अर्थ व सांख्यिकी संचालनालयाच्या राज्यस्तरीय

क्षेत्रीय अधिकाऱ्यांसाठी आयोजित कार्यशाळा संपन्न

 

नांदेड (जिमाका) दि. 26 :- अर्थ व सांख्यिकी संचालनालय, मुंबईच्यावतीने यशदा पुणे येथे 19 ते 21 एप्रिल 2023 या कालावधीत राज्यातील क्षेत्रीय अधिकाऱ्यांची तीन दिवसीय कार्यशाळा संपन्न झाली.

 

कार्यशाळेच्या उद्घाटन यशदाचे महासंचालक एस. चोकलिंगम व प्रमुख पाहूणे म्हणून औद्योगिक सांख्यिकी विभागाच्या उपमहानिदेशक सौम्या चक्रवर्ती, पुणे येथील राष्ट्रीय नमुना पाहणी विभागाच्या क्षेत्रीय कार्यालयाचे संचालक आलोक कुमार, उद्योग विभागाचे महाव्यवस्थापक प्रतिनिधी पी.डी.रेंदाळकर उपस्थित होते. राज्यातील प्रादेशिक सांख्यिकी कार्यालयांचे सहसंचालक डॉ.किरण गिरगांवकर व जिल्हा सांख्यिकी कार्यालयाचे उपसंचालक निखिल बासटवार आणि क्षेत्रकाम करणारे कर्मचारी या कार्यशाळेत उपस्थित होते. एकूण 164 अधिकारी व कर्मचारी या कार्यशाळेत सहभागी झाले.

 

वार्षिक उद्योग पाहणी  हा उद्योगविषयक (संघटित क्षेत्र) महत्वपूर्ण आकडेवारीचा प्रमुख स्त्रोत आहे. या आकडेवारीचा वापर राष्ट्रीय उत्पन्न अंदाज (जीडीपी) तयार करण्यासाठी, औद्योगिक संरचनेचा अभ्यास करण्यासाठी व उद्योगविषयक धोरणे निश्चितीसाठी होतो. राष्ट्रीय स्तरावर सांख्यिकी कार्यालयाकडून देशातील सर्व राज्यांमधील प्रमुख उद्योगांच्या वार्षिक उद्योग पाहणीचे काम करण्यात येते. राज्यातील उद्योग पाहणीचे काम अर्थ व सांख्यिकी संचालनालय या राज्य शासनाच्या सांख्यिकी विषयक नोडल यंत्रणेकडून करण्यात येते.

 

निवड करण्यात आलेल्या उद्योगांना सांख्यिकी संग्रहण अधिनियम 2008 खालील तरतुदींनुसार माहिती देणे बंधनकारक आहे. संकलित करण्यात येणाऱ्या माहितीची गुणवत्ता वाढविण्यासाठी व क्षेत्रकामाचा दर्जा उंचाविण्याच्या द‌ृष्टीकोनातून सन 2021-22 या वर्षाच्या क्षेत्रकामासाठी राज्यातील क्षेत्रीय अधिकाऱ्यांची तीन दिवसीय कार्यशाळा 19 ते 21 एप्रिल 2023 या कालावधीत यशदा पुणे येथे आयोजित करण्यात आली होती.

 

जगात बहुतांश देशांमध्ये वार्षिक उद्योग पाहणी घेण्यात येते.  आपल्या देशातील वार्षिक उद्योग पाहणीमध्ये सर्वात अधिक उद्योगांची पाहणी केली जात असून ही अभिमानास्पद बाब असल्याचे उपमहानिदेशक सौम्या चक्रवर्ती यांनी नमूद केले. तसेच माहिती विहीत वेळेत संकलित करुन उपलब्ध करुन देण्याचे महत्व अधोरेखित केले.

 

या प्रशिक्षणाचा पुरेपूर लाभ घ्यावा. जरी मनुष्यबळाची कमतरता असली तरी कामाचे योग्य नियोजन करुन शासनासाठी व उद्योग क्षेत्रासाठी महत्वाची असलेली माहिती या पाहणीच्या माध्यमातून वेळेत व गुणवत्तापुर्ण उपलब्ध करुन देण्याच्या दृष्टीने कार्यवाही करण्याच्या सूचना संचालक विजय आहेर यांनी दिल्या. तसेच उद्योगांनी देखिल या कामी आवश्यक ते सहकार्य करावे असेही आवाहन त्यांनी केले.

