प्रचार व प्रसार माध्‍यमांचा प्रचारासाठी

गैरवापर करणाऱ्यांवर जिल्‍हा प्रशासनाची करडी नजर

नांदेड,दि. 31 :- जिल्‍हा माध्‍यम प्रमाणीकरण व संनियंत्रण समिती कक्षात जिल्‍हा प्रशासनाने प्रसार माध्‍यमांद्वारे प्रचारासाठी गैरवापर होवू नये. यासाठी जिल्‍हा माध्‍यम प्रमाणीकरण व संनियंत्रण समितीमार्फत करडी नजर ठेवण्‍यात येत आहे. आदर्श आचार सहिंतेचा भंग होवू नये यासाठी प्रचार व प्रसार माध्‍यमांचा प्रसारासाठी गैरवापर करणा-यावर तसेच विनापरवानगी प्रचार करणा-यावर कार्यवाही करण्‍याचे निर्देश जिल्‍हाधिकारी तथा जिल्‍हा निवडणूक निर्णय अधिकारी अरुण डोंगरे यांनी भेटी दरम्‍यान दिले.

या दरम्‍यान जिल्‍ह्यात वर्तमानपत्रामध्‍ये येणा-या बातम्‍या, वृत्‍त, लेख तसेच समाजमाध्‍यमांतील व्‍हॉट्स अप ग्रुपवरील विनापरवानगी पोस्‍ट, मोबाईलद्वारे एसएमएस, बल्‍क एसएमएस अथवा प्रचार करणा-या तसेच सेवा पुरवविणा-या एजन्‍सीना यावेळी नोटीसा बजावल्‍या आल्‍या असून यासंदर्भात कारवाईचे निर्देशही त्‍यांनी समिती सदस्‍यांना यावेळी दिले.

तसेच विविध भाषेतील ऊर्दू, हिंदी, इंग्रजी या माध्‍यमातील दैनंदिन वृत्‍त अहवालाची तपासणी केली. मिडिया कक्ष स्थित स्‍थानिक वृत्‍त वाहिन्‍यांसह विविध वृत्‍त वाहिन्‍यांवरुन प्रसारित झालेल्‍या बातम्‍यांचाही यावेळी आढावा घेण्‍यात आला.  

उमेवारांचे फेसबुक, व्टिटर, इन्‍स्‍टाग्राम, युट्युब, व्‍हॉट्स अप या समाज माध्‍यमातून आक्षेपार्ह मजकूर अथवा ऑडिओ, व्हिडीओ क्लिप, संदेशातील मजकूर यासंदर्भात समितीने दैनंदिन अहवाल सादर करण्‍याच्‍या सुचनाही जिल्‍हाधिकारी तथा निवडणूक निर्णय अधिकारी अरुण डोंगरे यांनी सुचना केल्‍या.

यावेळी उपजिल्‍हाधिकारी निवडणूक प्रशांत शेळके, जिल्‍हा प्रशासन अधिकारी राजेंद्र चव्‍हाण, माहिती अधिकारी तथा सदस्‍य सचिव श्रीमती मीरा ढास, प्रा. डॉ दीपक शिंदे समिती सदस्‍यांची उपस्थिती होती. मिलिंद व्‍यवहारे यांचीही यावेळी उपस्थिती होती.

0000

वृत्त क्र. 253

लोकसभा सार्वत्रिक निवडणूक

18 एप्रिलला मतदानाच्या दिवशी

भरणारे आठवडी बाजार बंद राहणार

नांदेड, दि. 31 :-  लोकसभा सार्वत्रिक निवडणुकीच्या मतदानाच्या दिवशी गुरुवार 18 एप्रिल 2019 रोजी जिल्ह्यात भरणारे सर्व आठवडी बाजार बंद ठेवण्याचे आदेश मार्केट ॲड फेअर ॲक्ट 1862 चे कलम 5 अन्वये जिल्हाधिकारी तथा जिल्हदंडाधिकारी अरुण डोंगरे यांनी निर्गमीत केले आहेत.   

