86 नांदेड उत्‍तर विधानसभा मतदारसंघातील अधिकाऱ्यांसाठी

निवडणूक विषयक पहिल्या सामुहीक प्रशिक्षणाचे आयोजन

नांदेड दि. 30 :- निवडणूकीसाठी 86- नांदेड उत्‍तर विधानसभा मतदार संघाकरीता नियुक्‍त मतदान केंद्राध्‍यक्ष व मतदान अधिकारी, कर्मचारी यांच्यासाठी निवडणूक विषयक पहिले प्रशिक्षण 2 ऑक्टोंबर 2019 रोजी सकाळी 9 ते सायं. 6 वाजेपर्यंत डॉ.शंकराराव चव्‍हाण प्रेक्षागृह, स्‍टेडीयम जवळ, नांदेड येथे आयोजीत केले आहे. तसेच या कालावधीत प्रत्‍यक्ष मतदान यंत्र हाताळणीचे प्रशिक्षण देखील दुपारी 12 ते सायंकाळी 6 या कालावधीत स्‍पर्धा परीक्षा अभ्‍यासिका, शासकीय ग्रंथालय इमारत स्‍टेडीयम परिसर येथे आयोजीत करण्‍यात आले आहे.

भारत निवडणूक आयोगाने महाराष्ट्र विधानसभा सार्वत्रिक निवडणूक 2019 साठी निवडणूकीचा कार्यक्रम दिनांक 21 सप्‍टेंबर 2019 च्‍या प्रसिध्‍दीपत्रकान्‍वये घोषित केला आहे. 86-नांदेड उत्‍तर विधानसभा मतदार संघातील निवडणूक विषयक विविध कामे सुरळित व कालमार्यादेत पार पाडण्‍यासाठी विविध पथके तयार करण्‍यात येवून या पथकात नमुद केल्‍याप्रमाणे पथकातील प्रभारी अधिकारी व कर्मचारी यांच्‍या नेमणुका करण्‍यात आल्‍या आहेत.

या निवडणूकीसाठी 86-नांदेड उत्‍तर विधानसभा मतदारसंघासाठी नियुक्‍त मतदान केंद्राध्‍यक्ष तसेच मतदान अधिकारी व कर्मचारी यांनी  नमूद प्रशिक्षणाची नोंद घेऊन प्रशिक्षणास उपस्थित राहावे. तसेच या प्रशिक्षणास गैरहजर राहणा-या अधिकारी / कर्मचारी यांच्‍या भारतीय लोकप्रतिनिधीत्‍व अधिनियम 1951 अंतर्गत कायदेशीर कार्यवाही करण्‍यात येईल. असे  86-नांदेड उत्‍तर विधानसभा मतदार संघाचे निवडणूक निर्णय अधिकारी श्री सदाशिव पडदुणे यांच्‍यावतीने कळविले आहे.

000000

दिवाळीसाठी फटाका दुकानांच्या परवान्यासाठी

अर्ज करण्याचे आवाहन

नांदेड, दि. 30:- दिपावली उत्‍सव दिनांक 27 ऑक्टोंबर 2019 ते 29 ऑक्टोंबर 2019 या कालावधीत साजरा होत आहे. नांदेड महानगरपालिका हद्दीतील तात्‍पुरते फटाका परवाना घेणे आवश्यक आहे. नांदेड महापालिका हद्दीतील तात्पुरते फटाका परवाना जिल्हादंडाधिकारी तर जिल्ह्यातील सर्व उपविभागीय दंडाधिकारी त्यांच्या कार्यक्षेत्रातील तात्पुरता फटाका विक्री परवाने देतील. त्यासाठी उपविभागीय अधिकाऱ्यांना अधिकार प्रदान करण्यात आले आहेत. इच्छुकांचे विहीत नमुन्यातील अर्ज दिनांक 23 सप्टेंबर, 2019 ते 7 ऑक्टोबर, 2019 या कालावधीत विक्री व स्विकारले जातील. अर्ज स्विकारण्‍याची अंतीम तारीख 7 ऑक्‍टोंबर 2019 आहे. तात्‍पुरता फटाके विक्री परवानासाठी विहित नमुन्‍यात खाली नमुद कागदपत्रांसह अर्ज आपल्‍या कार्यक्षेत्रातील कार्यालयात दाखल करावेत, असे जिल्हादंडाधिकारी नांदेड यांनी कळविले आहे.

नांदेड महानगरपालिका हद्दीतील तात्पुरता फटका परवाना सेतू समिती जिल्हाधिकारी कार्यालय नांदेड यांच्यामार्फत व जिल्ह्यातील उपविभागीय कार्यालयामार्फत त्या कार्यक्षेत्रातील तात्पुरते फटाका परवाना अर्ज विस्फोटक अधिनियम नुसार दिनांक 23 सप्टेंबर, 2019 ते 07 ऑक्टोबर, 2019 या कालावधीत विक्री व स्विकारले जातील.

तात्‍पुरता फटाके विक्री परवानासाठी विहित नमुन्‍यात पुढील कागदपत्रांसह अर्ज आपल्‍या  कार्यक्षेत्रातील कार्यालयात दाखल करावेत.  नमुना AE-5 मधील अर्ज, परवाना घेण्‍याच्‍या दुकानाचा नकाशा ज्‍यात साठा व विक्री करावयाचे ठिकाण,साठवणूक क्षमता, त्‍याचा मार्ग परिसरातील सुविधा इत्‍यादी तपशील दर्शविण्‍यात यावा. The Explosive Rules 2008 मधील नियम 84 अन्‍वये सदर दुकानातील एकमेकापासून किमान अंतर 03 मीटर असावे तसेच संरक्षीत क्षेत्रापासूनचे अंतर 50 मीटर असणे आवश्‍यक आहे. सदर नकाशात दुकान क्रमांक नमुद असावा तसेच नकाशा स्‍थानिक प्राधिकरणाकडून साक्षांकित केलेला असावा. अर्जदाराचे दोन पासपोर्ट साईज फोटो.लायसन फीस रूपये 500/- चलनाची प्रत जोडलेली असावी. एकाच परिसरात सामुहिक रित्‍या दुकाने टाकण्‍यात येत असल्‍यास संबंधीत अर्जदारास देण्‍यात आलेला दुकान क्रमांक नमुद असलेले प्रमाणपत्र (Allotment Letter). आयुक्‍त नांदेड वाघाळा शहर महानगरपालिका नांदेड/मुख्‍याधिकारी नगरपरिषद, नगरपंचायत / ग्रामपंचायत कार्यालय यांचे नाहरकत प्रमाणपत्र. संबंधीत पोलीस स्‍टेशनचे चारित्र्य प्रमाणपत्र व नाहरकत प्रमाणपत्र.

