वृत्त क्रमांक 245

बालकांची विशेष आरोग्य तपासणी मोहिम सुरु

आज उपमुख्यमंत्री अजित पवार व आरोग्य मंत्री प्रकाश आबिटकर यांच्या हस्ते होणार राज्यस्तरीय उदघाटन

नांदेड दि. 28 फेब्रुवारी :- राज्य शासनाने संपूर्ण राज्यात “राष्ट्रीय बाल स्वास्थ्य कार्यक्रम" अंतर्गत विद्यार्थ्यांची विशेष तपासणी मोहिम या महत्वाकांक्षी अभियानाची घोषणा केलेली आहे. त्यानुसार या मोहिमेच्या शुभारंभ संपूर्ण राज्यामध्ये 1 मार्च 2025 रोजी इंदिरा गांधी मॉडेल स्कूल, औंध, पुणे येथून होणार आहे. या मोहिमेचे उदघाटन राज्याचे उप मुख्यमंत्री अजित पवार व सार्वजनिक आरोग्य व कुटुंब कल्याण मंत्री प्रकाश आबिटकर यांच्या हस्ते सकाळी 8.30 वाजता होणार आहे.

या उद्घाटन कार्यक्रमास राज्यातील प्रत्येक तालुक्यातील एक शाळा व जिल्हा स्तरावरील एक शाळा दूरभाष्य प्रणाली व्हीसीद्वारे सोहळ्यास मान्यवर उपस्थित राहणार आहेत. त्या अनुषंगाने नांदेड जिल्हयातील सर्व शासकीय, निमशासकिय शाळा, शासकीय अंगणवाडयामधील 0 ते 18 वर्षापर्यंतच्या बालकांची आरोग्य तपासणी करण्यात येणार आहे. या तपासणी दरम्यान आजारी आढळून आलेल्या बालकांवर त्वरीत निशुल्क उपचार व संदर्भ सेवा तसेच आवश्यकतेनुसार नंतर मोफत शस्त्रक्रिया करण्यात येणार आहे.

त्यानुसार आरबीएसके कार्यक्रमाच्या मोहिमेचे उद्घाटन 1 मार्च 2025 रोजी सकाळी 8.30 वाजता प्राथमिक शाळा क्र.4 व माध्यमिक शाळा नांदेड वाघाळा महानगरपालीका जंगमवाडी नांदेड तसेच तालुकास्तरावरील शारदा भवन हायस्कूल अर्धापूर, जिल्हा परिषद प्राथमिक शाळा थेरबन भोकर, कस्तुरबा गांधी बालिका विद्यालय बिलोली, मौलाना अबुल कलाम आझाद हायस्कूल देगलूर, ग्रीन फील्ड नॅशनल स्कूल अँड ज्युनियर कॉलेज धर्माबाद, अनुसुचित जाती मुलाची शाळा हादगाव, जिल्हा परिषद नेहरू नगर हिमायत नगर, मनोविकास प्राथमिक शाळा, कंधार, सरस्वती विद्या मंदिर किनवट, जिल्हा परिषद शाळा लोहा, अनुसुचित जाती व नवबौद्ध मुलींची शासकिय शाळा माहूर, श्री सरस्वती विद्या मंदिर मुदखेड, जिल्हा परिषद हायस्कूल मुखेड, लिटिल स्टेप इंग्लिश स्कूल नायगाव, व कस्तुरबा गांधी बालिका वि‌द्यालय उमरी इत्यादी शाळांत स्थानिक लोकप्रतिनिधी व अधिकारी यांच्या हस्ते पार पडणार आहे.

00000

 वृत्त क्रमांक 244

साहित्यातून जगण्याची दिशा मिळते -जेष्ठ साहित्यिक श्रीकांत देशमुख

 वाचन संस्कृतीला बळ देण्यासाठी ग्रंथ वाचन आवश्यक

 शालेय शिक्षणापासून वाचन संस्कृती जोपासावी- ॲड.गंगाधर पटने 

नांदेड दि. 28 फेब्रुवारी :- मध्ययुगीन काळातील चक्रधर स्वामीच्या लीळाचरित्र आद्यग्रंथापासून मराठी साहित्यांची परंपरा आपल्याला लाभलेली आहे.जेष्ठ साहित्यिकांच्या साहित्यातूनच जीवनमूल्यांची शिकवण, आध्यात्मिक साहित्य, तत्वज्ञान यांचा वारसा आपल्याला लाभलेला आहे. यातून सहिष्णूता, जगण्याचे तत्वज्ञान आपल्याला मिळत आहे. स्वातंत्र्योत्तर काळात महात्मा फुले, सावित्रीबाई फुले,डॉ. बाबासाहेब आंबेडकर यांच्या साहित्यातून समाज सुधारणेचे बळ मिळालेले आहे. अशा महान संत, महात्म्याचे साहित्य प्रत्येकांनी आपल्या घरात ठेवले पाहिजे, ते प्रत्येकांनी वाचले पाहिजे यामुळे पुढील पिढी सुसंस्कृत निर्माण होईल, असे प्रतिपादन जेष्ठ साहित्यिक श्रीकांत देशमुख यांनी केले. 

ग्रंथोत्सव 2024 चे आयोजन जिल्हा ग्रंथालयात करण्यात आले होते. यावेळी बोलत होते. यावेळी अध्यक्ष भगवंत क्षीरसागर,जिल्हा ग्रंथालय संघाचे अध्यक्ष तथा माजी.आ.ॲड.गंगाधर पटने, सहाय्यक ग्रंथालय संचालक, छत्रपती संभाजीनगर सुनील हुसे, जिल्हा माहिती अधिकारी प्रवीण टाके, जिल्हा ग्रंथालय अधिकारी अनिल सुर्यवंशी, जिल्हा परिषद माजी अध्यक्ष संभाजीराव धुळगुंडे, प्रकाशक निर्मलकुमार सूर्यवंशी, संपादक डॉ. राम शेवडीकर आदी मान्यवरांची उपस्थिती होती. 

थोर साहित्यिकांचे विचार, साहित्य प्रत्येकांच्या घरात आवश्यक आहे. ग्रंथात परिवर्तन करण्याची शक्ती आहे. सामाजिक विकृतीचा अभ्यास जाणून घ्यायचा असेल तर ग्रंथ वाचले पाहिजे. ग्रंथाचे सामर्थ्य प्रचंड असून त्यांची जाणीव प्रत्येकाला असणे आवश्यक असल्याचे प्रतिपादन श्रीकांत देशमुख यांनी केले. 

वाचन संस्कृतीचे संवर्धन, वाचन संस्कृतीला बळ देणारा ग्रंथोत्सव आहे. आताच्या काळात एआय, सोशल मिडीया यामुळे वाचन संस्कृतीला खूप मोठे आवाहन आहेत. परंतु या आव्हानाच्या काळातळी वाचन संख्या दिवसेंदिवस वाढविणे हे आपले कर्तव्य आहे. सध्या साहित्य मराठी परिषदेवर सर्व पुस्तके उपलब्ध आहेत. लोकांच्या स्पर्धासाठी पुस्तके आसुसलेले आहेत. गावातील ग्रंथालयात असलेली पुस्तकांची माहिती सर्व नागरिकांना होण्यासाठी ग्रंथालयांनी धार्मिक कार्यक्रमात यांची माहिती सांगावी. सोशल मिडीयावर याबाबत प्रसार करावा.उठा जागे व्हा ग्रंथालय चळवळीत जागे व्हा, असे आवाहन सहाय्यक ग्रंथालय संचालक सुनील हुसे यांनी केले. 

