महाराष्ट्र लोकसेवा आयोगाकडून

परीक्षांचे अंदाजित वेळापत्रक प्रसिद्ध

     लातूर, दि. 28 (विमाका):-  महाराष्ट्र   लोकसेवा आयोगाकडून 2024 मधील नियोजित विविध स्पर्धा परीक्षांचे अंदाजित वेळापत्रक आयोगाच्या https://mpsc.gov.in व https://mpsconline.gov.in या संकेतस्थळावर प्रसिद्ध करण्यात आले असल्याचे  आयोगाचे उपसचिव दे. वि. तावडे यांनी कळविले आहे.

        शासन सेवेतील विविध पदांवरील भरतीकरिता आयोगामार्फत वर्षभर विविध परीक्षांचे आयोजन करण्यात येते. त्यानुसार 2024 मध्ये घेण्यात येणाऱ्या विविध परीक्षांचे दिनांक आयोगाकडून निश्चित करण्यात आले आहेत. प्रस्तावित परीक्षेचे वेळापत्रक निश्चित करताना संघ लोकसेवा आयोग, विविध विद्यापीठे, परीक्षा घेणाऱ्या इतर संस्था इत्यादींकडून आयोजित करण्यात येणाऱ्या परीक्षा एकाच दिवशी येणार नाहीत व उमेदवारांचे नुकसान होणार नाही यादृष्टीने आयोगाच्या परीक्षांचे वेळापत्रक निश्चित करण्यात येते. तरी सर्व संबंधित संस्थांनी  परीक्षा एकाच दिवशी येणार नाहीत, याची दक्षता घेण्याची विनंती  संस्थांना आयोगाने केल्याचेही त्यांनी कळविले आहे.

इच्छुक उमेदवारांनी या संधीचा लाभ घ्यावा. तसेच आयोगाकडून वेळोवेळी जाहिर करण्यात येणाऱ्या सुचनांसाठी आयोगाच्या वरील संकेतस्थळास उमेदवारांनी वेळोवेळी भेट द्यावी, असे आवाहनही आयोगाव्दारे करण्यात आले आहे.

***

 जुना मोंढा ते शर्मा ट्रॅव्हल्स कार्यालय कौठा मार्गावरील वाहतूकीस प्रतिबंध

·         पर्याय मार्गाचा वापर करण्याबाबत अधिसूचना निर्गमीत 

 

नांदेड, (जिमाका) दि. 28 :-  नांदेड शहरातील जूना मोंढा गोदावरी नदीवरील पुल डॉ. बाबासाहेब आंबेडकर चौकापर्यंत रा.मा.256 (कि.मी 42/200 ते 75/700) व (2) नांदेड लातूर रस्ता भगतसिंह चौक गोदावरी नदीवरील नवीन पुल (पश्चिम वळण रस्ता) रा.मा.247 (कि.मी.0/00 ते 4/500) रस्त्याचे सिमेंट कॉक्रीटकरण, नाली बांधकाम, रस्ता दुभाजकासह संगमस्थळाची सुधारणा करण्यात येत असल्यामुळे जुना मोंढा ते शर्मा ट्रॅव्हल्स कार्यालय (कौठा) या भागातील वाहतूक पूर्णपणे बंद करुन इतर मार्गाने वळविण्यात आली आहे.  प्रतिबंध  करण्यात आलेल्या मार्गाऐवजी पर्यायी मार्गाचा वापर करण्याबाबत जिल्हादंडाधिकारी पांडुरंग बोरगावकर यांनी अधिसूचना निर्गमीत केली आहे.  

जुना मोंढा ते शर्मा ट्रॅव्हल्स कार्यालय कौठा या रस्त्याच्या काम सुरु करावयाचे असल्यामुळे वाहतुकीस जुना मोंढा ते शर्मा ट्रॅव्हल्स कार्यालय कौठा या प्रतिबंधित मार्गाऐवजी जुना मोंढा –वजीराबाद –कौठा-रवीनगर-शर्मा ट्रॅव्हल्स कार्यालय (कौठा) या पर्यायी मार्गाने ये-जा करतील.

मोटार वाहन कायदा 1988 चे कलम 115 मधील तरतुदीनुसार जिल्हादंडाधिकारी पांडुरंग बोरगावकर यांनी संबंधित विभागाने उपाययोजना करुन 25 नोव्हेंबर ते 24 डिसेंबर 2023 पर्यत नमूद केलेल्या पर्यायी मार्गाने सर्व प्रकारची वाहने वळविण्यास मान्यता दिली आहे.

