वृत्त क्रमांक  1145

दक्षता जनजागृती सप्ताह निमित्त एकता रॅलीत जनजागृती साहित्याचे वाटप 

माहूर तालुक्यात विविध उपक्रमाद्वारे जनजागृती  

नांदेड, दि. 31 ऑक्टोबर : सरदार वल्लभभाई पटेल यांच्या जयंती निमित्त महात्मा गांधी पुतळा ते जुना मोंढा या मार्गावरील एकता रॅलीमध्ये व रेल्वे डिव्हिजन कार्यालय नांदेड येथे आयोजित एकता रॅलीमध्ये पोलीस उपअधीक्षक प्रशांत पवार, पोलीस उपअधीक्षक राहुल तरकसे व पोलीस अंमलदार यांनी सहभाग नोंदवून रॅलीमध्ये सहभागी झालेल्या नागरिकांना जनजागृतीचे स्टीकर्स, बॅनर्स, पॉम्पलेटस वाटप करून भ्रष्टाचाराबाबत काही तक्रार असल्यास तक्रार कशी करावी याबाबत ला.प्र.वि.चे संकेतस्थळावर उपलब्ध असल्याची माहिती जास्तीत जास्त लोकांपर्यंत पोहोचविण्यात आली.

राज्य शासनाकडून 27 ऑक्टोबर ते 2  नोव्हेंबर 2025 या कालावधीत दक्षता जनजागृती सप्ताह-2025 “दक्षता आपली सामायिक जबाबदारी” आयोजित करण्यात आला आहे. याअनुषंगाने लाचलुचपत प्रतिबंधक विभाग नांदेड परिक्षेत्राचे पोलीस अधीक्षक संदीप पालवे, अपर पोलीस अधीक्षक अशोक कदम यांच्या मार्गदर्शनाखाली दक्षता जनजागृती सप्ताहाचा कार्यक्रम आज विविध ठिकाणी घेण्यात आला.

नांदेड लाचलुचपत प्रतिबंधक विभाग कार्यालय येथे पोलीस उपअधीक्षक प्रशांत पवार, राहुल तरकसे पोलीस निरीक्षक, करिम खान पठाण, श्रीमती प्रिती जाधव, श्रीमती अनिता दिनकर, श्रीमती अर्चना करपुडे व सर्व पोलीस अंमलदार यांनी सरदार वल्लभभाई पटेल यांच्या जन्मदिवस "राष्ट्रीय एकता दिवस" म्हणून एकता दिवसाची शपथ घेण्यात आली. 

ला.प्र.वि.चे पोकॉ/1487, चापोहेकॉ / 1889 साईनाथ आचेवाड हे नांदेड जिल्हयातील माहुर तालुक्याचे तहसिल कार्यालय, पोलीस स्टेशन, पोस्ट ऑफीस, बसस्थानक तसेच सारखणी व सिंदखेड याठिकाणी जावून तेथे बोर्डवर व दर्शनी भागावर दक्षता जनजागृती सप्ताह 2025 चे फलक व स्टीकर लावून तेथे उपस्थित असलेले नागरिकांना जनजागृती संबधाने प्रचार साहित्य वाटप केली.  

नांदेड जिल्हयात विविध कार्यक्रमांचे आयोजन करून नागरिकांच्या भेटी घेवून सर्व शासकीय इमारतीमध्ये तसेच सार्वजनिक ठिकाणी दर्शनीय भागावर भ्रष्टाचार विरोधी जनजागृतीबाबत तयार करण्यात आलेले पोस्टर, बॅनर व स्टिकर लावून जनजागृती मोहिम राबविली जात आहे. सर्व नागरिकांनी शासकीय अधिकारी / कर्मचारी हे शासकीय काम करण्यासाठी लाचेची मागणी करीत असल्यास तसेच त्यांचे लाचेच्या मागणी संदर्भात खालील क्रमांकावर संपर्क करावा, असे आवाहन करण्यात आले आहे.

पोलीस अधीक्षक संदीप पालवे : 02462-255811, मो. नंबर 9226484699.

अपर पोलीस अधीक्षक अशोक कदम : 02462-255811

पोलीस उपअधीक्षक प्रशांत पवार : मो नंबर 9359056840.

टोल फ्रि : 1064.

ला.प्र.वि. नांदेड दुरध्वनी क्रमांक : 02462-253512.

वेबसाईट : www.acbmaharashtra.gov.in

मोबाईल ॲप : www.acbmaharashtra.net

फेसबुक पेज : www.facebook.com/maharashtraACB

टिव्टर : @ACBnanded

इन्स्ट्राग्राम :  acb_nanded

युट्यूब : @Anti Corruption BureauNanded.

000000

सुधारित वृत्त

वृत्त क्रमांक  1144

सरदार वल्लभभाई पटेल जयंतीनिमित्त रन फॉर युनिटी दौडचे आयोजन

जुना मोंढा ते पोलिस अधीक्षक कार्यालयापर्यंत दौड

नांदेड, दि. ३१ ऑक्टोबर : भारताचे लोहपुरुष सरदार वल्लभभाई पटेल यांच्या 150 व्या जयंतीनिमित्त ‘सरदार @ 150 एकता अभियान’ अंतर्गत 31 ऑक्टोबर ते 15 नोव्हेंबर 2025 या कालावधीत विविध उपक्रमांचे आयोजन करण्यात आले आहे. या अभियानात आज पोलिस अधीक्षक कार्यालयामार्फत रन फॉर युनिटी दौडचे आयोजन जुना मोंढा ते पोलिस अधीक्षक कार्यालयापर्यंत करण्यात आले होते. या उपक्रमात जिल्ह्यातील महाविद्यालयीन विद्यार्थी, युवक आणि नागरिकांनी मोठ्या संख्येने सहभाग घेतला.

या उपक्रमात स्वामी रामानंद तीर्थ विद्यापीठाचे कुलगुरू डॉ.मनोहर चासकर,जिल्हाधिकारी राहुल कर्डीले,पोलिस अधीक्षक अबिनाश कुमार,जिल्हा परिषदेच्या मुख्य कार्यकारी अधिकारी मेघना कावली,मनपा आयुक्त महेशकुमार डोईफोडे,अधिष्ठाता डॉ. सुधीर देशमुख, आदरणीय धर्मगुरु आदीची उपस्थिती होती.

या अभियानांतर्गत भारत सरकारच्या माय भारतच्या नेतृत्वाखाली ‘सरदार@150 युनिटी मार्च’ या देशव्यापी उपक्रमाची सुरुवात करण्यात येत आहे. याचे उद्दिष्ट देशातील युवकांमध्ये एकता, देशभक्ती आणि नागरी जबाबदारीची भावना जागृत करणे हे आहे. या मोहिमेद्वारे युवकांना त्यांच्या दैनंदिन जीवनात आणि नागरी सहभागातून ‘एक भारत, आत्मनिर्भर भारत’ या संकल्पनेची अंमलबजावणी करण्यास प्रोत्साहित केले जाईल.

या उपक्रमाद्वारे युवकांमध्ये राष्ट्रीय एकात्मतेची भावना बळकट करणे, तसेच विकसित आणि आत्मनिर्भर भारताच्या उभारणीत युवा पिढीला सक्रिय योगदान देण्यासाठी हे अभियान महत्त्वपूर्ण ठरणार आहे.”

000000

वृत्त क्रमांक  1143

अनुसूचित जाती आयोगाचे सदस्य गोरक्ष लोखंडे यांचा नांदेड दौरा 

नांदेड, दि. 31 ऑक्टोबर : महाराष्ट्र राज्य अनुसूचित जाती आयोग मुंबईचे सदस्य (सचिव दर्जा) गोरक्ष लोखंडे हे नांदेड दौऱ्यावर येत असून त्यांचा दौरा कार्यक्रम पुढीलप्रमाणे राहील.

गुरूवार 6 नोव्हेंबर 2025 रोजी सोयीनुसार परभणी येथून बायरोडने शासकीय विश्रामगृह नांदेडकडे रवाना व मुक्काम.

