वृत्त क्रमांक  

दहावी-बारावी परीक्षेस प्रविष्ट होणाऱ्या खेळाडू विद्यार्थ्यांचे

क्रीडा सवलतीचे गुण प्रस्ताव ऑनलाईन सादर करण्याचे आवाहन

 

नांदेड दि. 2 मार्च :- फेब्रुवारी-मार्च 2026 च्या दहावी-बारावी परीक्षेस प्रविष्ठ होणाऱ्या खेळाडू विद्यार्थ्यांचे क्रीडा सवलतीचे प्रस्ताव ऑनलाईन बुधवार 15 एप्रिल 2026 पर्यंत सादर करण्याचे आवाहन लातूर विभागीय मंडळाने केले आहे.

 

माध्यमिक शालान्त प्रमाणपत्र (इ.10वी) परीक्षा व उच्च माध्यमिक प्रमाणपत्र (इ. 12वी) परीक्षेस प्रविष्ट होणाऱ्या खेळाडू विद्यार्थ्यांना व एन.सी.सी., स्काऊट गाईड मधील विद्यार्थ्यांना क्रीडा सवलतीचे गुण देण्यात येतात. यासाठीचा शासन निर्णय दिनांक 20 डिसेंबर 2018 रोजी निर्गमीत करण्यात आलेला आहे. महाराष्ट्र राज्य माध्यमिक व उच्च माध्यमिक शिक्षण मंडळ पुणे यांच्याशी संलग्न असलेल्या सर्व माध्यमिक शाळा, कनिष्ठ महाविद्यालयांचे मुख्याध्यापक, प्राचार्य, शिक्षक, विद्यार्थी व पालकांनी नोंद घ्यावी, असेही आवाहन केले आहे.

 

या शासन निर्णयानुसार जिल्हा क्रीडा अधिकारी यांच्याकडून क्रीडा प्रस्ताव तसेच एन.सी.सी. स्काऊट गाईड इत्यादी प्रस्ताव शिक्षणाधिकारी (माध्यमिक) यांच्याकडून दरवर्षी विभागीय मंडळाकडे सादर केले जातात. त्याअनुषंगाने फेब्रुवारी-मार्च २०२६ च्या इ.१० वी व इ. १२ परीक्षेस प्रविष्ट खेळाडू विद्यार्थ्यांचे प्रस्ताव जिल्हा क्रीडा अधिकारी यांनी दि. १५ एप्रिल २०२६ पर्यंत संबंधित विभागीय मंडळाकडे आपले सरकार पोर्टलव्दारे ऑनलाईन पध्दतीने पाठवावयाचे आहेत. तसेच एन.सी.सी., स्काऊट गाईडचे प्रस्ताव शिक्षणाधिकारी (माध्यमिक) यांनी विभागीय मंडळांकडे प्रचलित पध्दतीने दि. १५ एप्रिल २०२६ पर्यंत पाठवावयाचे आहेत.

 

सर्व जिल्हा कीडा अधिकारी, सर्व शिक्षणाधिकारी (माध्यमिक) तसेच माध्यमिक व उच्च माध्यमिक शाळा, कनिष्ठ महाविद्यालये मुख्याध्यापक, प्राचार्य, शिक्षक, विद्यार्थी, पालक व सर्व संबंधित घटकांनी या बाबींची नोंद घेऊन त्याप्रमाणे उचित कार्यवाही करावी, असेही आवाहन विभागीय सचिव लातूर विभागीय मंडळ लातूर यांनी केले आहे.

00000

वृत्त क्रमांक  

 प्राणीमित्र पद्धतीने होळी-रंगपंचमी साजरी करू या   

·    पाळीव किंवा भटके प्राणी, पक्ष्यांना सुका, ओला रंग लावू नका

 

नांदेड दि. 2 मार्च :-  प्राण्यांना सणांची समज नसते. त्यांच्यासाठी मोठा आवाज, अचानक अंगावर येणारे रंग, पाण्याचे फुगे आणि आक्रमक वर्तन अत्यंत भीतीदायक आणि जीवघेणे ठरू शकते. रासायनिक रंगांमुळे त्यांची त्वचा आणि डोळे जळू शकतात. नागरिकांनी हा रंगांचा सण साजरा करत असतांना भटके कुत्रे, मांजर, गुरे, पक्षी किंवा पाळीव प्राणी यांना कोणत्याही प्रकारचा ताण, इजा किंवा त्रास होणार नाही, याची काळजी घ्यावी असे आवाहन करण्यात आले आहे.

