वृत्त क्र. 455

 

नांदेड जिल्ह्यात पशुधनाचे शंभर टक्के ईअर टॅगिंगची मोहिम

·         पशुसंवर्धन विभागाला पशूपालकांनी प्रतिसाद देण्याचे आवाहन

 

नांदेड दि. 31 :- नांदेड जिल्ह्यातील पशुधनाचे १०० टक्के इअर टॅगिंग करण्यासाठीची प्रक्रिया एक जून पासून जिल्ह्यात सुरू होत आहे. ही प्रक्रिया सर्वांसाठी आवश्यक व अनिवार्य आहे.या प्रक्रियेला प्रतिसाद देण्याचे आवाहन प्रशासनाने केले आहे.

 

जनावरांची खरेदी-विक्री, शेतकऱ्यांची फसवणूक टाळणे तसेच राज्यातील सर्व पशुधनाची सर्वकष माहिती एकाच ठिकाणी उपलब्ध होण्याच्या दृष्टीने राज्यातील सर्व पशुधनाचे ईअर टॅगिंग करणे बंधनकारक करण्यात आले आहे. जिल्ह्यातील पशुधन विकास अधिकारी, पशुधन पर्यवेक्षक यांच्या कार्यक्षेत्रातील पशुधनास 100 टक्के ईअर टॅगिंग करुन त्याची भारत पशुधन प्रणालीवर नोंद अदययावत करण्याची कार्यवाही करण्याचे नियोजन पशुसंवर्धन विभागाच्यावतीने करण्यात आले आहे.

 

जनावरांच्या बाजारात ईअर टॅगिंग नसलेले पशुधन असल्यास त्यांची तिथेच ईअर टॅगिंग करण्याच्या दृष्टीने पशुधन विकास अधिकारी ,पशुधन पर्यवेक्षक यांच्या सेवा उपलब्ध करुन दिल्या आहेत.

 

नांदेड जिल्हयांमधील कार्यरत एकूण ७ फिरते पशुचिकित्सापथक यांची प्रत्येक जनावराच्या बाजारांमध्ये सेवा उपलब्ध करून देण्यात येत आहे. त्याद्वारे बाजारातील पशुधनास आवश्यक पशुवैदयकीय सेवा तसेच विषयांकित बाबींच्या अनुषंगाने शेतकरी पशुपालक, जनावरांचे व्यापारी यांचे प्रबोधन होईल.

 

 ईअर टॅगिंगमुळे विशिष्ठ भागातून जनावरांची खरेदी-विक्री, चाऱ्याची टंचाई, दुधाचे भाव पडणे, दुष्काळ याअनुषंगाने पुरावाजन्य निर्णय घेणे प्रशासनाला शक्य होणार आहे. बाहेरच्या राज्यातून येणाऱ्या जनावरांची खरेदी-विक्री टॅगिंग करुन झाल्यास त्यांना रोगप्रतिबंधक लसीकरण प्राधान्याने करता येईल व बाहेरच्या राज्यातून आजारी जनावरे राज्यात दाखल झाल्याने होणारे साथरोग प्रादूर्भाव यावर नियंत्रण ठेवणे शक्य होणार आहे.

 

पशुधनाच्या बाजारामध्ये खरेदी –विक्रीसाठी पशुधनाची माहिती विक्री करण्यात आलेल्या संबंधीत जिल्हयाच्या पशुसंवर्धन विभागास सादर करणे तसेच खरेदी-विक्री करण्यात आलेल्या पशुधनाची ईअर टॅगिंग करुन नोंदी अदयावत करणे बाबत निर्देशित केले आहे. बाजारामध्ये पशुधनाची ने-आण करताना कोणत्याही प्रकारची क्रुरता होणार नाही याची देखील दक्षता बाळगणे आवश्यक आहे. प्राण्यांमधील क्रुरतेस प्रतिबंध अधिनियम 1962 (जनावरांच्या बाजारांची नियमावली-2017) तसेच शासन निर्णयाच्या अनुषंगाने नांदेड जिल्हयातील सर्व पशुधनाचे आठवडी बाजार , कृषि उत्पन्न बाजार समिती यांनी याची तात्काळ अंमलबजावणी करावी असे निर्देश पशुसंवर्धन विभागाने दिले आहेत.

 

नांदेड जिल्ह्यात सुमारे 12 पेक्षा अधिक जनावरांचे बाजार भरतात. ज्यातील पाच बाजार सर्वात मोठे असून त्यामध्ये 100 पेक्षा अधिक पशुधनाची खरेदी –विक्री करण्यात येते. ईतर पशुधनाच्या बाजारांमध्ये कमी, मध्यम संख्येच्या पशुधनाची खरेदी –विक्री केली जाते. नांदेड जिल्ह्यातील सर्व सहाय्यक आयुक्त पशुसंवर्धन यांना जनावरांच्या बाजारामध्ये सर्व बाबींची काटेकोरपणे अंमलबजावणी करण्याबाबत जबाबदारी देण्यात आलेली आहे.

