पूरग्रस्त भागातील नुकसानीचे तात्काळ पंचनामे करा

पालकमंत्री गिरीष महाजन यांचे निर्देश

नांदेड जिल्ह्यातील पूरग्रस्त भागाची प्रत्यक्ष पाहणी करुन

पालकमंत्री गिरीष महाजन यांनी साधला शेतकऱ्यांशी संवाद

  नांदेड (जिमाका) दि. 23 :-   जिल्ह्यातील बिलोली, देगलूर, मुखेड, धर्माबाद, माहूर या तालुक्यात नुकत्याच झालेल्या अतिवृष्टीमुळे झालेले नुकसान खुप मोठे आहे. दोन व्यक्ती प्राणास मुकले आहेत. साधारणत: साठ जनावरे वाहून गेल्याचे समोर आले आहे. विशेषत: नदी नाल्याच्या जवळ असलेल्या अनेक भागातील शेतीची जमीन खरडून गेल्याने शेतकरी चिंतेत आहेत. जिल्ह्यातील पूरग्रस्त भागातील ज्या शेतकऱ्यांचे नुकसान झाले आहे त्यांच्यासाठी शासन निश्चितपणे मदतीसाठी पुढे येईल, असा विश्वास राज्याचे ग्रामविकास मंत्री तथा नांदेड जिल्ह्याचे पालकमंत्री गिरीष महाजन यांनी दिला. सध्या अधिवेशन सुरू असून लवकरच याबाबत धोरणात्मक निर्णय सभागृहात जाहीर केल्या जाईल, असे त्यांनी सांगितले.

 जिल्ह्यात अतिवृष्टी झालेल्या परिस्थितीचा तपशीलवार आढावा घेऊन त्यांनी अतिवृष्टी झालेल्या बिलोली, देगलूर, मुखेड भागातील विविध गावांना भेटी देऊन पाहणी केली. यावेळी त्यांच्या समवेत खासदार प्रतापराव पाटील चिखलीकर, आमदार राम पाटील रातोळीकर, आमदार तुषार राठोड, आमदार भीमराव केराम, माजी आमदार सुभाष साबने, जिल्हाधिकारी अभिजीत राऊत, जिल्हा परिषदेच्या मुख्य कार्यकारी अधिकारी मीनल करनवाल,  जिल्हा पोलीस अधिक्षक श्रीकृष्ण कोकाटे, प्रवीण साले, डॉ. माधव पाटील उचेगांवकर, डॉ. विरभद्र हिमगीरे आदि पदाधिकारी उपस्थित होते. विमानतळ येथील बैठक कक्षात जिल्हाधिकारी अभिजीत राऊत यांनी पॉवर पॉईंट प्रेझेटेंशनद्वारे जिल्ह्यातील पूरपरिस्थितीची माहिती दिली. पालकमंत्री गिरीष महाजन यांनी आढावा घेऊन प्रत्यक्ष गावांना भेटी दिल्या. यावेळी त्यांच्याहस्ते पूरग्रस्तांना प्रातिनिधीक स्वरुपात मदतीचे धनादेशही वाटप करण्यात आले.

 अतिवृष्टीचा फटका राज्यातील अनेक जिल्ह्यांना बसला आहे. ग्रामीण भागातील लहान पूल व रस्त्याचीही मोठी दुर्दशा झाली आहे. नांदेड जिल्ह्यातील ग्रामीण भागात काही ठिकाणी दरवर्षी पूराच्या पाण्यामुळे रस्ते बंद झाल्याने संपर्क तुटतो. अशा गावांची व ठिकाणांची यादी करुन त्याठिकाणी नवीन पूलाच्या कामाबाबत प्राधान्याने विचार केला जाईल, असे त्यांनी स्पष्ट केले. याचबरोबर पूरामुळे बऱ्याच गावात शेतजमीन खरडून जाते. अशी गावे व शेतशिवाराच्या जागांची निवड करुन त्याठिकाणी मृदसंधारणाच्या दृष्टीने, पाणलोटाच्या दृष्टीने वेगळा विचार करुन मनरेगामार्फत जे काही करता येईल त्याबाबत शासन पातळीवर चर्चा करुन निर्णय घेऊ, असेही ते म्हणाले.

