थेट कर्ज योजनेसाठी लाभार्थ्यांची निवड 15 मार्चला होणार

नांदेड (जिमाका) दि. 9 :- साहित्यरत्न लोकशाहीर अण्णाभाऊ साठे विकास महामंडळ (मर्या.) कार्यालयामार्फत प्रकल्प मर्यादा रुपये थेट कर्ज योजनेसाठी 15 मार्च रोजी सकाळी 11 वाजता लाभार्थी निवड चिठ्ठीद्वारे (लॉटरी पद्धतीने) होणार आहे. अर्जदारांनी डॉ. बाबासाहेब आंबेडकर सामाजिक न्याय भवन येथील सभाग्रह, नमस्कार चौक, ग्यानमाता शाळेच्या समोर नांदेड कार्यालयात स्वखर्चाने उपस्थित रहावे. पात्र व अपात्र अर्जदारांची यादी कार्यालयाच्या सुचना फलकावर लावण्यात आली आहे. संबधितांनी याची नोंद घ्यावी, असे आवाहन महामंडळाचे जिल्हा व्यवस्थापक यांनी केले आहे. साहित्यरत्न लोकशाहीर अण्णाभाऊ साठे विकास महामंडळ (मर्या.) जिल्हा कार्यालय नांदेड मार्फत प्रकल्प मर्यादा रुपये एक लाख थेट कर्ज योजनेअंतर्गत 28 नोव्हेंबर ते 20 डिसेंबर 2022 या कालावधीत कर्ज मागणी अर्ज स्विकारण्यात आले आहेत.

या योजनेअंतर्गत एकुण 478 कर्ज मागणी अर्ज प्राप्त झालेले आहेत. हे सर्व कर्ज प्रस्ताव जिल्हास्तरीय लाभार्थी निवड समिती समोर सादर केले असता त्यापैकी 381 कर्ज मागणी अर्ज पात्र आहेत. 97 कर्ज मागणी अर्ज अपात्र आहेत. पात्र कर्ज मागणी अर्जापैकी पुरुष 299 व महिला 82 आहेत. या योजनेचे 70 कर्ज प्रकरणाचे उद्दिष्ट असून त्यापैकी शासनाच्या निर्णयानुसार 3 टक्के अपंग राखीव म्हणजेच 2 लाभार्थी 1 महिला व 1 पुरुष लॉटरी पध्दतीने काढण्यात येणार आहे. उर्वरित 68 पैकी 34 पुरुष व 34 महिला यामध्ये 50 टक्के ग्रामीण, 50 टक्के शहरी या पद्धतीने अध्यक्ष निवासी उपजिल्हाधिकारी नांदेड तथा ईश्वर चिठ्ठी समिती यांनी दिलेल्या मान्यतेनुसार चिठ्ठीव्दारे (लॉटरी पध्दतीने) निवड करावयाची आहे असेही महामंडळाच्यावतीने कळविण्यात आले आहे.

0000

 कळी उमलताना या नाविण्यपुर्ण मोहिमेचा जिल्ह्यात शुभारंभ

 

नांदेड (जिमाका) दि. 9 :- जिल्ह्यात ग्रामीण भागातील किशोरवयीन मुलींमधील ॲनिमियाचे निवारण करण्यासाठी “कळी उमलताना” ही नाविण्यपूर्ण योजना आरोग्य विभागाकडून जिल्ह्यात राबविण्यात येत आहे. जागतिक महिला दिनाचे औचित्य साधून नांदेड जिल्ह्यातील मौजे पिंपळगाव महादेव येथे किशोरवयीन मुलींमधील ॲनिमियाचे निवारणासाठी कळी उमलताना या नाविण्यपुर्ण मोहिमेचा जिल्हाधिकारी अभिजीत राऊत यांच्या हस्ते शुभारंभ करण्यात आला. जिल्हाधिकारी अभिजीत राऊत यांच्या संकल्पनेतून व जिल्हा परिषदेच्या मुख्य कार्यकारी अधिकारी वर्षा ठाकूर-घुगे यांच्या मार्गदर्शनाखाली ही नाविण्यपूर्ण मोहिम जिल्ह्यात 8 मार्च 2023 ते 8 मार्च 2024 या कालावधीत वर्षभर  राबविण्यात येणार आहे.

