मागेल त्याला शेततळे योजनेची

टंचाई काळात शेतकऱ्यांना झाली मदत

योजनेत सहभागी व्हावे - जिल्हा अधिक्षक कृषि अधिकारी चलवदे

     

नांदेड दि. 31 :- “मागेल त्याला शेततळे” ही योजना राज्याचे मुख्यमंत्री देवेंद्र फडणवीस यांची महत्वकांक्षी योजना असून शासन निर्णय  17 फेब्रुवारी 2016 नुसार नांदेड जिल्हयात ही योजना सुरु करण्यात आली आहे. इच्छुक शेतकऱ्यांनी “मागेल त्याला शेततळे” या योजनेत मोठया प्रमाणात सहभागी व्हावे, असे आवाहन नांदेडचे जिल्हा अधिक्षक कृषि अधिकारी आर. बी. चलवदे यांनी केले आहे.

या योजनेत शेतकऱ्यांचे विहित नमुन्यातील अर्ज तथा संमती अनिवार्य असून शेतकऱ्यांनी त्यांची मागणी ऑनलाईन संगणकीय प्रणालीद्वारे भरावयाची आहे. यासाठी करावयाचे अर्ज https://aaplesarkar.maharashtra.gov.in या संकेतस्थळावर उपलब्ध करुन देण्यात आलेे आहेत.

जिल्ह्यात वार्षीक पाऊसाचे सरासरी प्रमाणे 955 मि.मि. इतके असून पावसाच्या अनियमिततेमुळे शेती करताना अडचणी, घटणारे पिकांचे उत्पादन तसेच दुष्काळावर कायमस्वरुपी मात करण्यासाठी  “मागेल त्याला शेततळे” योजना ही लाभदायक ठरत आहे. या शेततळयांमुळे पावसाच्या पाण्याचा उपयोग संरक्षित सिंचन, फलोत्पादन व पुरक कृषि उद्योगासाठी (मत्स्योत्पादन) होतो. शेततळे कार्यक्रमाचा विविध विस्तार योजनांशी सांगड घालून संरक्षित सिंचनामुळे पिकाचे उत्पादनात वाढ होते.

नांदेड जिल्ह्यास 4 हजार शेततळयाचे लक्षांक देण्यात आले असून आज आखेरीस 2 हजार 44 शेतकऱ्यांनी शेततळे या योजनेचा लाभ घेऊन त्यांच्या उत्पन्नात भरीव वाढ झाली आहे.

            देगलूर तालुक्यातील रामपुर प.शहापुर येथील विजय पुताजी कोकणे या शेतकऱ्याने मे 2018 मध्ये शेततळयाचा लाभ घेतला. खरीप हंगामामध्ये या शेतकऱ्याने 5 हेक्टर क्षेत्रावर सोयाबीन पिक घेतले असून जुलै, ऑगस्टमध्ये पडलेल्या 20 ते 25 दिवस पावसाच्या खंड कालावधीत शेततळयातून सोयाबीन पिकास एक संरक्षीत सिंचन देण्यात आले. त्यामुळे त्यांच्या उत्पन्नातील घट थांबवता आली. या शेतकऱ्यांने  त्यांच्या उत्पन्नात 15 ते 20 टक्के वाढ झाल्याचे सांगितले. तसेच शेततळयाला लागुन असलेल्या बोअरवेलच्या पाणी पातळीतही वाढ झाल्याचे श्री. कोकणे यांनी सांगितले.

या योजनेतर्गत विविध आकारमानाच्या शेततळयांपैकी कोणत्याही एका आकारमानाच्या शेततळयाची मागणी करता येते. यात जास्तीतजास्त 30 बाय 30 बाय 3 मीटर या आकारमानाचे व कमीतकमी इनलेट आऊटलेटसह प्रकारामध्ये किमान 15 बाय 15 बाय 3 मीटर या आकारमानाचे शेततळे घेता येते. इनलेट आऊटलेट विरहीत प्रकारात किमान 20 बाय 15 बाय 3 मीटर आकारमानाचे शेततळे घेता येते. आकारमानानुसार कमाल अनुदान 50 हजार रुपये इतके असून अनुदानाची रक्कम काम पूर्ण झाल्यावर थेट शेतकऱ्यांच्या बँक खात्यावर जमा करण्यात येते. अधिक माहितीसाठी संबंधीत तालुका कृषि अधिकारी कार्यालयाशी संपर्क साधावा, असेही आवाहन जिल्हा अधिक्षक कृषि अधिकारी नांदेड यांनी केले आहे.