वाचन संस्कृती शालेय स्तरापासून झाली पाहिजे. वाचनाबाबत शिक्षकांमध्ये जनजागृती असली पाहिजे. तर वाचन संस्कृती टिकेल असे मत माजी.आमदार ॲड.गंगाधर पटने यांनी व्यक्त केले. 

माणसाच्या जडणघडणीत ग्रंथाचे अन्यय साधारण महत्व आहे. ग्रंथ माणस घडवितात. ग्रंथ आहेत म्हणून आपण आहोत. ग्रंथालयात ज्ञानाच्या शाखा असून ते आपल्या आयुष्याचे मार्गदर्शक आहेत. संत परंपरा, शिकवण ग्रंथाच्या माध्यमातून मिळत असते असे मत कार्यक्रमाचे अध्यक्ष प्रा. भगवंत क्षीरसागर यांनी केले. 

नांदेड ग्रंथोत्सवाला आज पासून सुरुवात झाली. 28 फेब्रुवारी व 1 मार्च दोन दिवस हा ग्रंथोत्सव होत आहे. सकाळी 8.30 ला उपजिल्हाधिकारी अजय शिंदे ज्येष्ठ पत्रकार राम शेवडीकर व अन्य मान्यवरांच्या उपस्थितीत ग्रंथ दींडी काढण्यात आली. ग्रंथ पूजन करण्यात आले. ग्रंथदिंडी मध्ये विद्यार्थी विविध सांस्कृतिक मंडळे आणि भजनी मंडळे देखील सहभागी झाले होते. आयटीआय चौकातून निघालेली ही ग्रंथदिंडी लक्षवेधी ठरली होती.

शनिवारी पुस्तक प्रदर्शनाला भेट दया 

या ठिकाणी शुक्रवार व शनिवारी मोठया प्रमाणात पुस्तक प्रदर्शन लागले आहे. तसेच विविध कार्यक्रमाचे आयोजन करण्यात आले आहे. नांदेडकरांनी या ग्रंथोत्सवाचा लाभ घेण्याचे आवाहन केले आहे.

दुसऱ्या दिवशीच्या कार्यक्रमात  परिसवांद “मराठी भाषा सवंर्धन आणि घराघरातील प्रयत्न”चे आयोजन करण्यात येईल. दुपारच्या सत्रात “ग्रंथचळवळीतील दलित व ग्रामीण,बाल साहित्याचे योगदान” हा परिसवांद घेण्यात येणार आहे. समारोप अध्यक्ष माजी खासदार तथा साहित्यिक डॉ.व्यंकटेश काब्दे, माजी अध्यक्ष जिल्हा परिषद नांदेड, संभाजीराव धुळगुंडे, माजी आमदार तथा अध्यक्ष जिल्हा ग्रंथालय संघाचे ॲड . गंगाधर पटने, निर्मल प्रकाशनचे प्रकाशक निर्मलकुमार सुर्यवंशी यांची उपस्थिती राहणार आहेत. नांदेड मधील नागरिकांनी या ग्रंथ प्रदर्शनाचा लाभ घ्यावा मोठ्या प्रमाणात पुस्तक खरेदी करावे व ग्रंथोत्सवाला प्रोत्साहन द्यावे असे आवाहन जिल्हा ग्रंथालय अधिकारी यांनी केले आहे.

ग्रंथोत्सवात विविध नामांकित प्रकाशकांचे पुस्तक विक्री व प्रदर्शनी दालने राहणार आहेत. या महोत्सवाचे लाभ घेण्याचे आवाहन जिल्हा ग्रंथालय अधिकारी अनिल सुर्यवंशी यांनी केले आहे.कार्यक्रमचे सूत्रसंचलन ज्येष्ठ साहित्यिक नारायणराव शिंदे यांनी केले.

०००००

 वृत्त क्रमांक 243

गोरक्ष लोखंडे यांचा दौरा

 

नांदेड दि. 28 फेब्रुवारी : महाराष्ट‍्र राज्य अनुसूचित जाती जमाती आयोगाचे सदस्य गोरक्ष लोखंडे 1 ते 3 मार्च या कालावधीत नांदेड दौऱ्यावर येत आहेत.

 

1 मार्च रोजी त्यांचे आगमन होणार असून दुपारी 12 वा. जिल्हा समाज कल्याण अधिकारी  जिल्हा परिषद नांदेड यांच्या अंतर्गत असणाऱ्या आश्रमशाळांना ते भेटी देणार आहेत. 2 मार्चला सकाळी 11 वा. सहायक आयुक्त समाज कल्याण यांच्या अधिनस्त असणाऱ्या वसतीगृहांना ते भेटी देणार आहेत. 3 मार्चला संघटनेने आयोजित केलेल्या कार्यक्रमाला उपस्थित राहतील तर सायं 6 वा. संविधानाच्या अमृत महोत्सव कार्यक्रमासाठी कुसूम सभागृह येथे ते उपस्थित राहतील. त्यांचा मुक्काम शासकीय विश्रामगृह येथे असेल.

0000

वृत्त क्रमांक 242

संडे ऑन सायकल रॅलीमध्ये

मोठया संख्येने सहभागी व्हावे 

नांदेड दि. 28 फेब्रुवारी : आयुक्त क्रीडा व युवक सेवा संचालनालय महाराष्ट्र राज्य पुणे व जिल्हा क्रीडा अधिकारी कार्यालय नांदेडच्यावतीने “फिट इंडिया मुव्हमेंट फिटनेस का डोस आधा घंटा रोज” अंतर्गत संडे ऑन सायकल रॅलीचे आयोजन 2 मार्च,2025 रोजी करण्याबाबत केंद्र शासनाने महाराष्ट्रातील सर्व जिल्हयामध्ये करण्याचा निर्णय घेतला आहे. 

त्यानुसार नांदेड जिल्हयात जिल्हा प्रशासन, शिक्षण विभाग, जिल्हा परिषद, नांदेड व जिल्हा क्रीडा अधिकारी कार्यालय, नांदेडच्या वतीने दि.02 मार्च,2025 रोजी सकाळी 6.30 वा. “फिट इंडिया मुव्हमेंट फिटनेस का डोस आधा घंटा रोज” अंतर्गत संडे ऑन सायकल रॅलीचे आयोजन जिल्हा क्रीडा संकुल, श्री गुरुगोबिंदसिंघजी स्टेडीयम मुख्य प्रवेशद्वार येथून करण्यात आले आहे. 

या रॅलीचा मार्ग स्टेडीयम मुख्य प्रवेशद्वार येथून सुरुवात होवून आयटीएम कॉलेज मार्गे-आयटीआय चौक- श्रीनगर- वर्कशॉप कॉर्नर मार्गे आनंदनग- वसंतराव नाईक पुतळा (नागार्जुना हॉटेल)- अण्णाभाऊ साठे चौक मार्गे- आयटीएम व श्री गुरुगोबिंदसिंघजी स्टेडीयम मुख्यद्वार नांदेड येथे समाप्त होईल. 

“फिट इंडिया मुव्हमेंट फिटनेस का डोस आधा घंटा रोज” यामुळे आपले शरीर निरोगी, तंदुरुस्त व बळकट राहण्यास मदत होईल याकरीता फिटनेस जनजागृती करणेकरीता जिल्हयातील खेळाडू मुले-मुली, शारीरिक शिक्षक, क्रीडा शिक्षक, क्रीडा प्रमुख, विविध क्रीडा संघटनेचे पदाधिकारी व विविधि विभागाचे अधिकारी/ कर्मचारी, नागरीक, महिला व क्रीडाप्रेमी यांनी या संडे ऑन सायकल रॅलीमध्ये आपल्या सायकलीसह मोठया संख्येने सहभागी व्हावे. व वेबसाईड (https://fitindia.gov.in/cyclothon.2024) यावर ऑनलाईनद्वारे आपली नोंदणी करावी. व अधिक माहितीकरीता श्री. बालाजी शिरसीकर (राज्य क्रीडा मार्गदर्शक) यांचेशी जिल्हा क्रीडा अधिकारी कार्यालय, नांदेड येथे संपर्क साधावा असे आवाहन जिल्हा क्रीडा अधिकारी जयकुमार टेभंरे यांनी केले आहे.

