दहावी-बारावीची

पुरवणी परीक्षा 17 जुलैपासून    

नांदेड दि. 20 :- राज्य माध्यमिक व उच्च माध्यमिक शिक्षण मंडळ पुणे यांच्यावतीने दहावी व बारावीची लेखी पुरवणी परीक्षा 17 जुलै 2018 पासून तर प्रात्यक्षिक, श्रेणी, तोंडी परीक्षा 9 ते 16 जुलै या कालावधीत आयोजित करण्यात येणार आहे, असे राज्य मंडळ पुणे यांनी प्रकटनाद्वारे कळविले आहे.

जुलै-ऑगस्ट 2018 मध्ये पुणे, नागपूर, औरंगाबाद, मुंबई, कोल्हापूर, अमरावती, नाशिक, लातूर व कोकण या नऊ विभागीय मंडळामार्फत ही परीक्षा घेण्यात येत आहे. त्यानुसार दहावीची लेखी परीक्षा मंगळवार 17 जुलै ते गुरुवार 2 ऑगस्ट 2018, बारावी सर्वसाधारण विषयाची लेखी परीक्षा मंगळवार 17 जुलै ते शनिवार 4 ऑगस्ट 2018, बारावी व्यवसाय अभ्यासक्रम (नवीन) लेखी परीक्षा मंगळवार 17 जुलै ते गुरुवार 2 ऑगस्ट 2018 या कालावधीत होणार आहे.

या कालावधीत आयोजित केलेले दिनांक निहाय सविस्तर वेळापत्रक मंडळाच्या www.mahahsscboard.maharashtra.gov.in या संकेतस्थळावर उपलब्ध आहे. संकेतस्थळावरील वेळापत्रक माहितीसाठी असून परीक्षेपुर्वी शाळा, महाविद्यालयाकडे विभागीय मंडळामार्फत छापील स्वरुपात दिलेले वेळापत्रक अंतिम राहील. त्यानुसार वेळापत्रकावरुन परीक्षेच्या तारखांची खात्री करुन घ्यावी व विद्यार्थ्यांनी परीक्षेस प्रविष्ट व्हावे. अन्य संकेतस्थळावरील किंवा अन्य खाजगी यंत्रणेने छपाई केलेले तसेच व्हॉट्सॲप किंवा तत्सम माध्यमातून व्हायरल झालेले वेळापत्रक ग्राह्य धरु नये. याची सर्व संबंधितांनी नोंद घ्यावी, असेही आवाहन राज्यमंडळाच्यावतीने करण्यात आले आहे.

000000

कौशल्य विकास व उद्योजकता मंत्री

संभाजी पाटील-निलंगेकर यांचा दौरा    

नांदेड दि. 20 :- राज्याचे कौशल्य विकास व उद्योजकता, कामगार, भूकंप पुनर्वसन, माजी सैनिक कल्याण मंत्री संभाजी पाटील-निलंगेकर हे नांदेड दौऱ्यावर येत असून त्यांचा दौरा कार्यक्रम पुढील प्रमाणे राहील.

गुरुवार 21 जून 2018 रोजी लातूर येथुन सकाळी 10 वा. नांदेड विमानतळ येथे आगमन. सकाळी 10.50 वा. नांदेड विमानतळ नांदेड येथुन Trujet एअरवेज एअरलाईन्सच्या 2T493 या विमानाने मुंबईकडे प्रयाण करतील. दुपारी 2.30 वा. मुंबई येथून एअरवेज एअरलाईन्सच्या विमानाने नांदेड विमानतळ येथे आगमन व शासकीय वाहनाने लातूरकडे प्रयाण करतील.

000000

महाविद्यालयीन विद्यार्थ्यांसाठी निबंध, वक्तृत्व स्पर्धा

नांदेड दि. 19 :- महाविद्यालयातील विद्यार्थ्यांसाठी "राजर्षी शाहू महाराज व सामाजिक समता" निबंध व "सामाजिक समता आणि वैज्ञानिक प्रगती" या विषयावर वक्तृत्व स्पर्धेचे आयोजन गुरुवार 21 जून 2018 रोजी करण्यात आले आहे. या स्पर्धेसाठी महाविद्यालयाचे ओळखपत्र घेऊन जवाहरलाल नेहरु समाज कार्य महाविद्यालय सिडको नवीन नांदेड येथे स्वखर्चाने उपस्थित रहावे, असे आवाहन सहाय्यक आयुक्त समाज कल्याण, नांदेड यांनी केले आहे.  

