वृत्त क्रमांक 79

 जिल्‍हास्‍तरीय कृषि महोत्‍सवाचे

1 ते 5 मार्च या कालावधीत आयोजन

 

नांदेड, (जिमाका) दि. 22 :- मराठवाडा मुक्‍तीसंग्राम दिनाच्या अमृत महोत्‍सवी वर्षानिमित्‍त व आंतरराष्‍ट्रीय पौष्टिक तृणधान्‍य वर्ष 2023 चे औचित्‍य साधून कृषि विभाग व आत्‍मा यांच्या संयुक्‍त विद्यमाने “नांदेड जिल्‍हा कृषि महोत्‍सवाचे’’ आयोजन 1 ते 5 मार्च 2023 या कालावधीत करण्यात येणार आहे. या महोत्‍सवास नागरिकांनी भेट देऊन जास्तीत जास्त शेतमाल खरेदी करुन  शेतकऱ्यांना प्रोत्‍साहन द्यावे, असे आवाहन जिल्हा अधिक्षक कृषि अधिकारी तथा प्रकल्‍प संचालक (आत्‍मा) रविशंकर चलवदे यांनी केले आहे.

 

हा महोत्सवाचे आयोजन सकाळी 10 ते सायं. 8 वाजेपर्यंत कृषि उत्‍पन्‍न बाजार समिती, नवा मोंढा, नांदेड येथे करण्‍यात येणार आहे. या कृषि महोत्‍सवात कृषि प्रदर्शन, कृषि विज्ञान केंद्र / कृषि विद्यापीठाचे स्‍टॉल, विविध कृषि निगडीत तंत्रज्ञानाचे प्रदर्शन व कृषिसंलग्‍न शासकीय विभागाचे स्‍टॉल असे एकुण 200 स्‍टॉल उभारण्‍यात येणार आहेत. त्‍याचबरोबर विविध विषयांचे चर्चासत्र, खरेदी विक्री संमेलनाचे आयोजन करण्‍यात येणार आहे. आंतरराष्‍ट्रीय पौष्टिक तृणधान्‍य वर्ष 2023 म्‍हणून साजरे करण्‍यात येणार आहे. पौष्टिक तृणधान्‍यामध्‍ये ज्‍वारी, बाजरी, नाचणी, वरई, राळा, राजगिरा यासारख्‍या पिकांचा समावेश आहे. पिकाचे आहारामध्‍ये महत्‍व कळावे यासाठी चर्चासत्र पाककृती स्‍पर्धा आयोजित करण्‍यात येणार आहे. याचबरोबर याचा आहारामध्‍ये समावेश व्‍हावा यासाठी त्यापासुन तयार होणारे विविध पदार्थांचे प्रदर्शन व विक्री होणार आहे.

 

यामध्‍ये जिल्‍हयातील शेतकरी गट, शेतकरी उत्‍पादक कंपनी व महिला गटांचा सक्रिया सहभाग या महोत्‍सवात राहणार आहे. महोत्‍सवांच्‍या ठिकाणी आपल्‍या शेतकऱ्यांनी उत्पादित केलेला शेतमाल गहु,  ज्वारी, तांदूळ, तुर, मुग, उडीद, चनाडाळ, हळद, मिरची, मसाले, विविध प्रकारचे सेंद्रीय उत्पादने (गुळ, हळद पावडर, सेंद्रीय डाळी) तसेच नाविन्यपूर्ण उत्पादने जसे, मध, गुळाचा पाक व महिला बचतगटांची उत्पादने (चटणी, लोणचे, पापड, कुरडई इत्यादी) टरबुज, खरबुज इत्यादी फळे व भाजीपाला थेट विक्रीसाठी उपलब्ध राहणार आहेत. तसेच सेंद्रीय हिरव्‍या भाज्‍या, फळभाज्‍या व फुलभाज्‍या व रानफळांची व शेतकऱ्यांनी विविध उत्‍पादीत केलेले लाकडी घाण्‍याचे करडई, भुईमुग, जवस, तीळाचे तेल, बांबुपासुन तयार करण्‍यात आलेले वस्‍तु केळीचे वेफर्स यांचे प्रदर्शन व विक्री होणार आहे. डिंक, बिब्याची गोडंबी आदी कच्‍चा माल व काळा गहू उपलब्‍ध राहणार आहे.