00000

सातारा अखिल भारतीय सैनिकी स्कूलमध्ये

इयत्ता सहावी प्रवेशासाठी पुनर्परिक्षा पेपर

        नांदेड दि. 31 :-  अखिल भारतीय सैनिक स्कूल प्रवेश परीक्षेसाठी 6 जानेवारी रोजी घेण्यात आलेला इयत्ता 6 वीचा पेपर पहिला हा प्रशासकीय कारणास्तव रद्द करण्यात आला आहे. ही परीक्षा रविवार 24 फेब्रुवारी 2019 रोजी घेण्यात येणार आहे.

            या परीक्षेसाठी जे विद्यार्थी 6 जानेवारी रोजी उपस्थित होते अशा विद्यार्थ्यांनाच ही परीक्षा देता येईल. या पुनर्परिक्षेसाठी परीक्षा प्रवेशपत्र शाळेकडून उपलब्ध करुन दिली जातील. पुर्वी 6 जानेवारी रोजीच्या परीक्षेचे प्रवेशपत्र स्विकारले जाणार नाही. तसेच पुनर्परिक्षेचे प्रवेशपत्र www.sainikschooladmission.in या संकेतस्थाळावरुन शुक्रवार 8 फेब्रुवारी 2019 पासून डाऊनलोड करता येतील. जे विद्यार्थी रविवार 24 फेब्रुवारी रोजी पुनर्परिक्षेला उपस्थित राहणार नाहीत त्या विद्यार्थ्यांना शैक्षणिक वर्ष 2019-20 च्या प्रवेशासाठी अपात्र ठरविण्यात येईल. याची संबंधितांनी नोंद घ्यावी, असे आवाहन सातारा सैनिक स्कूलचे प्राचार्य यांनी केले आहे.  

000000

दहावी परीक्षेसाठी कलचाचणी,

अभिक्षता चाचणीसाठी मुदतवाढ  

        नांदेड दि. 31 :-  माध्यमिक शालांत प्रमाणपत्र परीक्षा मार्च 2019 इयत्ता दहावीच्या विद्यार्थ्यांची कलचाचणी व अभिक्षमता चाचणी मोबाईल ॲपद्वारे आयोजित करण्यासाठी प्रस्ताव सादर करण्यास मंगळवार 5 फेब्रुवारी 2019 पर्यंत मुदतवाढ देण्यात आली आहे.

            ही चाचणी नियोजनाप्रमाणे 18 डिसेंबर 2018 ते 20 जानेवारी 2019 या कालावधीत घेण्यात आली होती. परंतू काही विद्यार्थ्यांची चाचणी घेण्यात न आल्याने तसेच नव्याने मान्यता मिळालेल्या शाळांसाठी वेळेची मर्यादा वाढविण्याबाबत कलचाचणी व अभिक्षमता चाचणीसाठी 5 फेब्रुवारी पर्यंत ही मुदतवाढ देण्यात आली आहे. याची शाळांचे मुख्याध्यापक, शिक्षक, विद्यार्थी, पालक संबंधीतांनी नोंद घ्यावी, असे आवाहन लातूर विभागीय शिक्षण मंडळाचे विभागीय सचिव यांनी केले आहे.

000000

हमीभावाने तूर खरेदीची नोंदणी सुरु

        नांदेड दि. 31 :- केंद्र शासनाच्या किमान आधारभूत खरेदी योजनेंतर्गत नाफेडच्यावतीने हंगाम 2018-19 मध्ये हमीभावाने तूर खरेदी करण्यासाठी नांदेड जिल्ह्यातील नांदेड, मुखेड, देगलूर या तीन ठिकाणी नोंदणी सुरु करण्यात आली आहे.