 

पालकमंत्री गिरीष महाजन यांनी बिलोली तालुक्यातील टाकळी, देगलूर तालुक्यातील लखा, वनाळी, सुगाव मुखेड तालुक्यातील एकलारा, टाकळी बु., बेटमोगरा, ऊच्चा माऊली या भागातील शिवाराची पाहणी केली. या भागातील अनेक ठिकाणी विद्युत खांब पडल्याने काही गावातील विद्युत प्रवाह खंडित झाला आहे. उपमुख्यमंत्री तथा राज्याचे ऊर्जामंत्री देवेंद्र फडणवीस यांच्याशी मी चर्चा केली असून ही कामे त्वरित पूर्ण करुन विद्युत पुरवठा पुर्ववत केला जाईल, असे त्यांनी सांगितले. जिल्ह्यातील नुकसानीचे पंचनामे त्वरित पूर्ण करण्याचे निर्देश त्यांनी जिल्हा प्रशासनाला दिले.

 

0000

 राज्य महिला आयोगाच्या सदस्या ॲड. संगीता चव्हाण यांचा नांदेड दौरा 

नांदेड (जिमाका) दि. 22 :- महाराष्ट्र राज्य महिला आयोगाच्या सदस्या ॲड. संगीता चव्हाण दि. 24 व 25 जुलै, 2023 रोजी नांदेड जिल्ह्याच्या दौऱ्यावर येत आहेत. 

 

श्रीमती चव्हाण ह्या जिल्ह्यातील विविध औद्योगिक आस्थापनांमध्ये कार्यरत महिला कामगार यांच्या समस्या व अडीअडचणी जाणून घेणार आहेत. तसेच काही उद्योगांच्या आस्थापनांना प्रत्यक्ष भेट देऊन तेथे कार्यरत महिला अधिकारी, कर्मचारी यांच्या समस्या जाणून घेणार आहेत. 

00000

 दिव्यांग व्यक्तींना राष्ट्रीय पुरस्कारासाठी

ऑनलाईन अर्ज करण्याचे आवाहन  

 

नांदेड (जिमाका) दि. 22 :-केंद्र शासनाच्या सामाजिक न्याय व अधिकारीता मंत्रालय अंतर्गत दिव्यांगजन सशक्तीकरण विभागाकरीता राष्ट्रीय पुरस्कार सन 2023 साठी नामांकन व अर्ज गृह कामकाज मंत्रालयाच्या केंद्रीकृत पोर्टल www.awards.gov.in वर ऑनलाईन पद्धतीने सोमवार 31 जुलै 2023 पर्यंत मागविण्यात आले आहेत.   

 

अर्ज / नामांकन हे www.awards.gov.in  या संकेतस्थळावर भरण्यात यावे. राष्ट्रीय पुरस्कार 2023 साठी अर्ज / नामांकने सादर करण्याच्यादृष्टिने 15 जून ते 31 जुलै 2023 या कालावधीत संकेतस्थळ सुरू राहील. राष्ट्रीय पुरस्कार सन 2023 करीता अर्ज/नामांकन केवळ गृह मंत्रालयाने तयार केलेल्या URL www.award.gov.in या ऑनलाईन पोर्टलवर पासवर्ड संरक्षित करून सादर करावेत. या पोर्टलवर उपलब्ध असलेल्या विशिष्ट नमुन्यातील अर्जात सर्व मुद्यांची माहिती उल्लेखनीय व प्रेरणादायी कार्याचा सविस्तर वर्णनासह भरावी. सक्षम सादर केलेले अर्ज स्विकारले जाणार नाहीत.

 

पात्रता निकष व इतर सविस्तर तपशील www.disibilityaffairs.gov.in या संकेतस्थळावर उपलब्ध असलेल्या दिव्यांग व्यक्तीच्या सक्षमिकरणाच्या अनुषंगाने राष्ट्रीय पुरस्काराच्या मार्गदर्शक सुचनेनुसार विचारात घेण्यात येतील. केंद्र शासनाच्या सामाजिक व न्यायअधिकारीता मंत्रालय अंतर्गत दिव्यांगजन सशक्तीकरण विभागाच्या व्यक्तीसाठी राष्ट्रीय पुरस्कार सन 2023 करीता नामांकन व अर्ज मागविण्यात आली आहेत, अशी माहिती जिल्हा परिषदेचे समाज कल्याण अधिकारी सतेंद्र आऊलवार यांनी केले आहे.

 0000

 

 किनवट तालुक्यात गत दोन दिवसापासून 

अतिवृष्टीमुळे शेतीसह जनजीवन विस्कळीत 

नांदेड (जिमाका) दि. 22 :-  किनवट तालुक्यात 20 ते 22 जुलै रोजी सर्व 9 महसूल मंडळात अतिवृष्टीची नोंद झाली आहे. या अतिवृष्टीमुळे तालुक्यातील एकुण 176 गावातील 21 हजार 415 शेतकऱ्यांचे 13 हजार 246 हेक्टर आर. वरील शेतीपिकांचे नुकसान झाल्याचा प्राथमिक अंदाज आहे. अतिवृष्टीमुळे कोणतीही जीवितहानी झाली नसून 2 पशुधन दगावले आहेत. 