00000

 वृत्त क्रमांक 241

परीक्षांसाठी प्रतिबंधात्मक आदेश लागू 

नांदेड दि. 28 फेब्रुवारी : केंद्रीय माध्यमिक शिक्षा बोर्डाच्या इयत्ता 10 व 12 वी परीक्षा सध्या सुरू असून शहरातील ज्या शाळांमध्ये या परीक्षा सुरू आहेत त्या परिसरात शांतता राखण्याचे आवाहन जिल्हा प्रशासनाने केले आहे. शहरातील 8 शाळांमध्ये या परीक्षा होत असून सकाळी 10.30 ते दुपारी 1.30 यावेळेत प्रतिबंधात्मक आदेश जारी करण्यात आला आहे. त्यामुळे या कालवधीत शांतता पाळावी व प्रतिबंधात्मक बाबी करू नये असे आवाहन जिल्हा प्रशासनाने केले आहे.  

000000

 वृत्त क्रमांक 240

तो मुलगा तुमचा तर नाही ना ?

संपर्क साधण्याचे प्रशासनाचे आवाहन   

नांदेड दि. 28 फेब्रुवारी : धनगरवाडी येथील लहूजी साळवे निराधार बालकाश्रमामध्ये 13 वर्षाच्या शिवा मारोती चव्हाण या बालकाला दाखल करण्यात आले आहे. त्याच्या पालकाचा अद्याप पत्ता नाही. त्यामुळे या बालकाच्या पालकत्वाचा दावा करणाऱ्या पालकांनी संपर्क साधण्याचे आवाहन जिल्हा महिला व बालविकास अधिकारी यांनी केले आहे.

 

बालगृहात दाखल झाल्यापासून शिवा मारोती चव्हाण याच्याशी कोणीही संपर्क साधलेला नाही. या मुलाशी नाते असणाऱ्या कोणीही अधिकृतपणे संपर्क साधावा, असे आवाहन जिल्हा महिला व बालविकास अधिकारी आर. पी. रंगारी यांनी केले आहे.

0000

 वृत्त क्रमांक 239

महिलांचे लैंगिक छळापासून संरक्षण

तीन जागांसाठी अर्ज करण्याचे आवाहन   

नांदेड दि. 28 फेब्रुवारी : महिला व बाल कल्याण विभागामार्फत स्थापन करण्यात येणाऱ्या महिलांचे लैंगिक छळापासून संरक्षण समितीवरील अध्यक्ष व दोन सदस्य यासाठी नियुक्ती करण्यास्तव नागरिकांमधून नामांकने मागविण्यात येत आहेत. 6 मार्च पर्यंत अर्ज करण्याचे आवाहन करण्यात आले आहे.

 

या समितीचे अध्यक्ष व दोन सदस्य निवडायचे आहेत. त्यातील एक सदस्य विधी विभागाशी संबंधित असावा. दुसरा सदस्य हा एसी, एसटी, ओबीसी या पैकी एका गटातील असावा. तर अध्यक्ष पदासाठी सामाजिक कार्याचा पाच वर्षाचा अनुभव असावा. जिल्हास्तरावरील या समितीसाठी 6 मार्च 2025 पर्यंत जिल्हा माहिला व बालकल्याण विकास कार्यालय महात्मा फुले मार्केट मागे गणेशनगर रोड नांदेड यांच्याकडे अर्ज सादरण्याचे आवाहन करण्यात आले आहे.

0000

वृत्त क्रमांक 238

युवकांनी रोजगारासोबतच स्वयं रोजगार निर्मितीवर भर द्यावा – उपायुक्त विद्या शितोळे 

·         अभ्यासासोबत कौशल्य आत्मसात करणे आवश्यक

·         मेळाव्यात 386 विद्यार्थ्यांची प्राथमिक निवड

                                                                                         

नांदेड दि. 28 फेब्रुवारी :- रोजगार मेळाव्याच्या माध्यमातून रोजगाराच्या संधी मोठया प्रमाणात उपलब्ध करुन दिल्या जात आहेत. या मेळाव्याच्या माध्यमातून युवकांना त्यांच्या आयुष्याला दिशा देण्याची संधी मिळत आहे. युवकांनी या संधीचा आवश्य लाभ करुन घ्यावा. तसेच युवकांनी रोजगारासोबतच स्वयंरोजगार निर्मितीवरही भर द्यावा, असे आवाहन जिल्हा कौशल्य विकास विभाग छ. संभाजीनगरच्या उपायुक्त विद्या शितोळे यांनी केले.

 

आज यशवंत महाविद्यालयात रोजगार व स्वयंरोजगार विभागामार्फत पंडित दिनदयाळ उपाध्याय रोजगार मेळाव्याचे आयोजन करण्यात आले होते. या कार्यक्रमाचे अध्यक्ष शारदा भवन एज्युकेशन सोसायटीचे ॲड . उदयरावजी निंबाळकर, स्वामी रामानंद तीर्थ विद्यापिठाचे संचालक डॉ. सुर्यप्रकाश जाधव, प्राचार्य डॉ. गणेशचंद्र शिंदे, जिल्हा उद्योग केंद्राचे महाव्यवस्थापक अमोल इंगळे, रोजगार व स्वयंरोजगार विभागाच्या सहायक आयुक्त रेणूका तम्मलवार, उपप्राचार्य कविता सोनकांबळे आदींची उपस्थिती होती.

 

या रोजगार मेळाव्यात पुणे, छ.संभाजीनगर येथील 12 कंपन्या सहभागी झाल्या होत्या. या मेळाव्यात एकूण 620 विद्यार्थ्यांनी नोंदणी केली असून यापैकी प्राथमिक निवड झालेल्या उमेदवारांची संख्या 386 आहे. 100 दिवसांच्या कृती आराखड्यानुसार करावयाच्या कार्यवाहीत रोजगार व स्वयंरोजगार विभागामार्फत 100 रोजगार मेळावे आयोजित करण्यात येणार आहेत. या मेळाव्याच्या माध्यमातून अनेक युवकांना रोजगार उपलब्ध करुन देण्यात येणार आहे. या मेळाव्याच्या माध्यमातून विद्यार्थ्यांना अनेक गोष्टी शिकायला मिळणार असून नाव मेळाव्यात नोंदणी केल्यानंतर मुलाखत कशी द्यावी, कसे बोलावे, संस्था किंवा कंपनीचे प्रतिनिधी काय प्रश्न विचारतात अशा अनेक गोष्टीचा अनुभव मिळणार आहे .

 

तसेच मुख्यमंत्री युवा कार्य प्रशिक्षण योजनेच्या माध्यमातून विद्यार्थ्यांनी रोजगार उपलब्ध होण्याची संधी देण्यात आली आहे. विद्यार्थी व विद्यार्थीनीनी स्वयंरोजगारासाठी विविध महामंडळे कार्यरत असून या महामंडळाच्या माध्यमातून उद्योग उभारणी करता येणार आहे. त्यामुळे युवकांनी आपण स्वयंरोजगार निर्माण करुन इतरांना रोजगार उपलब्ध करुन देण्याचे माध्यम बनावे असेही आवाहन त्यांनी केले. तसेच यापुढील रोजगार मेळाव्यात विविध महामंडळे व योजनांचे स्टॉल लावण्यात येणार असल्याची माहिती उपायुक्त विद्या शितोळे यांनी दिली. यामुळे अनेक युवक-युवतींना रोजगार व शासकीय योजना संबंधी माहिती मिळण्यास मदत होईल.

