उच्चरक्तदाब, मधुमेह शिबिरात

367 व्यक्तींची तपासणी

नांदेड,दि. 28 :- जागतिक उच्चरक्तदाब दिन व सप्ताह 17 ते 24 मे 2018 या कालावधीत संपन्न झाला. त्याअनुषंगाने श्री गुरुगोबिंद सिंघजी स्मारक जिल्हा रुग्णालयाच्यावतीने जिल्हा शल्य चिकित्सक डॉ. बी. पी. कदम व अतिरिक्त जिल्हा शल्य चिकित्सक डॉ. एच.आर. गुंटूरकर यांच्या मार्गदर्शनाखाली 30 वर्ष वायोगटावरील 367 व्यक्तींचे उच्च रक्तदाब व मधुमेहाची तपासणी करण्यात आली.

त्यात जिल्हाधिकारी कार्यालय, मनपा, राज्यकर सहआयुक्त कार्यालय, सहाय्यक आयुक्त (अन्न व औषध प्रशासन) कार्यालय, एम्प्लॉयमेंट ऑफिस, रेल्वे स्टेशन नांदेड, वजिराबाद पोलीस स्टेशन तसेच मध्यवर्ती बस स्थानक नांदेड येथील अधिकारी व कर्मचारी यांचा समावेश आहे. या शिबिरास जिल्हा रुग्णालय येथील वैद्यकीय अधिकारी डॉ. अनुप्रिया गहेरवार, डॉ. प्रदीप बोरसे, डॉ. साईप्रसाद शिंदे, समुपदेशक सुवर्णकार सदाशिव, प्रयोगशाळा तंत्रज्ञ संतोष बेटकर, अधिपरिचारिका वर्षा सोळंके, रावणवेणी राधिका उपस्थित होते. या शिबिरास जिल्हा कार्यक्रम अधिकारी डॉ. दिपक हजारी यांचे सहकार्य मिळाले.

000000

सहकार क्षेत्रात निस्वार्थ भावनेने व प्रामणिकपणे, जिद्द व चिकाटीने सेवा करणे आवश्यक

--- विधान परिषदेचे अध्यक्ष हरिभाऊ बागडे

 

नांदेड,दि.26:-  सहकार क्षेत्रात निस्वार्थ भावनेने व प्रामाणिकपणे, जिद्द व चिकाटीने सेवा केल्यास सहकार क्षेत्र अधिक सक्षम होईल, असे प्रतिपादन महाराष्ट्र राज्याचे विधानसभा अध्यक्ष हरिभाऊ बागडे यांनी कुंडलवाडी येथे दि भाग्यलक्ष्मी महिला सहकारी बँकेच्या 22 व्या शाखेचे उद्घाटन प्रसंगी ते बोलत होते.  

यावेळी कार्यक्रमाच्या अध्यक्षस्थानी बँकेच्या अध्यक्षा श्रीमती शैलेजाताई इनामदार तर प्रमुख पाहुणे म्हणून आमदार सुभाष साबणे , भाजपाचे जिल्हा अध्यक्ष राम पाटील -रातोळीकर , माजी आमदार गंगाराम ठक्करवाड, जिल्हा परिषदेचे सदस्य लक्ष्मण ठक्करवाड , प्रमोद देशमुख , मनोहर देशपांडे, नगरसेवक पंढरीनाथ दाचावार, राजू गंदीगुडे, आदि. मान्यवरांची या कार्यक्रमास उपस्थिती होती.  

या कार्यक्रमाच्या उद्घाटनप्रसंगी विधान परिषदेचे अध्यक्ष हरिभाऊ बागडे म्हणाले की, आपल्या देशातील लोकांच्या अंगी सहकार हा गुण असल्याने , ही एक आपली चांगली संस्कृती आहे. दि भाग्यलक्ष्मी महिला सहकारी बँकेसारख्या अनेक सहकारी बँका आजही कार्यक्षमपणे काम करीत आहेत. सहकारी बँकांनी कर्ज देतांना कांही महत्वाची पथ्य पाळावीत. तसेच कर्ज देणे जेवढे सोयीचे केले आहे, तवढेच वसूल करणेही अवघड असल्याचेही त्यांनी यावेळी सांगितले.