00000

वृत्त क्र. 454

 जागतिक तंबाखू विरोधी दिनानिमित्त

जिल्हा रुग्णालयात विविध कार्यक्रमाचे आयोजन

 

·         जनजागृती रॅलीस हिरवी झेंडा दाखवून प्रारंभ

 

नांदेड दि. 31 :-  ३१ मे हा दिवस “जागतिक तंबाखू नकार दिन” म्हणून जगभरात साजरा करण्यात येतो. त्याअनुषंगाने जिल्हा सामान्य रुग्णालयात इंडियन डेंटल असोसिएशन आणि जिल्ह्यातील सेवाभावी संस्था यांच्या संयुक्त विद्यमाने जिल्हाधिकारी अभिजित राऊत व जिल्हा शल्य चिकित्सक डॉ. निळकंठ भोसीकर यांच्या मार्गदर्शनाखाली आज प्रभात फेरीचे आयोजन करण्यात आले होते. या रॅलीच्या माध्यमातून तंबाखूच्या दुष्परिणामांची लोकांमध्ये जनजागृती व्हावी या उद्देशाने रॅलीचे आयोजन करण्यात आले होते. या रॅलीस इंडियन डेंटल असोसिएशनचे अध्यक्ष डॉ. मनिष दागडीया यांनी रॅलीला हिरवा झेंडा दाखवून सुरुवात केली. रॅली दरम्यान तंबाखूजन्य पदार्थांच्या दुष्परिणामांबाबतचे पोस्टर्स, चित्रफीती यांच्या माध्यमातून तंबाखू विरोधी जनजागृती करण्यात आली. तसेच तंबाखू विरोधी शपथ घेण्यात आली.

 

या रॅलीसाठी जिल्हा रुग्णालयातील अति. जिल्हा शल्य चिकित्सक डॉ. संजय पेरके, निवासी वैद्यकीय अधिकारी डॉ. विद्या झिने, निवासी वैद्यकीय अधिकारी (बाह्य) डॉ. राजाभाऊ बुट्टे, नोडल अधिकारी   डॉ. हनुमंत पाटील, निवासी वैद्यकीय अधिकारी डॉ. एच.के. साखरे, डेंटल सर्जन डॉ. साईप्रसाद शिंदे, डेंटल सर्जन डॉ. अर्चना तिवारी, जिल्हा कार्यक्रम अधिकारी डॉ. उमेश मुंडे व तसेच इंडियन डेंटल असोसिएशन अध्यक्ष डॉ. मनिष दागदिया व इतर पदाधिकारी, विविध सेवाभावी संस्थेचे पदाधिकारी, श्री गुरुगोविंद सिंघाजी स्मारक शासकीय नर्सिंग कॉलेजचे प्राध्यापक व सर्व विध्यार्थ्यांनी उत्स्फूर्तपणे सहभाग नोंदविला. ही रॅली यशस्वी करण्यासाठी मानसशास्त्रज्ञ प्रकाश आहेर, सामाजिक कार्यकर्ता बालाजी गायकवाड, समुपदेशक सदाशिव सुवर्णकार, समुपदेशक नागेश अटकोरे व सुनील तोटेवाड, सुनील खंडागळे यांनी परिश्रम घेतले.

0000

 

वृत्त क्र. 453

 जिल्हा रुग्णालयात मासिक पाळी स्वच्छता दिवस साजरा

नांदेड दि. 29 :- जिल्हा शल्य चिकित्सक यांच्या मार्गदर्शनाखाली जिल्हा रुग्णालय व सर्व आरोग्य संस्थेमध्ये 28 मे रोजी मासिक पाळी स्वच्छता दिवस साजरा करण्यात आला. जिल्हा रुग्णालयात यावेळी जिल्हा शल्य चिकित्सक डॉ. निळकंठ भोसीकर, अतिरिक्त जिल्हा शल्य चिकित्सक डॉ. संजय पेरके, निवासी वैद्यकीय अधिकारी डॉ. पुष्पा गायकवाड यांची उपस्थिती होती. मासिक पाळी दिवस का साजरा केला जातो, मासिक पाळीविषयी समाजात असलेले समज -गैरसमजा बद्दल यावेळी मार्गदर्शन करण्यात आले.

 

मासिक पाळी म्हणजे काय ? व सॅनेटरी पॅडचा उपयोग याबद्दल सविस्तर मार्गदर्शन करण्यात आले. तसेच मासिक पाळीमध्ये काय काळजी घेतली पाहिजे. आहार कसा घ्यावा, योगा हा आरोग्यासाठी किती महत्वाचा आहे याविषयावरही नर्सिग महाविद्यालयाच्या विद्यार्थिनी, रुग्ण, नातेवाईक यांना माहिती सांगितली.