जिल्ह्यात लोकसभा सार्वत्रिक निवडणूक-2019 साठी नांदेड, हिंगोली व लातूर या लोकसभा मतदारसंघातील किनवट, हदगाव, भोकर, नांदेड उत्तर, नांदेड दक्षिण, लोहा, नायगाव, देगलूर व मुखेड या नऊ विधानसभा मतदारसंघात गुरुवार 18 एप्रिल 2019 रोजी मतदान होणार आहे. त्याअनुषंगाने पणन संचालक महाराष्ट्र राज्य पुणे यांनी मतदान दिनांकास जिल्ह्यात भरणारे सर्व आठवडी बाजार बंद ठेवण्यास परवानगी दिली आहे.  

गुरुवार 18 एप्रिल 2019 रोजी आठवडी बाजार भरणाऱ्या गावांची ठिकाणाची नावे पुढील प्रमाणे आहेत. अर्धापूर तालुका – मालेगाव, नायगाव खै.- नायगाव (बा.), भोकर, हदगाव- वाळकी खु, ल्याहारी (वाळकी फाटा), तळणी. किनवट- उमरी बा., बेल्लोरी (धा.). देगलूर- लोणी, बिलोली, मुखेड- बेटमोगरा, राजुरा बु, नांदेड- सिडको, कंधार- कुरुळा, मंगलसांगवी या ठिकाणची आठवडी बाजार दुसऱ्या दिवशी म्हणजे शुक्रवार 19 एप्रिल 2019 रोजी भरविण्यात यावेत, असे आदेशात म्हटले आहे.

0000

मौजे ब्रम्हपुरी गोदावरी नदीच्या

पात्र परिसरात कलम 144 लागू

नांदेड, दि. 31 :- मौजे ब्रम्हपुरी येथील गोदावरी नदी पात्र परिसरात शांतता व सुव्यवस्था अबाधीत रहावी यासाठी फौजदारी प्रक्रिया संहिता 1973 चे कलम 144 प्रमाणे नांदेड ग्रामीण पोलीस स्टेशनच्या हद्दीतील नदी पात्रातील परिसर प्रतिबंधीत क्षेत्र म्हणून 27 मार्च 2019 पासून घोषित करण्यात आले आहे. त्याबाबत जिल्हादंडाधिकारी कार्यालयाने आदेश निर्गमीत केले आहेत.

याबंदी आदेशात म्हटले आहे की, फौजदारी प्रक्रिया संहिता 1973 चे कलम 144 नुसार प्राप्त अधिकाराचा वापर करुन चतु:सिमा पुर्वेस वाजेगाव कोल्हापुरी बंधारा, पश्चिमेस नांदेड ते देगलूरकडे जाणाऱ्या रोडवरील जुना पूल, दक्षिणेस गोदावरीचे नदीचे पात्र आणि उत्तरेस चिल्ला / दर्गाची संरक्षण भिंत यामधील जागा 27 मार्च रोजी सकाळी 6 वाजेपासून ते 26 एप्रिल 2019 रोजीच्या मध्यरात्री पर्यंत फौजदारी प्रक्रिया संहिता 1973 चे कलम 144 प्रमाणे प्रतिबंधीत क्षेत्र म्हणून जिल्हादंडाधिकारी यांनी घोषित केले आहे.

हा आदेश शासकीय कर्तव्यावरील अधिकारी व कर्मचारी, एक खिडकी पथकातील अधिकाऱ्यांनी परवानगी दिलेल्या भाविकांना तसेच ज्यांना जिल्हाधिकारी नांदेड व पोलीस अधीक्षक नांदेड यांनी परवानगी दिली अशा व्यक्तींना लागू राहणार नाही.