जागेच्‍या मालकी हक्‍काचा पुरावा. नोंदणीकृत/मान्‍यताप्राप्‍त असोसिएशन मार्फत तात्‍पूरता फटाका परवानासाठी अर्ज केल्‍यास या कार्यालया मार्फत देण्‍यात येणा-या परवान्‍यातील नमूद ज्‍या अटी व शर्तीनूसार सबंधित दुकानांची उभारणी करणे बंधनकारक राहिल तसेच कोणत्‍याही विस्‍फोटक नियमांचे व परवान्‍यातील अटी व शर्तीचे उल्‍लंघन होवून कोणताही अनूचित प्रकार घडल्‍यास त्‍याची सर्वस्‍वी जबाबदारी सबंधित असोसिएशनची असेल या बाबत सबंधित असोसिएशन कडील शपथपत्र.दुकानाच्‍या ठिकाणी करण्‍यात आलेली व्‍यवस्‍था तपशील1.अग्निशमन दल 2.सुरक्षा रक्षक इ.इतर अटी व शर्ती नियम 84 नुसार.

अर्जदाराने विहित नमुन्‍यातील सर्व कागदपत्राची पुर्तता केली असल्‍याची खात्री झाल्‍यानंतर सबंधीत कार्यालयाकडून चलन नोंदवून देण्‍यात येईल. चलनद्वारे फिस शासन जमा झाल्‍यानंतर चलनाची प्रत अर्जासोबत जोडून, सबंधीत परिपुर्ण अर्जाच्‍या अनुषंगाने दिनांक 12 ऑक्टोबर, 2019 व 14 ऑक्टोबर,2019 या कालावधीत नांदेड महानगरपालिका हद्दीतील परवाने जिल्‍हादंडाधिकारी नांदेड यांच्‍या मार्फत तसेच उपविभागीय दंडाधिकारी यांच्‍या हद्दीतील परवाने सबंधीत उपविभागीय दंडाधिकारी यांच्‍या मार्फत निर्गमित केले जातील.   

            दिपावली सण-उत्‍सवाच्या कालावधीत The Explosive Rules 2008 मधील नियम 84 (6) अन्‍वये एकाच ठिकाणी 50 पेक्षा जास्‍त दुकानास अनुज्ञाप्‍ती दिली जाणार नाही. विहित केलेल्‍या साठा व विक्री परिणामापर्यतचाच व्‍यवहार करता येईल याबाबत The Explosive Rules 2008 मधील नियमानुसार व SET-X ते SET-Xv मधील निर्देशानुसार साठा नोंदवही तयार करून ती तपासणीसाठी उपलब्‍ध ठेवावी लागेल. The Explosive Rules 2008 अन्‍वये अनाधिकृतपणे विस्‍फोटक साठा व विक्री करणे हा गंभीर स्‍वरूपाचा अपराध असून तो दंडनीय आहे, याची नोंद घ्यावी असेही जिल्हादंडाधिकारी कार्यालयाने कळवले आहे.

0000

     जिल्ह्यात जमावबंदी, शस्त्रबंदी आदेश लागू 

नांदेड, दि. 30 :- जिल्ह्यात 14 ऑक्टोंबर 2019 रोजी मध्यरात्रीपर्यंत शस्त्रबंदी व जमावबंदी आदेश लागू राहणार आहे, अशी माहिती अपर जिल्हादंडाधिकारी कार्यालयाकडून देण्यात आली आहे.

जिल्ह्यातील कायदा व सुव्यवस्था अबाधित रहावी म्हणून अपर जिल्हादंडाधिकारी यांनी मुंबई पोलीस अधिनियम 1951 चे कलम 37 (1) व (3) अन्वये जिल्ह्यात 30 सप्टेंबर 2019 रोजी सकाळी 6 वाजेपासून ते 14 ऑक्टोंबर 2019 रोजी मध्यरात्रीपर्यंत शस्त्रबंदी व जमावबंदी आदेश लागू राहिल. त्यानुसार पाच किंवा पाचपेक्षा अधिक व्यक्तींनी या आदेशात नमुद असलेली कृत्ये सार्वजनिक परिसर किंवा त्याच्या जवळपास करण्यास बंदी घालण्यात आली आहे. हा आदेश कामावरील पोलीस अधिकारी, शासकीय कर्मचारी, विवाह, अंत्ययात्रा, धार्मिक कार्यक्रम, यात्रा व इतर सक्षम अधिकारी यांनी विशेषरित्या परवानगी दिलेल्या मिरवणुकांना लागू होणार नाही.

अशा मिरवणुकांना परवानगी देण्याचे अधिकार तसेच पाच व पाचपेक्षा जास्त इसम जमण्यासाठी, सभा, मिरवणुका, मोर्चा काढणे, ध्वनीक्षेपक वाजविण्यास परवानगी देण्याचे अधिकार जिल्ह्यातील पोलीस ठाणे प्रभारी अधिकारी यांना तसेच पोलीस अधीक्षक नांदेड यांनी प्राधिकृत केलेल्या इतर पोलीस अधिकारी यांना राहतील.

00000

“जागतिक हृदय दिन व पोषण आहार सप्ताह”

नांदेड दि. 30 :-  जागतिक ह्रदयदिन व पोषण आहार सप्ताहानिमित्त जिल्हा रुग्णालय नांदेड येथे जिल्हा शल्य चिकित्सक डॉ. एन. आय. भोसीकर तसेच शासकीय परिचर्या प्रशिक्षण केंद्र नांदेड येथील प्राचार्य एस. ए. गायकवाड यांच्या मार्गदर्शनाखाली जागतिक ह्रदयदिन व पोषण आहार सप्ताह कार्यक्रम घेण्यात आला.

या अनुषंगाने जिल्हा कार्यक्रम अधिकारी डॉ. डी. एन. हजारी व डॉ. सबा खान यांनी उपस्थित रुग्न व नातेवाईक यांना ह्रदयरोगाबद्दल मार्गदर्शन केले. त्याचवेळी प्रशिक्षण केंद्रातील विद्यार्थ्यांनी पोषण आहार प्रदर्शांनाच्या माध्यमातून ह्रदयरोग रुग्णांनी घ्यावयाच्या आहाराबद्दल प्रदर्शांनाच्या माध्यमातून माहिती दिली.