0000

वृत्त क्रमांक 78

 वैद्यकिय महाविद्यालय परिसरातील

एसटीपी प्लांटच्या मशीनला आग

 

कोणतीही जीवितहानी नाही  

 

नांदेड (जिमाका) दि. 21 :- डॉ. शंकरराव चव्हाण शासकीय महाविद्यालय व रुग्णालय विष्णुपुरी परिसरात एसटीपी प्लांट (मलशुद्धीकरण केंद्र) च्या यंत्रसामुग्री बसवण्याची प्रक्रिया खाजगी कॉन्ट्रॅक्टरद्वारे सुरू होती. त्याला वेल्डिंग करत असतांना मंगळवार 21 रोजी दुपारी 2.30 वा. अचानक आग लागली. त्या टाकीमध्ये असणाऱ्या प्लास्टिकच्या मटेरियलने आग धरली. तात्काळ अग्निशामन दलास पाचारण करण्यात आले व आग अटोक्यात आणण्यात आली. त्यामध्ये कोणतीही जीवीतहानी किंवा इजा झाली नसल्याची माहिती अधिष्ठाता डॉ. पी. टी. जमदाडे यांनी दिली.  

0000

वृत्त क्रमांक 76

 शासकीय गोदामासाठी वापरण्यात येणारे

टिनशेड व इतर साहित्याचा 1 मार्च रोजी लिलाव

नांदेड, (जिमाका) दि. 21 :- व्हीआयपी रस्त्यावरील शासकीय गोदामासाठी वापरण्यात आलेले बीओटी तत्वावरील महानगरपालिकेचे शॉपिंग कॉम्पलेक्स विकसित टिनशेड व इतर अनुषंगिक साहित्याचा मुल्यांकनानुसार लिलाव करण्यात येणार आहे. हा लिलाव बुधवार 1 मार्च 2023 रोजी सकाळी 11 वा. प्रशासकीय इमारत, तहसिलदार नांदेड यांचे कक्षात आयोजित केला आहे असे तहसिलदार नांदेड यांनी कळविले आहे.

या टिनशेडचे शासकीय मुल्य हे 12 लाख 3 हजार 739 रुपये असून या रकमेपेक्षा जास्त बोली लावणाऱ्यास सदर साहित्य देण्यात येणार आहे. या लिलावात सहभागी होवू इच्छिणाऱ्या व्यावसायिक, व्यापारी, एजन्सी, संस्था यांनी नोंद घ्यावी.

लिलावाच्या अटी व शर्ती पुढीलप्रमाणे आहेत.

लिलावाची बोली स्विकारण्याचे किंवा नाकारण्याचे सर्व अधिकार तहसिलदार नांदेड यांनी राखून ठेवले आहेत. लिलावात भाग घेणाऱ्या व्यक्तींना बाजारी किंमतीच्या 25 टक्के इतकी अनामत रक्कम भरुन हरास मध्ये भाग घेता येईल. ज्या बोलीदाराची बोली जास्त असेल ती स्विकारण्यात येईल व लिलावाची रक्कम तात्काळ भरावी लागेल. ज्या बोलीदाराची बोली स्विकारण्यात येणार नाही त्यांची अनामत रक्कम लिलाव संपल्यानंतर लिलावाच्या ठिकाणीच त्यांना परत करण्यात येईल. लिलावातील टिन शेडची खात्री करुन घेण्याची जबाबदारी संबंधित लिलाव धारकांची आहे. सदरचे टिन शेड कार्यालयीन वेळेत पाहता येईल, असेही प्रसिद्धीपत्रकाद्वारे कळविले आहे.

0000

वृत्त क्रमांक 76

 दहावी, बारावी लेखी परीक्षेसाठी हेल्पलाईन सुरु 

नांदेड, (जिमाका) दि. 20 :- महाराष्ट्र राज्य माध्यमिक व उच्च माध्यमिक शिक्षण मंडळ पुणे यांच्यावतीने फेब्रुवारी-मार्च 2023 मध्ये माध्यमिक व उच्च माध्यमिक प्रमाणपत्र परीक्षेसंदर्भात विद्यार्थ्यांना त्यांच्या येणाऱ्या अडीअडचणी सोडविण्यासाठी लातूर विभागीय मंडळ स्तरावर इयत्ता दहावीसाठी 02382-251633 व इयत्ता बारावीसाठी 02382-251733 या क्रमांकावर लातूर विभागीय मंडळात हेल्पलाईन सुरु करण्यात आली आहे. विद्यार्थी पालक व शाळा प्रमुखांनी आपल्या अडीअडचणी विषयी दूरध्वनीवर संपर्क साधावा, असे आवाहन लातूर विभागीय मंडळाचे विभागीय सचिव यांनी केले आहे.

