स्पर्धा परीक्षेला आत्मविश्वासाने सामोर जावे

                                 - निवासी उपजिल्हाधिकारी संतोष वेणीकर

नांदेड, दि. 6 :- स्पर्धा परीक्षेला सामोरे जातांना आत्मविश्वास व सकरात्मक दृष्टीकोण ठेवल्यास यश हमखास मिळते, असे प्रतिपादन निवासी उपजिल्हाधिकारी संतोष वेणीकर यांनी केले. ते जिल्हा प्रशासनाच्यावतीने आयोजीत दरमाह 5 तारखेच्या स्पर्धा परीक्षा मार्गदर्शन शिबिरामध्ये विद्यार्थ्यांना मार्गदर्शन करतांना बोलत होते. या शिबीरास पुणे येथील विषयतज्ज्ञ अमोल दशपूते, जिल्हा ग्रंथालय अ‍धिकारी आशिष ढोक यांची प्रमुख उपस्थिती होती.

श्री. वेणीकर म्हणाले, स्पर्धा परीक्षेची तयारी करणाऱ्या विद्यार्थ्यांनी चांगल्या मित्राची संगत धरावी. स्वत:ला झोकुन देऊन परीक्षेची तयारी करावी. स्पर्धा परीक्षेत यश मिळाल्यानंतर ज्या समाजातून आलो आहोत त्या समाजाची नाळ न तोडता समाजाच्या खालच्या स्तरापर्यंत विकास पोहचवावा.

श्री. दशपूते यांनी स्पर्धा परीक्षेतील NCERT अभ्यासक्रमाबद्दल अभ्यासपूर्ण मार्गदर्शन करतांना केद्रीय लोकसेवा व महाराष्ट्र लोकसेवा आयोगाच्या परिक्षेमधील NCERT चे पुस्तकाचे महत्व व येणाऱ्या प्रश्नाचे स्वरुप याबद्दल मार्गदर्शन केले.    

प्रास्ताविक जिल्हा ग्रंथालय अधिकारी श्री ढोक यांनी केले तर सुत्रसंचालन व आभार कु. आरती कोकुलवार यांनी मानले. शिबिराचे यशस्वी आयोजनासाठी प्रताप सुर्यवंशी, बाळू पावडे, संजय कर्वे, कोडिंबा गाडेवाड व खंडेलोटे यांनी सहाय्य केले.

000000