अंशकालीन उमेदवारांना नाव नोंदणीसाठी

30 डिसेंबर पर्यंत मुदत ; अर्ज करण्याचे आवाहन

नांदेड, दि. 8 :- जिल्ह्यातील अंशकालीन उमेदवारांनी जुलै-2016 मध्ये अंशकालीन प्रमाणपत्र पडताळणीसाठी विहित नमुन्यात अर्ज सादर केली नाहीत अशा उमेदवारांनी पुरवणी यादीसाठी मंगळवार 13 डिसेंबर ते शुक्रवार 30 डिसेंबर 2016 पर्यंत विहित नमुन्यातील अर्ज शपथपत्र, शैक्षणिक प्रमाणपत्रांसह जिल्हा कौशल्य विकास रोजगार व उद्योजकता मार्गदर्शन केंद्र नांदेड येथे सादर करावीत, असे आवाहन सहाय्यक संचालक जिल्हा कौशल्य विकास, रोजगार केंद्र नांदेड यांनी केले आहे.   

अंशकालीन उमेदवारांची अद्यावत यादी तयार करण्यात आली होती. शासनाकडून या यादीस मुदतवाढ देण्यात आली आहे. पुरवणी यादी तयार करण्यासाठी जिल्ह्याती ज्या अंशकालीन उमेदवारांचे यादीत नाव समाविष्ट नाहीत अशा उमेदवारांनी विहित नमुन्यातील अर्जासोबत शपथपत्र व शैक्षणिक कागदपत्रे सादर करावीत. मुदतीनंतर आलेल्या उमेदवारांची नावे यादीत समाविष्ट होणार नाहीत. अधिक माहितीसाठी 02462-251674 या दूरध्वनीवर संपर्क साधवा, असेही आवाहन केले आहे.

00000

राष्ट्रीय ऊर्जा संवर्धन दिन 14 डिसेंबर रोजी

नांदेड, दि. 7 :-  ऊर्जा संवर्धनाचे महत्व पटवून देण्यासाठी 14 डिसेंबर 2016 रोजी “राष्ट्रीय ऊर्जा संवर्धन दिन” व 14 ते 20 डिसेंबर 2016 दरम्यान “राष्ट्रीय ऊर्जा संवर्धन सप्ताह” साजरा करावा, असे सर्व शासकीय विभाग प्रमुखांना जिल्हाधिकारी सुरेश काकाणी यांनी निर्देशीत केले आहे.

विविध कार्यक्रमांनी ऊर्जा संवर्धनाच्या साधनाची व्यापक जनजागृती करावी. शालेय स्तरावर ऊर्जा संवर्धन विषयावरील निबंध व चित्रकला स्पर्धा आयोजित कराव्यात. उद्योग क्षेत्रातील विविध संघटनांनी जनजागृतीचे कार्यक्रम आयोजित करावेत, असे जिल्हाधिकारी कार्यालयाच्या पत्रात म्हटले आहे.

000000000

धर्माबाद नगरपरिषद सार्वत्रिक निवडणूक

मतदान जागृती अभियान संपन्न

नांदेड, दि. 7 :-   मतदान निवडणूक जनजागृती रॅली धर्माबाद नगरपरिषदेच्‍या प्रांगणातून मंगळवार 6 डिसेंबर रोजी निवडणूक निर्णय अधिकारी डॉ. सचिन खल्‍लाळ व उपविभागीय पोलीस अधिकारी प्रदिप पाटील यांच्‍या प्रमुख उपस्थितीत सुरुवात करण्‍यात आली.

रॅलीत निवडणूक निर्णय अधिकारी तथा उपविभागीय अधिकारी धर्माबाद डॉ. सचिन खल्‍लाळ, सहाय्यक निवडणूक निर्णय अधिकारी श्रीमती ज्‍योती चौहान, सुनिल माचेवाड, धर्माबादचे उपविभागीय पोलीस अधिकारी प्रदिप पाटील, पोलीस निरिक्षक अंगद सुंडगे, शाळेचे मुख्‍याध्‍यापक, सहशिक्षक, शिल्‍पनिर्देशक, कार्यालयातील कर्मचारी, तलाठी, पालक, विद्यार्थ्यांनी सहभाग घेतला होता.

