जिल्हास्तरीय सनियंत्रण समितीची बैठक संपन्न

नांदेड (जिमाका) दि. 30 :- शेतकऱ्यांनी युरिया खताचा अति वापर टाळून पर्यायी नॅनो युरियाचा वापर पिकाच्या वाढीच्या अवस्थेत करावा. किटकनाशक फवारणी करतांना विषबाधा न होण्यासाठी शेतकऱ्यांनी सुरक्षा किटचा वापर करुन फवारणी करावी. कापूस पिकावर गुलाबी बोंडअळी प्रादुर्भाव न होण्यासाठी शेतकऱ्यांनी एकात्मिक किड व्यवस्थापन प्रणालीचा वापर करावा. याबाबत कृषि विभागाने शेतकऱ्यामध्ये जनजागृती करावी, अशा सूचना जिल्हाधिकारी अभिजीत राऊत यांनी दिल्या.

 

जिल्हाधिकारी  यांच्या अध्यक्षतेखाली नुकतीच जिल्हास्तरीय कृषिनिविष्ठा सनियंत्रण समिती आढावा बैठक संपन्न झाली. यावेळी ते बोलत होते. या बैठकीस उपविभागीय कृषि अधिकारी रणवीर, तालुका कृषि अधिकारी बालाजी मुंडे, कृषि अधिकारी जी.एन. हुंडेकर, जिल्हा व्यवस्थापक एम.आय.डी.सी. फड, जिल्हा पणन अधिकारी राजेश हेमके, पोलिस निरिक्षक सातपुते, बियाणे व रा.खते कंपनीचे प्रतिनिधी इत्यादी उपस्थित होते.

 

या बैठकीत प्रास्ताविक जिल्हा अधिक्षक कृषि अधिकारी भाऊसाहेब बऱ्हाटे यांनी केले. प्रास्ताविकात त्यांनी शेतकऱ्यांच्या उत्पन्नवाढीसाठी सर्व कंपनी प्रतिनिधी प्रयत्न करावे असे सुचित केले. तसेच कृषि विकास अधिकारी विजय राजेश बेतीवार यांनी रासायनिक खत व बियाणे उपलब्धता बाबत माहितीचे सादरीकरण केले. सर्व कंपनी प्रतिनिधी यांना जिल्हयाच्या पुरवठा नियोजनानुसार रासायनिक खताचा पुरवठा करण्याबाबत सूचना दिल्या. सर्व कंपनी प्रतिनिधी यांनी त्यांच्या रा.खत व बियाणे उपलब्धता बाबत माहिती दिली. आभार मोहीम अधिकारी सचिन कपाळे यांनी मानले.

00000

 कृषि दिनानिमित्त विविध कार्यक्रमाचे आयोजन

नांदेड (जिमाका) दि. 30 :- माजी मुख्यमंत्री कै. वसंतराव नाईक यांनी कृषि क्षेत्रात केलेल्या भरीव योगदानाबद्दल 1 जुलै हा त्यांचा वाढदिवस राज्यात कृषिदिन म्हणून साजरा करण्यात येतो. यावर्षी जिल्हा परिषदेच्या कृषि विभागातर्फे कृषि दिनाचे आयोजन करण्यात आले आहे.  हा कार्यक्रम जिल्हा परिषदेच्या मुख्य कार्यकारी अधिकारी वर्षा ठाकूर-घुगे यांच्या अध्यक्षतेखाली होणार आहे.

कृषि दिनाच्या दिवशी शेतीक्षेत्रात उल्लेखनिय कार्य करणाऱ्या महिलांचा गौरव करण्यात येणार आहे. राज्यस्तरीय पुरस्कार प्राप्त शेतकऱ्यांचा वृक्ष देवून गौरव करण्यात येणार आहे. या कार्यक्रमादरम्यान शेतकऱ्यांना किटकनाशक फवारणी करतांना वापरावयाची सेफ्टी किटचे वितरण करण्यात येणार आहे.