00000

माजी सैनिक आणि आप्‍तस्‍वकीयांसाठी

नांदेड येथे नि:शुल्‍क डोळे तपासणी शिबीर 

नांदेड दि. 31 :-  माजी सैनिक आणि त्‍यांच्‍या आप्‍तस्‍वकीयांसाठी नि:शुल्‍क डोळे तपासणी शिबिर मंगळवार 2 एप्रिल 2019 रोजी सकाळी 9 वाजेपासुन इसीएचएस क्लिनीक नांदेड येथे आयोजित करण्‍यात आले आहे.

या शिबिरात जालना येथील प्रसिध्‍द नेत्र विशारदांच्‍या पथकाव्‍दारे आधुनिक तंत्रज्ञान पध्‍दतीने गरजुंची नेत्र तपासणी करण्‍यात येणार असुन माजी सैनिक आणि त्‍यांच्‍या आप्‍तस्‍वकीयांने मोठया संख्‍येने याचा लाभ घ्‍यावा, असे आवाहन जिल्‍हा प्रशासन आणि मेजर बिक्रम थापा ( सेवानिवृत्‍त) यांनी केले आहे.

00000

उन्हाळ्यात उष्‍णलाटेची तीव्रता निर्माण होण्‍याची शक्‍यता

नागरीकांनी काळजी घ्‍यावी - जिल्‍हा प्रशासनाचे आवाहन  

नांदेड दि. 31 :-  उन्‍हाळयाची सुरुवात यावर्षी लवकरच झाली असुन मार्च ते जून या कालावधीत राज्‍यात उष्‍णतेची तिव्रता निर्माण होण्‍याची शक्‍यता भारतीय हवामान खात्यांनी व्‍यक्‍त केले आहे. या उष्‍णतेच्‍या लाटेपासुन बचाव करण्‍यासाठी नागरीकांनी व परिक्षा कालावधी असल्‍यामुळे विद्यार्थ्‍यांनी योग्‍य ती खबरदारी घ्‍यावी, असे आवाहन नांदेड जिल्‍हा प्रशासनातर्फे करण्‍यात आले आहे.

या उष्‍माघातामुळे शरीराचे तापमान वाढुनन व्यक्ती बेशुद्ध झाल्यास तातडीचे वैद्यकीय उपचार करावे. उष्माघात होऊ नये यासाठी सोबत मोठा पांढरा पंचा आणि डोके झाकेल असा रुमाल, पूर्ण अंगभर शक्यतो सुती कपडे परिधान करावे,कमीत-कमी वेळात इच्छित स्थळी पोहोचणे, जवळ पाण्याची बाटली बाळगणे, दर अर्ध्या तासाने दोन-तीन ग्लास पाणी पिणे, अधून-मधून बर्फ न टाकलेले लिंबू पाणी, फळांचे रससपिणे अशा उपायानी उष्माघात टाळता येतो. उष्माघातावरील उपचार शरीराच्या तापमान वाढीच्या कारणावर अवलंबून आहेत.

कडक उन्हामध्ये शरीराचे तापमान वाढल्याची शंका येताच स्वत:च्या रक्षणासाठी सावलीमध्ये बसणे आणि भरपुर पाणी पिणे अशा उपायांनी पुरेसा आराम मिळतो. बाहेरील तापमान चाळीसहून अधिक आणि शरीराचे तापमान चाळीस झाल्यास उष्माघात होतो. प्रखर तापमानात बाहेर उन्हात फिरल्‍याने शरीरातील पाण्याची मात्रा अचानक कमी होते व मृत्यु ओढावतो, कानास फडके न बांधल्‍याने उष्णता मेंदुपर्यंत जाते व व्‍यक्‍ती बेशुध्‍द होते, उपाशी पोटी उन्हात फिरल्‍याने शरीरास साखरेचा / ग्लुकोजचा पुरवठा कमी होतो, अति थंड पाणी पिल्‍याने शरीराच्या तापमानात अचानक बदल होतो. अश्‍यावेळी त्‍वरीत वैद्यकिय उपचार घेणे आवश्‍यक आहे.