 

पदवी किंवा पदव्युत्तर विद्यार्थ्यांसाठी राज्य शासनाच्या अनेक योजना असून उद्योग उभारणीसाठी उद्योग विभागामार्फत या योजनांसाठी मार्गदर्शन करण्यात येते. तसेच अनेक योजनांमध्ये लाभार्थ्यांना अनुदान मिळते. त्यामुळे युवकांनी रोजगाराच्या मागे न धावता स्वयंरोजगार उभारुन इतरांना रोजगार उपलब्ध करुन देण्यावर भर द्यावा, असे आवाहन यावेळी जिल्हा उद्योग केंद्राचे महाव्यवस्थापक अमोल इंगळे यांनी केले .

 

यावेळी रोजगार स्वयंरोजगाराच्या सहाय्यक आयुक्त रेणूका तम्मलवार, स्वामी रामानंद तीर्थ विद्यापिठाचे संचालक डॉ. सुर्यप्रकाश जाधव यांचे मार्गदर्शन झाले. कार्यक्रमाचे सूत्रसंचलन यशवंत महाविद्यालयाचे डॉ. शिवाजी सूर्यवंशी यांनी केले.

00000

वृत्त क्रमांक 237

संतांच्या शिकवणीतून मराठवाड्याला संघर्षशीलतेचा मंत्र मिळाला : अजित पवार 

 उमरज : कलशारोहण सोहळ्यानिमित्त उपमुख्यमंत्र्यांची भेट 

नांदेड ( उमरज ता. कंधार ) दि. २८ फेबुवारी : स्वातंत्र्यपूर्व काळापासून मराठवाड्याला सहजासहजी काही भेटले नाही.तरीही मराठवाड्याने संघर्ष सोडला नाही.सहनशक्ती आणि संघर्षशीलता मराठवाड्याच्या संतांनी दिलेली शिकवण आहे, असे प्रतिपादन राज्याचे उपमुख्यमंत्री अजित पवार यांनी आज येथे केले.

उपमुख्यमंत्री अजित पवार नांदेड व परभणी जिल्ह्याच्या एक दिवसाच्या दौऱ्यावर आले आहेत.नांदेड वरून हेलिकॉप्टरने जिल्ह्यातील कंधार तालुक्यातील धाकटे पंढरपूर म्हणून प्रसिद्ध असणारे श्री.क्षेत्र उमरज येथील प्राचीन श्री. संत नामदेव महाराज संस्थान मंदिराच्या कलशारोहण सोहळ्यानिमित्त 108 कुंडी विष्णूयाग यज्ञ व अखंड हरिनाम सप्ताह तथा श्रीमद् भागवत कथा ज्ञानयज्ञ सोहळा आयोजित करण्यात आला होता. अडीचशे वर्षाची परंपरा आणि सात मठाधिपतीनी आत्तापर्यंत या ठिकाणी आध्यात्मिक कार्य केले आहे. यासाठी या परिसरातील हजारो भाविक उपस्थित झाले होते.आमदार प्रतापराव पाटील चिखलीकर यांच्या मार्गदर्शनात हा सोहळा आयोजित करण्यात आला आहे. त्यानिमित्त भाविकांशी आज उपमुख्यमंत्री अजित पवार यांनी संवाद साधला.

यावेळी मंचावर सहकार मंत्री बाबासाहेब पाटील, आमदार प्रताप पाटील चिखलीकर, आमदार विक्रम काळे, तसेच आंतरराष्ट्रीय ख्यातीचे कथा प्रवक्ते देवकीनंदन जी ठाकूर महाराज,संत नामदेव महाराज संस्थान उंबरजचे श्री.संत महंत एकनाथ नामदेव महाराज यांच्यासह अनेक मान्यवर उपस्थित होते. आगमनानंतर येथील नामदेव महाराज समाधीचे व विठ्ठल रखुमाई मंदिराचे दर्शन घेतले. संस्थांच्यावतीने त्यांचे आगमनाप्रती स्वागत करताना खोबऱ्याच्या भव्य हाराने परंपरेनुसार स्वागत करण्यात आले.

यावेळी उपस्थित भाविकांशी संवाद साधताना उपमुख्यमंत्री अजित पवार यांनी मराठवाड्यातील संत परंपरेचा गौरव केला. मराठवाड्याची भूमी संतांची ,कलावंतांची, शूरांची व विरांची असून मराठवाड्याला संघर्षाशिवाय सहजासहजी काही मिळाले नाही. मात्र संतांच्या शिकवणीतून संघर्षशीलता व संयम हे गुण या ठिकाणच्या मातीमध्ये आले आहे. संतांच्या शिकवणीतून सर्वधर्मसमभावाचा मंत्र बुलंद व्हावा. या ठिकाणचा आध्यात्मिक सोहळा सामाजिक एकोप्याची नांदी ठरावी, अशा शुभेच्छा त्यांनी यावेळी दिल्या. नामदेव महाराज संस्थानच्या प्रलंबित मागण्यांची पूर्तता करण्यात येईल ,अशी घोषणाही त्यांनी यावेळी केली. 

संस्थांच्या ट्रस्टीने त्यांना काही निवेदन यावेळेस सादर केले. तत्पूर्वी त्यांनी मंदिर परिसरात भेट देऊन समाधी दर्शन घेतले. यावेळी आमदार प्रताप पाटील चिखलीकर यांनीही संबोधित केले.

तत्पूर्वी, आज सकाळी नांदेड येथील श्री. गुरुगोविंद सिंह जी नांदेड विमानतळावर त्यांचे स्वागत करण्यात आले. या स्वागताला  प्रतापराव पाटील चिखलीकर, आ.बालाजी कल्याणकर आ.आनंद शंकर तिडके, जिल्हाधिकारी राहुल कर्डिले,महानगरपालिका आयुक्त डॉ. महेश डोईफोडे, अपर जिल्हाधिकारी पांडुरंग बोरगावकर यांच्यासह अनेक मान्यवर उपस्थित होते.

त्यानंतर त्यांनी नांदेड येथील पवित्र श्री.हुजूर साहिब गुरूद्वारा अबचलनगर जाऊन दर्शन घेतले. गुरुद्वारा येथील ट्रस्टीमार्फत त्यांचे स्वागत करण्यात आले. विविध क्षेत्रातील मान्यवर यावेळी मोठ्या संख्येने उपस्थित होते.

उमरज येथून त्यांनी नांदेड कडे प्रयाण केले रात्री उशिरा ते नांदेड विमानतळावरून मुंबईला परत जाणार आहेत.

000000

नांदेड ग्रंथोत्सवाला आज पासून सुरुवात झाली. २८ फेब्रुवारी व १ मार्च दोन दिवस हा ग्रंथोत्सव होत आहे. सकाळी ८.३०ला ग्रंथ दींडी काढण्यात आली. या ठिकाणी मोठया प्रमाणात पुस्तक प्रदर्शन लागले आहे. तसेच विविध कार्यक्रमाचे आयोजन करण्यात आले आहे. नांदेडकरांनी या ग्रंथोत्सवाचा लाभ घेण्याचे आवाहन केले आहे.

 

 नांदेड येथील पवित्र श्री.हुजूर साहिब गुरूद्वारा अबचलनगर येथे उपमुख्यमंत्री अजित पवार यांनी दर्शन घेतले. ते नांदेड , परभणी जिल्हयाच्या एका दिवशीय दौऱ्यावर आहेत. यावेळी त्यांच्या सोबत आमदार प्रतापराव पाटील चिखलीकर, आमदार विक्रम काळे यांच्यासह मान्यवर उपस्थित होते.