 

होळी हा आनंद, मैत्री आणि वाईटावर चांगल्याच्या विजयाचे प्रतीक असलेला सण आहे. यंदा हा सण मंगळवार 3 मार्च 2026 रोजी देशभरात साजरा केला जाणार आहे. भारतीय जीवजन्तु कल्याण बोर्ड (AWBI) च्या मार्गदर्शक सूचनुनुसार

 

नागरिकांनी हे लक्षात ठेवणे महत्त्वाचे आहे की प्राण्यांना वेदना, दुखापत किंवा त्रास देणे हा प्राण्यांना क्रूरतेने वागविण्यास प्रतिबंध करण्याबाबतचा कायदा, 1960 (Prevention of Cruelty to Animals Act, 1960) अंतर्गत शिक्षेस पात्र गुन्हा आहे. तसेच सण दयाळूपणे साजरा करणे हे केवळ आपले नैतिक कर्तव्यच नाही तर प्राण्यांच्या कल्याणाशी संबंधित कायद्यानुसार बंधनकारक देखील आहे.

 

नियमांचे पालन करा

·  पाळीव प्राणी, भटके प्राणी आणि पक्षी यांच्यावर सुका किंवा ओला रंग लावणे टाळा.

·  प्राण्यांवर पाण्याचे फुगे फेकू नका किंवा रंगीत पाणी उडवू नका, कारण यामुळे ते घाबरू शकतात आणि त्यांना गंभीर दुखापत होऊ शकते.

·  आपले पाळीव प्राणी घरात किंवा सुरक्षित आणि शांत ठिकाणी असल्याची खात्री करा आणि भटक्या प्राण्यांना गर्दीच्या किंवा गोंधळाच्या ठिकाणांपासून दूर राहण्यास मदत करा.

· सण साजरा केल्यानंतर परिसराची स्वच्छता राखा आणि प्राण्यांच्या पोटात हानिकारक पदार्थ जाऊ नयेत यासाठी रंगांचे अवशेष, प्लास्टिकचा कचरा आणि फुगे गोळा करून त्यांची योग्य विल्हेवाट लावा.

·    होळी प्राण्यांना अनुकूल आणि दयाळूपणे साजरी करण्याबाबत लहान मुले, मित्र आणि शेजाऱ्यांमध्ये जनजागृती करा.

·    एखाद्या प्राण्याच्या अंगावर रंग पडल्यास किंवा त्याला दुखापत झाल्यास, स्वच्छ पाण्याने तो भाग हळुवारपणे धुवा आणि त्वरित पशुवैद्यकीय मदत घ्या.

·   केवळ मानवांसाठी नैसर्गिक रंगांचा वापर करा आणि शांततापूर्ण, पर्यावरणपूरक आणि क्रूरता मुक्त उत्सवाला प्रोत्साहन देऊन जबाबदारीने सण साजरा करा.

 

या होळीमध्ये आपण उत्साहापेक्षा सहानुभूती, गोंधळापेक्षा दयाळूपणा आणि हानी पेक्षा मानवतेला प्राधान्य देऊ या. खऱ्या अर्थाने रंगतदार होळी तीच असते ज्यामध्ये कोणत्याही सजीव प्राण्याला दुखापत होत नाही. "सुरक्षित खेळा. दयाळूपणे खेळा. क्रूरतेशिवाय होळी साजरी करा." असे आवाहन SPCA समिती आणि जिल्हा प्रशासन नांदेड यांच्यावतीने केले आहे.

00000

वृत्त क्रमांक  

‘आयोग आपल्या दारी’

नांदेड येथे द्वितीय अपीलांचा विशेष अपील निर्गत कार्यक्रम 9 ते 13 मार्च दरम्यान

नांदेड, दि. 2 मार्च :- राज्य माहिती आयुक्त प्रकाश इंदलकर यांच्या संकल्पनेतून ‘आयोग आपल्या दारी’ या उपक्रमांतर्गत नांदेड येथे द्वितीय अपीलांचा विशेष अपील निर्गत कार्यक्रम 9 ते 13 मार्च 2026 या कालावधीत आयोजित करण्यात आला आहे.

