राजा राममोहन रॉय ग्रंथालय योजनेसाठी   

प्रस्ताव सादर करण्याचे आवाहन

नांदेड दि. 7 :-  राजा राममोहन रॉय ग्रंथालय प्रतिष्ठानच्या योजनेसाठी इच्छुकांनी संबंधित जिल्हा ग्रंथालय अधिकारी कार्यालयांशी संपर्क साधावा तसेच अधिक माहितीसाठी प्रतिष्ठानचे  www.rrlf.nic.in  हे संकेतस्थळ पहावे. ग्रंथालयांनी समाननिधी व असमाननिधी योजनेसाठी विहित पध्दतीत आवश्यक त्या सर्व कागदपत्रांसह इंग्रजी, हिंदी भाषेमधील प्रस्ताव चार प्रतीत संबंधित जिल्हा ग्रंथालय अधिकारी कार्यालयास गुरुवार 24 ऑगस्ट 2017 पर्यंत पोहचतील अशा बेताने पाठवावेत, असे आवाहन शासनमान्य सार्वजनिक ग्रंथालयांना ग्रंथालय संचालक किरण धांडेारे यांच्यावतीने जिल्हा ग्रंथालय अधिकारी नांदेड यांनी केले आहे.

भारत सरकारच्या सांस्कृतिक कार्य विभागातंर्गत राजा राममोहन रॉय ग्रंथालय प्रतिष्ठान कोलकाता अंतर्गत शासनमान्य सार्वजनिक ग्रंथालयासाठी कार्यन्वित असलेल्या अर्थसहाय्याच्या समान निधी व असमान निधी योजनेमधुन ग्रंथालय संचालनालय मुंबई यांच्यामार्फत दरवर्षी अर्थसहाय्य देण्यात येते. त्यासंदर्भातील नियम, अटी व अर्जाचा नमुना www.rrlf.nic.in  या प्रतिष्ठानच्या संकेतस्थळावर उपलब्ध आहे. इच्छुकांनी तो या संकेतस्थळावरुन उपलब्ध करुन घ्यावा, असे आवाहन जिल्हा ग्रंथालय अधिकारी सुनिल हुसे यांनी केले आहे.

समान निधी योजना 2016-17 साठी राज्य शासनाच्या 50 टक्के व प्रतिष्ठानच्या 50 टक्के अर्थसहाय्य राहील. सार्वजनिक ग्रंथालयांना इमारत विस्तार, बांधणीसाठी अर्थसहाय्य कमाल मर्यादा 10 लाख आहे. असमान निधी योजना 2016-17 व 2017-18 साठी ग्रंथालय सेवा देणा-या स्वयंसेवी संस्थांना ग्रंथ, साधन सामग्री, फर्निचर, इमारत बांधकाम व इमारत विस्तार यासाठी असमान निधीतून अर्थसहाय्य यामध्ये प्रतिष्ठानचे 75 टक्के व इच्छूक ग्रंथालय 25 टक्के हिस्सा असेल. सार्वजनिक ग्रंथालयातील बाल विभाग, महिला विभाग, ज्येष्ठ नागरिक विभाग, नवसाक्षर विभाग, स्वतंत्र स्पर्धा परीक्षा विभाग आदीसाठी तसेच बाल विभाग स्थापन करण्यासाठी सार्वजनिक ग्रंथालयांना अर्थसहाय्य प्रतिष्ठानकडून 100 टक्के  राहील. महोत्सवी वर्ष जसे 50, 60, 75, 100, 125, 150 वे वर्ष साजरे करण्यासाठी प्रतिष्ठानकडून 100 टक्के अर्थसहाय्य. शारिरिकदृष्टया विकलांग व्यक्तीसाठी विभाग स्थापन करण्यासाठी ग्रंथालयांना प्रतिष्ठानकडून 100 टक्के अर्थसहाय्य राहील.

0000000