तसेच कर्जदारांना कर्ज देतांना कर्जदारांची पात्रता पाहूनच बँकानी कर्जाचे वितरण केले पाहिजे , असा सल्लाही विधान परिषदेचे अध्यक्ष हरिभाऊ बागडे यांनी दि भाग्यलक्ष्मी महिला सहकारी बँकेच्या संचालक मंडळास दिला. या उद्घाटन समारंभास शहर व परिसरातील शेतकरी, व्यापारी, प्रतिष्ठित नागरिक बहुसंख्येने उपस्थिती होती.  

या कार्यक्रमाची सुरुवात भारतमातेचे पुजन करुन करण्यात आले. त्यानंतर बँकेच्या अध्यक्षा सौ. शैलेजाताई इनामदार यांनी प्रास्ताविक करुन बँकेकडून गोळवलकर सहकारी रुग्णालयास 4 लाख 51 हजार रुपयांची धनादेशाद्वारे देणगी म्हणून सुधीर कोकणे यांच्याकडे सुपूर्द करण्यात आली. तसचे या कार्यक्रमाचे सुत्रसंचालन कल्याण गायकवाड यांनी केले तर उपस्थितांचे आभार प्रा. आनंद इनामदार यांनी मानले.

****

पीक कर्जमाफीचे अर्ज करण्यास 5 जून

तर समझोता योजनेसाठी 30 जूनची मुदतवाढ  

वंचित शेतकऱ्यांना ऑनलाईन अर्ज करण्याचे आवाहन 

नांदेड, दि. 25 :- छत्रपती शिवाजी महाराज शेतकरी सन्मान योजनेंतर्गत यापुर्वी विहित कालावधीत अर्ज करण्यापासून वंचित राहिलेल्या शेतकऱ्यांसाठी ऑनलाईन अर्ज करण्याची सुविधा मंगळवार 5 जून 2018 पर्यंत उपलब्ध करुन दिली आहे. एक लाख 50 हजारापेक्षा जास्त थकीत कर्ज असणाऱ्या शेतक-यांना एकरकमी समझोता योजनेत 1 लाख 50 हजार रुपयापेक्षा अधिकची रक्कम बॅंकेत जमा करण्यासाठी शनिवार 30 जून 2018 पर्यंत मुदतवाढ देण्यात आली आहे.

तसेच दि. 1 एप्रिल 2001 ते 31 मार्च 2009 पर्यत उचल केलेल्या पीक, इमुपालन, शेडनेट, पॉली हाऊसाठी मध्यम मुदत कर्ज 30 जून 2016 रोजी थकीत असलेल्या शेतकऱ्यांना या योजनेचा लाभ मिळणार आहे. 1 मार्च 2018 रोजी पासून केलेल्या अर्जात नवीन माहिती समाविष्टासाठी शेतकऱ्यांनी “आपले सरकार” सेवा केंद्रावर किंवा https://csmssy.mahaonline.gov.in या पोर्टलवर स्वत: नोंदणी करुन युजर आयडी व पासवर्डच्या आधारे ऑनलाईन अर्ज सादर करावीत, असे आवाहन जिल्हा उपनिबंधक सहकारी संस्था, नांदेड यांनी केले आहे.  

छत्रपती शिवाजी महाराज शेतकरी सन्मान योजनेत ज्या शेतकऱ्यांना सन 2008 व 2009 मध्ये केंद्र व राज्य शासनाव्दारे कर्जमाफीचा लाभ मिळाला आहे, असे शेतकरी वगळून 1 एप्रिल 2001 ते  31 मार्च 2009 मधील कर्जदार शेतक-यांना या योजनेचा लाभ देण्यात येणार आहे. सहकार, पणन व वस्त्रोद्योग विभागाचा दि. 9 व 21 मे 2018  रोजीच्या शासन निर्णयाद्वारे या योजनेची व्याप्ती वाढवली आहे.