पिंपरी येथे डोंगराचे माळरान खचून जवळपास 65 घरांची पडझड झाली आहे. तसेच भंडरवाडी येथील 12 घरांचे व इतर गावातील 25 असे 90 घरांची पडझड झाल्याचा प्राथमिक अंदाज आहे. अतिवृष्टीमुळे पेनगंगा नदीची पाणी पातळी वाढल्यामुळे सहस्त्रकुंड धबधबा दुथडी भरून वाहत आहे.  सुरक्षेच्यादृष्टीने प्रशासनाने हा धबधबा नागरीकांसाठी तसेच पर्यटकांसाठी पुढील आदेशापर्यंत बंद केला आहे. 

किनवट तालुक्यातील सिंगारवाडी, भंडारवाडी, सुंगागुडा बोधडी, बेल्लोरी कि., झेंडीगुडा, नागझरी, मलकापूर, खेर्डा या गावाचा किनवट शहरापासून संपर्क तुटला आहे. किनवट तालुक्यातील बेंदी गाव व चिखली खुर्द येथील पुलावरून पाणी वाहत असल्याने किनवट-भोकर-नांदेड हा मार्ग बंद आहे. किनवट शहरातील मोमीनपुरा भागातील जवळपास 100 ते 110 अतिवृष्टीने बाधित नागरिकांचे तात्पुरते स्थलांतर जवाहर उलूम उूर्द शाळेत करण्यात आले. येथे नगरपरिषद किनवटतर्फे त्यांच्या जेवणाची व्यवस्था करण्यात आली आहे. 

ज्या पुलावरून पाणी वाहत आहे अशा सर्व ठिकाणी पोलीस प्रशासन व महसूल प्रशासनाच्यावतीने बॅरिकेटस लावून पुल बंद करण्यात आला आहे. नैसर्गिक आपत्तीमुळे कोणतेही अधिकचे नुकसान होणार नाही याबाबत सर्व यंत्रणांना अलर्ट जारी करण्यात आला आहे. सर्व अधिकारी-कर्मचाऱ्यांना मुख्यालयीन उपस्थित राहण्याचे निर्देशही देण्यात आले आहेत. नैसर्गिक आपत्तीसाठी सर्व यंत्रणांनी सज्ज राहण्याच्या सूचना जिल्हाधिकारी अभिजीत राऊत यांनी दिले आहेत.

0000

वृत्त क्र. 437 डिजीटल इंडिया सप्ताहात नोंदणी करण्याचे आवाहन

 वृत्त क्र. 437

डिजीटल इंडिया सप्ताहात नोंदणी करण्याचे आवाहन

नांदेड (जिमाका) दि. 21 :- केंद्र शासनाच्या माहिती व तंत्रज्ञान मंत्रालयातर्फे 25 ते 31 जुलै दरम्यान डिजीटल इंडिया सप्ताहाचे आयोजन करण्यात आले आहे. सप्ताहाचे उद्घाटन भारताचे पंतप्रधान नरेंद्र मोदी यांच्या हस्ते होणार आहे. डिजीटल इंडिया सप्ताहात सर्व सामान्य नागरिक व विद्यार्थी यांना विविध ई-गव्हर्नन्स सेवांची माहिती मिळेल. दैनंदिन जीवनात माहिती तंत्रज्ञानाचा अधिकाधिक वापर करण्यासाठी या सप्ताहाचा उद्देश आहे. नागरिकांनी व विद्यार्थ्यांनी नोंदणी केल्यास त्यांना त्यांच्या ईमेल व मोबाईलवर माहिती मिळत राहील, अशी माहिती तांत्रिक संचालक तथा जिल्हा सूचना विज्ञान अधिकारी प्रफुल कर्णेवार यांनी दिली आहे.

डिजीटल इंडिया सप्ताह भारताचे तंत्रज्ञान जगासमोर प्रदर्शित करणे, टेक स्टार्टअप साठी सहयोग, व्यवसायाच्या संधी शोधणे व पुढील पिढीला प्रेरणा देण्यासाठी आहे. यासाठी राष्ट्रीय स्तरावर विविध कार्यक्रमांची मालिका आयोजित करण्यात येणार आहे. नागरिकांना या कार्यक्रमात सहभागी होण्यासाठी केंद्र शासनाने तयार केलेल्या वेबलिंकवर नोंदणी करणे गरजेचे आहे. त्यासाठी https://nanded.gov.in या नांदेड जिल्ह्याच्या अधिकृत संकेतस्थळावर नोंदणीची व्यवस्था उपलब्ध करुन देण्यात आली आहे किंवा https://www.nic.in/diw2023-reg या वेबलिंकचा नोंदणीसाठी वापर करावा.