 

देशातील सर्व्हेचा इतिहास, माहितीचे महत्व आणि त्याचा वापर आणि त्यामुळे होणारे अपेक्षित/अनपेक्षित परिणाम याबाबत उदाहरणासह उपस्थितांच्या ज्ञानात यशदाचे महासंचालक चोकलिंगम यांनी भर घातली. माहिती तंत्रज्ञानात होत असलेल्या नवनवीन प्रगतीद्वारे उपलब्ध होत असलेले आर्टिफिशियल इंटेलिजन्स व मशीन लर्निंग यासारखे तंत्रज्ञान याचा विचार करुन माहिती संकलनाच्या पद्धतीमध्ये देखिल सुधारणा होण्याच्या दृष्टीने विचार करण्याची आवश्यकता असल्याचे त्यांनी सांगितले. वार्षिक उद्योग पाहणीच्या कामासाठी त्यांनी शुभेच्छा दिल्या.

 

प्रास्ताविकात अर्थ व सांख्यिकी संचालनालयाच्या उपसंचालक श्रीमती दिपाली धावरे यांनी वार्षिक उद्योग पाहणीबाबत सर्व उपस्थितांना अवगत केले. सहसंचालक नवेन्दु फिरके यांनी उपस्थित मान्यवरांचे आभार मानले. कार्यशाळेत कोलकाता राष्ट्रीय सांख्यिकी कार्यालयाचे उपसंचालक रणबीर डे व बाप्पा करमरकर, डॉ. प्रदीप आपटे, प्रख्यात अर्थतज्ज्ञ व प्राध्यापक गोखले, राष्ट्रीय नमुना पाहणी कार्यालयाच्या पुणे येथील क्षेत्रीय कार्यालयाचे उपसंचालक श्रीनिवास शिर्के आणि महेश चोरघडे यांनी मार्गदर्शन केले.

 

कार्यशाळेच्या दुसऱ्या दिवशी अपर संचालक डॉ.जितेंद्र चौधरी हे सत्र नियंत्रक व तज्ञ मार्गदर्शक म्हणून उपस्थित होते. अर्थ व सांख्यिकी संचालनालयाच्या संबंधित अनुभवी प्रशिक्षकांद्वारे वार्षिक उद्योग पाहणीच्या कामाचे प्रात्यक्षिकासह प्रशिक्षण संगणकावर घेण्यात आले. यावेळी प्रशिक्षणार्थींच्या अडचणींचे निराकरण करण्यात आले. समारोपाच्या कार्यक्रमासाठी यशदा पुण्याचे उपमहानिदेशक डॉ.मल्लीनाथ कलशेट्टी हे अध्यक्ष व अपर

संचालक पुष्कर भगूरकर हे प्रमुख पाहुणे म्हणून उपस्थित होते.

00000

 पंजाबचे माजी मुख्यमंत्री प्रकाश सिंघ बादल

यांच्या निधनामुळे दोन दिवसाचा दुखवटा   

नांदेड (जिमाका) दि. 26 :- पंजाबचे माजी मुख्यमंत्री प्रकाश सिंघ बादल यांचे दिनांक 25 एप्रिल 2023 रोजी दु:खद निधन झाले आहे. दिवंगत मान्यवरांना आदरांजली वाहण्यासाठी भारत सरकारच्यावतीने दिनांक 26 व 27 एप्रिल रोजी 2023 रोजी संपूर्ण देशात दोन दिवसाचा दुखवटा जाहीर केला आहे. 26 व 27 एप्रिल 2023 रोजी ज्या इमारतीवर दररोज नियमितपणे राष्ट्रध्वज फडकविण्यात येतो त्या सर्व ठिकाणी राष्ट्रध्वज अर्ध्यावर फडकविण्यात यावा. या दिवशी कोणतेही शासकीय मनोरंजनाचे कार्यक्रम आयोजित करण्यात येऊ नयेत, असे अपर जिल्हादंडाधिकारी नांदेड यांनी बिनतारी संदेशानुसार नांदेड जिल्ह्यातील सर्व विभाग प्रमुखांना कळविले आहे.

00000

 सामाजिक न्याय विभागातील कर्मचाऱ्याचे उद‌बोधन शिबिर संपन्न

नांदेड (जिमाका) दि. 26 :- सामाजिक न्याय व विशेष सहाय्य विभागाच्यावतीने 1 एप्रिल ते 1 मे 2023 या कालावधीत भारतरत्न डॉ. बाबासाहेब आंबेडकर सामाजिक समता पर्व अभियान राबविण्यात येत आहे. या अभियानातर्गंत विविध उपक्रम राबविण्यावर भर देण्यात येत आहे.