या कार्यक्रमास निवासी वैद्यकीय अधिकारी डॉ. एच. के. साखरे, वैद्यकीय अधिकारी डॉ. कुलदीपक, डॉ. पवार, डॉ. डॉ. लोमटे, पाठ्यनिर्देशक ये.बी. कुलकर्णी,व्ही.बेरळीकर अधिपरिसेविका चरडे हे उपस्थित होते. या कार्यक्रमासाठी समुपदेशक सुवर्णकार सदाशिव व श्रीकांत बोटलावर यांनी परिश्रम घेतले.

00000

शौर्यदिनानिमित्त

माजी सैनिकांचा सत्कार संपन्न

नांदेड दि. 30 :-  जिल्हा सैनिक कल्याण कार्यालय नांदेड येथे आयोजित शौर्यदिनाच्या कार्यक्रमात प्रशासनातर्फे जिल्हातील विरनारी, विरपिता, विरमाता व माजी सैनिकांचा सत्कार रविवार 29 सप्टेंबर 2019 रोजी  संपन्न झाला. या कार्यक्रमाचे अध्यक्षस्थानी निवासी उपजिल्हाधिकारी  डॉ. सचिन खल्लाळ  हे होते.

 भारतीय सैन्यदलाने 29 सप्टेंबर 2016 रोजी पाकिस्तान हद्दीत सर्जीकल स्ट्राईकव्दारे अतिरेक्याचा खात्मा केला होता. ही कार्यवाही जम्मु कश्मीर उरी येथे झालेल्या अतिरेक्याचा भ्याड हल्याचा  बदला घेण्यासाठी करण्यात आली होती.  यानिमित्त 29 सप्टेंबर  हा दिवस शौर्यदिन म्हणुन साजरा करण्यात येतो.

यावेळी मेजर बिक्रमसिंग थापा, शेटे के.अे, कल्याण संघटक, जेलअधिकारी बी. माळी,  माजी सैनिक संघटना अध्यक्ष व्यंकट देशमुख, पठाण हयुन, सार्जेन्ट संजय पोतदार यांची प्रमुख उपस्थिती होती.    

            नांदेड येथील माजी सैनिक भोसले पुंजाराम, पॅरा कमांडो 9 पॅरा यांनी 29 सप्टेंबर 2016 रोजी सर्जीकल स्ट्राईक या मोहिमेत भाग घेतला होता. त्यांचा विशेष सत्कार या कार्यक्रमात करण्यात आला. तसेच प्रदिर्घ सैन्य सेवा केलेले ऑन कॅप्टन किशन कपाळे, ऑन कॅप्टन प्रकाश कस्तुरे, सार्जेन्ट रामराव थडके यांचाही विशेष सत्कार करण्यात आला.

कार्यक्रमाचे प्रस्ताविकात श्री शेटे यांनी शौर्यदिनाचे महत्व सांगून नांदेड येथील  सैनिकांचा सहभाग असल्याचे नमुद केले.  मेजर बिक्रमसिंग थापा यांनी  विविध भाग घेतलेलेल्या  ऑपरेशनची माहिती दिली.   या प्रसंगी  इयत्ता 8 वीत शिकत असलेली माजी सैनिकाची मुलगी कु. सायरा हयुन पठाण  हिने  आपल्या भाषणात सर्जीकल स्ट्राईक विषयी पुर्ण माहिती उपस्थितांना दिली. या कार्यक्रमास जिल्हयातील जवळपास 90   माजी सैनिक/ विधवा व सैनिकी मुलांचे वसतिगृहातील मुलांची उपस्थिती होती.

कार्यक्रम यशस्वी करण्यासाठी सुभेदार तुकाराम मसीदवार, सुर्यकांत कदम, सुरेश टिपरसे, माधव  गायकवाड यांनी परिश्रम घेतले.

0000

विधानसभा सार्वत्रिक निवडणूक 2019

     प्रकाशक व मुद्रक यांच्या बैठकीचे आयोजन         

            नांदेड दि. 30 :- विधानसभा सार्वत्रिक निवडणूक 2019 पूर्व तयारीच्या अनुषंगाने जिल्हाधिकारी तथा जिल्हा निवडणूक अधिकारी नांदेड यांच्या अध्यक्षतेखाली जिल्हयातील सर्व नोंदणीकृत वृत्तपत्राचे प्रकाशक व मुद्रक यांची मंगळवार 1 ऑक्टोबर 2019 रोजी दुपारी 4 वा. जिल्हाधिकारी अरुण डोंगरे यांच्या बैठक कक्षात आयोजित केली आहे.

            जिल्ह्यातील सर्व नोंदणीकृत वृत्तपत्रांचे प्रकाशक व मुद्रक यांनी बैठकीस उपस्थित रहावे, असे आवाहन जिल्हाधिकारी तथा जिल्हा निवडणूक अधिकारी  अरुण डोंगरे यांच्यावतीने करण्यात आले आहे, असे  अपर जिल्हादंडाधिकारी नांदेड यांनी कळविले आहे.

00000

86-नांदेड उत्तर विधानसभा मतदारसंघात

 मतदार जनजागृतीसाठी रथ मार्गस्थ

          

  नांदेड, दि. 30 :- उत्तर विधानसभा मतदारसंघात आगामी विधानसभा निवडणुकीत मतदानाची टक्केवारी वाढविण्यासाठी निवडणूक विभागाने स्वीप कक्षाची स्थापना केली आहे. दिनांक 29 सप्टेंबर 2019 रोजी मतदार जनजागृती रथाचे उद्घाटन व स्वाक्षरी मोहिम फलकाचे अनावरण जिल्हाधिकारी अरुण डोंगरे तसेच निवडणूक निर्णय अधिकारी 86 नांदेड उत्तर विधानसभा मतदारसंघ तथा उपजिल्हाधिकारी (रोहयो) सदाशिव पडदूणे यांचे हस्ते करण्यात आले.

            मतदारसंघात रथफेरीद्वारा मतदार जनजागृती केली जाणार आहे. तसेच मतदार जनजागृतीसाठी विविध कार्यक्रम राबविले जाणार आहेत. मतदानाची टक्केवारी वाढविण्यासाठी शहरात, ग्रामीण भागात व मोक्याच्या ठिकाणी रथफेरीद्वारे मतदान करण्यासाठी संदेश प्रसारित करण्यात येत आहे, अशी माहिती नांदेड उत्तर विधानसभेचे निवडणूक निर्णय अधिकारी तथा उपजिल्हाधिकारी रोहयो यांनी दिली.