 

तसेच नियुक्त अधिकारी-कर्मचाऱ्यांचे भ्रमणध्वनी नंबर पुढील प्रमाणे आहेत. सहसचिव एस.सी. फडके यांचा भ्रमणध्वनी 9421030710, सहा.सचिव ए.आर.कुंभार 9405077991, तसेच उच्च माध्यमिक साठी एन.एन.डुकरे (व.अ) मो.नं. 8379072565, ए.सी.राठोड (क.लि) मो.नं. 8329471523 तर माध्यमिक साठी ए.पी. चवरे (व.अ)  मो.क्र. 9421765683 तर आर.ए. बिराजदार (क.लि) मो.क्र. 9892778841 हा भ्रमणध्वनी संपर्क क्रमांक आहे. तर नांदेड जिल्ह्यासाठी समुपदेशक बी. एम. कच्छवे यांचा भ्रमणध्वनी 9371261500, बी.एम.कारखेडे मो.क्र.9860912898, पी.जी. सोळंके मो.क्र. 9860286857,  बी. एच. पाटील 9767722071 यांचे भ्रमणध्वनी क्रमांक लातूर विभागीय मंडळाने प्रसिद्धी पत्रकाद्वारे कळविले आहेत.

000000

 *मराठवाडा विभागाच्या माहिती संचालकपदाचा किशोर गांगुर्डे यांनी स्वीकारला कार्यभार*

*शासकीय प्रसिद्धी व जनसंपर्कासाठी बदलत्या तंत्रज्ञानाचा वापर करण्याचे आवाहन*

औरंगाबाद, दि.17, (वि.मा.का.) – बदलती माध्यमे आणि तंत्रज्ञानाचा अंगीकार करुन शासनाची प्रतिमा उंचावण्यासाठी तसेच शासकीय योजना, उपक्रमांच्या प्रसारासाठी अधिकारी-कर्मचाऱ्यांनी प्रभावीपणे काम करण्याचे आवाहन मराठवाडा विभागाचे संचालक (माहिती) किशोर गांगुर्डे यांनी केले. माहिती व जनसंपर्क महासंचालनालयाच्या मराठवाडा विभागाचे संचालक म्हणून किशोर गांगुर्डे यांनी आज येथे (दि.17) रोजी कार्यभार स्वीकारला.

मराठवाडा विभागाच्या माहिती संचालक पदाची सूत्रे यापूर्वी श्री. हेमराज बागुल यांच्याकडे होती. खडकेश्वर येथील संचालक (माहिती) कार्यालयात आज श्री. किशोर गांगुर्डे यांचे जिल्हा माहिती अधिकारी मुकुंद चिलवंत, सहायक संचालक गणेश फुंदे, माहिती अधिकारी मीरा ढास यांनी पुष्पगुच्छ देऊन स्वागत केले. यावेळी सर्व कर्मचारी उपस्थित होते.

कार्यभार स्वीकारल्यानंतर श्री.गांगुर्डे यांनी मराठवाडा विभागातील आठही जिल्हा माहिती अधिकाऱ्यांशी संवाद साधून कामकाजाचा आढावा घेतला. आज माध्यम क्षेत्रातील बदल ओळखून नवीन तंत्रज्ञान आत्मसात करुन कामकाज करण्यासोबतच समाजमाध्यमांच्या प्रभावीपणे वापरावर भर देण्याची आवश्यकता व्यक्त करतानाच यासाठी आवश्यक ते सर्व प्रशिक्षण देण्यात येईल, असेही श्री.गांगुर्डे यांनी सांगितले.

मराठवाडा विभागात शासकीय माहिती प्रचार-प्रसिद्धी व जनसंपर्काचे काम करताना संघभावनेने काम करणार असल्याचेही त्यांनी सांगितले.

माहिती व जनसंपर्क महासंचालनालयात २००६ मध्ये सरळसेवेने सहायक संचालक (माहिती) या पदावर निवड झालेल्या श्री. किशोर गांगुर्डे यांनी विविध शाखांमध्ये काम केले आहे. २००८ मध्ये पुन्हा सरळसेवेने वरिष्ठ सहायक संचालक (माहिती)- गट अ पदावर त्यांची निवड झाली. विभागीय संपर्क कक्ष, वृत्त, समाजमाध्यम, महान्यूज, माध्यम प्रतिसाद केंद्र आदी विविध शाख़ांमध्ये त्यांनी काम केले आहे. गृहमंत्र्यांचे जनसंपर्क अधिकारी म्हणूनही त्यांनी दीर्घकाळ काम केले आहे. उत्कृष्ट लिखाणाबद्दल श्री. गांगुर्डे यांना २००७ च्या राज्य शासनाच्या ‘यशवंतराव चव्हाण उत्कृष्ट विकासवार्ता पुरस्कारा’ ने देखील तत्कालिन मुख्यमंत्र्यांच्या हस्ते सन्मानित करण्यात आले आहे.