शुक्रवार 7 नोव्हेंबर 2025 रोजी सकाळी 11 वा. महाराष्ट्र राज्य अनुसूचित जाती आयोग मुंबईचे सदस्य गोरक्ष लोखंडे यांच्या अध्यक्षतेखाली नांदेड महानगरपालिका येथील सभागृह हॉलमध्ये आयुक्त नांदेड महानगरपालिका यांच्यासोबत नांदेड महानगरपालिका यांचेकडे प्राप्त होणाऱ्या महसूलाचे एकूण 5 टक्के निधी आस्थापना, वजा खर्च, आर्थिक दुर्बल घटकावर केलेल्या खर्चाची मागील 5 वर्षाचा आढावा व कामाची तपासणी तसेच अनुसूचित जातीसाठी प्राप्त होणाऱ्या निधीबाबत आढावा व तपासणी. लाडपागे, दलितवस्ती, अण्णाभाऊ साठे सुधार योजना व अनुकंपाबाबत आढावा बैठक. दुपारी 2 वा. जिल्हाधिकारी कार्यालय नांदेड येथील सभागृहामध्ये जिल्हाधिकारी नांदेड यांच्यासोबत संविधान-5 निधीबाबत आढावा बैठक. सोयीनुसार नांदेड येथून बायरोडने पुणेकडे रवाना होतील.

00000

वृत्त क्रमांक  1142

राज्याचे सामाजिक न्याय मंत्री संजय शिरसाट यांचा नांदेड दौरा 

नांदेड, दि. 30 ऑक्टोबर : राज्याचे सामाजिक न्याय मंत्री संजय शिरसाट हे शनिवार 1 नोव्हेंबर 2025 रोजी नांदेड दौऱ्यावर येत असून त्यांचा दौरा कार्यक्रम पुढीलप्रमाणे राहील.

शनिवार 1 नोव्हेंबर 2025 रोजी छत्रपती संभाजीनगर येथून वाहनाने दुपारी 4.30 वा. शासकीय विश्रामगृह नांदेड येथे आगमन. दुपारी 4.30 ते 4.45 वाजेपर्यंत शासकीय विश्रामगृह नांदेड येथे राखीव. दुपारी 4.45 ते 5 वाजेपर्यंत नांदेड जिल्ह्यातील शिवसेना पदाधिकारी यांच्यासोबत चर्चा स्थळ-शासकीय विश्रामगृह नांदेड. दुपारी 5.30 वा. शासकीय विश्रामगृह नांदेड येथून वाहनाने समस्त आंबेडकरवादी समाज नांदेडच्यावतीने जाहीर नागरी सत्कार सोहळ्यास उपस्थिती. स्थळ- कै. शंकरराव चव्हाण सभागृह (स्टेडियम) नांदेड. सायंकाळी 7.45 वा. कै. शंकरराव चव्हाण सभागृह (स्टेडियम) नांदेड येथून वाहनाने डॉ. बाबासाहेब आंबेडकरवादी मिशन नांदेडकडे प्रयाण. सायं. 8 वा. डॉ. बाबासाहेब आंबेडकरवादी मिशन नांदेड येथे आगमन. सायं. 8 ते 8.30 वाजेपर्यंत डॉ. बाबासाहेब आंबेडकरवादी मिशन नांदेड येथील विद्यार्थ्यांसोबत चर्चा. सायं. 8.30 वा. डॉ. बाबासाहेब आंबेडकरवादी मिशन नांदेड येथून वाहनाने शासकीय विश्रामगृह नांदेडकडे प्रयाण. सायं. 8.45 वा. शासकीय विश्रामगृह नांदेड येथे आगमन. सायं. 8.45 ते 9.15 वाजेपर्यंत शासकीय विश्रामगृह नांदेड येथे राखीव. रात्री 9.15 वा. शासकीय विश्रामगृह नांदेड येथून वाहनाने छत्रपती संभाजीनगरकडे प्रयाण करतील.

00000

वृत्त क्रमांक  1141

दक्षता जनजागृती सप्ताहाचा कार्यक्रम प्रादेशिक परिवहन विभागासह इतर ठिकाणी संपन्न

नांदेड, दि. 30 ऑक्टोबर : राज्य शासनाकडून 27 ऑक्टोबर ते 2  नोव्हेंबर 2025 या कालावधीत दक्षता जनजागृती सप्ताह-2025 “दक्षता आपली सामायिक जबाबदारी” आयोजित करण्यात आला आहे. याअनुषंगाने लाचलुचपत प्रतिबंधक विभाग नांदेड परिक्षेत्राचे पोलीस अधीक्षक संदीप पालवे, अपर पोलीस अधीक्षक अशोक कदम यांच्या मार्गदर्शनाखाली दक्षता जनजागृती सप्ताहाचा कार्यक्रम आज प्रादेशिक परिवहन कार्यालयासह विविध ठिकाणी घेण्यात आला.

या कार्यक्रमाच्या जनजागृतीसाठी लाचलुचपत प्रतिबंधक विभागाचे पोलीस अधिकारी पोलीस निरीक्षक श्रीमती अनिता दिनकर व पोलीस अंमलदार पोहेका मेनका पवार, पोका सयद खदिर व चालक पोहेका रमेश नामपल्ले यांनी नांदेड जिल्हयातील वाजेगाव, आरटीओ कार्यालय नांदेड, सिडको-हडको परिसर तसेच पोलीस अंमलदार पोहेका यशवंत दाबनवाड व चालक पोहेका साईनाथ आचेवाड यांनी कंधार पंचायत समिती व भुमी अभिलेख कार्यालय कंधार येथे जावून कार्यालयाच्या बोर्डवर व दर्शनी भागावर दक्षता जनजागृती सप्ताह- 2025 चे फलक व स्टीकर लावून तेथे उपस्थित नागरिकांना जनजागृती संबंधाने प्रचार साहित्य वाटप करून भ्रष्टाचाराबाबत काही तक्रार असल्यास तक्रार करावी. याबाबत लाचलुचपत प्रतिबंधक विभागाच्या संकेतस्थळावर उपलब्ध असलेली माहिती जास्तीत जास्त लोकांपर्यंत पोहोचवण्यात आली.

नांदेड जिल्हयात विविध कार्यक्रमांचे आयोजन करून नागरिकांच्या भेटी घेवून सर्व शासकीय इमारतीमध्ये तसेच सार्वजनिक ठिकाणी दर्शनीय भागावर भ्रष्टाचार विरोधी जनजागृतीबाबत तयार करण्यात आलेले पोस्टर, बॅनर व स्टिकर लावून जनजागृती मोहिम राबविली जात आहे. 

जिल्ह्यातील नागरिकांनी शासकीय अधिकारी-कर्मचारी हे शासकीय काम करण्यासाठी लाचेची मागणी करीत असल्यास तसेच त्यांचे लाचेच्या मागणी संदर्भात पुढील क्रमांकावर संपर्क करावा, असेही आवाहन करण्यात आले आहे. 

पोलीस अधीक्षक संदीप पालवे : 02462-255811, मो. नंबर 9226484699.

अपर पोलीस अधीक्षक अशोक कदम : 02462-255811

पोलीस उपअधीक्षक प्रशांत पवार : मो नंबर 9359056840.

टोल फ्रि : 1064.

ला.प्र.वि. नांदेड दुरध्वनी क्रमांक : 02462-253512.

वेबसाईट : www.acbmaharashtra.gov.in

मोबाईल ॲप : www.acbmaharashtra.net

फेसबुक पेज : www.facebook.com/maharashtraACB

टिव्टर : @ACBnanded

इन्स्ट्राग्राम :  acb_nanded

युट्यूब : @Anti Corruption BureauNanded.

000000

 वृत्त क्रमांक  1140

कृषि समृध्दी योजनेतील विविध घटकांसाठी शेतकऱ्यांना अर्ज करण्याचे आवाहन 

नांदेड, दि. 30 ऑक्टोबर : कृषिक्षेत्रात भांडवली गुंतवणुक वाढवून पायाभूत सुविधा निर्माण करणे, उत्पादन खर्च कमी करणे, उत्पादकता वाढविणे, पिक विविधीकरण करणे, मुल्य साखळी बळकट करणे तसेच हवामान अनुकूल आणि शाश्वत शेतीला प्रोत्साहन देऊन शेतकऱ्यांच्या उत्पन्नात वाढ करण्यासाठी कृषि समृध्दी योजना हे सन 2025​-26 पासून जिल्ह्यात राबविण्यात येत आहे. या योजनेतील विविध घटकांसाठी शेतकऱ्यांनी तालुका कृषि अधिकारी नांदेड यांच्याकडे अर्ज सादर करावा, असे आवाहन तालुका कृषि अधिकारी संजय चातरमल यांनी केले आहे.