            या कार्यक्रमास स्वीप कक्ष प्रमुख तथा गटशिक्षणाधिकारी आर. एल. आडे, तहसिलदार श्रीमती वैशाली पाटील, आर. डब्लू. मिटकरी, नायब तहसिलदार सुनिल माचेवाड तसेच कर्मचारी गणेश नरहिरे, माधव पवार, गणेश रायेवार, श्रीमती कविता जोशी, संजय वाकोटे आदींची यावेळी उपस्थिती होती.

00000

महाराष्ट्र शासन

वृत्त क्र. 673                                       जिल्हा माहिती कार्यालय नांदेड                         दि. 28 सप्टेंबर 2019

------------------------------------------------------------------------------------------------------------------------

जिल्‍ह्यातील 09 विधानसभा मतदारसंघाच्‍या सार्वत्रिक निवडणूकीसाठी

निवडणूक निरिक्षक (खर्च) नांदेड जिल्‍ह्यात दाखल  

            नांदेड,28:- . विधानसभा सार्वत्रिक निवडणूक - 2019 च्‍या निवडणूकीचा कार्यक्रम मा.भारत निवडणूक आयोगाने दिनांक 21 सप्‍टेंबर, 2019 च्‍या प्रसिध्‍दीपत्रकान्‍वये घोषित केला आहे. नांदेड जिल्‍हयातील 09 विधानसभा मतदारसंघाच्‍या सार्वत्रिक निवडणूकीसाठी मा.निवडणूक निरिक्षक (खर्च) हे नांदेड जिल्‍ह्यात दाखल झाले असून त्‍यांचा तपशील खालील प्रमाणे आहे.

            83 - किनवट,  84 - हदगाव विधानसभा मतदारसंघासाठी निवडणूक निरिक्षक (खर्च) श्री.निकोलस मुर्मू यांचा भ्रमणध्‍वनी क्रमांक 8623982215 असून स्‍थानिक पत्ता नविन अजंठा,  शासकिय विश्रामगृह, नांदेड, 85 - भोकर,   86 -नांदेड उत्तर विधानसभा मतदारसंघासाठी निवडणूक निरिक्षक (खर्च) श्री.वाय. आनंद यांचा भ्रमणध्‍वनी क्रमांक 8623982212 असून स्‍थानिक पत्ता अजंठा,  शासकिय विश्रामगृह, नांदेड, 87 -नांदेड दक्षिण, 88 -लोहा विधानसभा मतदारसंघासाठी निवडणूक निरिक्षक (खर्च) विष्‍णु बजाज यांचा भ्रमणध्‍वनी क्रमांक 8623982198 असून स्‍थानिक पत्ता एलोरा,  शासकिय विश्रामगृह, नांदेड, 89 -नायगाव, 90 - देगलूर, 91 - मुखेड विधानसभा मतदारसंघासाठी निवडणूक निरिक्षक (खर्च) श्री. महेश कुमार यांचा भ्रमणध्‍वनी क्रमांक 8623982210 असून स्‍थानिक पत्ता गोदावरी,  शासकिय विश्रामगृह, नांदेड  .  

            तरी नांदेड जिल्‍हयातील नागरीकांना कळविण्‍यात येते की, आपली काही गाऱ्हाणी, तक्रार किंवा हरकत असल्‍यास त्‍यांनी संबंधित विधानसभा मतदारसंघाचे मा.निवडणूक निरिक्षक (खर्च) यांचेशी  संपर्क साधावा असे जिल्‍हा प्रशासनाच्‍यावतीने आवाहन करण्‍यात येत आहे.

0000

शौर्यदिनानिमित्त माजी सैनिकांचा सत्कार कार्यक्रम

                                                         

            नांदेड, दि. 27:- दिनांक 29 सप्टेंबर 2016 रोजी भारतीय सैन्य दलाने पाकिस्तान हद्वीत घुसून सर्जीकल स्ट्राईकव्दारे अतिरेक्याचा खात्मा केला. भारतीय सैन्याची अभिमानास्पद कामगिरी राज्यातील जनतेपर्यंत व्यापक प्रसिद्वीव्दारे पोचविण्यासाठी व माजी सैनिकांचा सन्मान करण्यासाठी दरवर्षी दिनांक 29 सप्टेंबर रोजी शौर्य दिन साजरा करण्याचे केन्द्र शासनाच्या धोरणानुसार निश्चित केले आहे. यानिमित्ताने,  जिल्हा प्रशासनाने जिल्हयातील  सर्व माजी सैनिक/माजी सैनिक विधवा/शहिद जवानांच्या कुंटूंबींयांचा  सत्कार जिल्हाधिकारी अरुण डोंगरे यांच्या हस्ते करण्यात येणार आहे.  जिल्हा सैनिक कल्याण कार्यालय, नांदेड येथे रविवार दि. 29 सप्टेंबर 2019 रोजी  सकाळी 11 वाजता शौर्यदिन कार्यक्रमाचे आयोजन करण्यात आले आहे.

              तरी जिल्हयातील सर्व  विरनारी, विरपिता/ विरमाता व माजी सैनिकांनी  दिनांक 29 सप्टेंबर 2019 रोजी सकाळी 11 वाजता जिल्हा सैनिक कल्याण कार्यालय येथे उपस्थित राहावे, असे जिल्हा सैनिक कल्याण अधिकारी नांदेड यांनी कळविले आहे.          

फौजदारी प्रक्रिया संहिता 1973 नुसार

विशेष कार्यकारी दंडाधिकाऱ्यांच्‍या नियुक्‍त्या

            नांदेड, दि. 27:- विधानसभा सार्वत्रिक निवडणूक-2019 च्‍या कामाकरीता जिल्‍हादंडाधिकारी यांनी निर्देशीत केलेले निवडणूक निर्णय अधिकारी व सहाय्यक निवडणूक निर्णय अधिकारी, फिरते पथक प्रमुख (Flying Squad Incharge) स्‍थायी निगरानी पथक प्रमुख (Static Surveillance Team Incharge) यांना शासनाने संदर्भात नमुद अधिसूचनेद्वारे फौजदारी प्रक्रिया संहिता 1973 चे कलम 21 नुसार विशेष कार्यकारी दंडाधिकारी म्‍हणून नेमणूक केली असून, उक्‍त संहितेचे कमल 129, 133, 143 व 144 खालील शक्ती प्रदान केल्या आहेत.

