फळे (आंबे) पिकविण्यासाठी

कार्बाईड गॅस ऐवजी इथेपॉन पावडरचा वापर करावा 

नांदेड दि. 5 :- कृत्रीमरित्या फळे पिकविण्यासाठी कार्बाईड गॅस (कॅलशियम कार्बाईड)चा वापर करण्याऐवजी इथेपॉन पावडर (इथेलीन गॅसचा) वापर फळे (आंबे) पिकविण्यासाठी करावा, असे आवाहन अन्न व औषध प्रशासनचे सहाय्यक आयुक्त तु. चं. बोराळकर यांनी केले आहे.

सध्या आंब्याचा मोसम सुरु होत असून फळांचा राजा आंबाची आवक बाजारात येण्यास सुरुवात झाली आहे. नैसर्गीकपणे आंबा पिकवून तो विक्रीसाठी बाजारात आणणे अभिप्रेत असतांना आंब्याचे व्यापारी त्याची वाहतूक, साठा करतांना कार्बाइडी गॅस (कारपेट) चा वापर करतात. अन्न सुरक्षा व मानदे कायद्याच्या तरतुदीनुसार कार्बाइड गॅस (कॅलशियम कार्बाइड) चा वापरास प्रतिबंध असून त्याचा वापर करुन आंबे पिकविल्यास शरीराच्या आरोग्यावर परिणाम होऊ शकतो.

आंबा पिकविण्यासाठी इथेपॉन पावडर (इथेलीन गॅस) चा मर्यादीत स्वरुपात वापर करण्याबाबत दिल्लीच्या भारतीय अन्न सुरक्षा व मानदे प्राधिकरणाने परवानगी दिली आहे. सदर पावडर वापरतांना ती फळांच्या (आंब्याच्या) प्रत्यक्ष संपर्कात येणार नाही याची दक्षता फळ विक्रेत्यांनी घ्यावी. हे पावडर एका आवरणात छोट्या स्वरुपात पॅक करुन फळाच्या (आंब्याच्या) ठिकाणी ठेवावे, जेणे करुन आंबा पिकविण्यास मदत होईल. अशा प्रकारच्या सुचना प्राप्त झाल्या आहेत.

आंबा किंवा इतर फळे पिकवतांना कार्बाइड गॅस (कॅलशीयम कार्बाईड) चा वापर न करता आवश्यकता वाटल्यास इथेपॉन पावडर (इथेलीन गॅस) मर्यादीत स्वरुपात विक्रेत्यांनी वापर करावा. त्याशिवाय नैसर्गिकरित्या आंबा किंवा इतर फळे पिकवण्यासाठी प्राधान्य दयावे. तसेच फळे व भाजीपाला विक्रेते कमिशन एजंट, वाहतूकदार यांनी अन्न सुरक्षा व मानदे कायद्याअंतर्गत परवाना, नोंदणी घेऊनच व्यवसाय करावा. FSSAI या वेबसाईटवर ऑनलाईन परवाना, नोंदणी घ्यावी, असेही आवाहन अन्न व औषध प्रशासनचे सहाय्यक आयुक्त तु. चं. बोराळकर यांनी केले आहे.

00000

लोकसभा सार्वत्रिक निवडणूक

विशेष कार्यकारी दंडाधिकाऱ्यांची नियुक्ती

नांदेड दि. 5 :- लोकसभा सार्वत्रिक निवडणूक-2019 ची प्रक्रिया सुरळीत पार पाडण्यासाठी जिल्हाधिकारी तथा जिल्‍हादंडाधिकारी अरुण डोंगरे यांनी फौजदारी प्रक्रिया संहिता 1973 (सन 1974 चा 2) कलम 21 अन्वये जिल्ह्यातील 9 विधानसभा मतदारसंघात निवडणूक कामासाठी क्षेत्रिय अधिकाऱ्यांना विधानसभा मतदारसंघ कार्यक्षेत्र हद्दीत विशेष कार्यकारी दंडाधिकारी म्हणून 16 ते 18 एप्रिलच्या कालावधीसाठी नेमणूक केली आहे.

नांदेड जिल्‍ह्यातील 15-हिंगोली लोकसभा मतदार संघातील :- 83-किनवट, 84-हदगांव विधानसभा मतदार संघ व 16-नांदेड लोकसभा मतदार संघातील :- 85-भोकर, 86-नांदेड उत्‍तर, 87-नांदेड दक्षिण, 89-नायगांव, 90-देगलूर, 91-मुखेड विधानसभा मतदार संघ तसेच 41-लातूर (अ.जा.) :- लोकसभा मतदार संघातील 88-लोहा विधानसभा मतदार संघ असे एकुण 9 विधानसभा मतदार संघात, लोकसभा सार्वत्रिक निवडणूक-2019 च्‍या कामासाठी (325) क्षेत्रिय अधिकारी (Zonal Officer) यांची नियुक्‍ती केली असून त्यांना विधानसभा मतदारसंघ कार्यक्षेत्र हद्दीपार्यंत 16 एप्रिल 2019 रोजी सायंकाळी 6 वाजेपासून ते दिनांक 18 एप्रिल 2019 पर्यंतच्‍या कालावधीकरीता विशेष कार्यकारी दंडाधिकारी म्हणून नेमणूक करून त्‍यांना वरील संहितेचे कलम 129, 133, 143 व 144 अन्वये अधिकार प्रदान केले आहेत. हा आदेश जिल्हादंडाधिकारी नांदेड यांनी 5 एप्रिल 2019 रोजी निर्गमीत केला आहे.