यावेळी पथनाट्यासाठी तहसिलदार श्रीमती ज्‍योती चौहान यांनी सहभागी मुला-मुलींना मार्गदर्शन केले. धर्माबाद येथील जिजामाता कन्‍याशाळा, हुतात्‍मा पानसरे हायस्‍कुल,  इंदिरा गांधी पब्‍लीक स्‍कुल, गुरुकूल विद्यालय, लाल बहादुर शास्‍त्री महाविदयालय धर्माबाद, कस्‍तूरबा गांधी विदयालय, ऊर्दू हायस्‍कुल, जि.प. हायस्‍कुल धर्माबाद या शाळेतील विद्यार्थ्यांनी सहभाग घेतला. निवडणूक जनजागृती रॅली नगरपरिषद येथून आय.टी.आय, नरेंद्र चौक, नेहरु चौक, साईबाबा चौक, तसेच मोंढा मार्गे काढण्‍यात आली. रॅलीस चांगला प्रतिसाद मिळाला.  

नायब तहसिलदार माचेवाड यांनी कार्यक्रमाचे प्रस्‍ताविक केले. विद्यार्थ्यांनी मतदानाविषयी आपले मत मांडले. विद्यार्थ्यांनी मतदार जनजागृतीसाठी पथनाटय व गीत सादर केले. मतदानाचे महत्‍व पटवून देवून धर्माबाद शहरातील नागरीकांनी रविवार 18 डिसेंबर 2016 रोजी मतदान नि:पक्ष व निर्भिडपणे मतदान करण्‍याचे आवाहन डॉ. सचिन खल्लाळ यांनी केले. मतदान जनजागृती कार्यक्रम यशस्‍वी करण्‍यासाठी नगरपालिका अधिकारी कर्मचारी यांनी संयोजन केले. कार्यक्रमाचे सूत्रसंचलन व आभार प्रदर्शन केंद्र प्रमुख एन.पी. पांचाळ यांनी केले.

निवडणूक विषयी दुसरे प्रशिक्षण संपन्न

 धर्माबाद नगरपरिषद सार्वत्रिक निवडणुकीच्या अनुषंगाने क्षेत्रिय अधिकारी, केंद्राध्‍यक्ष व मतदान अधिकारी यांचे दुसरे प्रशिक्षण 6 डिसेंबर रोजी संपन्‍न झाले. यापुर्वी प्रशिक्षणास निवडणूक निरिक्षक तथा अतिरिक्‍त मुख्‍यकार्यकारी अधिकारी पदमाकर केंद्रे यांची उपस्थिती होती.

            या प्रशिक्षणात निवडणूक निर्णय अधिकारी डॉ. सचिन खल्‍लाळ व सहाय्यक निवडणुक निर्णय अधिकारी श्रीमती ज्‍योती चौहान व सुनिल माचेवाड यांनी मार्गदर्शन केले. केंद्रअध्‍यक्ष व मतदान अधिकारी यांनी ईव्‍हीएम मशिनची प्रात्‍यक्षिकव्‍दारे प्रशिक्षण देण्‍यात आले. केंद्र प्रमुख एन.पी. पांचाळ यांनी पीपीटीव्‍दारे मतदान अधिकारी यांना माहिती दिली. मतदान अधिकारी यांना नि:पक्ष व निर्भिडपणे काम करण्‍याच्या सूचना निवडणूक निर्णय अधिकारी डॉ. सचिन खल्‍लाळ यांनी केल्‍या.

000000

वेतन पडताळणी पथकाचा

जानेवारी 2017 महिन्याचा दौरा

नांदेड, दि. 7 :- वेतन पडताळणी  पथकाचा माहे जानेवारी 2017 चा नांदेड जिल्हा दौरा कार्यक्रम खालील प्रमाणे आयोजित केला आहे, असे सहसंचालक लेखा व कोषागारे औरंगाबाद यांनी कळविले आहे. 

