वृत्त क्रमांक  

जिल्हा युवा पुरस्कारासाठी 22 एप्रिलपर्यत अर्ज करण्याचे आवाहन

नांदेड दि. 13 एप्रिल : जिल्हा युवा पुरस्कारासाठी अर्ज करण्याची अंतिम तारीख 22 एप्रिल 2026 असून, अर्जाचा नमुना जिल्हा क्रीडा अधिकारी कार्यालय, नांदेड येथे कार्यालयीन वेळेत उपलब्ध आहे. जिल्ह्यातील अधिकाधिक युवक-युवती व संस्थांनी या पुरस्कारासाठी अर्ज सादर करावेत, असे आवाहन जिल्हा क्रीडा अधिकारी महादेव कसगावडे यांनी केले आहे. 

अधिक माहितीसाठी राज्य क्रीडा मार्गदर्शक बालाजी शिरसीकर यांच्याशी संपर्क साधावा असेही कळविले आहे.

राष्ट्र व राज्याच्या उभारणीत युवकांची भूमिका अत्यंत महत्त्वाची असून राज्यातील युवक व विविध संस्था सामाजिक क्षेत्रात मोठ्या प्रमाणावर कार्यरत आहेत. युवांमधील सुप्त गुणांना वाव देणे, त्यांच्या कार्याला प्रोत्साहन देणे व त्यांचा गौरव करणे आवश्यक आहे. राज्याच्या युवा धोरणांतर्गत शालेय शिक्षण व क्रीडा विभागाच्या 12 नोव्हेंबर 2013 च्या शासन निर्णयानुसार राज्य युवा पुरस्कार प्रदान करण्यात येतात.

सन 2025-26 या वर्षासाठी जिल्हा युवा पुरस्कारांतर्गत जिल्ह्यातील उत्कृष्ट कार्य करणाऱ्या 1 युवक, 1 युवती आणि 1 नोंदणीकृत संस्था यांची निवड करण्यात येणार आहे.

अर्जदारांनी सामाजिक क्षेत्र, शैक्षणिक कार्य, स्वच्छता, व्यसनमुक्ती, पर्यावरण संवर्धन, तसेच राज्य व देशाच्या साधनसंपत्तीचे जतन आणि दुर्बल घटकांसाठी स्वयंप्रेरणेने केलेले कार्य यामध्ये योगदान दिलेले असणे अपेक्षित आहे. अर्जासोबत संबंधित कार्याचे पेपर कात्रणे, छायाचित्रे जोडणे आवश्यक आहे. तसेच मागील तीन वर्षांच्या कार्याचा आढावा, पुढील दोन वर्षे सातत्याने सामाजिक कार्य करण्याचे हमीपत्र व चारित्र्य प्रमाणपत्र सादर करणे आवश्यक आहे.

पुरस्काराचे स्वरूप पुढीलप्रमाणे आहे :

युवक व युवती यांना प्रत्येकी रु. 10 हजार रुपये रोख, संस्थेस 50 हजार रुपये, याशिवाय गौरवपत्र व सन्मानचिन्ह प्रदान करण्यात येणार आहे.

00000

वृत्त क्रमांक  

सामाजिक समता सप्ताहांतर्गत संविधान जागर व महिला मेळावा संपन्न

नांदेड, दि. 12 एप्रिल :- भारतरत्न डॉ. बाबासाहेब आंबेडकर सामाजिक समता सप्ताह-2026 अंतर्गत आज 12 एप्रिल 2026 रोजी सकाळी 11 वाजता समाज कल्याण कार्यालय येथील सांस्कृतिक सभागृहात “संविधान जागर व महिला मेळावा” उत्साहात संपन्न झाला.

कार्यक्रमाच्या अध्यक्षस्थानी सहायक आयुक्त शिवानंद मीनगिरे हे होते. प्रमुख पाहुणे व मार्गदर्शक म्हणून महिला व मुलांकरिता सहाय्यक कक्ष, पोलीस मुख्यालय, नांदेड येथील समुपदेशक मोनिका वामन बिरादार उपस्थित होत्या. तसेच समाज कल्याण अधिकारी गजानन नरवाडे व वरिष्ठ समाज कल्याण निरीक्षक लक्ष्मी गायके यांचीही प्रमुख उपस्थिती होती.

