राष्ट्रीय लोकन्यायालयाचे शनिवारी आयोजन

नांदेड, दि. 5 :- राष्ट्रीय विधी सेवा प्राधिकरणतर्फे नांदेड जिल्हा न्यायालय व जिल्ह्यातीत सर्व न्यायालयात राष्ट्रीय लोकन्यायालयाचे शनिवार 12 नोव्हेंबर 2016 रोजी आयोजन करण्यात आले आहे.

राष्ट्रीय लोकन्यायालयामध्ये दिवाणी, फौजदारी, भुसंपादन, मोटार वाहन अपघात नुकसान भरपाईची प्रकरणे, कौटुंबिक प्रकरणे, कामगारांची प्रकरणे, विविध बॅंकांची तसेच विविध मोबाईल कंपन्यांची दाखल पूर्व प्रकरणे, चेक अनादरित झाल्याबाबतचे खटले आपसात तडजोडीसाठी ठेवण्यात येणार आहेत.

विधिज्ञ, जिल्हाधिकारी कार्यालयातील अधिकारी, मनपा अधिकारी, उर्ध्व पैनगंगा प्रकल्प कार्यालयातील अधिकारी, विमा कंपन्याचे अधिकारी, विविध मोबाईल कंपन्याचे अधिकारी, पक्षकारांनी राष्ट्रीय लोकन्यायालयात जास्तीतजास्त प्रकरणे निकाली काढून पैसा, वेळ वाचवून राष्ट्रीय लोकन्यायालय  यशस्वी करावे, असे आवाहन जिल्हा विधी सेवा प्राधिकरणाच्या अध्यक्षा तथा प्रमुख जिल्हा व सत्र न्यायाधीश सविता बारणे यांनी केले आहे.

            गतमहालोकन्यायालयामध्ये मिळालेले यश पाहता यावर्षी देखील बऱ्याच मोठया प्रमाणावर प्रकरणे निकाली निघतील असा विश्वास जिल्हा विधी सेवा प्राधिकरणाचे सचिव न्या. ए. आर. कुरेशी यांनी व्यक्त केला. पक्षकारांनी प्रलंबित प्रकरणे तडजोडीने निकाली काढण्यासाठी संबंधीत न्यायालयात व दाखलपुर्व प्रकरणे जवळच्या तालुका विधीसेवा समितीकडे किंवा जिल्हा विधी सेवा प्राधिकरण नांदेड या कार्यालयाकडे अर्ज देवून आपले प्रकरण लोकन्यायालयामध्ये ठेवण्याची विनंती करावी. यासाठी आपणास कुठलेही शुल्क आकारण्यात येणार नाही. आपले आपसातील वाद मिटविण्याची या लोकन्यायालयाच्या रूपाने सुवर्ण संधी चालून आली आहे. याचा लाभ सर्वांनी घ्यावा असेही आवाहन न्या. कुरेशी यांनी केले आहे.

000000