00000

वृत्त क्र. 452

 दहावी परीक्षेच्या विद्यार्थ्यासाठी

राज्य मंडळ स्तरावरुन समुपदेशक नियुक्त

नांदेड दि.28 :- महाराष्ट्र राज्य माध्यमिक व उच्च माध्यमिक शिक्षण मंडळातर्फे मार्च 2024 मध्ये घेण्यात आलेली माध्यमिक शालांत प्रमाणपत्र इ. 10 वीची लेखी परीक्षा 1 मार्च ते 26 मार्च 2024 या कालावधीत पुणे, नागपूर, छत्रपती संभाजीनगर, मुंबई, कोल्हापूर, अमरावती,  नाशिक, लातूर व कोकण या विभागीय मंडळामार्फत आयोजित करण्यात आली होती.  

इयत्ता दहावीच्या परीक्षेचा निकाल 27 मे 2024 रोजी दुपारी 1 वाजता ऑनलाईन जाहीर करण्यात आला. निकालानंतर काही विद्यार्थी नकारात्मक विचाराने मानसिक दडपणाखाली येण्याची शक्यता असते. अशा विद्यार्थ्यांना राज्यमंडळ स्तरावरुन नैराश्यातून बाहेर काढण्यास मदत करण्यासाठी ऑनलाईन समुपदेशन सेवा सुरु ठेवण्यात येत आहे. त्यांचे भ्रमणध्वनी क्रमांक पुढील प्रमाणे आहेत.

7387400970,9011184242,8421150528, 8263876896, 8369021944, 8828426722, 9881418236, 9359978315, 7387647902, 9011302997 हे भ्रमणध्वनी क्रमांक दिलेले समुपदेशक परीक्षेच्या निकालाच्या दिवसापासून 8 दिवस सकाळी 8 ते रात्री 8 या वेळेत विद्यार्थ्यांना भ्रमणध्वनीद्वारे निशुल्क आवश्यक ते समुपदेशन करतील. विद्यार्थी, पालक यांनी यांची नोंद घ्यावी, असे आवाहन राज्यमंडळाचे सचिव अनुराधा ओक यांनी केले आहे.

00000

वृत्त क्र. 451

 शासकीय तंत्रनिकेतनमध्ये लोकसभा निवडणूक मतमोजणीची अद्ययावत तयारी

 
·    जिल्हाधिकारी अभिजीत राऊत यांनी घेतली आढावा बैठक
 
नांदेड दि. 28 :- 16- नांदेड लोकसभा मतदार संघासाठी 26 एप्रिल  2024 रोजी मतदान पार पडले. या मतदान प्रक्रियेची मतमोजणी 4 जून 2024  रोजी शासकीय तंत्रनिकेतन, बाबानगर, नांदेड येथे होणार असून यासाठी अद्ययावत तयारी प्रशासनाने सुरू केली असून आज वरिष्ठ अधिकाऱ्यांची व्यवस्थे संदर्भात बैठक घेण्यात आली.

16 नांदेड लोकसभा मतदारसंघांमध्ये येणाऱ्या सहा विधानसभा अनुसार स्ट्राँग रूम मध्ये सध्या मतपेट्या कुलुपबंद आहेत. ज्या ठिकाणी स्ट्रॉंग रूममध्ये मतपेट्या बंद आहेत.त्याच ठिकाणी मतमोजणीची वेगळी व्यवस्था करण्यात आली आहे. ही मतमोजणीची व्यवस्था करताना निवडणूक प्रक्रियेत महत्त्वाचे असणारे उमेदवार, त्यांचे प्रतिनिधी ,तसेच जनतेला माहिती देणारी माध्यमे यांच्या महत्त्वाच्या भूमिका व जबाबदाऱ्या असतात. त्यांच्या संदर्भातील व्यवस्थेचा आज आढावा घेण्यात आला.
     
सध्या शासकीय तंत्रनिकेतन, बाबानगर, नांदेड येथे असणाऱ्या स्ट्रॉंग रूमसाठी तीन स्तरीय सुरक्षा यंत्रणा तैनात आहे. प्रवेशिका व तपासणी प्रक्रियेशिवाय या ठिकाणी कोणालाही प्रवेश नाही. दर्शनी भागात सहा स्ट्रॉंग रूम मधील सीसीटीव्ही कॅमेरे 24 तास सुरू असतात. मतदान झाल्याच्या दुसऱ्या दिवस पासून या ठिकाणी सील लावण्यात आले आहे. स्ट्राँग रूम मध्ये कोणालाही प्रवेश नसतो. तसेच 24 तास कॅमेऱ्याच्या माध्यमातून निगराणी केली जाते.