ज्या शेतक-यांनी 22 सप्टेंबर 2017 पूर्वी किंवा 1 मार्च 2018 पासून आता पर्यत ऑनलाईन पध्दतीने कोणताही अर्ज सादर केला नाही त्यांनी ऑनलाईन अर्ज भरावीत. कर्जमाफी योजनेचा लाभ मिळालेला आहे त्यांना नव्याने कर्जाची आवश्यकता असल्यास त्यांनी संबंधित बॅंकेकडे कर्ज मागणी करावी व ज्यांना कर्ज मिळण्याबाबत अडचणी आहेत त्यांनी संबंधित तालुका उपनिबंधक, सहायक निबंधक, सहकारी संस्था कार्यालयाशी संपर्क साधावा, असेही आवाहन जिल्हा उपनिबंधक, सहकारी संस्था, नांदेड यांनी केले आहे.

000000

शेतकऱ्यांनी योजनेचा लाभ घ्यावा

तुषार संच बसविण्यासाठी  

ऑनलाईन नोंदणी सुरु

नांदेड दि. 25 :- प्रधानमंत्री कृषि सिंचाई योजनेअंतर्गत केंद्र पुरस्कृत सुक्ष्म सिंचन योजना सन 2018-19 साठी ई-ठिबक आज्ञावलीवर ठिबक / तुषार संच बसविण्यासाठी शेतक-यांची ऑनलाईन नोंदणी चालु झाली आहे. लाभार्थी आणि अर्ज नोंदणी करताना अर्जदारांनी अचुकपणे नोंद करावी. या योजनेचा शेतक-यांनी जास्तीत जास्त लाभ घ्यावा, असे आवाहन जिल्हा अधीक्षक कृषि अधिकारी नांदेड यांनी केले आहे.  

ज्या शेतक-यांना ठिबक / तुषार संच बसवून अनुदानाचा लाभ घ्यावयाचा आहे त्यांनी ई-ठिबक www.mahaagri.gov.in व www.mahaethibak.gov.in या वेबसाईटवर लाभार्थी नोंदणी आणि अर्ज नोंदणी करावी. लाभार्थी नोंदणी आणि अर्ज नोंदणी करताना अर्जदारांनी पुढील बाबींची अत्यंत अचुकपणे नोंद करावी. अर्जदाराचे संपूर्ण नाव, गावाचे नाव (ज्या गावाच्या शिवारामध्ये संच बसवायचा आहे आणि ज्या गावाचा 7/12 जोडावयाचा आहे ते गाव), पिकाचे नाव ( ज्या पिकासाठी संच बसवायचा आहे ते पीक), पिकाचे अंतर, सुक्ष्म सिंचनचा प्रकार ठिबक / तुषार , गट क्रमांक (ज्या गटात संच बसवायचा आहे तो गट क्रमांक), गटाचे क्षेत्र (ज्या गटात संच बसवायचा आहे त्या गटातील अर्जदाराचे क्षेत्र), आठ-अ प्रमाणे क्षेत्र (अर्जदाराचे त्या गावातील 8 अ प्रमाणे एकूण क्षेत्र). अर्जदाराच्या आधार संलग्न असलेल्या बँक खात्याचा तपशील जसे बँकेचे नाव, शाखा, खाते क्रमांक, आयएफसी कोड नंबर. ऑनलाईन अर्ज नोंदणी करताना याबाबींची अचुकपणे नोंद करणे गरजेचे आहे. त्याकरिता अर्ज नोंदणी झाल्यानंतर त्याची प्रिंट घ्यावी व तिचे व्यवस्थीत वाचन करुन खात्री करावी. यापैकी एक जरी बाब चुकीची नोंदली गेली तरी संपूर्ण अर्ज रद्द करावा लागतो. यामध्ये दुरुस्तीची सुविधा उपलब्ध करुन दिलेली नाही याची सर्वांनी नोंद घ्यावी. असेही आवाहन कृषि विभागामार्फत करण्यात आले आहे.