             नांदेड जिल्हाधिकारी तथा जिल्‍हादंडाधिकारी अरूण डोंगरे यांनी विधानसभा सार्वत्रिक निवडणूक-2019 ची प्रक्रिया सुरळीत पार पाडण्यासाठी, फौजदारी प्रक्रिया संहिता 1973 (सन 1974 चा 2) कलम 21 अन्वये प्रदान करण्‍यात आलेल्‍या शक्तीचा वापर करून नांदेड जिल्‍ह्यातील 83-किनवट,  84-हदगांव,  85-भोकर,  86- नांदेड उत्‍तर,  87- नांदेड दक्षिण,  88-लोहा, 89-नायगांव,  90-देगलूर, 91-मुखेड अशा (09) विधानसभा मतदार संघामध्‍ये, निवडणूकीच्‍या कामासाठी (09) निवडणूक निर्णय अधिकारी व (27) सहाय्यक निवडणूक निर्णय अधिकारी यांची नियुक्‍ती झाली असून त्‍यापैकी 08 निवडणूक निर्णय अधिकारी हे उपविभागीय अधिकारी तथा उपविभागीय दंडाधिकारी पदी असल्याने तसेच (16) सहाय्यक निवडणूक निर्णय अधिकारी हे तहसिलदार तथा तालुका दंडाधिकारी पदी असल्याने विकादं पदसिध्‍द आहेत उर्वरीत (01) 86-नांदेड उत्‍तर मतदार संघाचे निवडणूक निर्णय अधिकारी तथा उपजिल्हाधिकारी, (रोहयो)  सदाशिव पडदुने व नियुक्‍त (11) सहाय्यक निवडणूक निर्णय अधिकारी यांना तसेच विधानसभा सार्वत्रिक निवडणुक-2019 च्‍या कामासाठी निर्माण केलेल्‍या स्‍थायी निगरानी पथक (Static Surveillance Team), संख्‍या (116) आणि फिरते पथक संख्‍या (110) (Flying Squad Team) यांचे प्रमुखांना विधानसभा कार्यक्षेत्र हद्दीपावेतो दिनांक 21 सप्टेंबर, 2019 ते दिनांक 27 ऑक्टोबर, 2019 या कालावधीकरीता विशेष कार्यकारी दंडाधिकारी म्हणून नेमणूक करीत आहे आणि अशाप्रकारे नियुक्‍त केलेल्‍या विशेष कार्यकारी दंडाधिकारी यांना उक्‍त संहितचे कलम 129, 133, 143 व 144 खाली शक्ती प्रदान करण्यात आली आहे.

राज्य उत्पादन  शुल्क विभागाची करडी नजर

            नांदेड,26:- .जिल्हाधिकारी अरूण डोंगरे, यांच्या मार्गदर्शनानुसार व मा.आयुक्त राज्य उत्पादन शुल्क, म.रा.मुंबई यांच्या निर्देशानुसार विधानसभा निवडणुक 2019 च्या अनुषंगाने राज्य उत्पादन शुल्क, विभाग नांदेड यांच्यामार्फत निवडणूक काळातील अवैध मद्य विक्री , अवैध वाहतुक व अवैध उत्पादन रोखण्यासाठीखालील प्रमाणे उपाययोजना करण्यात आलेली आहेत. 

जिल्ह्यातील मद्य विक्रीच्या सर्व अनुज्ञप्त्या मतदानाच्या दिवशी, मतदान संपण्यापुर्वीपासून 48 तास अगोदर व मतमोजणीच्या दिवशी बंद ठेवण्याबाबत नियमात तरतुद असल्याने जिल्हाधिकारी अरुण डोंगरे यांच्याकडून आदेश प्राप्त करून घेण्यात येऊन बंद ठेवण्यात येतील. तसेच जिल्ह्यातील सर्व अनुज्ञप्तीधारकांना ते बजावण्यात येणार आहेत. कोरड्या दिवसाच्या कालावधीत मद्य विक्रीच्या कोणत्याही अनुज्ञप्तीचे व्यवहार सुरु राहणार नाहीत याची दक्षता घेण्यात येईल.

मा.आयुक्त राज्य उत्पादन शुल्क, महाराष्ट्र राज्य मुंबई यांच्याकडून प्राप्त झालेल्या विवरणपत्रात नमुद केलेल्या ठिकाणीसीमातपासणी नाकेकार्यान्वित करण्यात आले आहेत. त्यानुसार मौ.भक्तापूर ता.देगलूर जि.नांदेड व मौ.कार्ला फाटा ता.बिलोली जि.नांदेड येथे उभारण्यात आलेल्या सीमातपासणी नाक्यांवर वाहन तपासणीचेकामकाज सुरु झाले आहे.

उपरोक्त कार्यान्वित केलेल्या सीमातपासणी नाक्यावर नेमणूककरण्यात येणाऱ्या अधिकारी व कर्मचारी अहोरात्रकार्यरत राहण्याबाबत दक्षता घेण्यात आली आहे. सदर नाक्यावर नेमणूककरण्यात येणाऱ्या अधिकारी व कर्मचारी यांच्या तात्पुरत्या नेमणुकीचे आदेश निर्गमित करण्यात आलेले आहे. निवडणुकीच्यावेळी संबंधित मतदार संघाच्या निवडणुक निरीक्षकांना (Observer) गुन्हा अन्वेषनाची माहिती वेळोवेळी देण्यात येईल. मद्य निर्माण्या, घाऊक व किरकोळ विक्रेत्यांच्या व्यवहारावर बारकाईने लक्ष ठेवण्यात येत आहे. व लक्ष ठेवण्यात येईल.

मद्य निर्मीतीकरणाऱ्या घटकांनी (PLL / CL-I / BRL) घाऊक विक्रेते (FL-I / CL-II इत्यादी) या अनुज्ञप्तीधारकांनी सीसीटीव्ही (CC TV) जर बसविले नसलेल्या घटकांनासुचना देण्यात आले आहे. यापुर्वीच बसविलेले असतील परंतूतेकार्यरत अशा घटाकंनातरतेकार्यरत करण्याबाबत देण्यात आलेले आहेत. व कार्यरत असल्याचीखात्रीकरण्यात आलेली आहेत.

या विभागा मार्फत चार विशेष भरारी पथकाची स्थापना करण्यात येवून निवडणूक कालावधीमध्येकुठल्याही प्रकारची अवैधरित्या निर्मिती, वाहतूक, विक्री व वितरण होणार नाही याबाबत दक्षता घेतली आहे. त्यांचे मार्फत रात्रीची गस्त गळती जात आहे. तसेच संशयित वाहनांची तपासणीकेली जात आहे.

