मासिक अतिशय उपयुक्त ठरत असल्याचे सिद्ध झाले आहे. या मासिकाचे मुख्य संपादक ब्रिजेश सिंह यांनी लोकराज्यचा खप पुढील काळात आणखी वाढवून देशात पहिला क्रमांकाचे नियतकालिक करण्याचा निर्धार व्यक्त केला आहे.

मराठी सोबतच आता लोकराज्य उर्दू, गुजराती, हिंदी भाषेतही प्रकाशित केले जाते. त्याचबरोबर 'महाराष्ट्र अहेड' हे इंग्रजी भाषेत प्रकाशित केले जाते.

००००

संभाव्य आपत्तीच्या काळात सर्व यंत्रणांनी

सतर्कता, समन्वय, तत्परतेने प्रयत्न करावेत

- जिल्हाधिकारी अरुण डोंगरे

नांदेड, दि. 18 :-  आपत्ती व्यवस्थापन, नियंत्रणासाठी संघटीत आणि वेळेत प्रयत्न करणे गरजेचे आहे. त्यामुळे संभाव्य आपत्तीच्या काळात सर्व यंत्रणांनी अधिक सतर्कता, समन्वय व तत्परतेने प्रयत्न करावेत, अशा सूचना नांदेडचे जिल्हाधिकारी अरुण डोंगरे यांनी आज येथे दिल्या.  

नांदेड जिल्हाधिकारी कार्यालय आवारातील डॉ. शंकरराव चव्हाण नियोजन भवनात मान्सून 2017 पूर्व तयारी आढावा बैठक श्री. डोंगरे यांच्या अध्यक्षतेखाली झाली. त्यावेळी ते बोलत होते. यावेळी पोलीस अधीक्षक चंद्रकिशोर मिना, मनपा आयुक्त समीर उन्हाळे, अप्पर जिल्हाधिकारी संतोष पाटील, निवासी उपजिल्हाधिकारी जयराज कारभारी, जिल्हा अधीक्षक कृषि अधिकारी डॉ. तुकाराम मोटे, परिवहन, सार्वजनिक बांधकाम, पाटबंधारे, महानगरपालिका, पोलीस, आरोग्य आदी विभागाचे वरिष्ठ अधिकाऱ्यांसह जिल्ह्यातील उपविभागीय अधिकारी उपस्थित होते.

बैठकीत मार्गदर्शन करताना जिल्हाधिकारी श्री. डोंगरे म्हणाले की, आपत्ती व्यवस्थापनात तातडीने माहिती उपलब्ध होणे आणि त्यावर लगेच कार्यवाही करणे अपेक्षित असते. त्यासाठी संपर्क व दळणवळणाच्या अनुषंगाने सशक्त यंत्रणा कार्यान्वीत करावी. पुरेशा मनुष्यबळ व साधनसामग्री सज्ज ठेवावी. आपत्ती काळात वित्त व जिवीत हानी टाळता आली पाहिजे. यासाठी तालुका व गावस्तरावर सर्वंकष कृती आराखडे तयार करावीत. हे कृती आराखडे तयार करताना मागील घटनांचा अभ्यास करावा. सामाजिक बदलाचे प्रतिबिंबाबरोबर आपत्तीच्या अनुषंगिक इतर घटनांचा विचार करुन हे आराखडे सर्व विभागाने वेळेत करावेत. प्रशिक्षीत व्यक्तींच्या नावांची यादी तयार करावी. नियंत्रण कक्ष स्थापन करावेत,  असे निर्देश त्यांनी दिले.

येत्या मान्सुनच्यादृष्टीने नाले सफाई दुरुस्तीवर भर देण्यात यावा. धोकादायक इमारतीचे सर्वेक्षण करावे, धोकादायक पुलावरील वाहतूक बंद करावी. नदी, नाले, खोल पातळीचे डोह निर्माण झाले आहे अशा ठिकाणी धोक्याच्या इशाऱ्याचे फलक लावावेत. जिल्ह्यात पाऊस झाल्याने परिस्थिती निर्माण होते असे नाही तरी वरील भागात अतिवृष्टी झाल्याने तेथील धरणातून पाणी सोडल्याने जिल्ह्यात पूर परिस्थिती निर्माण होते. याचा विचार करुन योग्य नियोजन व सतर्कता बाळगली पाहिजे असेही श्री. डोंगरे यांनी यावेळी सांगितले.