00000

महाराष्ट्र विधासनभा अध्यक्ष

हरिभाऊ बागडे यांचा दौरा

नांदेड दि. 25 :- महाराष्ट्र विधानसभा अध्यक्ष हरिभाऊ बागडे हे नांदेड जिल्हा दौऱ्यावर येत असून त्यांचा दौरा कार्यक्रम पुढील प्रमाणे राहील.

शनिवार 26 मे 2018 रोजी सिंकदराबाद रेल्वे स्टेशन हैदराबाद येथून देवगिरी एक्सप्रेसने दुपारी 3.46 वा. धर्माबाद रेल्वे स्टेशन येथे आगमन व मोटारीने शासकीय विश्रामगृह धर्माबादकडे प्रयाण. सायं. 4 वा. शासकीय विश्रामगृह येथे आगमन व राखीव. सायं. 4.30 वा. शासकीय विश्रामगृह येथून कुंडलवाडी ता. बिलोलीकडे प्रयाण. सायं. 5 वा. कुंडलवाडी येथे आगमन व भाग्यलक्ष्मी महिला सहकारी बँक लि. नांदेड - कुंडलवाडी शाखेच्या उद्घाटन समारंभास उपस्थिती. सोईनुसार मोटारीने कुंडलवाडी येथून शासकीय विश्रामगृह नांदेडकडे प्रयाण. शासकीय विश्रामगृह नांदेड येथे आगमन, राखीव व मुक्काम.

रविवार 27 मे 2018 रोजी मोटारीने शासकीय विश्रामगृह नांदेड येथुन सकाळी 10.45 वा. ओम गार्डन नांदेडकडे प्रयाण. सकाळी 11 वा. ओम गार्डन येथे आगमन व बाळासाहेब पांडे यांच्या अमृत महोत्सव सोहळ्यास उपस्थिती. सोईनुसार ओम गार्डन नांदेड येथुन मोटारीने उस्मानपुरा औरंगाबादकडे प्रयाण करतील.

000000

अनुज्ञाप्तीसाठी अर्ज करण्याचे आवाहन

विद्युत कंत्राटदारांसाठी

अभियंत्यांचा मेळावा संपन्न

नांदेड दि. 24 :- पुरेसे विद्युत कंत्राटदार उपलब्ध व्हावेत यासाठी अनुज्ञाप्ती मिळण्याच्यादृष्टिने अभियंता मेळाव्याचे आयोजन उप-प्रादेशिक प्रशिक्षण केंद्र महावितरण मंडळाच्या कार्यालयात करण्यात आले होते. यावेळी आवश्यक कागदपत्रे व अर्जाची माहिती देण्यात आली. पात्र अभियंत्यांनी अनुज्ञाप्तीसाठी अर्ज करावेत, असे आवाहन विद्युत निरीक्षक प्र. द. दहाट यांनी केले आहे.   

महावितरण कंपनी व इतर विद्युत विषयांशी निगडीत औद्योगीक क्षेत्रातील कामांसाठी  महावितरण व विद्युत निरीक्षक कार्यालयाच्यावतीने या मेळाव्याचे आयोजन करण्यात आले होते. याप्रसंगी विद्युत निरीक्षक पी. डी. दहाट, महावितरणचे कार्यकारी अभियंता एस. आर. रसाळ, एस. के. धडके यांची प्रमुख उपस्थिती होती.     