            नांदेड जिल्हा फळे व भाजीपाला सहकारी संस्था- कृषी उत्पन्न बाजार समिती संगणक विभाग नवा मोंढा नांदेड, मुखेड तालुका खरेदी विक्री संघ यांचे कार्यालय मुखेड, पूर्वारेश्वर ॲग्रो प्रोइयूस कं. लि. करडखेड देगलूर- आर्य समाज मंदिर रोड जुन्या तहसीलजवळ देगलूर येथे तूर खरेदी नोंदणी सुरु आहे.  शेतकऱ्यांनी तूर नोंदणीसाठी येताना सोबत ऑनलाईन पीकपेरा नोंद असलेला सात/बारा, आधारकार्ड झेरॉक्स, आधार लिंक असलेल्या बँक पासबूकची झेरॉक्स प्रत सोबत आणावी, असे आवाहन जिल्हा मार्केटिंग अधिकारी रामप्रसाद दाड यांनी केले आहे.

0000

      सोमवारी लोकशाही दिन

नांदेड दि. 31 :- जिल्‍हा प्रशासनाच्‍यावतीने महिन्‍याचा पहिला सोमवार म्‍हणून लोकशाही दिननसोमवार 4 फेब्रुवारी 2019 रोजी बचत भवन जिल्‍हाधिकारी कार्यालय,परिसर नांदेड येथे लोकशाही दिन दुपारी 1 ते 3 वाजेपर्यंत आयोजीत केला आहे.

यादिवशी महसूल, जिल्‍हा पोलीस अधिक्षक, मुख्‍य कार्यकारी अधिकारी, जिल्‍हा परिषद, नांदेड पाटबंधारे विभाग, सार्वजनिक बांधकाम विभाग, परिवहन, सहकार, कृषी विभागाचे जिल्‍हा स्‍तरावरील प्रमुख अधिकारी व जिल्‍हा पाणी पुरवठा समन्‍वय अधिकारी व ज्‍या कार्यालयाकडे लोकशाही दिनातील प्रलंबित प्रकरणे आहेत असे अधिकारी जिल्‍हाधिकारी कार्यालय परिसरातील बचत भवन येथे उपस्थित राहतील. निवेदनाच्‍या नोंदणीला सुरुवात दुपारी 12 वाजेपासून होणार आहे. त्‍यानंतर लगेचच प्राप्‍त झालेल्‍या अर्जावर / निवेदनावर म्‍हणणे ऐकुण घेण्‍याच्‍या कामास सुरुवात करण्‍यात येईल.

लोकशाही दिनामध्‍ये अर्ज स्विकारण्‍याचे व न स्विकारण्‍याचे निकष पुढील प्रमाणे आहेत. अर्ज विहित नमुन्‍यात असावा (नमुना प्रपत्र 1 ते 1 डड), तक्रार / निवेदन वैयक्‍तीक स्‍वरूपाची असावी, अर्जदाराचे विहित नमुन्‍यात 15 दिवस अगोदर दोन प्रतिमध्‍ये जिल्‍हाधिकारी कार्यालय नांदेड येथे पाठविणे आवश्‍यक आहे. तालुकास्‍तरावर अर्ज दिल्‍यानंतर 1 महिन्‍यानंतर जिल्‍हाधिकारी कार्यालय नांदेड येथे अर्ज करता येईल. अर्ज न स्विकारण्याचे निकषात न्‍याय प्रविष्‍ठ प्रकरणे राजस्‍व / अपिल्‍स सेवाविषयक, अस्‍थापना विषयक बाबींचा समावेश असलेली. विहित नमुन्‍यात नसलेले अर्ज, अंतिम उत्‍तर दिलेले आहे, देण्‍यात येणार आहे, तक्रार निवेदने वैक्‍तीक स्‍वरूपाची नसेल तर असे अर्ज स्विकारण्‍यात येणार नाहीत.