यावेळी पोलीस अधीक्षक चंद्रकिशोर मिना, अप्पर जिल्हाधिकारी संतोष पाटील, नांदेड पाटबंधारे विभाग (उत्तर) कार्यकारी अभियंता आर. एम. देशमुख, विष्णुपुरी प्रकल्प विभाग क्र. 2 चे कार्यकारी अभियंता डी. के. शेटे यांनी ही जिल्ह्यातील आपत्तकालीन परिस्थिती नियंत्रणासंबंधी माहिती देवून करावयाच्या उपाययोजना संबंधी माहिती दिली.

प्रारंभी निवासी उपजिल्हाधिकारी जयराज कारभारी यांनी आपत्ती व्यवस्थापन प्राधिकरणाबाबत व केल्या जाणाऱ्या उपाययोजना संबंधी सादरीकरणातून माहिती देतांना नियंत्रण कक्ष स्थापन करुन 24 तास कार्यांन्वीत राहणार आहेत, असे सांगितले. संबंधीत विभागाच्या अधिकाऱ्यांनी आपत्ती व्यवस्थापनासंबंधी केलेल्या उपाय योजनांची माहिती दिली.

0000

पालकमंत्री अर्जून खोतकर यांचा सुधारीत दौरा

नांदेड, दि. 17 :- राज्याचे वस्त्रोद्योग, पशुसंवर्धन, दुग्धविकास व मत्स्यव्यवसाय राज्यमंत्री तथा नांदेड जिल्ह्याचे पालकमंत्री अर्जून खोतकर हे गुरुवार 18 मे 2017 रोजी नांदेड जिल्ह्याच्या दौऱ्यावर येत असून त्यांचा सुधारीत दौरा कार्यक्रम पुढील प्रमाणे राहील.

गुरुवार 18 मे 2017 रोजी मुंबई येथून देवगिरी एक्सप्रेसने सकाळी 8.25 वा. नांदेड रेल्वे स्थानक येथे आगमन व मोटारीने शासकीय विश्रामगृहाकडे प्रयाण. सकाळी 8.35 वा. शासकीय विश्रामगृह येथे आगमन व राखीव. सकाळी 9.30 वा. शासकीय विश्रामगृह येथून चिखलीकडे प्रयाण. सकाळी 10.30 वा. चिखली येथे आगमन व आमदार प्रताप पाटील चिखलीकर यांच्या निवासस्थानी सांत्वनपर भेट. सकाळी 11 वा. चिखली येथून मुखेडकडे प्रयाण. सकाळी 11.45 वा. मुखेड येथे आगमन व आमदार सुभाष साबणे यांच्या निवासस्थानी सांत्वनपर भेट. दुपारी 12.15 वा. मुखेड येथून शासकीय विश्रामगृह नांदेडकडे प्रयाण. दुपारी 1 वा. शासकीय विश्रामगृह नांदेड येथे आगमन व राखीव. दुपारी 4.15 वा. शासकीय विश्रामगृह येथून नांदेड रेल्वे स्टेशन येथे आगमन व नंदीग्राम एक्सप्रेसने नाशिककडे प्रयाण करतील.  

000000

पालकमंत्री अर्जून खोतकर यांचा दौरा

नांदेड, दि. 17 :- राज्याचे वस्त्रोद्योग, पशुसंवर्धन, दुग्धविकास व मत्स्यव्यवसाय राज्यमंत्री तथा नांदेड जिल्ह्याचे पालकमंत्री अर्जून खोतकर हे गुरुवार 18 मे 2017 रोजी नांदेड जिल्ह्याच्या दौऱ्यावर येत असून त्यांचा दौरा कार्यक्रम पुढील प्रमाणे राहील.

गुरुवार 18 मे 2017 रोजी हैद्राबाद येथून मोटारीने मुखेड येथे सकाळी 11.30 वा. आगमन व आमदार सुभाष साबणे यांच्या निवासस्थानी सांत्वनपर भेट. दुपारी 12.30 वा. मुखेड येथून मोटारीने चिखलीकडे प्रयाण. दुपारी 1.15 वा. चिखली येथे आगमन व आमदार प्रताप पाटील चिखलीकर यांच्या निवासस्थानी सांत्वनपर भेट. सोईनुसार चिखली येथुन शासकीय विश्रामगृह नांदेडकडे प्रयाण. शासकीय विश्रामगृह नांदेड येथे आगमन व राखीव. सायंकाळी 6 वा. देवगिरी एक्सप्रेसने नाशिककडे प्रयाण करतील.