राज्य माहिती आयोग, छत्रपती संभाजीनगर खंडपीठाकडे माहिती अधिकार अधिनियम 2005 मधील कलम 19 (3) अंतर्गत प्रलंबित द्वितीय अपीलांचा शिघ्र निपटारा व्हावा तसेच अपीलार्थी, जन माहिती अधिकारी व प्रथम अपिलीय अधिकारी यांच्या वेळेची बचत व्हावी, या उद्देशाने नांदेड जिल्ह्याशी संबंधित द्वितीय अपीलांची सुनावणी नांदेड मुख्यालयी घेण्याचा निर्णय घेण्यात आला आहे.

सन 2024 व सन 2025 या कालावधीत आयोगाकडे सादर करण्यात आलेली व अद्याप प्रलंबित असलेली नांदेड जिल्ह्यातील एकूण 1136 द्वितीय अपीलांची सुनावणी या विशेष कार्यक्रमांतर्गत मा. राज्य माहिती आयुक्त, छत्रपती संभाजीनगर खंडपीठ यांचेसमोर होणार आहे.

ही सुनावणी 9 ते 13 मार्च 2026 दरम्यान कॅबिनेट हॉल, नियोजन भवन, जिल्हाधिकारी कार्यालय परिसर, नांदेड येथे आयोजित करण्यात आली आहे. सर्व संबंधितांना आयोगाकडून सुनावणी नोटीस पोस्टाने पाठविण्यात आलेल्या आहेत. तसेच सुनावणी बोर्ड (वादसूची) आयोगाच्या अधिकृत संकेतस्थळावर प्रसिद्ध करण्यात आले आहे.

संबंधित अपीलार्थींनी www.sic.maharashtra.gov.in या संकेतस्थळावर आपल्या अपील क्रमांकानुसार सुनावणीची तारीख व वेळ तपासून सुनावणीस व्यक्तिशः उपस्थित राहावे, असे आवाहन आयोगाचे उपसचिव रा. चो. सरवदे यांनी केले आहे.

००००००

वृत्त क्रमांक  

सर्व पशुवैद्यकीय चिकित्सालये, तालुका व जिल्हा चिकित्सालये तसेच फिरते दवाखान्यांच्या कामकाजाच्या वेळा निश्चित

नांदेड, दि. 2 मार्च :- ग्रामीण भागातील पशुपालकांना सकाळच्या सत्रात पशुवैद्यकीय सेवा सुलभ व्हावी तसेच कार्यक्षेत्रातील गावांना नियमित भेटी देऊन पशुसंवर्धन व दुग्धव्यवसाय विभागाच्या विविध योजना प्रभावीपणे राबविता याव्यात, या उद्देशाने राज्यातील जिल्हा पशुवैद्यकीय चिकित्सालये, तालुका पशुवैद्यकीय चिकित्सालये, पशुवैद्यकीय दवाखाने व फिरते पशुवैद्यकीय दवाखाने यांच्या कामकाजाच्या वेळांमध्ये सुधारणा करण्यात आली आहे.

महाराष्ट्र शासनाच्या कृषि, पशुसंवर्धन, दुग्धव्यवसाय विकास व मत्स्यव्यवसाय विभागाच्या दि. 28 फेब्रुवारी 2026 च्या शासन निर्णयानुसार दि. 1 मार्च 2026 पासून पुढील सुधारित वेळा लागू करण्यात आल्या आहेत.

सुधारित वेळापत्रक :

• सोमवार ते शुक्रवार : सकाळी 8 ते दुपारी 1.30 व सायं. 3 ते 5

• शनिवार : सकाळी 8 ते दुपारी 1

जिल्हा व तालुका स्तरावर विशेषज्ञ सेवा तसेच पशुपालकांना आकस्मिक प्रसंगी 24 तास पशुवैद्यकीय सेवा उपलब्ध राहणार आहे.

नांदेड जिल्ह्यातील सर्व पशुपालक व शेतकरी यांनी या बदलाची नोंद घ्यावी, असे आवाहन पशुसंवर्धन व दुग्धव्यवसाय विभागाचे जिल्हा उपायुक्त डॉ. सखाराम बाबुराव खुणे यांनी केले आहे.