 

या कार्यक्रमास जिल्हा माता बाल संगोपन अधिकारी डॉ. निना बोराडे, अतिरिक्त जिल्हा आरोग्य अधिकारी डॉ. शिवशक्ती पवार, जिल्हा क्षयरोग अधिकारी डॉ. संतोष सुर्यवंशी, तालुका आरोग्य अधिकारी डॉ. आकाश देशमुख, सुभाष खाकरे आदीची उपस्थिती होती.   

किशोरवयीन मुली एकुण लोकसंख्येच्या  10 ते 11 टक्के असतात. प्रौढत्वाच्या वाढीचा हा टप्पा सर्वात भावनिक आणि शारीरिक दृष्ट्या खूप महत्वाचा असतो. विचारांची परिपक्वता, अनेक शारीरिक बदल, मनोसामाजिक बदल याच वयात घडतात. याच वयात मुलींना आहार विषयक गैरसमजुती, त्यामुळे आहारातील महत्वाच्या घटकांची कमतरता, ॲनेमिया-लोहाची कमतरता, वजन कमी असणे, लैगिंक आजार, मानसिक आजार इतर सवयी, लठ्ठपणा होणे आदी आरोग्याचे प्रश्न उद्भवतात. या वयोगटातील मुलींच्या आरोग्यावरच पुढच्या पिढीचे आरोग्य व उपयुक्तता अवलंबुन आहे. बरेच आजार जसे लोहाची कमतरता, कुपोषण, ॲनेमिया आजारांनी ग्रस्त किशोरवयीन मुलीपासून ते तिच्या होणाऱ्या बाळालासुध्दा हा आजार संक्रमित होतो. ही साखळी तोडण्यासाठी या उपक्रमाची गरज असल्याचे जिल्हा आरोग्य अधिकारी डॉ. बालाजी शिंदे यांनी सांगितले.

0000

 डॉ. शंकरराव चव्हाण शासकीय वैद्यकीय महाविद्यालयाकडून

स्तन कर्करोग जागरुकता व उपचार अभियानास सुरुवात

नांदेड (जिमाका) दि. 9 :-  राज्य शासनाच्या धोरणात्मक निर्णयानुसार महिला मधील स्तनाच्या कर्करोगाचे प्रमाण हे आज घडीला इतर कर्करोगा पेक्षा जास्त आहे. त्यामुळे महिलाच्या आरोग्याच्या दृष्टीने स्तनाच्या कर्करोगाचे लवकर निदान व उपचार होणे गरजेचे आहे. त्या दृष्टीकोणातून राज्य शासनाने “स्तन कर्करोग जागृती व उपचार अभियान” राबविण्याचा संकल्प केला आहे व त्याची सुरुवात 8 मार्च पासून महिला दिनाचे औचीत्य साधून केली आहे.

 

या अभियानाची सुरुवात वैद्यकीय शिक्षण मंत्री गिरीष महाजन यांनी मुंबई येथील जे.जे.रुग्णालयात केली. यावेळेस वैद्यकीय शिक्षण विभागाच्या सचिव डॉ. अश्विनी जोशी,
आयुक्त डॉ. राजीव निवतकर,  संचालक डॉ. दिलीप म्हैसेकर व डॉ. अजय चंदनवाले, सहसंचालक, वैद्यकीय शिक्षण यांची उपस्थिती होती.