000000

जिल्ह्यात जमावबंदी, शस्त्रबंदी आदेश लागू

नांदेड, दि. 17  :- जिल्ह्यात गुरुवार 25 मे 2017  रोजी मध्यरात्रीपर्यंत शस्त्रबंदी व जमावबंदी आदेश लागू केला आहे, अशी माहिती अपर जिल्हादंडाधिकारी कार्यालयाकडून देण्यात आली आहे.

आगामी काळातील धरणे, मोर्चे, रस्तारोको, आंदोलनाची शक्यता या पार्श्वभुमीवर जिल्ह्यात शांतता व सुव्यवस्था कायम रहावी म्हणून अपर जिल्हादंडाधिकारी यांनी मुंबई पोलीस अधिनियम 1951 चे कलम 37 (1) व (3) अन्वये जिल्ह्यात शनिवार 13 मे 2017 ते गुरुवार 25 मे 2017 रोजीच्‍या मध्यरात्रीपर्यत शस्त्रबंदी व जमावबंदी आदेश लागू केला आहे. त्यानुसार पाच किंवा पाचपेक्षा अधिक व्यक्तींनी या आदेशात नमूद असलेली कृत्ये सार्वजनिक परिसर किंवा त्याच्या जवळपास करण्यास बंदी घालण्यात आली आहे. हा आदेश पोलीस अधिकारी, शासकीय कर्मचारी, विवाह, अंत्ययात्रा, धार्मिक कार्यक्रम, यात्रा व इतर सक्षम अधिकारी यांनी विशेषरित्या परवानगी दिलेल्या मिरवणुकांना लागू होणार नाही.

000000

"दहशतवाद व हिंसाचार विरोधी दिवस"

21 मे ऐवजी 20 मे रोजी साजरा करावा

नांदेड, दि. 17  :- "दहशतवाद व हिंसाचार विरोधी दिवस" रविवार 21 मे 2017 रोजी साजरा करण्यात येतो. रविवार 21 मे 2017 रोजी राज्यातील शासकीय, निमशासकीय कार्यालयांना सुट्टी असल्याने "दहशतवाद व हिंसाचार विरोधी दिवस" हा शनिवार 20 मे 2017 रोजी दहशतवाद व हिंसाचार विरोधी प्रतिज्ञा घेऊन साजरा करण्याच्या सूचना सामान्य प्रशासन विभागाच्या परिपत्रकान्वये दिल्या आहेत.

जिल्ह्यातील सर्व विभाग प्रमुखांनी दि. 16 मे 2017 रोजीच्या शासन परिपत्रकान्वये योग्य ती कार्यवाही करावी व शनिवार 20 मे 2017 रोजी "दहशतवाद व हिंसाचार विरोधी दिवस" साजरा करावा, असे जिल्हाधिकारी नांदेड यांनी प्रसिद्धी पत्रकान्वये कळविले आहे.  

000000

पालकमंत्री अर्जून खोतकर यांचा दौरा

नांदेड, दि. 16 :- राज्याचे वस्त्रोद्योग, पशुसंवर्धन, दुग्धविकास व मत्स्यव्यवसाय राज्यमंत्री तथा नांदेड जिल्ह्याचे पालकमंत्री अर्जून खोतकर हे बुधवार 17 मे 2017 रोजी नांदेड जिल्ह्याच्या दौऱ्यावर येत असून त्यांचा दौरा कार्यक्रम पुढील प्रमाणे राहील.

बुधवार 17 मे 2017 रोजी मुंबई येथून देवगिरी एक्सप्रेसने सकाळी 8.10 वा. नांदेड येथे आगमन व शासकीय विश्रामगृहाकडे प्रयाण. सकाळी 8.25 वा. शासकीय विश्रामगृह नांदेड येथे आगमन व राखीव. सकाळी 10 वा. शासकीय विश्रामगृह नांदेड येथून मोटारीने मुखेडकडे प्रयाण. सकाळी 11 वा. मुखेड येथे आगमन व आमदार सुभाष साबणे यांच्या निवासस्थानी सांत्वनपर भेट. सकाळी 11.30 वा. मुखेड येथून मोटारीने चिखलीकडे प्रयाण. दुपारी 12.15 वा. चिखली येथे आगमन व आमदार प्रताप पाटील चिखलीकर यांच्या निवासस्थानी सांत्वनपर भेट. सोईनुसार चिखली येथुन शासकीय विश्रामगृह नांदेडकडे प्रयाण करतील.

000000