वृत्त क्रमांक 73

 नांदेड जिल्हा जात प्रमाणपत्र पडताळणी समितीकडून

ग्रामपंचायत समिती सदस्यावर गुन्हा दाखल

 

नांदेड (जिमाका) दि. 17 :- बिलोली तालुक्यातील संगरोळी ग्रामपंचायत येथील ग्रामपंचायत सदस्या शेख मेहताबी लालशा  (माहेर) शेख मेहताबी मियॉसाब (सासर) व इतर यांचे विरुध्द जिल्हा जात प्रमाणपत्र पडताळणी समिती नांदेड यांच्या आदेशान्वये पोलीस स्टेशन विमानतळ नांदेड येथे फौजदारी गुन्हा क्रमांक 0057/2023 नोंद झाला आहे. जिल्हा जात प्रमाणपत्र पडताळणी समितीचे संशोधन अधिकारी तथा सदस्य सचिव सतेंद्र आऊलवार यांनी ही माहिती प्रसिद्धी पत्रकाद्वारे दिली आहे.

             

शेख मेहताबी लालशा (माहेर) शेख मेहताबी मियॉसाब (सासर) यांनी पिंजारी-177 (इतर मागास वर्ग) या जातीचे प्रमाणपत्र पडताळणीसाठी जात वैधता प्रमाणपत्र समितीकडे दाखल केले होते. या प्रकरणात समितीने पोलीस दक्षता पथकामार्फत सखोल चौकशी केली असता शेख मेहताबी लालशा (माहेर) यांनी त्यांचे माहेर मौ. आळंदी ता. बिलोली जि. नांदेड येथील नसताना बनावट, खोटे कागदपत्रे, प्रमाणपत्रे सादर करुन तेथील मुळ रहिवासी (माहेर) असल्याचे दर्शविले. दक्षता पथकाच्या चौकशी दरम्यान मौ. आळंदी ता. बिलोली जि. नांदेड येथील ज्येष्ठ नागरीकांनी ग्रामपंचायत सदस्या शेख मेहताबी लालशा (माहेर) ह्या तेथील रहिवासी नसल्याचा जवाब दिला.  दक्षता पथक चौकशीनुसार मौजे आळंदी येथील तत्कालीन ग्रामसेवक नागनाथ रामचंद्र चौंडे यांनी शेख मेहताबी लालशा  (माहेर) शेख मेहताबी मियॉसाब (सासर) यांना आळंदी गावातील रहिवासी दर्शविण्यासाठी व जात प्रमाणपत्र प्राप्त करुन घेण्यासाठी बनावट, खोटे मृत्यू प्रमाणपत्र, जात प्रमाणपत्र, शिधापत्रिका, ओळखपत्र, रहिवास प्रमाणपत्र व जन्म-मृत्यु अनुउपलब्धता प्रमाणपत्र सादर केले असल्यामुळे ग्रामसेवक नागनाथ रामचंद्र चोंडे यांनी त्यांच्या स्वाक्षरीने शेख मेहताबी लालशा (माहेर) यांना खोटे व बनावट प्रमाणपत्र निर्गमित केल्याबाबत समितीच्या दक्षता पथकास  लेखी जबाब दिला. 

 

शेख मेहताबी लालशा  (माहेर) यांचा मुलगा शेख मुर्तुजा मियॉसाब व ग्रामसेवक नागनाथ रामचंद्र चोंडे यांनी वरील नमुद खोटी व बनावट कागदपत्रे, प्रमाणपत्रे आधारे उपविभागीय अधिकारी बिलोली जि.नांदेड येथून पिंजारी (इ.मा.व.) जात प्रमाणपत्र प्राप्त केले. सदर जात प्रमाणपत्र आधारे त्यांनी सगरोळी ता.बिलोली, जि.नांदेड येथील ग्राम पंचायत सार्वत्रिक निवडणूक 2020 राखीव जागेवर लढविली. त्या सदस्य पदावर दिनांक 29 जानेवारी 2021 रोजी निवडून आल्या. जात वैधता प्रमाणपत्रासाठी त्यांचा प्रस्ताव समितीस दि. 26 डिसेंबर 2020 दाखल केला होता. समितीच्या निदर्शनास वरील वस्तुस्थिती निदर्शनास आल्याने समितीने त्यांचे पिंजारी जात प्रमाणपत्र दिनांक 15 फेब्रुवारी 2023 रोजीच्या आदेशान्वये अवैध ठरविले आहे.   शेख मेहताबी लालशा (माहेर) व त्यांचा मुलगा शेख मुर्तुजा मियॉसाब व ग्रामसेवक नागनाथ रामचंद्र चोंडे व इतर विरुध्द भारतीय दंड विधान संहिता अन्वये गुन्हा नोंदविण्यास समितीच्या पोलीस निरीक्षक पक्षता पथकास आदेशीत करण्यात आले.  या आदेशान्वये पोलीस निरीक्षक दक्षता पथक यांनी समितीतर्फे फिर्यादी देऊन दिनांक 16 फेब्रुवारी 2023 रोजी विमानतळ पोलीस स्टेशन नांदेड येथे गुन्हा नोंदविला. या गुन्हयाचा तपास विमानतळ पोलीस स्टेशन येथील पोलीस निरीक्षक अनिरुद्ध काकडे यांचे मार्गदर्शनाखाली श्री.जाधव, पोलीस उपनिरीक्षक व इतर हे अधिक तपास करीत आहेत.

