वृत्त क्रमांक 1162

नांदेड जिल्ह्यातील 12 नगरपरिषदेसह एका नगरपंचायतीसाठी निवडणूक कार्यक्रम जाहीर

2 डिसेंबरला मतदान तर 3 डिसेंबर रोजी मतमोजणी

नांदेड दि. 5 नोव्हेंबर :- नांदेड जिल्ह्यातील 12 नगरपरिषद व एका नगरपंचायतीच्या 269 सदस्यांसाठी मंगळवार 2 डिसेंबर 2025 रोजी मतदान तर बुधवार 3 डिसेंबरला मतमोजणी होणार आहे. नांदेड जिल्ह्यात एकूण 13 स्थानिक स्वराज्य संस्थाच्या निवडणूकीचा कार्यक्रम काल 4 नोव्हेंबर रोजी राज्य निवडणूक आयोगाने घोषित केला असून या नगरपरिषदा व नगरपंचायतीच्या कार्यक्षेत्रात कालपासून आचारसंहिता लागू झाली आहे, याबाबतची माहिती जिल्हाधिकारी राहुल कर्डिले यांनी आज जिल्हाधिकारी कार्यालयात आयोजित पत्रकार परिषदेत दिली. 

नांदेड जिल्ह्यात नगरपरिषद देगलूर, नगरपरिषद भोकर, नगर परिषद धर्माबाद, नगरपरिषद किनवट, नगरपरिषद उमरी, नगरपरिषद हदगांव, नगरपरिषद मुखेड, नगरपरिषद कंधार, नगरपरिषद बिलोली, नगरपरिषद कुंडलवाडी, नगरपरिषद मुदखेड, नगरपरिषद लोहा, नगरपंचायत हिमायतनगर याठिकाणी सार्वत्रिक निवडणूकीचा कार्यक्रम राबविण्यात येणार आहे. जिल्ह्यातील 12 नगरपरिषद व एका नगरपंचायतीच्या निवडणूक  कार्यक्रमाच्या क्षेत्रात 1 लाख 47 हजार 165 पुरुष तर 1 लाख 50 हजार 858 स्त्री व इतर 20 असे एकूण 2 लाख 98 हजार 40 मतदार आपल्या मतदानाचा हक्क 351 संभाव्य मतदान केंद्रावर बजावतील. 

12 नगरपरिषदांमध्ये नगरपरिषद देगलूर ही ब वर्गवारीची असून बाकी सर्व क वर्गवारीच्या नगरपरिषद व नगरपंचायत आहेत. या सर्व नगरपरिषद व नगरपंचायतीमध्ये एकूण प्रभाग संख्या 141 आहे. या निवडणुकांसाठी निवडणूक कार्यक्रम जारी करण्याची तारीख 6 नोव्हेंबर 2025 असून नामनिर्देशनपत्र दाखल करण्यास 10 नोव्हेंबर 2025 पासून सुरुवात होईल. नामनिर्देशपत्र दाखल करण्याची अंतिम तारीख 17 नोव्हेंबर 2025 रोजी 3 वाजेपर्यत राहील. या कालावधीत येणाऱ्या रविवार या सुट्टीच्या दिवशी नामनिर्देशनपत्र स्विकारण्यात येणार नाहीत. नामनिर्देशनपत्रांची छाननी व वैधरित्या नामनिर्देशित झालेल्या उमेदवारांची यादी 18 नोव्हेंबर 2025 रोजी होईल. 

निवडणूक निर्णय अधिकाऱ्यांच्या निर्णयाविरुद्ध अपील नसलेल्या ठिकाणी 21 नोव्हेंबर 2025 पर्यंत; तर अपील असलेल्या ठिकाणी 25 नोव्हेंबर 2025 पर्यंत नामनिर्देशनपत्रे मागे घेता येतील. निवडणूक चिन्ह नेमून देण्याचा तसेच अंतिमरित्या निवडणूक लढविणाऱ्या उमेदवारांची यादी 26 नोव्हेंबर 2025 रोजी प्रसिध्द होईल. 