 

या योजने अंतर्गत उत्पादकता, शाश्वतता आणि उत्पन्न वाढीस प्रोत्साहन देण्यासाठी प्रमुख कृषी गुंतवणूक क्षेत्रांना प्राधान्य देण्यात येत आहे. यामध्ये हवामान अनुकूल बियाणे, पिकांचे वैविध्य, जमिनीची सुपीकता व्यवस्थापन, यांत्रिकीकरण व मजबूत मूल्य साखळी तयार करण्यावर भर दिला जात आहे. याशिवाय डिजीटल शेती, काटेकोर शेती, यंत्रसामुग्री सेवा, कृषि, गोदाम, प्रक्रिया व निर्यात यावर तसेच शेतकऱ्यांचे निव्वळ उत्पन्न वाढविण्याच्या दृष्टीने योजनांची आखणी, अंमलबजावणी करण्यासाठी विविध योजना व उपक्रमांसाठी शेतकऱ्यांचे अर्ज स्विकारण्यात येत आहेत.

 

निर्यात वृद्धीच्या दृष्टीने गुंतवणुकीस प्रोत्साहन देणेसाठी नियोजन केलेले असुन यासाठी शेतकऱ्यांचा उदंड प्रतिसाद लाभणे अपेक्षीत आहे. या योजनेंतर्गत राबविण्यात येणाऱ्या अनुदानीत घटकांसाठी केंद्र व राज्य शासनामार्फत राबविण्यात येणाऱ्या घटकातील देय अनुदान प्रमाण व मर्यादा लागु राहणार असुन प्रथम अर्ज करणा-यास प्रथम प्राधान्य (FCFS) देण्यात येणार आहे.

 

ही योजना डीबीटी (थेट लाभ हस्तांतरण) प्रणालीव्दारे राबविण्यात येणार असुन योजनेंतर्गत शेतकरी महिला गट, उत्पादक कंपन्या यांना प्राधान्य देण्यात येत आहे. अल्प, अत्यल्प भुधाकरक, महिला शेतकरी, अनुसूचित जाती, जमातीचे शेतकरी आणि दिव्यांग शेतकरी यांना प्राधान्य राहील. या प्राधान्यक्रमाचा महा-डिबीटी प्रणालीमध्ये समावेश असल्याने कृषि विभागाच्या https://mahadbt.maharashtra.gov.in/farmer या संकेतस्थळावर शेतकऱ्यांनी अर्ज करावे असे आवाहन केले आहे.

 

जिल्हा अधिक्षक कृषि अधिकारी कार्यालय नांदेड अधिनस्त तालुका कृषि अधिकारी यांना कृषि समृद्धी योजनेमध्ये विविध घटकांसाठी लक्षांक प्राप्त झालेला असुन केंद्र व राज्य शासनाकडील सध्दस्थितीत असलेल्या योजनांच्या मार्गदर्शक सूचनांनुसार अंमलबजावणी करण्यात येत आहे. सदर योजनेमध्ये लाभार्थी निवड तालुका कृषि अधिकारी कार्यालयात अर्ज करुन "प्रथम येणाऱ्यास प्रथम प्राधान्य" या तत्त्वानुसार केली जाणार असुन योजने मध्ये समाविष्ट घटक म्हणजेच,

 

एकात्मिक खत व्यवस्थापन अंतर्गत प्रोमखते प्रोत्साहन योजना, प्राथमिक प्रक्रिया अंतर्गत बीज प्रक्रिया संच स्थापन करणे, किसान ड्रोन योजना, जैविक निविष्ठा संसाधन केंद्र (बीआरसी (स्थापन करणे, काढणे पश्चात व्यवस्थापन अंतर्गत गोदाम बांधकाम योजना, शेतमाल विक्रीसाठी फिरते वाहन विक्री केंद्रव्यवस्थापन अंतर्गत प्रोमखते प्रोत्साहन योजना, प्राथमिक प्रक्रियाअंतर्गत बीज प्रक्रिया संच स्थापन करणे, किसान ड्रोन योजना, जैविक निविष्ठा संसाधन केंद्र (बीआरसी (स्थापन करणे,काढणे पश्चात व्यवस्थापन अंतर्गत गोदाम बांधकाम योजना, शेतमाल विक्रीसाठी फिरते वाहन विक्री केंद्र सुविधा योजना, पिक प्रात्यक्षिक चिया पीक, पीक प्रात्यक्षिक मका पीक, कॉटन श्रेडर इत्यादी घटकांसाठी शेतकऱ्यांनी तालुका कृषि अधिकारी नांदेड  यांच्याकडे अर्ज सादर करण्यासाठी मागणी करण्यात येत आहे. या योजनेच्या अधिक माहितीसाठी आपल्या तालुक्यातील तालुका कृषी अधिकारी नांदेड कार्यालयाशी संपर्क साधून नांदेड तालुक्यातील शेतकऱ्यांनी या संधीचा लाभ घ्यावा, असे आवाहन तालुका कृषि अधिकारी संजय चातरमल यांनी केले आहे.

 0000

 वृत्त क्रमांक  1139

“अमृत दुर्गोत्सव 2025”: छत्रपती शिवरायांना अनोखी मानवंदना

नांदेड, दि. 30 : राज्य शासनाच्या महाराष्ट्र संशोधन, उन्नती व प्रशिक्षण प्रबोधिनी (अमृत) या स्वायत्त संस्थेमार्फत “अमृत दुर्गोत्सव 2025”या राज्यभर साजरा करण्यात येत आहे. या उपक्रमाचा उद्देश म्हणजे छत्रपती शिवाजी महाराजांच्या पदस्पर्शाने पावन झालेल्या गड-दुर्गांच्या गौरवशाली इतिहासाचे स्मरण करून तो वारसा जनतेपर्यंत पोहोचविणे हा आहे. 

या अभिनव उपक्रमाअंतर्गत नागरिकांना आपल्या घराच्या अंगणात, गॅलरीत किंवा सोसायटी परिसरात रायगड, राजगड, प्रतापगड, सिंधुदुर्ग, शिवनेरी, पन्हाळगड, लोहगड, पद्मदुर्ग, जिंजी, साल्हेर, विजयदुर्ग व खांदेरी या शिवकालीन 12 दुर्गांपैकी कोणताही एक दुर्ग साकारण्याचे आवाहन करण्यात आले आहे. तयार झालेल्या दुर्गासोबत सेल्फी काढून ती www.durgotsav.com या संकेतस्थळावर अपलोड करायची आहे. प्रत्येक सहभागीला मुख्यमंत्र्यांच्या हस्ते अभिनंदन पत्र देण्यात येणार असून, हा उपक्रम पूर्णपणे लोकसहभागातून राबविण्यात येत आहे.

ही स्पर्धा नसून आपल्या संस्कृती, परंपरा आणि स्वाभिमान साजरा करण्याची संधी आहे. प्रत्येक घराघरात गड-दुर्ग उभे राहावेत, हाच या उपक्रमामागचा हेतू आहे. या माध्यमातून राज्यभरातील नागरिकांमध्ये शिवचरित्राबद्दल आदर, प्रेरणा आणि अभिमान वाढविण्याचे उद्दिष्ट ठेवण्यात आले आहे.

या माध्यमातून राज्यातील सर्व नागरिकांनी “अमृत दुर्गोत्सव 2025”या अनोख्या उपक्रमात उत्स्फूर्तपणे सहभागी होऊन शौर्य, पराक्रम आणि इतिहासाचा अभिमान साजरा करावा, असे आवाहन अमृतचे संचालक विजय जोशी यांनी केले आहे. 

000000

 वृत्त क्रमांक  1138

हिंदु खाटीक समाज आर्थिक विकास महामंडळाच्या

विविध योजनेंतर्गत कर्ज योजना ; अर्ज करण्याचे आवाहन 

नांदेड, दि. 29 ऑक्टोबर :- हिंदु खाटीक समाज आर्थिक विकास महामंडळ मर्यादित (महात्मा फुले मागासवर्ग विकास महामंडळाची उपकंपनी ) जिल्हा कार्यालय नांदेड यांच्यामार्फत सन 2025-26 या आर्थिक वर्षातील राज्य व केंद्र शासनाच्या विविध योजनेंतर्गत कर्ज योजना राबविण्यासाठी योजनानिहाय उद्दिष्ट प्राप्त झाले आहे. गरजू लाभार्थ्यांनी कर्ज मागणी अर्ज करण्यासाठी जिल्हा कार्यालयास भेटुन लागणाऱ्या कागदपत्रासह महामंडळाच्या योजनेचा लाभ घ्यावा, असे आवाहन महात्मा फुले मागासवर्ग विकास महामंडळ मर्या. जिल्हा व्यवस्थापक यांनी केले आहे.   