000000 

 वृत्त क्रमांक  72 

मौजे ब्रम्हपुरी गोदावरी नदीच्या पात्र परिसरात कलम 144 लागू   

नांदेड (जिमाका) दि. 16 :-  मौजे ब्रम्हपुरी येथील गोदावरी नदी पात्र परिसरात शांतता व सुव्यवस्था अबाधीत रहावी यासाठी फौजदारी प्रक्रिया संहिता 1973 चे कलम 144 प्रमाणे नांदेड ग्रामीण पोलीस स्टेशनच्या हद्दीतील नदी पात्रातील परिसर प्रतिबंधीत क्षेत्र म्हणून दिनांक 20 फेब्रुवारी ते 19 मार्च 2023 पर्यंत घोषित करण्यात आले आहे. त्याबाबत जिल्हादंडाधिकारी कार्यालयाने आदेश निर्गमित केले आहेत.  

याबंदी आदेशात म्हटले आहे की, फौजदारी प्रक्रिया संहिता 1973 चे कलम 144 नुसार प्राप्त अधिकाराचा वापर करुन चतु:सिमा पुर्वेस वाजेगाव कोल्हापुरी बंधारा, पश्चिमेस नांदेड ते देगलूरकडे जाणाऱ्या रोडवरील जुना पूल, दक्षिणेस गोदावरीचे नदीचे पात्र आणि उत्तरेस चिल्ला / दर्गाची संरक्षण भिंत यामधील जागा 20 फेब्रुवारी 2023 रोजी सकाळी 6 वाजेपासून ते 19 मार्च 2023 रोजीच्या मध्यरात्री पर्यंत फौजदारी प्रक्रिया संहिता 1973 चे कलम 144 प्रमाणे प्रतिबंधीत क्षेत्र म्हणून जिल्हादंडाधिकारी यांनी घोषित केले आहे.  

हा आदेश शासकीय कर्तव्यावरील अधिकारी व कर्मचारी, एक खिडकी पथकातील अधिकाऱ्यांनी परवानगी दिलेल्या भाविकांना तसेच ज्यांना जिल्हाधिकारी नांदेड व पोलीस अधीक्षक नांदेड यांनी परवानगी दिली अशा व्यक्तींना लागू राहणार नाही.

00000

 

 वृत्त क्रमांक  71 

डॉल्‍बी सिस्‍टीमचा वापर करण्यास प्रतिबंध 

नांदेड (जिमाका) दि. 16 :- छत्रपती शिवाजी महाराज जयंती व संत सेवालाल महाराज जयंती काळात जिल्हयात डॉल्बी सिस्टीमचे मालक, चालक व इतर कोणत्याही व्‍यक्‍तीस डॉल्‍बी सिस्‍टीमचा वापर करण्यास व चालविण्‍यास दिनांक 19 ते 28 फेब्रुवारी 2023 रोजीच्या मध्यरात्री पर्यंत प्रतिबंध करण्‍यात आले आहे. याबाबत जिल्हादंडाधिकारी अभिजीत राऊत यांनी फौजदारी प्रक्रिया संहिता 1973 चे कलम 144 (1) अन्‍वये आदेश निर्गमीत केले आहेत.    