जिल्हास्तरीय सामाजिक विकास शक्ती प्रदत्त समिती मार्फत राजर्षी छत्रपती शाहू महाराज यांच्या जयंती दिनानिमित्त गुरुवार 21 जून रोजी सकाळी 11 वा. जवाहरलाल नेहरु समाज कार्य महाविद्यालय सिडको नवीन नांदेड येथे महाविद्यालयीन विद्यार्थ्यांसाठी निबंध स्पर्धा आयोजित करण्यात आली आहे. निबंध स्पर्धेचा विषय "राजर्षी शाहू महाराज व सामाजिक समता" असून निबंध 1 हजार 500 शब्दात लिहिणे आवश्यक आहे. या स्पर्धेतून प्रथम, द्वितीय, तृतीय येणाऱ्या विद्यार्थ्यांना रोख पारितोषीक व प्रमाणपत्र देण्यात येईल. ज्या महाविद्यालयीन विद्यार्थ्यांना या स्पर्धेत भाग घ्यावयाचा आहे त्यांनी 21 जून रोजी सकाळी 11 वा. जवाहरलाल नेहरु समाज कार्य महाविद्यालय सिडको नवीन नांदेड येथे उपस्थित रहावे. तसेच 21 जून रोजी दुपारी 2 वा. "सामाजिक समता आणि वैज्ञानिक प्रगती" या विषयावर वक्तृत्व स्पर्धा आयोजित करण्यात आली आहे. वक्तृत्व स्पर्धेत सर्व महाविद्यालयीन मुला-मुलींना भाग घेता येईल. या स्पर्धेतून प्रथम, द्वितीय व तृतीय येणाऱ्या विद्यार्थ्यांना रोख पारितोषीक व प्रमाणपत्र देण्यात येईल, असे प्रसिद्धी पत्रकात नमूद केले आहे.  

000000

अनुसूचित जमातीच्या विद्यार्थ्यांसाठी

जमात प्रमाणपत्र पडताळणीकरिता विशेष मोहीम

पुणे, दि. 18 – सन 2018-19 या शैक्षणिक वर्षात अनुसूचित जमातीच्या विद्यार्थ्यांना इ. 10 वी, 12 वी नंतर पदविका/पदवी अभ्यासक्रमाकरिता तसेच इतर अभ्यासक्रमाकरिता प्रवेश घेताना अनुसूचित जमाती वैधता प्रमाणपत्रची आवश्यकता असते. त्यासाठी आदिवासी संशोधन व प्रशिक्षण संस्थेतर्फे विेशेष मोहीम राबविण्यात येत आहे.  

वैधता प्रमाणपत्राच्या आधारावर अनुसूचित जमातीच्या विद्यार्थ्यांना सवलती मिळू शकतात. राज्यात नुकताच इयत्ता 10 वी व 12 वीच्या परिक्षेचा निकाल प्रसिद्ध झाल्यामुळे विद्यार्थ्यांची विविध अभ्यासक्रमाच्या प्रवेशासाठी धावपळ सुरु झालेली आहे. परिणामी आदिवासी संशोधन व प्रशिक्षण संस्थेच्या अंतर्गत पुणे, नाशिक, नागपूर, ठाणे, औरंगाबाद, अमरावती, नंदूरबार व गडचिरोली अनुसूचित जमाती प्रमाणपत्र समित्यांकडे मोठ्या प्रमाणात अर्ज प्राप्त होत आहेत.

विद्यार्थ्यांच्या भवितव्याच्या दृष्टीने त्यांना अनुसूचित प्रमाणपत्र त्वरित मिळण्याच्या दृष्टीने विशेष मोहीम आखण्यात आली आहे. या मोहिमेअंतर्गत अनुसूचित जमातीच्या विद्यार्थ्यांना ई-ट्राईब पोर्टलवर https://www.etribevalidity.mahaonline.gov.in येथे ऑनलाईन अर्ज केल्यानंतर प्राधान्याने वैधता प्रमाणपत्र देण्याची प्रक्रिया सुरू करण्यात येईल. यासंदर्भात संबंधित समितीच्या पोलीस दक्षता पथकाला देखील गृह व शालेय चौकशीची व कागदपत्रांची पडताळणी करण्याच्या सूचना देण्यात आलेल्या आहेत. आदिवासी संशोधन व प्रशिक्षण संस्था, पुणे येथे हेल्पलाईन क्रमांक 020-26360941 सुरू करण्यात आलेला असून सकाळी 9 ते सायंकाळी 7 या वेळेत दूरध्वनीवरून वैधता प्रमाणपत्रावर मार्गदर्शन करण्यात येईल.