०००००

 वृत्त क्रमांक  

आंतरराष्ट्रीय महिला दिनानिमित्त "अस्मिता महिला लीग" आयोजनात सहभागी होण्याचे आवाहन

नांदेड, दि. 2 मार्च :- भारत सरकार, युवा कार्यक्रम व क्रीडा मंत्रालय यांचेकडून प्राप्त पत्रानुसार आंतरराष्ट्रीय महिला दिनानिमित्त "अस्मिता महिला लीग" आयोजनासंबंधी मानक कार्यपद्धती निर्गमित करण्यात आलेली आहे. त्याअनुषंगाने नांदेड जिल्हयामध्ये भारतीय क्रीडा प्राधिकरण, जिल्हा क्रीडा अधिकारी कार्यालय, खेलो इंडिया, माय भारत, युवा कार्य, क्रीडा मंत्रालय, भारत सरकार यांच्या संयुक्त विदयमाने व सायन्स कॉलेज, नांदेड यांच्या सहकार्याने 8 मार्च, 2026 रोजी "अस्मिता महिला लीग" स्पर्धाचे आयोजन सायन्स कॉलेज, नांदेड करण्यात आले आहे. 

या स्पर्धेचा मुख्य उददेश म्हणजे महिला खेळाडूंना स्पर्धात्मक व्यासपीठ उपलब्ध करून देणे, क्रीडा सहभाग वाढविणे व स्थानिक स्तरावर क्रीडा चळवळ बळकट करणे, आंतरराष्ट्रीय महिला दिनानिमित्त महिला सक्षमीकरणाचा संदेश देणे, जिल्हास्तरावर क्रीडा संरचना व तांत्रिक क्षमता विकसित करणे हा आहे.

स्पर्धेची रचना क्रीडा प्रकारः अॅथलेटिक्स प्रस्तावित स्पर्धाः अ) धावण्याच्या स्पर्धा :100 मीटर, 200, 400 मीटर याबाबीचा समावेश असून यामध्ये वयोगटः 13 वर्षांखालील, 13 ते 18 वर्षे, 18 वर्षांवरील मुली व महिलांचा समावेश राहील. 

वय पडताळणी नोंदणीच्या वेळी पुढील कागदपत्रांच्या आधारे वय निश्चित करण्यात येईलः 1) आधारकार्ड (प्राधान्याने), 2) राज्य/केंद्रशासनाने दिलेला जन्म तारीख नमूद असलेला पुरावा, 3) दहावी उत्तीर्ण प्रमाणपत्र इत्यादी नोंदणी दरम्यान खेळाडूंचे वय, वजन व उंची नोंदविणे आवश्यक राहील. यासाठी नांदेड जिल्हयातील मुली व महिला खेळाडूंनी ASMITA Portal वर आपली नांवे 07 मार्च, 2026 पर्यंत आवश्यक कागदपत्रासह अपलोड करणे बंधनकारक आहे. यामध्ये पहिला, दुसरा व तिसऱ्या विजेत्या खेळाडूंना मेडल देवून मान्यवरांच्या हस्ते गौरव करण्यात येणार आहे.

तरी नांदेड जिल्हयातील 13 वर्षांखालील, 13 ते 18 वर्षे, 18 वर्षांवरील मुली व महिलां खेळाडूंनी जास्तीत जास्त संख्येने अस्मिता पोर्टलवर आपली नांवे अपलोड करावी व 08 मार्च,2026 रोजी सकाळी 7.30 वा. सायन्स कॉलेज, नांदेड येथे उपस्थित राहावे. अधिक माहितीसाठी श्रीमती शिवकांता देशमुख (राज्य क्रीडा मार्गदर्शक) 9657092794 यांचेशी संपर्क साधावा, असे आवाहन जिल्हा क्रीडा अधिकारी जयकुमार टेंभरे यांनी केले आहे.