 

8 मार्च पासून हे अभियान संपूर्ण महाराष्ट्र भर राबविण्यात येणार आहे. या अभियानाचा भाग म्हणून नांदेड येथील व परिसरातील महिलांच्या कर्करोगाविषयी जागरूकता वाढविण्यासाठी व कर्करोगाचे लवकर निदान व उपचार करून महिलांच्या उत्तम आरोग्यासाठी 8 मार्च रोजी डॉ. शंकरराव चव्हाण शा. वै. म, नांदेड येथे बाह्य रुग्ण विभाग १२३ मध्ये “ BREAST CLINIC ROOM “ ‘स्तन कर्करोग तपासणी कक्ष’ असा स्वतंत्र कक्ष स्थापन करण्यात आला आहे. हा कक्ष दर बुधवारी १२ ते २ दुपारी या वेळेत चालू असून त्यामध्ये स्तन कर्करोग तज्ञ महिलांची तपासणी करतील. तसेच योग्य त्या तपासण्या व उपचार मोफत करण्यात येतील.

 

या स्तन कर्करोग कक्षाचे उद्घाटन 8 मार्च रोजी डॉ. शंकरराव चव्हाण शा. वै. महाविद्यालयाचे अधिष्ठाता डॉ. पी .टी . जमदाडे यांचे हस्ते करण्यात आले. जिल्ह्यातील व परिसरातील महिलांनी या उपलब्ध सुविधेचा फायदा घेऊन स्तनाच्या कर्करोगावर मात करण्याचे आवाहन यावेळी अधिष्ठाता डॉ. पी.टी. जमदाडे यांनी केले. या कार्यक्रमास महाविद्यालयातील वरिष्ठ प्राध्यापक डॉ. वाकोडे, डॉ बोडके, वैद्यकीय अधीक्षक व शल्य चिकीत्सा शास्त्र विभागातील डॉ. अनिल देगावकर, डॉ. विद्याधर केळकर, डॉ. सुनील बोंबले , डॉ. बुशरा व इतर तज्ञ डॉक्टरांची उपस्थिती होती.

0000

 कर्तव्य पथावरील नारीशक्ती चित्ररथाचे

माहूर येथे भव्य स्वागत

नांदेड (जिमाका) दि. 9 :- महाराष्ट्रातील साडेतीन शक्तीपिठे; नारीशक्ती या चित्ररथाचे आज माहूरगडावर भव्य स्वागत करण्यात आले. शासकीय विश्रामगृहाशेजारील प्रांगणात महाराष्ट्राच्या लौकिकाला साजेशा असलेल्या या चित्ररथाचे माहूरचे नगराध्यक्ष फेरोज दोसानी, तहसीलदार किशोर यादव, रेणुकादेवी संस्थाचे विश्वस्त चंद्रकांत भोपी, संजय कान्नव, अरविंद देव, अशिष जोशी, चंद्रकांत रिठे, राठोड, स्वाती आडे, प्रिती जगत, बंजारा महासंघाचे पांडुरंग राठोड, महिला संघाच्या पदाधिकारी व मान्यवर उपस्थित होते.

प्रजासत्ताक दिनानिमित्त नवी दिल्ली येथे कर्तव्यपथावर संचलन सोहळ्यात गौरवान्वित झालेल्या महाराष्ट्राच्या साडेतीन शक्तीपीठे नारिशक्ती या चित्ररथाला दुसऱ्या क्रमांकाचा पुरस्कार देऊन सन्मानित करण्यात आले आहे. चित्ररथाचा देखावा महाराष्ट्रातील साडेतीन शक्तीपीठांना भेट देणाऱ्या भाविकांना, सर्वसामान्यांना पाहता येण्यासाठी हे प्रदर्शन माहूर येथे दोन दिवस राहणार आहे. सर्व नागरीकांनी व भाविकांनी या चित्ररथाच्या प्रदर्शनाचा लाभ घ्यावा, असे आवाहन सांस्कृतिक कार्य विभागातर्फे करण्यात आले आहे.