यावेळी रोजगार उपलब्ध होण्यासाठी शासनाची विद्युत कंत्राटदारांच्या अनुज्ञाप्तीसाठी आवश्यक असणारी माहिती, कामांची माहिती स्त्रोत त्यासाठी अनुज्ञाप्तीचे महत्व व निविदा त्यामधील अटीबाबत माहिती देऊन मार्गदर्शन केले. तसेच तारतंत्री, पर्यवेक्षक व ठेकेदार अनुज्ञाप्ती परवाना यांची वेगवेगळ्या कक्षाद्वारे माहिती दिली. या मेळाव्यात अनेक उमेदवारांनी भेटी देऊन माहितीचा लाभ घेतला. विद्युत पर्यावेक्षक, तारतंत्री व विद्युत कंत्राटदार परवाना मिळविण्यासाठी विहित नमुन्यातील अर्जाचे विनामुल्य वितरण करण्यात आले. त्यासाठी लागणाऱ्या कागदपत्रांचे माहिती पत्रक देण्यात आली, अशी माहिती प्रसिद्धी पत्रकाद्वारे दिली आहे.  

00000

मौजे ब्रम्हपुरी गोदावरी नदीच्या

पात्र परिसरात कलम 144 लागू 

नांदेड, दि. 24 :- मौजे ब्रम्हपुरी येथील गोदावरी नदी पात्र परिसरात शांतता व सुव्यवस्था अबाधीत रहावी यासाठी फौजदारी प्रक्रिया संहिता 1973 चे कलम 144 प्रमाणे नांदेड ग्रामीण पोलीस स्टेशनच्या हद्दीतील नदी पात्रातील परिसर प्रतिबंधीत क्षेत्र म्हणून रविवार 27 मे 2018 पासून घोषित करण्यात येत आहे. त्याबाबत जिल्हादंडाधिकारी कार्यालयाने आदेश निर्गमीत केले आहेत.

या बंदी आदेशात म्हटले आहे की, फौजदारी प्रक्रिया संहिता 1973 चे कलम 144 नुसार प्राप्त अधिकाराचा वापर करुन चतु:सिमा पुर्वेस वाजेगाव कोल्हापुरी बंधारा, पश्चिमेस नांदेड ते देगलूरकडे जाणाऱ्या रोडवरील जुना पूल, दक्षिणेस गोदावरीचे नदीचे पात्र आणि उत्तरेस चिल्ला / दर्गाची संरक्षण भिंत यामधील जागा रविवार 27 मे 2018 रोजी सकाळी 6 वाजेपासून ते मंगळवार 26 जून 2018 रोजीच्या मध्यरात्री पर्यंत फौजदारी प्रक्रिया संहिता 1973 चे कलम 144 प्रमाणे प्रतिबंधीत क्षेत्र म्हणून जिल्हादंडाधिकारी यांनी घोषित केले आहे.

हा आदेश शासकीय कर्तव्यावरील अधिकारी व कर्मचारी, एक खिडकी पथकातील अधिकाऱ्यांनी परवानगी दिलेल्या भाविकांना तसेच ज्यांना जिल्हाधिकारी व पोलीस अधीक्षक नांदेड यांनी परवानगी दिली अशा व्यक्तींना लागू राहणार नाही. 

00000

मुलांची काळजी व संरक्षणासाठी  

बालकल्याण समिती गठीत

नांदेड दि. 24 :- बाल न्याय (मुलांची काळजी व संरक्षण) अधिनियमांतर्गत महिला व बालविकास विभागाच्या अधिसुचनेनुसार नांदेड जिल्ह्यासाठी बालकल्याण समिती गठीत करण्यात आली आहे. या समितीचे अध्यक्ष प्रा. निरंजनकौर स्वरुपसिंग सरदार हे असून सदस्य ॲड गणेशलाल जोशी, श्रीमती सावित्री जोशी, डॉ. सुरेखा कलंत्री यांची नियुक्ती करण्यात आली आहे. या समितीचा कालावधी तीन वर्षांसाठी आहे.

जिल्ह्यात शुन्य ते 18 वर्षे वयोगटातील अनाथ, निराधार, निराश्रीत, काळजी व संरक्षणाची गरज असलेल्या बालकांसाठी बाल कल्याण समिती कार्यरत आहे. तशी बालके आढळल्यास त्यांना बाल कल्याण समितीकडे उपस्थित करावे, असे आवाहन जिल्हा बाल संरक्षण अधिकारी तथा जिल्हा महिला व बाल विकास अधिकारी धर्मपाल शाहू यांनी केले आहे.  