मंगळवार 2 डिसेंबर 2025 रोजी सकाळी 7.30 ते सायंकाळी 5.30 पर्यंत मतदानाची वेळ असेल. मतमोजणी सर्व संबंधित ठिकाणी बुधवार 3 डिसेंबर 2025 रोजी सकाळी 10 वाजल्यापासून सुरु होईल. निकाल जाहीर झाल्यानंतर नगरपरिषदा व नगरपंचायतींच्या क्षेत्रापुरती आचारसंहिता संपुष्टात येईल.

जात वैधता प्रमाणपत्राबाबत

राखीव जागेवर निवडणूक लढविणाऱ्या उमेदवारांना जात प्रमाणपत्र व जातवैधता प्रमाणपत्र सादर करणे आवश्यक आहे. परंतु जातवैधता प्रमाणपत्र उपलब्ध नसल्यास त्यासाठी पडताळणी समितीकडे केलेल्या अर्जाची पोहोच पावती नामनिर्देशनपत्रासोबत सादर करण्याची मुभा आहे. तसेच नामनिर्देशन पत्रासोबत जात वैधता प्रमाणपत्र सादर करण्यासाठी निवडून आल्याच्या दिनांकापासून 6 महिण्याच्या आत शासनाच्या 3 नोव्हेंबर 2025 च्या अध्यादेशाद्वारे तरतुद करण्यात आली आहे. त्यानुसार कार्यवाही करण्याचे तसेच उमेदवार निवडून आल्याचे घोषित झाल्याच्या दिनांकापासून अधिनियमातील तरतुदीनुसार जातवैधता प्रमाणपत्र सादर न केल्यास त्यांची निवड भूतलक्षी प्रभावाने रद्द करण्यात येईल असे विहित केलेले हमीपत्र उमेदवारांने सादर करणे आवश्यक आहे. 

नामनिर्देशनाबाबत 

नामनिर्देशन स्विकारण्याची प्रक्रीया संगणक प्रणालीद्वारे राबविण्यात येत असल्याने नामनिर्देशन व शपथपत्र राज्य निवडणूक आयोगाकडील सॉफ्टवेअर द्वारेच भरणे आवश्यक आहे. निवडणूक लढवू इच्छीत असणाऱ्या उमेदवारांनी https://mahasecelec.in संकेतस्थळावर स्वत: नोंदणी करावी व नामनिर्देशनपत्रामध्ये तसेच शपथपत्रामध्ये माहिती भरावी. त्याची प्रिंट घेवून त्यावर स्वाक्षरी करुन ते निवडणूक निर्णय अधिकऱ्यांकडे विहित वेळेत व विहित पध्दतीने दाखल करावे. अशा प्रकारे भरलेला व स्वाक्षरी केलेला नामनिर्देशन पत्राचा अर्ज नामनिर्देशनपत्र म्हणून ग्राह्य धरण्यात येईल.  

संभाव्य दुबार नावांबाबत दक्षता

स्थानिक स्वराज्य संस्थांच्या मतदार यादीतील संभाव्य दुबार मतदाराच्या नावासमोर (**) असे चिन्ह नमूद करण्यात आले आहे. असे मतदार कुठल्या मतदान केंद्रावर मतदान करणार आहेत, याबाबत त्यांना आवाहन करण्यात येईल. या आवाहनाला प्रतिसाद मिळाल्यानंतर अशा मतदारांकडून तो कोणत्या मतदान केंद्रावर मतदान करणार आहे, याबाबत विहित नमुन्यात अर्ज भरून घेतला जाईल. त्याने नमूद केलेले मतदान केंद्र वगळता त्यास उर्वरित कोणत्याही मतदान केंद्रावर मतदान करता येणार नाही; परंतु प्रतिसाद न मिळाल्यास संभाव्य दुबार नाव असलेला मतदार मतदान केंद्रावर मतदानासाठी आल्यास त्याच्याकडून त्याने इतर कोणत्याही मतदान केंद्रावर मतदान केले नसल्याबाबत किंवा करणार नसल्याचे विहित नमुन्यातील हमीपत्र लिहून घेण्यात येईल. त्याचबरोबर त्याची काटेकोरपणे ओळख पटल्यानंतरच त्याला संबंधित मतदान केंद्रावर मतदान करण्याची मुभा देण्यात येईल.