00000

 जिल्ह्यात जमावबंदी, शस्त्रबंदी आदेश लागू  

नांदेड (जिमाका) दि. 28 :- नांदेड जिल्ह्यात 9 डिसेंबर 2023 च्या मध्यरात्री पर्यंत शस्त्रबंदी व जमावबंदी आदेश लागू राहणार आहे, अशी माहिती अपर जिल्हादंडाधिकारी कार्यालयाकडून देण्यात आली आहे. 

 

जिल्ह्यातील कायदा व सुव्यवस्था अबाधित रहावी म्हणून अपर जिल्हादंडाधिकारी यांनी मुंबई पोलीस अधिनियम 1951 चे कलम 37 (1) व (3) अन्वये जिल्ह्यात 9 डिसेंबर 2023 रोजी मध्यरात्री पर्यंत शस्त्रबंदी व जमावबंदी आदेश लागू राहिल. त्यानुसार पाच किंवा पाचपेक्षा अधिक व्यक्तींनी या आदेशात नमुद असलेली कृत्ये सार्वजनिक परिसर किंवा त्याच्या जवळपास करण्यास बंदी घालण्यात आली आहे. हा आदेश कामावरील पोलीस अधिकारी, शासकीय कर्मचारी, विवाह, अंत्ययात्रा, धार्मिक कार्यक्रम, यात्रा व इतर सक्षम अधिकारी यांनी विशेषरित्या परवानगी दिलेल्या मिरवणुकांना लागू होणार नाही.

अशा मिरवणुकांना परवानगी देण्याचे अधिकार तसेच पाच व पाचपेक्षा जास्त इसम जमण्यासाठी, सभा, मिरवणुका, मोर्चा काढणे, ध्वनीक्षेपक वाजविण्यास परवानगी देण्याचे अधिकार जिल्ह्यातील पोलीस ठाणे प्रभारी अधिकारी यांना तसेच पोलीस अधीक्षक नांदेड यांनी प्राधिकृत केलेल्या इतर पोलीस अधिकारी यांना राहतील.

00000

दि. 26.11.2023

 संविधान दिनानिमित्त आयोजित रॅलीला उत्स्फूर्त सहभाग

·         संविधान दिनानिमित्त संविधान प्रस्ताविकेचे सामुहिक वाचन

नांदेड (जिमाका) दि. 26 :- संविधान दिनानिमित्त सामाजिक न्याय व विशेष सहाय्य विभागातर्फे नांदेड येथे महात्मा ज्योतीबा फुले पुतळा ते डॉ. बाबासाहेब आंबेडकर पुतळ्यापर्यंत संविधान दिनाचे औचित्य साधून भव्य रॅली काढण्यात आली. सुरवातीला जिल्हाधिकारी पी.एस.बोरगावकर यांनी महात्मा ज्योतीबा फुले व क्रांतीज्योती सावित्रीबाई फुले यांच्या पुर्णाकृती पुतळ्यास पुष्पहार अर्पण करुन अभिवादन केले.  त्यानंतर त्यांनी  संविधान रॅलीला  हिरवी झेंडी दाखवली.

 

यावेळी सहाय्यक आयुक्त शिवानंद मिनगीरे, समाज कल्याण अधिकारी बापू दासरी यांची उपस्थिती होती. या संविधान रॅलीचा मार्ग महात्मा ज्योतीबा फुले पुतळा ते शिवाजी नगर, कलामंदिर, मुथा चौक, छत्रपती शिवाजी महाराज पुतळा ते डॉ. बाबासाहेब आंबेडकर यांच्या पुतळ्यापर्यंत होता. डॉ. बाबासाहेब आंबेडकर यांच्या पुतळयाजवळ संविधान प्रस्ताविकेचे सामुहिक वाचन करण्यात येवून राष्ट्रगीताने संविधान रॅलीची सांगता करण्यात आली.

 

भारतीय राज्यघटना ही जगातील सर्वश्रेष्ठ राज्यघटना असून सर्व नागरिकांनी त्याचा अभ्यास करावा. सर्वानी घटनेने दिलेल्या अधिकार व कर्तव्ये त्यांचे पालन करावे असे जिल्हाधिकारी पी.एस. बोरगावकर यांनी सांगितले. या कार्यक्रमास समाज कल्याण कार्यालयील अधिकारी कर्मचारी, जाती पडताळणी कार्यालयील अधिकारी कर्मचारी, बार्टीचे प्रकल्प अधिकारी व समतादूत तसेच विविध महामंडळाचे कर्मचारी यांची उपस्थिती होते.