चार जूनला सकाळी सात वाजता पासून मतमोजणी प्रक्रियेला सुरुवात होणार आहे. ही मतमोजणी उमेदवार व त्यांच्या प्रतिनिधींच्या समक्ष केली जाते. माध्यमांना याबाबत माहिती दिल्या जाते. माध्यमामार्फत वृत्तपत्र व वाहिन्यांद्वारे या संदर्भातील वृत्त संकलन केले जाते.

     
आज जिल्हाधिकारी अभिजीत राऊत यांनी सर्व उपाययोजनांचा आढावा घेतला. मतमोजणी ज्या ठिकाणी होणार आहे त्या ठिकाणच्या व्यवस्थेची पाहणी केली.आज झालेल्या या बैठकीला व पाहणी दरम्यान जिल्हा पोलीस अधीक्षक श्रीकृष्ण कोकाटे, अतिरिक्त जिल्हाधिकारी  पी.एस.बोरगांवकर, निवासी उपजिल्हाधिकारी महेश वडदकर, निवडणूक उपजिल्हाधिकारी राजकुमार माने, उपविभागीय अधिकारी विजय माने यांच्यासह विविध विभाग प्रमुख व सुरक्षा यंत्रणेचे अधिकारी उपस्थित होते.

वृत्त क्र. 450

 लोकसहभागातून तलावातील गाळ काढण्याच्या

मोहिमेत स्वयंस्फूर्तीने सहभाग घ्यावा - जिल्हाधिकारी अभिजीत राऊत

 

·         आत्तापर्यंत 44287.28 ब्रास गाळ विविध तलावातून उपसला

·         गावपातळीवर अधिकाऱ्यांच्या प्रयत्नातून मोहीम सुरु

नांदेड दि. 28 :- सद्यस्थितीत जिल्ह्यातील विविध तलाव व धरणामधून लोकसहभागातून गाळ काढण्याचे काम प्रगतीपथावर सुरु आहे. लोकसहभागातून तलावातील गाळ काढण्याच्या या मोहिमेत सामाजिक संस्था व शेतकऱ्यांनी स्वयंस्फूर्तीने सहभाग घ्यावा, तसेच तलावातील काढलेला जास्तीत जास्त गाळ शेतकऱ्यांनी आपल्या शेतामध्ये घेवून जावा, असे आवाहन जिल्हाधिकारी अभिजीत राऊत यांनी केले आहे.

 

जिल्ह्यातील धरणामध्ये, तलावामध्ये दरवर्षी साठत चाललेला गाळ उपसा करुन शेतात पसरविल्यास धरणातील व तलावातील साठवण क्षमता पुनर्स्थापित होण्याबरोबरच कृषी उत्पन्नात भरीव वाढ होणार आहे. ही बाब विचारात घेवून जिल्हाधिकारी कार्यालय (रोहयो) विभागातर्फे लोकसहभागातून गाळ काढण्याची मोहीम राबविण्यात येत आहे. या अभियानाअंतर्गत सुरु केलेल्या गाळ उपसा मोहिमेमुळे यावर्षीच्या हंगामात निश्चित जलसंचय वाढणार आहे. तसेच पूरप्रतिबंधक उपाययोजना होऊन शेताची सुपिकता वाढणार आहे. जिल्ह्यामध्ये विविध विभागामार्फत जसे जिल्हा परिषद लघु पाटबंधारे विभाग नांदेड- 3356.89 ब्रास, मृद व जलसंधारण विभाग-618.37 ब्रास, नांदेड पाटबंधारे विभाग (उत्तर) नांदेड 40206.01 ब्रास गाळ काढला आहे. कार्यकारी अभियंता पाटबंधारे विभाग (द) नांदेड-106.007 ब्रास अशी आतापर्यंत 44287.28 ब्रास गाळ जिल्ह्यातील विविध तलावामधून काढण्यात आला आहे. सद्यस्थितीत जिल्ह्यातील विविध 40 तलाव व धरणामधून गाळ काढण्याचे काम सुरू आहे. नॅशनल हायवे विभागाने त्यांना देण्यात आलेल्या कामांच्या परवानगी मधून 201410 ब्रास गाळ/मुरुम काढून नव्याने निर्मित शेततळे शेततलावाद्वारे पाणी साठवण क्षमता निर्माण केली आहे.

 

जिल्हाधिकारी अभिजीत राऊत यांच्या आवाहनानुसार जलसमृध्द अभियानातर्गंत लोकसहभागातून ही मोहीम सर्व उपविभागीय अधिकारी, तहसिलदार, गटविकास अधिकारी, तालुका कृषी अधिकारी, मुख्याधिकारी व विविध विभागाचे कार्यकारी अभियंता यांचेसह गावपातळीवर तलाठी, मंडळ अधिकारी यांचे प्रयत्नांमधून सुरु आहे.