जिल्ह्यातील महाविद्यालये, विशेषत: औद्योगिक प्रशिक्षण संस्था, तंत्र निकेतन व अभियांत्रिकी महाविद्यालये यांनी विद्यार्थ्यांच्या सोयीसाठी डिजीटल इंडिया सप्ताहाच्या सर्व कार्यक्रमांचे प्रक्षेपण महाविद्यालयाच्या सभागृहात उपलब्ध करुन द्यावे. जिल्ह्यातील अधिकाधिक नागरिकांनी व विद्यार्थ्यांनी नोंदणी करुन केंद्र शासनाच्या या उपक्रमाचा लाभ घ्यावा, असे आवाहन करण्यात आले आहे.

0000

जिल्ह्यात गत 24 तासात सरासरी 64.80 मि.मी. पाऊस

 जिल्ह्यात गत 24 तासात सरासरी  64.80  मि.मी. पाऊस

नांदेड (जिमाका) दि. 21 :- जिल्ह्यात शुक्रवार 21  जुलै रोजी सकाळी संपलेल्या गत 24 तासात सरासरी 64.80 मिलीमीटर पावसाची नोंद झाली असून जिल्ह्यात एकुण 327.20  मिलीमीटर पाऊस झाला आहे.

जिल्ह्यात शुक्रवार 21 जुलै 2023 रोजी सकाळी संपलेल्या गत 24 तासात झालेला पाऊस मिली मीटरमध्ये तालुकानिहाय पुढील प्रमाणे, कंसात एकूण पाऊस : नांदेड- 37 (235.60), बिलोली-109.30 (449.60), मुखेड- 84 (408.30), कंधार-14 (170.10), लोहा-25.30 (227.10), हदगाव-90.30 (307.50), भोकर-60.20(358.80), देगलूर-152.30(400.80), किनवट-59.50(389.90), मुदखेड- 41.40 (298.30), हिमायतनगर-105.50 (289.20), माहूर- 30.60 (388.40), धर्माबाद- 79.10 (388.30), उमरी- 41.50 (358.10), अर्धापूर- 55.40 (313.20), नायगाव-34.40 (271.30) मिलीमीटर आहे.

0000 

मिशन स्थूलपणा जनजागृती व उपचार अभियानातर्गत निबंध व पोस्टर स्पर्धेचे आयोजन

 मिशन स्थूलपणा जनजागृती व उपचार

अभियानातर्गत निबंध व पोस्टर स्पर्धेचे आयोजन

नांदेड (जिमाका), दि. 20 :- मिशन स्थुलपणा जनजागृती व उपचार अभियानातर्गत डॉ. शंकरराव चव्हाण शासकीय वैद्यकीय महाविद्यालयात पदवीपूर्व विद्यार्थ्यांची फुड ॲन्ड ओबेसिटी या विषयावर निबंध स्पर्धा व पोस्टर स्पर्धा नुकतीच आयोजित करण्यात आली होती. या स्पर्धेत विद्यार्थ्यांची उर्स्फुत प्रतिसाद दिला. या स्पर्धेमुळे विद्यार्थ्यामध्ये स्थुलतेबद्दल जागरुकता निर्माण होण्यास मदत झाली.

या स्पर्धेच्या यशस्वीतेसाठी वैद्यकीय महाविद्यालयाचे अधिष्ठाता डॉ. एस.आर. वाकोडे यांचे मार्गदर्शन व जनऔषधशास्त्र विभागातील विभागप्रमुख डॉ. पी.एल.गट्टाणी यांचे नेत्वृत्वाखाली स्पर्धा आयोजित करण्यात आली होती. यावेळी स्पर्धेत सहभागी झालेल्या विद्यार्थ्यांना प्रशस्तीपत्र देवून गौरविण्यात आले. या स्पर्धेचे नियोजन सहाय्यक प्राध्यापक डॉ. महावीर नाकेल यांनी केले तर या स्पर्धेसाठी डॉ. आय.एफ.इनामदार, डॉ. आर.डी.गाडेकर, डॉ. साईनाथ मैदपवाड, डॉ. अक्षय नलाबले, डॉ. भार्गव यांनी सहकार्य केले.

00000