आचारसंहिता

निवडणूक कार्यक्रम जाहीर झाल्यापासून संबंधित नगरपरिषदा व नगरपंचायतींच्या संपूर्ण क्षेत्रात आचारसंहिता लागू झाली असून ती निवडणूकीचा निकाल जाहीर होईपर्यत अंमलात राहील. नगरपरिषदा व नगरपंचायतींच्या कार्यक्षेत्रात ही आचारसंहिता लागू असली तरी अन्य ठिकाणीदेखील नगरपरिषदा व नगरपंचायतींच्या मतदारांवर प्रभाव पाडणारी घोषणा किंवा कृती करता येणार नाही. नैसर्गिक आपत्तीबाबत करावयाच्या उपाययोजना किंवा मदतीसंदर्भात आचारसंहितेची आडकाठी असणार नाही. आचारसंहिता आणि कायदा व सुव्यवस्थेसंदर्भात राज्य निवडणूक आयोगाने 4 नोव्हेंबर 2025 दोन स्वतंत्र आदेश निर्गमित केले आहेत.

महत्वाच्या तारखा

* नामनिर्देशनपत्र दाखल करण्यास सुरुवात- 10 नोव्हेंबर 2025

* नामनिर्देशनपत्रची दाखल करण्याची अंतिम मुदत- 17 नोव्हेंबर 2025

* नामनिर्देशनपत्रांची छाननी- 18 नोव्हेंबर 2025

* अपील नसलेल्या ठिकाणी नामनिदेशनपत्र माघारीची अंतिम मुदत - 21 नोव्हेंबर 2025

* अपील असलेल्या ठिकाणी नामनिदेशनपत्र माघारीची अंतिम मुदत- 25 नोव्हेंबर 2025

* मतदानाचा दिवस- 02 डिसेंबर 2025

* मतमोजणीचा दिवस- 03 डिसेंबर 2025

0000

 वृत्त क्रमांक 1161

"वंदे मातरम्" गीताच्या 150 व्या वर्धापन दिनानिमित्त कार्यक्रम 

नांदेड दि. 5 नोव्हेंबर :- "वंदे मातरम" या गीतास येत्या 7 नोव्हेंबर रोजी 150 वर्ष पुर्ण होत आहेत. ही एक आपल्यासाठी अभिमानास्पद बाब आहे. त्याअनुषंगाने  शुक्रवार 7 नोव्हेंबर 2025 रोजी श्री गुरू ग्रंथसाहिबजी भवन तहसील कार्यालय जवळ नांदेड येथे "वंदे मातरम्" गीताच्या 150 व्या वर्धापन दिनाचा कार्यक्रम साजरा होणार आहे. हा कार्यक्रम सकाळी 9.30 ते 10.45 या कालावधीत होईल. या कार्यक्रमासाठी मान्यवर व्यक्ती, विद्यार्थी, पालक व समाजातील विविध घटकांनी उपस्थित रहावे, असे आवाहन येथील श्री गुरू गोबिंदसिंघजी शासकीय औद्योगिक प्रशिक्षण संस्थेचे प्राचार्य सचिन सुर्यवंशी यांनी केले आहे.  