कारण नसतांना उन्‍हात न जाणे, भरपुर पाणी प्राशन करने आणि सुती कपडे परिधान करने याद्वारे उष्‍माघात टाळता येतो. नागरीकांना उष्‍माघाताचा रुग्‍ण आढळल्‍यास तात्‍काळ त्‍यास जवळच्‍या रुग्‍णालयात प्रथमोपचारासाठी पाठवावे.

मागील वर्षापेक्षा यावर्षी उन्‍हाळयाची सुरुवात लवकर झालेली असुन उष्‍णतेच्‍या लाटेपासुन कोणत्‍याही प्रकारची जीवित हानी होऊ न देण्‍यासाठी जिल्‍हयातील महानगरपालिका, शासकीय आणि खाजगी आरोग्‍य यंत्रणेशी समन्‍वय साधुन उष्‍णतेच्‍या लाटेपासुन नागरीकांचे बचाव करावयाच्‍या तसेच यंत्रणा सज्‍ज ठेवावयाच्‍या सूचना जिल्‍हा प्रशासनाद्वारे निर्गमित करण्‍यात आल्‍या आहेत. उष्‍णतेची तिव्रता आणि तापमानात अचानक होणा-या  वाढीवर नागरीकांनी व विद्यार्थ्‍यांनी सावधगिरी बाळगावी.

00000

शासकीय व्यवहारांसाठी स्टेट बँक शाखा

31 मार्चला रात्री 10 वाजेपर्यंत सुरु राहणार

नांदेड दि. 30 :- जिल्ह्यातील स्टेट बँक ऑफ इंडिया यांची शाखा कार्यालये रविवार 31 मार्च 2019 रोजी शासकीय व्यवहारासाठी रात्री 10 वाजेपर्यंत सुरु ठेवण्याबाबत जिल्हाधिकारी अरुण डोंगरे यांनी आदेशीत केले आहे.

महाराष्ट्र राज्य कोषागार अधिनियम 1968 अन्वये जिल्हाधिकारी यांनी निर्गमीत केलेल्या आदेशात म्हटले आहे की, स्टेट बँक ऑफ इंडियाच्या नांदेड शहरातील व तालुका मुख्यालयातील सर्व शाखा कार्यालये रविवार 31 मार्च 2019 रोजी रात्री 10 वाजेपर्यंत शासकीय व्यवहारासाठी सुरु राहतील.

000000

दिव्‍यांग मतदार जनजागृतीसाठी कौठा व विषणुपूरीत पथनाट्य सादर

             नांदेड, दि. 30 :-   17 व्‍या लोकसभा सार्वञिक निवडणुक 2019 साठी “सुलभ निवडणुक”  हे घोषवाक्‍य भारत निवडणुक विभाग यांनी घेतले आहे. याकार्यक्रमांतर्गत मतदान प्रक्रीयेतील सर्वांचा सहभाग वाढावा यासाठी निवडणुक 086 उत्‍तर मतदार संघ व 087  दक्षिण नांदेड मतदार संघात दिव्‍यांग मतदारांमध्‍ये जनजागृती करण्‍यासाठी स्‍वतंञ कक्ष स्‍थापन करुन त्‍या कक्षामार्फत पथनाट्याव्‍दारे मतदार जनजागृती करण्‍यात येत आहे.

      वरील प्रमाणे चालु असलेल्‍या कार्यक्रमांतर्गत पुनश्‍च दि.28/03/019 रोजी कौठा येथील जिल्‍हा परिषद शाळेत तसेच दि.29/03/2019 रोजी विष्‍णुपूरी येथे दिव्‍यांग मतदारांसाठी पथनाट्य सादर केले.”माझ मत माझा स्‍वाभिमान”  या पथनाट्याव्‍दारे लोकशाहीतील प्रत्‍येकाच्‍या मताचे महत्‍व तसेच दिव्‍यांगासाठी निवडणुक विभागाव्‍दारे केद्रावर पुरविण्‍यात येणा-या सोयी सुविधांवर प्रबांधन करण्‍यात आले.