सर्व आठही अनुसूचित जमाती प्रमाणपत्र पडताळणी समित्यांमध्ये अनुसूचित जमातीच्या विद्यार्थ्यांसाठी विशेष कक्षामार्फत आवश्यक ती माहिती पुरविण्याची व्यवस्था करण्यात येत आहे. तसेच सदर मोहिमेच्या कामकाजाचा वरिष्ठ व अतिवरिष्ठ अधिकाऱ्यांकडून दैनंदिन आढावा घेतला जात असून अनुसूचित जमातीच्या विद्यार्थ्यांना त्वरित वैधता प्रमाणपत्र मिळण्याच्या दृष्टीने सर्व प्रक्रिया पूर्ण करून आवश्यक ती खबरदारी घेण्यात येत आहे. सर्व समित्यांच्या स्तरावर अनुसूचित जमातीच्या विद्यार्थ्यांसाठी दूरध्वनी सेवा उपलब्ध करून देण्यात येत आहे.

अनुसूचित जमातीच्या विद्यार्थ्यांनी पुणे समितीसाठी पुणे, सांगली, सातारा, सोलापूर व कोल्हापूर या कार्यक्षेत्राकरिता 28, क्विन्स गार्ड, पुणे (020-26336961), ठाणे समितीत ठाणेसह मुंबई, मुंबई उपनगर, रायगड, रत्नागिरी, सिंधुदूर्गसाठी वर्तकनगर प्रभाग समिती कार्यालय, वर्तकनगर, ठाणे (पश्चिम), ठाणे (022-25883503), नाशिक समितीमध्ये नाशिक व अहमदनगरकरिता  आदिवासी विकास भवन, जुना आग्रा रोड, नाशिक (0253-2577059), औरंगाबाद समितीतील औरंगाबाद, हिंगोली, परभणी, जालना, नांदेड, बीड, लातूर व उस्मानाबाद या कार्यक्षेत्रासाठी सेंट लॉरेन्स हायस्कूलजवळ, टाऊन सेंटर सिडको, औरंगाबाद (0240-2362901), अमरावती समितीत अमरावती, अकोला, बुलढाणा, वाशिम आणि यवतमाळसाठी शासकीय विश्रामगृहाजवळ, राज्य माहिती आयुक्त यांच्या कार्यालयासमोर, सना हाऊस, जुना बायपास रोड, चपराशीपुरा, अमरावती (0721-2550995), नागपूर समितीसाठी नागपूर, वर्धा, भंडारा व गोंदियाकरिता आदिवासी विकास भवन, गिरी पेठ, नागपूर (0712-2560031), नंदूरबार समितीसाठी नंदुरबार, धुळे, जळगावकरिता  शासकीय दूध डेअरी इमारत, आरटीओजवळ, नंदूरबार (02564-210130) तर गडचिरोली समितीसाठी गडचिरोली व चंद्रपूरकरिता जिल्हा परिषद कॉलनी कॉम्प्लेक्स, गडचिरोली (07132-223179 याठिकाणी संपर्क साधावा.

00000

धर्माबाद तालुक्यातील नागरी सुविधांची कामे

त्वरीत सुरु करण्याचे रामदास कदम यांचे निर्देश

मुंबई, दि. 18 : धर्माबाद शहर व तालुक्यातील नागरी सुविधांची कामे त्वरीत सुरु करण्याचे निर्देश पर्यावरण मंत्री तथा नांदेड जिल्ह्याचे पालकमंत्री रामदास कदम यांनी आज मंत्रालयात आयोजित बैठकीत दिले.