00000

वृत्त क्रमांक  

जिल्हाधिकाऱ्यांनी घेतला पशुसंवर्धन विभागाच्या विविध योजनांचा आढावा

नांदेड, दि. 2 मार्च :- कै. शंकरराव चव्हाण नियोजन भवन, जिल्हाधिकारी कार्यालय, नांदेड येथे जिल्हाधिकारी राहुल कर्डीले यांच्या अध्यक्षतेखाली पशुसंवर्धन विभागाच्या विविध योजनांचा आढावा नुकताच घेण्यात आला. यावेळी जिल्हा परिषदेच्या मुख्य कार्यकारी अधिकारी मेघना कावली, लातूरचे प्रादेशिक सहआयुक्त पशुसंवर्धन व दुग्धव्यवसाय डॉ. नाना सोनवणे यांची प्रमुख उपस्थिती होती.

बैठकीस जिल्ह्यातील सर्व सहाय्यक आयुक्त पशुसंवर्धन, पशुधन विकास अधिकारी, सहाय्यक पशुधन विकास अधिकारी, पशुधन पर्यवेक्षक तसेच ‘मैत्री’ व नॅशनल डेअरी स्कीम अंतर्गत कार्यरत सेवादाते उपस्थित होते. नांदेड जिल्ह्यातील पशुप्रजनन कार्य, दुग्ध उत्पादन वाढ तसेच विदर्भ-मराठवाडा दुग्ध विकास प्रकल्प (टप्पा 2) अंतर्गत बाबनिहाय आढावा घेण्यात आला. यासोबतच किसान क्रेडिट कार्ड योजना, महाराष्ट्र गोजातीय प्रजनन कायदा आदी विषयांवर चर्चा करण्यात आली.

जिल्ह्यातील प्रजननक्षम गाय व म्हैस वर्गीय जनावरांसाठी वंध्यत्व निवारण शिबिरे आयोजित करून कृत्रिम रेतनाचे प्रमाण वाढविण्याचे निर्देश देण्यात आले. अधिक दुध उत्पादन देणारी जनावरे तसेच मादी कालवडींची निर्मिती करण्यासाठी लिंगवर्गीकृत रेतमात्राचा वापर वाढविण्याचे आवाहन करण्यात आले. दुग्ध उत्पादनवाढीसाठी विदर्भ-मराठवाडा दुग्ध विकास प्रकल्पांतर्गत कृती आराखडा तयार करून प्रभावी अंमलबजावणी करण्याबाबत सूचना देण्यात आल्या.

पशुधनातील विविध लसीकरण मोहिमांचा आढावा घेण्यात आला. लाळ-खुरकूत (FMD) लसीकरणाच्या आठव्या फेरीस सुरुवात करण्यात आली असून विहित मुदतीत लसीकरण पूर्ण करून ‘भारत पशुधन’ प्रणालीवर माहिती अद्ययावत करण्याचे निर्देश देण्यात आले. लिंगवर्गीकृत रेतमात्रासाठी जिल्हा नियोजन समितीकडून आवश्यक निधी उपलब्ध करून देण्यात आल्याची माहिती यावेळी देण्यात आली.

नांदेड जिल्ह्यात कृत्रिम रेतनाचे कार्य दुप्पट करण्यासाठी राबविण्यात येत असलेल्या नियंत्रित प्रजनन कार्यक्रमाच्या प्रगतीचाही आढावा घेण्यात आला. तसेच प्रधानमंत्री धनधान्य योजनेअंतर्गत उद्दिष्टपूर्तीसाठी आवश्यक नियोजन व उपाययोजना करण्याचे निर्देश देण्यात आले. जिल्हा वार्षिक योजना (सर्वसाधारण) सन 2025-26 अंतर्गत लिंगवर्गीकृत रेतमात्राचा पुरवठा करण्यात आला. यासंदर्भात उपस्थित अधिकारी व कर्मचाऱ्यांना डॉ. स्वप्नील देशमुख (एबीएस जीनस) यांनी सविस्तर तांत्रिक मार्गदर्शन केले.

यावेळी जिल्हा पशुसंवर्धन उपआयुक्त डॉ. सखाराम खुणे, सहाय्यक आयुक्त पशुसंवर्धन डॉ. प्रविणकुमार घुले, डॉ. अरविंद गायकवाड, नॅशनल डेअरी स्कीमचे प्रकल्प समन्वयक डॉ. ज्ञानेश्वर सोनटक्के, विदर्भ-मराठवाडा दुग्ध विकास प्रकल्पाचे जिल्हा प्रकल्प अधिकारी डॉ. सतीश खिल्लारे तसेच विभागातील सर्व संबंधित अधिकारी उपस्थित होते.