    वरील प्रमाणे दोन्‍ही दिवशी कार्यक्रमात संबंधीत मतदान केंद्रस्‍तरीय अधिकारी उपस्थित होते. सदरील पथनाट्यास दिव्‍यांग मतदारांनी उत्‍सफुर्तपणे प्रतिसाद दिला. पथनाट्याव्‍दारे उपस्थित दिव्‍यांग मतदारांचे मने जिंकली. या कार्यक्रमाप्रसंगी कौठा येथील दिव्‍यांग मतदार म्‍हणुन रुपेश भोकरे ,‍देवानंद काकडे व पडलवार यांनी आपले मनोगत व्‍यक्‍त करुन निवडणुक विभागाचे केलेल्‍या जनजागृती बद्दल आभार व्‍यक्‍त केले. याप्रसंगी कार्यक्रमाची प्रस्‍तावना प्रा. डॉ. संदीपराव काळे यांनी केली.

     या कार्यक्रमासाठी नारायणराव चव्‍हाण विधी महाविद्यालयाचे विद्यार्थी सुरज मंञी, मारोती कदम,केदार जोशी,कर्णधार मगर,चैतन्‍य अर्जुने ,ऋषीकेश यादव यांनी पथनाट्य कलाकार म्‍हणुन आपला सहभाग नोंदवला.      

     सहाय्यक निवडणुक निर्णय अधिकारी श्री.लतीफ पठाण व तहसिलदार नांदेड श्री.किरण अंबेकर यांचे मार्गदर्शनाखाली सदर कक्षाचे प्रमुख प्रा.डॉ.अशोक सिध्‍देवाड ,प्रा.डॉ.महेश पाटील कार्लेकर ,प्रा.डॉ.सुग्रीव फड, प्रा.डॉ.दत्‍ता म्‍हेञे हे दिव्‍यांग मतदारांचे मतदाणात 100  टक्‍के सहभागी दृष्‍टीकोनातून विशेष प्रयत्‍न करत आहेत.

00000

लोकसभा सार्वत्रिक निवडणूक

तेलंगणा राज्यातील सीमावर्ती भागात

दारु दुकाने बंद ठेवण्याचा आदेश    

नांदेड, दि. 30 :- लोकसभा सार्वत्रिक निवडणूक- 2019 संदर्भात नांदेड जिल्ह्याच्या शेजारील तेलंगणा राज्याच्या अदिलाबाद, निझामाबाद, निर्मल, कामारेड्डी या जिल्ह्यात 11 एप्रिल 2019 रोजी मतदान व 23 मे 2019 रोजी मतमोजणी होत आहे. या अनुषंगाने तेलंगणा राज्यातील 5 कि.मी अंतरावरील सीमावर्ती भागात मतदान व मतमोजणी होत असलेल्या ठिकाणी दारु दुकाने बंद ठेवण्याचे आदेश जिल्हाधिकारी अरुण डोंगरे यांनी काढले आहेत.

या निवडणुकीसंदर्भात होत असलेल्या मतदानाची प्रक्रिया मुक्त व निर्भयपणे शांततेत पार पाडण्यास मदत व्हावी व शांतता, सुव्यवस्थेचा प्रश्न निर्माण होवून अनुचित प्रकार घडू नये यासाठी मुंबई दारुबंदी कायदा 1949 चे कलम 142 (1) अन्वये जिल्हाधिकारी अरुण डोंगरे यांनी तेलंगणा राज्यातील 5 कि.मी. अंतरावरील सीमावर्ती भागात मतदान होत असलेल्या ठिकाणी सर्व सीएल-3, एफएल-2, एफएल-3 (परवाना कक्ष) एफएल / बीआर-2 व ताडी दुकाने (टिडी-1) अनुज्ञप्त्या बंद ठेवण्याचे आदेश दिले आहे.