हे पथक मंगळवार 17 जानेवारी रोजी पोलीस अधिक्षक कार्यालय व बुधवार 18 जानेवारी ते गुरुवार 19 जानेवारी या काळात जिल्हा व तालुका स्तरावरील इतर कार्यालयाची वेतन पडताळणी करील. त्यासाठी  हे  पथक या कालावधीत जिल्हा कोषागार कार्यालय नांदेड येथे उपस्थित राहील.

वेतन पडताळणीस सेवा पुस्तके सादर करण्यापुर्वी शासन निर्णय वित्त विभाग क्र. वेपुर 1299/प्र.क्र.5/99/सेवा-10 दि. 20 जानेवारी 2001 चे सोबत जोडलेले विवरणपत्र संबंधितांच्या सेवा पुस्तकात लावून त्याप्रमाणे सेवा पुस्तके पडताळणीस सादर करावीत. सेवा पुस्तके पडताळणीस सादर करताना पुढील एक वर्षात सेवा निवृत्ती होणारी प्रकरणे, मयत, न्यायालयीन, लोकायुक्त प्रकरणे प्राधान्याने सादर करावीत. सेवा पुस्तके पडताळणी पथकाकडे सादर करताना संबंधित आहरण व संवितरण अधिकारी यांनी महाकोष मधील वेतनिका प्रमाणित डीडीओ लॉगीन करावे डीडीओ लॉगीन करण्यासाठी बीडीएससाठी वापरण्यात येत असलेले युजरनेम आणि पासवर्ड वापरावे. ज्या कर्मचाऱ्यांची सेवापुस्तके पडताळणीसाठी सादर करावयाची आहे त्या कर्मचाऱ्यांचे सेवार्थ Employee ID टाकून Submit करावे. म्हणजे लेखाधिकारी, वेतन पडताळणी पथक यांच्या नावाने कर्मचाऱ्यांच्या तपशिलासह पत्र तयार होईल. त्याच पत्रासह सेवापुस्तके पडताळणीसाठी  पथकाकडे  सादर  करावीत, असे सूचित केले आहे. 

0000000

रस्ता सुरक्षा विषयक उपक्रमाबाबत

माहिती पाठविण्याचे आवाहन

नांदेड, दि. 6 :-  रस्ता सुरक्षा विषयक काम करणाऱ्या व्यक्ती, संस्था यांनी त्यांचे कामाच्या संदर्भात पॉवर पॉईट सादरीकरण जास्तीतजास्त 15 स्लाईड तयार करुन प्रादेशिक परिवहन कार्यालय नांदेड येथे सादर करावीत. त्यानंतर त्यांची नावे परिवहन आयुक्त कार्यालय मुंबई यांना बुधवार 7 डिसेंबर रोजी कळविण्यात येतील, असे प्रादेशिक परिवहन अधिकारी नांदेड यांनी कळविले आहे.  

000000

निवडणूक निरीक्षक पाटील यांना आज

अर्धापूर, मुदखेड, उमरी येथे भेटता येणार

नांदेड, दि. 6 :- राज्य निवडणूक आयोगाने अर्धापूर नगरपंचायत, मुदखेड व उमरी नगरपलिकेसाठी निवडणूक निरीक्षक म्हणून नांदेडचे अपर जिल्हाधिकारी संतोष पाटील यांची नियुक्ती केली आहे. सार्वत्रिक निवडणुकीसंबंधाने जनतेच्या तक्रारी, समस्या जाणून घेण्यासाठी बुधवार 7 डिसेंबर 2016 रोजी संबंधित तहसिल कार्यालयात उपस्थित राहणार आहेत, अशी माहिती उपविभागीय अधिकारी नांदेड यांनी दिली आहे.

निवडणूक निरीक्षक श्री. पाटील हे बुधवार 7 डिसेंबर रोजी तहसिलदार यांचे कक्ष तहसिल कार्यालय अर्धापूर येथे सकाळी 10 ते 11 यावेळेत, तहसिल कार्यालय मुदखेड येथे दुपारी 12 ते 1 यावेळेत तसेच तहसिल कार्यालय उमरी येथे दुपारी 3 ते 4 यावेळेत सार्वत्रिक निवडणुकीसंबंधाने जनतेच्या तक्रारी, समस्या जाणून घेण्यासाठी उपस्थित राहतील.

