पशुसंवर्धनच्या राज्यस्तरीय नाविन्यपूर्ण

 योजनेंतर्गत अर्ज करण्याचे आवाहन

नांदेड , दि. 5 :- जिल्हा पशुसंवर्धन उपआयुक्त कार्यालयाकडून सन 2017-18 मध्ये राबविण्यात येणाऱ्या राज्यस्तरीय नाविन्यपुर्ण योजनेंतर्गत दुधाळ संकरीत गाई, म्हशी, शेळी, मेंढी वाटप व कुक्कुटपालन व्यवसाय सुरु करण्यासाठी सोमवार 10 जुलै ते बुधवार 9 ऑगस्ट 2017 या कालावधीत सर्वसाधारण व अनुसुचित जाती, अनुसुचित जमाती योजनेस पात्र लाभार्थ्यांकडून अर्ज मागविण्यात येत आहेत.  

विहित नमुन्यातील अर्ज आवश्यक त्या कागदपत्रासह जवळच्या पशुवैद्यकीय संस्थेमार्फत पशुधन विकास अधिकारी (विस्तार) पंचायत समिती, पशुवैद्यकीय दवाखाना श्रेणी- 1 संबंधीत तालुका यांचेकडे बुधवार 9 ऑगस्ट 2017 पर्यंत सादर करावीत. अधिक माहितीसाठी संबंधीत पशुवैद्यकीय दवाखान्याशी संपर्क साधावा, असे आवाहन जिल्हा पशुसंवर्धन उपआयुक्त नांदेड यांनी केले आहे.  

दुधाळ संकरीत गाई, म्हशीचे वाटप करणे : महिला बचतगट, अल्पभुधारक एक हेक्टर ते दोन हेक्टर पर्यंत,  रोजगार व स्वयंरोजगार केंद्रात नोंद असलेले सुशिक्षित बेरोजगार, लाभार्थ्यांनाच या योजनेसाठी प्राधान्य राहील. यापुर्वी अर्ज केलेले परंतु त्याची निवड व प्रतीक्षा यादीमधून संधी उपलब्ध न झालेले पात्र लाभार्थी देखील विचारात घेतले जातील. सर्वसाधारण प्रवर्गासाठी 50 टक्के शासकीय अनुदान, अनुसुचित जातीचे लाभार्थ्यांना 75 टक्के शासकीय अनुदान राहील.

अंशत: ठाणबंद पद्धतीने संगोपन करण्यासाठी दहा शेळ्या, मेंढ्या व एक बोकड, नर मेंढा याप्रमाणे लाभार्थ्यांना शेळी / मेंढी गट वाटप करणे : दारिद्रय रेषेखालील, अत्यल्प भुधारक शेतकरी एक हेक्टर पर्यंत.  अल्पभुधारक शेतकरी एक ते दोन हेक्टर पर्यंत,  रोजगार व स्वयंरोजगार केंद्रात नोंद असलेले सुशिक्षित बेरोजगार, महिला बचतगटातील लाभार्थी या योजनेसाठी प्राधान्य राहील. यापुर्वी दारिद्रयरेषेखालील अर्ज केलेले परंतु त्याची निवड व प्रतीक्षा यादीमधून संधी उपलब्ध न झालेले पात्र दारिद्रयरेषेखालील लाभार्थी देखील विचारात घेतले जातील. सर्वसाधारण प्रवर्गासाठी 50 टक्के शासकीय अनुदान, अनुसुचित जाती / जमातीचे लाभार्थ्यांना 75 टक्के शासकीय अनुदान राहील.  

एक हजार मांसल कुक्कुट पक्षी संगोपनाद्वारे कुक्कुटपालन व्यवसाय सुरु करणे : अत्यल्प भुधारक शेतकरी एक हेक्टर पर्यंत, अल्प भुधारक शेतकरी एक ते दोन हेक्टर पर्यंत,  रोजगार व स्वयंरोजगार केंद्रात नोंद असलेले सुशिक्षित बेरोजगार, महिला बचत गटातील लाभार्थी यांना या योजनेसाठी प्राधान्य राहील. सर्वसाधारण प्रवर्गासाठी 50 टक्के शासकीय अनुदान, अनुसुचित जाती / जमातीचे लाभार्थ्यांना 75 टक्के शासकीय अनुदान राहील.

000000