 

या संविधान रॅली मध्ये पोलिस अधिक्षक कार्यालीयातील पोलिस बँड पथक कर्मचारी सुनिल पारधे यांच्या अधिपत्याखालील बँड पथक संच यांनी गीत सादर केले. या रॅलीमध्ये महात्मा फुले हायस्कुल येथील स्काऊट गाईड व एन.सी.सी. विद्यार्थी सहभागी झाले होते. वसंतराव नाईक महाविद्यालय, जवाहरलाल नेहरू समाजकार्य महाविद्यालय, नोबल हास्कुल, पंचशिल विद्यालय, सायन्स कॉलेज मधील राष्ट्रीय सेवा योजना विद्यार्थी यांनी सहभाग नोंदविला.  शाळा व महाविद्यालयातील विद्यार्थी शिक्षक, कर्मचारी तसेच इतर मागास बहुजन कल्याण विभागाच्या आश्रमशाळेतील कर्मचारी हे रॅलीत सहभागी झाले होते तसेच जिल्हयातील नागरीकांची मोठया प्रमाणात उपस्थिती होती.

00000

यशकथा : 

वेटरच्या नोकरीपासून ते

मालकीच्या धाब्यापर्यंतची अनोखी यशोगाथा 

अवघ्या पाच एकरच्या आतली वडिलोपार्जित शेती. त्यात भावा-भावातील हिस्से. यात भागत नाही म्हणून सुरुवातीला व्यवसायाकडे वळण्याचे धाडस करणारे धनेगाव येथील मुळ रहिवासी असलेले बाळु शिंदे ! काय करायचे याचा कोणताही आराखडा त्यांना बांधला नाही. शिक्षण कमी म्हणजे नसल्यागतच. बँकेतल्या खात्यावर व्यवहारासाठी तीन-तीनवेळा त्यांच्याकडून सही करून घेतल्यावरही सारखी न आल्याने बँकेतील कर्मचारी त्यांच्या प्रत्येक व्यवहारासाठी दचकून राहतात. “सहीपुरते कसेबसे अक्षरे जवळ करणाऱ्यांपैकी मी एक आहे” अशी प्रांजळ कबुली देण्याइतपत निर्मळपणा बाळु शिंदेनी जपला आहे. या निर्मळपणातच त्यांचा आत्मविश्वास दिसून येतो. हा आत्मविश्वास त्यांचे मुख्य भांडवल.    

काही तरी काम करायचे आहे, हे डोक्यात घेऊन शिंदेनी अगोदर नांदेडला राहण्याचा निर्णय घेतला. महानगरपालिकेअंतर्गत काही करता येईल का याची चाचपणी त्यांनी केली. ही चाचपणी करतांना आपला रोजचा उदरनिर्वाह सुरू रहावा यासाठी ॲटोरिक्षा जवळ करायला त्यांनी मागे-पुढे पाहिले नाही. महानगरपालिकेतील तत्कालीन वरिष्ठ अधिकारी डॉ. निपुण विनायक यांनी शिंदेला घरकुलची कामे करण्याबाबत जी कौशल्य लागतात ती शिक्षणासाठी संधी दिली. प्रशिक्षण पूर्ण झाल्यावर घरकुलच्या कामात हळूहळू शिंदेनी जम बसविला. घरांसाठी विट्टांचे एक-एक थर जसे वाढू लागले त्याप्रमाणात शिंदेला स्वत:ची ओळख निर्माण करायला उशीर लागला नाही. कष्टातील मिळकतीवर स्वत:चे एक घरकुल त्यांनी कॅनलरोडला बांधून घेतले.   