या कार्यक्रमात खरीप पिकावरील कीड व रोग तसेच हवामान बदल आधारित शेती पध्दती याबाबत शास्त्रज्ञ मार्गदर्शन करणार आहेत. जिल्ह्यातील शेतीक्षेत्रात उल्लेखनिय कार्य करणाऱ्या शेतकऱ्यांचे मार्गदर्शन होणार आहे. तालुकास्तरावर पंचायत समिती व कृषि विभागाच्यावतीने विविध उपक्रम राबविण्यात येणार आहेत. यामध्ये शेतकऱ्यांच्या शेतावर वृक्ष लागवड, विहीरीचे जलपुजन, विहिर पुर्नभरण, बीबीएफ यंत्राद्वारे पेरणी करण्यात येणार आहे असे कृषि विभागाने प्रसिध्दीपत्रकाद्वारे कळविले आहे.

0000

 ​प्रादेशिक परिवहन विभागाच्या वतीने

शिकाऊ, पक्के अनुज्ञप्ती साठी मासिक शिबिराचे आयोजन 

नांदेड (जिमाका) दि. 30 :- प्रादेशिक परिवहन विभागाच्या वतीने शिकाऊ व पक्के अनुज्ञप्तीसाठी जुलै 2023 महिन्यात तालुक्याच्या ठिकाणी शिबिर कार्यालय आयोजित करण्याचे नियोजन केले आहे. या शिबिरासाठी जागा उपलब्धतेच्या अधिन राहून ऑनलाईन अपॉईटमेंट महिना सुरु होण्यापूर्वी 5 दिवसा आधी कार्यालयीन वेळेत सुरु करण्यात येईल. अपॉइटमेंट घेतलेल्या अर्जदारांनी याबाबची नोंद घेऊन शिबिर कार्यालयात उपस्थित रहावे, असे आवाहन प्रादेशिक परिवहन अधिकारी शैलेश कामत यांनी केले आहे.

तालुक्याच्या ठिकाणी पुढीलप्रमाणे कॅम्पचे आयोजन केले आहे. कंधार येथे 3 जुलै, धर्माबाद येथे 5 व 21 जुलै, किनवट येथे 7 व 28 जुलै, मुदखेड येथे 10 जुलै, माहूर 12 जुलै, हदगांव 17 जुलै, हिमायतनगर 25 जुलै रोजी कॅम्पचे आयोजन केले आहे, असे प्रसिध्दी पत्रकाद्वारे कळविले आहे.

00000

 राज्य  उत्पादन शुल्क विभागाच्यावतीने हातभट्टी मुक्त गाव

अभियानाअंतर्गत मार्गदर्शन सत्र संपन्न

 

नांदेड (जिमाका) दि. 30 :- आयुक्त राज्य  उत्पादन शुल्क मुंबई डॉ. विजयकुमार  सुर्यवंशी व विभागीय  उपआयुक्त  राज्य उत्पादन शुल्क नांदेड श्रीमती  उषा वर्मा मॅडम यांच्या मार्गदर्शनात राज्‍य उत्पादन शुल्क विभागाचे अधिक्षक  अ.अ.कानडे यांनी दिलेल्या  निर्देशाप्रमाणे  निरीक्षक राज्य उत्पादन शुल्क  किनवट विभागाचे निरीक्षक  ए.एम.शेख यांनी  किनवट तालुक्यातील शनिवारपेठ  गावात हातभट्टी निर्मिती व विक्री केंद्रावर  मागील मे महिन्यात वारंवार गुन्हे  उघडकीस आणले व आरोपीं  विरूध्द  कायदेशिर कार्यवाही  केली आहे. या  कालावधीत एकुण 7 गुन्हे  नोंदविण्यात आले आहेत. हातभट्टी दारू,  गुळ मिश्रीत रसायण व इतर साहित्य  असा एकुण 40 हजार  किंमतीचा मुददेमाल  जप्त करण्यात आला आहे.

 

शनिवारपेठ येथील प्रतिष्ठित नागरिक,  सरपंच, सदस्य,  तंटामुक्ती अध्यक्ष यांच्या समवेत निरीक्षक राज्य उत्पादन शुल्क किनवट व पोलीस निरीक्षक डी.ए.बोरसे यांनी  बैठक घेवून हातभट्टी मुक्त गाव हि संकल्पना  मांडली. महाराष्ट्र  दारूबंदी  अधिनियम  मधील तरतुदी   सांगितल्या. यानुसार गावकरी  आणि सरपंच श्रीमती वत्सलाबाई खंडू किरवले, ग्रामविकास अधिकारी आर.जी. कागणे यांनी  हातभट्टी मुक्त गाव करण्याबाबत  व सहकार्य करण्याबाबत आश्वासन दिले. 