या दिवशी प्राप्‍त होणाऱ्या जनतेच्‍या तक्रारी, अडचणी एकत्रीतरीत्‍या समजून घेऊन त्‍या शक्‍य तीतक्‍या लवकरात लवकर सोडण्‍यात येतील. ज्‍या प्रकरणात कालावधी लागणार आहे. अशा प्रकरणाची पुढील महिण्‍याच्‍या होणाऱ्या लोकशाही दिनात मागील अर्जावर कार्यवाहीची माहिती देण्‍यात येईल, असे जिल्‍हाधिकारी नांदेड यांनी कळविले आहे.  

000000

संकटग्रस्त महिलांसाठी निवारा केंद्रातील

कामकाजासाठी अर्ज करण्याचे आवाहन

 नांदेड दि. 31 :- संकटग्रस्त महिलांसाठी निवारा केंद्राचे दैनंदिन कामकाज  हाताळण्यासाठी पात्रताधारक स्वयंसेवी संस्थेकडून प्रस्ताव मागविण्यात येत असून इच्छूकांना विहीत नमुन्यातील अर्ज 5 फेब्रुवारी 2019 पर्यंत जिल्हा महिला बालविकास अधिकारी कार्यालय गणेशकृपा शास्त्रीनगर (भाग्यनगर जवळ) नांदेड येथे उपलब्ध राहील, असे आवाहन जिल्हा महिला बालविकास अधिकारी नांदेड यांनी केले आहे.

नांदेड जिल्ह्यातील नमुद मान्यताप्राप्त स्वयंसेवी संस्थांकडून 10 फेब्रुवारी 2019 अखेर अर्ज मागविण्यात येत आहेत. जिल्हा महिला बालविकास कार्यालयाचे प्रमाणित केलेल्या अर्जाच्या प्रतींचा निवड प्रक्रीयेदरम्यान विचारात घेतल्या जाणार आहेत. केंद्र शासनाच्या महिला व बालविकास विभागाकडून नांदेड जिल्ह्यासाठी संकटग्रस्त महिलांसाठी निवारा केंद्र मंजूर करण्यात आले आहे. हे केंद्र तात्पुरत्या स्वरुपात लाल बहादुर शास्त्रीनगर नांदेड येथे नारायण कामाजी गोरे यांची इमारत रविदास निवास येथे जिल्ह्यातील संकटग्रस्त महिलांना  वैद्यकीय सुविधा, पोलीस मदत, समुपदेशन व कायदेशिर मदत इत्यादी तातडीने उपलब्ध होईल यासाठी कार्यान्वीत करण्यात आले आहे.

या केंद्राचे दैनंदिन कामकाज प्रभावीपणे चालविण्यासाठी केंद्र शासनाने निर्गमित केलेल्या संकटग्रस्त महिलांसाठी निवारा केंद्राच्या  मार्गदर्शक सुचनेप्रमाणे, पात्रताधारक एजन्सीची निवड करावयाची आहे. योजनेच्या मार्गदर्शक सुचनेमध्ये नमुद केल्यानुसार नांदेड जिल्ह्यातील महिलांविषयक कायदे व योजनांवर काम करणाऱ्या स्वयंसेवी संस्था, महिलांवर होणाऱ्या हिंसाचाराच्या विरोधात कार्यरत असणारी स्वयंसेवी संस्था, अशा स्वयंसेवी संस्थांमधून पात्रताधारक संस्थेची निवड करण्यात येणार आहे, असे प्रसिद्धी पत्रकात नमूद केले आहे.  

000000

लोकशाही पंधरवाडा निमित्त

जनजागृती रॅली उत्साहात संपन्न 

नांदेड दि. 30 :- लोकशाही पंधरवाडा निमित्त लोकशाही, निवडणूक व सुशासन ही संकल्‍पना जनमाणसात रुजवून मतदारांचा निवडणूक प्रक्रियेत सहभाग, मतदार यादीत नावाची खात्री, मतदानाची टक्‍केवारी वाढविणे,  विद्यापीठ व महाविद्यालयाच्या प्रथम वर्षात सर्व विषयांसाठी ‘लोकशाही, निवडणूक व सुशासन” हा विषय अनिवार्य करणे आदीबाबत जनजागृती करण्यासाठी महात्मा फुले पुतळा आयटीआय नांदेड परिसरातून रॅली उत्साहात काढण्‍यात आली होती.