माहिती व जनसंपर्क महासंचालनालयाचे समाजमाध्यमांवर प्रतिनिधीत्व आणण्यात आणि अद्ययावत अशा माध्यम प्रतिसाद केंद्राच्या उभारणीत योगदान दिल्याबद्दल श्री. गांगुर्डे यांचा २०१७ मध्ये नागरी सेवा दिनी तत्कालिन मुख्यमंत्री देवेंद्र फडणवीस यांच्या हस्ते विशेष पुरस्कार देऊन गौरव करण्यात आला आहे. १९९७ मध्ये पत्रकारितेला सुरुवात केलेल्या श्री. गांगुर्डे यांनी २००४ मध्ये चंद्रपूर येथे जाग़तिक बॅंक अर्थसहाय्यित प्रकल्पात ‘माहिती, शिक्षण व संवाद तज्ज्ञ’ म्हणून काम पाहिले आहे. २०१४ मध्ये जळगाव जिल्हा माहिती अधिकारी आणि नाशिक येथे २०१५ मध्ये पार पडलेल्या सिंहस्थ कुंभमेळ्यात त्र्यंबकेश्वर येथील प्रसारमाध्यम केंद्राचे नियंत्रण अधिकारी म्हणून त्यांनी उत्कृष्ट काम केले आहे. मुख्यमंत्री एकनाथ शिंदे यांचे जनसंपर्क अधिकारी म्हणून श्री. गांगुर्डे हे मंत्रालयात कार्यरत होते. नुकतीच त्यांची महाराष्ट्र लोकसेवा आयोगातर्फे संचालक (माहिती) पदावर सरळसेवेने थेट निवड झाली आहे, या पदावर थेट निवड झालेले श्री.गांगुर्डे हे विभागातील दुसरे संचालक आहेत.

*****

वृत्त क्रमांक 75

 ग्रामीण महिला व मुलींनी

वैयक्तिक लाभाच्या योजनेसाठी अर्ज करण्याचे आवाहन

नांदेड (जिमाका) दि. 17 :- जिल्हा परिषदेच्या महिला व बाल विकास विभागा मार्फत ग्रामीण महिला व मुलींसाठी वैयक्तिक लाभाची योजना राबविण्यात येत आहे. या योजनेतर्गंत 90 टक्के अनुदानावर ग्रामीण महिला व मुलींना शिलाई मशिन पुरवण्यात  येतील. इच्छूक लाभार्थ्यांनी त्यांचा परिपूर्ण प्रस्ताव 8 मार्च 2023 पर्यंत तालुक्याच्या बाल विकास प्रकल्प अधिकारी, एकात्मिक बाल विकास सेवा योजना कार्यालयात कार्यालयीन कामाकाजाच्या दिवशी वेळेत सादर करावेत. विहित मुदतीनंतर  सादर केलेले अथवा अपूर्ण  असलेले प्रस्ताव मंजूर करण्यांत येणार नाहीत, असे आवाहन जिल्हा परिषदेच्या महिला बाल विकास विभागाचे जिल्हा कार्यक्रम अधिकारी यांनी केले आहे.

या योजनेच्या अटी व शर्ती पुढीलप्रमाणे आहेत.