00000

(छायाचित्र : बालाजी कोंडे )

 आदिवासी सुशिक्षित बेरोजगार उमेदवारांसाठी प्रशिक्षण  

नांदेड (जिमाका) दि. 6 :- आदिवासी उमेदवारांसाठी कौशल्य विकास, रोजगार व उद्योजकता माहिती व मार्गदर्शन केंद्र किनवट या  प्रशिक्षण केंद्रात 1 एप्रिल 2023 पासून विविध स्पर्धा परीक्षेच्या तयारीसाठी उमेदवारांना प्रवेश देण्यात येणार आहेत. या प्रशिक्षण सत्रात नोकऱ्यांसाठी विविध स्पर्धा परिक्षांची तयारी करून घेण्यात येते. पात्र इच्छुक आदिवासी (अनुसूचित जमातीचे) उमेदवारांनी मंगळवार 28 मार्च 2023  पर्यंत शैक्षणीक व जातीचे प्रमाणपत्राच्या सत्यप्रतीसह अर्ज करावेत, असे आवाहन कौशल्य विकास, रोजगार व उद्योजकता मार्गदर्शन अधिकारी किनवट यांनी केले आहे. 

 

आदिवासी उमेदवारांसाठी राबविण्यात येणाऱ्या इतर खात्याच्या स्वयंरोजगार योजनांची माहिती देवून मार्गदर्शन केले जाणार आहे. प्रशिक्षण केंद्रात 1 एप्रिल 2023 पासून सुरू होणाऱ्या 105 च्या प्रशिक्षण सत्रात आदिवासी सुशिक्षीत बेरोजगार उमेदवारांना विविध स्पर्धा परीक्षेची तयारीसाठी प्रवेश देण्यासाठी उमेदवारांनी 28 मार्च 2023 तत्पुर्वी या कार्यालयास पोहचतील अशा बेताने आदिवासी (अनुसूचीत जमातीचे) उमेदवारांकडून अर्ज मागविण्यात येत आहे. अर्ज करण्यासाठी या पत्त्यावर आदिवासी उमेदवारांकरीता कौशल्य विकास, रोजगार व उद्योजकता माहिती व मार्गदर्शन केंद्र, औद्योगिक प्रशिक्षण संस्थेच्या बाजुला शासकीय तंत्र प्रशाला केंद्र गोकुंदा ता. किनवट जि. नांदेड संपर्क दुरध्वनी क्रमांक 02469-221801/ 9881524643 / 7620304096 संपर्क करावा, असेही कळविले आहे. 

 

या प्रवेशाच्या अटी पुढीलप्रमाणे आहेत. उमेदवार अनुसूचित जमाती पैकी (एस.टी.) प्रवर्गातील असावेत. नांदेड जिल्ह्यातील व इतर जिल्ह्यातील उमेदवारांचाही प्रवेशासाठी विचार करण्यात येईल. उमेदवार कमीत कमी शालांत परीक्षा उतीर्ण असावेत. उच्च शैक्षणिक पात्रतेस प्राधान्य देण्यात येईल. उमेदवारांनी कौशल्य विकास, रोजगार व उद्योजकता कार्यालयात नाव नोंदणी केलेली असावी. उमेदवारांनी किनवट येथे स्वत: रहाण्याची व जेवणाची व्यवस्था स्वखर्चाने करावी लागेल. प्रशिक्षण कालावधी 3 महीने 15 दिवस असून शालांत परीक्षा उत्तीर्ण उमेदवारांना तसेच पदवीधारकांना दरमहा 1 हजार रुपये विद्यावेतन दिले जाईल. वयोमर्यादा - उमेदवाराचे वय 31 मार्च 2023 रोजी 18 वर्ष पुर्ण असावे व 35 वर्षापेक्षा जास्त नसावे. प्रशिक्षणार्थीचे विद्यावेतन संबंधित प्रशिक्षणार्थीचे बँक खात्यामध्ये दरमहा जमा करण्यात येणार असल्यामुळे प्रशिक्षणार्थींचे बँक खाते चालू असणे आवश्यक आहे. आपण यापुर्वी अशाप्रकारचे प्रशिक्षण घेतलेले असल्यास किंवा सदर प्रशिक्षण सत्र अर्ध्यातुन सोडलेले असल्यास प्रवेश देण्यात येणार नाही, असेही प्रसिध्दीपत्रकाद्वारे कळविले आहे.