000000

खरीप पीक कर्ज वाटपासाठी

"सुलक्ष कर्जवाटप अभियान"

नांदेड दि. 24 :- शेतकऱ्यांना खरीप पीक कर्ज वाटपात अडचण येऊ नये, कर्ज वाटप प्रक्रिया सोपी होण्यासाठी बँक व प्रशासनाच्या सहकार्याने जिल्ह्यात "सुलभ पीक कर्ज वाटप अभियान" राबविण्यात येत आहे. याबाबत नुकत्याच पार पडलेल्या जिल्हास्तरीय बँक कमिटीच्या बैठकीत जिल्हाधिकारी अरुण डोंगरे यांनी निर्देशही दिले आहेत.  

तालुका उपनिबंधक, सहाय्यक निबंधक, सहकारी संस्था यांनी संबंधीत तालुक्यात मंडळनिहाय कर्ज वाटपाबाबत बँकांच्या मदतीने मेळावे आयोजीत करुन पात्र शेतकरी व कर्जमाफीचा लाभ मिळालेल्या शेतकऱ्यांना खरीपासाठी पीक कर्ज उपलब्ध करुन देण्यात येणार आहे. जिल्हा अग्रणी बँकेमार्फत सर्व बँकांना खरीप पीक कर्ज वाटप प्राधान्याने करण्याबाबत सुचना दिल्या आहेत.

शेतकऱ्यांना खरीप पीक कर्ज उपलब्ध होण्यामध्ये अडचणी किंवा मागणी नंतर कर्ज उपलब्ध होत नसल्यास संबंधीत तालुका उपनिबंधक, सहाय्यक निबंधक, सहकारी संस्था कार्यालयाशी संपर्क करावा, असे आवाहन जिल्हा उपनिबंधक सहकारी संस्था नांदेड यांनी केले आहे.

000000

उन्हाळी क्रीडा प्रशिक्षण शिबिरात

विद्यार्थ्यांना सहभागाचे आवाहन

नांदेड दि. 23 :-उन्हाळी क्रीडा प्रशिक्षण शिबिराचे आयोजन 22 ते 31 मे 2018 या कालावधीत जिल्हा क्रीडा कार्यालयाच्यावतीने मोफत करण्यात आले आहे. प्रशिक्षण शिबिराचे उद्घाटन शिवछत्रपती पुरस्कार प्राप्त खेळाडू सुरज सोनकांबळे यांच्या हस्ते नुकतेच करण्यात आले. शालेय व महाविद्यालयीन विद्यार्थ्यांनी उन्हाळी सुट्ट्यांमध्ये क्रीडा मार्गदर्शनाचा लाभ घ्यावा, असे आवाहन जिल्हा क्रीडा कार्यालयाच्यावतीने करण्यात आले आहे.

यावेळी शिवछत्रपती पुरस्कार प्राप्त रामलू पारे, सेवानिवृत्त क्रीडा अधिकारी गंगालाल यादव, प्रा. मनोज पैजणे यांची प्रमुख उपस्थिती होती. प्रशिक्षणार्थींना सकस आहार दिला जात आहे. विद्यार्थ्यांनी खेळाकडे वळावे हा मुख्य उद्देश आहे. गुरुवार 31 मे पर्यंत सकाळी व सायंकाळी या दोन सत्रात श्री गुरुगोविंदसिंघजी स्टेडीयम परीसरातील शासकीय बहुउद्देशीय क्रीडा संकुल येथे तेरा क्रीडा प्रकारात क्रीडा मार्गदर्शन केले जात आहे. हे प्रशिक्षण शिबिर जिल्हा क्रीडा अधिकारी चंद्रशेखर साखरे यांच्या मार्गदर्शनाखाली संपन्न होत आहे, असे प्रसिद्धी पत्रकात नमूद केले आहे.  

000000