कार्यक्रमाची सुरुवात दीपप्रज्वलन व महात्मा ज्योतिबा फुले, राजर्षी शाहू महाराज आणि भारतरत्न डॉ. बाबासाहेब आंबेडकर यांच्या प्रतिमेस पुष्पहार अर्पण करून अभिवादनाने करण्यात आली. यानंतर मान्यवरांचा भारतीय संविधान उद्देशिकेची प्रत व पुष्पगुच्छ देऊन सन्मान करण्यात आला.

या मेळाव्यात डॉ. बाबासाहेब आंबेडकर यांनी महिलांसाठी केलेल्या कार्याबाबत सविस्तर माहिती देण्यात आली. तसेच संविधान जागर अंतर्गत भारतीय संविधानाची निर्मिती प्रक्रिया, समित्या, अनुच्छेद, मूलभूत अधिकार व कर्तव्ये याविषयी व्याख्यान आयोजित करण्यात आले.

प्रास्ताविक समाज कल्याण अधिकारी गजानन नरवाडे यांनी केले. त्यांनी महिलांना दैनंदिन जीवनातील समस्या, बालविवाह प्रतिबंधक कायदा, हुंडाबळी प्रतिबंधक कायदा तसेच अनुसूचित जाती-जमाती अत्याचार प्रतिबंधक अधिनियम 1989 याबाबत माहिती दिली.

समुपदेशक मोनिका बिरादार यांनी महिलांसाठी असलेल्या विविध कायद्यांविषयी मार्गदर्शन करताना महिलांनी आपल्या हक्कांविषयी सजग राहण्याचे आवाहन केले.

कार्यक्रमाचा अध्यक्षीय समारोप शिवानंद मीनगिरे यांनी केला. सूत्रसंचालन गजानन पापटवार यांनी तर आभार प्रदर्शन लक्ष्मी गायके यांनी केले. कार्यक्रमाची सांगता राष्ट्रगीताने करण्यात आली.

हा कार्यक्रम सहायक आयुक्त शिवानंद मीनगिरे यांच्या मार्गदर्शनाखाली यशस्वीरीत्या पार पडला.

0000

 भारतातील सर्वसमावेशक, शाश्वत आणि मूल्याधारित उद्योजकतेला चालना देणारी #MudraYojana महत्त्वाची शक्ती.

वृत्त क्रमांक  

जनगणनेची अचूक माहिती देऊन राष्ट्रनिर्मितीत सहकार्य करा – जिल्हाधिकारी राहुल कर्डीले 

नांदेड, दि. ११ एप्रिल:– जनगणना फील्ड ट्रेनर्सच्या तीन दिवसीय प्रशिक्षण वर्गाचे उद्घाटन जिल्हाधिकारी राहुल कर्डीले यांच्या हस्ते करण्यात आले. 

यावेळी बोलताना त्यांनी सांगितले की, भारताची जनगणना ही देशातील 16 वी जनगणना असून स्वातंत्र्यानंतरची आठवी जनगणना आहे.

ही जनगणना पूर्णपणे डिजिटल स्वरूपात होणारी पहिलीच जनगणना असून ती अधिक अचूक, वेगवान आणि पर्यावरणपूरक असेल. यामध्ये प्रथमच सामान्य नागरिकांना पोर्टलद्वारे स्वगणनेची सुविधा उपलब्ध करून देण्यात आली आहे.

जनगणना ही भारतीय संविधानात नमूद केलेली अत्यंत महत्त्वाची प्रक्रिया असून लोकशाहीचा पाया अधिक भक्कम करण्यासाठी तिची भूमिका महत्त्वाची आहे. जनगणनेद्वारे गोळा होणारी माहिती ही राष्ट्रनिर्मितीचा आधार असून यावरच विकास योजना, धोरणनिर्मिती, कल्याणकारी योजना आणि पायाभूत सुविधांचे नियोजन ठरवले जाते.

त्यामुळे नांदेड जिल्ह्यातील सर्व नागरिकांनी मे आणि जून २०२६ या कालावधीत आपल्या घरी येणाऱ्या प्रगणकांना अचूक माहिती देऊन राष्ट्रनिर्मितीत सहकार्य करावे, असे आवाहन जिल्हाधिकारी श्री कर्डीले यांनी केले.