00000

 नांदेड जिल्हा कृषी महोत्सवास उदंड प्रतिसाद

 

नांदेड (जिमाका) दि. 6 :- राज्य शासनाचा कृषी विभाग, आत्मा आणि महिला आर्थिक विकास महामंडळ यांच्या संयुक्त विद्यमानाने नांदेड येथे दिनांक 1 ते 5 मार्च 2023 रोजी भव्य असा कृषी महोत्सवाचे आयोजन करण्यात आले होते. या महोत्सवात जवळपास 300 स्टॉल धारकांनी सहभाग घेतला. यामध्ये विशेषतः कृषी निविष्ठाधारक, ठिबक/तुषार कंपनीचे तसेच शेतीसाठी आवश्यक औजारे, मशिनरीचे स्टॉल व इतर कृषी संलग्न विभागांचे स्टॉल लावण्यात आले होते. रविवार 5 मार्च रोजी या कार्यक्रमाला समारोपीय समारंभासाठी आमदार राम पाटील रातोळीकर, आमदार  मोहनअण्णा हंबर्डे  यांची उपस्थिती होती.

 

यावेळी मान्यवरांच्या हस्ते सहभागी शेतकरी स्टॉल धारक, महिला बचतगट, शेतकरी उत्पादक कंपनी यांना प्रमाणपत्राचे वितरण करून त्यांचा गौरव करण्यात आला. समारोपीय कार्यक्रमात आमदार राम पाटील रातोळीकर यांनी शेतकऱ्यांना नवीन तंत्रज्ञान माहिती होण्याकरिता या महोत्सवाच्या आयोजनाबाबत समाधान व्यक्त केले. आमदार मोहनआण्णा हंबर्डे यांनी शेतकऱ्यांना विक्री करता कायमस्वरूपी शेतकरी मॉल उभारण्याची संकल्पना मांडली व त्याकरिता पाठपुरावा करून निधी उपलब्ध करण्यासाठी प्रयत्न करू अशी ग्वाही दिली. उत्कृष्ट आयोजनाबाबत सर्व मान्यवरांनी कृषि विभागाचे कौतुक करून अशा पद्धतीचा कृषी महोत्सव भविष्यात सतत व्हावेत अशी अपेक्षा व्यक्त केली.

 

महोत्सवात आपला शेतमाल विक्री करता शेतकरी महिला बचतगट, शेतकरी उत्पादक कंपनी, शेतकरीगट यांनी आणला होता. यामधून सुमारे एक कोटी रुपये किंमतीची उलाढाल झाली असून जवळपास 20 लाख किंमतीचा शेतमालाचे ॲडव्हान्स बुकिंग झाले आहे. सलग पाच दिवस चाललेल्या  महोत्सवामध्ये  विविध विषयावर परिसंवादाचे आयोजन करण्यात आले होते. याकरिता उत्कृष्ट मान्यवर वक्ते मार्गदर्शनांसाठी लाभले असून शेतकरी व महिलांचा  चांगला प्रतिसाद दिसून आला. त्याचप्रमाणे आंतरराष्ट्रीय पौष्टिक तृणधान्य वर्षाचे औचित्य साधून पाककला स्पर्धा आयोजित करण्यात आली होती. यामध्ये 70 उत्सुक महिलांनी आपला सहभाग नोंदवून आपली पाककला सादर केली.

00000

 हैद्राबाद मुक्ती लढ्याच्या अमृत महोत्सवानिमित्त

जिल्ह्यातील ऐतिहासिक गावांमध्ये विशेष उपक्रम

-    खासदार प्रतापराव पाटील चिखलीकर

 

·   एप्रिल महिन्यापासून वंदेमातरम् चळवळीने होईल उपक्रमांचा शुभारंभ

·   जिल्हा नियोजन सभागृहात खासदार चिखलीकरांच्या अध्यक्षतेखाली

समितीतील सदस्यांची व्यापक बैठक

·  युवापिढी पर्यंत हैद्राबाद मुक्तीचा इतिहास पोहचविण्यावर असेल भर

 