वंदे मातरम गीताने भारतीयांना एकत्र आणण्यात आणि देशभक्तीची भावना जागृत करण्यात महत्त्वाची भूमिका बजावली आहे. बंकिमचंद्र चट्टोपाध्याय यांनी हे गीत लिहिले असून, 1896 साली रवींद्रनाथ टागोर यांनी प्रथमच ते गायले होते. वंदे मातरमने भारताच्या स्वातंत्र्यलढ्यात अत्यंत प्रेरणादायी भूमिका निभावली. वंदे मातरम हे भारतमातेच्या ममतेचे प्रतीक आहे आणि ते ऐकताना प्रत्येक भारतीयाच्या मनात देशप्रेमाची भावना जागृत होते. राज्यातील शासकीय तालुका व जिल्हा औद्योगिक प्रशिक्षण संस्थामध्ये "वंदे मातरम्" गीताच्या 150 व्या वर्धापन दिनाचा कार्यक्रम आयोजित करण्यात येत आहे.

00000

वृत्त क्रमांक 1160  

​हमीभावाने मूग, उडीद, सोयाबीन खरेदीसाठी ऑनलाईन नोंदणी सुरू

 प्रत्यक्ष खरेदी 15 नोव्हेंबरपासून सुरू होणार 

नांदेड दि. 4 नोव्हेंबर :- केंद्र शासनाच्या किमान आधारभूत किंमत खरेदी अंतर्गत नाफेडच्यावतीने नांदेड जिल्ह्यात खरीप हंगाम 2025-26 मध्ये हमीभावाने मूग, उडीद, सोयाबीन खरेदीसाठी 30 ऑक्टोबर 2025 पासून ऑनलाईन पोर्टलवर नोंदणी करण्यासाठी एकूण 13 खरेदी केंद्र निश्चित करण्यात आले आहेत. प्रत्यक्षात सोयाबीन खरेदी शनिवार 15 नोव्हेंबर 2025 पासून सुरू होणार आहे. 

मुखेड तालुका खरेदी विक्री संघ मुखेड, हदगाव तालुका खरेदी विक्री संघ हदगाव, कुंडलवाडी विविध कार्यकारी से. सह. सो. कुंडलवाडी, नांदेड जिल्हा फळे व भाजीपाला सह.संस्था (अर्धापुर), तालुका खरेदी विक्री संघ बिलोली (कासराळी), पंडित दीनदयाल उपाध्याय अभिनव सह. संस्था देगलूर, बळीराम पाटील फळे​ व भाजीपाला सह.ख.वि.संस्था (बेरळी), मुखेड फळे व भाजीपाला सह.ख.वि. संस्था (उमरदरी), किनवट तालुका कृषिमाल प्रक्रिया सह. संस्था गणेशपूर (ता. किनवट), जय महाराष्ट्र शेतीमाल खरेदी विक्री सह.संस्था (कौठा), स्वामी विवेकानंद अभिनव सह. संस्था (शेळगाव थडी) ता. धर्माबाद, अष्टविनायक शेतीमाल खरेदी विक्री सह. संस्था मानवाडी फाटा (ता. हदगाव), महात्मा बसवेश्वर ग्रामीण विकास मंडळ बापशेटवाडी (मुक्रामाबाद) या ठिकाणी मार्केटिंग फेडरेशन मार्फत मूग, उडीद, सोयाबीन ऑनलाईन शेतकरी नोंदणी सुरू झाली आहे. 

शेतकरी बांधवांनी ऑनलाईन नोंदणी करण्यासाठी चालू हंगामातील मूग, उडीद, सोयाबीन या पिकांचा ई- पिक पाहणी अहवाल नोंद असलेला सात/बारा उतारा, आधारकार्ड व बँक पासबूक इत्यादी कागदपत्रे संबंधित तालुक्यातील खरेदी केंद्रावर देऊन नोंदणी करावी. सदरील नोंदणी ही ऑनलाईन पध्दतीने POS मशीनद्वारे करण्यात येणार असल्याने नोंदणीसाठी प्रत्यक्ष खरेदी केंद्रावर उपस्थित राहणे अनिवार्य आहे. शेतकरी बांधवांनी याची नोंद घ्यावी, असे आवाहन जिल्हा पणन अधिकारी राजेश हेमके यांनी केले आहे.