000000

जिल्ह्यात जमावबंदी, शस्त्रबंदी आदेश लागू 

नांदेड, दि. 5 :- जिल्ह्यात 21 एप्रिल 2019 रोजी मध्यरात्रीपर्यंत शस्त्रबंदी व जमावबंदी आदेश लागू राहणार आहे, अशी माहिती अपर जिल्हादंडाधिकारी कार्यालयाकडून देण्यात आली आहे.

जिल्ह्यातील कायदा व सुव्यवस्था अबाधित रहावी म्हणून अपर जिल्हादंडाधिकारी यांनी मुंबई पोलीस अधिनियम 1951 चे कलम 37 (1) व (3) अन्वये जिल्ह्यात 7 एप्रिल ते 21 एप्रिल 2019 रोजी मध्यरात्रीपर्यंत शस्त्रबंदी व जमावबंदी आदेश लागू राहिल. त्यानुसार पाच किंवा पाचपेक्षा अधिक व्यक्तींनी या आदेशात नमुद असलेली कृत्ये सार्वजनिक परिसर किंवा त्याच्या जवळपास करण्यास बंदी घालण्यात आली आहे. हा आदेश पोलीस अधिकारी, शासकीय कर्मचारी, विवाह, अंत्ययात्रा, धार्मिक कार्यक्रम, यात्रा व इतर सक्षम अधिकारी यांनी विशेषरित्या परवानगी दिलेल्या मिरवणुकांना लागू होणार नाही.

अशा मिरवणुकांना परवानगी देण्याचे अधिकार तसेच पाच व पाचपेक्षा जास्त इसम जमण्यासाठी, सभा, मिरवणुका, मोर्चा काढणे, ध्वनीक्षेपक वाजविण्यास परवानगी देण्याचे अधिकार जिल्ह्यातील पोलीस ठाणे प्रभारी अधिकारी यांना तसेच पोलीस अधीक्षक नांदेड यांनी प्राधिकृत केलेल्या इतर पोलीस अधिकारी यांना राहतील.

000000

एमसीएमसी समितीच्‍या मिडिया सेंटरमध्‍ये

जिल्‍ह्यातील रेडिओ प्रतिनिधी व प्रकाशकांची बैठक संपन्‍न

नांदेड,दि. 3 :-  16- लोकसभा निवडणूकीदरम्‍यान प्रचार आणि प्रसार माध्‍यमातून प्रचार करण्‍यात येणा-या साहित्‍याविषयी तसेच संख्‍या यासंदर्भात आकाशवाणीवरुन प्रसारित होणा-या प्रचारपर जाहिरातीच्‍या प्रमाणकीकरण करुन घेवूनच प्रसारित करावी. प्रकाशक , मुद्रक आणि विविध एफएम वाहिन्‍यांचे प्रतिनिधी यांची जिल्‍हाधिकारी कार्यालयाच्‍या मिडिया कक्षात आज बैठक घेण्‍यात आली.

या बैठकीस माहिती अधिकारी तथा सदस्‍य सचिव श्रीमती मीरा ढास, प्रा. डॉ. दीपक शिंदे, जनसंपर्क अधिकारी मिलींद व्‍यवहारे, श्री. जटाळे आदि सदस्‍यांची या बैठकीस उपस्थिती होती.

या बैठकीदरम्‍यान प्रचार साहित्‍यासंदर्भात उमेदवारांनी छापाई केलेला मजकूर आणि छापिल प्रतींची संख्‍या याची माहिती प्रमाणन करुन घेण्‍यासाठी प्रथम एमसीएमसी कमिटीकडे देणे आवश्‍यक आहे. तसेच आकाशवाणीवरुन प्रसारित होणा-या जिंगल्‍स किंवा जाहिराती याही प्रमाणित करुन घेवूनच प्रसारित करण्‍यात याव्‍यात. समाज माध्‍यमावरुन प्रसारित करण्‍यात येणा-या जाहिराती तसेच या अनुषंगाने येणा-या विविध परवानग्‍या देण्‍यासंदर्भात जिल्‍हा प्रशासन अधिकारी राजेंद्र चव्‍हाण यांनी मार्गदर्शन केले.

प्रकाशक डॉ. आबासाहेब कल्‍याणकर, सुनिल गोधणे, सु.ग. चव्‍हाण, शिवानंद सुरकुटवार, साहेबराव शंकरराव बेळे, आकाशवाणीचे कार्यक्रम अधिकारी व्‍ही.आर. वाघमारे, रेडिओचे प्रतिनिधी दीपक रत्‍नपारखी (रेड एफएम), शशिकांत महामुणे (माय एफएम), संकेत इनामदार (रेड एफएम), आर. पी. आत्राम (ऑल इंडिया रेडिओ), गौतम पट्टेबहादूर (ऑल इंडिया रेडिओ), शंकर भोसले  (रेडिओ सिटी) यांची उपस्थिती होती.