 0000

वृत्त क्र. 449

 मतमोजणी केंद्र परिसरात 4 जून रोजी 144 कलम लागू

 

नांदेड दि. 28 :- नांदेड लोकसभा सार्वत्रिक निवडणूक 2024 ची मतमोजणी 4 जून 2024 रोजी शासकीय तंत्रनिकेतन, बाबानगर नांदेड येथे सकाळपासून होणार आहे. या दिवशी मतमोजणी केंद्र परिसरात फौजदारी प्रक्रिया संहिता 1973 चे कलम 144 लागू करण्यात आले आहे, असे आदेश जिल्हादंडाधिकारी अभिजीत राऊत यांनी निर्गमीत केले आहेत.

 

माहिती व तंत्रज्ञान  इमारत शासकीय तंत्रनिकेतन महाविद्यालय बाबानगर नांदेड या मतमोजणी केंद्रापासून दोनशे मीटर परिसरात मोबाईल, कॉर्डलेस फोन, पेजर, वायरलेस सेट, ध्वनीक्षेपके व इतर इलेक्ट्रॉनिक उपकरणे (संपूर्ण मतमोजणी प्रक्रियेचे अधिकृत रेकॉर्डिगसाठी वापरले जाणारे कॅमेरे वगळता) यांच्या वापरासाठी, तसेच निवडणूकीच्या कामाव्यतिरिक्त खाजगी वाहन व मतमोजणीच्या कामाव्यतिरिक्त इतर व्यक्तीस प्रवेश करण्यासाठी तसेच, मतमोजणी केंद्रापासून 100 मीटरच्या आतमधील क्षेत्र हे पादचारी क्षेत्र राहील ज्यामध्ये वाहनांच्या हालचालीसाठी सुध्दा या आदेशाद्वारे प्रतिबंध करण्यात आले आहे. हा आदेश मंगळवार 4 जून 2024 रोजी सकाळी 6 वाजेपासून 16-नांदेड लोकसभा मतदारसंघ मतमोजणी केंद्र परिसरात मतमोजणीची प्रक्रिया पूर्ण होईपर्यंत अंमलात राहील.

0000

वृत्त क्र. 448

 मान्‍सून पूर्वतयारीची आपत्ती व्यवस्थापन विभागाकडून रंगीत तालीम

नांदेड दि. 27 :-  जिल्हा आपत्‍ती व्‍यवस्‍थापन प्राधिकरणाच्यावतीने आज सकाळी १० वाजता काळेश्वर घाट, विष्णुपूरी येथे जिल्हाधिकारी तथा अध्‍यक्ष जिल्हा आपत्‍ती व्‍यवस्‍थापन प्राधिकरण अभिजीत राऊत यांच्‍या आदेशानुसार व निवासी उपजिल्हाधिकारी महेश वडदकर यांच्‍या मार्गदर्शनाखाली मान्‍सून-२०२४ पूर्वतयारी-पूर परिस्‍थिती शोध व बचावाबाबत रंगीत तालीम संपन्‍न झाली.
 
माहे जूनमध्‍ये मान्‍सूनचे आगमन होणार आहे.  मान्‍सूनच्‍या काळात अतिवृष्टी होऊ शकते. नदीकाठच्‍या गावात पूर परिस्थिती निर्माण होऊ शकते. अशा पूर परिस्‍थ‍ितीच्‍या वेळी जिवीत व वित्त हानी कशी टाळता येऊ शकते. यासाठी पूर परीस्‍थ‍ितीत शोध व बचाव कसा करावा याबाबत काम करणाऱ्या सर्व यंत्रणाचे प्रशिक्षण काळेश्‍वर घाट विष्णुपूरी येथे संपन्‍न झाले. यावेळी नांदेड वाघाळा शहर महानगरपालिका, अग्‍नीशमन दल, शीघ्र प्रतिसाद दल, गृहरक्षक दल, उपविभागीय अधिकारी व तहसिल कार्यालय, पंचायत समिती नांदेड व इतर अधिकारी, कर्मचारी यांची उपस्थिती होती.
 
 या रंगीत तालीमेस उपविभागीय अधिकारी विकास माने, तहसिलदार संजय वारकड, जिल्हा आपत्‍ती व्‍यवस्‍थापन अधिकारी किशोर कुऱ्हे, अग्‍नीशमन अधिकारी केरोजी दासरे यांनी मार्गदर्शन केले. यावेळी सूत्रसंचालन  जिल्हा आपत्‍ती व्‍यवस्‍थापन प्राधिकरणाचे बारकुजी मोरे यांनी केले तर आभार तहसिल कार्यालयाचे रवि दोंतेवार यांनी मानले. यावेळी मंडळ अधिकारी पी.व्‍ही.खंडागळे, ए.एम. धुळगुंडे, एस.डी.देवापुरकर, प्रमोद बडवणे, गृहरक्षक दलाचे एम.बी.शेख, प्रवीण हंबर्डे, बालाजी सोनटक्‍के, मंडगीलवार आर.बी., गौरव ति‍वारी, कोमल नागरगोजे आदींनी परीश्रम घेतले. तर मनपा नांदेड, पोलीस क्‍यु.आर.टी., होम गार्ड,जिल्हा शल्‍य चिकित्सक कार्यालयाचे आरोग्‍य पथक, मंडळ अधिकारी, तलाठी, ग्रामसेवक पोलीस पाटील कोतवालासह विविध यंत्रणेचे अधिकारी व कर्मचारी उपस्‍थ‍ित होते.