000000

नागरिकांना कॅशलेस व्यवहारासंबंधी

शासकीय अधिकाऱ्यांनी मार्गदर्शन करावे

-         जिल्हाधिकारी सुरेश काकाणी

नांदेड, दि. 6 :- दैनंदिन व्यवहारात डिजीटल पद्धतीने आर्थिक देवाण-घेवाण केल्यास आर्थिक अडचणी जाणवणार नाहीत. त्यासाठी सामान्य नागरिकांना व कर्मचाऱ्यांना कॅशलेस व्यवहाराची माहिती देण्याकरीता जिल्ह्यातील शासकीय विभागांच्या कार्यालय प्रमुखांना प्रशिक्षण देण्यात आले आहे, अशी माहिती जिल्हाधिकारी सुरेश काकाणी यांनी दिली.

नोटाबंदीमुळे नागरिकांना आर्थिक अडचणी जाणवत आहेत. डिजीटल पेमेंटद्वारे यातून मार्ग निघू शकतो. शासकीय अधिकारी व कर्मचारी यांनी आपल्या दैनंदिन व्यवहारात कॅशलेस व्यवहाराचा वापर करावा. सामान्य नागरिकांनाही त्याचे मार्गदर्शन करावे. कार्यालय प्रमुखांनी आपल्या कार्यालयातील कर्मचाऱ्यांना तसेच सामान्य नागरिकांनाही कॅशलेस व्यवहारासंबंधी माहिती व प्रशिक्षण दयावे. जिल्हाधिकारी कार्यालयातील कर्मचाऱ्यांसाठीही प्रशिक्षण आयोजित केले आहे,  असेही जिल्हाधिकारी श्री. काकाणी यांनी सांगितले.

कॅशलेस व्यवहारासाठी मोबाईल ॲप, प्रिपेड कार्ड, डेबीट कार्ड, क्रेडीट कार्ड, इंटरनेट बँकिंग, ई-वॉलेट यासारख्या सुविधांबरोबर अविस्तृत पुरक सेवा माहिती (USSD) या प्रणालीद्वारे कोणत्याही मोबाईल फोनच्या इंटरफेसमधून इंटरनेटशिवाय पैसे पाठविणे शक्य आहे. या सर्व सुविधांच्या महत्वाबाबत लहान व्यापारी व सामान्य नागरिकांमध्ये जागृती करण्यात येणार आहे. त्यासाठी जिल्ह्यात वित्तीय संस्था व बँकांच्या माध्यमातून बाजार समित्या, आठवडी बाजार, मोठी आस्थापना, कार्यालय, बँका, मोंढा आदी ठिकाणी प्रशिक्षण वर्ग हाती घेण्यात आले आहे.  

शहरी भागाबरोबर ग्रामीण भागात कॅशलेस व्यवहार प्रत्यक्षात उतरविण्यासाठी प्राधान्याने लक्ष केंद्रीत केले जात आहे. बँकांनीही काही महत्वाची गावे कॅशलेस करण्याचे उद्दीष्ट ठेवून कार्यवाही करावी. कॅशलेस व्यवहार अधिकाधिक व्हावेत , डिजीटल व्यवहार व्हावेत यासाठी विविध घटकांच्या माध्यमातून प्रशिक्षणाबरोबर जनजागृतीही करण्यात येणार आहे. यामुळे डिजीटल व्यवहाराची व्याप्ती वाढेल. रोखीने आर्थिक व्यवहाराचे प्रमाण कमी होईल. त्याद्वारे व्यवहारात पारदर्शकता आणणे सहज शक्य आहे. म्हणून नागरिकांनी यापद्धतीचा अवलंब करुन अधिकाधिक डिजीटल व्यवहार करावे , असे आवाहनही जिल्हाधिकारी श्री. काकाणी यांनी केले आहे.

000000