हिंदू खाटीक समाजाच्या उन्नतीसाठी व आर्थिक विकासाच्या दृष्टीने महाराष्ट्र शासनाने महामंडळाची स्थापना 5 जुन 2025 रोजी केली आहे. याअंतर्गत अनुदान योजना, बीजभांडवल योजना, थेट कर्ज योजना, एनएसएफडीसी कर्ज योजना राबविण्यात येत आहेत. अशा विविध योजना महामंडळाकडुन राबविण्यात येतात. या योजनेचे उदिष्ट मुख्यालय मुंबई यांच्याकडून प्राप्त झाले आहे. 

अनुदान योजना

या योजनेअंतर्गत 50 हजार रुपयापर्यंत कर्जासाठी अर्ज करता येतील. यात 25 हजार रुपये महामंडळाचे अनुदान व 25 हजार रुपये बँकचे कर्ज दिले जाते. 

बीज भांडवल योजना

या योजनेअंतर्गत 5 लाख रुपयापर्यंत कर्जासाठी अर्ज करता येतील. यामध्ये महामंडळाचे अनुदानसह 20 टक्के कर्ज व बँकेचा सहभाग 75 टक्के कर्ज व अर्जदाराचा सहभाग 5 टक्के असे एकूण 5 लाख रुपयापर्यंत कर्ज दिले जाते. 

थेट कर्ज योजना

या योजनेंतर्गत 1 लाख रुपयापर्यंत महामंडळाकडून 50 हजार रुपये अनुदान व 45 हजार रुपये कर्ज व्याज दर द.स 4 टक्के व अर्जदाराचा सहभाग 5 हजार रुपये असे एकुण 1 लाखापर्यंत कर्ज दिले जाते. 

एनएसएफडीसी कर्ज योजना

याअंतर्गत 5 लाख रुपयापर्यंत त्यामध्ये एन.एस.एफ.डी.सी. महामंडळाकडुन 75 टक्के बीजभांडवल अनुदानासह 20 टक्के व अर्जदाराचा सहभाग 5 टक्के कर्ज दिले जाते. 

या योजनेंतर्गत लाभार्थी हा हिंदु खाटीक जातीचा असावा या समाजातील गरजु व्यक्तींना स्वत:चा उदरनिर्वाह व स्वयंरोजगार मिळविण्यासाठी छोटे-मोठे लघुउद्योग जसे किराणा दुकान, जनरल स्टोअर्स, ब्युटी पार्लर, शेळीपालन, दुग्धव्यवसाय, रेडिमेट गारमेंट इत्यादी व्यवसायासाठी महामंडळामार्फत कर्ज व अनुदान दिले जाते. 

प्राप्त उद्दिष्ट

अनुदान योजना 50 हजार पर्यंत 25 हजार रुपये बँकेचे कर्ज व 25 हजार रुपये अनुदान या योजनेसाठी भौतिक उद्दिष्ट 10 असून आर्थिक उद्दिष्ट अनुदान 5 व बीजभांडवल कर्ज निरंक आहे. 

बीज भांडवल योजनेत 50 हजार ते 5 लाखापर्यंत योजनेसाठी भौतिक उद्दिष्ट 10 असून आर्थिक उद्दिष्ट अनुदान 5 व बीजभांडवल कर्ज 4.50 आहे. 

थेट कर्ज योजना 1 लाखापर्यंत योजनेसाठी भौतिक उद्दिष्ट 5 असून आर्थिक उद्दिष्ट अनुदान 2.50 व बीजभांडवल कर्ज 2.25 राहील. 

एनएसएफडीसी 1 लाख 40 हजार ते 5 लाख रुपयापर्यंत योजनेत भौतिक उद्दिष्ट 12 असून आर्थिक उद्दिष्ट अनुदान व बीजभांडवल कर्ज निरंक याप्रमाणे आहे.

0000

वृत्त क्रमांक  1137

उपमुख्यमंत्री अजित पवार यांचा नांदेड दौरा 

नांदेड, दि. 29 ऑक्टोबर :- महाराष्ट्र राज्याचे उपमुख्यमंत्री अजित पवार हे गुरूवार 30 ऑक्टोबर 2025 रोजी नांदेड दौऱ्यावर येत असून त्यांचा दौरा कार्यक्रम पुढीलप्रमाणे राहील.

गुरूवार 30 ऑक्टोबर रोजी बेलोरा विमानतळ जि. अमरावती येथून विमानाने सायंकाळी 5.30 वा. श्री गुरू गोविंद सिंगजी विमानतळ नांदेड येथे आगमन. सायं.5.35 वा. मोटारीने उदगीरकडे प्रयाण. उदयगिरी औद्योगिक वसाहत लोणी नांदेड रोड उदगीर जिल्हा लातूर येथून रात्री 11.25 वा. श्री गुरू गोविंद सिंगजी विमानतळ नांदेड येथे आगमन. रात्री 11.30 वा. विमानाने आंतरराष्ट्रीय विमानतळ पुणेकडे प्रयाण करतील.

00000

वृत्त क्रमांक  1135

अवैध रेती उत्खनन करणारे साहित्य नष्ट नांदेड महसूल पथकाची कारवाई

63 लाख किंमतीचा मुद्देमाल नष्ट

नांदेड, दि. 29 ऑक्टोबर :  आज 29 ऑक्टोबर 2025 रोजी जिल्हाधिकारी राहुल कर्डिले  यांच्या मार्गदर्शनाखाली उपविभागीय अधिकारी डॉ. सचिन खल्लाळ, तहसीलदार संजय वारकड, नायब तहसीलदार स्वप्निल  दिगलवार, मंडळ अधिकारी  कुणाल जगताप, अनिरुद्ध जोंधळे, मोहसीन सय्यद, ग्राम महसूल अधिकारी, मनोज जाधव, माधव भिसे, बरोडा श्रीरामे, जमदाडे,  मनोज सरपे, महेश जोशी, महसूल सेवक बालाजी सोनटक्के, शिवा तेलंगे या महसूल पथकाने  विष्णुपुरी  परिसरामध्ये पहाटे 5 वाजता अवैध रेती उत्खनन प्रतिबंधासाठी गस्तीवर असताना रेती उत्खनन करणारे 2 मोठ्या बोटी,   एक छोटी बोट व 4 इंजिन आढळून आले. 

या पथकाने मजुरांच्या साह्याने 3 बोटी व  4 इंजिन जिलेटीने स्फोट करून नष्ट केले. तसेच 30 तराफे जाळून नष्ट केले, असे एकूण 63 लाख किंमतीचा मुद्देमाल जाग्यावरच स्फोट करून नष्ट केला.  एक अवैध वाहतूक करणारी हायवा एमएच 26 बीसी 4892 जप्त करून तहसील कार्यालय परिसरामध्ये लावण्यात आला आहे. सदर हायवावर दंडात्मक फौजदारी स्वरूपाची कारवाई करण्याची तजवीच करण्यात आली आहे.

या कारवाई दरम्यान पोलीस अधीक्षक अबिनाश कुमार यांनी नांदेड ग्रामीण पोलीस स्टेशनचे पोलीस  उपनिरीक्षक ज्ञानेश्वर भोसले व पोलीस जमादार शिंदे, श्री. घुगे व श्री. जाधव यांचे पोलीस पथक उपलब्ध करून दिले. अवैध उत्खननासंदर्भात नांदेड महसूल प्रशासन सक्तीने कारवाई करेल असा इशारा नांदेडचे उपविभागीय अधिकारी डॉ. सचिन  खल्लाळ व तहसीलदार संजय वारकड यांनी दिला आहे. 