  वृत्त क्रमांक 236

उपमुख्यमंत्री अजित पवार यांचे नांदेड विमानतळावर स्वागत 

नांदेड दि. 28 फेब्रुवारी :- महाराष्ट्राचे उप मुख्यमंत्री अजित पवार यांचे आज एक दिवसाच्या नांदेड, परभणी दौऱ्यासाठी श्री. गुरू गोविंद सिंघ जी विमानतळ नांदेड येथे आगमन झाले.

यावेळी त्यांचे आमदार विक्रम काळे, प्रतापराव पाटील चिखलीकर, आ.बालाजी कल्याणकर आ.आनंद शंकर तिडके, जिल्हाधिकारी राहुल कर्डिले,महानगरपालिका आयुक्त डॉ. महेश डोईफोडे, अपर जिल्हाधिकारी पांडुरंग बोरगावकर यांच्यासह मान्यवरांनी स्वागत केले. जिल्ह्यामधील विविध कार्यक्रमांना उपस्थित राहण्यासाठी ते नांदेड व परभणी जिल्ह्याच्या दौऱ्यावर आले आहेत.

विमानतळावर त्यांनी स्वागत स्वीकारतानाच या ठिकाणी आलेल्या दिव्यांग व्यक्तींच्या शिष्टमंडळाला भेट दिली त्यांचे निवेदन स्वीकारले.

00000

 वृत्त क्रमांक 235

उप मुख्यमंत्री अजित पवार यांचा नांदेड दौरा कार्यक्रम    

                                                                                                                                                                      नांदेड दि. 27 फेब्रुवारी :- महाराष्ट्र राज्याचे उप मुख्यमंत्री अजित पवार हे नांदेड दौऱ्यावर येत असून त्यांचा दौरा कार्यक्रम पुढीलप्रमाणे आहे.

                                                                                                                                                                    शुक्रवार 28 फेब्रुवारी 2025 रोजी मुंबई  येथून विमानाने सकाळी 9.30 वाजता श्री गुरू गोविंद सिंघजी विमानतळ, नांदेड येथे आगमन. सकाळी 9.35 वाजता मोटारीने प्रयाण, नंतर स्वागत रॅली. नंतर श्री. हुजूर साहिब गुरूद्वारा अबचलनगर, नांदेड येथे दर्शन. सकाळी 10.45 वाजता मोटारीने ओम गार्डन, कौठा, नांदेड जि.नांदेड येथे आगमन. सकाळी 10.45 वाजता पक्षप्रवेश कार्यक्रम. नंतर दुपारी 12.20 वाजता कौठा, नांदेड जि. नांदेड येथे आगमन. दुपारी 12.20 वा. श्री.मोहनराव हंबर्डे, माजी आमदार यांच्या संपर्क कार्यालयाचे उद्घाटन. दुपारी 12.45 वाजता मोटारीने आ. प्रतापराव पाटील चिखलीकर यांचे दिपक-ज्योती निवासस्थान, बोरबन, नांदेड येथे आगमन. दुपारी 12.45 वा. राखीव. दुपारी 1.55 मोटारीने कौठा हेलिपॅड आसर्जन मैदान ता. जि. नांदेड येथे आगमन. दुपारी 2 वाजता हेलिकॉप्टरने मौजे उमरज हेलिपॅड, ता. कंधार जि. नांदेडकडे प्रयाण. दुपारी 2.20 वाजता मौजे उमरज हेलिपॅड, ता. कंधार, जि. नांदेड येथे आगमन. दुपारी 2.30 वाजता मोटारीने उमरज, ता. कंधार, जि. नांदेड येथे आगमन. दुपारी 2.30 वाजता महंत श्री. गुरु एकनाथ नामदेव महाराज यांनी आयोजित केलेल्या कार्यक्रमास उपस्थिती. दुपारी 3.35 वाजता मोटारीने बोरी बु. ता. कंधार, जि. नांदेड येथे आगमन. दुपारी 3.35 वा. आमदार प्रतापराव पाटील चिखलीकर यांनी आयोजित केलेल्या देवस्थानच्या कार्यक्रमास उपस्थिती. सायं. 4.35 वाजता मोटारीने मौजे उमरज हेलिपॅड, ता. कंधार, जि. नांदेड येथे आगमन. सायं. 4.40 वा. हेलिकॉप्टरने परभणीकडे प्रयाण करतील. रात्री 10.35 वाजता परभणी येथून मोटारीने श्री गुरु गोविंद सिंगजी विमानतळ, नांदेड येथे आगमन. रात्री 10.40 वाजता विमानाने पुणे कडे प्रयाण करतील. 

00000

वृत्त क्रमांक 234

नांदेड ग्रंथोत्सवाचे आजपासून आरंभ मोठ्या संख्येने उपस्थित राहण्याचे आवाहन 

नांदेड दि. २७ फेब्रुवारी :  ग्रंथालय संचालनालय व जिल्हा ग्रंथालय अधिकारी कार्यालय नांदेड यांच्या वतीने बहुउद्देशिय सांस्कृतिक संकुल, श्री.गुरुगोविंद सिंघजी स्टेडीयम परिसर, नांदेड येथे दोन दिवसीय नांदेड ग्रंथोत्सवाचे आयोजन करण्यात आले आहे. नांदेड मधील साहित्यप्रेमी जनतेने या ग्रंथोत्सवाचा लाभ घ्यावा,असे आवाहन प्रशासनाने केले आहे.

ग्रंथोत्सवाचे उदघाटन शुक्रवार दिनांक 28 फेब्रुवारी रोजी सकाळी 11.00 वा साहित्य अकादमी पुरस्कार प्राप्त लेखक श्री.श्रीकांत देशमुख,यांच्या हस्ते होणार आहे.पहिल्या दिवशी दि.28 फेब्रुवारी रोजी सकाळी 8.30 वा ग्रंथदिंडी महात्मा फुले पुतळा ते कार्यक्रम स्थळ निघेल. यावेळी अजय दत्तात्रय शिंदे,उपजिल्हाधिकारी नांदेड यांच्या हस्ते होणार आहे .

उदघाटन सकाळी 11.00वा. श्रीकांत देशमुख यांच्या हस्ते होईल. यावेळी विशेष अतिथी म्हणून मा. अतुल सावे,मंत्री,इतर मागास,बहूजन कल्याण,दुग्धविकास,अपारंपारिक ऊर्जा तथा पालकमंत्री नांदेड जिल्हा उपस्थित राहणार आहेत. तसेच या कार्यक्रमाचे अध्यक्ष भगवंत क्षीरसागर असणार असून प्रमुख अतिथी           खा.अशोकराव शंकरराव चव्हाण, आ.हेमंत श्रीराम पाटील,खा.अजित गोपछडे,खा.रविंद्र वसंतराव चव्हाण, खा.नागेश बापुराव पाटील आष्टीकर, खा. डॉ.शिवाजीराव बंडप्पा काळगे, आ.विक्रम वसंत काळे, आ.सतीश भानुदास चव्हाण, आ.प्रताप पाटील चिखलीकर, आ.भिमराव रामजी केराम, आ. डॉ.तुषार गोविंदराव राठोड, आ.बालाजी देविदासराव कल्याणकर, आ. राजेश संभाजी पवार, आ.जितेश रावसाहेब अंतापूरकर, आ.बाबुराव कदम कोहळीकर, आ.आनंद शंकर तिडके,  आ.श्रीजया अशोकराव चव्हाण,राहुल कर्डिले,जिल्हाधिकारी,नांदेड श्रीमती मिनल करनवाल, मुख्य कार्यकारी अधिकारी,नांदेड  अबिनाश कुमार, पोलिस अधिक्षक,नांदेड

डॉ.महेशकुमार डोईफोडे,आयुक्त,म.न.पा.नांदेड,  माजी.आ.ॲड.गंगाधर पटने,अध्यक्ष जिल्हा ग्रंथालय संघ,नांदेड  अशोक गाडेकर,ग्रंथालय संचालक,म.रा.,मुंबई.सुनील हुसे,सहाय्यक ग्रंथालय संचालक,छत्रपती संभाजीनगर यांच्यासह मान्यवरांच्या  उपस्थितीत होणार आहे.