 

सामाजिक समता पर्वानिमित्त 25 एप्रिल रोजी सामाजिक न्याय विभागातील कर्मचाऱ्यांसाठी उदबोधन शिबिराचे आयोजन कार्यालयातील डॉ. बाबासाहेब आंबेडकर सांस्कृतिक सभागृहात करण्यात आले होते. या कार्यक्रमाचे अध्यक्ष सहाय्यक आयुक्त डॉ. तेजस माळवदकर व  मार्गदर्शक समाज कल्याण अधिकारी बी.एस.दासरी हे होते.

 

या शिबिरात कार्यालयातील अधिकारी, कर्मचारी तसेच कार्यालय अधिनस्त मुला-मुलींचे शासकीय निवासी शाळाचे मुख्याध्यापक व मुला-मुलींचे शासकीय वसतिगृहातील गृहपाल व कर्मचारी यांची उपस्थिती होती. यावेळी सर्व उपस्थित कर्मचारी यांना संभाषण कौशल्य, अभ्यंगता सोबतचे वर्तन व योजनाच्या माहितीवर आधारित मार्गदर्शन समाज कल्याण अधिकारी बी.एस.दासरी यांनी केले.

 

अध्यक्षीय समारोपात सहाय्यक आयुक्त डॉ. तेजस माळवदकर यांनी कर्मचाऱ्यांनी केलेल्या कामकाजाचे कौतूक करुन पुढील वार्षिक कामकाजाच्या नियोजनाबाबत मार्गदर्शन केले. कार्यक्रमाचे प्रास्ताविक कार्यालय अधीक्षक राजेश सुरकूटलावार तर सुत्रसंचालन तालुका समन्वयक गजानन पांपटवार यांनी केले. आभार तालुका समन्वयक अंजली नरवाडे यांनी मानले.

0000

 

District Information Office Nanded <dionanded23@gmail.com>	12:23 PM (0 minutes ago)
to vinod

नायगाव येथे 27 एप्रिल रोजी बेरोजगार

युवक-युवतींसाठी रोजगार मेळाव्याचे आयोजन

नांदेड (जिमाका) दि. 25 :-  जिल्हयातील बेरोजगार उमेदवारांना रोजगाराची संधी उपलब्ध होण्यासाठी जिल्हा कौशल्य विकास, रोजगार व उद्योजकता, मार्गदर्शन केंद्रातर्फे 27 एप्रिल 2023 रोजी शासकीय औद्योगिक प्रशिक्षण संस्था नायगाव येथे सकाळी 10 वा. रोजगार मेळाव्याचे आयोजन करण्यात आले आहे.

 

या रोजगार मेळाव्यात नामांकित कंपनीच्यावतीने मुलाखती घेण्यात येणार आहेत. तसेच स्वयंरोजगार मार्गदर्शन व विविध महामंडळाच्या कर्ज योजनांची माहिती देण्यात येणार आहे. या मेळाव्यास जिल्ह्यातील बेरोजगार उमेदवारांनी वेळेवर उपस्थित राहून या संधीचा लाभ घ्यावा. याबाबत काही अडचण असल्यास कार्यालयाचा दुरध्वनी क्रमांक (02462) -251674 किंवा ई-मेल आयडी nandedrojgar@gmail.com वर संपर्क साधावा, असे आवाहन जिल्हा कौशल्य विकास रोजगार व उद्योजकता मार्गदर्शन केंद्राच्या सहायक आयुक्त श्रीमती रेणुका तम्मलवार यांनी केले आहे.