000000

 

 ई-मेल संदेश दि. 4 नोव्हेंबर, 2025

 प्रति ,

मा. संपादक / प्रतिनिधी

दैनिक वृत्‍तपत्र / दूरचित्रवाणी / इलेक्ट्रॉनिक मिडीया    

नांदेड जिल्‍हा 

महोदय, 

नांदेड जिल्ह्यातील 12 नगरपरिषदा व 01 नगरपंचायतीच्या सार्वत्रिक निवडणुकीसंदर्भात माहिती देण्यासाठी   मा. जिल्हाधिकारी राहुल कर्डिले हे उद्या बुधवार दि. 5.11.2025 रोजी सकाळी 11 वा. मा. जिल्हाधिकारी यांच्या दालनात पत्रकारांशी संवाद साधणार आहेत. 

तरी कृपया, आपण या पत्रकार परिषदेस उपस्थित रहावे, ही विनंती.   

पत्रकार परिषद दिनांक :-    05.11.2025(बुधवार)

वेळ                          :-   सकाळी 11.00 वा.

स्थळ                        :- जिल्हाधिकारी कार्यालय, नांदेड

 

            स्वा/-

प्र. जिल्‍हा माहिती अधिकारी,

            नांदेड

वृत्त क्रमांक 1159

जिल्हाधिकारी कार्यालयात मंगळवारी पेन्शन अदालतीचे आयोजन 

नांदेड दि. 4 नोव्हेंबर :- नांदेड जिल्ह्यातील महसूल विभागातून सेवानिवृत्त झालेले अधिकारी आणि कर्मचाऱ्यांच्या अडचणीचे निवारण करण्यासाठी नोव्हेंबर महिन्याच्या दुसऱ्या मंगळवारी 11 नोव्हेंबर 2025 रोजी सकाळी 11 ते 1.30 वा. जिल्हाधिकारी कार्यालय येथे पेन्शन अदालतीचे आयोजन करण्यात आले आहे. सेवानिवृत्त झालेले अधिकारी कर्मचारी यांनी अडचणी निवारण्यासाठी पेन्शन अदालतीच्या दिवशी उपस्थितीत राहून तक्रारीचे निवेदन द्यावेत, असे आवाहन जिल्हाधिकारी नांदेड यांनी केले आहे.

०००००

 वृत्त क्रमांक 1158

जिल्हा परिषद व पंचायत समित्यांच्या

सार्वत्रिक निवडणुकीसाठी अंतिम मतदार यादी प्रसिध्द

नांदेड दि. 4 नोव्हेंबर :- राज्य निवडणूक आयोग, महाराष्ट्र राज्य यांचेकडील 27 ऑक्टोबर 2025 च्या पत्रान्वये नांदेड जिल्ह्यातील जिल्हा परिषद व त्याअंतर्गत 16 पंचायत समित्यांची सार्वत्रिक निवडणुकीसाठी मतदार यादी तयार करण्याचा कार्यक्रम घोषित करण्यात आलेला आहे. 

त्यानुसार अंतिम मतदार यादी 3 नोव्हेंबर 2025 रोजी प्रसिध्द करण्यात आली आहे. अंतिम मतदार यादी संबंधित तहसिल कार्यालय, संबंधित पंचायत समिती कार्यालय, जिल्हाधिकारी कार्यालयाचे संकेतस्थळ https:nanded.gov.in यावर प्रसिध्द करण्यात आली आहे, असे जिल्हाधिकारी राहुल कर्डिले यांनी प्रसिध्दीपत्रकाद्वारे कळविले आहे. 