दिनांक 23 सप्टेंबर 2019 रोजी जिल्हाधिकारी अरुण डोंगरे अध्यक्षतेखाली सिमालगत भागातील तेलंगना राज्यातील अदिलाबाद, निर्मल, निझामाबाद, कामारेड्डी जिल्ह्यातील व तसेचकर्नाटक राज्याच्या बिदर जिल्ह्यातील, पोलीस अधीक्षक, महसूल अधिकारी, राज्य परिवहन अधिकारी व अधीक्षक राज्य उत्पादन शुल्क अधिकाऱ्यांसमवेत बैठक घेऊन निवडणुकीच्या पार्श्वभूमीवर कुठल्याही प्रकारचे अवैध मद्य नांदेड जिल्ह्यात येणार नाही याबाबत दक्षता घेण्याच्या सुचना देण्यात आल्या आहेत.

तसेचतेलंगना व कर्नाटक राज्यातीलसीमालगर भागातील 5 कि.मी. अंतरावरील अनुज्ञप्त्या मतदानाच्या 48 तास अगोदर व मतमोजणीच्या दिवशी बंद ठेवण्याबाबत कोरडा दिवसा (dray day) आदेश निर्गमित करण्याबाबत विनंती करण्यात येणार आहे.

राज्य उत्पादन शुल्क विभागामार्फत मुंबई दारुबंदी कायदा 1949 चेकलम 93 अंतर्गत दाखले केलेल्या 58 प्रस्तावावर उपविभागीय अधिकारी यांचेकडून बंधपत्र घेण्याचेकामकाज चालु असून अशा आरोपींच्या हालचालींवर देखील बारीक नजर ठेवली जात आहे.

जिल्ह्यातील हातभट्टीची ठिकाणेतसेच अवैध मद्यविक्रीची ठिकाणे यांचे मॉपिंगतयारकेले असून विशेष माहिमे अंतर्गत अशा ठिकाणांवर कारवाई करण्यात येत आहे.

अवैध दारु विक्री करणाऱ्या सराईत गुन्हेगांवर करडी नजर ठेवली जात असून वेळोवेळी त्यांचेवर कारवाई देखीलकरण्यात येत आहे. नांदेड राज्य उत्पादन शुल्क अधीक्षक यांनी एका प्रसिध्दी पत्रकाद्वारे कळविले आहे.

0000

मौजे ब्रम्हपुरी गोदावरी नदीच्या

पात्र परिसरात कलम 144 लागू

नांदेड, दि. 25 :- मौजे ब्रम्हपुरी येथील गोदावरी नदी पात्र परिसरात शांतता व सुव्यवस्था अबाधीत रहावी यासाठी फौजदारी प्रक्रिया संहिता 1973 चे कलम 144 प्रमाणे नांदेड ग्रामीण पोलीस स्टेशनच्या हद्दीतील नदी पात्रातील परिसर प्रतिबंधीत क्षेत्र म्हणून 27 सप्टेंबर 2019 पासून घोषित करण्यात आले आहे. त्याबाबत जिल्हादंडाधिकारी कार्यालयाने आदेश निर्गमीत केले आहेत.

याबंदी आदेशात म्हटले आहे की, फौजदारी प्रक्रिया संहिता 1973 चे कलम 144 नुसार प्राप्त अधिकाराचा वापर करुन चतु:सिमा पुर्वेस वाजेगाव कोल्हापुरी बंधारा, पश्चिमेस नांदेड ते देगलूरकडे जाणाऱ्या रोडवरील जुना पूल, दक्षिणेस गोदावरीचे नदीचे पात्र आणि उत्तरेस चिल्ला / दर्गाची संरक्षण भिंत यामधील जागा 27 सप्टेंबर 2019 रोजी सकाळी 6 वाजेपासून ते 26 ऑक्टोंबर 2019 रोजीच्या मध्यरात्री पर्यंत फौजदारी प्रक्रिया संहिता 1973 चे कलम 144 प्रमाणे प्रतिबंधीत क्षेत्र म्हणून जिल्हादंडाधिकारी यांनी घोषित केले आहे.

हा आदेश शासकीय कर्तव्यावरील अधिकारी व कर्मचारी, एक खिडकी पथकातील अधिकाऱ्यांनी परवानगी दिलेल्या भाविकांना तसेच ज्यांना जिल्हाधिकारी नांदेड व पोलीस अधीक्षक नांदेड यांनी परवानगी दिली अशा व्यक्तींना लागू राहणार नाही.

00000

विधानसभा निवडणूक अनुषंगाने

प्रकाशक, मुद्रकांची आज बैठक

नांदेड, दि. 25 :- नांदेड तालुक्यातील 87- नांदेड दक्षिण विधानसभा मतदारसंघातील सर्व प्रकाशक व मुद्रक यांची 87-नांदेड दक्षिण विधानसभा सार्वत्रिक निवडणूक 2019 च्या अनुषंगाने निवडणूक निर्णय अधिकारी 87-नांदेड दक्षिण विधानसभा मतदारसंघ तथा उपविभागीय अधिकारी नांदेड यांचे कार्यालयात गुरुवार 26 सप्टेंबर 2019 रोजी सकाळी 11 वा. निवडणूक विषयक प्रकाशन व छपाई याविषयावर चर्चा / मार्गदर्शन करण्यासाठी बैठक आयोजित केली आहे.

निवडणूक निर्णय अधिकारी तथा उपविभागीय अधिकारी नांदेड यांनी सर्व प्रकाशन व मुद्रक यांना या बैठकीस उपस्थित राहण्याचे आवाहन केले आहे.  

00000

विधानसभा सार्वत्रिक निवडणूक

विविध बाबींवरील निर्बंध आदेश निर्गमीत      

नांदेड, दि. 24 :- भारत निवडणूक आयोगाकडून विधानसभा सार्वत्रिक निवडणूक 2019 ची दिनांक 21 सप्टेंबर 2019 रोजी घोषणा केली असून घोषणेच्‍या दिनांकापासून आदर्श आचारसंहिता अंमलात आली आहे. नांदेड जिल्‍ह्यात विधानसभेच्‍या सार्वत्रिक निवडणूकीची संपूर्ण प्रक्रिया शांततेत, निर्भय व न्‍याय वातावरणात पार पाडण्‍याच्‍या दृष्‍टीकोणातून नांदेडचे जिल्‍हादंडाधिकारी अरुण डोंगरे यांनी फौजदारी प्रक्रिया संहिता 1973 चे कलम 144 अन्‍वये अधिकाराचा वापर करुन विविध बाबींवर निर्बंध आदेश 21 सप्टेंबर 2019 रोजी निर्गमीत केले आहेत.  