0000

वृत्त क्र. 447

 जागतिक तंबाखू विरोधी दिनानिमित्त

जिल्हा रुग्णालयात स्वाक्षरी मोहीम

नांदेड दि. 27 :-  आज जिल्हा रुग्णालयात ३१ मे जागतिक तंबाखू विरोधी दिनानिमित्त जिल्हा तंबाखू नियंत्रण कक्ष, जिल्हा रुग्णालय नांदेड व मराठवाडा ग्रामीण विकास संस्था छत्रपती संभाजीनगर यांच्या वतीने तंबाखू व तंबाखूजन्य पदार्थांच्या दुष्परिणामाबाबत जनजागृती होण्यासाठी स्वाक्षरी मोहीम राबविण्यात आली.

हा कार्यक्रम जिल्हाधिकारी अभिजित राऊत व जिल्हा शल्यचिकित्सक डॉ. निळकंठ भोसीकर यांच्या मार्गदर्शनाखाली संपन्न झाला. या कार्यक्रमाच्या माध्यमातून जिल्हा रुग्णालयातील अधिकारी कर्मचारी व रुग्ण यांनी स्वाक्षरी मोहिमेत सहभाग घेवून तंबाखू सोडण्याचा संकल्प केला. या कार्यक्रमासाठी जिल्हा रुग्णालयाचे अतिरिक्त जिल्हा शल्य चिकित्सक डॉ. संजय पेरके, नोडल अधिकारी  डॉ. हनुमंत पाटील, निवासी वैद्यकीय अधिकारी डॉ. एच.के. साखरे, डॉ.पुष्पा गायकवाड, डॉ. अभय अनुरकर, मेट्रेन राठोड तसेच इतर वैद्यकीय अधिकारी व कर्मचारी तसेच नर्सिंग स्कूलचे विद्यार्थी व रुग्ण उपस्थित होते. कार्यक्रम यशस्वी करण्यासाठी मानसशास्त्रज्ञ प्रकाश आहेर, सामाजिक कार्यकर्ता बालाजी गायकवाड व मराठवाडा ग्रामीण विकास संस्थेचे मंगेश गायकवाड यांनी परिश्रम घेतले.

0000

वृत्त क्र. 446

 दहावीचा निकाल आज दुपारी 1 वाजता संकेतस्थळावर उपलब्ध 

नांदेड दि. 26 :- महाराष्ट्र राज्य माध्यमिक व उच्च माध्यमिक शिक्षण मंडळामार्फत मार्च 2024 मध्ये घेण्यात आलेल्या माध्यमिक शालांत प्रमाणपत्र इयत्ता 10 वी परीक्षेचा निकाल मंडळाच्या अधिकृत संकेतस्थळावर उद्या सोमवार 27 मे 2024 रोजी दुपारी 1 वा. ऑनलाइन जाहीर करण्यात येणार आहे.

https://mahresult.nic.in, http://sscresult.mkcl.org, https://sscresult.mahahsscboard.in, https://results.digilocker.gov.in,  https://results.targetpublications.org, https://www.tv9marathi.com माध्यमिक शालांत प्रमाणपत्र इयत्ता 10 वी मार्च 2024 परीक्षेस प्रविष्ट झालेल्या सर्व विद्यार्थ्यांचे विषयनिहाय संपादित केलेले गुण या संकेतस्थळावर उपलब्ध होतील. सदर माहितीचे प्रिंट आऊट घेता येईल. https://mahresult.nic.in  या संकेतस्थळावर विद्यार्थ्यांच्या निकालासोबत निकालाबाबतची इतर सांख्यिकी माहिती उपलब्ध होईल. तसेच https://mahahsscboard.in या संकेतस्थळावर शाळांना एकत्रित निकाल उपलब्ध होईल.