“घरकुलच्या कामातून माझे घर सावरल्या गेले. मात्र कालांतराने आणखी किती काळ याच कामात अडकून पडायचे” हा माझ्यापुढे मोठा प्रश्न होता. या विंवचनेत मी इतर व्यवसाय करता येतील का याची चाचपणी सुरू केली, असे आपल्या प्रवासाबद्दल शिंदे सांगतात. पुन्हा वेगळा व्यवसाय निवडायचा ही खुणगाठ मनाशी बाळगून सुरुवातीला चंद्रलोक व नंतर सिटी प्राईट या हॉटेलमध्ये त्यांनी काम करायला सुरूवात केली. हॉटेलमधील इतर कामे करतांना स्वयंपाकाची आवड शिंदे यांना निर्माण झाली. सुरुवातीला दाल फ्राय पासून छोटी-मोठे बारकावे त्यांनी शिकून घेतले. हा प्रवास पुढे  तंदूर, व्हेज हंडी, नॉनव्हेज हंडी करीत ज्वारीच्या रोटी पर्यंत पोहचला. यातच त्यांच्या हाताला चव लागली. “सारेकाही मी इथेच शिकलो” असे शिंदे सांगतात. यात आत्मविश्वास आल्याने मीही माझ्या स्वत:च्या मालकीचे छोटे का असेना पण स्वत:चे हॉटेल असावे हे स्वप्न उराशी बाळगले.   

अनुभवाची शिदोरी सोबत असल्यामुळे आपल्याला जे काही सुरू करायचे आहे, त्या व्यवसायाचे कौशल्य अंगी असल्याने मी स्वत:चे हॉटेल सुरू करण्यासाठी कुठून अर्थसहाय्य मिळेल का याचा विचार सुरू केला. यातूनच मला अण्णासाहेब पाटील आर्थिक मागास विकास महामंडळाकडे संपर्क करण्याचा मित्रांनी सल्ला दिला. त्यानुसार मी महामंडळाच्या पदाधिकाऱ्यांसमवेत भेट घेतली. त्यांनी माझ्यातला आत्मविश्वास पाहून व पडेल ते काम करण्याची माझी तयारी पाहून साडेनऊ लाख रुपयांचे कर्ज मंजूर केले. यातूनच नांदेडमध्ये स्वत:चे एक हॉटेल (धाबा) सुरू करू शकलो यावर माझा मलाच कधीकधी विश्वास बसत नाही, असे शिंदेनी सांगतात. दर महिन्याला 23 हजार 300 एवढा हप्ता आजवर मी नित्यनियमाने फेडत आलो आहे. येत्या काही महिन्यात माझे हे संपूर्ण कर्ज पूर्णपणे फिटलेले असेल. नंतर ते हॉटेल विनाकर्जाचे असेल, हे त्यांचे स्वप्न साकार होणार आहे.   

नांदेड येथील महाराणा प्रतापसिंह चौक येथे बाळु शिंदे यांनी भाड्याचे जागा घेऊन हॉटेल तुळजाई अर्थात धाबा सुरू केला आहे. हॉटेल तुळजाईसाठी त्यांनी घरातील सर्व मनुष्यबळ उपयोगात घेतले हे विशेष ! कामाची लाज बाळगुन चालणार नाही, मला हे जमणार नाही, आपले हे काम नाही असा भेदभाव मनात कधीच येऊ दिला नाही. त्याच श्रद्धेने माझे मुले त्यांचे शिक्षण पूर्ण करत हॉटेलमध्ये किचनचे काम करतात हे माझ्यासाठी जास्त महत्वाचे आहे, असे शिंदे सांगतात. अण्णासाहेब पाटील आर्थिक मागास विकास महामंडळाने माझ्या स्वयंरोजगाराच्या कल्पनेला उचलून घेत जे कर्ज दिले आहे, जी योजना दिली आहे त्यामुळे मला पुढे येता आले, असे स्पष्ट सांगण्याचा निर्मळपणा बाळु शिंदे यांनी जपला आहे. 

विनोद रापतवार,

जिल्हा माहिती अधिकारी नांदेड.   

 

 शिष्यवृत्ती योजनेसाठी ऑनलाईन नोंदणी 30 नोव्हेंबर पर्यंत

संबंधित मुख्याध्यापकांनी मुदतीत कार्यपूर्ती करण्याचे आवाहन 

 