ध्‍वनीक्षेपक, ध्‍वनिवर्धकाचा वापर  

कोणतीही व्‍यक्‍ती, संस्‍था, पक्ष व पक्षाचे कार्यकर्ते यांना ध्‍वनीक्षेपक व ध्‍वनिवर्धकाचा वापर सक्षम प्रधिकाऱ्याच्‍या पूर्व परवानगीशिवाय करता येणार नाही. फिरत्‍या वाहनांवर ध्‍वनिक्षेपक व ध्‍वनिर्धकाचा वापर करता येणार नाही. महाराष्‍ट्र शासन पर्यावरण विभाग, शासन निर्णय क्रमांक ध्‍वनीप्र 2009/प्र.क्र.12/08/ता.क.1, दिनांक 31 जुलै, 2013 नुसार ध्‍वनिक्षेपक व ध्‍वनिवर्धकाचा वापर ध्‍वनि प्रदुषणाची पातळी विहित मर्यादेत राखून करावी. ध्‍वनिक्षेपक व ध्‍वनिवर्धकाचा वापर सकाळी 6 वाजेपुर्वी आणि रात्री. 10 वाजेनंतर करता येणार नाही.

कार्यालये, विश्रामगृहे परिसरातील निर्बंध

कार्यालये, विश्रामगृहे इत्‍यादी परिसरात कोणत्‍याही प्रकारची मिरवणूक, मोर्चा काढणे, सभा घेणे, उपोषण करणे, कोणत्‍याही प्रकारच्‍या घोषणा देणे, वाद्य वाजविणे किंवा गाणी म्‍हणने, कोणत्‍याही प्रकारचा निवडणूक प्रचार करण्यावर निर्बंध राहतील.

शासकीय वाहनाच्‍या गैरवापरास प्रतिबंध

निवडणूकीचे कालावधीत कोणत्‍याही वाहनांच्‍या ताफ्यामध्‍ये तीन पेक्षा जास्‍त मोटारगाडया अथवा वाहने (Cars/Vehicles) वापरण्‍यास या आदेशाव्‍दारे प्रतिबंधीत करण्‍यात आले आहे.

वाहनांवर पक्ष प्रचाराचे कापडी फलके,

झेंडे लावणे इत्‍यादी बाबीस काही प्रतिबंध

फिरत्‍या वाहनांवर पक्ष प्रचाराचा झेंडा हा वाहनाच्‍या डाव्‍या बाजुला विंड स्‍क्रीन ग्‍लासच्‍या पुढे राहणार नाही आणि तो त्‍या वाहनाच्‍या टपापासून 2 फुट उंची पेक्षा जास्‍त राहणार नाही. प्रचाराच्‍या फिरत्‍या वाहनावर कापडी फलक वाहन चालकाच्‍या आसनामागे वाहनाच्‍या डाव्‍या व उजव्‍या बाजुनेच लावण्‍यात यावा. इतर कोणत्‍याही बाजूस तो लावता येणार नाही. फिरत्‍या वाहनावर लावावयाचा पक्ष प्रचाराचा झेंडा किंवा कापडी फलक संबंधीत पक्षाचे जिल्‍हाध्‍यक्ष, उमेदवार व उमेदवाराचे निवडणूक प्रतिनिधी यांच्‍या वाहना व्‍यति‍रीक्‍त इतर कोणत्‍याही वाहनावर लावता येणार नाही.

निवडणूक कालावधीत विश्रामगृह वापरावरील निर्बंध

शासकीय व निवडणूकीच्‍या कामावर असलेले अधिकारी व कर्मचारी यांच्‍या व्‍यतीरिक्‍त, इतर कोणत्‍याही व्‍यक्‍तीस विश्रामगृहात थांबण्‍यासाठी संबंधित खात्‍याने दिलेला अधिकृत परवाना असल्‍याशिवाय किंवा सक्षम अधिकाऱ्याच्‍या पूर्व परवानगीशिवाय जिल्‍ह्यातील शासकीय/निमशासकीय विश्रामगृहात अथवा त्‍या परिसरात प्रवेश करता येणार नाही.

सार्वजनिक ठिकाणी तात्पुरती पक्ष कार्यालय स्‍थापन करण्यास निर्बंध

निवडणूकीचे कालावधीत धार्मिक स्‍थळे, रुग्‍णालये किंवा शैक्षणिक संस्‍था व सार्वजनिक ठिकाणाच्या जवळपास तात्‍पुरती पक्ष कार्यालये स्‍थापन करण्‍यास प्रतिबंधीत करण्‍यात आले आहे.

सार्वजनिक ठिकाणी पक्षांचे चित्रे,

चिन्‍हांचे कापडी फलके, भाषण देण्याबाबतचे निर्बंध

निवडणूक कालावधीत सार्वजनिक ठिकणी पक्षांचे चित्रे, चिन्‍हांचे कापडी फलके, सार्वजनिक ठिकाणी भाषण देण्यास प्रतिबंधीत करण्‍यात आले आहे.

शासकीय, सार्वजनिक मालमत्‍तेची विरुपता करण्‍यास निर्बंध  

निवडणूक कालावधीत शासकीय, निमशासकीय, सार्वजनिक मालमत्‍तेची प्रत्‍यक्ष किंवा अप्रत्‍यक्ष स्‍वरुपात विरुपता करण्‍यास प्रतिबंधीत करण्‍यात आले आहे.

शस्‍त्र परवानाधारकाकडील शस्‍त्रास्‍त्रे वाहून नेण्‍यावर बंदी  

निवडणूकीचे कालावधीत शासकीय कर्तव्‍य पार पाडणाऱ्या अधिकारी व कर्मचारी, बँके सुरक्षा गार्ड यांचे व्‍यतिरिक्‍त इतर सर्व परवाना धारकास परवान्‍यातील शस्‍त्रास्‍त्रे वाहून नेण्‍यास या आदेशान्‍वये बंदी घालण्‍यात आली आहे.

वरील सर्व आदेश नांदेड जिल्‍ह्यातील विधानसभा सार्वत्रिक निवडणूक 2019 अनुषंगाने विधानसभा मतदारसंघ कार्यक्षेत्राहद्दी पर्यंत आदेश निर्गमीत झाल्‍याचा दिनांक 21 सप्‍टेंबर पासून गुरुवार 24 ऑक्‍टोंबर 2019 रोजी मध्यरात्री पर्यंत अंमलात राहतील. 