00000

 वृत्त क्रमांक 1157 

एम-सँड (कृत्रिम वाळू) उत्पादक म्हणून परवानगीसाठी अर्ज करण्याचे आवाहन

 

नांदेड दि. 4 नोव्हेंबर :- एम-सँड (कृत्रिम वाळू) धोरणाच्या अनुषंगाने 100 टक्के एम-सॅण्ड उत्पादीत करू इच्छिणाऱ्या व्यक्ती / संस्थाकडून योजनेच्या सवलती मिळवण्याकरीता अर्ज करावयाची कार्यपध्दती निश्चित करण्यात आली आहे. एम-सॅण्ड उत्पादीत करुन इच्छिणाऱ्या व्यक्ती / संस्थांनी आवश्यक कागदपत्रासह विहित मुदतीत 2 डिसेंबर 2025 पर्यंत नव्याने सवलती मिळण्यासाठी अर्ज करावेत, असे आवाहन जिल्हाधिकारी राहुल कर्डिले यांनी केले आहे.

 

शंभर टक्के एम-सॅण्ड (कृत्रिम वाळू) उत्पादित करु इच्छिणाऱ्या व्यक्ती, संस्था यांनी यापूर्वीच्या प्रसिध्दी पत्रकास प्रतिसाद देऊन अर्ज सादर केला असला तरीही त्यांना या प्रसिध्दीपत्रकाच्या अनुषंगाने नव्याने अर्ज सादर करणे आवश्यक आहे. एम - सॅण्ड (कृत्रिम वाळू) युनिटसाठी अर्ज करुन ईच्छिणारे व्यक्ती पुढीलप्रमाणे असणार आहेत. अ-मंजुर खाणपट्टा असलेले. ब-तात्पुरता परवाना असलेले. क- कोणताही प्रकरचा खाणपट्टा नसलेले.

 

राज्य शासनाच्या महसूल व वन विभागाचा शासन निर्णय 23 मे 2025 अन्वये नैसर्गिक वाळूला एम-सॅन्ड (कृत्रिम वाळू) पर्याय म्हणून विकास करण्याच्या अनुषंगाने शासनाने धोरण जाहीर केले आहे. या धोरणाची कशाप्रकारे अंमलबजावणी करण्यात येणार आहे. याबाबतची कार्यपध्दती काय असणार आहे त्याअनुषंगाने दिनांक 27 ऑक्टोबर 2025 रोजीच्या पत्रानुसार अंमलबजावणीबाबत कार्यपध्दती निश्चित केली आहे.

 

याद्वारे जिल्हयातील एम-सॅण्ड / (कृत्रिम वाळू) धोरणाच्या तरतुदी विचारात घेऊन 100 टक्के एम - सॅण्ड (कृत्रिम वाळू) उत्पादीत करुन ईच्छिणा-या व्यक्ती / संस्थेकडून या योजनेच्या सवलती मिळवण्याकरीता अर्ज मागविण्याची कार्यवाही पुढीलप्रमाणे आहे. प्रसिध्दीपत्रक 3 नोव्हेंबर 2025 रोजी केले असून सॅण्ड उत्पादीत करुन ईच्छिणाऱ्या व्यक्ती / संस्थांना अर्ज करण्याचा अंतिम मुदत 2 डिसेंबर 2025 आहे. हेतुपत्र निर्गमित करण्याचा दिनांक 9 डिसेंबर 2025 हा आहे.

 

हेतूपत्र निर्गमित केल्यानंतर जास्तीजास्त सहा महिन्याच्या आत आवश्यक त्या सर्व परवानग्या / नाहरकत प्रमाप्रमाणत्र मिळवून तसेच MPCB कडून CTO (Consent to Operate) प्राप्त करुन 100 टक्के एम - सॅण्ड (कृत्रिम वाळू) युनिट स्थापन करण्याची जबाबदारी संबंधीत व्यक्ती / संस्था यांची राहील. या कालावधीत हे युनिट स्थापन न झाल्यास हेतूपत्र आपोआप रद्द होईल.

