ई-छायाचित्र मतदान ओळखपत्राची सुविधा  

नांदेड (जिमाका) दि. 3 :- मतदारांना सहज आणि सोप्‍या पद्धतीने ई-छायाचित्र मतदार ओळखपत्र (e-EPIC) डाऊनलोड करुन घेण्‍यासाठी https://nvsp.in, https://voterportal.eci.gov.in/ या वेबपोर्टलद्वारे तसेच Voter Helpline Mobile App (Android & iOS) या अॅपद्वारे सुविधा उपलब्‍ध करुन दिली आहे. नव मतदारांनी यासंधीचा लाभ घेऊन जास्‍तीत जास्‍त e-EPIC डाऊनलोड करुन घ्यावा, असे आवाहन जिल्‍हाधिकारी तथा जिल्‍हा निवडणूक अधिकारी डॉ. विपीन इटनकर यांनी केले आहे.     

मा. भारत निवडणूक आयोगाने 25 जानेवारी 2021 या राष्‍ट्रीय मतदार दिनाच्‍या दिवशी e-EPIC या सुविधेची सुरुवात केली आहे. याकार्यक्रमात 3 लाखांपेक्षा अधिक नवीन मतदारांनी नोंदणी करुन त्‍यांचे e-EPIC डाऊनलोड करुन घेतले आहे. मतदारांची मोठया प्रमाणातील मागणी लक्षात घेता आणि या e-EPIC च्‍या प्रणालीवरील सातत्‍याने येत असलेला भार पाहता नविन नोंदणी झालेल्‍या मतदारांना यासाठी प्राधान्‍य देण्‍याचे आयोगाने ठरविले आहे. त्‍याअनुषंगाने मतदार यादीच्‍या विशेष संक्षिप्‍त पुनरीक्षण कार्यक्रम-2021 दरम्‍यान ज्‍या नविन मतदारांनी नोंदणी केली त्‍या मतदारांना फेब्रुवारी महिना अखेरपर्यंत e-EPIC डाऊनलोड करता येऊ शकेल. मतदार यादीच्‍या विशेष संक्षिप्‍त पुनरीक्षण कार्यक्रम-2021 पूर्वी नोंदणी झालेल्‍या आणि योग्‍य  दूरध्‍वनी क्रमांक नमूद केलेल्‍या इतर सर्वसाधारण मतदारांना e-EPIC डाऊनलोड करण्‍याचा दिनांक स्‍वतंत्रपणे जाहीर करण्‍यात येणार आहे.

00000