000000

 

वृत्त क्रमांक 69

दहावी-बारावीच्या विद्यार्थ्यांना परीक्षेसाठी

निर्धारित वेळेनंतर दहा मिनिटे वाढवून मिळणार

 

·  प्रश्नपत्रिका दहा मिनिटे अगोदर वितरीत करण्याची सुविधा झाली बंद

नांदेड (जिमाका) दि. 16 :- इयत्ता 10 वी व 12 वी परीक्षेस प्रविष्ट होणाऱ्या परीक्षार्थ्यांना प्रश्नपत्रिका वाचण्यासाठी, आकलन होण्यासाठी परीक्षा दालनात प्रश्नपत्रिकांचे वाटप परीक्षेच्या निर्धारीत वेळेपूर्वी दहा मिनिटे अगोदर करण्यात येत होते. या परीक्षेचा विद्यार्थ्यांच्या जीवनात एक महत्वपूर्ण टप्पा असतो. पालक व समाज घटकांचे या परीक्षेकडे बारकाईने लक्ष असते. परंतु प्रश्नपत्रिका मोबाईलवर तसेच अन्य समाज माध्यमातून व्हायरल झाल्याच्या अफवा व काही अंशी घटना मंडळाच्या निदर्शनास आलेल्या आहेत. अशा प्रकारच्या घटनांना प्रतिबंध होवून परीक्षा निकोप, भयमुक्त व कॉपी मुक्त वातावरणात सुरळीत पार पडण्याच्यादृष्टीने परीक्षेच्या निर्धारित वेळेपूर्वी दहा मिनीटे अगोदर प्रश्नपत्रिका वितरीत करण्याची सुविधा फेब्रुवारी-मार्च 2023 परीक्षेपासून रद्द करण्यात आली आहे. परंतू विद्यार्थ्याचे हित लक्षात घेवून सदरची दहा मिनिटे परीक्षेच्या निर्धारित वेळेनंतर वाढवून देण्यात येणार असल्याचे महाराष्ट्र राज्य माध्यमिक व उच्च माध्यमिक शिक्षण मंडळाच्या सचिव अनुराधा ओक यांनी परिपत्रकान्वये कळविले आहे.

 

फेब्रुवारी-मार्च 2023 परीक्षेपासून सकाळ सत्रात सकाळी 11 वा. तसेच दुपार सत्रात दुपारी 3 वा. परीक्षा दालनात प्रश्नपत्रिकांचे वितरण करण्यात येईल व लेखनास प्रारंभ होईल. सकाळ सत्रात सकाळी 10.30 वा. तसेच दुपार सत्रात दु. 2.30 वाजता परीक्षार्थ्यांने परीक्षा केंद्रावर उपस्थित राहणे आवश्यक आहे. परीक्षेची सध्याची वेळ सकाळी 11 ते दुपारी 2 असून सुधारित वेळ सकाळी 11 ते दु.2.10 याप्रमाणे राहील. परीक्षेची सध्याची वेळ सकाळी 11 ते दु. 1 असून सुधारित वेळ दुपारी 11 ते दु.1.10 याप्रमाणे राहील. परीक्षेची सध्याची वेळ सकाळी 11 ते दु. 1.30 असून सुधारित वेळ दुपारी 11 ते दु.1.40 याप्रमाणे राहील. दुपार सत्रात दु. 3 ते सायं 6 असून सुधारित वेळ दु. 3 ते सायं 6.10 याप्रमाणे राहील. दुपार सत्रात दु. 3 ते सायं 5 असून सुधारित वेळ दु. 3 ते सायं 5.10 याप्रमाणे राहील. दुपार सत्रात दु. 3 ते सायं 5.30 असून सुधारित वेळ दु. 3 ते सायं 5.40 याप्रमाणे राहील, असेही प्रसिध्दी पत्रकाद्वारे कळविले आहे.

00000

 वृत्त क्रमांक  70

 

सर्वधर्मीय सामुहीक विवाह मेळाव्याचे 23 एप्रिल रोजी आयोजन

 

·   नाव नोंदणीसाठी संपर्क साधण्याचे आवाहन

 

नांदेड (जिमाका) दि. 16 :- सार्वजनिक न्यास नोंदणी कार्यालयाच्या समन्वयाने नांदेड जिल्ह्यातील विश्वस्त संस्थेच्या सहकार्याने धर्मादाय संघटना सार्वजनिक सामुहीक विवाह सोहळा समिती नांदेड यांच्या पुढाकारातून सर्वधर्मीय सामुहिक विवाह मेळाव्याचे आयोजन करण्यात आले आहे. हा विवाह सोहळा रविवार 23 एप्रिल 2023 रोजी शहीद बाबा दीपसिंघजी गुरुद्वारा, कौठा (विमान गुरुद्वारा) नांदेड येथे दुपारी 12.31 वाजता संपन्न होणार आहे. गरजुनी या सामुहिक विवाह सोहळयाचा लाभ घ्यावा, असे आवाहन धर्मादाय उप आयुक्त किशोर वसंतराव मसने यांनी केले आहे.