या प्रशिक्षण कार्यक्रमाचे आयोजन जिल्हाधिकारी कार्यालयातील जिल्हा नियोजन सभागृहात करण्यात आले आहे. उद्घाटनप्रसंगी निवासी उपजिल्हाधिकारी किरण अंबेकर, महानगरपालिकेचे उपायुक्त अभिजित वायकोस, सहाय्यक आयुक्त श्रीमती मनीषा नरसाळे, तसेच जनगणना संपर्क अधिकारी नेहाल धुरंधरे उपस्थित होते.

प्रशिक्षणासाठी प्रशिक्षक म्हणून संजय सोळंकर, गिरीश सर्कलवाड आणि संघरत्न सोनसळे हे मार्गदर्शन करणार आहेत.

000000

 वृत्त क्रमांक  

क्रांतीसुर्य महात्मा ज्योतिबा फुले यांच्या द्विशताब्दी वर्षानिमित्त भव्य प्रभात फेरी

नांदेड, दि. ११ एप्रिल : क्रांतीसुर्य महात्मा ज्योतिबा फुले यांच्या द्विशताब्दी वर्षानिमित्त आज ११ एप्रिल २०२६ रोजी सकाळी ७.३० ते ९ या वेळेत सहाय्यक संचालक, इतर मागास बहुजन कल्याण विभाग, नांदेड यांच्या वतीने स्व. वसंतराव नाईक चौक ते महात्मा ज्योतिबा फुले यांच्या पुतळ्यापर्यंत भव्य प्रभात फेरीचे आयोजन करण्यात आले.

या प्रभात फेरीत शासकीय मुलांचे व मुलींचे वसतिगृह तसेच महाविद्यालयीन सुमारे ३०० विद्यार्थ्यांनी उत्स्फूर्त सहभाग नोंदविला. प्रभात फेरीदरम्यान विद्यार्थ्यांनी पथनाट्य सादर करून तसेच शैक्षणिक संदेशपर कविता सादर करून सामाजिक जागृतीचा प्रभावी संदेश दिला.

यानंतर महात्मा ज्योतिबा फुले यांच्या पुतळ्यास पुष्पहार अर्पण करण्यात आला. यावेळी जिल्हाधिकारी राहुल कर्डिले प्रमुख उपस्थित होते. त्यांनी उपस्थित विद्यार्थ्यांना व मान्यवरांना द्विशताब्दी वर्षानिमित्त शुभेच्छा दिल्या तसेच समग्र वाङ्मय ग्रंथ भेट म्हणून प्रदान केले. कार्यक्रमाच्या उत्कृष्ट आयोजनाबद्दल इतर मागास बहुजन कल्याण विभाग, नांदेड येथील सर्व अधिकारी व कर्मचाऱ्यांचे त्यांनी कौतुक केले.

कार्यक्रमाच्या शेवटी नांदेड जिल्ह्याचे सहाय्यक संचालक सचिन खुणे यांनी उपस्थितांचे आभार मानून कार्यक्रमाची सांगता केली.

००००००

वृत्त क्रमांक  

पोलीस अंमलदारांना अधिकार प्रदान  

नांदेड दि. 11 एप्रिल :- आगामी काळात संपुर्ण नांदेड जिल्ह्यात 14 एप्रिल 2026 रोजी आंबेडकरी अनुयायी यांच्यावतीने भारतरत्न डॉ. बाबासाहेब आंबेडकर यांची 135 वी जयंती मोठ्या उत्साहात दरवर्षी साजरी करण्यात येते. त्यामुळे 14 एप्रिल 2026 रोजी तसेच त्यानंतर 15 ते 30 एप्रिल 2026 या कालावधीतसुद्धा जिल्ह्यातील ग्रामीण भागात भारतरत्न डॉ. बाबासाहेब आंबेडकर यांची जयंती मिरवणुका व इतर कार्यक्रमांचे आयोजन करुन साजरी करण्यात येत असते. त्याअनुषंगाने डॉ. बाबासाहेब आंबेडकर जयं​ती दरम्यान कायदा व सुव्यवस्थेचा प्रश्न निर्माण होवु नये व जिल्ह्यात शांतता टिकुन राहावी म्हणुन नांदेडचे पोलीस अधीक्षक अबिनाश कुमार यांनी महाराष्ट्र पोलीस कायदा अधिनियम 1951 प्रमाणे प्रदान झालेल्या अधिकारान्वे पुढील प्रमाणे आदेश निर्गमीत केला आहे. 