00000

 वृत्त क्रमांक  1136

दक्षता जनजागृती सप्ताहाच्या अनुषंगाने नांदेड पोलीस क्लब व महापालिकेत जनजागृती 

नांदेड, दि. 29 ऑक्टोबर :  महाराष्ट्र राज्य शासनाकडून 27 ऑक्टोबर ते 2 नोव्हेंबर 2025 या कालावधीत "दक्षता जनजागृती 2025" दक्षता आपली सामायिक जबाबदारी" आयोजित करण्यात आला आहे. या अनुषंगाने आज पोलीस अधीक्षक संदिप पालवे यांच्या मार्गदर्शनाखाली पोलीस क्लब, नांदेड येथे नागरीकांच्या प्रत्यक्ष भेटी घेवून लाचलुचपत प्रतिबंधक विभागाच्या कामकाजाची माहिती दिली. तसेच दर्शनी भागावर दक्षता जनजागृती सप्ताहचे फलक व स्टिकर लावून नागरीकांना पॉम्पलेट वाटप करुन जनजागृती करण्यात आली.

या कार्यक्रमासाठी पोलीस अधिक्षक संदिप पालवे, पोलीस उपअधिक्षक प्रशांत पवार, पोलीस उपअधिक्षक राहुल तरकसे, पोलीस निरिक्षक साईप्रकाश चन्ना, श्रीमती अनिता दिनकर, श्रीमती अर्चना करपूडे व ला.प्र.वि. चे सर्व पोलीस अंमलदार हाजर होते.

दक्षता जनजागृती सप्ताह 2025 च्या अनुषंगाने पोलीस अधीक्षक संदिप पालवे यांनी नांदेड शहर महानगरपालिका नांदेड येथे महापालिका आयुक्त डॉ. महेश कुमार डोईफोडे, अतिरिक्त आयुक्त गिरीश कदम, उपआयुक्त तथा विधी अधिकारी अजितपालसिंग संधु, सहाय्यक आयुक्त गुलाम सादिक व सर्व अधिकारी यांच्यासोबत दक्षता जनजागृती संबंधाने बैठक घेवून भ्रष्ट्राचार निर्मुलनासाठी विविध उपाययोजना बाबत मार्गदर्शन करण्यात आले. लाचलुचपत प्रतिबंधक विभागाचे पोलीस अधिकारी व पोलीस अंमलदार यांनी महानगरपालिकेच्या नोटीस बोर्डावर व दर्शनी भागावर दक्षता जनजागृतीचे फलक व स्टिकर लावून तेथे उपस्थित असलेल्या नागरीकांना जनजागृती संबंधाने प्रचार साहित्य वाटप केले. तसेच भ्रष्टाचाराबाबत काही तक्रार असल्यास तक्रार कशी करावी याबाबत लाचलुचपत प्रतिबंधक विभागाचे संकेतस्थळावर उपलब्ध असल्याची माहिती जास्तीत जास्त लोकांपर्यंत पोहचविण्यात आली.

संपूर्ण नांदेड जिल्हयात विविध कार्यक्रमाचे आयोजन करुन नागरीकांच्या भेटी घेवून सर्व शासकीय इमारतीमध्ये तसेच सार्वजनीक ठिकाणी दर्शनी भागावर भ्रष्टाचार विरोधी जनजागृतीबाबत तयार करण्यात आलेल्या पोस्टर, बॅनर व स्टिकर लावून जनजागृती मोहिम राबविली जात आहे.

पोलीस अधीक्षक संदीप पालवे : 02462-255811, मो. नंबर 9226484699.

अपर पोलीस अधीक्षक अशोक कदम : 02462-255811

पोलीस उपअधीक्षक प्रशांत पवार : मो नंबर 9359056840.

टोल फ्रि : 1064.

ला.प्र.वि. नांदेड दुरध्वनी क्रमांक : 02462-253512.

वेबसाईट : www.acbmaharashtra.gov.in

मोबाईल ॲप : www.acbmaharashtra.net

फेसबुक पेज : www.facebook.com/maharashtraACB

टिव्टर : @ACBnanded

इन्स्ट्राग्राम :  acb_nanded

युट्यूब : @Anti Corruption BureauNanded.

000000

 वृत्त क्रमांक  1134

सरदार वल्लभभाई पटेल जयंतीनिमित्त ‘सरदार @150 एकता अभियानात सहभागी व्हावे

- जिल्हाधिकारी राहुल कर्डिले

31 ऑक्टोबर व 7 नोव्हेंबर रोजी भव्य पदयात्रेचे आयोजन

नांदेड, दि. 29 ऑक्टोबर : भारताचे लोहपुरुष सरदार वल्लभभाई पटेल यांच्या 150 व्या जयंतीनिमित्त ‘सरदार @ 150 एकता अभियान’ अंतर्गत 31 ऑक्टोबर ते 15 नोव्हेंबर 2025 या कालावधीत विविध उपक्रमांचे आयोजन करण्यात आले आहे. या अभियानात जिल्ह्यात 31 ऑक्टोबर व 7 नोव्हेंबर 2025 रोजी भव्य पदयात्रेचे आयोजन करण्यात आले आहे. या उपक्रमात जिल्ह्यातील महाविद्यालयीन विद्यार्थी, युवक आणि नागरिकांनी मोठ्या संख्येने सहभागी व्हावे, असे आवाहन जिल्हाधिकारी राहुल कर्डिले यांनी केले आहे.

जिल्हाधिकारी कार्यालयात आयोजित पत्रकार परिषदेत ते बोलत होते. यावेळी जिल्हा युवा अधिकारी चंदा रावळकर, तसेच विविध प्रसारमाध्यमांचे प्रतिनिधी आदी उपस्थित होते.

या अभियानांतर्गत भारत सरकारच्या माय भारतच्या नेतृत्वाखाली ‘सरदार@150 युनिटी मार्च’ या देशव्यापी उपक्रमाची सुरुवात करण्यात येत आहे. याचे उद्दिष्ट देशातील युवकांमध्ये एकता, देशभक्ती आणि नागरी जबाबदारीची भावना जागृत करणे हे आहे. या मोहिमेद्वारे युवकांना त्यांच्या दैनंदिन जीवनात आणि नागरी सहभागातून ‘एक भारत, आत्मनिर्भर भारत’ या संकल्पनेची अंमलबजावणी करण्यास प्रोत्साहित केले जाईल.

या कालावधीत पदयात्रा, विविध स्पर्धा आणि प्रेरणादायी कार्यक्रमांचे आयोजन करण्यात येणार आहे. यामध्ये डिजिटल फेसवर सोशल मीडिया रील स्पर्धा, निबंध स्पर्धा, सरदार @यंग लीडर्स प्रोग्राम अंतर्गत प्रश्नमंजुषा स्पर्धा, आरोग्य शिबिरे, सरदार वल्लभभाई पटेल यांच्या जीवनावर व्याख्याने, ड्रग्जमुक्त भारत प्रतिज्ञा इ. उपक्रमांचा समावेश आहे. 

जिल्हाधिकारी श्री. कर्डिले यांनी सांगितले की, “युवकांमध्ये राष्ट्रीय एकात्मतेची भावना बळकट करणे, तसेच विकसित आणि आत्मनिर्भर भारताच्या उभारणीत युवा पिढीला सक्रिय योगदान देण्यासाठी हे अभियान महत्त्वपूर्ण ठरणार आहे.” यावेळी जिल्हास्तरीय पदयात्रा पोस्टरचे प्रकाशन मान्यवरांच्या हस्ते करण्यात आले. 

नांदेड येथे 31 ऑक्टोबर व 7 नोव्हेंबर रोजी जिल्हास्तरीय भव्य पदयात्रेचे आयोजन करण्यात आले आहे. 31 ऑक्टोबर रोजी ही पदयात्रा जुना मोंढा ते जिल्हाधिकारी कार्यालयातील नियोजन भवनापर्यत काढण्यात येणार आहे. तरी या पदयात्रेत सर्व विद्यार्थी, नागरिक यांनी सहभागी व्हावे असे आवाहन करण्यात आले आहे. नांदेड जिल्ह्यातील सर्व विभाग, महाविद्यालयीन विद्यार्थी, युवक आणि नागरिकांनी या राष्ट्रीय उपक्रमात सक्रिय सहभाग नोंदवावा असे आवाहन जिल्हाधिकाऱ्यांनी केले आहे. 

