गुटखा, पानमसाला तत्सम पदार्थाची

विक्री करणाऱ्या पानटपऱ्यांवर कारवाई

नांदेड, दि. 29 :- अन्न व औषध प्रशासन, तंबाखू नियंत्रण विभाग, स्थानिक गुन्हे शाखा यांनी नुकतेच नांदेड शहरातील विविध पानस्टॉल यांच्यावर कार्यवाही करुन बंदी असलेला गुटखा, पानमसाला व तत्सम पदार्थ जप्त केली आहेत. प्रतिबंधीत अन्न पदार्थांची साठवणूक, वाहतूक, विक्री व उत्पादन करणाऱ्या अन्न व्यावसायिकांविरुद्ध नियमित कार्यवाही होणार असून अन्नपदार्थ छुप्प्या, चोरट्या पद्धतीने विक्री, उत्पादन, साठा, वाहतुक करु नये, असे आवाहन अन्न व औषध प्रशासन नांदेड यांनी केले आहे.

यात रियाज सौदागर पान  शॉप शिवाजीनगर, गोदावरी पान शॉप आयटीआय कॉर्नर, नटराज पान शॉप शिवाजीनगर, गुरु डिलक्स पान शॉप वर्कशॉप व सावजी पान शॉप वजिराबाद नांदेड यांच्यावर कार्यवाही करण्यात आली. त्यांच्या ताब्यातून प्रतिबंधित अन्नपदार्थ गुटखा, सुगंधित तंबाखू आदी 23 हजार 390 रुपयाचा साठा, सुगंधित तंबाखू व इतर पानमसाला पदार्थ वापरुन त्यांचे मिक्चर बनविण्यासाठीची मशिन जप्त केली आहे. या प्रकरणी संबंधित पान शॉपचे शेख रमजाने, चंद्रकांत माने, मोहमद इमरान, एजाज खान व सुरेश साहू यांचे विरुद्ध भाग्यनगर, शिवाजीनगर व वजिराबाद पोलीस स्टेशन नांदेड येथे अन्न सुरक्षा कायदा व भादवि नुसार गुन्हा दाखल झाला आहे. न्यायालायात गुन्हा सिद्ध झाल्यास संबंधितास अजीवन तुरुंगवास आणि 10 लाख रुपयापर्यंत शिक्षेची तरतूद आहे. या संयुक्त कार्यवाहीत अन्न सुरक्षा अधिकारी श्री. कावळे, तंबाखू नियंत्रण कक्षाचे डॉ. शिंदे, सहाय्यक पोलीस निरीक्षक श्री. परदेशी, खाडे व नमुना सहायक बालाजी सोनटक्के यांनी सहभाग नोंदवला.

000000