नांदेड (जिमाका) 24 :- सन  2023-24 वर्षासाठी केंद्रीय  शालेय शिक्षण आणि साक्षरता विभागाच्या 'राष्ट्रीय आर्थिक दुर्बल घटकासाठी असलेली शिष्यवृत्ती' योजनेसाठी (एनएमएमएस) राष्ट्रीय शिष्यवृत्ती पोर्टल (एनएसपी) www.scholarships.gov.in वर नवीन आणि नूतनीकरण अर्जांच्या ऑनलाइन नोंदणी व अर्ज भरण्यास 1 ऑक्टोबर 2023 पासून सुरवात झाली आहे. नोंदणीची अंतिम तारीख 30 नोव्हेंबर 2023 आहे अशी आहे. याबाबत नांदेड जिल्ह्यातील माध्यमिक व उच्च माध्यमिक शाळा मुख्याध्यापकांना बैठका व पत्राद्वारे यापूर्वीच कळविण्यात आले आहे. जिल्ह्यातील काही शाळांनी आज पर्यंत विद्यार्थ्यांचे नवीन आणि नूतनीकरणाचे अर्ज आज पर्यंत भरलेले नाहीत. ही बाब गंभीर असून दिलेल्या मुदतीत अर्ज न भरणाऱ्या मुख्याध्यापकांवर कारवाई करण्यात येणार आहे, अशी माहिती  प्रशांत दिग्रसकर शिक्षणाधिकारी (योजना) जिल्हा परिषद नांदेड यांनी दिली आहे.

0000

 साहित्यरत्न लोकशाहीर अण्णाभाऊ साठे विकास

महामंडळाच्या योजनांसाठी आत्मविश्वासाने पुढे या

-  व्यवस्थापकीय संचालक मनिष सांगळे

 

नांदेड (जिमाका) 24 :- राज्यातील मांग, मातंग, मिनी-मादीग, मादींग, दानखणी मांग, मांग महाशी, मदारी, राधे मांग, मांग गोराडी, मांग गोराडी, मादगी व मादिगा या जातीतील लोकांना विकासाच्या प्रवाहात आणण्यासाठी राज्य शासन प्रयत्नशील आहे. यासाठी शासनाने बीज भांडवल योजना, अनुदान योजना सारखे अनेक नाविन्यपूर्ण उपक्रम हाती घेतले आहेत. ज्या क्षेत्रामध्ये आपला स्वयंरोजगार सुरू होईल, व्यवसाय सुरू करता येईल असा आत्मविश्वास व कौशल्य असलेल्या व्यक्तींना योजनेच्या अटी व निकषानुसार 45 टक्के बीज भांडवल योजना कार्यरत आहेत. अपेक्षीत लाभार्थ्यांनी यासाठी आत्मविश्वासाने पुढे येऊन साहित्यरत्न लोकशाहीर अण्णाभाऊ साठे विकास महामंडळ (मर्या.) अंतर्गत कार्यालयांशी संपर्क साधावा, असे आवाहन व्यवस्थापकीय संचालक मनिष सांगळे यांनी केले.

 

आज 24 नोव्हेंबर रोजी डॉ. बाबासाहेब  आंबेडकर, सामाजिक न्याय भवन सभागृह येथे सकाळी 11 वा. आयोजित मेळाव्यात ते बोलत होते. नांदेड व परभणी आणि हिंगोली येथील मांग व तत्सम जातीच्या बांधव या मेळाव्यास  उपस्थित होते. साहित्यरत्न लोकशाहीर अण्णाभाऊ साठे विकास महामंडळामार्फत राबविण्यात येणाऱ्या योजनांचा लाभ तळागाळापर्यंत व शेवटच्या व्यक्ती पर्यंत  पोहोचविण्यासाठी  योजनाचा प्रसार, प्रचारासाठी या मेळाव्याचे आयोजन करण्यात आले होते. कार्यक्रमाच्या अध्यक्षस्थानी साहित्यरत्न लोकशाहीर अण्णाभाऊ साठे विकास महामंडळाचे व्यवस्थापकीय संचालक मनिष सांगळे होते. प्रमुख पाहुणे म्हणुन व्यवस्थापक अनिल म्हस्के, प्रादेशिक व्यवस्थापक आर. जी. दरबस्तेवार हे उपस्थित होते.  