निकालाबाबत अन्य तपशील

ऑनलाईन निकालानंतर माध्यमिक शालांत प्रमाणपत्र इयत्ता 10 वी परीक्षेस प्रविष्ट झालेल्या विद्यार्थ्यांस स्वत: च्या अनिवार्य विषयापैकी (श्रेणी विषयाव्यतिरिक्त) कोणत्याही विशिष्ट विषयात त्याने संपादित केलेल्या गुणांची गुणपडताळणी व उत्तरपत्रिकांची छायाप्रती, पुनर्मूल्यांकनासाठी संबंधित विभागीय मंडळाकडे ऑनलाईन पध्दतीने मंडळाच्या अधिकृत संकेतस्थळावर http://verification.mh-ssc.ac.in स्वत: किंवा शाळांमार्फत अर्ज करण्याची सोय उपलब्ध करुन देण्यात आली आहे. यासाठी आवश्यक अटी/शर्ती व सूचना संकेतस्थळावर देण्यात आलेल्या आहेत. गुणपडताळणी व छायाप्रती साठी मंगळवार 28 मे 2024 ते मंगळवार 11 जून 2024 पर्यत अर्ज ऑनलाईन पध्दतीने करता येतील. त्यासोबतच ऑनलाईन पध्दतीने शुल्क डेबिट कार्ड/क्रेडीट कार्ड, यूपीआय, नेट बँकिंग याद्वारे भरता येतील.

मार्च 2024 परीक्षेच्या उत्तरपत्रिकेचे पुनर्मूल्यांकनासाठी ऑनलाईन पध्दतीने अर्ज मंडळाच्या अधिकृत संकेतस्थळावरुन करण्यासाठी प्रथम उत्तरपत्रिकेची छायाप्रत घेणे अनिवार्य असून छायाप्रत मिळाल्याच्या दिवसापासून कार्यालयीन कामाच्या पाच दिवसात पुनर्मूल्याकंनाच्या कार्यपध्दतीचा अवलंब करुन विहित नमुन्यात विहित शुल्क भरुन संबंधित विभागीय मंडळाकडे विद्यार्थ्यांनी ऑनलाईन पध्दतीने अर्ज करणे आवश्यक राहील. ज्या विद्यार्थ्यांना उत्तरपत्रिकेचे पुनर्मूल्यांकन करावयाचे असेल त्यांनी अधिक माहितीसाठी संबंधित विभागीय मंडळाकडे संपर्क साधावा.

मार्च 2024 च्या माध्यमिक शालांत प्रमाणपत्र इयत्ता 10 वी परीक्षेत सर्व विषयांसह प्रविष्ट होऊन उत्तीर्ण होणाऱ्या विद्यार्थ्यांसाठी लगतच्या दोन संधी जुलै-ऑगस्ट 2024 व मार्च 2025 श्रेणी/गुण सुधार योजनेअंतर्गत उपलब्ध राहील.

जुलै-ऑगस्ट 2024 मध्ये आयोजित करण्यात येणाऱ्या माध्यमिक शालांत प्रमाणपत्र इयत्ता 10 वी पुरवणी परीक्षेसाठी पुनपरिक्षार्थी व श्रेणीसुधार विद्यार्थ्यासाठी शुक्रवार 31 मे 2024 पासून मंडळाच्या संकेतस्थळावर ऑनलाईन पध्दतीने आवेदनपत्र भरुन घेण्यात येणार आहे. याबाबत स्वतंत्रपणे परिपत्रक निर्गमित करण्यात येणार असल्याचे मंडळाच्यावतीने कळविले आहे.

0000

वृत्त क्र. 445

 कपाशीच्या वाणांची बियाणे जादा दराने विक्री

 केल्यास कृषी विभागाकडे तक्रार करण्याचे आवाहन

 

नांदेड दि. 25:- आगामी खरीप हंगामासाठी शासनाने हायब्रीड कपाशी बीजी 2 वाणाचे दर जाहीर केले आहेत. प्रति पाकीट 864 रुपयाने विक्री करण्याचे निर्देश शासनाकडून मिळाले आहेत. कृषी निविष्ठा विक्रेत्यांकडून अधिक दराने कोणत्याही वाणाच्या कपाशी बियाण्याची विक्री होत असल्याचे आढळल्यास कृषी विभागाकडे तक्रार करावी, असे आवाहन उपविभागीय कृषी अधिकारी दत्तकुमार कळसाईत केले आहे .

 

आगामी खरीप हंगामात कपाशीची लागवड सोयीचे होण्याकरिता नियोजन करण्यात आले आहे. परंतु गुलाबी बोंड अळीचा प्रादुर्भाव टाळण्यासाठी शेतकऱ्यांनी 1 जूननंतरच चांगल्या पावसानंतर जमिनीत पुरेशा प्रमाणात ओलावा निर्माण झाल्यावर लागवड करावी . तसेच शेतकऱ्यांनी देखील विशिष्ठ वाणांचा आग्रह न धरता निविष्ठा जादा दराने खरेदी करू नये असे आवाहन कृषि विभागाकडुन करण्यात आले आहे. विविध बियाणे उत्पादक कंपन्यांकडूनही तालुक्यात ठोक विक्रेत्याकडे आणि त्यांचेमार्फत किरकोळ विक्रेत्याकडे सध्या कपाशी बियाणे पुरवठा होत आहे. आता शेतकऱ्यांनी शासनाच्या निर्देशानुसार कृषी निविष्ठा विक्रेत्यांनी प्रति पाकिट ८६४ रुपये दरापेक्षा अधिक दराने बियाणे विक्री होत असल्यास तालुका स्तरावरील तक्रार निवारण कक्ष , तालुका स्तरावरील भरारी पथकाचे अध्यक्ष तालुका कृषी अधिकारी यांच्याशी संपर्क साधावा, असे आवाहन उपविभागीय कृषी अधिकारी नांदेड यांनी केले आहे.