०००००

 वृत्त क्रमांक  

सामाजिक न्याय विभागामार्फत विविध राज्यस्तरीय पुरस्कारांसाठी

 15 मार्चपर्यत अर्ज करण्याचे आवाहन

नांदेड, दि. 2 मार्च :- सामाजिक क्षेत्रात उल्लेखनीय व वैशिष्ट्यपूर्ण कार्य करणाऱ्या व्यक्ती व स्वयंसेवी संस्थांना प्रोत्साहन मिळावे या उद्देशाने सामाजिक न्याय विभागामार्फत विविध राज्यस्तरीय पुरस्कार प्रदान करण्यात येतात. या पुरस्कारासाठी इच्छुक सामाजिक कार्यकर्ते व सेवाभावी संस्थांनी आवश्यक कागदपत्रांसह विहित नमुन्यातील अर्ज सहाय्यक आयुक्त, समाज कल्याण, नांदेड कार्यालयाकडे 15 मार्च 2026 पर्यंत सादर करावेत, असे आवाहन समाज कल्याण विभागाचे सहाय्यक आयुक्त शिवानंद मिनगिरे यांनी केले आहे.

यामध्ये डॉ. बाबासाहेब आंबेडकर समाजभूषण पुरस्कार, साहित्यरत्न लोकशाहीर अण्णाभाऊ साठे पुरस्कार, पद्मश्री कर्मवीर दादासाहेब गायकवाड पुरस्कार, शाहू-फुले-आंबेडकर पारितोषिक,  डॉ. बाबासाहेब आंबेडकर सामाजिक न्याय प्राविण्य पुरस्कार आदी पुरस्कारांचा समावेश आहे.

सन 2024-25 व 2025-26 या आर्थिक वर्षांसाठी देण्यात येणाऱ्या वरील पुरस्कारांसाठी इच्छुक व्यक्ती व संस्थांकडून 15 मार्च 2026 पर्यंत अर्ज मागविण्यात येत आहेत. संबंधित वर्षासाठी विहित अटींची पूर्तता करणे आवश्यक राहील. पुरस्कारासाठी पात्रतेचा कालावधी 01 जानेवारी ते 31 डिसेंबर असा विचारात घेण्यात येईल. सन 2024-25 या वर्षासाठी पात्रतेचा कालावधी 01 जानेवारी 2024 ते 31 डिसेंबर 2024 असा राहील. सन 2025-26 या वर्षासाठी पात्रतेचा कालावधी 01 जानेवारी 2025 ते 31 डिसेंबर 2025 असा राहील.

विहित नमुन्यातील अर्ज सहाय्यक आयुक्त, समाज कल्याण कार्यालय, नांदेड येथे तसेच सामाजिक न्याय व विशेष सहाय्य विभागाच्या अधिकृत संकेतस्थळावर उपलब्ध आहेत.

00000

 मुख्यमंत्री सचिवालय (जनसंपर्क कक्ष)

शिक्षण, राजकारण, समाजकारण यांना जोडणारा मार्गदर्शक दुवा निखळला - मुख्यमंत्री देवेंद्र फडणवीस

ज्येष्ठ विचारवंत, माजी खासदार, माजी कुलगुरू डॉ. जनार्दन वाघमारे यांना श्रद्धांजली

मुंबई, दि. २:- विद्वत्ता, तत्वनिष्ठ आणि, लोकाभिमुखता यांचा त्रिवेणी संगम असलेल्या  माजी खासदार प्रा. डॉ. जनार्दन वाघमारे यांच्या निधनामुळे शिक्षण, राजकारण आणि समाजकारण यांना जोडणारा मार्गदर्शक असा दुवा निखळला आहे, अशी भावना व्यक्त करत मुख्यमंत्री देवेंद्र फडणवीस यांनी ज्येष्ठ विचारवंत, माजी खासदार, माजी कुलगुरू डॉ. जनार्दन वाघमारे यांना भावपूर्ण श्रद्धांजली अर्पण केली आहे.

