सुशिक्षीत बेरोजगारांसाठी बीज भांडवल योजना

नांदेड दि. 16 :- सुशिक्षीत बेरोजगारांसाठी बीज भांडवल योजना / जिल्हा उद्योग केंद्राची कर्ज योजनेचे सन 2019-20 या आर्थिक वर्षासाठी उद्दीष्ट जिल्हा उद्योग केंद्रास प्राप्त झाले असून पात्र लाभार्थ्याकडून अर्ज मागविण्यात येत आहेत.

सुशिक्षीत बेरोजगारांसाठी बीज भांडवल योजनेसाठी पात्रता अर्जदार किमान 7 वी उत्तीर्ण असावा. वयोमर्यादा 18 ते 50 वर्षे. उमेदवार बेरोजगार असावा.उमेदवाराचे महाराष्ट्रात पंधरा वर्षे वास्तव्य असावे.अर्जदाराने सेवायोजन कार्यालयात नाव नोंदणी केलेली असावी. योजनेत पात्र उद्योग / व्यवसायाच्या प्रकल्प खर्चाची कमाल मर्यादा 25 लाख रुपये राहील व त्यात  एकूण स्थीर भांडवली गुंतवणूक व खेळत्या भांडवलाचे सीमातिक भांडवल अंतर्भूत राहील. बीज भांडवल 15% प्रमाणे जास्तीत जास्त रु. 3 लाख 75 हजार रु. पर्यंत.   दहा लाख रुपयापेक्षा कमी प्रकल्प खर्च असलेल्या प्रकरणांमध्ये अनुसुचित जाती / जमाती / इतर मागासवर्गीय / अपंग / भटक्या / विमुक्तजाती जमातीसाठी बीज भांडवल प्रकल्पाचे  20 टक्के राहील. कर्जफेड, कर्ज दिल्यानंतर व्यापार व सेवा उद्योगासाठी 6 महिन्यांचा विलंब अवधीनंतर 6 महिन्यापासून 4  वर्षापर्यंत व लघुउद्योगसाठी 2 वर्षाच्या विलंब अवधीनंतर 3 ते 7 वर्षात 5 हप्त्यात परतफेड करावी. बीज भांडवल कर्जासाठी व्याजाचा दर द. सा. द. शे. 6 टक्के असून नियमीत परतफेड करणा-या   लाभार्थीस 3%  सवलत देण्यात येईल व  थकबाकीदारास 1 टक्के दंड व्याज आकारण्यात येईल. बीज भांडवल कर्जाचा गैरवापार करणा-यास 2 टक्के दंड व्याज लावून एक रकमी वसुली करण्यात येईल. बीज भांडवल कर्ज मंजुरीनंतर जिल्हा उद्योग केंद्राचे नावे दुसरा अधिभार नोंदवणे आवश्यक आहे.

जिल्हा उद्योग केंद्राची कर्ज योजना - शिक्षणाची व वयाची अट नाही. या योजनेत उद्योग व सेवा उद्योग यासाठी  कर्ज मिळू शकते. योजनेत यंत्रसामुग्रीमधील एकूण गुंतवणूक रु. 2 लाखाच्या आत असावी. ही योजना 1981 नुसार 1 लाखापर्यंत लोकसंख्या असलेल्या गावात / ग्रामीण भागात लागू आहे. योजनेखाली उद्योग व सेवा तसेच अस्तित्वात असलेल्या लघुउद्योगाच्या वाढीसाठी अर्ज करता  येतो. अर्ज 75 टक्के कर्ज मिळण्यासाठी वित्तीय संस्थेकडे (राष्ट्रीय बँका, व्यापारी बँका व व्यापारी  सहकारी बँका) पाठविण्यात येतो. एकूण प्रकल्प खर्चाच्या सर्वसाधारण घटकांना 20% प्रमाणे रु.40 हजारापर्यंत व अनु.जाती/जमातीसाठी 30 टक्के प्रमाणे रु.60 हजार पर्यंत मार्जीन मनी 4% दराने मिळेल व ते पाच वर्षात परतफेड करावयाचे आहे. या योजनेंतर्गत राष्ट्रीयकृत बँका, सर्व ग्रामीण बँका यांच्यामार्फत कर्ज उपलब्ध करुन देण्यात येईल. ही योजना शहरी व ग्रामीण भागासाठी जिल्हा उद्योग केंद्र यांच्यामार्फत राबविण्यात येत आहे, अशी माहिती महाव्यवस्थापक जिल्हा उद्योग केंद्र नांदेड यांनी दिली आहे.

0000000