12 एप्रिल 2026 चे 00:01 वाजता पासून ते 1 मे 2026 चे 24:00 वाजता पर्यत नांदेड जिल्ह्यातील सर्व पो.स्टे. स्वाधिन अधिकारी त्यांच्या अधिनस्त अधिकारी व अंमलदार यांना महाराष्ट्र पोलीस कायदा कलम 36 मधील पोट कलम "अ" ते "ई" प्रमाणे पुढील लेखी किंवा तोंडी आदेश आपआपल्या हद्दीत देण्याचा अधिकार प्रदान करण्यात आला आहे. 

रस्त्यावरील व रस्त्यावरून जाणाऱ्या मिरवणुकीतील किंवा जमावातील लोकांनी कोणत्या रितीने चालावे कोणत्या रितीने वागावे ते फर्माविण्यासाठी. अशा कोणत्याही मिरवणुकांना कोणत्या मार्गाने आणि कोणत्या वेळी जावे किंवा जाऊ नये हे ठरविण्याबद्दल. सर्व मिरवणुकीच्या व जमावाच्या प्रसंगी व पूजा-अर्चनेच्या प्रार्थना स्थळांच्या सर्व जागेच्या आसपास पुजे-अर्चेनेच्या वेळी कोणताही रस्ता किंवा सार्वजनिक जागा येथे गर्दी होणार असेल किंवा अडथळे होण्याचा संभव असेल अशा सर्व बाबतीत अडथळा होण्याचा संबध असेल अशा सर्व बाबतीत अडथळा होऊ न देण्याबाबत. 

सर्व रस्त्यावर किंवा रस्त्यामध्ये सर्व धक्यावर व धक्यामध्ये आणि सार्वजनिक स्नानाच्या कपडे धुण्याच्या व उतरण्याच्या जागेमध्ये व इतर कर्कश वाद्य वाजविणे वगैरेचे नियमन करण्याबद्दल आणि त्यावर नियंत्रण ठेवण्याबाबत.

महाराष्ट्र पोलीस अधिनियम कलम 33, 35 ते 40, 42, 43, 45 या अन्वये नमुद केलेल्या कोणत्याही हुकूमापेक्षा कमी दर्जाचे व त्यापुष्टी देणारे दुय्यम अधिकाऱ्यांना जबाबदारीवर हुकूम करण्याचा मार्गदर्शन पर आदेश देण्याबाबत. तसेच सार्वजनिक ठिकाणी अथवा सार्वजनिक करमणुकीचे ठिकाणी ध्वनीक्षेपण आवाजावर नियंत्रण ठेवण्यासाठी सूचना देण्यासंबंधी. 

कोणीही सदरचा आदेश लागू असे पर्यंत नांदेड जिल्ह्यात जाहिर सभा, मोर्चे, निदर्शने, पदयात्रा इत्यादी कार्यक्रम संबधीत पोलीस फौजदार किंवा त्यांच्या वरिष्ठांकडून तारीख व वेळ, सभेची जागा मिरवणुकीचा व मोर्चाचा मार्ग, त्यात दिल्या जाणाऱ्या घोषणा पूर्व परवानगी शिवाय आयोजित करु नयेत. तसेच संबंधीत पोलीस अधिकाऱ्यांनी दिलेले आदेशांचे पालन करावे. सदर जाहिर सभा, मिरवणुक पदयात्रा, समायोचीत घोषणा सोडून किंवा ज्या घोषणांनी शांतता व सुव्यवस्थेला बांधा येवु शकतो अशा घोषणा देऊ नयेत. 