 

त्यानुसार नुकतेच किनवट तालुक्यातील शनिवारपेठ  येथे मार्गदर्शन सत्र आयोजित करण्यात आले होते. या मार्गदर्शन सत्रास  गावकरी,  ग्रामपंचायत सदस्य, सरपंच, उपसरपंच,  तंटामुक्ती अध्यक्ष प्रकाश गब्बा राठोड हे हजर होते. निरीक्षक  राज्य उत्पादन शुल्क किनवट ए.एम. शेख  यांनी हातभट्टी मुक्त गाव  ही  संकल्पना मांडली. महाराष्ट्र दारूबंदी अधिनियम  मधील तरतुदी  सांगितल्या यानुसार  गावकरी व  सरपंच, उपसरपंच यांनी हातभट्टी मुक्त गाव करण्याबाबत  व सहकार्य करण्याबाबत आश्वासन दिले. मार्गदर्शन सत्रास राज्य उत्पादन शुल्क विभागाचे  दुय्यम निरीक्षक आर.पी.पवार, तसेच स.दु.नि. मो.रफि, जवान ए.आर. जाधव, एन.पी.भोकरे  व वाहनचालक डी.के.जाधव हे उपस्थित होते.

0000

 महाराष्ट्र विधानपरिषदेचे विरोधी पक्षनेता

अंबादास दानवे यांचा नांदेड दौरा 

नांदेड (जिमाका) दि. 29 :- महाराष्ट्र विधानपरिषदेचे विरोधी पक्षनेता अंबादास दानवे हे नांदेड दौऱ्यावर येत असून त्यांचा दौरा कार्यक्रम पुढीलप्रमाणे राहील. 

शुक्रवार 30 जून 2023 रोजी हिंगोली येथून दुपारी 2.30 वा. नांदेडकडे प्रयाण. दुपारी 4 वा. नांदेड जिल्ह्यातील शिवसेना पदाधिकारी बैठक स्थळ शासकीय विश्रामगृह नांदेड. सायं. 5.30 वा. पत्रकारांशी संवाद. सायं. 6.50 वा. देवगिरी एक्सप्रेसने मुंबईकडे प्रयाण करतील.

00000

 प्रशासन व लाभार्थ्यांच्या सकारात्मक सहभागामुळे शासन आपल्या दारी उपक्रमाला अभूतपूर्व यश - जिल्हाधिकारी अभिजीत राऊत

पोलीसांच्या यशस्वी नियोजनाने कार्यक्रमानंतर अवघ्या 15 मिनिटात जनसमुदाय परतला

ग्राम पातळीपासून जिल्हा पातळीपर्यंतच्या नियोजनाने

शासकीय उपक्रमाचा शक्य झाला भव्य सोहळा

जिल्हाधिकारी यांच्या हस्ते कर्मचारी-अधिकाऱ्यांचा गौरव

नांदेड (जिमाका) दि. 28 :- शासकीय योजनांप्रती जनसामान्यांच्या मनात विश्वास निर्माण व्हावा, शासकीय योजनांप्रती साक्षरताचे नवे पर्व ग्रामीण भागापर्यंत पोहोचावे या उद्देशाने नांदेड जिल्हा प्रशासनाने शासन आपल्या दारी उपक्रमाचे नियोजन केले. यात लाभार्थी व प्रशासनातील सर्व घटकांच्या सकारात्मक सहभागामुळे नवे मापदंड निर्माण करू शकले, या शब्दात जिल्हाधिकारी अभिजीत राऊत यांनी गौरव केला. रविवार 25 जून रोजी नांदेड येथे शासन आपल्या दारी या अभिनव उपक्रमाच्या यशस्वी आयोजनाबद्दल सर्व कर्मचारी-अधिकाऱ्यांप्रती कृतज्ञता व्यक्त व्हावी व सर्वांचे कौतुक करून आत्मविश्वासाला द्विगुणित करावे या उद्देशाने आयोजित विशेष समारंभात ते बोलत होते. नियोजन सभागृहात आयोजित करण्यात आलेल्या या सोहळ्यास अतिरिक्त पोलीस अधिक्षक अबिनाश कुमार, मनपा आयुक्त डॉ. महेशकुमार डोईफोडे, निवासी उपजिल्हाधिकारी महेश वडदकर, जिल्हा परिषदेचे अतिरिक्त मुख्य कार्यकारी अधिकारी संदिप माळोदे व सर्व विभाग प्रमुख उपस्थित होते.