तेलंगणा राज्यातील 5 कि.मी. अंतरावरील सीमावर्ती भागात मतदान होत असलेली गावे- मतदान संपण्यापूर्वी 48 तास अगोदर सायंकाळी 6 वाजेपासून 9 एप्रिल रोजी. मतदानाचा अगोदरचा दिवस 10 एप्रिल 2019 रोजी संपूर्ण दिवस. मतदानाचा दिवस 11 एप्रिल 2019 रोजी मतदान प्रक्रिया पूर्ण होईपर्यंत संपूर्ण दिवशी तर मतमोजणीचा दिवस 23 मे 2019 रोजी मतमोजणीची प्रक्रिया संपूर्ण होईपर्यंत, हा आदेश लागू राहील.

या आदेशाचा भंग करणाऱ्या अनुज्ञप्तीधारकाविरुद्ध दंडात्मक कार्यवाही करण्यात येईल याची संबंधितांनी नोंद घ्यावी, असेही आदेशात नमूद केले आहे.

000000

लोकसभा सार्वत्रिक निवडणूक

जिल्ह्यात दारु दुकाने बंद ठेवण्याचा आदेश    

नांदेड, दि. 30 :- जिल्ह्यात लोकसभा सार्वत्रिक निवडणूक कार्यक्रमानुसार मतदान 18 एप्रिल 2019 रोजी तर मतमोजणी 23 मे 2019 रोजी होणार आहे. यावेळी निवडणुकीसंदर्भात होत असलेल्या मतदानाची प्रक्रिया मुक्त व निर्भयपणे शांततेत पार पाडण्यास मदत व्हावी व शांतता, सुव्यवस्थेचा प्रश्न निर्माण होऊन अनुचित प्रकार घडू नये यासाठी मुंबई दारुबंदी कायदा 1949 चे कलम 142 (1) अन्वये जिल्हाधिकारी अरुण डोंगरे यांनी नांदेड जिल्हा हद्दीतील सर्व मतदान व मतमोजणी होत असलेल्या ठिकाणी सर्व सीएल-3, एफएल-2, एफएल-3 (परवाना कक्ष) एफएल / बीआर- 2 व ताडी अनुज्ञप्त्या बंद ठेवण्याचे आदेश दिले आहेत.

हा आदेश नांदेड जिल्ह्यातील लोकसभा निवडणूक 2019 साठी मतदान होत असलेल्या ठिकाणी मतदान संपण्यापूर्वी 48 तास अगोदर म्हणजे 16 एप्रिल 2019 रोजी सायंकाळी 6 वाजेपासून ते 17 एप्रिल 2019 रोजी संपूर्ण दिवस, मतदानाचा दिवशी 18 एप्रिल रोजी संपूर्ण दिवस तसेच मतमोजणीच्या दिवशी मतमोजणी होत असलेल्या ठिकाणी 23 मे 2019 रोजी मतमोजणीची प्रक्रिया पूर्ण होईपर्यंत अंमलात राहील.

या आदेशाचा भंग करणाऱ्या अनुज्ञप्तीधारकाविरुद्ध दंडात्मक कार्यवाही करण्यात येईल, असेही आदेशात नमूद केले आहे.

00000

निवडणूक निरीक्षक हरदीप सिंग  व जिल्हाधिकारी डोंगरे यांच्‍या हस्‍ते

नांदेड लोकसभा निवडणूक संदर्भिकेचे प्रकाशन

नांदेड, दि. 29 :- १६- नांदेड लोकसभा सार्वत्रिक निवडणूक -२०१९ च्‍या माहितीच्‍या संदर्भिकेचे प्रकाशन निवडणूक निरीक्षक (जनरल) हरदीप सिंग  व जिल्‍हाधिकारी अरुण डोंगरे यांच्‍या हस्‍ते  जिल्‍हाधिकारी कार्यालयात झालेल्‍या पत्रकार परिषदेत  जिल्‍हाधिकारी यांच्‍या बैठक कक्षात  करण्‍यात आले.  

प्रसार माध्‍यमांना विश्‍लेषणासाठी तसेच अभ्‍यासकांना उपयुक्‍त ठरेल अशी माहिती या संदर्भिकेतून देण्‍यात आल्‍याची माहिती जिल्‍हाधिकारी अरुण डोंगरे यांनी दिली. 