शोकसंदेशात मुख्यमंत्री म्हणतात, प्रा. डॉ. वाघमारे यांचा इंग्रजी भाषा आणि साहित्यासह अर्थशास्त्र, राज्यशास्त्राचा गाढा अभ्यास होता. शैक्षणिक क्षेत्रात त्यांनी अध्यापन आणि प्रशासन या अंगाने मोठा ठसा उमटवला. स्वामी रामानंद तीर्थ मराठवाडा विद्यापीठाचे कुलगुरू म्हणूनही त्यांनी प्रभावी कार्य केले. विशेष म्हणजे त्यांनी लातूरचे पहिले लोकनियुक्त नगराध्यक्षपदही भुषविले. या काळात त्यांनी शहराच्या विकासासाठी लातूर व्हिजन म्हणून आराखडा तयार केला. शहरातील स्वच्छता, पाणी पुरवठा तसेच नागरी सुविधांसाठी प्रयत्न केले. त्यामुळे लातूरला तत्कालीन संत गाडगेबाबा नागरी स्वच्छता अभियानात प्रथम पुरस्कार देखील मिळाला होता. राज्यसभा सदस्य म्हणूनही त्यांनी विविध संसदीय समितीवर काम केले. लातूरचे किल्लारी भूकंपशास्त्र संशोधन आणि नांदेड - किनवटच्या आदिवासी संशोधन आणि अभ्यास केंद्रांच्या स्थापनेत त्यांचा पुढाकार होता. त्यांना संयुक्त राष्ट्र संघाच्या अधिवेशनात भारताचे प्रतिनिधी मंडळाचा सदस्य म्हणून म्हणणे मांडण्याची संधी मिळाली होती. त्यांनी वैविध्यपूर्ण विषयांवर विपुल साहित्य निर्मिती केली. त्यांची ही ग्रंथसंपदा आपल्या सर्वांसाठी एक प्रकारचे संचित आहे. ज्येष्ठ विचारवंत डॉ वाघमारे यांच्या निधनामुळे शिक्षण, राजकारण आणि समाजकारण यांना जोडणारा मार्गदर्शक असा दुवा निखळला आहे. ही सामाजिक क्षेत्राची हानी आहे. आम्ही वाघमारे कुटूबिंयाच्या दुःखात सहभागी असून, ईश्वराने त्यांना हा आघात सहन करण्याची ताकद द्यावी अशी प्रार्थना करतो असे नमूद करून मुख्यमंत्री देवेंद्र फडणवीस यांनी ज्येष्ठ विचारवंत, माजी कुलगुरू, माजी खासदार डॉ. जनार्दन वाघमारे यांना भावपूर्ण श्रद्धांजली अर्पण केली आहे.

00000

हिंद-दी-चादर श्री गुरु तेग बहादुर साहिब जी के चरणों में कोटि-कोटि नमन। प्रधानमंत्री श्री नरेंद्र मोदी जी ने बताया कि कैसे हमारे गुरुओं की सीख आज भी हमें सामाजिक एकता के सूत्र में पिरोती है।

#hinddichadar350maharashtra #navimumbai #gurutegbahadurji #ShahidiSamagam

 

“हिंद-दी-चादर” ३५० वा शहीदी समागम

मा. अमित शाह यांच्या ओजस्वी संबोधनातून गुरु साहिबांच्या शौर्य आणि धर्मनिष्ठेची उजळणी.

इतिहास आणि राष्ट्रभावना यांचा सशक्त संदेश संगतपर्यंत पोहोचला.

#ShahidiSamagam #navimumbai #gurutegbahadurji #hinddichadar350maharashtra #hinddichadar

 

प्रधानमंत्री श्री नरेंद्र मोदी जी के प्रेरक शब्दों के साथ जुड़िए "हिंद-दी-चादर" ३५०वें शहीदी समागम से।

#hinddichadar350maharashtra #navimumbai #hinddichadar #gurutegbahadurji #GuruTeghBahadur

 

 "हिंद-दी-चादर" श्री गुरु तेग बहादुर साहिब जी के 350वें शहीदी समागम के पावन अवसर पर, माननीय प्रधानमंत्री श्री नरेंद्र मोदी जी ने सामाजिक एकता और गुरुओं के त्याग पर अपने विचार साझा किए। आइए, गुरु साहिब के चरणों में नमन करें और उनके बताए एकता के मार्ग पर चलें।

#navimumbai #hinddichadar350maharashtra #gurutegbahadurji #ShahidiSamagam #hinddichadar #NarendraModi