प्रारंभी श्री. कदम यांनी नियोजन विभाग, जिल्हा परिषद, नाविण्यापूर्ण योजनेचा निधी, मुख्यमंत्री ग्राम सडक योजनेच्या निधीचा आढावा घेऊन नागरी सुविधांच्या प्रस्तावांवर चर्चा केली. उपलब्ध निधीमधून ग्रामीण भागातील 230 किमीची रस्त्यांची कामे करणे, तलावांची दुरुस्ती व स्वच्छता करणे, पथदिवे लावणे, स्मशानभूमी बांधणे, सांस्कृतिक भवन उभारणे, ग्रामीण भागातील विविध आरोग्य केंद्रात वैद्यकीय उपकरणांची खरेदी करणे, शाळांची दुरुस्ती करणे, धर्माबाद एस.टी. आगारासाठी जागा देणे, आरोग्य केंद्रात ॲम्बुलन्स खरेदी करणे अशा अनेक सोयी सुविधांच्या प्रस्तावावर निधी खर्च करण्याचे निर्देश श्री. कदम यांनी अधिकाऱ्यांना दिले.

या बैठकीला महसूल विभागाचे अधिकारी तसेच परिवहन, विद्युत मंडळ, शिक्षण विभाग, कृषी, रस्ते विभाग, आरोग्य, समाजकल्याण विभाग, महिला व बालविकास विभागाचे अधिकारी उपस्थित होते.

००००

जिल्हा नियोजन समितीच्या नवनिर्वाचित

सदस्यांचे बुधवारी यशदा येथे प्रशिक्षण

नांदेड दि. 15 :- जिल्हा नियोजन समितीच्या सर्व नवनिर्वाचित सदस्यांचे प्रशिक्षण बुधवार 20 जून 2018 रोजी यशदा पुणे येथे आयोजित केले आहे. नांदेड जिल्हा नियोजन समितीच्या सर्व नवनिर्वाचित मा. सदस्यांनी या प्रशिक्षणास उपस्थित राहावे, असे आवाहन जिल्हाधिकारी अरुण डोंगरे यांनी केले आहे.

जिल्हा नियोजन समितीच्या नवनिर्वाचित सदस्यांना यशवंतराव चव्हाण विकास प्रशासन प्रबोधिनी (यशदा) पुणे येथे प्रशिक्षण देण्याबाबत मुद्दा मागील जिल्हा नियोजन समितीच्या बैठकीत उपस्थित करण्यात आला होता. त्यानुसार यशदा पुणे यांचेशी संपर्क करुन या प्रशिक्षणाचे आयोजन करण्यात आले आहे.

या प्रशिक्षणाच्या माध्यमातून जिल्हा नियोजन समितीची रचना व कार्यपद्धती, जिल्हा वार्षिक योजनेंतर्गत राबविण्यात येणाऱ्या विविध योजनांची माहिती, जिल्हा नियोजन समितीच्या सभेबाबतची माहिती तसेच विविध योजनेंतर्गत कामांना मंजुरी, प्रशासकीय मान्यता व निधी वितरणाबाबतची माहिती जिल्हा नियोजन समितीच्या सदस्यांना देण्यात येणार आहे. त्याआधारे समिती मार्फत जिल्हास्तरावर राबविण्यात येणाऱ्या विविध विकास योजनांची प्रभावीपणे अंमलबजावणी करण्यास मदत होईल. हे प्रशिक्षण पुर्ण झाल्यानंतर सर्व सदस्यांच्या जिल्हा नियोजन समितीच्या कामकाजाबाबत संकल्पना स्पष्ट होणार असल्याने योग्य प्रकारे विकास कामांचा आराखडा तयार होईल व त्याची अंमलबजावणी करण्यास गती येईल, असे जिल्हा नियोजन अधिकारी सुरेश थोरात यांनी प्रसिद्धी पत्रकाद्वारे कळविले आहे.  

0000000

परिवहन मंत्री दिवाकर रावते यांचा दौरा

नांदेड दि. 15 :- राज्याचे परिवहन, खारभूमी विकास मंत्री दिवाकर रावते हे नांदेड दौऱ्यावर येत असून त्यांचा दौरा कार्यक्रम पुढील प्रमाणे राहील.

गुरुवार 28 जून 2018 रोजी हिंगोली येथून शासकीय मोटारीने दुपारी 1 वा. नांदेड येथे आगमन व नांदेड जिल्हा छत्रपती शिवाजी महाराज शेतकरी सन्मान योजना आढावा बैठक (स्थळ : जिल्हाधिकारी कार्यालय नांदेड ). दुपारी 2.30 वा. नांदेड येथुन शासकीय मोटारीने लातूरकडे प्रयाण करतील.  

0000