0000

एमसीएमसी समितीच्‍या मिडिया कक्षाला

निवडणूक निरीक्षक विरेंद्र सिंग यांची भेट

नांदेड,दि 3 :-  माध्‍यम प्रमाणीकरण व देखरेख समिती अर्थात मिडिया कक्षाला निवडणूक निरीक्षक (खर्च) विरेंद्र सिंग यांनी भेट दिली.

या भेटी दरम्‍यान मिडिया कक्षातील माध्‍यम प्रमाणीकरणासाठी लावण्‍यात आलेल्‍या विविध वाहिन्‍यां तसेच स्‍थानिक केबल वाहिन्‍यांच्‍या देखरेखीसाठी लावण्‍यात आलेल्‍या टीव्‍ही संचाची त्‍यांनी पाहणी केली. कक्षात दररोज येणा-या विविध वृत्‍तपत्रातील बातम्‍यांच्‍या कात्रणाच्‍या संचाची यावेळी पाहणी करण्‍यात आली. पेडन्‍युज प्रकरणी समितीने केलेल्‍या कार्यवाहीविषयी त्‍यांनी आढावा घेतला.

 तसेच उमेदवारांच्‍या जाहिरातीवर होणारा खर्च, सोशल मिडियावरुन प्रसारित होणा-या जाहिरात निर्मिती आणि प्रसारणाचा खर्च एमसीएमसी समितीने प्रमाणीत करुन दिलेल्‍या खर्चाची आढावा घेतला. या समितीने प्रमाणीत करुन दिलेल्‍या जाहिरातीच्‍या संचाची पाहणी केली.

 यावेळी मिडिया कक्षाचे प्रमुख जिल्‍हा प्रशासन अधिकारी राजेंद्र चव्‍हाण, निळकंठ पांचगे, जिल्‍हा कोषागार अधिकारी श्री. गग्‍गड, माहिती अधिकारी तथा सदस्‍य सचिव श्रीमती मीरा ढास, प्रा. डॉ. दीपक शिंदे, जनसंपर्क अधिकारी मिलींद व्‍यवहारे आदिंची यावेळी उपस्थिती होती.

००००

निवडणूक निरक्षकांकडून

मतमोजणी केंद्राची पाहणी

नांदेड दि. 4 :- 16- नांदेड लोकसभा मतदारसंघातील  85 -भोकर, 86 – नांदेड उत्‍तर, 87 – नांदेड दक्षिण, 89 – नायगाव खै.,  90 – देगलूर, 91 – मुखेड या सर्व मतदारसंघातील मतमोजणी एकाच ठिकाणी गुरुवार 23 मे 2019 रोजी नांदेड शासकिय तंत्रनिकेतनच्या माहिती व तंत्रज्ञान इमारत येथे मतमोजणी होणार आहे.

या मतमोजणी केंद्राची  पाहणी बुधवार 3 एप्रिल 2019 रोजी निवडणूक निरिक्षक (जनरल), निवडणूक निरिक्षक (पोलिस), जिल्‍हा निवडणूक निर्णय अधिकारी नांदेड व जिल्‍हा पोलिस अधिक्षक नांदेड यांनी केली आहे. या मतमोजणी केंद्राची पाहणी करतांना सर्व बाबींची सहनिशा करण्‍यात आली आहे. याबाबत निवडणूक निरिक्षक (जनरल) व निवडणूक निरिक्षक (पोलिस) यांनी समाधान व्‍यक्‍त केले आहे.

000000

निवडणूक खर्च निरीक्षणासाठी

5, 10 व 16 एप्रिल तारखा निश्चित

        नांदेड, दि. 4 :-  16- नांदेड लोकसभा निवडणूकीकरीता उमेदवारांसाठी लोकसभा सार्वत्रिक निवडणूक-2019 च्‍या नियोजित वेळापत्रकानुसार प्रत्‍येक उमेदवारास स्‍वतःचा खर्च निरिक्षणासाठी खर्च निरिक्षकासमोर सादर करावयाचा असतो. त्‍यासाठी 5 एप्रिल, 10 एप्रिल व 16 एप्रिल 2019 रोजी जिल्‍हाधिकारी कार्यालय परिसर कॅबिनेट हॉल नियोजन भवन नांदेड येथे सकाळी 11 ते दुपारी 3 यावेळेत स्‍वीकारण्‍यात येणार आहेत. 

 16- नांदेड लोकसभा मतदार संघ निवडणूकीसाठी उमेदवारांनी  स्‍वतः किंवा आपल्‍या प्रतिनिधीमार्फत निवडणूकीसाठी झालेला आपला खर्च निरीक्षणासाठी सादर करावा, असे आवाहन जिल्‍हाधिकारी तथा जिल्‍हा निवडणूक अधिकारी अरुण डोंगरे यांनी केले आहे.

0000