या रॅलीची सुरुवात जिल्‍हाधिकारी अरुण डोंगरे यांच्‍या मार्गदर्शानाखाली अप्‍पर जिल्‍हाधिकारी खुशालसिंह परदेशी यांनी हिरवी झेंडी दाखवून केली. रॅलीत पिपल्‍स कॉलेज, यशवंत महाविद्यालय व सायन्‍स कॉलेज नांदेड या तीन कॉलेजचे एनएसएस व छात्रसेनेचे विद्यार्थी सहभागी झाले होते. रॅलीची महात्मा फुले पुतळा येथुन शिवाजीनगर, कलामंदिर, वजीराबाद मार्गे जिल्‍हाधिकारी कार्यालय बचत भवन येथे रॅलीचा समारोप झाला.

यावेळी उपजिल्‍हाधिकारी (सामान्‍य) अनुराधा ढालकरी यांनी मार्गदर्शन करतांना म्हणाल्या,     स्‍थानिक स्‍वराज्‍य संस्‍थेच्‍या निवडणूकीत केलेल्‍या सुधारणांची माहिती देणे हा पंधरवाडा साजरा करण्‍याचा उद्देश आहे. निवडणुकामध्‍ये आता अधिकाधिक आधुनिक तंत्रज्ञानाचा वापर करण्‍यात येत आहे. उमेदवाराला नामनिर्देशनपत्रासोबत शपथपत्र व उत्‍पन्नाचा गोषवारा देणे, उमेदवाराच्‍या गुन्‍हेगारी पार्श्‍वभुमीची माहिती मतदान केंद्राच्‍या बाहेर मतदारांच्‍या माहितीसाठी उपलब्‍ध करुन देणे अनिवार्य केले आहे. तसेच नोटाला सर्वाधिक मते पडल्‍यास अशा ठिकाणी फेर निवडणूक घेण्याबाबत आयोगाचे आदेश आहेत. तसेच सर्व स्‍थानिक स्‍वराज्‍य स्‍वंस्‍थेस या पंधरवाडात किमान 10 होर्डींग, बॅनर लावणेच्‍या सुचना निवडणूक आयोगाने दिल्या आहेत.

स्‍थानिक केबल व आकाशवाणीवर लोकशाही, निवडणुक व सुशासनाच्‍या जिंगल्‍स प्रसारित करण्‍यात येत आहेत तसेच चर्चासत्रे आयोजित करण्‍यात येत आहेत. महिला मतदारांची नावे नोंदणी वाढविणे तसेच ग्रामीण भागात निवडणुकीचे महत्‍व पटवुन देण्यासाठी चुनाव पाठशालाचे आयोजन करावे, असे निर्देश राज्‍य निवडणुक आयोगाचे आयुक्‍त यांनी दिले आहेत. त्‍यानुसार जिल्‍हास्‍तरावर उपजिल्‍हाधिकारी (सामान्‍य), मनपा स्‍तरावर उपायुक्‍त, जिल्‍हा परिषद स्‍तरावर उप मुख्‍य कार्यकारी अधिकारी (पंचायत), तालुका स्‍तरावर सर्व संबधीत तहसिलदार यांना नोंडल अधिकारी म्‍हणुन नियुक्‍त करण्‍यात आले आहे. त्‍यांना सहाय्यक गटविकास अधिकारी व मुख्‍याधिकारी यांची नियुक्‍ती करण्‍यात आली आहे. विद्यापीठाचे नोंडल अधिकारी म्‍हणून प्रा. डॉ. ए.एन. सिध्‍देवाड यांची नियुक्‍ती करण्‍यात आली आहे. त्‍यांच्‍यामार्फत काही महाविद्यालयाच्‍या विद्यार्थ्‍यांना स्‍थानिक स्‍वराज्‍य संस्‍थामध्‍ये नेऊन तेथील कामकाज व निवडणुक प्रक्रियेविषयी माहिती देण्‍यात येणार आहे. या पंधरवाड्यात जिल्‍हातील सर्व महाविद्यालयात निबंध स्‍पर्धा, वाद-विवाद स्‍पर्धा, चित्रकला स्‍पर्धाचे आयोजन करण्‍याच्‍या सुचना सर्व तहसिलदार व कुलसचिव स्‍वामी रामानंद तिर्थ विद्यापीठ यांना देण्‍यात आल्‍या आहेत, अशी माहिती यावेळी देण्यात आली.   