पाहिल्या दिवशी  परिसंवाद “AI च्या काळात वाचनसंस्कृतीपुढील आव्हान” घेण्यात येईल. यानंतर  परिसंवाद “भारतीय संविधानाच्या अमृतमहोत्सवी पर्वावर सामान्य नागरिकांचे कर्तव्य”घेण्यात येईल.

 दुस-या दिवशी  परिसवांद “मराठी भाषा सवंर्धन आणि घराघरातील प्रयत्न”चे आयोजन करण्यात येईल. दुपारच्या सत्रात “ग्रंथचळवळीतील दलित व ग्रामीण,बालसाहित्याचे योगदान” हा परिसवांद घेण्यात येणार आहे. समारोप अध्यक्ष डॉ.व्यंकटेश काब्दे माजी खासदार तथा साहित्यिक, मा.संभाजीराव धुळगुंडे माजी अध्यक्ष जिल्हा परिषद नांदेड, गंगाधर पटने माजी आमदार तथा अध्यक्ष जिल्हा ग्रंथालय संघ, निर्मलकुमार सुर्यवंशी निर्मल प्रकाशन,नांदेड उपस्थित राहणार आहेत.

ग्रंथोत्सवात विविध नामांकित प्रकाशकांचे पुस्तक विक्री व प्रदर्शनी दालने राहणार आहेत. या महोत्सवाचे लाभ घेण्याचे आवाहन जिल्हा ग्रंथालय अधिकारी अनिल सुर्यवंशी यांनी केले आहे.

0000

 वृत्त क्रमांक 233

नांदेड शहरातील पूरग्रस्तांनो ! आपले नाव यादीत आहे अथवा नाही तपासणी करा 

 सप्टेंबरमधील क्षतीग्रस्तांची प्राथमिक यादी जाहीर 

नांदेड दि. 26 फेब्रुवारी : गेल्या वर्षीच्या  अतिवृष्टीमुळे, पुरामुळे नुकसान झालेल्या नांदेड शहरातील नागरिकांनी आपली नावे शासनाच्या प्राथमिक  यादीमध्ये आहे अथवा नाही याची खातरजमा करावी.तसेच आक्षेप असल्यास विहित नमुन्यात तहसील कार्यालयात मागणी दाखल करावी, असे आवाहन करण्यात आले आहे.

माहे सप्टेंबर 2024 मध्ये अतिवृष्टीमुळे नांदेड शहरातील पूरग्रस्त भागातील घरांमध्ये पाणी जाऊन संसार उपयोगी साहित्याचे नुकसान झाले. जिल्हाधिकारी नांदेड यांचे दिनांक 06.09.2024 रोजीच्या आदेशान्वये नांदेड वाघाळा महानगरपालिकाचे कर्मचारी व नांदेड शहरातील तलाठी यांनी पंचनामे केले.

महानगरपालिका प्रशासनाने पूरग्रस्त 12 हजार 772 लाभार्थीची यादी तहसील कार्यालयात दाखल केली आहे. प्राथमिक तपासणी करून ही पूरग्रस्तांची यादी नांदेड जिल्ह्याचे संकेतस्थळावर nanded.nic.in वर प्रसिद्धीस देण्यात आली आहे. नागरिकांना याद्वारे आव्हान करण्यात येते की, प्रसिद्धी देण्यात आलेल्या यादीवर आक्षेप असल्यास दिनांक 21.02.2025 ते दिनांक 05.03.2025 या कालावधीत कार्यालयीन वेळेत तहसील कार्यालय नांदेड येथे विहित नमुन्यात आक्षेप दाखल करावेत. विहित मुदतीनंतर  आक्षेप आल्यास त्याचा विचार करण्यात येणार नाही याची नोंद घ्यावी, असे आवाहन तहसीलदार संजय वरकड यांनी केले आहे.

000000

  वृत्त क्रमांक 232

माहूरच्या भाविकांना अधिक उत्तम व तत्पर सेवा देण्यासाठी प्रयत्न करा : जिल्हाधिकारी 

 माहूर गडावरील प्रस्तावित प्रकल्पांची राहुल कर्डिले यांच्याकडून पाहणी 

नांदेड ( माहूर ) दि.२६ फेब्रुवारी : महाराष्ट्रातील भाविकांचे आराध्य दैवत असणारे माहूर आध्यात्मिक, धार्मिक आणि पर्यटनाच्या दृष्टीने महत्त्वाचे केंद्र आहे. या ठिकाणच्या सोयी सुविधा व प्रस्तावित प्रकल्प काल मर्यादेत पूर्ण करण्याकडे लक्ष दया, अशा सूचना जिल्हाधिकारी राहुल कर्डिले यांनी आज माहूर येथे दिल्या.

 माहूर गडावर आज त्यांनी भेट दिली यावेळी सहाय्यक जिल्हाधिकारी मेघना कावली  तसेच सार्वजनिक बांधकाम विभागाचे  उपकार्यकारी अभियंता भोकर प्रशांत कोरे,तहसीलदार किशोर यादव,मंदिर विश्वस्त उपस्थित होते. या ठिकाणी उभारल्या जात असलेला लिफ्ट व स्कायवॉकच्या कामाची पाहणी, गडावरील दुकानदारांच्या समस्या,रस्त्यांचे विस्तारीकरण, सुशोभीकरण तसेच माहुरच्या विविध ठिकाणी भेटी देताना श्रद्धाळू व पर्यटकांना येणाऱ्या अडचणी याबाबत त्यांनी यावेळी उपस्थित अधिकाऱ्यांशी, विश्वस्तांची चर्चा केली.

प्राचीन ऐतिहासिक संदर्भ असणाऱ्या माहूरगडासारख्या लोकप्रिय पर्यटन स्थळाला जिल्ह्याच्या वैभवात भर घालणाऱ्या सोयी सुविधा उपलब्ध झाल्या पाहिजेत. या परिसरातील अतिक्रमण, फेरीवाल्यांच्या समस्या आणि सर्व प्रलंबित प्रकल्प काल मर्यादेत पूर्ण करण्यात यावे, अशा सूचना त्यांनी यावेळी दिल्या.

तत्पूर्वी त्यांनी माहूर गडावर रेणुका मातेचे दर्शन घेतले. यावेळी मंदिरांच्या विश्वस्तांनी त्यांचे स्वागत केले.

000000

 वृत्त क्रमांक 231

दोन दिवशीय नांदेड ग्रंथोत्सवाचे आयोजन 

विविध कार्यक्रमाची मेजवानी व भव्य ग्रंथप्रदर्शन 

नांदेड ग्रंथोत्सवाचे उद्यापासून आरंभ 

नांदेड दि. २६ फेब्रुवारी : दोन दिवसीय नांदेड ग्रंथोत्सवाचे आयोजन व ग्रंथ प्रदर्शन व विक्री , विविध सांस्कृतिक कार्यक्रम ग्रंथालय संचालनालय,जिल्हा ग्रंथालय अधिकारी कार्यालय नांदेड यांच्या वतीने बहुउद्देशिय सांस्कृतिक संकुल, श्री.गुरुगोबिंदसिंगजी स्टेडीयम परिसर, नांदेड-431602 येथे दोन दिवसीय नांदेड ग्रंथोत्सवाचे आयोजन करण्यात आले आहे.