 

महामंडळमार्फत पूर्वी राबविण्यात येत असलेल्या साहित्यरत्न लोकशाहीर अण्णा भाऊ साठे शिष्यवृत्ती योजनेत बदल करुन देण्यात येणाऱ्या प्रोत्साहनपर रक्कमेत देखील मोठयाप्रमाणात वाढ करण्यात आल्याची माहिती सांगळे यांनी दिली. देशाअंतर्गत शिक्षणासाठी 10 लाख तर परदेशात शिक्षणासाठी 30 लाख रुपये निकषानुसार  दिलेल्या अभ्यासक्रमासाठी शैक्षणिक कर्ज शासनाने उपलब्ध केले आहे. एनएसएफडीसी योजना  व त्यासाठी आवश्यक असलेली खंडहमी मिळणेसाठी शासन प्रयत्नशील आहे. सर्व सुरु असलेल्या योजना व प्रस्तावित योजना प्रभावीपणे सुरु राहण्यासाठी  100 कोटी रुपयांची मागणी नवी दिल्ली येथील राष्ट्रीय अनुसूचित जाती जमाती वित्तीय विकास महामंडळ यांच्याकडे केल्याचे सांगळे यांनी सांगितले. महामंडळामार्फत राबविण्यात येत असलेल्या योजनांचा लाभ मोठया प्रमाणात घेण्याचे आवाहन महाव्यवस्थापक अनिल म्हस्के यांनी केले.

 

व्यवस्थापकीय  संचालक मनिष सांगळे यांनी महामंडळाचा पदभार स्विकारल्यापासून केलेल्या कामकाजाचा आढावा सादर केला. लाभार्थींनी योजनांचा लाभ घेण्यासाठी व्यवसाय निवड करताना, नवीन व नाविन्यपूर्ण व्यवसाय निवडीबाबत मार्गदर्शन केले. महामंडळाच्या योजना व प्रस्तावित योजना याबाबत सविस्तर माहिती त्यांनी दिली. धाराशिव जिल्ह्यातील तुळजापूर येथे शासनाने महामंडळास उपलब्ध करुन दिलेल्या जमीन/जागेवर सुरु करण्यात येणाऱ्या  युपीएससी / एमपीएससी सेंटर व बहुउपयोगी  प्रशिक्षण केंद्राबाबत मार्गदर्शन केले. महामंडळामार्फत राबविण्यात येत असलेल्या योजनांचा लाभ मोठ्या प्रमाणात घेण्याचे आवाहन त्यांनी केले.

 

प्रास्ताविकात साहित्यरत्न लोकशाहीर अण्णाभाऊ साठे विकास महामंडळाचे जिल्हा व्यवस्थापक टी. आर. शिंदे यांनी महामंडळाच्या योजनांची माहिती दिली. सामाजिक कार्यकर्ते राष्ट्रपती पुरस्कार प्राप्त शिक्षक डॉ. शिवा कांबळे,  प्राध्यापक अमरजित आईलवाड, सामाजिक कार्यकर्ते लालबाजी घाटे, प्रकाश मुराळकर, (स्थायी) समिती सदस्य नामदेव कांबळे, नगरसेवक व सामाजिक कार्यकर्ते  रविकिरण वाघमारे,अण्णाभाऊ साठे पुरस्कार प्राप्त श्रीमती हरीबाई कांबळे, रमेश गायकवाड यांचे मार्गदर्शनपर मनोगत व्यक्त करुन महामंडळातील योजना प्रभावीपणे राबविण्यासाठी काही सुचना करण्यात आली. मनोगतामध्ये प्रामुख्याने जामिनदारांची अट शिथिल करण्याबाबत विनंती करण्यात आली. महामंडळाचे लाभार्थी यशस्वी उद्योजक रमेश गायकवाड यांची त्यांच्या यशाबद्दल महामंडळाच्या योजनेबद्दल मनोगत व्यक्त केले.

 

उपस्थित मान्यवरांचे स्वागत आर.जी.दरबस्तेवार, प्रादेशिक व्यवस्थापक लातुर व टी.आर.शिंदे जिल्हा व्यवस्थापक नांदेड आणि आर. एन. पवार जिल्हा व्यवस्थापक परभणी, पी. जी. सुर्यवंशी लेखापाल हिंगोली आणि श्रीमती स्नेहलता अरुणराव खुणे लेखापाल नांदेड यांच्यावतीने पुष्पगुच्छ देऊन केले. कार्यक्रमाच्या सुरुवातीला शाहीर श्रीमान खानजोडे व रामराव मोहन कांबळे लोणकर यांनी गाणे सादर केली. प्रकल्प अधिकारी समतादुत बार्टी श्रीमती सुजाता पोहरे यांनी आभार मानले तर सुत्रसंचलन कु. विशाखा बंडेवार, विनोद पाचंगे समतादुत बार्टी यांनी केले.

00000