 

सन 2018 प्रमाणे यावर्षी धर्मादाय आयुक्त मुंबई यांचे निर्देशानुसार या विवाह सोहळ्याचे आयोजन करण्यात आले आहे.  हा विवाह सोहळा विनामूल्य होणार असून यामध्ये वधू-वरांना मणी, मंगळसुत्र, जोडवे, लग्नाचा ड्रेस व संसार उपयोगी साहित्य विनामूल्य देण्यात येणार आहे. नांदेड जिल्ह्यातील सर्व गरजू व्यक्तींनी विशेषत: आत्महत्या शेतकरी, शहीद जवान, अपंग, निराधार व कोरोना काळात मृत्यू पावलेल्या कुटूंबातील वधू-वरांनी आपले नाव नोंदणी करुन या सर्वधर्मीय सार्वजनिक विवाह सोहळयाचा लाभ घ्यावा, असे आवाहन विवाह सोहळा समितीच्यावतीने करण्यात आले आहे.

 

संपर्क व नाव नोंदविण्यासाठी धर्मादाय उप कार्यालय, नांदेड दू. क्र. 02462-249770, अध्यक्ष सुधाकर गोपीनाथ टाक मो.क्र.7588889000, सचिव मिनलताई निरंजन राव खतगावकर पाटील मो.क्र. 7507346600, कोषाध्यक्ष कामाजी गंगाधरराव पवार मो. क्र. 9158049999 व सदस्य शिवाजी राघोजीराव पवार मो.क्र. 8411999901 वर संपर्क साधावा, असे प्रसिध्दीपत्रकाद्वारे कळविले आहे.

00000

वृत्त क्र. 68

 जिल्हा कौशल्य विकास रोजगार व उद्योजकता मार्गदर्शन

केंद्रातील निर्लेखित वस्तुचा शुक्रवार 17 फेब्रुवारी रोजी लिलाव

नांदेड (जिमाका) दि. 14 :- जिल्हा कौशल्य विकास रोजगार व उद्योजकता मार्गदर्शन केंद्र नांदेड येथील टेबल, खुर्च्या, नोटीस बोर्ड, वापरात नसलेल्या व मोडकळीस आलेल्या निर्लेखित वस्तूंचा लिलाव करावयाचा आहे. जाहीर लिलावात भाग घेण्यासाठीच्या अटी व नियम कार्यालयाच्या सूचना फलकावर लावण्यात आलेले आहेत. शहरातील इच्छुक व गरजु खरेदीदारांनी लिलावात भाग घेण्यासाठी शुक्रवार 17 फेब्रुवारी 2023 रोजी कार्यालयास कैलास बिल्डिंग, वर्कशॉप रोड, कैलास नगर, नांदेड भेट द्यावी. अधिक माहितीसाठी कार्यालयाचा दु.क्र. (02462) 251674 वर संपर्क साधावा, असे आवाहन कौशल्य विकास, रोजगार व उद्योजकता केंद्राच्या सहाय्यक आयुक्त रेणूका तम्मलवार यांनी केले आहे.

0000 

 वृत्त क्र.  67 

जिल्हा परिषद व पंचायत समिती सार्वत्रिक

निवडणुकीसाठी विविध कामांसाठी निविदा

 

नांदेड (जिमाका) दि. 14 :- आगामी जिल्हा परिषद व पंचायत समिती सार्वत्रिक निवडणुकांसाठी महाराष्ट्र शासनाच्या mahatenders.gov.in या संकेतस्थळावर 14 ते 28 फेब्रुवारी पर्यंत सात ई-निविदा मागविण्यात आल्या आहेत. यात मतदान केंद्रासाठी आवश्‍यक साहित्‍य तसेच कार्यालयीन कामासाठी लेखन सामुग्री व तत्‍सम साहित्‍य पुरवठा व पुढील बाबीचा समावेश आहे. फर्निचर / मंडप भाडे तत्‍वावर पुरवठा करणे, व्हिडीओग्राफी करणेकरीता HD4K डिजिटल कॅमेरामनसह भाडे तत्‍वावर पुरवठा, भाडेतत्त्वावर सी.सी.टी.व्‍ही.(C.C.T.V.), भाडे तत्‍वावर पुरवठा संगणक, झेरॉक्‍स प्रती पुरवठा, डी.टी.पी. व छपाई करण्याबाबतच्या कामांचा यात समावेश आहे. या निविदांची विस्‍तुत माहिती mahatenders.gov.in संकेतस्‍थळावर उपलब्‍ध आहे, असे जिल्हाधिकारी कार्यालयाचे तहसिलदार(सामान्य)यांनी प्रसिद्धीपत्रकाद्वारे कळविले आहे.

0000