0000

 जवाहर नवोदय विद्यालय प्रवेश चाचणी 

परीक्षा केंद्र परिसरात प्रतिबंधात्मक आदेश 

नांदेड (जिमाका) दि. 25 :- जवाहर नवोदय विद्यालय प्रवेश चाचणी परीक्षा जिल्ह्यातील 46 केंद्रावर येत्या शनिवार 29 एप्रिल 2023 रोजी सकाळी 10.30 ते दुपारी 2.30 या वेळेत घेण्यात येणार आहे. जिल्हादंडाधिकारी अभिजीत राऊत यांनी फौजदारी प्रक्रिया संहिता 1973 चे कलम 144 अन्वये या 46 परीक्षा केंद्रावर नवोदय चाचणी परीक्षा चालू असतांना परीक्षेच्या कामाशी संबंधित असलेले अधिकारी, कर्मचारी या व्यतिरीक्त इतर कोणत्याही व्यक्तीस परीक्षा केंद्रापासून 100 मीटर परिसरात प्रवेश करता येणार नाही.  परीक्षा कालावधीत सकाळी 8.30 ते दुपारी 3.30 यावेळेत परीक्षा केंद्र परिसरातील 100 मीटर पर्यंतची सर्व सार्वजनिक टेलिफोन्स, एसटीडी, आयएसडी, भ्रमणध्वनी, फॅक्स, झेरॉक्स, पेजर आणि ध्वनिक्षेपक चालू ठेवण्यास प्रतिबंध केले आहे.

00000

 समता पर्व निमित्त ऊसतोड कामगांराचे पुर्नआगमन शिबिर संपन्न

नांदेड (जिमाका) दि. 25 :-सामाजिक समता पर्वानिमित्त ऊसतोड कामगारासाठी पुर्नआगमन ‍शिबिराचे आयोजन करण्यात आले होते. या शिबिरात ऊसतोड कामगारांची नाव नोंदणी करणे, ओळखपत्र वाटप करणे, ऊसतोड कामगांरासाठी आरोग्य तपासणी शिबिर, धान्य महोत्सव निमित्त आनंदाचा शिधा वाटप करणे अशा विविध उपक्रमावर आधारित मार्गदर्शन शिबिर 22 एप्रिल रोजी मुगट येथे संपन्न झाले.

या कार्यक्रमाचे अध्यक्ष वैद्यकीय अधिकारी डॉ. कासराळीकर हे होते. यावेळी समाज कल्याण निरीक्षक पी.जी. खानसोळे, ग्रामसेवक व इतर कर्मचारी यांची उपस्थिती होती. यावेळी समाज कल्याण निरीक्षक पी.जी. खानसोळे यांनी ऊसतोड कामगारांसाठी शासनाकडून राबविण्यात येणाऱ्या योजनाची माहिती दिली. तसेच मान्यवरांच्या हस्ते ऊसतोड कामगाराना ओळखपत्र वाटप करण्यात आले.

यावेळी वैद्यकीय अधिकारी डॉ. कासराळीकर यांचे मार्गदर्शन झाले. यावेळी आनंदा झंपलवाड, पी.जी.वडगावकर, बालाजी खुपसे, तालुका समन्वयक एस.जे.डोंगरे हे उपस्थित होते. कार्यक्रम यशस्वीतेसाठी आश्रमशाळा मुगट, वैद्यकीय अधिकारी व कर्मचारी यांनी सहकार्य केले.

0000

 समता पर्व अभियानात शिष्यवृत्ती

माहिती संदर्भात विशेष अभियान कार्यक्रम संपन्न 

नांदेड (जिमाका) दि. 25 :- डॉ. बाबासाहेब आंबेडकर सामाजिक समता पर्वानिमित्त समान संधी केंद्रामार्फत शिष्यवृत्तीच्या माहितीसंदर्भात विशेष  अभियानातर्गत कार्यक्रम  विविध महाविद्यालयात नुकतेच संपन्न झाले.

नांदेड जिल्ह्यातील हुतात्मा जयवंतराव पाटील महाविद्यालय हिमायतनगर, महात्मा गांधी जैवतंत्रज्ञान पोखर्णी, भिवराज कलंत्री नर्सिंग इन्स्टिट्युट सिडको नांदेड, गणशांती नर्सिग स्कूल नांदेड येथे समता पर्वानिमित्त समान संधी केंद्र अंतर्गत भारत सरकार शिष्यवृत्ती योजनांच्या माहिती संदर्भात विशेष अभियान राबविण्यात आले. यावेळी विद्यार्थ्यांच्या शिष्यवृत्ती संदर्भातील अडचणी व समस्याचे निराकरण करण्यात आले. या कार्यक्रमास समाज कल्याण निरीक्षक सुकेशनी व्हडगीर, लिपिक बोराटे, तालुका समन्वयक विजय माळवदकर, नर्सिंग स्कूल हडको चे संस्थापक अध्यक्ष डॉ. अशोक कलंत्री,  सुर्यवंशी तसेच हुतात्मा जयवंतराव पाटील उच्च माध्यमिक विद्यालय हिमायतनगरचे मोतेवार यांची उपस्थिती होती.

0000