विहित नमुन्यातील अर्ज (लाभार्थी फोटोसह), नांदेड जिल्ह्यातील रहिवाशी असावे. (ग्रामसेवकाचे प्रमाणपत्र), मागासवर्गीय असल्यास सक्षम अधिकाऱ्यांनी दिलेले जातीचे प्रमाणपत्र असावे. सदर महिला ही दारिद्रय रेषेखालील कुटूंबातील किंवा त्यांचे सन 2021- 22 चे वार्षिक उत्पन्न 1 लाख 20 हजार रुपयांच्या आत असावे, यापूर्वी या योजनेचा लाभ घेतले नसल्याचे ग्रामसेवकाचे प्रमाणपत्र असावे, लाभ धारकांकडे शिलाई मशीनचे प्रशिक्षण पूर्ण केल्याचे प्रमाणपत्र असावे, शिलाई मशिन विक्री / हस्तांतर न करण्याचे हमीपत्र असावे, लाभधारकांस 90 टक्के अनुदानाची रक्कम त्यांच्या बँक खात्यावर जमा करण्यात येईल (पाच हजार रुपयांच्या मर्यादेत), आधार कार्ड सत्यप्रत, बँक पासबुकाची ठळक छायांकित प्रत,  वस्तू खरेदीची जीएसटीसह पावती, शिलाई मशीन सह लाभार्थींचा पोस्टकार्ड रंगीत साईज फोटो, लाभार्थी निवडीबाबत ग्रामपंचायत ठरावाची प्रत,  प्राप्त सर्व प्रस्ताव सन 2022- 23 या आर्थिक वर्षापूरतेच तसेच उपलब्ध निधीच्या मर्यादेत राहतील, लाभार्थी निवड करण्याचा अधिकार कार्यालयाने राखून ठेवला आहे  असे महिला बाल विकास विभागाच्या वतीने कळविले आहे.

00000

वृत्त क्रमांक 74

 शिवजयंती निमित्त वाहतूक मार्गात बदल 

नांदेड (जिमाका) दि. 17 :- रविवार 19 फेब्रुवारी 2023 रोजी शिवजयंती निमित्त शहरात मिरवणूका काढण्याची शक्यता आहे. या कालावधीत कायदा व सुव्‍यवस्‍था अबाधीत रहावी. राष्‍ट्रीय एकात्‍मता जोपासणे व सर्व सामान्‍य नागरीकांचे हित लक्षात घेवून रविवार 19 फेब्रुवारी  रोजी सकाळी 11 ते मध्यरात्री 12 वाजेपर्यंत पुढील मार्गावरील वाहतूक बंद ठेवून, पर्यायी मार्गाचा वापर करण्याची अधिसूचना पोलीस अधिक्षक श्रीकृष्ण कोकाटे यांनी निर्गमीत केली आहे. 

  

वाहतूकीसाठी बंद असलेले मार्ग जुना मोंढा, देना बँक, महावीर चौक, तरोडेकर मार्केट, वजीराबाद चौक, कलामंदिर, शिवाजीनगर ते आय.टी.आय चौकापर्यंत जाण्या-येण्यास बंद, राज कार्नर कडून आय.टी.आय कडे येण्यासाठी राज कार्नर, वर्कशॉप टी पॉईट, श्रीनगर ते आय.टी.आय पर्यत डावी बाजू बंद. राज कार्नर ते तरोडा नाकाकडे जाण्यासाठी डावी बाजू बंद, बर्की चौक ते जूना मोंढाकडे येण्यासाठी बंद, सिडको/ हडको ते जुना मोंढयाकडे येण्यासाठी बंद. 

वाहतूकी करीता पर्यायी मार्ग-  बर्की चौकाकडून जुना मोंढयाकडे येणारी वाहतूक महम्मंद अली (गणेश टॉकीज) रोडचा जाण्या-येण्यासाठी वापर करतील, वजीराबाद चौकाकडून श्रीनगर, वर्कशॉपकडे जाणारी वाहतूक वजिराबाद चौक, पोलीस मुख्यालय कॉर्नर, लालवाडी अंडरब्रिज, शिवाजीनगर (पिवळी गिरणी) ते गणेश नगर वाय पॉईटकडे जाण्या-येण्यासाठी वापर करतील, राज कार्नर ते जुना मोंढा मार्गावरील वाहतूक राज कार्नर, वर्कशॉप कार्नर, भाग्यनगर, आनंदनगर, नागाजुर्ना टी पॉईट, अण्णाभाऊ साठे चौक, यात्री निवास पोलीस चौकी, अबचलनगर ते पुढे जाण्या-येण्यासाठी वापर करतील, गोवर्धन घाट पुलावरुन नांदेड शहरात येणारी वाहतूक पोलीस मुख्यालय कॉर्नर, लालवाडी अंडरब्रीज, शिवाजीनगर (पिवळी गिरणी) ते गणेश नगर वाय पॉईटकडे जाण्यासाठी वापर करतील, सिडको/हडको कडून येणारी वाहतूक साई कमान, गोवर्धन घाट नवीन पुल, तिरंगा चौक, पोलीस मुख्यालय कॉर्नर, लालवाडी अंडरब्रीज, शिवाजीनगर (पिवळी गिरणी) ते गणेश नगर वाय पॉईटकडे जाण्यासाठी वापर करतील.

0000