 

या कार्यपध्दतीनुसार ज्या व्यक्ती / संस्था यांना हेतूपत्र देण्यात आले असेल केवळ अशा व्यक्ती / संस्था यांनाच महसुल व वन विभागाच्या 23 मे 2025 च्या शासन निर्णयातील परिच्छेद क्र.8 मध्ये नमुद केल्यानुसार शासनाच्या उद्योग, ऊर्जा, कामगार व खनिकर्म विभागाकडून दिले जाणारे गुंतवणूक प्रोत्साहन अनुज्ञेय असेल. अ-औद्योगिक प्रोत्साहन अनुदान. ब-व्याज अनुदान. क-विद्युत शुल्कातून सुट. ड-मुद्रांक शुल्क माफी. इ-वीज दर अनुदान.

 

पात्र एम-सॅण्ड (कृत्रिम वाळू) युनीटधारक यांची नावे व इतर तपशील नमुद करुन याबाबतचे स्वतंत्र प्रमाणपत्र उद्योग विभागास निर्गमित करण्यात येईल. तथापि मुद्रांक शुल्क वगळता या सवलती 100 टक्के एम-सॅण्ड (कृत्रिम वाळू) उत्पादन सुरु केल्याच्या दिनांकापासून लागू राहतील. अशा सवलती प्राप्त झालेल्या व्यक्ती, संस्था यांनी 100 टक्के कृत्रिम वाळू उत्पादन बंद केल्यास आपोआप या सवलती लागू होणे बंद होईल.

 

शंभर टक्के एम-सॅण्ड (कृत्रिम वाळू) उत्पादन करण्यात येत आहे किंवा कसे व उत्पादन होणारी एम-सॅण्ड (कृत्रिम वाळू) ही विहीत गुणवत्तेनुसार होत आहे किंवा नाही याची पडताळणी संबंधीत यंत्रणेमार्फत करण्यात येईल. याव्यतिरीक्त 100 टक्के एम-सॅण्ड (कृत्रिम वाळू) उत्पादन करणाऱ्या खाणपट्टाधारक यांना महसुल व वन विभागाच्या 23 मे 2025 रोजीच्या शासन निर्णयाच्या परिच्छेद 7 (ix) मध्ये नमूद केल्याप्रमाणे स्वामित्व धानातून 400 ब्रास प्रती ब्रास इतकी सवलत देण्यात येईल.

 

हे धोरण अस्तित्वात येण्यापूर्वीच काही व्यक्ती / संस्था यांनी एम-सॅण्ड (कृत्रिम वाळू)चे उत्पादन सुरु केले असल्याचे व आवश्यक कागदपत्रासह अर्ज केल्यास सदर युनिट धारकास हेतूपत्र निर्गमित करण्यात येईल. सदर हेतूपत्र निर्गमित केल्याच्या दिनांकापासून महसूल व उद्योग विभागाच्या सवलती लागू करण्यात येतील. एम-सॅण्ड (कृत्रिम वाळू) युनिट करीता लागणाऱ्या गौण खनिजाच्या स्त्रोत बदलबाबतची माहिती सादर करणे आवश्यक आहे. सदर स्त्रोतामध्ये बदल करावयाचा असल्यास एक महिना अगोदर लेखी कळवून व मान्यतेने असा बदल करता येईल.

 

एम-सॅण्ड (कृत्रिम वाळू) व्यतिरीक्त सदर गौण खनिजाचा वापर इतर उपउत्पादनासाठी करीत असल्याचे निदर्शनास आल्यास हेतपूत्र रद्द करुन उद्योग विभागाच्या सवलती बंद करण्यात येतील व खाणपट्टाधारक यांच्यावर महाराष्ट्र गौण खनिज उत्खनन विकास व विनियमन 2013 च्या अंतर्गत बंद करण्याची कार्यवाही करण्यात येईल. विहित नमुद केलेले आवश्यक कागदपत्रासह विहीत मुदतीत नव्याने अर्ज करुन कृत्रिम वाळू धोरणाच्या अनुषंगाने सवलती मिळण्यासाठी अर्ज करावेत, असेही आवाहन जिल्हाधिकारी राहुल कर्डिले यांनी केले आहे.

0000