यावेळी अप्‍पर जिल्‍हाधिकारी खुशालसिंह परदेशी, उपजिल्‍हाधिकारी (निवडणूक) प्रशांत शेळके, जात प्रमाणपत्र पडताळणी समितीचे अध्‍यक्ष राम गगराणी, सहाय्यक निवडणूक निर्णय अधिकारी तथा उपविभागीय अधिकारी लतीफ पठाण,जिल्‍हा प्रशासन अधिकारी राजेंद्र चव्‍हाण, डॉ. दिपक शिंदे,  जनसंपर्क अधिकारी मिलिंद व्‍यवहारे, विविध प्रसार माध्‍यमांचे प्रतिनिधी, आदिंची यावेळी उपस्थिती होती.

जिल्हा माहिती अधिकारी अनिल आलुरकर यांनी या पुस्तिकेचे संपादन केले असून माहिती अधिकारी श्रीमती मीरा ढास, मिलिंद व्यवहारे, विवेक डावरे, काशिनाथ आरेवार यांनी सहाय्य केले आहे.

जिल्‍हा माहिती कार्यालयाच्‍यावतीने काढण्‍यात आलेल्‍या संदर्भिकेमध्‍ये नांदेड लोकसभा मतदार संघाचा नकाशा,  निवडणूक आचारसंहिता, पेडन्‍युजचे निकष,सोशल मिडिया, इलेक्‍ट्रॉनिक मतदान यंत्र, व्‍हीव्‍हीपॅट,निवडणूक आयोग तसेच प्रमुख अधिकारी यांचे संपर्क क्रमांक, मतदान केंद्र संख्‍या, मतदारांची संख्‍या तसेच नांदेड लोकसभा निवडणूकीतील १९५१ ते २०१४ पर्यंतचे निकाल, निवडणूक कार्यक्रमासह आदि माहिती संदर्भिका पुस्तिकेत देण्‍यात आली आहे.

००००

निवडणूक निरीक्षक हरदीप सिंग यांचे आगमन

नांदेड, दि. २६- भारत निवडणूक आयागाने लोकसभा निवडणूक -२०१९ ची घोषणा केली आहे. त्‍यानुसार १६- नांदेड लोकसभा निवडणुकीसाठी श्री. हरदीप सिंग यांची निवडणूक निरीक्षक (जनरल) म्‍हणून नियुक्‍ती करण्‍यात आली आहे.

          निवडणूक निरीक्षक हरदीप सिंग यांचे वास्‍तव्‍य निवडणूक काळात मिनी सह्याद्री , शासकीय विश्रामगृह, स्‍नेह नगर, नांदेड येथे आहे. त्‍यांच्‍या कक्षाचा दुरध्‍वनी क्र.०२४६२-२५०१३० असून त्‍यांचा भ्र.क्र.९४२००७५६१२ असा आहे. १६- नांदेड लोकसभा परिक्षेत्रातील नागरिकांना लोकसभा सार्वत्रिक निवडणुकीसंदर्भात आपल्‍या काही तक्रारी असतील, तर  निवडणूक  निरीक्षक यांच्‍याशी संपर्क  साधावा.

श्री हरदीप सिंग (जनरल) हे सकाळी ८-०० ते ९-०० या दरम्‍यान सर्वसामान्‍य जनतेसाठी त्‍यांचे तात्‍पुरते निवासस्‍थान म्‍हणजेच मिनी सह्याद्री, शासकीय विश्रामगृह, स्‍नेह नगर , नांदेड येथे उपलब्‍ध राहतील.

          तरी आपल्‍या कांही अडचणी असल्‍यास निवडणूक निरीक्षक यांच्‍याशी संपर्क साधावा, असे आवाहन जिल्‍हाधिकारी तथा जिल्‍हा निवडणूक निर्णय अधिकारी १६- नांदेड लोकसभा मतदार संघ यांनी केले आहे.

०००००