000000

 वृत्त क्रमांक  1133

जिल्ह्यात जमावबंदी, शस्त्रबंदी आदेश लागू 

 नांदेड दि. 28 ऑक्टोबर :- नांदेड जिल्ह्यात 29 ऑक्टोबरच्या सकाळी 6 वाजेपासून ते 12 नोव्हेंबर 2025 च्या मध्यरात्री पर्यंत शस्त्रबंदी व जमावबंदी आदेश लागू राहणार आहे, अशी माहिती अपर जिल्हादंडाधिकारी कार्यालयाकडून देण्यात आली आहे.  

जिल्ह्यातील कायदा व सुव्यवस्था अबाधित रहावी म्हणून अपर जिल्हादंडाधिकारी यांनी महाराष्ट्र पोलीस अधिनियम 1951 चे कलम 37 (1) व (3) अन्वये जिल्ह्यात 29 ऑक्टोबरच्या सकाळी 6 वाजेपासून ते 12 नोव्हेंबर 2025 रोजीच्या मध्यरात्री पर्यंत शस्त्रबंदी व जमावबंदी आदेश लागू राहील. त्यानुसार पाच किंवा पाचपेक्षा अधिक व्यक्तींनी या आदेशात नमुद असलेली कृत्ये सार्वजनिक परिसर किंवा त्याच्या जवळपास करण्यास बंदी घालण्यात आली आहे. हा आदेश कामावरील पोलीस अधिकारी, शासकीय कर्मचारी, विवाह, अंत्ययात्रा, धार्मिक कार्यक्रम, यात्रा व इतर सक्षम अधिकारी यांनी विशेषरित्या परवानगी दिलेल्या मिरवणुकांना लागू होणार नाही. 

अशा मिरवणुकांना परवानगी देण्याचे अधिकार तसेच पाच व पाचपेक्षा जास्त इसम जमण्यासाठी, सभा, मिरवणुका, मोर्चा काढणे, ध्वनीक्षेपक वाजविण्यास परवानगी देण्याचे अधिकार जिल्ह्यातील पोलीस ठाणे प्रभारी अधिकारी यांना तसेच पोलीस अधीक्षक नांदेड यांनी प्राधिकृत केलेल्या इतर पोलीस अधिकारी यांना राहतील.

00000

 वृत्त क्रमांक  1132

28 व 29 ऑक्टोबर या दोन दिवसांसाठी यलो अलर्ट जारी

नांदेड, दि. २८ ऑक्टोबर:- प्रादेशिक हवामानशास्त्र केंद्र, मुंबई यांनी 28 ऑक्टोबर रोजी दिलेल्या सूचनेनुसार नांदेड जिल्ह्यासाठी 28 व 29 ऑक्टोबर 2025 या दोन दिवसांसाठी यलो (Yellow) अलर्ट जारी केलेला आहे. दिनांक 28 ऑक्टोबर 2025 ह्या दिवशी जिल्ह्यात तुरळक ठिकाणी ताशी 30 ते 40 किमी वेगाने वादळी वारे वाहण्याची, विजेच्या कडकडाटासह व ढगांच्या गडगडाटासह मुसळधार व 29 ऑक्टोबर 2025 रोजी जिल्ह्यात तुरळक ठिकाणी ताशी 30 ते 40 किमी वेगाने वादळी वारे वाहण्याची, विजेच्या कडकडाटासह व ढगांच्या गडगडाटासह हलका ते मध्यम स्वरूपाचा पाऊस पडण्याची अधिक शक्यता वर्तविली आहे. या नैसर्गिक आपत्ती संदर्भात सर्व संबंधित यंत्रणा आणि जनतेने खबरदारी घ्यावी. खबरदारीची उपाययोजना म्हणून खालील प्रमाणे काळजी घ्यावी.

या गोष्टी करा :

विजेच्या गडगडाटासह पावसाची पूर्वकल्पना असल्यास बाहेर जाणे टाळा. जर मोकळ्या जागेत असाल आणि जवळपास कुठल्याही सुरक्षित इमारतीचा आसरा नसेल तर सखल जागेत जाऊन गुडघ्यात डोके घालून बसा.

आकाशात विजा चमकत असल्यास घरात किंवा सुरक्षित इमारतीत आश्रय घ्या. घराच्या बाल्कनी, छत अथवा घराबाहेरील ओट्यावर थांबू नका.

आपण घरात असाल आणि घरातील विद्युत उपकरणे चालू असतील तर त्या वस्तू त्वरित बंद करा.

तारांचे कुंपण, विजेचे खांब व इतर लोखंडी वस्तूंपासून दूर रहा.

 पाण्यात उभे असाल तर तात्काळ पाण्यातून बाहेर पडा.

या गोष्टी करु नका: 

आकाशात विजा चमकत असल्यास घरातील लँडलाईन फोनचा वापर करू नका. शॉवरखाली अंघोळ करू नका. घरातील बेसिनचे नळ, पाण्याची पाईपलाइन यांना स्पर्श करू नका तसेच कुठल्याही विद्युत उपकरणांचा वापर करू नका.

विजेच्या गडगडाटासह वादळी वारे चालू असताना लोखंडी धातूच्या सहाय्याने उभारलेल्या तंबूमध्ये किंवा शेडमध्ये आसरा घेऊ नका.

उंच झाडाच्या खाली आसरा घेऊ नका.

धातूंच्या उंच मनोऱ्याजवळ उभे टाकू नका.

जर आपण घरात असाल तर उघड्या दारातून अथवा खिडकीतून वीज पडताना पाहू नका. हे बाहेर थांबण्याइतकेच धोकादायक आहे.

00000

 पत्रकार परिषद निमंत्रण

दि. 28 ऑक्टोबर 2025 

प्रति ,

मा. संपादक / प्रतिनिधी

दैनिक वृत्तपत्र / दूरचित्रवाणी / इलेक्ट्रॉनिक मिडीया    

नांदेड जिल्हा 

महोदय,

भारताचे लोहपुरूष सरदार वल्लभभाई पटेल यांच्या 150 व्या जयंती निमित्त “सरदार @ 150 एकता अभियान” अंतर्गत जिल्हास्तरीय पदयात्रेचे आयोजन करण्याबाबत मा. जिल्हाधिकारी श्री. राहुल कर्डिले यांची उद्या बुधवार दिनांक 29 ऑक्टोबर 2025 रोजी सकाळी 11 वा. मा. जिल्हाधिकारी नांदेड यांच्या बैठक कक्षात पत्रकार परिषद आयोजित केली आहे. 

तरी कृपया, आपण या पत्रकार परिषदेस उपस्थित रहावे, ही विनंती.  

 पत्रकार परिषद दिनांक :-  बुधवार 29 ऑक्टोबर 2025

वेळ                          :-  सकाळी 11 वा.

स्थळ                        :- मा. जिल्हाधिकारी नांदेड यांचे बैठक कक्ष

प्र. जिल्हा माहिती अधिकारी, नांदेड

वृत्त क्रमांक  1131

शेतकऱ्यांनी कृषि समृद्धि योजनेतील विविध घटकांसाठी

अर्ज करावेत-  जिल्हा अधिक्षक कृ‍षी अधिकारी

नांदेड, दि. 28 ऑक्टोबर :  कृषि क्षेत्रात भांडवली गुंतवणुक वाढवून पायाभुत सुविधा निर्माण करणे, उत्पादन खर्च कमी करणे, उत्पादकता वाढविणे, पिक विविधीकरण, मुल्य साखळी बळकट करणे तसेच हवामान अनुकूल आणि शाश्वत शेतीला प्रोत्साहन देऊन शेतकऱ्यांच्या उत्पन्नात वाढ करण्यासाठी कृषि समृध्दी योजना सन 2025-26 पासून जिल्ह्यात राबविण्यात येत आहे.

 या योजनेअंतर्गत उत्पादकता, शाश्वतता आणि उत्पन्न वाढीस प्रोत्साहन देण्यासाठी प्रमुख कृषी गुंतवणूक क्षेत्रांना प्राधान्य देण्यात येत आहे. यामध्ये हवामान अनुकूल बियाणे, पिकांचे वैविध्य, जमिनीची सुपीकता व्यवस्थापन, यांत्रिकीकरण व मजबूत मूल्य साखळी तयार करण्यावर भर दिला जात आहे.