एखाद्या शासकीय उपक्रमाचे एवढे भव्य नियोजन करणे हे प्रशासनासाठी आव्हानात्मक होते. लाभार्थ्यांच्या निवडीपासून या कार्यक्रमाच्या आयोजनातील प्रत्येक टप्प्यावर आपण खबरदारी घेतली. सर्व माध्यमांनी सकारात्मक भूमिका घेऊन नेमक्या कुठे अडचणी येऊ शकतील याची स्पष्ट माहिती देऊन त्याबाबत प्रत्यक्ष भेटून सूचित केले. सर्वांच्या सकारात्मक सहभागामुळे नांदेड जिल्हा शासकीय योजनेच्या या सकारात्मक उपक्रमाला यशाच्या शिखरावर नेऊ शकला, असे जिल्हाधिकारी अभिजीत राऊत यांनी स्पष्ट केले.

प्रत्येक लाभार्थी घरी सुखरूप पोहोचेपर्यंत जिल्हा पातळीपासून गावपातळीवरील टिम दक्ष होती. वाहतुकीचा आराखडा हा आव्हानात्मक होता. यात नांदेडकरांनी दाखवलेला संयम याचे कौतूक करावे लागेल. याचबरोबर पोलीस विभागाने सर्वपातळीवर केलेल्या नियोजनामुळे, वाहनांच्या थांब्यापासून ते वाहतुकीच्या मार्गापर्यंत जी खबरदारी घेतली त्यामुळे लाभधारकांचा आलेला जनसागर अवघ्या 15 मिनिटात विनाव्यत्यय कार्यक्रम संपल्यावर बाहेर पडू शकला. प्रत्येक पोलीस अधिकारी, कर्मचाऱ्यांनी, वैद्यकिय टिमने, बचतगटाच्या कार्यकर्त्यांनी, माविमपासून ते थेट ग्रामपंचायतीपर्यंत जिल्हा परिषदेच्या मुख्य कार्यकारी अधिकारी वर्षा ठाकूर-घुगे यांनी केलेले नियोजनही महत्त्वाचे होते, असे त्यांनी सांगितले.

विशेष पोलीस महानिरीक्षक शशिकांत महावरकर, जिल्हा पोलीस अधीक्षक श्रीकृष्ण कोकाटे, मनपा आयुक्त डॉ. महेशकुमार डोईफोडे, जिल्हा शल्यचिकित्सक डॉ. निळकंठ भोसीकर, शासकीय वैद्यकीय महाविद्यालयाचे अधिष्ठाता डॉ. एस. आर. वाकोडे, सार्वजनिक बांधकाम विभागाचे अधिक्षक अभियंता राजपूत व टिम, महिला व बालकल्याण विभाग, माविम, जिल्हा उपनिबंधक आदी सर्व विभागांनी परस्पर सहकार्यातून केलेले नियोजन हे भविष्यातील प्रशासकीय कामकाजाच्यादृष्टिने महत्त्वाचे असल्याचे ते म्हणाले. येणारे दिवस हे पावसाचे आहेत. याच काळात अनेक कामांचे नियोजन करावे लागते. पुढील नियोजन व जबाबदाऱ्या याच उत्साहाने पेलून आपण जबाबदारीने आपले कर्तव्य पार पाडून असा विश्वास जिल्हाधिकारी राऊत यांनी व्यक्त केला. यावेळी मनपा आयुक्त डॉ. महेशकुमार डोईफोडे, निवासी उपजिल्हाधिकारी महेश वडदकर, जिल्हा माहिती अधिकारी विनोद रापतवार यांनी आपले मनोगत व्यक्त केले.

