विद्यार्थ्यांच्या सर्वांगीण विकासासाठी

नवीन अभ्यासक्रम आवश्यक - प्राचार्य पोपळे 

नांदेड दि. 5 :- विद्यार्थ्यांच्या सर्वांगीण विकासासाठी नवीन अभ्यासक्रम आवश्यक असून विद्यार्थ्यांना आधुनिक व गरजेवर आधारित शिक्षण देवून विविध प्रकल्पांच्या माध्यमातून सक्षम व दर्जेदार अभियंता निर्माण करण्याची गरज आहे, असे प्रतिपादन नांदेड शासकीय तंत्रनिकेतनचे प्राचार्य प्रकाश पोपळे यांनी केले.   

शासकीय तंत्रनिकेतन नांदेड व महाराष्ट्र राज्य तंत्रशिक्षण मंडळ विभागीय कार्यालय औरंगाबाद यांच्या संयुक्त विद्यमाने महाराष्ट्र राज्य तंत्रशिक्षण मंडळ मुंबई यांनी शैक्षणिक वर्ष 2017-18 पासून लागू केलेल्या नवीन अभ्यासक्रमाची (आयस्कीम) माहिती प्रथम वर्षाच्या संबंधित अधिव्याख्यात्यांना होण्याच्या दृष्टीकोनातून एक दिवसीय प्रशिक्षण कार्यक्रमाचे आयोजन नुकतेच शासकीय तंत्रनिकेतन नांदेड येथे पार पडले. यावेळी कार्यक्रमाच्या अध्यक्षस्थनावरुन प्राचार्य पोपळे हे बोलत होते. 

प्रशिक्षणात शासकीय तंत्रनिकेतन जिंतूर येथील प्रमुख वक्ते प्राचार्य डॉ. एच. पी. तासकर यांनी नवीन अभ्यासक्रमाबाबतची सामाजिक व तांत्रिक मानसिकता, त्याचे विविध पैलू व आवश्यकता याबाबत दृष्यश्राव्य पद्धतीने विश्लेषन केले. हिंगोली येथील शासकीय तंत्रनिकेतनचे यंत्र अभियांत्रिकीचे विभाग प्रमुख डॉ. एस. एच. काद्री यांनी नवीन अभ्याक्रमाबाबत आपले विचार मांडले.

प्रास्ताविकात शैक्षणिक समन्वय प्रा. सुहास कुलकर्णी यांनी नवीन अभ्यासक्रमाच्या अंमलबजावणीत  शिक्षकांच्या योगदानाचे महत्व विषद केले. प्रशिक्षणास नांदेड, परभणी व हिंगोली जिल्हयातील शासकीय व खाजगी तंत्रनिकेतन येथील 77 अधिव्याख्यात्यांनी सहभाग नोंदवला.

सुत्रसंचालन डॉ. संतोष चौधरी यांनी केले. कार्यक्रमाच्या यशस्वीतेसाठी प्रा. सुहास कुलकर्णी, डॉ. संतोष चौधरी, प्रा. संतोष मुधोळकर, सुकुमार कासार, गणेश नंदे, श्री.कासारपेठकर, श्री. सोनवणे, श्री. राहुल पोहरे,श्री. हुरदुके,श्री. बोडावार, श्री. झडते यांनी संयोजन केले.

000000