 याशिवाय, डिजीटल शेती, काटेकोर शेती, यंत्रसामुग्री सेवा, कृषि, गोदाम, प्रक्रिया व निर्यात यावर तसेच, शेतकऱ्यांचे निव्वळ उत्पन्न वाढविण्याच्या दृष्टीने योजनांची आखणी व अंमलबजावणी करण्यासाठी विविध योजना व उपक्रमांसाठी शेतकऱ्यांचे अर्ज स्विकारण्यात येत आहेत. निर्यात वृद्धीच्या दृष्टीने गुंतवणुकीस प्रोत्साहन देणेसाठी नियोजन केलेले असुन यासाठी शेतकऱ्यांचा उदंड प्रतिसाद लाभणे अपेक्षीत आहे.

या योजनेंतर्गत राबविण्यात येणाऱ्या अनुदानीत घटकांसाठी केंद्र व राज्य शासनामार्फत राबविण्यात येणाऱ्या घटकातील देय अनुदान प्रमाण व मर्यादा लागु राहणार असुन प्रथम अर्ज करणाऱ्यास प्रथम प्राधान्य (FCFS) देण्यात येणार आहे. ही योजना डीबीटी (थेट लाभ हस्तांतरण) प्रणालीव्दारे राबविण्यात येणार असुन योजनेंतर्गत शेतकरी /महिला गट, उत्पादक कंपन्या यांना प्राधान्य देण्यात येत आहे. अल्प, अत्यल्प भुधाकरक, महिला शेतकरी, अनुसूचित जाती, जमातीचे शेतकरी आणि दिव्यांग शेतकरी यांना प्राधान्य राहील. या प्राधान्यक्रमाचा महाडिबीटी प्रणालीमध्ये समावेश असल्याने कृषि विभागाच्या https://mahadbt. maharashtra.gov.in/farmer या संकेतस्थळावर शेतकऱ्यांनी अर्ज करावेत.

जिल्हा अधिक्षक कृषि अधिकारी कार्यालय, नांदेड अधिनस्त तालुका कृषि अधिकारी यांना कृषि समृद्धी योजनेमध्ये विविध घटकांसाठी लक्षांक प्राप्त झालेला असुन केंद्र व राज्य शासनाकडील सद्स्थितीत असलेल्या योजनांच्या मार्गदर्शक सूचनांनुसार अंमलबजावणी करण्यात येत आहे. या योजनेमध्ये लाभार्थी निवड तालुका कृषि अधिकारी कार्यालयात अर्ज करुन ‘प्रथम येणाऱ्यास प्रथम प्राधान्य’ या तत्त्वानुसार केली जाणार आहे. या योजनेमध्ये समाविष्ट घटक म्हणजेच, एकात्मिक खत व्यवस्थापन अंतर्गत प्रोम खते प्रोत्साहन योजना, प्राथमिक प्रक्रिया अंतर्गत बीज प्रक्रिया संच स्थापन करणे, किसान ड्रोन योजना, जैविक निविष्ठा संसाधन केंद्र (बी आर सी ( स्थापन करणे, काढणे पश्चात व्यवस्थापन अंतर्गत गोदाम बांधकाम योजना , शेतमाल विक्रीसाठी फिरते वाहन विक्री केंद्र सुविधा योजना, पीक प्रात्यक्षिक चिया पीक, पीक प्रात्यक्षिक मका पीक, कॉटन श्रेडर इत्यादी घटकांसाठी शेतकऱ्यांनी तालुका कृषि अधिकारी यांचेकडे अर्ज सादर करण्यासाठी मागणी करण्यात येत आहे. तरी नांदेड जिल्ह्यातील शेतकऱ्यांनी या संधीचा फायदा घ्यावा असे आवाहन जिल्हा अधिक्षक कृषि अधिकारी दत्तकुमार कळसाईत यांनी केले आहे. अधिक माहितीसाठी आपल्या तालुक्यातील तालुका कृषी अधिकारी कार्यालयाशी संपर्क साधावा असेही प्रसिद्धीपत्रकाद्वारे कळविली आहे.

00000

 वृत्त क्रमांक  1130

कृषी समृद्धी योजनेअंतर्गत चिया पीक

 प्रात्यक्षिक घटकासाठी अर्ज करण्याचे आवाहन

नांदेड, दि. 28 ऑक्टोबर :  मध्यम ते भारी जमीन, सुरुवातीच्या तीन प्रवाही सिंचनाच्या पाळ्या आणि नंतर दोन ते तीन तुषार सिंचन देण्याची सुविधा असलेल्या, सिंचन सुविधा असलेले शेतकरी यांनी कृषी समृद्धी योजनेअंतर्गत चिया पीक प्रात्यक्षिकासाठी तालुका कृषी अधिकारी यांच्याकडे अर्ज सादर करावेत. तसेच प्रथम येणाऱ्यास प्रथम प्राधान्य यातत्वावर लाभार्थी निवड होणार आहे. तरी यासंधीचा त्वरीत लाभ घ्यावा, अधिक माहितीसाठी गावचे सहाय्यक कृषी अधिकारी, उप कृषि अधिकारी, मंडळ कृषि अधिकारी, तालुका कृषि अधिकारी, उपविभागीय कृषि अधिकारी यांचेशी संपर्क करावा, असे आवाहन जिल्हा अधिक्षक कृषि अधिकारी दत्तकुमार कळसाईत यांनी केले आहे. 

कृषी समृद्धी योजनेअंतर्गत नांदेड जिल्ह्यात 3 हजार 125 एकर क्षेत्रावर चिया पीक प्रात्यक्षिक (3 हजार 200 रुपये प्रति एकर प्रमाणे) घेण्यात येणार आहेत. यामध्ये निविष्ठा बियाणे हे शेजारील जिल्ह्यातून शेतकऱ्यांनी स्वतः खरेदी करावयाचे आहे. सहाय्यक कृषी अधिकारी यांनी मोका पाहणी केल्यानंतर बियाण्याची रक्कम शेतकऱ्यांचे बँक खात्यावर डीबीटी पध्दतीने जमा करण्यात येईल. 

तसेच इतर निविष्ठा (जैविक संघ,एकात्मिक अन्नद्रव्य/किड व्यवस्थापन, पिकाची माहिती पुस्तिका) कृषी विभागामार्फत पुरवठा करण्यात येणार आहे. निरोगी व पौष्टिक अन्नाच्या वाढत्या मागणीमुळे अलीकडच्या काळात शेतकऱ्यांचा चिया लागवडीकडे कल वाढत आहे. नवीन व पौष्टिक तेलबिया पिक प्रात्यक्षिकाचा मुख्य उद्देश शेतकऱ्यांना उच्च पौष्टिक मूल्य असलेल्या आणि बाजारात अधिक दर मिळविणाऱ्या पर्यायी पिकाची ओळख करून देणे हा आहे.

चिया पिकात ओमेगा-3 फॅटी ॲसिड, प्रथिने, तंतू व खनिजांचे प्रमाण जास्त असल्यामुळे याचा वापर आरोग्यदायी आहारासाठी मोठ्या प्रमाणावर होतो. हे पीक कोरडवाहू तसेच सिंचित परिस्थितीत अल्प कालावधीत तयार होते. शेजारच्या वाशिम जिल्ह्यामध्ये मागील मोठ्या प्रमाणावर शेतकऱ्यांनी लागवड केली होती आणि त्यातून त्यांना चांगले उत्पन्न मिळाले तसेच नीमच मध्यप्रदेश येथे याची बाजारपेठ उपलब्ध आहे. तसेच वन्य प्राण्यापासुन या पिकास धोका नाही.

प्रात्यक्षिकांतर्गत शेतकऱ्यांच्या शेतावर चिया पिकाची लागवड करून आधुनिक शेती तंत्रज्ञानाचा वापर, बीज प्रक्रिया, खत व्यवस्थापन, कीड नियंत्रण आणि उत्पादनवाढीच्या उपायांची माहिती देण्यात येईल. तसेच बियाणे उत्पादनानंतर बाजारपेठेपर्यंत पोहोचण्यासाठी मार्गदर्शन दिले जाईल.

चिया पिकाच्या प्रात्यक्षिकातून शेतकऱ्यांना पारंपरिक पिकांपेक्षा अधिक नफा मिळण्याची संधी उपलब्ध होणार आहे. या प्रकल्पामुळे शेतकऱ्यांचे उत्पन्न वाढविणे, जमिनीची सुपीकता टिकविणे आणि आरोग्यदायी अन्नधान्य उत्पादनाला प्रोत्साहन देणे हे उद्दिष्ट आहे. या माध्यमातून नावीन्यपूर्ण पिक नांदेड जिल्ह्यात अंतभुर्त करण्याचा कृषी समृद्धी योजनेच्या माध्यमातून हा प्रयत्न आहे.