नांदेड (जिमाका) दि. 6 :- मराठवाडा मुक्तीचा लढा हा निजामाच्या बेबंदशाहीतून मुक्तीचा लढा होता. हा लढा स्वातंत्र्यासाठीचा लढा होता. या लढ्याला धार्मिक, पक्षीय भेद नव्हते. आपल्या हजारो माय-माऊलीनीही मराठवाड्याच्या मुक्तीसाठी यात स्वत: झोकून दिले. जो लोकसहभाग त्यावेळी सर्व जात, धर्म, पंथ यातील भेदाभेद विसरुन लोकांनी दिला त्याला तोड नाही. त्यांच्या योगदानाला अधोरखित करण्यासाठी, स्वातंत्र्य सैनिक, ज्ञात-अज्ञात हुतात्म्यांना अभिवादन करण्यासाठी जिल्ह्यातील ऐतिहासिक गावांमध्ये विशेष उपक्रम घेतले जातील, अशी घोषणा खासदार प्रतापराव पाटील चिखलीकर यांनी केली.

 

येथील जिल्हा नियोजन सभागृहात मराठवाडा मुक्तीसंग्राम अमृत महोत्सवच्या नियोजन समितीची बैठक खासदार चिखलीकर यांच्या अध्यक्षतेखाली आज संपन्न झाली. या बैठकीस जिल्हाधिकारी अभिजीत राऊत, मनपा आयुक्त डॉ. सुनिल लहाने, उपजिल्हाधिकारी संतोषी देवकुळे, निवासी उपजिल्हाधिकारी अनुराधा ढालकरी, सार्वजनिक बांधकाम विभागाचे अधीक्षक अभियंता राजपुत, उपवनसंरक्षक वाबळे, प्रभारी उपजिल्हाधिकारी कोलगणे, प्रविण साले, व्यंकटराव गोजेगावकर, समितीतील सदस्य संपादक शंतनू डोईफोडे, पत्रकार विजय जोशी, चारुदत्त चौधरी, प्रल्हाद उमाटे, ज्येष्ठ रंगकर्मी लक्ष्मण संगेवार, सान्वी जेठवाणी, संजय जोशी, रत्नाकर अपस्तंभ, प्रा. कौसल्ये, शाहीर रमेश गिरी, गोडबोले आदी मान्यवर उपस्थित होते.  

 

मराठवाडा मुक्तीचा हा अमृत महोत्सव अधिक लोकाभिमुख व्हावा, लोकसहभाग अधिकाधिक व्हावा या उद्देशाने आजच्या बैठकीत एक उपसमिती गठन करण्यात आली. या समितीच्या समन्वयकपदी जिल्हा माहिती अधिकारी विनोद रापतवार हे इतर सदस्यांसमवेत काम पाहतील. एप्रिल महिन्यात वंदेमातरम् चळवळीची मुर्हतमेढ रोवली गेली होती. ज्येष्ठ स्वातंत्र्य सेनानी गोविंदभाई श्रॉफ यांनी निजामाच्या अत्याचाराला धुडकावून टाकण्यासाठी वंदेमातरम् सामुहिकरीत्या औरंगाबादच्या शासकीय महाविद्यालयात हॉस्टेलमध्ये गायले. याची गाथा नव्यापिढीपर्यंत पोहचावी यासाठी विविध उपक्रम मार्च-एप्रिल पासून प्रस्तावित करण्याचे ठरले.

समितीतील सदस्यांनी हा अमृत महोत्सव अधिक सर्वसमावेशक व्हावा यासाठी स्वत:हून पुढे यावे व वेळ द्यावा, असे आवाहन खासदार प्रतापराव पाटील चिखलीकर यांनी केले.

 

मानव विकास निर्देशांकानुसार कारखानदारी, सेवाक्षेत्र, पंतप्रधान आवास योजना आणि शाळांची उपलब्धता यात गुणांच्या आधारावर नांदेड लोकसत्ता जिल्हा निर्देशांक पुरस्कार जिल्हाधिकारी अभिजीत राऊत यांना मिळाल्याबद्दल त्यांचा खासदार प्रतापराव पाटील चिखलीकर यांच्या हस्ते सत्कार करण्यात आला. पत्रकार विजय जोशी यांनी बैठकीत याबाबत सुचना मांडली होती.

0000