वृत्त क्र. 1212

राजमाता जिजाऊ महिला सक्षमीकरण अंतर्गत बाजारासाठी जागा उपलब्ध करण्यात येणार 

नांदेड दि. 19 डिसेंबर :- राजमाता जिजाऊ महिला सक्षमीकरण योजनेंतर्गत सणासुदीच्या काळामध्ये महिला स्वयंसहायता बचतगटांना जिल्ह्याच्या ठिकाणी बाजारासाठी जागा उपलब्ध करून देण्याबाबत आज आढावा बैठक घेण्यात आली. यासंदर्भातील धोरण निश्चित करण्याबाबत जिल्हाधिकाऱ्यांनी संबंधित अधिकाऱ्यांना सुचना दिली. 

जिल्हाधिकारी, जिल्हा परिषदेचे मुख्य कार्यकारी अधिकारी, मनपा आयुक्त, जिल्हा उद्योग केंद्राचे महाव्यवस्थापक, जिल्हा ग्रामीण विकास यंत्रणेचे प्रकल्प संचालक, जिल्हा महिला व बालविकास अधिकारी, जिल्हा माहिती अधिकारी, जिल्हा अग्रणी बँक व्यवस्थापक, महिला आर्थिक विकास महामंडळाचे अधिकारी यांच्या समावेश असणारी समिती यासंदर्भात गठीत करण्यात आली आहे. या समितीची बैठक आज जिल्हाधिकारी कार्यालयामध्ये आयोजित करण्यात आली होती. 

नगरपालिका प्रशासनाचे जिल्हा सह आयुक्त गंगाधर इरलोड यांनी यासंदर्भात आज विविध अधिकाऱ्यांना माहिती दिली. समितीला बाजारासाठी जागा उपलब्ध करून देण्याबाबत नेमकी कोणती कार्यवाही करायची याबाबतची माहिती दिली. यावेळी जागा उपलब्धतेच्या बाबत चर्चा झाली. जिल्हाधिकाऱ्यांनी यासंदर्भात कोणत्याही यंत्रणेची अडचण असल्यास तातडीने लक्षात आणून द्यावेत. यासंदर्भातील शासन निर्णयातील नियमांचे पालन करण्याचे निर्देशही त्यांनी यावेळी दिले.   

000