 

खबरदारीचा उपाय म्हणून अधिक मागणी असलेल्या कपाशी वाणांची बियाणांची विक्री ही कृषी सहाय्यक यांचे निगराणीखाली होणार आहे. त्यासाठी कृषी सेवा केंद्रावर कृषी सहायकांची नेमणूक करण्यात आलेली आहे. शेतकऱ्यांच्या तक्रारीसाठी पुढील प्रमाणे कृषी विभागांचे अधिकाऱ्यांचे दूरध्वनी क्रमांक उपलब्ध करून देण्यात येत आहेत. उपविभागीय कृषी अधिकारी डी. आर. कळसाईत दूरध्वनी क्रमांक-9158417482, नांदेड तालुका कृषी अधिकारी मोकळे दूरध्वनी क्रमांक-9422140047, अर्धापूर तालुका कृषी अधिकारी देवकांबळे  दूरध्वनी क्रमांक-9923135036, मुदखेड तालुका कृषी अधिकारी श्रीमती गच्चे दूरध्वनी क्रमांक-9403108216, तालुका कृषी अधिकारी लोहा पोटपल्लेवार दूरध्वनी क्रमांक-9527620807, कंधार तालुका कृषी अधिकारी गीते दूरध्वनी क्रमांक-9890450217 कपाशी बियाण्याची अधिक दराने विक्री होत असल्याचे आढळल्यास शेतकऱ्यांनी तक्रारीसाठी वरील दिलेल्या अधिकाऱ्यांशी दूरध्वनीवर संपर्क साधावा. संबंधिताचे नाव गोपनीय ठेवण्यात येईल आणि वाढीव दराने विक्री करीत असलेल्या कृषी सेवा केंद्रविरुद्ध तात्काळ कारवाई करण्यात येईल असेही उपविभागीय कृषी अधिकारी यांनी आवाहन केले आहे.

0000

 वृत्त क्र. 444

जेईई JEE (Advanced) परीक्षा केंद्र परिसरात प्रतिबंधात्मक आदेश 

नांदेड दि. 24 मे :- जेईई JEE (Advanced)-2024 परीक्षा रविवार 26 मे 2024 रोजी सकाळी 9 ते सायंकाळी 5.30 या कालावधीत दोन सत्रामध्ये नांदेड जिल्ह्यात 4 परीक्षा केंद्रावर घेण्यात येणार आहे. या परीक्षा केंद्र परिसरात फौजदारी प्रक्रिया संहिता 1973 चे  कलम 144  अन्वये जिल्हादंडाधिकारी अभिजीत राऊत यांनी प्रतिबंधात्मक आदेश निर्गमीत केले आहेत.

 

या आदेशात नमूद केलेल्या आयऑन डिजीटल झोन विष्णुपुरी नांदेड, होरिझोन इंटरनॅशनल सीबीएसई स्कूल लातूर रोड विष्णुपुरी नांदेड,  राजीव गांधी कॉलेज कॅम्पस, विद्युतनगर नांदेड, श्री संभाजी कॉलेज ऑफ मॅनेजमेंट ॲण्ड टेक्नालॉजी नांदेड शामल एज्युकेशन कॅम्पस देगावरोड समोर  नांदला दिग्रस खडकूत या 4 परीक्षा केंद्रापासून 100 मीटरच्या परिसरात रविवार 26 मे 2024 रोजी  सकाळी 7 ते सायंकाळी 7 वाजेपर्यंतच्‍या वेळेत परीक्षार्थी व परीक्षेच्या कामाशी संबंधीत असलेले अधिकारी-कर्मचारी  या व्यतिरीक्त इतर कोणत्याही व्यक्तीस  प्रवेश करता येणार नाही. तसेच या दर्शविलेल्या वेळात परीक्षा केंद्राच्या परिसरातील 100 मीटर पर्यंतची सर्व सार्वजनिक टेलिफोन्स, एस.टी.डी., आय.एस.डी, भ्रमणध्वनी, पेजर, फॅक्स, झेरॉक्स आणि ध्वनिक्षेपक चालू ठेवण्यास या आदेशाद्वारे प्रतिबंध करण्यात आले आहे.

0000