 ग्रंथोत्सवाचे उदघाटन शुक्रवार दिनांक 28/02/2025 रोजी सकाळी 11.00 वा श्रीकांत देशमुख,साहित्य अकादमी पुरस्कार प्राप्त लेखक यांच्या हस्ते होणार आहे. पहिल्या दिवशी दि.28 फेब्रुवारी रोजी सकाळी 8.30 वा ग्रंथदिंडी महात्मा फुले पुतळा ते कार्यक्रम स्थळ निघेल. यावेळी  अजय दत्तात्रय शिंदे,उपजिल्हाधिकारी नांदेड, उपस्थित राहणार आहेत.

उदघाटन सकाळी 11.00वा. मा.श्रीकांत देशमुख यांच्या हस्ते होईल. यावेळी विशेष अतिथी म्हणून मा.श्री अतुल सावे,मंत्री,इतर मागास,बहूजन कल्याण,दुग्धविकास,अपारंपारिक ऊर्जा तथा पालकमंत्री नांदेड जिल्हा उपस्थित राहणार आहेत. तसेच या कार्यक्रमाचे अध्यक्ष भगवंत क्षीरसागर असणार असून प्रमुख अतिथी श्री अशोकराव शंकरराव चव्हाण,राज्यसभा सदस्य तथा माजी मुख्यमंत्री,महाराष्ट्र राज्य, मा.श्री हेमंत श्रीराम पाटील,विधान परिषद सदस्य तथा मा.अध्यक्ष मा.बाळासाहेब ठाकरे हरिद्रा (हळद) संशोधन व प्रशिक्षण केंद्र, मा.खा.श्री अजित गोपछडे,राज्यसभा सदस्य, मा.खा.प्रा.रविंद्र वसंतराव चव्हाण,मा.संसद सदस्य-16-नांदेड  लोकसभा मतदार संघ,मा.खा.श्री.नागेश बापुराव पाटील आष्टीकर, मा.संसद सदस्य 15-हिंगोली लोकसभा  मतदार संघ, मा.खा.श्री डॉ.शिवाजीराव बंडप्पा काळगे,मा.संसद सदस्य,41-लातूर  लोकसभा मतदार संघ, मा.आ.श्री विक्रम वसंत काळे,मा.विधानपरिषद सदस्य, मा.आ.श्री.सतीश भानुदास चव्हाण,मा.विधानपरिषद  सदस्या, मा.आ.श्री.प्रताप पाटील चिखलीकर, मा.विधानसभा सदस्य 88-लोहा विधानसभा मतदार संघ,  मा.आ.श्री.भिमराव रामजी केराम,मा. विधानसभा सदस्य 83-किनवट विधानसभा मतदार संघ, मा.आ.श्री डॉ.तुषार गोविंदराव राठोड,                मा. विधानसभा सदस्य 91 -मुखेड विधानसभा मतदार संघ,मा.आ.श्री बालाजी देविदासराव कल्याणकर, मा.  विधानसभा  सदस्य 86-नांदेड उत्तर विधानसभा मतदारसंघ  मा.आ.श्री राजेश संभाजी पवार, ,मा.विधानसभा सदस्य 89- नायगाव विधानसभा मतदारसंघ, मा.आ.श्री.जितेश रावसाहेब अंतापूरकर, ,मा.विधानसभा सदस्य 90-देगलूर विधानसभा मतदारसंघ मा.आ.श्री.बाबुराव कदम कोहळीकर, ,मा.विधानसभा सदस्य 84- हदगाव विधानसभा मतदारसंघ,आ.श्री.आनंद शंकर तिडके, ,मा.विधानसभा सदस्य 87नांदेड दक्षिण विधानसभा मतदारसंघ,   मा.आ.कु.श्रीजया अशोकराव चव्हाण, ,मा.विधानसभा सदस्य 85-भोकर विधानसभा मतदारसंघ

प्रमुख उपस्थिती   मा.श्री.राहुल कर्डिले,(भा.प्र.से.)जिल्हाधिकारी,नांदेड  मा.श्रीमती मिनल करनवाल, (भा.प्र.से.) मुख्य कार्यकारी अधिकारी,नांदेड  मा.श्री.अभिषेक कुमार, ,(भा.पो.से.) पोलिस अधिक्षक,नांदेड

मा.श्री.डॉ.महेशकुमार डोईफोडे,आयुक्त,म.न.पा.नांदेड  मा.आ.ॲड.गंगाधर पटने,अध्यक्ष जिल्हा ग्रंथालय संघ,नांदेड  मा.श्री.अशोक गाडेकर,ग्रंथालय संचालक,म.रा.,मुंबई.मा.श्री.सुनील हुसे,सहाय्यक ग्रंथालय 

संचालक,छत्रपती संभाजीनगर, मा.श्री.प्रताप सुर्यवंशी,राज्य निरीक्षक,मुंबई,मा.श्री.कैलाशचंद्र गायकवाड,तांत्रिक सहाय्यक,नांदेड,अनिल बाविस्कर (मुख्य लिपिक),अजय राजाराम वट्टमवार (निर्गम सहाय्यक) उपस्थित राहणार आहेत.सुत्रसंचालन ज्येष्ठ साहित्यिक नारायण शिंदे करतील.

दुपारी 2.00 ते 4.00 या वेळेत परिसंवाद AI च्या काळात वाचनसंस्कृतीपुढील आव्हान घेण्यात येईल. त्यामध्ये अध्यक्ष मा.प्रो.डॉ.पराग भालचंद्र,संगणकशास्त्र विभाग,स्वा.रा.ति.म.वि.नांदेड, सहभाग मा.श्री.सुरज गुरव, अप्पर पोलीस अधिक्षक,नांदेड,  मा.श्री.सचिन नरंगले,इलेक्ट्रानिक मिडिया विभाग, स्वा.रा.ति.म.वि.नांदेड  यांचा सहभाग असेल. संचलन मा.नवनाथ कदम  हे करतील.

दुपारी 4.00 ते 6.00 या वेळेत परिसंवाद भारतीय संविधानाच्या अमृतमहोत्सवी पर्वावर सामान्य नागरिकांचे कर्तव्य,घेण्यात येईल वक्ते मा.श्री भिमराव राऊत, लेखक व अनुवादक, सूत्रसंचालन बालाजी नारलेवाड हे करतील.

दुस-या दिवशी 1 मार्च2025 रोजी सकाळी 11.00 ते 1.00 वेळेत परिसवांद “मराठी भाषा सवंर्धन आणि घराघरातील प्रयत्न”चे आयोजन करण्यात येईल.अध्यक्षस्थानी मा.डॉ.पृथ्वीराज तौर,मराठी विभाग प्रमुख स्वा.रा.ति.म.वि.नांदेड राहतील,सहभाग मा.श्रीमती.सुचिता खल्लाळ,राज्य शासन पुरस्कार प्राप्त लेखिका शिक्षण विस्तार अधिकारी,प्रा.डॉ.शारदा कदम,बर्हिजी महाविद्यालय,बसमत, मा.श्री.विकास जोशी,पत्रकार.

दुपारी 2.00 ते 4.00 ग्रंथचळवळीतील दलित व ग्रामीण,बालसाहित्याचे योगदान या परिसवांदाचे आयोजन करण्यात आले आहे. अध्यक्षस्थानी रविचंद्र हडसनकर ज्येष्ठ साहित्यिक, सहभाग मा.डॉ.कमलाकर चव्हाण ज्येष्ठ साहित्यिक, मा.श्री.शंकर वाडेवाले ज्येष्ठ साहित्यिक, मा.श्री.श.ल.नाईक बालसाहित्यिक यांचा सहभाग असेल. सुत्रसंचलन मा.श्री.भानुदास पवळे हे करतील.