सदरचा आदेश लग्नाच्या वरातीस, प्रेत यात्रेस लागु नाही. या आदेशाचे उल्लंघन केल्यास तो महाराष्ट्र पोलीस कलम 134 प्रमाणे अपराधास पात्र ठरेल. सदरचा आदेश दिनांक 12 एप्रिल 2026 चे 00:01 वाजेपासून ते 1 मे 2026 रोजीचे 24:00 वाजेपर्यंत लागु राहिल. हा आदेश नांदेडचे पोलीस अधिक्षक अबिनाश कुमार यांनी 10 एप्रिल 2026 रोजी निर्गमीत केला आहे.

00000

 वृत्त क्रमांक  

सामाजिक समता सप्ताहांतर्गत क्रांतीसूर्य महात्मा ज्योतीबा फुले जयंती उत्साहात साजरी

नांदेड,दि.११ एप्रिल:- भारतरत्न डॉ. बाबासाहेब आंबेडकर सामाजिक समता सप्ताह-२०२६ अंतर्गत आज ११ एप्रिल रोजी सकाळी ९ वाजता नांदेड येथे क्रांतीसूर्य महात्मा ज्योतीबा फुले व क्रांतीज्योती सावित्रीबाई फुले यांच्या पूर्णाकृती पुतळ्यांना पुष्पहार अर्पण करून अभिवादन करण्यात आले.

हा कार्यक्रम जिल्हाधिकारी राहूल कर्डीले व सहाय्यक आयुक्त शिवानंद मिनगीरे यांच्या हस्ते पार पडला. यावेळी समाज कल्याण विभागातील अधिकारी, कर्मचारी, तालुका समन्वयक व समतादूत मोठ्या संख्येने उपस्थित होते.

जयंतीनिमित्त उपस्थित विद्यार्थी व नागरिकांना शुभेच्छा देत जिल्हाधिकारी राहूल कर्डीले व सहाय्यक आयुक्त शिवानंद मिनगीरे यांनी महात्मा ज्योतीबा फुले यांच्या महान कार्याची माहिती दिली. 

त्यानंतर समाज कल्याण कार्यालयाच्या सांस्कृतिक सभागृहात जयंतीनिमित्त कार्यक्रमाचे आयोजन करण्यात आले.

कार्यक्रमाच्या अध्यक्षस्थानी सहायक आयुक्त शिवानंद मिनगीरे होते. प्रमुख पाहुणे म्हणून डॉ. भिमराव हाटकर (सामाजिक कार्यकर्ते), राज गोडबोले (सामाजिक कार्यकर्ते), संभाजी कांबळे (दै. सम्राट प्रतिनिधी) व गजानन नरवाडे (समाज कल्याण अधिकारी) उपस्थित होते.

कार्यक्रमाची सुरुवात महात्मा ज्योतीबा फुले, राजर्षी शाहू महाराज आणि डॉ. बाबासाहेब आंबेडकर यांच्या प्रतिमांना पुष्पहार अर्पण व दीपप्रज्वलनाने करण्यात आली. यानंतर मुख्य वक्ते डॉ. भिमराव हाटकर यांनी महात्मा ज्योतीबा फुले यांच्या जीवनकार्यावर सखोल मार्गदर्शन केले.

अध्यक्षीय भाषणात सहायक आयुक्त शिवानंद मिनगीरे यांनी महात्मा ज्योतीबा फुले यांच्या विचारांचे महत्त्व अधोरेखित करत उपस्थितांना प्रेरणादायी मार्गदर्शन केले. कार्यक्रमात सामूहिक संविधान वाचन करण्यात आले.

कार्यक्रमाचे सूत्रसंचालन गजानन पापंटवार (तालुका समन्वयक) यांनी केले, तर आभार प्रदर्शन गजानन नरवाडे यांनी केले. राष्ट्रगीताने कार्यक्रमाची सांगता झाली. हा कार्यक्रम सहाय्यक आयुक्त शिवानंद मिनगीरे यांच्या मार्गदर्शनाखाली यशस्वीरीत्या पार पडला.

यानंतर सामाजिक समता सप्ताह-२०२६ अंतर्गत स्वयंसेवी संस्थांच्या सहकार्याने समाज कल्याण विभागाच्या कर्मचाऱ्यांनी अशोक नगर, नांदेड येथील नवबौद्ध वस्तीत स्वच्छता अभियान राबविले.

०००००