नामनिर्देशनपत्र दाखल करताना

 अवलंब करावयाची कार्यपद्धत

निवडणूक कालावधीत निवडणूक निर्णय अधिकारी यांच्‍या कार्यालयात उमेदवारांनी नामनिर्देशनपत्र दाखल करतेवेळेस वाहनांच्‍या ताफ्यामध्‍ये तीन मोटारगाड्या/वाहने यांचा ताफ्यात समावेश असावा. तसेच नामनिर्देशनपत्र दाखल करते वेळेस निवडणूक निर्णय अधिकारी यांचे दालनात पाच व्‍यक्‍ती उपस्थित राहतील या व्‍यतिरिक्‍त कोणालाही निवडणूक निर्णय अधिकारी यांच्‍या दालनात प्रवेश दिला जाणार नाही. निवडणूक निर्णय अधिकारी यांचे कार्यालयात नामनिर्देशनपत्र दाखल करते वेळेस कार्यालयाच्‍या परिसरात मिरवणूक/सभा घेणे, कोणत्‍याही प्रकारच्‍या घोषणा देणे/ वाद्य वाजविणे किंवा गाणी म्‍हणने आणि कोणत्‍याही प्रकारचा निवडणूक‍ प्रचार करणेस प्रतिबंधीत करण्‍यात आले आहे.

हा आदेश नांदेड जिल्‍हयात विधानसभा सार्वत्रिक निवडणूक 2019 अनुषंगाने 27 सप्‍टेंबर 2019 ते 4 आक्‍टोंबर 2019 रोजी मध्यरात्री पर्यंत अंमलात राहील.

मतदान केंद्र परिसरात 144 कलम

मतदानाच्‍या दिवशी सोमवार 21 आक्‍टोंबर 2019 रोजी जिल्‍ह्यातील सर्व मतदान केंद्र परिसरात फौजदारी प्रक्रिया कलम 144 लागु राहील. ज्‍या ठिकाणी मतदान होणार आहे त्‍या ठिकाणापासून 200 मीटर परिसरातील सर्व पक्षकारांचे मंडपे, सर्व दुकाने, मोबाईल, कॉडलेस फोन, पेजर, वायरलेस सेट, ध्‍वनीक्षेपके, सर्व प्रकारचे फेरीवाले व इतर इलेक्‍ट्रॉनिक्‍स उपकरणे, निवडणुकीच्‍या कामाव्‍यतीरिक्‍त खाजगी वाहन, संबंधीत पक्षाचे चिन्‍हांचे प्रदर्शन व निवडणूकीच्‍या कामाव्‍यतीरीक्‍त व्‍यक्तीस प्रवेश करण्‍याकरीता सोमवार 21 आक्‍टोंबर, 2019 रोजी प्रतिबंधीत करण्‍यात आले आहे.

हा आदेश मतदानाच्‍या दिवशी सोमवार 21 ऑक्‍टोंबर 2019 रोजी मतदान सुरु झाल्‍यापासून मतदान संपेपर्यन्‍त अंमलात राहील.

मतमोजणी केंद्र परिसरात 144 कलम

नांदेड जिल्‍ह्यातील 83-किनवट, 84-हदगाव, 85-भोकर, 86-नांदेड (उत्‍तर), 87-नांदेड (दक्षिण), 88-लोहा, 89-नायगाव, 90-देगलूर, 91-मुखेड विधानसभा मतदार संघाच्‍या मुख्‍यालयी गुरुवार 24 ऑक्‍टोबर, 2019 रोजी मतमोजणी शांततेत पार पडावी आणि कायदा व सुव्‍यवस्‍था अबाधीत रहावी या दृष्‍टीकोणातून मतमोजणीच्‍या दिवशी मतमोजणी केंद्रापासून 200 मिटर परिसरात सर्व पक्षकारांचे मंडपे, सर्व दुकाने, मोबाईल, कॉडलेस फोन, पेजर, वायरलेस सेट, ध्‍वनीक्षेपके, फेरीवाले व इतर इलेक्‍ट्रॉनिक्‍स उपकरणे, निवडणुकीच्‍या कामाव्‍यतीरिक्‍त खाजगी वाहन, संबंधीत पक्षाचे चिन्‍हांचे प्रदर्शन व निवडणूकीच्‍या कामाव्‍यतीरीक्‍त व्‍यक्‍तीस प्रवेशास प्रतिबंधीत करण्‍यात आले आहे.

हा आदेश गुरुवार 24 ऑक्‍टोबर,2019 रोजी सकाळी 6 वाजेपासून ते मतमोजणी प्रक्रिया संपेपर्यन्‍त अंमलात राहील.

0000

नांदेड विधानसभा निवडणुकी विषयी जिल्हाधिकारी कार्यालयाच्या परिसरातील नियोजन भवन सभागृहात विविध शाखा प्रमुखाची बैठक आणि प्रशिक्षण आयोजित केले होते, या दरम्यान निवडणूक प्रक्रिया पार पाडण्यासाठी विविध शाखेने पार पाडण्याची जबाबदारी तसेच कर्तव्ये संदर्भात प्रशिक्षण देण्यात आले यावेळी माननीय जिल्हाधिकारी अरुण डोंगरे यांच्या मार्गदर्शनाखाली विविध टीम ला मार्गदर्शन करण्यात आले यावेळी सहायक जिल्हाधिकारी अभिनव गोयल , पोलीस अधीक्षक विजय कुमार मगर; अप्पर जिल्हाधिकारी खुशालसिह परदेशी ,जिल्हा निवडणूक अधिकारी प्रशांत शेळके, निवासी उपजिल्हाधिकारी सचिन खल्लाळ, तसेच विविध शाखा प्रमुख उपस्थित होते.

  

वाहन योग्यता प्रमाणपत्र

नुतनीकरणासाठी आवाहन

नांदेड, दि. 23 :-  नांदेड जिल्हयातील सर्व वाहन चालक, मालकांनी सोमवार 23 सप्टेंबर 2019 पासून ज्या वाहनाचे योग्यता प्रमाणपत्र नूतनीकरणासाठी अपॉईंटमेट घेतले आहे, अशाच वाहनांची योग्यता प्रमाणपत्र नूतनीकरणासाठी तपासणी करण्यात येईल. तसेच वाहन धारकांनी ज्या दिवशी अपॉईंटमेंट घेतले आहे त्याच दिवशी वाहन ब्रेक टेस्ट ट्रॅकवर  तपासणीसाठी आणावेत इतर दिवशी वाहन ब्रेक टेस्ट ट्रॅकवर आणू नये अन्यथा योग्य ती कारवाई करण्यात येईल याची सर्वांनी नोंद घ्यावी, असे उप प्रादेशिक परिवहन अधिकारी, नांदेड यांनी कळविले आहे.

0000