00000

 वृत्त क्रमांक  1129

दक्षता जनजागृती सप्ताहनिमित्त विविध उपक्रमांद्वारे जनजागृती

नांदेड दि. 28 ऑक्टोबर :- महाराष्ट्र राज्य शासनाकडून 27 ऑक्टोबर 2025 ते 2 नोव्हेंबर 2025 या कालावधीत "दक्षता जनजागृती 2025" दक्षता आपली सामायिक जबाबदारी" आयोजित करण्यात आला आहे. या अनुषंगाने आज लाचलुचपत प्रतिबंधक विभाग, नांदेड टायगर ग्रुप अँटो संघटनेच्या रिक्षावर जनजागृती सप्ताह 2025 चे फलक लावून सर्व रिक्षांना जनजागृतीसाठी नांदेड शहरात रवाना करण्यात आले.

लाचलुचपत प्रतिबंधक विभाग नांदेड परिक्षेत्रचे पोलीस अधीक्षक संदीप पालवे यांच्या मार्गदर्शनाखाली लाचलुचपत प्रतिबंधक विभाग नांदेड परिक्षेत्रचे अपर पोलीस अधीक्षक अशोक कदम यांनी आयोजन केले. या कार्यक्रमासाठी अपर पोलीस अधीक्षक अशोक कदम, पोलीस उप अधीक्षक प्रशांत पवार, पोलीस उपअधीक्षक राहुल तरकसे, पोलीस निरीक्षक करिम खान पठाण, साईप्रकाश चन्ना, श्रीमती अनिता दिनकर, श्रीमती अर्चना करपुडे व ला.प्र.वि. चे सर्व पोलीस अंमलदार उपस्थित होते.

दक्षता जनजागृती सप्ताह 2025 च्या अनुषंगाने पोलीस निरीक्षक श्रीमती दिनकर, सपोउपनि शेख रसुल, पोकॉ/शाम गोरपल्ले, चापोह/ नामपल्ले यांना अर्धापुर, बारड, मुदखेड येथे पाठवून ग्रामसभा जनजागृती मेळावे व जनजागृती संबधाने प्रचार साहित्य वाटप व वॅनर, पोस्टर्स, स्टिकर लावून भ्रष्टाचाराबाबत काही तक्रार असल्यास, तक्रार कशी करावी याबाबत ला.प्र.वि. चे संकेतस्थळावर उपलब्ध असल्याची माहिती जास्तीत जास्त लोकांपर्यंत पोहोचविण्यात आली.

शासकीय कर्मचारी व त्यांच्या कुटूंबासाठी भ्रष्टाचार निर्मूलनासंदर्भात स्नेहनगर, पोलीस वसाहतीमधील लॉनमध्ये विविध स्पर्धात्मक कार्यक्रमाचे आयोजन करून भ्रष्टचार निमूर्लनाबाबतची माहिती देण्यात आली आहे. हा कार्यक्रम पोलीस उपअधीक्षक प्रशांत पवार यांच्या मार्गदर्शनाखाली पोलीस निरीक्षक श्रीमती अर्चन करपुडे, मपोह/ मेनका पवार, पोह/ किरण कणसे, अरशद अहेमद खान, गजानन राउत व पोकॉ / स. खदीर यांनी पार पाडली.

संपूर्ण नांदेड जिल्हयात विविध कार्यक्रमाचे आयोजन करून नागरिकांच्या भेटी घेवून सर्व शासकीय ईमारतीमध्ये तसेच सार्वजनिक ठिकाणी दर्शनीय भागावर भ्रष्टाचार विरोधी जनजागृतीबाबत तयार करण्यात आलेले पोस्टर, बॅनर व स्टिकर लावून जनजागृती मोहिम राबविली जात आहे.

शासकीय अधिकारी-कर्मचारी हे शासकीय काम करण्यासाठी लाचेची मागणी करीत असल्यास तसेच त्यांचे लाचेच्या मागणी संदर्भात पुढील क्रमांकावर नागरिकांनी संपर्क साधावा, असे आवाहन लाचलुचपत प्रतिबंधक विभागाने केले आहे.

पोलीस अधीक्षक संदीप पालवे : 02462-255811, मो. नंबर 9226484699.

अपर पोलीस अधीक्षक अशोक कदम : 02462-255811

पोलीस उपअधीक्षक प्रशांत पवार : मो नंबर 9359056840.

टोल फ्रि : 1064.

ला.प्र.वि. नांदेड दुरध्वनी क्रमांक : 02462-253512.

वेबसाईट : www.acbmaharashtra.gov.in

मोबाईल ॲप : www.acbmaharashtra.net

फेसबुक पेज : www.facebook.com/maharashtraACB

टिव्टर : @ACBnanded

इन्स्ट्राग्राम :  acb_nanded

युट्यूब : @Anti Corruption BureauNanded.

000000

 नांदेड जिल्ह्यातील अपूर्ण सिंचन प्रकल्प तातडीने मार्गी लावावेत – उपमुख्यमंत्री अजित पवार

मुंबई, दि. २८ :- सिंचनाच्या माध्यमातून शेतीला आणि ग्रामीण अर्थव्यवस्थेला चालना देणे हे सरकारचे प्राधान्याचे विषय आहेत, त्यामुळे नांदेड जिल्ह्यातील अपूर्ण सिंचन प्रकल्प तातडीने मार्गी लावण्याच्या सूचना उपमुख्यमंत्री अजित पवार यांनी दिल्या. नांदेड जिल्ह्याच्या सर्वांगीण विकासासाठी आवश्यक निधीची कमतरता भासू दिली जाणार नाही, अशी ग्वाही त्यांनी आज दिली.

नांदेड जिल्ह्यातील विविध विकासकामांचा आढावा घेण्यासाठी उपमुख्यमंत्री अजित पवार यांच्या अध्यक्षतेखाली सह्याद्री राज्य अतिथीगृह येथे बैठकीचे आयोजन करण्यात आले होते. यावेळी आमदार प्रतापराव पाटील-चिखलीकर, माजी आमदार मोहनराव हंबर्डे, माजी आमदार अविनाश घाटे, शिरीष गोरठेकर, लेंडी संघर्ष समितीचे अध्यक्ष राजू पाटील-रावणगांवकर, वित्त विभागाचे अपर मुख्य सचिव ओ.पी. गुप्ता, नियोजन विभागाचे प्रधान सचिव सौरभ विजय, गोदावरी मराठवाडा पाटबंधारे विकास महामंडळ छत्रपती संभाजीनगरचे कार्यकारी संचालक संतोष तिरमनवार, जलसंपदा विभागाचे मुख्य अभियंता व सहसचिव प्रसाद नार्वेकर, जलसंपदा (ला.क्षे.वि.) विभागाचे अधीक्षक अभियंता व उपसचिव महेंद्र कुमार यांच्यासह दूरदृश्यप्रणालीद्वारे छत्रपती संभाजीनगरचे विभागीय आयुक्त जितेंद्र पापळकर, नांदेड जिल्हाधिकारी राहूल कर्डिले उपस्थित होते.

उपमुख्यमंत्री अजित पवार म्हणाले की, नांदेड जिल्ह्यातील लोअर मानार प्रकल्पांतर्गत कॅनल लायनिंगचे काम, तसेच विष्णुपुरी प्रकल्पाच्या मारतळा भागातील कॅनल लायनिंगसाठी आवश्यक निधी उपलब्ध करुन देण्यात येईल. सिंचनाच्या माध्यमातून शेतीला आणि ग्रामीण अर्थव्यवस्थेला गती देण्याचे सरकारचे धोरण आहे. त्यामुळे नांदेड जिल्ह्यातील सिंचन क्षेत्र वाढविण्यासाठी अपूर्ण सिंचन प्रकल्पांना तातडीने गती देण्यात यावी. त्यासाठी आवश्यक निधीची तरतूद करण्यात येईल. तसेच लेंडी प्रकल्पग्रस्तांचे प्रलंबित प्रश्न तातडीने मार्गी लावण्याचे निर्देश उपमुख्यमंत्री अजित पवार यांनी दिले.

0000