प्रा. डॉ. सिध्‍देवाड यांनी राज्‍य निवडणुक आयोगाच्‍या सुचनेनुसार लोकशाहीचे मुल्‍ये कशी रुजवायची, लोकशाहीचे महत्‍व तसेच मतदानाचा अधिकाराचा उपयोग याबाबत तसेच राज्‍य निवडणूक आयोग याची माहिती दिली. शेवटी तहसिलदार अरविंद नरसिकर यांनी आभार मानले.  

0000

रस्ता सुरक्षा अभियानात

चित्रकला, निबंध स्पर्धेचे आयोजन

नांदेड दि. 30 :- रस्ता सुरक्षा अभियान 2019 च्या निमित्ताने प्रादेशिक परिवहन कार्यालयाच्यावतीने जिल्हयातील शालेय विद्यार्थ्यांसाठी चित्रकला व निबंध स्पर्धेचे आयोजन करण्यात आले आहे. ही स्पर्धा नांदेड जिल्हयातील सर्व शालेय विद्यार्थ्यांसाठी खुली असून स्पर्धेतील विजेत्यांना पारितोषिक दिले जाणार आहे. जिल्हयातील सर्व शालेय विद्यार्थ्यांनी या स्पर्धेत सहभागी घ्यावा, असे आवाहन उपप्रादेशिक परिवहन अधिकारी नांदेड यांनी केले आहे.

स्पर्धेसाठी गट व विषय पुढील प्रमाणे राहतील. चित्रकला स्पर्धा :  छोटा गट इयत्ता 1 ते 4 पर्यत- रहदारीचे नियम पाळा, अपघात टाळा. मध्यम गट इयत्ता 5 ते 8 पर्यत- सुरक्षित वाहतूक. वरिष्ठ गट इयत्ता 9 ते 12 पर्यत- आदर्श वाहतूक व्यवस्था.  निबंध स्पर्धा : मध्यम गट इयत्ता 5 ते 8 पर्यंत- रस्ते सुरक्षा हे घोषवाक्य नसून ती जीवनशैली आहे. मोठा गट इयत्ता 9 ते 12 पर्यत- अपघातमुक्त समाजासाठी आपले योगदान हा विषय राहिल. 

या स्पर्धेच्या अटी व शर्ती पुढील प्रमाणे आहेत निबंध व चित्रकला स्पर्धेतील इच्छूक स्पर्धेकांनी त्यांना दिलेल्या विषयावरील आपला निबंध व चित्र संबंधीत शाळेच्या मुख्याध्यापक / प्राचार्य यांचेकडे जमा करावयाचे आहेत. संबंधीत शाळांनी आपल्या शाळेतून एका गटासाठी तीन सर्वोत्कृष्ट निबंधाची व चित्रकला स्पर्धेसाठी 5 सर्वोत्कृष्ट चित्रांची निवड करुन निबंध व चित्र प्रादेशिक परिवहन कार्यालय, एमआयडीसी सिडको नांदेड येथे खिडकी क्र. 5 वर सोमवार 11 फेब्रुवारी 2019 पर्यत  कार्यालयीन वेळेत व कार्यालयीन कामकाजाच्या दिवशी जमा करावेत.

या स्पर्धेच्या अधिक माहितीसाठी या कार्यालयातील दुरध्वनी क्र. (02462) 259900 व वरिष्ठ लिपीक गाजुलवाड यांचा मोबाईल क्र.7875422228 वर संपर्क करावा. निबंध व चित्रकला स्पर्धेमध्ये जास्तीत विद्यार्थ्यानी सहभाग नोंदवावा, असे आवाहन  उप प्रादेशिक परिवहन अधिकारी नांदेड यांनी केले आहे.

0000