या कार्यक्रमात सांस्कृतिक कार्यक्रमाची जबाबदारी उत्कृष्ट सांभाळणाऱ्या डॉ. सान्वी जेठवाणी, आनंदी विश्वास, मंडप व इतर व्यवस्था यशस्वीपणे सांभाळणारे धडूशेठ, बसेसची व्यवस्था पाहणारे निखील लातूरकर, वाहतुक तळासाठी जागा विनामूल्य उपलब्ध करून देणारे बापु देशमुख, गुरूद्वारा प्रबंधक ठानसिंग, राज्य परिवहन महामंडळाचे विभागीय व्यवस्थापक कुलकर्णी यांचाही यावेळी प्रातिनिधिक स्वरूपात सत्कार करण्यात आला. कार्यक्रमाचे संचलन नायब तहसिलदार मुगाजी काकडे यांनी केले.

-------

 सामाजिक न्याय दिनानिमित्त

समता दिंडी व व्याख्यान कार्यक्रम संपन्न

 

नांदेड, दि. 26 (जिमाका) :- सामाजिक न्याय व विशेष सहाय्य विभागाअंतर्गत सहाय्यक आयुक्त समाज कल्याण कार्यालयाच्या वतीने राजर्षी छत्रपती शाहू महाराजाच्या जयंती निमित्ताने सामाजिक न्याय दिन साजरा करण्यात आला. या कार्यक्रमानिमित्त समता दिंडीचे आयोजन करण्यात आले होते. या समता दिंडीचे उद्घाटन उपविभागीय अधिकारी विकास माने यांचे हस्ते हिरवी झेंडी दाखवून करण्यात आले.

समता दिंडीचा मार्ग महात्मा ज्योतीबा फुले पुतळा स्नेहनगर ते राजर्षी छत्रपती शाहू महाराज पुतळा असा होता. राजर्षी छत्रपती शाहू महाराज पुतळा येथे दिंडीचा समारोप करण्यात आला. या समता दिंडीत नांदेड जिल्हयातील विविध शाळा व महाविद्यालयांचे विद्यार्थी, शिक्षक, सामाजिक कार्यकर्ते, अधिकारी व कर्मचारी उपस्थित होते.

 

त्यानंतर सकाळी  11. वा. डॉ. बाबासाहेब आंबेडकर, सांस्कृतिक सभागृह, सामाजिक न्यायभवन येथे व्याख्यानाचे आयोजन करण्यात आले होते. या व्याख्यानात “राजर्षी छत्रपती शाहू महाराज यांना अपेक्षीत असलेली सामाजिक समता आणि वर्तमान” याविषयावर प्रा.डॉ.स्वातीकाटे-तौर यांनी मार्गदर्शन केले. यात सामाजिक न्यायाची सुरुवात खऱ्या अर्थाने आपल्या स्वत:पासून केली पाहीजे. आपण ज्या पदावर आहोत त्या पदाला न्याय देता आला पाहीजे असे मत व्यक्त करुन“राजर्षी छत्रपती शाहू महाराज यांच्या विविध विचार पैलु व कार्यावर सखोल मार्गदर्शन प्रा. तौर यांनी केले. छत्रपती शाहू महाराज यांना अपेक्षीत सामाजिक न्याय, समता बंधुता अधिक सक्षम होण्यासाठी सर्वांनी जोमाने कार्य करण्याचा संकल्प यावेळी करण्यात आला.

 

या कार्यक्रमाच्या अध्यक्षस्थानी सहाय्यक आयुक्त बापू दासरी तर कार्यक्रमाचे प्रमुख पाहुणे कार्यालय अधिक्षक अशोक पंडीत हे होते. यावेळी अधिक्षक राजेश सुरकूटलावार, वरिष्ठ समाज कल्याण निरीक्षक श्रीमती माधवी राठोड, समातादुत प्रकल्प अधिकारी श्रीमती सुजाता पाहेरे व महात्मा फुले महामंडळाचे व्यवस्थापक मोहीते यांची उपस्थिती होती. कार्यक्रमाचे प्रास्ताविक दत्ताहरी कदम यांनी तर कार्यक्रमाचे सूत्रसंचालन तालुका समन्वयक गजानन पांपटवार यांनी केले. आभार प्रदर्शन समतादूत विनोद पांचगे यांनी केले. कार्यक्रमाची सांगता राष्ट्रगीताने करण्यात आली.

00000

छाया : सदा वडजे नांदेड