सायंकाळी 4.00 वाजता समारोप अध्यक्ष डॉ.व्यंकटेश काब्दे माजी खासदार तथा साहित्यिक, मा.संभाजीराव धुळगुंडे माजी अध्यक्ष जिल्हापरिषद नांदेड, मा.ॲड.गंगाधर पटने माजी आमदार तथा अध्यक्ष जिल्हा ग्रंथालय संघ, मा.निर्मलकुमार सुर्यवंशी निर्मल प्रकाशन,नांदेड उपस्थित राहणार आहेत. ग्रंथोत्सवात विविध नामांकित प्रकाशकांचे पुस्तक विक्री व प्रदर्शनी दालने राहणार आहेत. या महोत्सवाचे लाभ घेण्याचे आवाहन जिल्हा ग्रंथालय अधिकारी अनिल सुर्यवंशी यांनी केले आहे.

00000

 वृत्त क्रमांक 230

महाराष्ट्र सहकारी संस्था अधिनियमांतर्गत

अवसायकांची नामतालिका (पॅनल) साठी मागविण्यात आले अर्ज  

नांदेड दि. 25 फेब्रुवारी :- महाराष्ट्र सहकारी संस्था अधिनियम 1960 चे कलम 102 अन्वये जिल्ह्यातील अवसायनातील संस्थांचे कामकाजासाठी अवसायकांची नामतालिका (पॅनेल) तयार करण्यासाठी अर्ज मागविण्यात आली आहेत, असे आवाहन लातूर सहकारी संस्था  विभागीय सहाय्यक निबंधक, अधिन विभागीय सहनिबंधक अरुण शेंदारकर यांनी केले आहे. 

याबाबत अर्जाचा विहित नमुना विभागीय सहनिबंधक सहकारी संस्था लातूर विभाग, लातूर, मध्यवर्ती प्रशासकीय इमारत लातूर यांच्या कार्यालयात 25 फेब्रुवारी  ते 14 मार्च 2025 या कालावधीत कार्यालयीन वेळेत मिळू शकतील. अर्ज सादर करण्याची अंतिम मुदत 14 मार्च 2025 पर्यंत आहे. प्राप्त अर्जाची छाननी  20 मार्च 2025 रोजी पूर्ण करून 21 मार्च 2025 पर्यंत प्रारुप नामतालिका प्रसिद्ध करणे व 25 मार्च 2025 रोजी हरकती मागवणे व 27 मार्च 2025 रोजी हरकतीचा निर्णय करून 28 मार्च 2025 रोजी अंतिम नामतालिका प्रसिद्ध करण्यात येणार आहे. 

अर्ज कोणाला करता येणार 

न्यायालयातील निवृत्त न्यायाधीश व सेवानिवृत्त विधी अधिकारी, प्रॅक्टीसिंग अॅडव्हॉटस्, चार्टर्ड अकौन्टट, कॉस्ट अकौन्टर, कंपनी सेक्रेटरी, राष्ट्रीयकृत बँका, ग्रामीण बँका, भूविकास बँका, जिल्हा मध्यवर्ती सहकारी बँका, व्यापारी बँका, नागरी सहकारी बँका, राज्य सहकारी बँका यांच्या सेवेतील व्यवस्थापक दर्जापेक्षा कमी दर्जा नसलेले सेवानिवृत अधिकारी, सहकार विभागातील सेवानिवृत वर्ग-1, वर्ग-2 चे अधिकारी आणि सहकार अधिकारी प्रथम श्रेणी व द्वितीय श्रेणी दर्जाचे कर्मचारी,महसूल विभागातील सेवानिवृत उपजिल्हाधिकारी दर्जाचे अधिकारी, कंपनी लिक्विडेटर म्हणून कामकाज केलेले अनुभवी व्यक्ती. सहकारी संस्थेचे लेखापरिक्षण केले असल्याचे 5 वर्षाचे अनुभवी प्रमाणित लेखापरिक्षक हे व्यक्ती अर्ज करू शकतील. 

अर्जदाराची अर्हता  

अर्ज करणाऱ्या सदर व्यक्तीवर कोणत्याही स्वरुपाचे गुन्हे दाखल नसावेत. शासकीय सेवानिवृत्त अधिकारी-कर्मचारी असल्यास त्यांची कोणत्याही प्रकारची खातेनिहाय चौकशी चालू नसावी. व सेवेत कोणताही ठपका ठेवलेला नसावा. वयोमर्यादा 70 वर्षापर्यंत असावी. शारीरिक व मानसिक आरोग्याच्या दृष्टीने सक्षम असावा. प्रॅक्टसिंग ॲडव्होकेटस व चार्टर्ड अकौन्टट, कॉस्ट अकौन्टट, कंपनी सेक्रेटरी यांना सहकारी संस्थेचे कामकाजाचा 5 वर्षांचे अनुभव असणे आवश्यक आहे. कोणत्याही सहकारी संस्थेचा थकबाकीदार नसावा किंवा कलम 83 व कलम 88 च्या कार्यवाहीमध्ये जबाबदार धरलेला नसावा. (महाराष्ट्र सहकारी संस्था अधिनियम 1960 व त्याखालील नियमांतर्गत अपात्र नसावा). सदर व्यक्तीचा सहकार खात्याने काळ्या यादीमध्ये समाविष्ट केलेला नसावा. सदर व्यक्ती संबंधीत विभागाच्या विभागीय सहनिबंधक, सहकारी संस्था कार्यालयाच्या अधिपत्याखाली येणाऱ्या जिल्ह्यातील रहिवासी असावा. जसे लातूर, धाराशीव, बीड व नांदेड जिल्ह्यातील. सदर व्यक्ती एकावेळी एकाच जिल्ह्यातून अर्ज दाखल करू शकेल.

याबाबतची जाहीर सूचना या कार्यालयाच्या नोटीस बोर्डावर प्रसिद्ध करण्यात आली आहे, असेही आवाहन लातूर सहकारी संस्थाचे  विभागीय सहाय्यक निबंधक, अधिन विभागीय सहनिबंधक अरुण शेंदारकर यांनी प्रसिद्धी पत्रकाद्वारे केले आहे.

00000

  वृत्त क्रमांक 229

मराठी भाषा गौरव दिनानिमित्त विविध कार्यक्रमांचे आयोजन करण्याचे निर्देश

नांदेड, दि. 25 :- महाराष्ट्राच्या सांस्कृतिक क्षेत्रामध्ये मोलाचे योगदान जेष्ठ कवी वि.वा.शिरवाडकर उर्फ कुसुमाग्रज यांनी दिले आहे. मराठी भाषा ही ज्ञानभाषा होण्यासाठी त्यांनी अथक परिश्रम घेतले आहेत. आपल्या मातृभाषेचा गौरव म्हणून वि.वा.शिरवाडकर उर्फ कुसुमाग्रज यांचा 27 फेब्रुवारी हा जन्मदिन “मराठी भाषा गौरव दिन” म्हणून साजरा करण्याच्या सूचना शासनाने दिल्या आहेत.

मराठी भाषेचा गौरव दिन साजरा करताना मराठी भाषेचा प्रचार, प्रसार व जतन व संवर्धन व्हावे हा उद्देश आहे. याची अंमलबजावणी संपूर्ण जिल्ह्यात विविध कार्यक्रमाच्या माध्यमातून केली जाणार आहे. 27 फेब्रुवारी रोजी सर्व कार्यालयात मराठी भाषा गौरव दिन म्हणून साजरा करण्यात यावा व केलेल्या कार्यवाहीचा अहवाल शासनास व जिल्हाधिकारी कार्यालयास सादर करावा, असेही निर्देश जिल्हा प्रशासनाने दिले आहेत.

00000